SUANGTUAHNA KHAWVEL

*SUANGTUAHNA KHAWVEL*

✍..Rema Renthlei

        Ka ṭhianpa Khâwlromawia chu tleirâwl hrisel leh thahrui ngah tak mai a ni a. Mi pangngai leh ṭawng tam chi a ni, a insawi ang thlip thlep chuan awm bik lo mah se, a ngaihdânah mi che fel tak a niâwm e. Mizoram thingtlâng khaw pakhatah a lo piang a, chu khuaah chuan a pian niah chiah ka piang ve nghe nghe.

        Ka têt lai aṭang tawh a ka mi hriat ṭhan a ni a, kan inkawm ngai lem lo. Kan tleirâwl chhuak chho chu engtin tin emaw kan inkawm ngeih ta phian a. Eng thil mai pawh hi sawi nuam a ti em em vek a, sawi loh a hleih pawh a nei lo. Mi nun tlang tak a ni a, a rin tawh chu ring bur mai, a rin tawh loh erawh chu ring leh tawh ngai lo a ni thung.

         Têt lai chanchin sawi tawh chuan ho te a ngah thu te, insual a huai thu te a sawi ber ṭhin a. Mahse, a insual âwm reng reng ka hre ngai lova, mi dawihzep chu a ni lova, buaina a tâwk ngai hran lo, a rualpuite zingah hotu chan a chan âwm ka hre ngai lova, inhnialnaah chuan a pâwr pawlah vawihnih khat chu a tel ve tawh, mahse, a han sawi tak tak hi chuan keimah ngei nen pawh vawihnihkhat chu kan insual tawh a ni âwm e. Chutianga ka insual loh thu ka lo sawi zauh tawh chuan, ka la naupan êm avang a hre tawh loah min dah a, diktak chuan, kan pianni leh thla a inrual tih pawh a hre ve thovang. Mahse, a thilsawi leh ngaihdan te chu a ngheh ṭhin em avangin, ni a a hriat tawh chu atan chuan ni a ni ringawt mai.

          Mi ṭawngthei tak chu a ni lova, mahse, mi ṭawng duh tak chu a ni. A phuahchawp mai mai emaw tih lai hian a lo ti tak tak hman ziah a, a rei deuh hnu phei chuan amah pawh hian a tak tak emaw tiin a tak ang maiin a sawi leh ta ṭhin a. Mahse, ṭhianṭha leh mi ngaihsak peih tak, inpe pumhlum tawp mai chi a ni a, chuvang chuan keipawhin ka zah a, ti ti ngai reng sawi mah se, lo chawtak khuk pui hi ka ching tlat tawh a ni.

        Thu leh hla a tui a, mahse, a inngaih ang em em chuan a thiam fahran chuang lo. A thu phuah te hi min thawn reng a, a chang chuan a thu phuahte chu a bawl ve ṭhin hle. Mi thu ziah lo chhutzui sak(criticise) te hi a thiam a, a thu ziah te chu fakmawi sak hman pawh a ni lova, amah hian ṭha a tihtâwk ṭhin em avangin a thlirna aṭanga thlir ve turah min dah hmiah ringawt mai a ni.

       Vawikhat chu khawtlâng chanchinbuah 'article' pakhat chu a chhuah ve tawh a, a suangtuahnaa mi'n an fakzui nasat zia chu a sawi ṭha duh lo zawk. Amah hre ngai lo tan chuan a nuihzatthlak maithei a, kei chuan a nih nih hi ka pawm ṭhin dan a ni.

          Infiamnaah hian a pachhe em em a, eng infiamnaah mah hian a zei lo tih chu amah pawhin a pawm, mahse, inhnuaichhiah lam hi a tei thei ṭhak lo. Vawikhat pawh kan chowkidar-in, "Ball awmna lam apiang a tlán, ball tawk tlêm ber si a hah ber" a lo ti a ni âwm e. Ka ṭhiana ngaihdan a nih ka ring lo nghal a, engtik lai mai pawh a mi bâwl tum phet ṭhianpa Hmingtea'n a lo hrilh pek chu niin.

        Kan inkhelh lai, vaivut khuk luih luihna kar a ball inchuh zingah chuan ka ṭhiana hmel a lang vuaih a, kan referee kan chowkidar ke chu a bek velah hian a var phe zauh mai zawk. Ka ṭhiana chu a intitheiin a va insawi ropui leh dawn em ka lo ti roh rohva, tih ang tak tak chuan a han sawi leh chuan, chowkidar chu a zei loh chhuanlamin tlûk pah hian a ngalah a pet sak a, a tlûk hnu chuan a bekah a tlawh leh niawm tak a ni. Chumi ṭum erawh chuan a sawi dik ngei a nih ka ring, kan chowkidar mitko duk chur mai chu ka ṭhiana'n a tlawhna a nih ngei pawh ka ring. A chet dan chu a duh ang tak a nih avangin phuah belh ṭul a ti lo pawh a ni mah na.

           Naupang lehkhathiam thei tak a ni bik lova, phatna tur lah hi a hre thei em em mai lehnghal. Thu leh hla a tuipui em vang a ni a tih loh leh, a nun chu a buai ve hrim hrim a, thlarau lama a pachhiat vâng a ni a ti ve ziah a, mi'n thlarau lamah ka pachhia a tih miau chuan awih loh ngawt chi a ni si lo. Ṭawngṭai sak tur hian min chah sek reng a, min ṭawngṭai sak ta em, tih emaw, min ṭawngṭai pui vãng a ni, tih lam phei chu a sawi zui ngai lem lo.

         Inngaihzawnna khawvelah hian vanduai a inti leh em em a, pawlli kan nih khan ngaihzawng a neih daih tawh thu a sawi ṭhin. Mahse, a hmeichhe hming a sawi duh tlat loh avangin chu erawh ka awih sak ngai lem lo, kum sawm erh awrh emaw chauh a la ni lehnghal. A chhan chu pawlkhat kha a beinawn miauva, sikul luh hun pangngaia sikul kan luh chuan kan inpawl rual leh ta tho a ni.

        Mi hrisel leh thahrui ngah tak a ni kan tih tawh kha, mi tlawmngai thei tak pawh a ni. Vengchhungah pawh mi fak a kâi ve reng reng a, a pa hi khawtlâng parâwn a lo ni nen. Mi'n an fak derna tak hi chu a bengkhawn duh lova, mahse, a suangtuahna aṭang a mi'n an fakna erawh sawi a ching ta zawk ṭhin a, mahni han infak chiam phei chu a tlawmngai ve hle tho mai.

         Achâng chuan a nun dan tehnuaih chu ning ve hle hian a lang a. Lehkhapuanah hian, "Ka dan leh hrai" tih thupui hmang hian pâwl lian lo thurin chen zet a ziak chamchi ṭhin a. Chutiang hun a lo thlen chuan, a ṭawngkam hman ṭhenkhat emaw, a han hawi vel dan emaw, a inchei dan emaw, a kal vel dan te hi a thlâk danglam ve ziah a. Tar leh upa zawk te kawnga han tawh a, muang deuh det a kal a han kun zeuh emaw, hahmai lang vek a nui lova, han nuih deuh seih te hi a dan leh hrai a siam ṭum chuan a ching zual a. Engmah tak tak phei chu a zâwm rei ngai lem lo.

         Ahmanhmawh êm ṭhin vang pawh ni lo hian a kawngkal reng reng hi a tei vut vut mai a, mi'n fiamthu deuhva an sawi a hriat hi chuan, kal chak a ṭhat thu leh hnam puitlingzia a nih thu a sawi ve ziah a, chu phei chu ka pawmpui ve tho, thil pakhat ka pawmpui hleihtheih loh chu, tui in ṭeuh ṭeuh hi mipat lohnaa a ngai tlat hi a ni. Tui in hnem chu kan zirlai ṭanchhanin hriselnan hrim hrim a ṭhat thu sawi mah i la, kan mamawh tawk kan in tho, hmeichhe tih awm tawk lek alawm tihian a ṭang kawh ve tlat ṭhin. A inlâk pá kualna vel mai mai a ni tih chu amah pawhin a hriat ve tho ka ring ṭhin.

            Sipai ṭan a chak thu a sawi ve ziah a, a châk chhan lah hi a dang reng a. A châng chuan ama displine tan hrim hrim a ṭha a ti a, sipai ṭang tawh thatchhia an awm ngai loh thu a sawi ve ziah a, an hminghmerh a han sawi tur phei chu a hre chuang lo. A dawtah chuan an hlawh a ni leh a, sipai hlawh ṭhat tawh thu hi a sawi kham thei lo. A dawt lehah chuan indo a ni leh a, hmelma te nena inpawmchilh a inkah lam phei chu a ni chiah lo, chutiang indona kara nuih duar duar a, Vai sipai mangang leh thlabar tak tak kara mei han zuk hluah hluah te hi a sawi ve ziah a. A intih lâk pâ kualna vel vang niin ka hre ber ṭhin. Chu lo rengah, mei zuk a tum loh thu a sawi reng tho a, a thusawi tam tak hi chu a inluhthelh nuaih ṭhin ni ber hian a lang.

           Amah hi mi rilru nghet tak a ni kan tih tawh kha, kan miss pakhat a star deuh tlat mai subject, keinin a har a har kan tihah chuan mark a hmu hnem ber ziah a, kan sir pakhat, zu in ve zauh zauh ṭhin subject ah chuan a tichhe ber ziah thung, a hawrawp thleng hian a tichhia a, chungte chu a sawi nuam tihzawng tak a ni lawi si.

       Hnathawh ni a nih tawh hi chuan zirtirtute hian an kianga awm tur hian an duh em em ṭheuhva, amah a lo taima bawk si nen, chu chu sawi kher lova a intihtheihna pakhat a ni. Hotute kianga awm bik chu châk lo hmel fahran hian a lang a, amah hrechiangtu keia tan chauh tih lovah chuan, a châk tak tak lovang tih pawh a rin maitheih ang. Mahse, kei erawh chuan chutiang induhsakna chu ka ṭhiana tan mai ni lo, mi zawng zawng tana a lawmawm dan tur hi ka hrethiam a ni.

          Pawlkua a high sikul kan nih khan ka ṭhiana pawh kawng eng emaw ti zawng chuan hma a sawn ve hle a, uniform kawr leh kekawr han nawh bâkah, pheikhawk han nawh tlêt te kha a uar fál a, amah a intih uluk em avang hian inuluk ve lo turah min dah ngawt mai bawk a. Dik tak chuan midang te pawh chutiang tho chuan kan in uluk ṭheuh thova, mahse, a ngaihdanah chuan chutia a inuluk ṭhin em avang chuan ṭhian dang te hian an kawm peih lo a ti a, dik tak chuan amah zawk hian a kawm peih lo tih pawh a hre ve tho.

           Ralkhat ngaihzawng hi chu a nei ve reng ṭhin a, keipawhin ka nei thova, mahse, ka ṭhiana hi chuan sawi tur a hre bik a, engkim hmuhpui a hriatpuitu ka ni chung pawh hian ka lo hriat loh leh hmuh loh hi sawi tur a hre ṭeuh zel. A han sawi tak tak hi chuan hmeichhia chuan a mitsir ṭhin a, min mitsir a ni a tih tawh chuan hmeichhia chuan a nuih seih ṭhin thuin a zawm ziah a, chumi zawhah chuan hmeichhia chuan a duh ve ngei a a rin thu a sawi ta ṭhin a. A han zeldin tak tak phei chuan engti kawng emaw tak chuan hmeichhia chuan a ngaipawimawh tih hi a khaikhawmna a ni ziah bawk.

           Phulo hi ngah a inti em em a, mahse, a han sawi tak tak hi chuan amah phutu hi a hre chuang lova, pa hmelchhia a ni lo tih chu amah pawhin a hre thova, mahse, inngaihtlawm hi a vaw lian tlat a. A intih ngaihtlawm luât vang hian phulo ngah a inti vel mai mai niin ka hre ṭhin.

            Khawhar a tei thei ang bawk mahni ngaihtuahna kawm melh melh hi a chîng a, chung a thu ziah te chu a thuziah min thawn ṭhin tam takah hian a tam em em ṭhin. A ma'n a sawi danin thawnthu a ngaihtuah tlut tlut tawh chuan zanlai pawh nise a va ziah chhuah phawt loh chuan a muhil hleithei ngai lova, a muhil thei a nih pawhin zingah chuan a lo bo vek tawh ṭhin a, a nileng nun pawh a tihnual rawih ṭhin a ni a ti.
        
           Ni e, thu leh hlaah chuan a tui em em a, kutchhuak pawh tu hriatpui vak loh chuan a nei nual, mahse, keini ang bawk a thingtlâng chhungkua, khawsak harsa ve tak tan chuan engtikah nge chung a thu leh hla te chu a puanzar ve ang tih hian ka ṭhiana rilru chu a mawlh tlat ṭhin, lehkha zir tura fuihnan tak te pawh ka hmang ve ṭhin a, keini ang thova tleirawl hawklak leh ngaihsam a nih avang hian rei phei chu a phur zui ngai chuang lem lo.

          A suangtuahna tam tak te hi chu thil ni thei aṭang a ni thei lo pui, a suangtuahna ṭâwmpui erawh chuan niâwm tak lawi si te hi a awm nuk a, a suangtuahna khawvela a chên nasatzia a tilang chiang hlein ka hre ṭhin. Chung zingah chuan CIA secret spy a nih thu a ziah te kha a ropui hle nâ chu, rokhawlhna avangin ka thai lang thei lo tlat.

            Tichuan hun a kal zel a, kumtawp a lo hnai ta. Vanduaithlãk takin ka ṭhian, a suangtuahnaa spy ropui tak mai ni ṭhin chuan a mission fail-in pawlkua chu a beinawn ta rup mai a. A tirah phei chuan a hnual hle a, a chhungte leh zirtirtute beiseina a tihchhiat thu a sawi a, dik tak chuan, a lehkhazir dan ngaihtuahin a lakah beiseina an tihsân viau a rinawm loh. Mahse, ṭhianṭha ber a nih avangin ka han hnêm ve ngial a, chutia han inhnem chu a tlawmngai leh a, engmah a nih loh thu leh a ngaihtuah loh hrim hrim thu a sawi leh ta tho mai.

              Hun a kal leh deuhva, ka ṭhiana nun chu hmeichhe pakhat hian a rawn pawlh buai belh leh ta a . Chu nu lah chu a hmelṭhain mi han biangbiak vel dan a thiam si. Ka ṭhiana chuan a rilru zawng zawng a pe leh lo thei lova. Chu nu lah chuan thu han phuah vel te hi a tui zêk a, an inlungrual thei ta phian a. A rei deuh hnu phei chuan an thu phuahte an inthawn tawn a, a suangtuahna zawng zawng chu, chu nu lamah chuan a luanglût vek a, a hlimawmin ka ṭhianpa han phur lutuk hmel vel chuan keipawh min tihlim ṭhin hle. Khang hun lai kha ka ṭhiana hlimnain a tawng san lai ber a nih ka ring ṭhin. Kumte a lo vei a, pawlsawm ka pass hnuin khaw dangah zirna sâng zawk umin ka awm a, ka ṭhiana pawhin pawlkua chu ṭha takin a pass ve leh ta a ni.

         Khaw danga ka awm hnuah pawh ka ṭhiana nen chuan kan la inbe pawp reng a. Lehkhate pawh min la thawn reng a, a lehkha te chu fiamthua inkahna lam leh thu hlimawm lam te, lungchhiatthlãk leh ngaihtuahna tithui thei lam te a ni deuh ber ṭhin. Thil pakhat ka la hriatreng chu, a bialnuin a hming, Khâwlromawia tih chu an phuah chhan leh eng lam hawi a phuah nge a nih tiin a zawt a ni awm e, amah ka ṭhiana'n lehkhaa a rawn ziah angin. "Min zawh tirh chuan keipawhin ka hre bik lova, tuman chutianga min zawh âwm pawh ka hre chuang lo. Ka han ngaihtuah mai mai a, kan khuaah hian ka pu, ka pa pu kha buhherkhâwl nei hmasa ber a ni a, tun thlenga kan la inrochun zel vang hi a niang ka ti ta ngawt. A hrim hrimin khâwl leh romawi tih hi chu a inchawbe chiah lo a ni, mahse, Mâwite tia min koh ṭum hi chuan ka eih nêm ve ṭhin khawp mai" a ti.

             Mihringnun ka han thlir châng hi chuan engkim mai hi a chiang lo em em vek a, kan duh dan thlip thlepin thil a thleng ngai hek lo. Ka ṭhiana nunah pawh hian a duh ang hlirin thil a thleng bik lo. Nikhua a lo rei leh deuhva, ka ṭhiana nen pawh kan inbe pawp khát tulh tulh a, lehkha pawh min thawn khât ta hle mai, keipawhin ṭhian tam tak ka chhar a, ngaihzawng te hial ka neih leh takah chuan ka ngaihsak lutuk ta lova.

           Vawikhat chu ka ṭhiana chuan lehkha min thawn tawh ho zawng zawng kha min rawn dil tlat mai a, lehkhabu puitlinga chhuah mai dan awmin a hria a ni. Chumi tur chuan an sawhthing hmun zau tak mai chu a ring tawk a, a chhûngte pawhin an phur pui hle a ni awm e. Ka ṭhiana chuan a ṭhiannu chu bem ve mai a duh thu thlengin min hrilh a, ni e amah hian a ngaizawng em em ṭhin a, mahse, a hmeichhiain a ngaihdan erawh a chiang ngai lo thung. Lehkha hmanga a duhthu hrilh tawp mai chu a duh tawh a ni.

               Kum tawp a lo thlen chuan a tum dan angin engmah a thleng ta lo, a sawi dan takin chu kum chu atan chuan kum malsawm lo leh duhawm lo lâwt lak a ni. A hmasa berah a bialnu a bem-na chu chhân a ni lo, a hnu chawlhkar hnih hnuah ṭhian ang chauhva in en a duhthu leh ngaihzawng a neih hrim hrim thu a dawng leh, pahnihnaah chuan sorkar tlachhia avangin sawhthing rate a awm lova, a awm leh hun tur hriat a ni lo. Pathumnaah chuan pawlsawm a fail a, a chhungte chuan a beihnawn leh pawhin position ṭha tak a neih loh chuan zir zawm zel a harsat tur thu an hrilh a, unau zinga a upa ber a nih avângin lehkhazir zel chu a harsa dawn hrim hrim tih chu a hre tlang vek a, mahse, eng emaw tak nih a lo tumna, a suangtuah ve ṭhin te kha a thleng dawn lo tih min hrilh a, mawhphurhna hlenchhuah tum tlat ṭhin ka ṭhiana chu buai ta nuaih hian a lang a.

            Pawlsawm chu a beinawn leh a, ka ṭhiana chu a reh zui ta vang vang a, phone a khawih tawh ngai lova, lehkha pawh min thawn tawh ngai lo. Keiman a ka biak hi chuan a zirlaiah a insawrbing hle tih min hrilh ṭhin.

               Vawikhat chu ngaihzawng thar a chhar thu min rawn hrilh mauh mai a, chu hmeichhia chu a duhthusâm ṭhin ngei kha a nih thu leh hun nuam tak tak an hman thu te, rawn pêm thar an nih thu te, an in awmna thlengin min hrilh dap a, a hnuah phone hmangin chipchiar mangkhengin min rawn hrilh leh a. Phone top-up ren reng reng a khawsa ṭhin khan a balance zawh ṭhak thlengin min rawn bia a, ka haw veleh min hmuhpui a tum thu pawh a sawi a. Engkim mai chu a chian em avangin keipawhin ka phurpui a, ka lawmpui thu te pawh ka hrilh mawlh mawlh a.

            Chu hmeichhia, Angela a tih chu atan a hun lunglenthlak ber mai, tlai lam ni tlak dawn a, kâwl a en phût laiin a kiss a ni awm e. Ka ṭhiana'n hmeichhia a kiss chu thil lawmawm tak a ni. Hmeichhe kiss dan tur kha a lukhamah khan a practise nasa ṭhin em! Krismas a ka haw loh avangin, nipui chawlh huna haw thuai thuai chu ka châk tawh hle a.

          Nipui a rawn thaw a, engthâwl taka kan khuaa haw mai chauh ka hmabak ta. Ka ṭhiana te pawh an exam zo tawh niâwm tak a ni, a exam chungchang ka zawh zawng zawngah te khan a chhân ṭhat thu leh, position ṭha tak aneih a rin thu a sawi a, ka ṭhiana tan chuan kumṭhat kum a nih ka ring ve tawh hle.

         Kan khua chu ka thleng ta, chhuatlâiah ka bag ka thehthla tawp a, ka nu chuan,"Tunah khawiah nge i kal dawn? Thingpui te in phawt rawh, inbual phawt la." A lo ti a, kawngkaa chhuah pahin, "Rova ka hmu nghal dawn, ka rawn haw lehnghal a ni mai" ka ti a, Rova te in chu ka thleng thla thuai a.

            An in a ka luh chuan a room-a a dawhkanah ngawi rengin a lo ṭhu a, a melh ngai chu a lo melh leh tlawk tlawk tawh a. Min hmuh chuan a meng kâwk kâwk a, min kuah vel chung chung a, a hah hmel hle a, kawr bâl zet, hnathawh kawr hi a inbel a, a rim pawh a tui tang lo, a lu a bukin a hmuihmul pawh fai lo deuh hian a mêt a. "Eng nge i thawh ṭhin a, va inbualfai rawh, tihtur kan neih kha" ka ti lûng lûng a. Engmah phei chu a sawi chuang lova, a dan leh hrai a zawm leh tawh ang a, eng amah hmaa han ṭawng tuitam duah kha ṭul a ti leh tawh lo a nih ka ring a.

          Phur fe hian bualinah chuan a lût a, a nu chuan min be luam a, an chhungkaw boruak rit hmel tak leh keia thawveng hmel lutuk chu a in mil chiah lo tih ka hria. A nu chuan, "Eng nge tihtur in neih chu, eng nge a hrilh che?" a ti a, kei chuan, "Engmah ni lo ve, nula kan chhûn rim dawn a niang" ka ti liam mai a, mahse, a nu chu a thu tak angreng hle a, a farnu chuan, "Tu nula nge a sawi a?" A lo ti thuai a, kei lah chuan ka sawi ṭha duh lo kual vel a, min zawh ngun tak em avangin, "Ka hrechiang bik chiah lo, Angela a tia" ka han ti a. Chutah a farnu chuan "Angela" a ti ringawt a, a mittui chu a parawl kiang a.

            Ka hamhaih viau mai a, a nu chuan, "Nuna, i ṭhianpa chhuahpui lo mai rawh, a chanchin hi hriat pakhatmah i nei lo zawk a mi?" A rawn ti a, kei lah chuan, "Hria e, mahse, tihtur a la neih chuan ka tihpui mai ang, a phur ve sia." ka han ti leh ngawt a. A nu chuan, "Nuna, i ṭhianpa hi i hriat ṭhin kha a ni tawh lo, Angela tih hming hi kan tan thil thar a ni lo, Angela chu a awm reng reng hleinem" a tih lai chuan ka lo pawtchat a, "Min bum tihna a mi?" Ka lo ti a, a ni chuan, "Angela chu a suangtuahna mai a ni, he khawvelah hian a awm reng reng lo, rawn pêm thar an awm lova, engkim mai hi a duhthusam ram vek a ni tawh," a thaw halh a, "I ṭhianpa hi mi â a ni tawh" a ti ta a.

             Chumi a sawi lai a mak ka tihzia chu mak zawk tak a ni. A nu chu an exam chungchang kha ka zawt a, a ni chuan sikul a chawlhna a rei tawh thu a sawi leh a, engvanga engmah min hrilh ve lo nge an nih tih leh, Phychitrist an pan leh pan loh ka zawt a, a nu chuan, "Phychitrist chu kan pan alawm, mahse, rilru doctor chu mi a doctor a ni si lova, a lo tlâi tawh a ni. A ât chhan hi depression nasa leh amah natna a insiam chawp vang niin a sawi a, mahse, mi a dahna a dah kan tum lova, tihian kan inenkawl chho ta a ni, i nu ten engkim an hrilh che kan ring a" a ti ta a.

              Ka lung a âwi thei lo, ka lung a chhia a, ka thinrim bawk si. Ka ṭhiana inbual zo rawn chhuak chu ka en a, ka lung hi a âwi mawlh lo. Ka ṭhiana hnenah chuan dâwt awmze nei lo ka sawi ka lo rin ngai loh chu sawiin, "Ṭhiana, Angela-i te chu nichin mai khan an chhungkuain khawiah emaw an zin dawn a niang, motor-in kan tâwk a" ka han ti a, min hniâl emaw, a awih loh emaw chu ka la ring ru viau nâin, "Ni dawn tak, a sawi alawm, i hmuh hrim hrim chuan a ṭha mai, a hmelṭha i ti viau lo maw?" A ti ta a. Chutah zet zawng engkim mai chu ka awih a ka awih lohvin kori a tu tawh lo tih ka chiang ta hle. Kei chuan, "Tirawh i lu te kha met i la, i hmuihmul te kan ziat fai ang a" ka ti a, mi intichékngel tak a nih ṭhin avang khan a lu kha kan mêt rei ṭhin hle a, mahse, chumi ṭum chuan a dawh hle hle a, a hmuihmul thleng mai chuan ka met vek a. Chunglai zawng zawng pawh chuan tumah kan ṭawng lova, ka tih ang ang chuan a awm tawp mai a ni.

                  A lu chu kan mêt zova, intifai turin ka tir leh a, chumi chhung chuan a nu chuan, "Nuna, a lawmawm hle mai, i inbual tirin, i met fai thei a, kan tih fêt loh chuan a duh ngai lo asin" a ti sap sap a. Ka ṭhiana chu a rawn chhuak a, a nu chuan, "Bawiha tirawh i hnathawk i châu ang, rawn mu hahdam rih rawh, nang pawh Nuna, haw tawh rih mai rawh, i rawn lêng leh zawk dawn nia" a han ti a. Thuawih tak chuan a mutna tura an siamah chuan a mu ve mai a, kan inmangṭha ta rih a. Engvangin nge a nu khan hnathawk chau tak ang a achhuah tih ka ngaihtuah a, ka hriat leh danin an in a ka luh tirh khan eng nge a thawh ṭhin tih ka zawt a, a hnathawh avâng chuan inbual turin ka tir tlat a ni.

           In a ka haw chuan ka lungawi loh thu hlir ka sawi a, chanchin engmah min hrilh ve loh avang chuan ka chhungte chu ka dem a, ka titau reng a, ka vei tawn sek mai bawk. Ka chhungte pawhin an thiamloh a ni tih bak chu sawi tur em em an hre chuang lo, chawei lai chuan ka nu chuan, "Têa, i ṭhianpa chanchin chu engkim a chhungten an hrilh che kan rin vang a ni pakhat a," a ti a, ka lungâwiloh thu ka la sawi tho mai.

             Chu nipui chawlh chu ka tum ang reng rengin ka hmang ta lo, ka ṭhiana lah chuan ka awm leh awm loh pawh a ngaihsak lova. Ka hmel a hmuh hi chuan rei tak chhung inhmu tawh lo ang mai hian min la lâwm thei reng a, eng emaw chenah chuan ka lung pawh a awi ve. An in a ka kal hnuhnun ber chu khawpuia ka kal leh hma zan a ni a, a nu chuan mittui tla ṭeuh chung hian, tihian min hrilh a, chutih lai chuan Rova chu a nu mal chungah a muhil a, a nu chuan, "Tunah chuan i ṭhianpa Rova chuan mi pangngai a pha ta si lova, a takram aiin a suangtuahna ram chu chên nan a hmang zo tawh a, mi khawngaihthlâk tak a ni. A suangtuahna ram lalnu Angela a tih hian a bual â zo tawh. Aw..Angela chu han awm tak tak se, akiang a hruaia han hmuhtir ka va duh em.." a ti vawng vawng a, ka rilruah hian a thi thei tawh ngai lo.

                   Suangtuahna hian a châng chuan awmzia a nei lova, a châng chuan a takram aia nuamah min chên tir veng veng thei ṭhin, mahse, mi pangngâi tan chuan suangtuahna ram mai chauh a ni tho tho. Ka ṭhiana chuan a nun leh a suangtuahna ram chu a chawhpawlh ta a, chu chu mi beidawng, dawihzep leh khawvel tak hmachhawn ngam lo, suangtuahnaa khawvel thar din ta leh chuta chêngzui ta ṭhin te kawng zawh ṭhin a ni.

             Tunah chuan ka ṭhiana chu he khawvelah hian a awm tawh lova, natna eng emawin tlâkbuakin a thihpui ta a ni. Tunah chuan a duhthusam ram aia nuamah a chêng tawh ngeiin ka ring, a thu min thawn pakhat ka la hriatreng chu, vanram nawm tur zia leh vanram awm dan tur a ziak chamchî a, ngaih mai chuan nawm hmel tak a ni, mahse, a tawpah chuan tihian a tlâng a kâwm a, "Ṭhiana, vanram chu a nuam em em ang tih ka rinna chhan chu maw, tuna ka han sawi tâk te khi mihring duhthusam mai a ni a, hei ai hian Pathian thil tum chu a lét eng emaw zat a a ropui dawn avangin vanram chu a nuam em em ang tih ka ring." tiin.

            A thih hma khan a thuziah zawng zawng te chu dah sawn a phal lova, ken reng a duhthu a sawi bawk, a thih chuan kum tam tak a lo buaipui tawh, a thu phuah, amah hriatrengna lunphun pawimawh tak pakhat tur chu an phûm tel ta daih a. Ka ṭhianpa chanchin lungchhiatthlâk tak mai avâng hian he kan chênna khawvel lo hi chu, thihhnu piahlam ram a nih ngawt loh chuan chênna ka nei hrih lova, kan thih hnu pawh a, a tak tak ram chu kan thlen theih nan tuna kan nun hi a hlu a, hei lo chu nun dang kan nei lo.

    - A Tawp Ta -