"KA TIL I RAP A NIA!"
(TV Bihthlâk Zan)
© Chhantea Pautu
Hualtuah TV nei kha pahnih khat bâk an la awm lo.
In pakhatah khan kan han en dawn a, luh an lo phal lo va, kawngka an kalh hmiah mai si. Kan en châk chu a zat hian kan za zek zek a; tichuan, bang chhak lamah phun ru sur sur chungin kan tleh chho huk a, a awng awmchhun chu kan inchuh nghal thut thut bawk. A â ber, Isak-a pui roh chuan, a awng chu a chang ta roh khang lang a; ka ke a la rap zui. Salaah!
Chutah, kei chuan, awng siam chawp tumin dim thei ang berin bang dâp chu ka han ulh ngar ngar a, a tliak ri rep a, TV ka en ve thei chu a ni ta reng mai. Pawn lam, kawmchhak leh kopang inkar chep tak aṭang ngeiin kan bihthla a.
Mahse, ngaiteh, thil khawlo tak a thleng ta. Remruata chuan ka tih dan thîkin bangah awng siamchawp a tum ve ta ringawt a. Kei angin a thliak dim ve thiam si lo, pawp hawk khawpin bang chu a han thliak ri rawp mai tehreng a; hepa hi chu tunthlengin, Pune lama a awm hnu pawh hian a pa mawl tluang zel.
Ka bihna bang awng aṭanga a lan dan chuan, khatia awng chiang deuh taka Remruata'n bang awng a siamchawp tâkah khan, in-chhunga a neitute kha kan lam hawiin an rawn hawi rual ṭhup a ni ber mai.
Chutah le! Inthurual sa ang hrimin, a mak a maka rual hian kan ri suau a, bang leh kopang inkar chep tak karah chuan tlan chhuah tumin kan ri huk a, kan sawi ber hriat si loh hian kan ṭawng noh noh a, thim zingah lehnghal, ramhuai note chetla te pawh kan ang deuhin ka hria; chuti ang hmun chep kara mi panga ngawt chhuah hmasak inchuha han tlan ta huk chu, kan inhnawh tawt a, kan tlu-sai-kalh ta rum mai a.
Ngal leh ngal, bân leh bân chu a inkawkalh ta ṭuk mai a. Kei chu ka têt deuh bik avangin ka tek chhuak nalh a, hmanhmawh baklengin kawngpui lamah lo zuk tlân thlâk ka tum a; mahse lei lamah thil khawlo tak rah tur a lo awm chu niin, chu chu, fafu(vaimim eina hnu) hnawng chep chawp hi a lo ni a. Ka ke a kang lawp a, ka duh aia chakin TV neitute veranda lamah ka thlâwk thla fua a; chutìh lai tak chuan in neitupa, pa lianpui mai chuan kawngka a rawn hawng ta chiah mai si. Amah chu ka ngaih vang ni miah lovin a 'eng lo' zawn vela ka hmai phumin a bawp pahnih chu ka zuk kuah ta chawt a.
Khûk chem chem a, khûk ral daih ka va han châk tak em! Kan chhakah chuan, ka thiante pawh chu an la ri hut hut bawk a.
"Ka beng i rap!" tihte,
"Khawng nge ka lu!?" tihte,
"Ka ngal i kalh!" tihte chu a ri nawk nawk a.
Chutia, in neitupa 'englo' zawn taka ka hmai ka phum a; a nihna takah chuan ka nawr tawm sak deuh tâwk avanga ka zah chem chem lai chuan, ka thiante zingah, tu aw ber nge tih pawh hriat loh khawpa ṭe ṭial ruan ruan chuan, "Awìah...awiah...ka til tung'e rap...ka til i rap a nia...rap tawh suh u...duh tâwk tawh rawh u...!" a rawn ti rak ta ruai ruai a.
Tumah tal chhuak thei bik si lovin, tal chhuah tum ṭheuh bawk siin an la che luih luih a. Ka han en chho a, a châng leh, Chhuantea lu chu Nundama mawng zawnah a awm a, a chang leh Rinzuala mit chu Richhunga kap zawnah a awm a, a chang leh Rinzuala beng chu Richhunga'n leiah a rah chilh a. An tal luih luih mai a; an bân leh bawp kha eng ti tiha inkalh khawlo nge tih ka hre thiam pha ve miah lo. Mak ti takin ka han en a, kei lah ka tek chhuak nalh thei tho si; mahse khatih lai khan a nuihzatthlak loh hle a nia aw.
A tawp a tawpah chuan ṭhiante chu kawrkilh inphelh huang leh thaw sa thlan tla phungin an rawn ding chhuak pawr pheng phung a. A ṭhen, na tuar ṭhen chak chak hmel, a ṭhen, inthlahrung hmai hmel dû mai leh hmai sen sêng sûngin an rawn ding chhuak a. Chhuantea kawrkilh pathum a tla.
Kha til neitu pawh kha ṭhen chak chak pahin a la kun ta ai ai a. He zan, TV bihthlâk zan chu zan fuh lo tak a ni. In neitupa chuan min han en kual diat diat a, a meng rum ul a, a hlauhawm em em mai a. Mahse, kan beisei loh deuhin a nui ta ruh ruh roh a, "Lo lût rawh u," a han ti ta hlauh a.
Rinzuala'n, "Iasss..." a lo ti hmanhmawh. Inneitupa chuan a melh rulh a, Rinzuala chu a ṭawng a tawp ta chawt a, inthlarung tak, phur ru tak chungin kan lut ta dial a...
Comments