RÛL A NIANG!
© Chhantea Pautu
In hlimpui lo a nih pawha in lo ṭahpui tâk mialin kan lui kal zân, Pa Mawia tâna zân khawlo tak chanchin ka han sawi teh ang.
Zân lamah lui ka kal ve fo a, chêt fuh loh ṭum leh hlawhchham ṭum pawh ka tawng ve fo. Kawng han bo that that te, ruahin min nan tâk hrep te pawh ka tawng ṭhin; mahse khami zân, kan lui kal tum anga ka mak em emna kha ka tawng leh tawh miah lo. Ka hlauh dàn em em leh ka dàwih dàn em em kha a mak a, ka khawlo hle a ni! Tun hnu-ah erawh khati ang em emin ka dàwih ta lo.
Favang khûa a rawn thengthaw ṭan tir, Mîmkût Thla chawhnu lam leh Khuangchawi Thla hi Zokhaw lama awmte tân chuan 'Chakai Meichher Chhit' hun a ni. Aikam lian pui pui leh bawppui hrawl pui pui han hum kamki ṭûn mai chu nuam thei tak a ni ringawt; vawikhat phei chu ṭin thum dawng Èm khat kan man nghe nghe asin!
Ka pa hi Health Department-ah a thawh ve avangin Health Worker rawn awm thar apîangte hi kan lo pawh em em viau zel a. Tumkhat chu Chhiahtlâng lam mi Health Worker, lui kal peih tak mai hi a rawn awm thar a, chakai chhit turin kan kal dun ta a; naupang, râwlthar ve ṭêp mai kha ka la ni a.
Kan khaw dâi maia luite pakhat, 'Tuipawl Lui' kan tih chu chhuk zawngin kan zawh thla a, chutih pah chuan chakai chaw, buhfai kan hmui kan chah thla pah zel bawk. A lui a chhengchhe khawp mai a, chho zawnga kal kài zung zung phei chu keini ang naupang tân chuan huphurhawm tak a ni ve.
He luiah hian Rûl a tam em em mai a, a bîkin Rulmuk hmun a ni deuh bîk! Naupan lai chuan rul hi ka hlau theihtâwp a, min chuk se ka thih ka ring ngawih ngawih ṭhin! Kan chhuk thlâk lam ringawt pawh chuan Rulmuk pahnih kan hmu nghal pang a, kei chu ka ṭi sâwt hle mai bawk. Ka rilru chuan, "Rul...rul...rul..." tih ringawt hi a ngaihtuah tawh a.
Kan chhuk zel a, lui mawng khâm ko kan thleng thla ṭêp tawh tih chuan, kan dinglam sirah thawm 'hraw' ang reng tak mai hi a rawn ri phut mai a; kei chu ka phu chîang ngang mai. A eng a mah hmain, "Rûl a niang!" ka'n ti nghal ngawt a.
Ka kalpui pa chuan, "Ramsa a nih kha, a tlan phei zeuh pawh ka hmu reng alawm," a han ti a.
Ka ngaihtuahnaah chuan thil dang a leng tawh lo, thil dang a ni thei lo; thawm rîkna lam kha ka han en vang vang a, "Ka awih lo...rul a niang!" ka han ti leh ṭâlh a. Ka kalpui pa chuan min han en a, ka hmêl a hmuh chuan a nui ta vur vur a; kei chu ka nuih a za miah lo, rul a nih ngei ka ring tlat.
Tichuan kan kal thla zel a, kan innghahna tur khâm ko kan thleng thla ṭêp ta. Ngaw hnuai a nih avangin lui ruam chu a thim chhulh tawh a, ka ngaihtuahna chu Rûl hlir a la ni tho! Chutah, ka hmaa kal ka kalpui pa chu lêngkir ang reng, sâng vak lo koah hian lung nalah a tawlh thlu palh ta hlauh mai a, a hnuaiah chuan a tawlh thla tlang a. Chutia a tawlh thlu chu a ri deuh phut mai bawk si, kei lah Rûl hlir ka lo ngaihtuah lâi a ni a, ka phu zuk a, nasa mangkhengin tawite ka rak thawt a, lui hnar lamah ka per chho dawrh mai a, ka chakai chawhchah tur ken chu ka theh per ur ur bawk. Chu lêngkir ko aṭang chuan inchhûng dûng chen zeta hla ka lo per chho hman a.
Thaw hluam hluamin ka han ding a, Rûl thawm bawk chu ka ngâichang leh ta a; mahse thehmeh ang maia a reh tâk avangin muangchangin lêngkir lam chu ka pan thla a, ka ding leh vei, hmalam leh hnunglam chu rul hmuh tumin ka melh tawn thla sek a; mahse a vâng ang reng khawp mai.
Lêngkir ang reng koah chuan hlauthawng takin ka zu dâk dêk dêk a, ka kalpui pa chu a lo zi ṭhalh ṭhalh a; a ngal char tak hi a sawh a ni mai thei, a lo chûl hauh hauh a.
Kei chuan ṭi dêk hian, "Ngati nge aaa...Rûl ami!?" ka zuk ti a.
Ani chuan ṭawng pawh ṭawng lo, nuih pawh nui chuang lo hian min lo en reng a, a ngal na chu a chûl leh ta daih a.
Min chhân lawk loh avangin, "Maw...rul ami!?" tiin ka'n zawt nawn leh hrâm a.
Ani chuan lungawi hmel vak lo hian, "Ka tawlh thlu a nih kha...khawng'e i kal daih?" a lo ti hlur a.
Kei chuan, "Ka awih lo...Rûl i rap a niang!" ka lo ti leh a.
Ani chuan, "I va han nêp tak. Ka kalpui tawh miah lo ang che. Kal ang," a ti hmuk a, kei chuan ka zui ta hnà hnà a.
Khâm ko chu kan thleng ta a, mei chhemin khua kan nghak thim te te a; ka ngaihtuahnaah chuan Rûl a cheng reng a, a reh thei lo. Kan bul vela ngaw hnuai thim mup maite chu ka han en kual a, mei êng chin leh chin lohah chuan rul chu ka zawng pah zel a. Chutah eng emaw ni hi a rawn hrâm tuarh a, chutih pah chuan kan chunglam thing lerah sava thlâwk ri a ri phurh a, ka phu chiang lutuk chu mei zuan kánin ka zuang tharh a, ka kalpui pa kapkarah tak ka han ṭum tharh mai a. Ka kalpui pa lu chu ka vuan titih, ka kuah titih a, "Eng'e aaa...Rûl ami!?" ka ti nghal bawk a!
Ani chu, thu kâr suah chunga hnai set sawt a mei lum aiin, kap hem siaha ṭhu a ni a; chutia ka zuang chho tharh mai chuan thing tuah lai ka rap per a, meisi a lêng chum chum a.
"I va han dawihzep tak! Sava a nih kha sava..." tih pahin a sir dinglamah ka kalpui pa chuan mi nam kat dawrh a.
Kei lah a rang a rangin mei êng lamah ka lêt leh vat a, "Rûl a niang!" ka ti leh a!
Luikal dun e ti lovin kan inbe ta mang hlek lo mai; ka inthlahrung tawh em em mai a, ṭawng pawh ka ṭawng ngam tawh lo. Ka kalpui pa, ka pa rual zet chu ka melh hrek hrek ngam chauh tawh a; mahse rilru zau tak a nih avangin rei lotê bâk a hmêl hmuh a hrehawm loh hlauh.
Lui zawh chhoin Chakai chu kan dap ṭan ta a, thui vak lo kan kal hnu chuan ka kalpui pa chu a kûn zauh zauh ṭan a, chakai a man a ni ngei ang. Kei erawh Rûl ringawtin min la luah khat a.
"Chakai kha man ve ta che."
"Rûl a awm ang."
"A va han buaithlâk tak...khu, khu lâi li chhunga dum khu i hmu em? Zu man rawh."
"Ka duh lo...Rûl a niang."
Min tur luih fê hnu chuan li chhunga thil dum chu ka zu man a, Rûl a lo ni lo!
Chakai na na chu Rûl ka hlauh angin ka hlau lo ve ang reng khawp mai. Ka man ve zeuh zeuh tâkah chuan nuam ka ti ta em em a; lui khawkrawk tih takah chakai an lian si, an bawppui a hrawl si, ka Rûl ngaihtuahna pawh a nêp ve hret hret. Lui chanve vel kan zawh chhoh thlen chuan rul ringawt lo deuh pawh ka rilru-ah a awm ve tawh a ni.
Mahse thil vanduaithlâk a lo thleng leh ta! 'A va pawi tak a niii...!' Ko sâng vak lo aṭang hian a hnuai li sei zêtah tui a khawh thla per seng seng a, chuta Aikam hrawl zet zet pathum mana ka kalpui pa a kùn kât kât lâi tak chuan a ke pahnih inkar, tui chhûngah hmuh ka nei! Rûl a ni! Tuirûl!
"Kha...kha...kha...i ke bul a kha...a seh dawn che nia...!" tih pahin vaukam lam panin ka tlânchhe ri buan buan a.
Chutah, ka kalpui pa chu a rawn hawi zuk a, "Eng maw...eng maw!?" tih pahin vaukam lam pan chuan a'n tlân ve ta buan buan mai a. A hmanhmawh lutuk chu a pai nawk nawk a, hreh hmel zeta phar uan uan chungin tuiah chuan a tlu bawkkhup ta bawrh a. A hmêl chu hmuhnawm ve mai mai fû a ni! Kei lah chu vaukamah ka ding fel thân tawh a, a tlûkna lamah a maubati ken tuiah a chiah hlum a, a rawn tho huh hluam mai chu(h); meng nêm lo tak hi a ni ringawt!
A tlu lai 'pawsi' chu a nalh lo êm avang leh a tlûk chian em avangin ka nuih a za ta tlat mai a. Nuih chi a ni si lo, ka insûm ṭang ṭang a, ka hrawk leh thin, pum leh ka 'englo' thlengin ka îp mar ṭang mai a; a za si, pakhat a thinrim hmel si, a tâwpah chuan ka insum zo dawnin ka hre lo va, lehlam, thimtham lam ka hawi a, ka ṭhen khur ta ngar ngar a!
Ka hnunglam aṭang chuan, "Eng'e...min seh tur awm a...khatia i au chîam a...hei, tinge khatia i awm...!?" a rawn ti...
Kei chu ka la hawi lêt lawk hman lo va, ṭhen zawh phawt kha a ngai a ni. Naupang mah ni ila, râwlthar ka ni ve ṭêp tawh a, thil kha ka man thiam ṭan tawh. A tâwpah chuan ka hawi lêt thei ta hrâm a. Amah lah chu a lo la ding dir tluk tluk a, a huh chiang ngei mai!
"Eng'e li chhungah khan awm a? 'A seh dawn che' i rawn tih chîam a...!?" tiin min han zâwt nawn leh a.
Ka chhâng huphurh kher mai; kha thil kha hmu ngei chuan ka inhre si, a dum leh a vara ṭial a ni a, a sêi hle bawk. A hma khan, "Rûl a niang," ka lo ti ngun tawh si a, chutia han tih leh pawh chu ka inthlahrung tawh em em a . "Satel a niang," tih daihte ka duh a; dâwt sawi ka duh bawk si lo. "Rûl a niang," han tih leh ai chuan, "Thereng a niang," han tih daihte pawh ka duh daih zâwk; mahse dâwt sawi ka hreh êm avangin, "Rûl a niang," ka ti leh ta nge nge a.
Ani chu a rûm nghut a, "Rûlin mi a seh ngai em ni? A chuk ṭhin!" a ti hmuk a, a inher vut a, a maubati chu a han chhi leh te te a, kal mai a tum lâi tak chuan vanneihthlâk takin, 'a niang' tih ringawt lo deuha ka thu sawi ti rintlâktu tur thil ka hmu ta!
Li sir lam chu ka han kâwk a, "Pa Mawi, saw...saw...ta saw...rul...rul...rul..." ka ti a.
Pa Mawia pawh chuan a hmu ve nghal a, patling tih takah a chempui a phawrh a, a va sât hlum ta a ni. Ka thaw huai a, ka inthiamlohna pawh a kiam dawk mai; mahse ka ṭit phah leh zo vek tawh!
Kan kal leh ta zel a, kal thlâk lama chhuk deuh, fimkhur taka kal a ngaihna lai kha, chhoh lam chuan chho deuh, fimkhur taka kal a ngaihna lai a lo ni a; chuti lai kan han thlen chuan- Pa Mawia chu a kal hmasa a, fimkhur takin a kal a, "Fimkhur rawh aw, i tawlh thla ang'e " a ti pah reng bawk.
Fimkhur takin chho sâng chu kan han kâi dun a; amah a chhuak chho ṭêp tawh tih chuan keimah bawk chuan thil nêm nuak hi ka rap leh ta tlat mai! Rûl ngei a ni chiang lutuk! Sawi mumal pawh nei chuang lem lovin lui ruam ngaw hnuai, zân reh ruihah chuan ka'n râk ta tak tak mai a, "A nuuu...a nuuu...a nuuu...!!!" ka ti a...😦
Chak lutukin Pa Mawia lamah ka petek chho a, a tleng hian ka tleng chho a ni ber awm e; rul ang maiin! Pa Mawia chhuak chho ṭêp chu ka lehpel chho fûa a, a koki ka rap a, koki chungah chuan ka per kai ta tharh mai; ani ve thung chu a koki ka rah sak avang khan a vawn a pît a, hreh zetin thlanglamah a tawlh thla hrut hrut a, a tâwpah thingbul pakhatah hian a inham tâng thei ta hrâm a. A inham tân ngheh hnu chuan, "Eng'e ni leh ta aaa...!?" a han ti a...
"Rûl a niang...!!!" ka lo ti ve vat a! A nih ka ring miau alawm.
Tunhnu hian ka han ngaihtuah a, kha lai ko sâng, fimkhur taka kal a ngaihna lai kha fimkhur lo taka kalin; chu pawh a ni lo, fimkhur lo taka tlân chhoin kan chhuak chho hma daih zâwk niin ka hre ta! Pa Mawia chu fimkhur leh muangchang takin a rawn inham chho leh a, chu lai chho sâng lai kâi tura kan hun hman rei zawng chu a inthlau kher asin!
Chakai chu ṭhahnem ve tak kan man a, kan hlawhtling ve tho mai, kawngpui kan han chhuak chho a.
"Pa Mawi, Rûl a niang!"
"Motor ri a nih chu mawle...i nêp sazu e mai a!"
"Khuta ka thil rah nêm nûak kha maw le...Rûl a niang...a ni hrim hrim ang...!?"
A hnu-ah Pa Mawia lui kal tur ka hmu a. La thianpa, vawih uih thei deuh a hruai daih; an liam tur chu kal ve châkin ka thlir zui vung vung a. Pa Mawia chuan a thu sawi a hlen ta tih ka hre thiam mai; nêp min ti a, min hruai duh tawh lo! 😭😭😭
Comments