MI BÓ ZAWN
Pjs
"YMA Information Centre aṭangin khawtlang hriattur pawimawh kan han puang a nge. Vanlalhmuaka, Pa Tinkhuma leh pi Lianthangpuiite fapa, Venglai chu, niminpiah Thawhlehni a a ramvak lo la haw lova, a zawngturin, khawtlang mipui a thei apiang thawkchhuak turin kan in ngen a ni e.."
A rawn tilauh lauh mai a.
A puan zawh veleh chuan, kan ṭhenawmpá pa Liankunga a rawn lang nghal, inchhungah chuan a veikual thurh thurh a, khum aṭang chuan kan nú nena an thilsawi pawh chu ka lo hre phaka.
Paliana chuan "I ṭhianpa hi zawng mut a duh lutuka, delhhlum sâ ei a tum a ni leh lo maw le, Va kaitho teh khai, mi bó zawn a ngai tihte kha a hriat pawh ka ring lo ve.."
Chuti'a kan nu bula a sawizawh chuan kan nu chuan pindan kawngkhar a rawn hawnga, ka puan sin rawn keu hawn pahin
"Pâ â tho teh, hei pa Liana a rawn kala..... lo tho rawh chaw ei pawh a hun dawn tawh.."
Kei chuan "Awle ka lo tho ang.." ti a ka chhan zawh chuan ani chu pindan aṭang chuan a chhuak leh nghal mai a.
"Ani hi zawng mut hi a duh êm em reng mai a, nizanah eng thil nge maw intih ni" . Pa Liana bawk chuan an ti leh ta bul bula, a ni hi zawng zahmawh sawi nuam tichi a ni a.
Kan nu chuan "Nimin a lo vat a châu deuh a ni a nge..Tunlai chu engmah pawh kan ti thei lo" an lo tive leh mai a..
Zawimuangin ka han tho a, tap a, pa Liana ṭhutna bulah chuan ka va ṭhu ve nghala,
"Pa Lian, Hmuaka chu engti'a bo thei nge maw a nih reng reng le, ani tlangval thaza hian, rampilril lutukah a lo tapkual vel mai mai a ni lo maw le, a pa khi a chhun si a,,"
PaLiana chuan "A.. ka hre bik lo.. a chhungte an mangang miau a, zawn a ngai si a nih hi...a ramvahna chin hria pawh kan awm der lo chu a nia, kan khawram lah a zau nasa mai si a.."
Kei chuan "Mi bo zawn hi ka nin deuh tur niin ka hria, a thu hrimah, Hmuaka te ang tlangval thazâ zawng; zawn zawn chi pawh niin ka hre lo ka peih lo ngawt mai, a ruang hmutu ah te kan ṭang anga, a lo thi a nih phei chuan.."
"Ni e tirawh.. Han chhuak ve phawt mai ilah , tlang thilah hi chuan a sual lo turah ngai ang..Akhaih.. ka'n haw phei dawn a nge..Tukṭhuan te pawh ei rawh u.
In nu pawh a ril a ṭam tawh ang, kawtchhuahah kan inhmu dawn nia."
Tih pah chuan PaLiana chu a chhuak ta a..
Pa Liana a chhuah hnu chuan keini pawh chuan tukṭhuan chu kan ei ta a.
Lo vah laklawh lai berkhera mi bó zawn ngai lo awm chu a va han hun lo tak mai ve le, tlangval tlawngawl lutuk tak mai hi chu(h) zù a heh em em mai lehnghala, a zu chhuang haw hman lo mai mai te hi kan zawng chiamin a ni ka rin ni.
Tukṭhuan ei kham chuan kawtchhuah lam chu ka pan ve ta a,kan khaw tlangval leh pavalai deuh ho chu an lo ngir khup tawh maia, kan zawnna tur hmun lam te kan han inthliarfel zawh chuan kan chhuak ta a.
Kan ṭhenawm pa, Pa Liana nen chuan kan kal duna, kan khaw hnuaia luitê zul chu zui thlain kan han chhuk ve mauh chu a ni a, luimawng kan thlen thlengin hnúhmâ awm hmuh tur a awm lova, mi bo zawnge tilo chuan mi aiawt chiah te chu kan han phawk thla zela, a chang leh kan han khawrh a, kan hlawk duh ngei mai, tlailamah kawtchhuah lam kan han pan khawm leh a, Vanlalhmuaka hnúhma awm hmu reng reng kan awm lo maia, kan la zawn leh deuh chu a la ngai dawn a ni.
Kan Mizo danah mi bo chu nisarih chhung kan zawn a ngai a, chuta kan hmuh loh erawh chuan an laina hnaite'n an duh leh an zawng a, an duh loh leh an zawng lo mai ṭhin a ni.
Nisarih hmaa hmuh chu a ngai thung a ni, hna kan ngah hun lai tak a ni nen, mi bo a awm chu hunlo kan titlang hlawm hle a ni.
Ni thum chhung lai kan zawn hnûah pawh a hnû hma awm hmuh tur kan hre tlat lo maia, kan VC president-in tihdan tur a han ngaihtuaha,
Ani chuan "Kan khaw ṭhenawmte kan han zawtkuala, hmutu awm ang an awm lo a, mahse hei Maite khua lam aṭangin ṭawngṭaia mibo zawng ṭhin kan hmuhfuh hlauh maia , hei tunah hian kan hnenah a awm a, a ṭawngṭai anga, a awmna hmun ni a a sawi ah chuan kan chhuak tlang dawn nia.." tih pah chuan Ṭawngṭai a mibo zawng thei chu a rawn ko chhuaka.
Chupa chu a rawn ding chhuaka
"Ka'n ṭawngṭai a nge, ka ṭawngṭai lai hian khawngaihin lo meng lo hram ang che u, in men chuan thudik tak kan hre thei dawn si lo" tih pah chuan kan lam chu a rawn hawia..
Keimah lamah chuan ka awihzawng a ni hauh lova, a ṭawngṭai a nih pawhin ka mit ka chhing kherin ka ring lo, puithúna atthlak mai a ni, ka tive tlat.
Kan han ngawi duak a, ani chu a ṭawnṭai ta alawm..
"Ekhai, khawiah nge maw i ṭuan ni. Khawiah nge maw i awm ni, khawilam nge i zui ni, min hre thei em,?"
A han si hlat hlat maia..
Kei chu ka meng kar renga, meng ve dang an awm em ti a, ka han hawikual chuan kan ṭhenawmpa pa Liana pawh chuan a lo awih vak bik lo a ni ngei ang, kan inhmu fuh hlauh mai, kan han inmelha, kan nui tut tut reng a..
Ṭawṭaia bawk chuan an chhunzawm leh a
"Ekhai..eee...ka hmu a che...Vanlal..Vanlal...Oo tunge i hminga khah..ka'n theihnghil lawk chu.." a ngawi vang vanga..
pa Liana, kan ṭhenawm pa chuan ring leng lawng tak hian "VANLALHMUAKA AW.." a rawn tilauh maia, nuih insum kan tam teh e..
Ṭawngṭaia bawk chuan.."Awle..awle..i hming ka hre ta, Vanlalhmuaka maw..I awmna hmun hi khawilai nge mawni le..?? Engtin maw..?? EEE awle..Tuikum hnarah maw..Ekhai..lo mang ang suh kan rawn kal ang nge..lo mangang reng reng suh ang che..."
Vanlalhmuaka bia niawm taka, a ṭawnṭaina a zawh chuan a rawn meng ta a..a rawn men veleh chuan ka lo meng reng tih chu a rawn hmu ta a..mahse a chham duh a chhamzo tawh ah a in ngai a, meng tawh tura mi a han hrilh zawh chuan..mi dang ho chu an meng ta a..
"Ekhai, Vanlalhmuaka chu Tuikum hnarah; ram ngaw pilril lutukah a awm a ni awm e..Min hrilh dan chuan púkah a awm a ni..A mah ngei hian a bó a ni tih leh khawtlangin kan zawng a ni tih a hriat avangin a zaka, a birû a ni ber a, information hmanga amah a bo thu inpuan vel leh zawng tura tlangsawmna thu i puan vel pawh a hre pha vek a ni..tunah chuan a laina hnaite chauh han kal rawh u..." a rawn ti leh ta a..
: A tukah chuan Hmuaka chhung hnaivai deuhte chuan tuikum hnar lam chu an han pan ta a..Khawtlangin kan lo ngaichanga, Ṭawngṭaia thil hre theia sawi kha a dik tak tak em..?
Ani lah chu an khaw lam panin a haw leh daih tawh mai si a..a lo dik lo a nih chuan han dem viau hlaihtheih a ni tawh dawn lo a ni.
Tlailamah chuan Hmuaka lam tura han kalte chuan an hmuh loh thu an rawn sawi leh ta maia, an zawn fê hnua, an auh vak vak pawhin Hmuaka rim awm ra reng reng an hre leh ta si lo.
An hnung lamah chuan Kan khaw pa pakhat ramvak haw hian a rawn zui a,chu pa chuan a sawi alawm.."Vanlalhmuaka chu a la dam sen lul mai..nimin tlaia ṭawngṭai hre theia sawi kha a dik reng reng lo."
Kan han thlir deuh ṭhupa..
Ani bawk chuan."Ka lo vaua kawrtêah mei khu ka hmuh avangin ka zuk kal a, ka han hnaih deuh chuan mi tuemaw hi ka zuk hmu a, kan mi zawn lai hmuaka a an em avangin, ka han au a, a rawn hawi phawk hru maia, eng nge a tih ka han enchian chuan, Zú a lo chhuang reng mai a, ka zuk pan hnaih dawn chuan a tlanchhe ta chiam mai a ni.."
"Zuk hmu leh teh reng pawh ni ula, nangni aiin a la tlan chak ang, man a hlau lutuk.."
Kan nui dar dar a, thil thleng chuan nuih a tiza a ni. Kei ka lo rin lawk reng a ni a, buai loh na tur ah kan buai a ni. Hmuakliana chhungte tan chuan a zahthlak awm ma nge..
Zu hi khap a ni a, a zuar man an nih chuan pawisa tam tak chawitir an ni ṭhin a, ló vah zawh awllen lai a, zu zuar an awm chuan an hlawk ṭhin hle thung... Vanlalhmuaka bo vang vang chhan a nih chu..
: Kan VC president chuan kan mibo chanchin a hriatin, kan ṭawngṭai thil bo awmna hretheia chu a han hrilh veleh a,
Ani chuan "Ka ṭawngṭai lai khan Inkhaw pa pakhat a lo meng a, khavang kha aniang..a chhanna dik ka hmuh loh " a lo ti ve tlat..
Tu tak lo meng ang maw..kei chu ka ni lo..kan ṭhenawmpa pa Liana menglai kha ka hmu tlat a ni..Pa Liana a nih ngei chu...
Comments