KHUUU...SETANA!
© Chhantea Pautu
Khawi nge, sei vak lovin a taka thleng hi sawi ila, tlem belh hlek bawk ila, a sawite pawh sawi uar ve deuh hrim hrim ngat teh ang.
Kha'ng ka ṭawngṭaipui(Bethel), Setana hlau em ema sarak vak vak chunga tlânchhe ta chîam chiam, mi nèp ve tak tak pathumte hming dik tak leh nihna dik tak kha chu ka han zêp sak ve hram ang nge.
Kum 2002 khan a ni. Kan khûaah chuan 'Chhandamna Camping' an buatsaih a, Speaker atân chutih laia Synod Revival Speaker luck tak, Pu C. Zairemmawia an hmang a , kan ṭhianho pawh kan lût ve nghe nghe a.
Zan khat chu kei leh ka ṭhiante pathum chu intibfel tâwk tak mai hian light down tawh hnu-ah ṭawngṭai turin kan chhûak a. Kan Camp-na, Pressbyterian Biak In awmna kha thlanmûal bul lawk hi a ni a, Biak In hnunglam chu thlanmûal a ni nghal mai a ni. Chu thlanmûal tawntirh lamah chuan kan ṭawngṭai ta a, kan ṭawngṭai tui ta khawp mai bawk a.
Kan ṭhian zinga pakhat Remruata chu a haleluiah vak vak a; ani hi chu a râwl a ring ve hrim hrim a, a rau pawh a rau hmel ber zel. Halleluiah tih leh Amen tih leh LALPA tih hi a uar em em a, a ṭawngṭai vawikhatah hian vawi 150 chuangte 'LALPA' a ti thin. A tih zât kan hriat theihna chhan chu keima'n ka lo chhiar ṭhin vang a ni.
Kan ṭhiante zinga mi Ngaihtea chu ṭawng tlem tak, aw thum tak si, zawi supa ṭawngṭai chi hi a ni a, bawkkhup bungbu kûtin, lei depah a ṭawngṭai vei dût dût a, chunglam ami pawhin a hre phâk dawn emaw ni le, tih tur khawpin a ṭawngṭai zawi thung.
Kan ṭhian zing ami tho Romawia thung chu ṭawng rang tak(a ṭawng rang mah mah ṭhin) meng râng, mitmu pawng lek lek hi a ni a, a ṭawngṭai chu a'n ṭawng rang mai mai khawp a, chunglam pawhin a awmzia a hre hman ang em awww tih tur khawp a ni. A nuai liam vut mai a, a râk hian a râk nawk nawk a ni ber mai, ve leh thung a.
Kei chu a ṭawngṭai mial mial a; mahse ka ṭawngṭai lai chu ka tâwp ta thut a; chutih lai chuan ka ṭhiante chuan thlarau pawlna sang tak an chang a ni ang, an ṭawngṭai tui em em a, mahni style style-in kan ṭawngṭai vak vak a. Ka ṭhiante chu an ṭawngṭai nawk nawk a, an ṭawngṭai dût dût a, a ṭawngṭai mawlh mawlh bawk a.
Kei chuan kan thlang lam, thlanmûal mawng lamah chuan ke pen thawm dik tak hi ka han hria a, ṭawngṭai chhunzawm ta lo chuan chu ke pen thawm chu ka han ngaithla a, ka ngawi ta kar mai. Kan lam panin a rawn kal hnai tawlh tawlh lehnghal! Ṭawngṭai laia han men êm chu dikin ka hre si lo, men rûk chu ka châk hle tawh a; mahse ka insum hram hram a. Chu ke pen thawm lah chuan kan lam a rawn pan zel a, ka ṭhiante ṭawngṭai thawm chu engahmah ka ngai tawh lo. Chu thil chu eng'e ni ang tih ka han ngaihtuah a, ka ngaihtuah kual ka ngaihtuah kual hnu-ah a ni thei àwm ber tur chu ka han hre chhuak ta a.
Chutia ka ṭhiante, vanvadâk, a chânga lei hmai nawr leh tlangsam bul ṭanchhana mawng tai tâta an ṭawngṭai hliam hliam lai chuan, "Khuuu...Setana!" ka han ti ta thut mai a.
Ka au ring bawk a ni ang ka ṭhiante ṭawngṭai chu an reh nghal duk a; second rei lote chu a reh hian a reh tlawk tlawk bawk.
Thâwklehkhatah thawm danglam tak hi a rawn ri ta thut a, sarâk rapthlâk tak, mangang awrawl, hlau thlabar ṭe ri, aw sîn deuh leh aw thum deuh, leh aw ṭial riai ruai hi a ri inpawlh chho ta nuk mai a; ka han hriat chian chuan, ka ṭhiante thlabar ṭe ri a lo ni.
Kei chu a chhak bera awm ka ni a, ka ṭhiante chuan min rawn pal chho ta tak tak mai a. Ka awihah ta ṭhawt ṭhawt a, a chhak bera awm chu a thlang berah ka awm ta daih mai lehnghal a. Chutia a thlang bera ka awm tâk daih chu second rei lote chhunga thleng a ni. A thlang berah ka awm ta daih tih ka han inhre chiah chu eng nge an hlauh pawh hre lovin ka ṭhiante chu ka um chho ve ta tak tak mai a, ka tlan pel chho ta fua fua a. Thui fê ka thlen hnu-ah ka ṭhiante chu ka lo nghâk ta a ni.
Kan han ding khawm a, ka ṭhiante chu an thaw huam huam a; Romawia phei chu Ui ni sa tuar ang maiin lei a chhuah hlûi a, a men ràn sa nâk laiin pawngpur khawpin a men ràn belh a, chutih lai chuan samzaiin a mitmu kha a phih-awh theih hrim hrim ang; meng râng ve nasa em!
Kei chuan, "Ngati nge in tlân vak a?" ka han ti a.
Romawia chuan, "A hlauhawm em alawm," a rawn ti tham ṭùak a.
Kei chuan, "Eng'e in hlauh a?" ka lo ti leh hû a.
Ngaihtea'n, "Setana!" a lo ti sup a.
Kei chuan nui ruh ruh chungin, "In va han ho tak e awww. Ka lo tlân ve vak vak a," ka lo ti a.
Remruata chuan lungawi loh hmel zet hian min han melh ner nâwng nâwng a, "Setana i hmu a ni lo'm ni?"
Kei lah chuan, "Hmu nang," ka lo ti sam et si a.
"Chuti si, nge, 'khuuu setana' i tih chîam aaa?"
"A nih duh hmel ber alawm," ka lo ti mai a.
Ka ṭhiante kha an han râk ring mai mai khawp a. An nêp sazu hlawm ngawt mai, min tluk lo han han teh e.
Kan zun hian kan khung leh hmain mipa chuan kan thing hmasa deuh kher ṭhin, hei hi zahmawh lam a ni lo va, zun fep nei ngah chi tân phei chuan khung hmaa thin ngei ngei a ṭha a, kap hîng lutuk tur a ti ziaawm thei, thin zât erawh a inang lo thei nuk àwm e. Zahmawh lam a ni lo kan tih kha, mipate zîak loh dàn nghet tak a ni zâwk; chuvangin, 'VAWITHUM THING RAWH' tih thu kan sawi chhap tawh kha.
Khuuu...Setana!
Comments