"I SAZU PHAWRH RAWH!
(Vawi Thum Thing Rawh)
© Chhantea Pautu
Sazu chanchin lam ngawr ngawr ka sawi dawn a, zahmawhah lo la lo hram ang che u aw; hmeichhe ho chhiar phei chu phal lo mai ta ila a ṭha ang. A pawimawh lai chin bâk ka ziak hman lo va; chuvangin in lo chhiar hmanhmawh hle mai dâwn nia, in chhiar zo hman lo palh ang.
Sazu chanchin chu zîak ṭan nghal mai ila.
Kan zun hian kan khung leh hmain mipa chuan kan thing hmasa deuh kher ṭhin; hei hi zahmawh lam a ni lo va, zun fep nei ngah chi tân phei chuan khung hmaa ri deuh thlawp thlawp khawpa thin ngei ngei a ṭha, kap hîng lutuk tur a véng ve thei, thin zât erawh a inang lo thei nuk àwm e. Chuti chung chuan number kawpkim loah chuan 3 hi number kawpkim ber leh pawimawh tak niin a lang a, vawi thum thing chu kan tam ber mai thei(?)
Zahmawh lam a ni lo kan tih tawh kha, mipate zîak loh dàn nghet tak a ni zâwk.
Kei chu ka han zung a, ka 'Sazu' ka han phawrh a, ka han lek char chiah hian, "Ka zung," ti mai lo hian, "Sa ka zâwn," ka ti deuh kher ṭhin. Chu ka sa zâwn chu a bâwma ka kalh hnan leh hma hian thin hmasak ngei ngei a ngai ziah a; a chhan chu in hriat thiam ve mai ka ring.
Naupan lai deuh, zah kan hre ve ṭan tawh tih hian mak tak maiin ni khat chhung ringawt pawh hian 'tlem te te tam deuh' hi ka zung sek ziah ringawt mai a. Ka pa ngaih ṭha lo chuan kan khuaa Chhingchhip Doctor rawn kal remchàn laiin min entir ta nghe nghe a.
DOCTOR: I sazu phawrh rawh!
Kei chuan hreh zetin ka han phawrh a.
DOCTOR: E hee...tih tham a awm miah lo a nih hiii...! Engmah tham a awm reng reng lo mai!
Doctor chu a fiamthu han ti dâwn ila a nui miah si lo. Ka Sazu a sawina nge ka zun a sawina ka hre lo hrim hrim. A en lai erawh kha chuan far khat pawh ka zung thung si lo va, zakin ka ngawi reng a; chutah, Doctor han chêt dàn chu a mak ta kher mai, ka phalna la lo leh ka thu ni miah lovin ka Sazu awmchhun chu a han lip ta ngawt mai a nih chu maw le! Chîang fahran hian a han thlêk zui leh ta nghal a. Naupang mah ni ila zah kha kan hre ve tawh asin le.
DOCTOR: Vawi thum thing rawh!
Kei chuan vawi thum chu ka han thing a; mahse vawi thum thin kha eng nge a ṭangkaina leh a awmzia ka hre lo reng reng!
DOCTOR: A mak hle mai!
A makna lai mak ti ve tur pawhin ka man pha ve lo!
DOCTOR: Vawi thum thing leh rawh!
Vawithum ka han thing leh a!
Ka han inentir zo chu ka pa chuan, "Doctor chuan engtin nge a lo tih che?" tiin min zâwt a.
Kei chuan, "Vawi thum thing rawh!' a ti," ka ti ve ta tawp mai.
'Tlêm tete tam deuha' ka zung ṭhin chu a reh chhawm chho ve ta mai a; vawi thum thin kha a ngeih viau a ni mai thei. A hnu, ka rawlthar chhuah chhoh hnu leh 'tlangval' tia sawi theih kan nih hnu, tun thleng hian ka zun apîangin ka 'Sazu' chu vawi thum ka thing ta deuh ziah a; mahse a châng chuan vawi thum aia tam pawh ka thing tho.
Ṭumkhat chu ka 'Sazu' khungna kawngka kalhna khâwl leh ka 'Sazu' chu a intâwk làwi ta tlat mai; a bâwm kalhna khâwl chuan ka 'Sazu' hmâwr vun chu ka zip hnan palh ta hlauh mai a. A na chai chai teh e!
Chumi ṭum chuan ka duh reng vang ni miah lovin ka 'Sazu' chu mi zîngah phawrh a ngai leh ta! Ka phawrh hreh a, a na bawk si, a nawm vang ni miah lovin ka si ta hlarh hlarh mai a. Ṭap rual ka ni tawh lo va, ṭap rual ka ni tawh loh vang tak chuan mi zînga ka 'Sazu' phawrh kha ka hreh hlê bawk. Dik tak chuan Doctor-in a en lai ai kha chuan 'tih tham ve fee' a ni tlat tawh a(ang ka ring). Ka hre chiah chuang lo!?
Harsa tak chuan ka 'Sazu' chu kan han chhuah zalèn thei ve ta hrâm a nih kha. Chuti ang thil a thlen hnu chuan kan u Ar El Khawlhring te ang, zun fep ngah avanga kap nei hîng thei deuh ang chi hi chu an zung lai ka hmuh fuh phawt chuan, "Vawi thum thing rawh," ka ti ta ziah a.
Kum khat chu, Hualtu rama 'Sazuk-Sih-Tlâng-Hla' neih kum a ni a. Lo a kàng ṭhain a kàng mam fai puk mai a; ka ṭhianpate lo vau luitèah ka ṭhianpa nen chuan tui kan theh kang a. Thlai-chi-thlâk hun lai a nih avangin ka ṭhianpa nu leh pate pawh thlai-chi-thlâkin an feh ve a; an thlai chi ken zingah hmarcha chí a tel ve nghe nghe.
Tui chu kan han theh kang ta a, Nghavawk lian leh sei fu fu hi an lo tam mai a, tui tlêm lai a nih avangin man an nuam hle mai. Chutia kan hlim hle lai chuan ka ṭhianpa nu leh pate ṭawng thawm chu ka han hria a; chutih lai chu ka ṭhianpa pain hmarcha chi a theh lai a ni bawk nghe nghe.
A nupui chu a han ko a, "Rozîk rawn kal teh," a han ti a; a nupui chu a bulah a va kal var a. (Hetih lai hian kan hmu pha reng; anni chuan min hmu lo.)
Ka ṭhianpa pa chuan, "Phawrh rawh," a han ti ta nghut a.
A nupui, Pi Roziki chuan a hre thiam nghal mai a ni ang, a phawrh tur dik tak chu a phawrh dik chat tlat. Chutah, ka ṭhianpa Pa chu kangvar ni sen sa hnuaiah chuan a zung ta tur tur a; a dâwt a lian viau a ni mai thei, a hâw lian em em lutuk!
A han zung zo a, a nupui chuan khung sak leh mai hi a han tum a; mahse ani chuan, "Rozik ngawi rawh, lo hmanhmawh cheng suh...la khung rih suh," a han ti a.
Pi Rozîki chuan, "Ngati nge?" a lo ti há a.
Ka ṭhianpa Pa chuan, "Vawi thum thing rawh," a han ti nghut a!
Pi Roziki chuan vawi thum chu a thin sak ta a! Chuta ṭang phei chuan vawi thum thin chu a pawimawh hle a ni tih ka hre thiam lehzual ta a ni.
VAWI THUM TAL THING NGEI NGEI RAWH.
Comments