ARAMBHA KALO ATMA - Book One Complete

ARAMBHA KALO ATMA
- Chhantea Pautu

A Hmatheh

       Ruam kùam zau vak lo a awm a, a piah lawkah Sangu lui chu a luang a.

       Thla bial zan a ni a; mahse chulai ruam, mipakhatin a rawn thlen lai chuan thla êng chu chhum dumin a hliah thim a, ruam chu a thim deuh chhulh a, thli na ang reng takin a thaw ham

ham a, chhum a zîng chûai a, mi dawihzep tak tân chuan ṭim sung sungna tham khawpin chulai ruam boruak chu a nelawm loh a ni.

       Chu ruama rawn kal chu mipa, la naupan hmel tak mai hi a ni a, san lamah pa vantlang niin a sa a pan deuh hle thung. Kawr fual dum hi a ha hnuk a, a kut dinglam chuan hmawlhtè ni maia lang tawi tè hi a keng a, ruamah chuan hmanhmawh zet hian a rawn lut a. Ruam lai tak vela pûk luhna kawkel tereuh tèah chuan hawi zak zak chung hian a lut a.

       Pûk chhung a va luh chuan zawn nei niawm tak hian a han hawi kual zak zak a; mahse a zawn chu a hmu mai lo a ni ang, pûk kawkel hrang hrang awm chu a lut lawr zung zung a. Pûk chhung chu a thim nelawm loh ruih a, sathau khawnvar hi a inchhi thliah thluah a; mahse duhthusam chuan pûk chhung chu a êng lem lo hle mai.

       Chulai ruam rawn lut thar chuan pûk chu a fang kûal zel a, a tawpah chuan pùk kawkel tawp ber, pindan pangngai tak anga chei, a sir hmun khat laia maicham ang reng deuh awm, maicham ni si lo, thil serh dahna ni ngeia lang si awmna hmun chu a va thleng a. Maichàmah chuan danglam deuh tak hian thil dahna tur bîk pawng deuh pali intlar hi a awm a, chu thil dahna pawng pali zinga pahnihah chuan lunghlu lian deuh pakhat leh a aia te deuh fê pakhat hi a awm a. Thil dahna pawng bîk, thil dah hun rem nana a chhip tih khuar deuh len zawng te pawh chu a inang lo thliah a. Maicham pian ang hian killi neiin a awm a, a lan dan chuan lung ni ngeiin a hriat; a pang leh chung vel te chu lungsam nge pâtèk tih pawh hriat loh hian a bawh khat tlat a, a dung leh vang pawh awm chuang lo hian 3ft. bial vel a ni. Thil dahna pawng pali awm zinga a lai pahnih chu engmah awm lo hian a la awm bawk a.

       Chu pindanah chuan mipa khat pa lian deuh tak, hang lam lek lek, vai hmel pu tak hi a lo awm a, chulai ruama rawn kal tharin pindan a han luh chuan a hmawlh ken tawi tè chuan pindana lo awm pa chu a han kαwk a, hriat thiam har zet hian a han râk nawk nawk a. Pindana lo awm chuan mak a tih hmelin a hlauh hmel hle a, lo kal tharin a biakna ṭawng ang chuan a han chhang a. Lo kal thar zawk chuan a han vin tuar a, a hmawlh kenna kut chu a han lek khawng sauh a, a hmel chu a nunrawn hmelin a nelawm loh em em mai a, a mit meng chu thinrim avangin a vam ham mai bawk.

       Ṭawng mak sak zet hian an han inbe zui ta zel a, pûk pindana lo awm sain a chhan lêt ve apiangin lo kal thar pa chuan a vin let hrep zel a; pakhat ṭawng ri aṭang chuan lo kal thar hming chu Sago Vas ni ngeiin a lang. Chutah, puk pindana lo awm zawk kut dinglam, hnung lama a dah chu a che hret hret a, a hnung lam aṭang chuan lo kal tharin a ken ang chen vela sei bawk hmawlh hi a rawn phawrh ve ta a; mahse lo kal thar chuan engmah a lo hmuh hmaih hauh si lo. Chutia puk pindana lo awm zawkin hmawlh a phawrh ve tih a han hmuh chuan thinrim zet hian a râk nawk nawk a, "Avada Kedavra," a han ti ṭhat a, puk pindana lo awm lam hawi chuan a hmawlh ken aṭangin eng hring hi a rawn chhuak a, chupa chu a vir nawk a, puk pindan chhuatah chuan a tla thum ṭawk a, mit khap miah lo hian chung lam a melh a, a chet eih tawh loh danah a thi ta ni ngeiin a lang.

       Mitthi ni tain 'Sago Vas' tia a koh chuan maicham ang renga awm lunghlu pahnih chu a la a, lunghlu a lak rual chuan thli a rawn thaw suau a, sathau khawnvar chu a thi phiar a, a hmawlh ken hmawra êng a tih chhuah ring chuan ruama rawn lut thar chuan hmanhmawh zetin pûk chu a chhuahsan ta a.

       Ruamah khan a rawn chhuak leh a, thawm chu a reh duk a, thla êng hliahtu chhum chu a kal kiang zut zut a, a hnu deuhah chinghnia a rawn ù rawng rawng a, Sago Vas chu chinghne u ri ngaithla chuan a han ding dat a; chutah rapthlak deuha nui chung hian thim thamah a pil bo ta a.

       Ruam leh khaw awm dan chuan chulai hmuna tualthahna leh anchhia lo thleng zui zel tur chu pawmpui ni awm takin thawm an chhuah lo. Rapthlak zawk khawpin a reh a, chhum zing chûai mai te chuan nun a ti ngui a, rannung hrâm ri hriat tur takngial pawh a awm lo va.
* * * * * * *

       Dinsanga chuan, "I huphurh viau chuan kan ti lo mai dawn mi? Ka..." a han ti a, a ngawi leh daih a.

       Remsangi chuan, 'Ka rilru a hria a ni maw,' a ti rilru a; mahse engtinmah a chhang lo.

       Innei hlim an ni a, hemi zan hi lawi ṭhat zan a ni. An chhung te chu an reh ṭhap tawh a, anni chu an muhil mai lo va; zing lam dar 3:00 ah pawh engmah an la ti lo!

        "Remrem, a pawi lo, inneih zan khera tih a ngai chuang hleinem, i inpeih hun ka nghak thei tho alawm," a han ti leh a.

       A chhâng tawh dawn lo emaw tih hnu-ah, "A vawikhatna chu a na ṭhin lutuk an tia..." Remsangi chuan a ti ta sap a.

      Dinsanga chu a nui suk a, "Kei paw'n ka ring; mahse, kan pal tlang tho a la ngai dawn a..." a han ti leh a. Amahin a châk avanga nawr kher a duh lo a ni, sex hi inpawh taka hman a nih loh chuan nawmchenna mai a ni tih hi a pawm dan a ni a. "Mipa chu kan nung sa a, kan inpeih reng a ni mai, kei phei chuan ka hmangaih em che avangin ka duhna che leh phurna hi a thawk hma a, chu chuan min ti so sâng hma a ni. Zep loah chuan zanin pawh hian ka khawih châk takzet che..."

       Remsangi chu a han ngawi vang vang a, "Dîmtèin min khawih ang che aw; mahse..." a ti sap a, a heh petin a ngawi leh det a.

       "Ka nawr na lutuk lo vang che, i rilru-a i inpeih thlap hun ka nghak mai ang."

       "Din, ka rilru hre chung leh ka rilru hliam dam har zia hre reng chungin min nei duh tho a...?"

       "Ka hmangaih che alawm."

       "Ka sual tiraw?"

       "Ka tuar nasa khawp mai, ka thinlung kha a rùm nasa ṭhin; mahse i sual lo...i sual vang a ni lo."

       "Ka tihpalh takzet a ni; hriat thiam sèn pawh kha ka ni lo vang."

        Dinsanga chu a han ngawi vang vang a, Remsangi lamah chuan a han tawlh hnai a, ngawi rengin a lamah a pawt hnai hret a, a kuah ta hle hle a. Tunah chuan sex han hmanpui tumna rilru pawh a pu tawh rih lo. "Eng ang paw'n lang la, eng mi pawh ni la, ka tân chuan i duhawm lutuk tho tho; mahse i inpeih hunah chauh aw...Princess, muhil rawh," a han ti a, a kuah nghet leh sauh a, a beng bulah, "Savate, zanin chuan kan ti lo vang," a ti leh sup a.

       Chumi hnu darkar chanve hnu-ah Dinsanga chu a muhil ta mai niin a lang, a thaw ri sâk sâk a. Remsangi erawh a muhil thei thung lo; a bula mipa pangti lum chuan a ur ham ham a, a pangti lum neitu chu hahdam hmel takin a muhil a. An inneih hma hun kha a han ngaihtuah kir a, amah a hmangaih avanga Dinsanga tawrhna te kha; a zah a, a tâwp thlenga hre thiamtu he mipa hi hmel ṭha leh pian ṭha, inkhaithli thlerh thlawrha sawi tur a ni lo; mahse a ngainatawm a ti a ni. A inngaihtuah thui zel a, Dinsanga'n a hmangaih zia hi a hai lo, amah hmangaihtu atâna a duh mipa laka a beisei leh mamawh ṭhin zawng zawng kha Dinsanga hnen aṭang hian a hmu ta zawk a; chu chu dawn zel pawh a duh a ni. Virginity hi a ngai hlu a, a tum ang ngeiin pasal neia mo kawr a hâk nî thlengin a vawng him ta reng a. Remruata kha pasal a tân a duh a, a hmangaih a, a tân a nulât thianghlimna pawh pêk theih ngei a duh hle; mahse nupa an nih hma chu a theih loh.

       A ngaihtuahna a kâwm zui zel a, hun kal tawh a thlîr lêt a, natna a tawrh, zahna leh ṭahna, mit tui a sèn tâk te leh Pathian hnena dilna hmanga a ṭawngṭaina zozai te kha; tawrhna a pal tlang chhung zawnga dik taka hmangaihtu chu a bula muhil mêk Dinsanga hi a ni.

       Dinsanga chu a rawn che ṭial ṭial a, zangthalin a inlet a. Remsangi chuan a muhil hmel chu a han en a, an inneih zân a ni chung pawha nawrh luih tum miah lova hre thiam taka a la insum thei chu mak a ti, a zah bawk. Mipate tisa châkna thawh hma zia a hai bîk lo va, zanin hian Dinsanga taksa chuan a taksa hi a mamawh em em dawn a ni tih pawh a hre ve reng; mahse, virgin a la ni a, a huphurh bawk si a ni.

       A han ṭhu chhuak ta ngawt a. Dinsanga chu kaih thawha tihpui mai chu a duh rilru ve a; mahse a inthlahrung letling leh ta hlauh bawk si. Awm dan a thiam lo va, a ṭhu chu a mu leh ta ngawt a; chutia a mut leh zawng chuan Dinsanga ban chu a delh palh a, ani chu a rawn harh ta a.

       "I la muhil nange?"

       "Umm...ih eng lo?"

       "Eng'e ni Remrem?"

     Remremi chu a han ngawi leh ren rawn a, a tâwpah chuan, "Ihh...tunah ti mai ang..."

       Dinsanga chu a nui sak a, "I inpeih tak tak maw?"

       "Ka huphurh tho a...mahse...kan la ti tho awm sia," tiin Remremi chu a nui ve a.

       "I duhawm lutuk...dimtein kan ti dawn nia..."

       Nupa thlung nghettu chu sex hi a ni pakhat a; mahse chhungrila inpawhna tel lo hian a hman theih si! Mipa ṭhenkhat chuan titipui hmasak pawh awm lovin an nupuite an hmanpui tawp a, an duh tâwk an ngah hnu-ah an vangvat puar thlawn tawp a, an nupui te lungchim taka kuah emaw han chhaih fiam emaw tum lovin an ui puar muthilh leh burh burh tawh mai ṭhin.

       Remsangi'n a rem ti ve tih a han hriat chuan Dinsanga chuan a tih tur chu a han ti ṭan a; a fâwp a, khawih tur lai khawihin a chûl a, a fawp pah zel a! Chutia a han chêt tâkah chuan Remremi huphurh leh khawr zualpui pawh a reh a, a tha a tho ve telh telh a, Dinsanga chuan dimdawi leh dawhthei tak chungin a khawih a, a taksain lawi ṭhat zanah a nupui chu a hmangaih ta a ni.
* * * * * * *

       Muanawma chuan Sangu lui luang chu a thlir vang vang a, a vawithum nan kha ruam kha a pan leh mek a ni. He thil a buaipui tirha innei ta te kha tluang takin an innei a, anchhe ṭhenkhat tem vetu mi ṭhenkhat te chunga thil thleng erawh kha chu pawi a ti hle a; Dinsanga'n thil a hrilh kha tam lo mah se a chhawr hle a, Dinsanga nupui ni ta Remremi chunga anchhe thleng thei an dang ringawt pawh kha lawmna tham a tling a ni.

       Tlai thim hlimah ruam chu a lut a. Tun ṭum chu tumah a hruai lo va, a him lo ema a hriat avangin tumah hruai a duh lo va; chu bakah Mira-i khan amah chauha kal turin a chah tlat a ni. He ruam bulah hian tawh sual tawkin a nunna a lo chân ṭep tawh a; khati ang kha a la thleng thei reng tih a hria a ni. A rilru-ah Bs-i a lo lang a, amah Muanawma chungah chuan thil ṭha lo eng pawh thleng ta se...ngaihtuah chhunzawm duh lovin a lu a thing nawk nawk a.

       Ruam chu a lut a, pûk awmna lam chu a pan a, pûk chhung a luh dawn ṭêp chuan thil de chuai hi a hmu a, a taksa chu a her mawp a, a tlu vir nawk a, hmeichhe thinrim ṭe tuar tuar hi a hre riai ruai a, a khaw hmuh chu a thim ta riai riai a...

SANGU LUIRUAMAH
- Chhantea Pautu

Bung 1 Na

       Zinga a muhil a han harh chuan tho chhuak mai lovin a inngaihtuah nawn rauh rauh a, inchung thuahna(cielling) chu a melh vang vang a.

       Zoremi hi inbox lamah a bialpa ten an lo CK pui fo tawh a, nizan kha chuti anga a awm vawi tam tak zinga pakhat ve mai chauh a ni; mahse a danglamin mak a ti thung a!

      "Mami i ṭhiannu a rawn kal a nia...thawh a hun hi chuan tho ve vat ṭhin teh u," tiin a pindan pâwn lam aṭang chuan a nuin rawn au a. Peih loh hmel zetin a tho a, darthlalangah a han inthlek leh ngial a. A hmel hi chu a ṭha a ni, a pian a nalh tawk viau a, a sam a tibuang chuan a vun rawng ngo paw vah sa chu a chawih hle a. A luck pawh a luck reng a, a la naupan ngaihtuahin bialpa pawh a ngah tawh fé mai; a taka a la hmuh loh, Social Media kal tlanga biak eng emaw zat a nei nual reng a. Hmeichhia hi an luck miau chuan inven sen a har a ni ang; mahse chu chu thil tihsual chhuanlam atana tling a ni kher lo.

       A ṭhiannu chuan ṭhutkhawmna pindanah a Smart Phone khawih neuh neuh pahin a lo nghak a; hei hi ṭhalaite nun dan chu a ni, khawi hmunah pawh ṭhalai Smart Phone khawih lai hi chu hmuh tur an awm. A ṭhiannu hi a lan dana thawveng ve tak, vei nei lem lo, nun zalen ve tak a ni; Sex Story Group lamah fake account hmanga Sex Story ziah a hrat hle a, tawn hriat pawh a nei hrep tawh ang!

      Mizo ṭhalai ten Social Media kan luh chilh hnu hian sex lamah kan ṭhangharh lutuk tawh a, Sex Story Group lah kan ngah, chung group vela an ziah duh zawng lah chu pasal pawm lai neiin(mînu) mipa dang laka uire-a inthiam lohna pawh nei chuang lo va sex a hmang chanchin te, nupui pawm lai nei(mîpa) in tîm miah lova hmeichhe dang leh mi nupui sex a hmanpui chanchin te a ni nawk hlawm a; tleirawl te te nia kan ngaihte pawh sex lamah an harhvang ta khawp mai!

       A pindan aṭanga a chhuak chu a thiannu ṭhutkhawmna pindanah a Smart Phone khawih neuh neuh paha a lo ṭhu chu a va hmu a. Ani chuan, "I va tho har..." tih pahin a lo melh zauh a, a Phone chu a khawih zui leh mai a.

       Hei hi tunlai ṭhalai nun chu a ni. Khawi hmunah pawh, eng hunah pawh ṭhalai Smart Phone khal neuh neuh hmuh tur hi an awm reng a, titi paha khawih, TV en paha khawih, chaw ei paha khawih; eng pawh ti se thil tih paha khawih hi an hnehsawh tlat!

       Zoremi chu muangchanga a ṭhiannu bula ṭhut pahin a thaw deuh ham ham a, "Sang...nizan ka meng rei lutuk...ka muhil mang lo..." a han ti a.

       "In ti leh ami?" amah pawh en chuang lo leh Phone khawih pah chuan Biaksangi chuan a lo chhâng a.

       Zoremi chu a nui hak a, ṭawngkam erawh chuan a chhang lo. A han ngawi vang vang a, a ṭhiannu Phone khawih tui em em mai chu a han en a, a tawpah chuan, "Lalbiaksang, i Phone kha dah ve teh...ka rilru a nuam lo a nia," a han ti ta a.

       "Ngeee...zan dangah pawh in ti fo tho alawm...tukin atak a....?"

       "Nia...mahse, nizan chu a danglam alawm...rilru a nuam lo eee..."

       "Engvang...?"

       Zoremi chu a han nui sèih phawt a, a ngawih deuh hnu-ah, "Ihh...eng lo...nizan chu pic kan inthawn tel vak a..."

       "A ni maw!? Chuan...a 'englo' pic a rawn thawn che ami?" nui ar ar pahin Biaksangi chuan a lo ti a.

       Zoremi chu a nuih leh sèih a; a hmel hi chu a ṭha a ni. "Mmm..." tih ngawtin a ṭhiannu chu a chhang a, a ngawi leh ta vang vang a

       "I 'englo' pic i thawn ve ami?" zawi sapin a ṭhiannu chuan a han zawt a.

       "Mmm...ihh...en teh Sang, a zei lutuk ringawt..."

       "A nuam em?"

       Zoremi chuan a ṭhiannu chu a han en a, a nui ringawt a

       "Hman nî-a i sawi kha ami?" tiin Biaksangi chuan a han zâwt leh a.

       "Aw...ni e..."

      "A zei ngawt ang, a hmel ṭha si. Chuan, a 'englo' chu ka lo en ve chhin!?"

       "Sang...i mawl thei lutuk..." tiin a ṭhiannu chu a han melh vak a. "Ka pic kha ka thawn ve tho sia, min tih mualpho ka hlau a nia!" a ti zawi leh sap a.

       "Ka en ve châk alawm...ho lutuk...i hmel i ti lang tel ami?"

       "Ti lang tel chuang lo ve..."

       "Hlauthawng duh suh...a tih vaih chuan a 'englo' pic i nei ve tho alawm," Biaksangi chuan a ti liam puat a.

        Zoremi hian a tirin 'naked pic' em inthawn kha a tum pawh a ni bik lo; mahse a mipa khan a phût tlat a, a ti ve ta mai a ni. A hma chuan ṭawngkamin vawi tam mipa a lo CK pui tawh a, pic nen meuha a tihpui chu nizan kha a vawi khatna a ni. Mihring hian feeling aṭang chauh pawha phurna leh nawmna kan neih theih avangin Zoremi paw'n nuam a ti lutuk; mahse a awm chu a nuam zui vak lo hle a, a hlauthawng a ni. He feeling, mihring chhunga awm hi nupa ni tawh te chauhin nuam leh hlawhtling taka sex an hman theihna tura bul ṭanna tur dik a ni bawk.

       Mahse, hei hi Zoremsangi tleirawl nun bul ṭan dan chu a ni tlat!
* * * * * * *

       Sago Vas chu a naupan têt aṭanga mi danglam a ni. Pâwn lama a lan dan ang chiaha chhungril khà a ni a, a nun a rawng a, pawisak a nei lo va, khawngaihna awmzia a hre hek lo. Dawi thiamna lamah a naupan ang aiin a chim chin a sâng hle a, a ngaihtuahna chu pawikhawihna tur phiara phuar velna hlir a ni ber awm e. A nui zen zen lo va, a nuih chhun a thleng a nih chuan thil ṭha lo a thleng ziah ṭhin; a awmzia chu thil ṭha lo thleng chhinchhiahna chu Sago Vas-a nui chu a ni mai.

        Dawi lam zirna hmun ṭha ber pawlah a zir a; chu chu thu hran, a nun chhungril chu khâkna hlira a khah avangin Dark Magic lamah a rilru a dah tlat a, mahni inzirchawpin chu lam chu a ngaihven char char a ni. A hetih vangin a ni ngei ang, mitinin kan chhungrila kan pai, thimna chu Sago Vas-a chhungrilah a ṭhang chak bik a ni.

       Muanawma chuan chupa chanchin tawi tè inziahna lehkha chu a han thlep ṭha a, a zat vang ni miah lo hian a han nui suk a, he a thil hriat hi a awih dawn nge, a awih dawn lo tih pawh a hre thiam lo; mahse a hrilhtu, he lehkha rawn thawntu hi Dawithiam a ni ngei tih amah pawh hian a hre chiang nasa mai si a, a rilru ngaihtuahna chu a buai nuaih thei hian a hria a; chutah, "Paradise Lodge lunghlu kha Ilvermorny hmun aṭanga lo kal maw ni a?" a han ti chhuak sap a. A hriatna luahtu thil chu awih harsa a la ti cheu mai; lehkha rawn ziaktuin 'Sago Vas' tia a rawn sawi pawh hi a hmuh ngai loh chu sawi loh, tuna lehkha a ken meka inziak aṭang chauha hria a ni si. Eng ang mi nge tih pawh a hriat loh chuan lunghlu a rawn um zui ngei dawn tih hrilh a ni bawk si a, kha lunghlu um zuitu pawh chu an va tam ta ve mawle.

       Legkhaa a inziah dan chuan Sago Vas chu 'Ilvermorny School of Witchraft and Widzardy' dawi zirna School aṭanga inzir chhuak a, Dark Magic lam buaipui zui ta zel a ni a. He dawi zirna School hi United State of America chhung, Massachusetts State-a Mount Greylock hmuna awm niin Magical Congress of The United States of America leh International Confederate of Wizards hnuaia inziak lut a ni.

       Muanawma chu a han inngaihtuah chiang a, a thil hriat thar chu a awih lo nge a mak a ti zawk tih pawh a hre thiam ta chiah lo. Dawithiam chu an awm ngei tih chu a pawm a; mahse a zirna School em em chu a awm tak tak theiin a ring ngai lo. Lunghlu kha a han ngaihtuah zui a, chhiatna a thlen tawh dan te, Rintei thihna chhan te; a ngaihtuahna chu hun kal taah khan a let leh zut zut ni mai hian a hria a.

       He thil han buaipui leh tur pawh hian a la inpeih chiah pawhin a inhre lo. Amah buantu nen chhungrilah indona a hmachhawn mek a, hmeichhe pakhat chu a kalsan mai dawn nge a chelh dawn tho tih thu-ah thutlûkna siam tumin a inngaihtuah lai a ni a; chutih laiin he thil, mak leh awihawm vak pawha a hriat loh hi kha Dawithiamnu khan lehkha ngat leh nghalin a rawn hrilh leh si.

       Kawlkila Ni a liam ruala lungngaihna leh ipikna te, manganna lo thleng leh thinlung natna zual ṭhin hi Muanawma nunah a mikhual lo khawp mai.

       Kum 2018, Khuangchawi thla chawhnu lam a ni a; chumi hma kum kal ta kum thum chhunga a nuna a thil tawn te ngaihtuahin amah chauh hian a in kawt lo lam bathlarah chuan ava ṭhu ngawi reng ta a, "Hmangaihna," tia phun sap pahin beidawn hmel tak hian a ṭhen sak a. Ani tân hi chuan tih deuh rap rap te, khawi maw lai ram ril leh hmun fianriala inhliam rap rap te, thil harsa leh khirhkhán hmachhawn a, mî hniak zuia chhui te hi hmangaihna buaipui leh ṭhin ai chuan a tih chi fo a ni; mahse, a thinlung hi hmeichhe màwina leh an zûn hian a kal kân thei bik lo va, Rintei a chân hnu-ah hmeichhia hian a lung an ti nâin a nun an ti nguai ta ziah mai.

       Bathlara a ṭhutna lam pan chuan hmeichhe lian vak lo, hmaifang fel zet, ngo lutuk lo, hang pawh ni chuang si lo hi a rawn chhuak ve a, "Muana, ti nge hetah i awm reng a? Ngawi rengin i chhuak daih a, thinrimna i nei a mi?" a han ti sep a.

       Muanawma chu a ngawi reng a, a nui lo va, thinur hmel pawh a pu chuang lo. Ruah a sur cherh cherh a, khua chu a vawt viau mai bawk; hmeichhe lo chhuak chu a kawr lum chuan a intuam ṭha set set a, Muanawma bula ṭhutna awlah chuan ṭhuin, Muanawma dar veilamah a lu nghatin ngainatawm deuh hian Muanawma lamah chuan a thle phei deuh a.

       Chumi te pahnih inkar chu tun dinhmunah chuan hriat thiam a har deuh a ni. Amah ngainat hmel zeta a ngheng chil chial te, a taksa khana a mu zawi hniang ṭhin te, amah a melh leh ralh ralh ṭhin te chu Muanawma chuan duhawm a ti thei hle a.

       "Maw, Muana, i thinrim a mi?"

       Muanawma chu a la ngawi reng a, a nuih erawh a nui sak a. A chhan loh avang chuan hmeichhe thinin a tuar ta lo a ni ang, "Lalmuanawm, min chhang rawh, i awm dan hi ka ngaih dan a ni miah lo a nia aw," a han ti ṭhat a, a awm dan thlâkin Muanawma chu a han thlék hé hâw a.

       Muanawma chu a nui sak duh chauh a. A ngawih leh tlat hnu-ah, "I chunga a rilru put ang chiah hi kei pawhin i chungah ka put ve dan a ni; mahse ani aiin ka inthup thei a ni mai," a ti ve ta a.

       Hmeichhia chuan a chhang lawk lo. Muanawma malchunga Muanawma kut chu a dah sawn a, Muanawma malchunga a lu chu nghatin a mu zawi nen nen a, a mitah tak enin Muanawma khabe hmul chu a khal nep nep a. "I hmanhmawh a nih kha. Hmanhmawh lo vang aw, tun dinhmunah chuan ka peih rih lo a ni, insiam rem ka ngai alawm," a ti a.

       "Hlauhthawn ka la nei a ni."

       "Eng'e?"

       "I chunga ka rilru put dan chu theihnghilh rawh...a hnenah i kir leh duh ang em?"

       "I mawl a mi? A hun a thlen ṭep tawh hi."

       "Ṭhulh ta se."

       "A ṭhulh ngam awm lo e mai a."

       Ruah sur cherh cherh bak chu thawm dang a awm lo va, mi pahnih te chuan ruah sur chu an thlir dun a, ngawi renga kut invuanin khaw vawh avangin an inkhawr ṭha ṭat ṭat a, inchhunga luh erawh an tum mai lo. Muanawma ngaihtuahna chu a kal thui hle a, a hun chu a thleng ṭep tawh tak tak a, chumi hunah chuan a chan atan eng'e dah a nih leh ang tih a hre lawk bawk si lo. A hmangaih leh duh apiang hi a chân deuh ziah a!

       A malchung khama mu hmeichhia chu a han en a, ani chu a lo maimi'chhing a. He nu hi a duh a ni. A hmuh loh chhungin a lo la danglam tam lo hle a, a tan chuan ngainatawm, duhawm leh lawmawm tak hmeichhia kha a la ni reng a, a duhawmna leh ngainatawmna hian a hmel ṭhatna a hliah zawk ni hial hian a hre ṭhin; mahse a hmel ṭha lo a ni der si lo. A ngaihtuahna avang chuan a nui sak a, a kun hniam a, a hmuiah dim tè hian a zuk fâwp a.

       Hmeichhia chu a rawn meng a, Muanawma chu a rawn ner khum nang nang a, "Ngawt a che aw," a rawn ti a.

       Muanawma chu a nui mai a, a mitah tak hian a en reng a, "Nun hi a awlsam ngai lo, thil nihphung a ni tlat lo; hlim la, hlim fo ang che aw," a han ti daih a.

       Hmeichhia chu a meng hnuai deuh hian a lang a, "Ka hlim alawm. Muana, lut tawh ila," a han ti ve a.

       "A vawt i ti deuh elo?"

       "Imm..."

       "Mu lo khan lo ṭhu teh."

       Ani chu a tho a, Muanawma si chèt hian a han ṭhu a. Muanawma chu a inher rem hret a, a bîanga a kut pahniha dawmin a mitah awmze nei zet hian a han en a, a mitmeng aṭanga a rem ti tih a hriat chuan muangchang hian khaw vawh avanga hmeichhe hmui duk lek lek lum hiam si chu a fawp leh ta a. Ani pawh chuan a lo chhang let mial mial a; mipahnih te chuan an rilru an lantir a ni.

       "A tawk e," tih sap pahin Muanawma chu a hawi sawn a, "Tikhan a lum deuh tawh em?" a ti nui zui sak a.

       Hmeichhia chu lai deuh tak hian a nui sèih a, Muanawma âwmah na lo tè hian a han chum taih a.

       Muanawma bawk chuan, "Mithiam te chuan infawh hian kan taksa mamawh hormones a chhuak hnem a, a hrisel an ti asin; min ti hlim a, nun nguai a ti reh thei an ti alawm, khaw vawt pawh," a han ti leh a, a la nui san san reng a.

       "Ka awih kher lo ve a."

       "A nia lawm, dâwt ka sawi miah lo; chuvangin ti ṭha leh ila."

       "I thaw ve nih chu."

       Hmeichhia chu a nui chen chen a, Muanawma chu a pawm hle hle a. Ruah sur pawh a hàn ta; Muanawma ngaihtuahna erawh a chawl thei lo, a chân leh mai ang em tih ngawt chu a ngaihtuah a, thil lo thleng mai tur leh Dawithiamnu hnen aṭanga a thil hriat thar chuan a rilru a kap tlat bawk a, engmah hi a la chiang thei tak tak lo niin a hria.

       A bula hmeichhia hi hlim se, lawm se, nui se la, a hmangaih ber nei se la a duh a; mahse chu chu ama Muanawma duhthlan tur ni lovin, a thinlunga cheng reng, a hmangaih hmeichhe duhthlan tur a ni si.b"Lut tawh ila. Kei pawh naktukah ka zin chhuak ang," Muanawma chuan a han ti a

       Hmeichhia chuan, "Ngati maw?" a lo ti deuh há a.

       "Tih tur ka nei alawm; bakah, a chang chuan i bula awm hi kan inthlahrung ṭhin."

       "Engvang ngawtin maw?"

       "Ka hre lo. Ka tel lo pawh hian i hlim thei tih ka hria asin," Muanawma aw chu a pangchang ve lek lek a.

       "I tel lo chuan a kim lo, a nuam chuang lo; chuvangin..." hmeichhia chu sawi zawm lovin a ngawi daih a.

       "Sawi zawm rawh."

       "Aih!"

       "Tunah sawi zawm vat teh."

       "Ka duh lo," tih pahin a nui har har a. Inchhungah hmeichhia chu a tlan lut a, an inum lut ta a.

       Khua chu a vawt a, a hnîm reih a, chhum a zing chiai chiai a. Hun hian Muanawma hmangaihna thawnthu kal dan tur chu a hril dawn a ni; thil ri a hriat avangin bathlar lamah a hawi lêt a, vathlar ṭhuthlenga hmeichhe Phone chu a hmu a, a va la a, a han bih a, message lo thleng chu a hmu a; chutah, a hmel chu a tak ran a, a tih lan ngai mang loh thîkna chu a hmelah chhiar theihin a rawn lang a, thinrim hmel erawh a pu lo! Hmeichhe luhna inchhung lam hawiin a ding vang vang a, "Veron...i hlim zui ngei tur a ni," a han ti sap a


SANGU LUIRUAMAH
- Chhantea Pautu

Bung 2 Na

       Zoremsangi awm dan ka sawi hi nakina mipakhat chungchanga thil awm dan kan hriat fiah nan a ni. Hei hi ka sawi duh; eng lai mah hi lo ngaihthahin lo hmaih suh ang che.

       Muanawma a buai ruk em em lai hian kei chu ruahmanna felfai tak pawh nei chuang lova kal bo ka tum a, ka kal bo hmain thil mak leh ngaihnawm takin hnena sawi tur ka nei a, ka sawi ṭan mék tawh bawk a ni!

       Nun hi belthleng, a thal zawnga awm ṭha hle hle lai, vawi-leh-khata khaikhup thawk ang mai a nih châng awmin ka hria! Hmangaihna avangin kan zawltling-vawn-nat a, vawnchhan dapin kan phar ruai a, kan tlu lek lek ṭhin. Kei pawh hian thathona reng reng ka nei lo va, hmangaihna hian thinlung a tih nat awlsam ang aiin a lo dam har si; ka mang zo va, ṭhian kawm ka châk lo va, ka mamawh hle thung. Mahniin ka awm cheuh cheuh a; hei, tlaivar ka hnaih chu a ni leh ta reng mai.

       Ka hmangaihin mipa dang, Social Media vela pawh tak leh nel taka a kâwm vel hmuh chu ka tân tawrh hrehawm a ni a; Rose pâr kuangah hian mi chhun na thei hling zum tak a awm a ni tih ka hre thiam ve ṭan ta a nih hi. Ka awm dan hi ka duh dan a ni bîk lo a; mahse, hma lama ke pen chu ka tân a harsa hle si. Thathona tel miah lova nun hman chu khuang lova chai ang chauh a ni; nun a ngui a, ka tân natna dang a ṭul lo, hmangaihna avanga ka thinlung hliam hi natna a tling tawk hle a. Ka hetih avang hian ramhnuai pilril taka rawl bo ka tum ta a, eng chen nge ka va thang ang a, eng thil nge ka chungah thleng dawn tih chu ka hre lâwk bik lo; a châng chuan tlachawp taka nun hman a, thil tawn apîang pal hmiah hmiah chunga chhawr ṭangkai tum hi thinlung nâ hian a mamawh ve fo niin ka hria.

       Ka sawi tawh angin he ka thinlung natna ka kal bopui hma hian he chanchin hi ka han hrilh hmasa ang che u.

       Chu thil ka hrîat leh zân chu Thla bial zan a ni a, tukverh inhawng lam chu ka pan a, ka thawm hriat chu ngun takin ka han ngaithla a. Kan kawmthlang, Sunhlu kung awmna vela nausen ṭap, lungrun leh lung la tak maia ring vak si lova ṭap leh ngâk ngâk ṭhin thawm chu ka han hre leh ta a, chu nausen ṭap thawm chuan ka tirilah a ṭham a, tukverha dâk chhuaka chu lam hawi reng chung chuan ka ṭim er er a, ka za chem chem a; a ṭap ri chuan khawngaih thlâ a la takzet a ni. A khât tâwkin a rawn ṭap leh ṭhin a.

       Kum 2016 Khuangchawi thla a nih kha. Zan khat chu kan ṭhenawmpa chuan a in piah maiah nausen ṭap thawm hi zing lam khawvar hma hret hian a hria a, ṭap thawm chu pâwn lam niin lang mah se; chuti ang huna pâwna nausen ṭah thu awma a hriat si loh avangin ṭhenawm te nau ṭap ri ni turah a ngai lui a, ṭap ri erawh ring vak si lo hi a hre leh ṭhin. Mu chungin a ngaithla reng a, nausen ṭap thawm chu a chuai raih raih a, a tâwpah a reh hlen ta niin a sawi. Chu thil chu ka ngaihtuahnaah a lo thar nawn leh a, kan ṭhenawmpain nausen ṭap thawm a hriat tûk zîngah chuan kan kawmthlang thingkungah hmeichhia, la naupang tak, hmel ṭha tak pakhat chu a nau pûak lâi nen thî-a hmuh a ni a; an lo inkhai a, inawkhlum ni ngeia rin a ni.

       Chu thil thlen hnu-a he nausen ṭap ka hriat ṭhin hi ka la sawi chhuak ngai lo. Kan kawmthlang thingkunga hmeichhia, la naupang tak leh hmel ṭha tak te nufa lo inkhai ngawt mai te nen ka nun a inkungkaih chhoh tâk dân phei chu ka la sawi chhuak chhin lo hrim hrim; he hmeichhia hi kan khaw mi leh sa a ni lo lehnghal a.

       A khât táwkin nausen ṭap thawm chu ka hre ta fo a, zan reh lam, khawvar lam hnaihah a ni tlangpui bawk. He nausen ṭap thawm ka lo hriat mai theih nachhan pawh hi ka hmangaih châna ka zawltling-vawn-nat avanga ka zan muhil thei lo inṭan aṭang khan a ni, ka tlaivar fo si a. A ṭap lungrun thei hle a, lairil fan ngâih hian a tap ni berin ka hria; midang, hre ve ṭhina insawi hi ka hre ngai miah lo va. An hria a, an sawi duh lo nge, kei chauhin ka hria tih lah ka hre bîk lo.

       Ka hmangaih nena kan inṭhenna pawh thla tam a liam ta; mahse tun thlengin mi hlim thei ka nihna te, thatho thei tak ka nihna te kha ka la nei kir leh thei lo va, ka thinlung hi a saltâng reng mai a ni. Chuta karah, thla hmasa mai khan kum 2016 khuangchawi thlaa kan kawmthlanga lo inkhai hmeichhia kha, ka hmangaih em em Dintei nutei fanu a ni tih ka hria a; kha thil a thlen lai khan kan khuaah ka awm lo va, engmah kha a kîlkèlhin ka hre ve tak tak lo. A hnu-a ka thil hriat zui leh tâk erawh, mi tu te emaw chhungkaw nun buarchuar tak chanchin a nih avangin sawi zui pawh châkawm loh tak a ni; mahse, kei hian sawi ṭul riaua hriatna ka nei a, kan tih sual avanga kan chunga ânchhe lo thleng thei laka kan fimkhur phahna tur a nih ngei pawh ka duhin ka beisei takzet.

       He thil chungchanga keimah ka tel vena bîka in lo chhinchhiah tura ka duh chu- I hmangaih tak tak chu i hmangaih tak tak a nih ngat chuan, eng anga tling lo leh bawlhhlawh pawh ni se, i thinlungah mipawimawh ber angin a châm reng tawh a, a tlin lohna i hriat tam poh leh amah i hmangaihna thinlung avangin i natna a thûk telh telh ang tih leh, i hmangaih chuan nangmah a hmangaih ve vang che ni hauh lo va, a rilru ṭhatna vang ngawta i chunga a ṭhat nasat apîangin amah i hmangaih avanga i thinlung natna a pung zel ang tih hi a ni!

       Tichuan, zan dang ang bawkin nausen ṭap thawm a han reh a, nuam ti lo zetin tukverh chu ka khar a, ka khumah chuan ka mu meng leh ta kar a. Ka rilru-ah naute leh a nu kha an riak reng mai.
* * * * * * *

       Ani chu a hmel a ṭha a; mahse a lerh. A ngainatawm; mahse a nun a rawng si. A zei hle a; chu chu a hlauhawmna a ni thung. A mitmeng, chezia, a pian ṭhatna leh a nu leh pa neihnunna chu a hriamhrei ṭangkai tak a ni. Nula lakah a hriam a chelek hle a; mahse a nula theih tawh ten a fa an la pai ngai miah lo. Hei hi Lalremruata nihna chu a ni.

       Chhiar dawn ta se Remruata kutzungṭang neih hian a nula theih tawh zat a daih teuh lo! A duh táwka a khawih theih hmeichhe derdep hi an lo tam khawp mai; a duhtawka a CK pui theih, a duh hun huna an 'naked pic' a dil chhuah theih hmeichhe ṭhenkhat te chu hmu ta la, i awih loh avangin i nui ringawt hial ang! A hmeichhe kawih thal tawh ṭhenkhat te Sunday inkhawm nungchang hmu ve ngat phei la chu, Zoram Kristian-te nun pâwnlàn dan thûk leh ril zia chhut thiam i nih ngat chuan, zirchianin tun lai zoram khawvel nun leh Sodom leh Gomorra nun tehkhin inhmeh zia i hmu pha ngat ang!

       Chuti ang thil a nih mek laiin Hminghlui chu tleirawltè, zakzum tak, nu hnâp mai, a rualpui khawpui tleirawl dang te ang lo taka tunlaina ṭha lo takin a la khawih dâk loh, thianghlim fai ser mai a ni; mahse a thinlung chu hnehin a awm ve ta.

       Star chu a lo nei ve fo tawh a, ngaihzawng erawh a la nei ngai lo. A tleirawl tituai chu a nalh takzet a, a pian a fel thlep a, sweet sixteen pel chho hlim, nula puitling taksa pu chho ṭan leh taksa inphut mawi tak a ni.

       Ṭhalai ten Phone changkang an nei sup sup a, Social Media luhchilhin ṭhian kawm nan tak an hmang chho a, Social Media chhungah ngat chuan nun a lo zalen halh mai si, tuma'n min khap tak tak thei lo va, khap phak niin kan inhre lo hrim hrim bawk. Kan duh duh Mizo ṭawng hawrawp dik mang lovin kan sawi a, kan duh duh pic kan upload a; chuti anga kan awm dan lo kalha sawiseltu chu kan lim erh ṭhin. He tunlaina nun hian Hminghlui pawh a kal kân tak tak thei bik lo.

       Zankhat chu a status-ah, "Ka lug a leg eee...khwge ka lèn tir ag ooo..." tih hi a post a.

       A post hnu lawkah mipakhat hian, "Hetah ron len tir rwh," tiin a rawn coment a.

       Hminghlui chuan a Profile a'n check phawt a. A hmel a ṭha, a pa len hmel khawp mai. Tihian a va chhang a, "wm hlat hmel e mei..."

       "Hla lo lutuk...i bul lokah k om maithei sin..."

       "Hla i tihna..."

       "Hehehe...i van ce lo..."

       "Cuti mi...lom e..."

       "Mmm...khoi vengah ge in om?"

       Hminghlui chuan a chhang zui tawh lem chuang lo va; mahse chupa chuan zan rei deuh tawh hnu-ah inbox lamah a rawn be zui ta nge nge a. Pangngai tak leh polite takin a rawn bia a, ani pawhin ṭha takin a lo kawm ve zel a, chupa chuan fiamthu a duhin a ninawm lo tawka chhan dan a thiam hle.

       Chuta ṭang chuan an inbia an inbia a, mipa zawk pawh a huangtau sawtin a ngampa tan tawh hle a, huat theih chiah si loh hian ṭawngkam eng emaw deuh hlekin a fiam ṭan ta zauh zauh a; a ninawm miau loh avangin Hminghlui chuan a haw miah lo. Chutia an inkawm nasat lai tak chuan zan khat chu a chhan sawi miah si lo hian mipa chu a reh ta daih a; 'a reh' han tih lemah, reh tak tak chu a ni lo, amah Hminghlui chu a be ta lo mai zawk a ni. Zan thum ngawt a reh a, Hminghlui chuan a ngai ru ta hle mai si, rawn biak a tum tawh der si lo, a mangang ru em em mai a, biak hmasak a hreh si, midang post vel leh pic vel chu a coment tho bawk si a; chu'ngte chu a lo thîk ve em em ringawt mai a ni!

       Zan linaah chuan a rawn be ta a; Hminghlui chu a phur takzet a, a lo thinrim rŭk vang erawh chuan a chhang vat duh bik lo. A vawi thum rawn inbox naah chuan a chhang lo phal ta bîk lo va. A han titau dawn a; mahse chupa chuan a tilungawi thiam ngang mai. Hminghlui chuan ṭawngkam zahmawh lek leka a fiam leh zeuh ṭhin pawh chu a haw phal tawh lo; a rawn biak loh chhung khan a lo ngai hman hle a ni.

       An inbe ngawrh chho lehzual a, mipa a zei a, a nawr thiam em avangin an CK ṭan ta zeuh zeuh bawk! A tawpah chuan hun remchang dapin an inhmu ta nge nge a; facebook inbox lama a lo CK pui fo tawh avangin mipa chuan a zuam nghal hle mai. A vawi khat tihna a nih loh avangin Hminghlui chu a nawr thiam hle a, hemi zan hian Hminghlui chuan a virginity chu a hloh ta ngei reng a.

       Mahse, Hminghlui chu a hlim tlat! Remruata hi a duh a, a hmangaih a ni. A tân chuan eng pawh a huam a, engkim a phal a, a tana a inpekna hian bituk chin a nei thei lo vang. A virginity hloh mah se, a hmangaih ber tana a rohlu ber pea a inngaihna chuan a hmel chu a tisen siah a, a mitmeng chu a rilru hlim avangin a de sawr sawr a.

       Remruata rilru erawh a dang daih. A haw hnu chuan, a online a, Hminghlui a wish hnu-ah zan tam tak ṭawngkam zahmawh uchuak tak taka a lo CK pui tawh Sangpui nen chuan an hna ngai chu an chhunzawm zui leh a. Sangpuii hi Pasal pawm lai nei, fa pawh pahnih nei tawh, a hahdam avanga no sen sak mai, nu hmel ṭha tak, kum 30 bawr vel mi a ni. Remruata nen hian ṭawngkam maia CK lovin a pasal zin bo hlanin an khawsa dun fo tawh!

       Pain pa a nih a pawisa lo va, nuin nu ka ni tlat a ti phal tawh lo. Tisa nawmnain nun a rûn a, Remruata hi sual hmanrua pakhat a ni.
* * * * * * *

       Kaslla chuan a lo hriat tawh; mahse rei tak a chhung te laka a lo thup tawh au thawm chu a hre leh ta a. He au thawm a hriat hian zanlai dar 12:14am vel bawr hi a ni ziah a. A ngaihna hre lova awmtirtu, a chhungril ṭham a, a hmul thî ti ding fotu he au thawm a hriat ṭhin hi ngaia neih harsa a ti em em a.

       Zan dang ang bawkin a tho a, emergency light chu a han on a, thim zingah chhuakin a mutna dup nuam tak chu a thawh san leh ta a. Hemi zana au thawm a hriat hi chu zan dang aiin a dan a dang deuh niin a hria a; zan dangah chuan, au thawm chu hre mah se, khawi lam aṭanga rawn chhuak nge tih rin ngaihna a hre ngai lo. Hre reng chungin in chhung kil tin a fang kual a, mahse a kal lohna lam apiangah au thawm chu a awm ni maiin a hria a ni; chu pawh chu a ni chiah em tih a chiang chuang lo.

       He thawm hi mipakhat thawm mai a ni ngai lo va, thawm inpawlh, hmeichhe aw ni awm tak tak pawh tel, mi pahnih pathum lai, na tuara an ṭe thawm, mangang leh sarak vak vak thawm a ni ṭhin.

       "Awi ka nuuuu...ka duh lo...!"

       "Khawngaihin ti suh, ti tawh lo hram rawh...!"

       "I fapa a nih kha, i rila rah a ni asin...tawp rawh...duh tawk rawh...!"

       "Awi ka nuuuu...a na e mai...min pui teh u...!"

       "Âpa...âpa...âpa...ka duh lo...!"

       Heti anga au thawm rapthlak hi kumkhat zet an luah tawh inah chuan Kaslla chuan zantin, khel lovin thlakhat chhung chu a hre ta. Thawm awmna a zawng a, a hre thei lo. Chu thawm chuan a lu bûrah a luh ngut ngut a, a nun chu a zuai zo a, a chaw ei tha a tho thei lo va, a cher talh talh a, a pawr phang mai a, zanah hian thlakhat chhung chu mutmu a tuah mumallo reng reng a ni.

       Kaslla hi tlangval senior ve ṭan tawh, mahni tawka sa nghet tak, dawihzep lo tak mai hi a ni a, an inchhunga thawm ngaihnawm lo zet pawh chu sawi chhuak duh lovin amah ngeiin a chhan zawn chhuah a tum tlat a. A chhung te hian engmah an hre ve lo niin a hria a; chuvangin han hrilha an rilru han tih buai ting tang kha a duh lo a ni.

       A emergency light ken chu a han herh êng zual sauh a, a lu bûr luhtu, a thluak ti buai vek thei khawpa mihring na tuar ṭe thawm lo rik chhuahna lam chu a pan ta a. An in hi in lian ve pangngai tak,  in sak dan dang ang lo taka an sak a ni a. In chanve vel innghahna lei chu 6ft. vel dawn hian laih khuar a ni a, chumi laih khuar chhuat chu in chhuatah chuan hmangin, choka atan te, ṭhutkhawmna pindan atan te leh chaweina hmun atana hman a ni a; mahse, in chanve chhuat chu sang zawk hle chungin choka a tana an hman leh chhungkaw chaw ei nan bera an hman bawk in chanve dawn chu a chung rangva thlengin engmah chhawng pawh awm lovin a awm a, chumi awm zia chu, choka, ṭhutkhawmna pindan, chaweina hmun te chu a lîang a sângin a thawveng hle tihna a ni. In innghahna, laih khuar ve loh, in chanve vel chu a chhawnga awm a ni a, chu'ng chu Kaslla te chhung, chhungkaw rual tak, mi pakua lai te chuan mut pindanah an hmang vek thung a, a chhawng chunglam thlengin. Ka han sawi leh duh chu, in hi sak dan danglam tehchiam awm lovin killi nei a ni tawp a, a dung 40ft. vel leh, a vang 36ft. vel a ni a, chhim leh hmar hawiin a dung a, hmar lam, a innghahna lei laih khuar huam chinah luhna pui ber, kawngkapui kan tih ṭhin hi a awm a ni.

       Kaslla chuan thawm awmna lam nia a hriat choka lam chu a han pan a, a chhuk thlak hnu chuan curent a han ti eng a, a bengah chuan au thawm chu a la ri reng mai!

       Choka leh ṭhutkhawmna leh chaweina pin dan bang, a nihna takah chuan leih laih khuar bang chu lungrem nalh tak vek hian a mar nalh zaih a; mahse mak deuh mai hian chhak lam pang hmun hnih lai chu rual rem vak lo hian in chei danglamna ni awm tak hian a bang lung rem chu bang dang aia a poh bakah, a rual rem lo hle mai a. Chu lung rem rualrem lo leh poh bik inkar lai chu ṭhutkhawmna pindan zawn chiah hi a ni a, chu lai takah chuan lehkhabu dahna chhuar hi a awm a, lehkhabu eng emaw zat hi a inrem ṭhat bawk.

       Kaslla chu a lu bûra au thawm châm tlat avang chuan ṭhutkhawmna pindan chu panin a kal zel a, chhak lam bang poh bik pakhat zawn a thlen chuan a thil hriat chu a reh ta daih a, hmun danga ri ang pawhin a hre tawh lo. Thawm chu thehhmeh ang mai hian a reh vung vung a. Chutia thawm a reh ta thut mai chu mak a tiin a hrilhhai ang reng zawk hle a, hriat leh tumin a han ngaichang ngial a, a hre leh ta chuang lo. Mak ti deuh tak hian a kal sawn a, chutia a kal sawn veleh chuan au thawm chu a hre leh ṭan nghal a. Chhak lam bang poh bik lai vel aṭanga rawn chhuak ngei ni hian a hria a. A va pan hnai leh a; mahse  a hmaa a dinna zawn a thlen chuan au thawm chu a reh leh ta daih si a. Mak hi a ti lehzual a. Rei vak lo a din hnu-ah a kal sawn leh a; mahse current a han off chiah chuan a ngai te bawkin au thawm chu a bengah a lo ri leh ta. Kaslla chuan mak a ti, hemi zan ber kher hi chuan a lo chhuahna ngai aṭang hlirin au thawm chu a lo chhuak si a. A let leh ngat a, lung rem poh zawn a thlen chuan au thawm chu a reh leh hmak a.

       Kaslla chu a ngaihna hre lovin a ding ta reng a, lung rem poh bik chu a en reng a. A nakinah phei chuan a hnaih a, ngunthlûk zet hian a han en a, chu lung rem poh bik rual rem lem lo zet chu a kutin a han khawih a, hnai set sawtah lung rem chu a han en a, a beng chu dawhin lung rem poh bik lai chu a bek a chuan han siktir a, ngun deuh hian thawm a awm nge awm lo tiin a han ngaithla a. Minutes nga vel a ngaihthlak hnu chuan hla deuh taka au thawm ni awm tak hi a han hre ta a, hla taka aw ri a ni. Chu aw chuan mangan hmel zet hian, "Kal rawh, kal rawh, kha a khawih ang che, a khawih ve mai ang che," ti ni hian a hria a; hmeichhe aw a ni.

       A beng chu a dawh reng a, aw chu lo hnai tial tial hian a hria a. Chutihlai chuan  Kaslla hmul thi chu a ding sung sung a, chhung lamah vawtin a ṭham emaw chu tih tur khawpin boruak a dang lam a. Aw chu a lo hnai zel a, a awm pawh a nuam lo telh telh a, a velah chuan amah uap khurtu thil eng emaw hi awm tlatin a hria a. Chutah, hmeichhe aw ring zet mai hian vin zet hian, "Kal rawh ka tih chu...a khawih dawn che kha," a rawn ti ta thut mai. A sawitu rawl a vin em avagin leh a rin em avangin Kaslla chu a phu chiang hle a, bang aṭang chuan a per sawn rang hle a, chu achhapah, a beng bul lawkah hian, "Khi khi hnaih suh," tiin mipa aw thum lam hian a rawn ṭawng khum dùt hian a la hre zui a, a inher zawk a, tumah a hmu si lo. Lung rem poh bik chu a en vawng vawng a.
* * * * * * *

SANGU LUIRUAMAH
- Chhantea Pautu

Bung 3 Na

       Kan sawi inkarkirik lo thei dawn lo va, thil thleng zawng zawng erawh a inzawmna lai a awm zel dawn a ni.

       Tun hnu hian naute nu kha Remsangi, Dintei nutei fanu a ni tih ka hria a; chutia nausen ṭap thawm ringawt ngaihtuaha ka leh ka leh tâkah chuan, ṭha lo tiin thil dang ka ngaihtuah lui ta a; Dintei nena kan intawn tirh lam kha a ni- kha boruak nuam leh hlimawm lutuk mai kha; nimin maia thil thleng ang maiin ka la chîang a.

       "I hnenah dâwt ka sawi i duh em?"

       "Duh lo, dâwt hi ka hua. Mahni thutiam hlen thei lo hi ka hua. Mi rinawm lo hi ka hua. Mi bum chîng hi ka hua..."

       "Nang paw'n ka lakah he'ng zawng zawng hi ti miah suh ang che," kei chuan ka lo ti a.

       "Ka tih duh loh vang a ni e tlang taka ka awm, rilru pêk dân tâwk pawh i thiam dawn nia, ka care vak dawn lo bawk che nia. I rilru tihnatna tur chi a thlen lohna turin ka care vak dawn lo che; kan beisei ang kan hmuh leh si loh hian a hrehawm thin, ka lo tawn tawh avangin...ka care theih hun che a lo thleng thei ta a nih leh, kan la ti dawn nia."

       A mi chhanna sei ang reng tak chu a dikna lai a awm ka ti a; mahse min ti hnual ang reng. Eng emaw chen chu ka reh phah ta nghe nghe a.

       Facebook leh Whatsapp lamah kan inbe phawt a, a tâwpah SMS pack ka ngîat a, a mak lutuk, SMS pack a thun tak tak; keimah vanga thun a nih thu a sawi a! Chutia ka reh leh deuh daih tâkah chuan a SMS ka hmu ta a; a dik tak chuan ka reh chhan kha ka ngaih loh vang a ni lo, a thu sawi avangin ka invêng ve deuh ringawt zâwk a ni chauh si a.

       "LALCHHANHIM...ka SMS pack thun hi a zawh loh vaih chuan i châk lo vang...ih maw!?" a rawn ti deuh tawp mai a; khawl mai a.

       Kei chuan, "Mmm...eng'e?" ka ti a!

     "Nikum te khan min ngai thei lutuk tiraw?"

       "Hehe...'tinge min dâwp kher a?"

       "Ka dâwp lo che. Ka hre ṭhin a...min ngai tih hi."

       "Nia, ka post coment-a i lo lân tam vak loh kha chuan a dân a dang ve alawm."

       "Nia, i post coment aṭang khan mipakhat chuan kan inngaizawng emaw a tia...inbox-ah min rawn zâwt alawm."

       Chu a SMS rawn thawn ka chhiar zawh chuan, "I va'n nghal reuh tak," ka han tingawt a; ka lai a niang.

       "Engvang chuan maw?" tiin mi rawn reply hâ a!

       "I ngaihawm em alawm."

       "Hihi...nang pawh i ngaihawm. Kei paw'n a tir aṭang khan ka ngaina ve nghal em em ringawt che."

       "Nuthlawi piangthar *** emaw ka tih kha, nula dik tak a lo ni reng a..." ka nui a.

       "Hihi...chimawm..."

       "Hehe...chuan, min ngai ve miah lem lo em ni...?" ka'n ti leh ngawt a. A hnu deuhah, "Ka zawhna chu a va'n ṭul lo tak. Mu tawh ang aw?" ka'n ti leh hrâm a...

       Ani chuan, "Fb-a kan in-friend aṭang khan min tihlim lutuk. I thu post lo coment te kha a nuam ka ti ṭhin. Ka thlalák i lo coment paw'n ka lawm ṭhin; chuvang chuan reh suh la...i reh chuan ka ngai lutuk ang che."

       "Aw le...mahse net-pack neih reng hi a har a...chuan, mebhi bohut khush hu," ama Hindi min zirtir chu ka'n hmang nghal zaih a.

       "Net-pack chauh ka sawi lo," a rawn ti a. A hnu deuhah, "Hehe...i va'n thiam em em!" tiin min rawn fak zui a. Ka reply leh hmain min rawn wish nghal ngawt a, "Mu tawh ang aw...mut tui aw...ka tlaivarpui che a nia..."

       Keiin, "Min tlaivarpui ve ziah...thawnthu ka ziak leh dawn khawp mai," ka ti ve nghal zat a.

       "Ziak leh la; mahse min puh tawh kher suh ang che."

       "Ka puh leh vek ang che. A changtupa hi ka zîak khawngaihthlak ziah ṭhin."

       "Phakar..."

       A'n nuam thei khawp a.

    Vawikhat chu nilêngin ka text lo va; mahse ka ngai hle tho. Mut dawnah ka text ta chauh a.

       "Vawiin eng'e i tih a?"

       "Ka sawi peih lo!"

       "'Tinge a!?"

       "'Timah...ka sawi awm lo!"

       "I lungawi lo ami a...Duhtak?"

       "Mu rawh," a rawn ti ta hmak a!

       A va'n buaithlak tak, a thinrim chhan ka hre si lo. Hmeichhe thlem hi ka zei miah lo; tih thinrim zual ka hlau chuan ka va wish ta ngawt a.

       "Muttui aw...tui tawkin i muhil dawn nia...duhawm leh lutuk mai," tiin min reply pawh ring lovin ka va text a; mahse min reply leh duh hlauh mai.

       "Blehhh!" a rawn ti ngawt a; a fuh dawn ṭan e.

       "I ṭha lutuk a nih mai chu a."

       "David Lalchhanhim Pautu."

       "Ka ngai che."

       "Min ngai thlâwt lo...dâwttt!"

       "I va han hre lo tak emmm."

       "Hre bawk...min be lo paw'n i awm thei lutuk. Min ngai bawk lo."

       "I text ka hmu si lo...Whatsapp ka rawn check...i lo online...ka lungawi lo hmel i hmu lo a nih kha."

       "I online leh online loh ka en reng alawm...a lang vat thei lo ka tia lawm...eng'e vawiin nilênga min rawn text loh vel...thinrim zawkah te chuan i la ṭang zui lehnghal!"

       A thinrim chhan ka man ta chiah, chheh chheh mai a, "Ka thinrim tawh lo bawk...ka ngai che," ka'n ti leh ngawt a.

       "Thinrimmm...min ngai loooooo...!"

       "Ka ngai che(100)"

       "Ngai lo(100)"

       "Duhtak?"

       "Eng'eeeeee...?"

       "Ka ngai tak tak che asin."

       "Min ngai rêng rawh," a duhawm asin.

       "A nih...nangin?" ka han ti leh a.

       "Aw."

      "Hehe...a tho hnuhnung hnung beng sûk..."

       "Aihhh...a fair lo."

       "Hahaha...a nih inchum?" ka ti leh a.

       A lo ngam hle a, "Aw...min chum pha dawn chuang lo va...hihihi."

       Kha'ng hun zawng zawng kha hun kal tawh a ni ta si a! Ka ban phaka a awm loh hnu-a ka nun danglam zia te, ka kim loh zia te kha.

       Engvang nge ni ang le!?

       Ka hre lo, ka hre miah lo; a chhànna ka hre chhuak zo lo va, ka zawngin ka dap thiam hek lo. Demawma lang te ka dem thei si lo va, chawlhna ka zawng a, tih dan ka dap a, vawn tur zawngin ka mit ka lèn kual a, rinchhan tur dapin ka kut ka phar a; mahse, ka hmu lo, zah pawh ka zah zawh loh khawpa ka harsatna hrilh fai kêlh tur mi ka hre lo a ni! Tlâwmah ka la a, zahthlâk ka ti a, ka dinhmun sawi tur khawpin ka pûak keh ngam lo a ni. Mi te hnena ṭanpuina ngen ka duh lo, ka zak tlat.

       Nui chungin chhungrilah ka tuar a, hmel hlim pu chungin ka âwmah hian mi hnawh ep ep a, a va hahthlâk tak! Engtin nge ka tih ang? Engtin nge ka sawi tâk ang le? Heti ang tak hian thil a lo kal thei em ni? "Ka zâm a ni; LALPA, I kut chauh lo chu innghahna tur ka nei ta lo. Nangin ka mamawh i hria a, min pe ang che aw!" tiin ka thinlung chu a rûm a.

       Hetih lai hian ka hnathawhin a ken tel tlat avangin nui chungin midang ka hmachhawn a, ṭawngkam thlumin midang ka dawr ṭhin; ka chhungrila nun inlumlet vel nen chuan inhmeh lo ka ti kher mai. Duh chuan mit tui ko chhuak thei ka ni; mahse ka ṭap tawh lo vang. Tumah ka haw lo va, huat lah a ṭangkai hek lo. Ka dem lo va, an ṭanpui beisei pawh ka tum tawh chuang lo. "Tunah ka dinhmun phet mah se..." tiin ka inngaihtuah a. Ngaihtuah chhunzawm duh lovin ka hna ken tel thil chu ka ziah zawm zui ta daih a.

       Zan thum zet chu nausen ṭap kha ka hre leh ta lo va; ka chauh deuh avangin ka lo mu nghet ve ta deuh nge phei chu ka hre lo. Mak ka tih em em chu, kha nausen ṭap thawm kha tumah hian an hriat ve thu an sawi ngai miah lo hi a la ni reng mai. Ka bengah erawh a chîang hle si a.

       Ka hna thar chu ni thum chu ka thawk ve ta a, zep lem loah chuan a hahdam lo; mahse, hnathawh chu a hahdam viau thei lo tih ka hria a, lung ti dam lo boruak dang nena han chawm pawlh erawh a tui lem lo ṭhin ngawt a ni.

        Ka nuna thil thleng- hmangaihna lama ka tluan lohna, chhungkaw boruak ṭha lo, dinhmun leh rahbi tleu, bul ṭanna retheihthlâk leh, hna ka han thawh dawn tak taka taksa lama harsatna lo awm ve leh sek ṭhin te hi engvang nge tih ka hre lo takzet a ni. Nun zir ka ngai em ni? Pathian hian eng'e min zirtir a tum? Nge, ka dài sual rah ka seng em ni? Hetia ka han inngaihtuah thlen tâkah chuan, ka dài sual rah seng ni ngeiin ka inhre ta a. Ni e, hum sual kha ka dai tak asin. Ka ke kha ka chhep sual tak asin. Ka tih loh tawp tur thil kha ka tih tâk kha. LALPA leh!!!

       Ka phu zawk a, ka hnung lam chu ka han hawi vat a, kan nau pakhat a rawn kal hi a lo ni. Ka rilru a kal ding a leiah a rawn luh lai ka lo hre miah pek lo a.

       "U Chhante, in chu luah dun ila," a rawn ti nghal ngawt a.

       "Kan tum dawn nia. In luah tur lo dap ve deuh la," ka lo ti ve mai a.

       "Aw, ka lo dap ve ang, kan College hnaih deuhah ni thei se."

       "Kan hmuh a thu le. Zâna ka muthilh tawh hnu leh, chhuna ka awm loh deuh apîang hian helai chhuat hi thlahrâng leng tawk lek hian a lo kaw ziah asin," ka han ti a. Ani chuan a awih lo nasa mai.

       Chhuat lo awng ziah chungchangah hian ka daw miah lo va, thawm danglam erawh ka hre ngai si lo a ni. Tun dinhmunah ngat hi chuan thlahrâng pawh rawn inlâr hlauhawm teh mah se, eng hèhù-ah ka ngai miah lo vang; ngaihtuah dang tam nâk alai a. "Heti reng chu ka ni lo vang," ka ti rilru a.

       Dem tur chu ka zawng chawp thei alawm; chu chuan sâwtna a nei lo tih ka hriat chian em vang erawh chuan tumah dem ṭul ka ti ta lo a ni. A tira a hming ka sawi lan tawh ka ṭhianpa Dinsanga chanchin chu ka han ngaihtuah a.
* * * * * * *

       A zin haw leh hny karkhat a liam-ah Es-i chuan Muanawma chu a rawn bia a, "Muana, ka tân nangmah hlata awm hi a ṭha a ni," a rawn ti a.

       Muanawma chuan eng vakin a chhang lo; mahse thil a han ngaihtuah a, Es-i tana a inpek zia te a han ngaihtuah thleng a, a rilru chuan, 'Khawhar hnem atân chauh a ni maw min lo hman,' a ti a.

       Es-i hian harsatna a tawh apiangin Muanawma a pan ṭhin, ani hian a lo hnar ngai lo va, a lo induh khum ngai hek lo; mahse eng nge thleng ta hi.

       Muanawma chu a thinrim ve ta thut a, "A ni maw, vawi khat pawh ka rawn be pawp tawh lo vang che," a ti chhum hmak a. A be leh ta lo. A hun kal ta kha a ngaihtuah fo va; hmangaihna a natpui ṭhin kha.

       Muanawma chu kum 18 a ni ve tawh. Zanlai hnulam a ni tawh a, Siamsiami nu leh pa te chu ramah an riak a, a nau te chu an mu tui hle tawh bawk. A nau te hi an mu nghet thei hle a, an muthilh tawh chuan an harh mai mai tawh lo tih pawh Muanawma chuan a hre chiang hle tawh a; achhan chu hemi zan hi zan rei tawh hnu-a Siamsiami te ina a kal vawikhatna a ni tlat lo a ni.

       Thimhlim khan a pa hnenah Remthanga te ina lehkha zira a riah tur thu kha a sawi tawh a, Remthanga te in aṭang chuan dar 10:00pm hnulamah Siamsiami te in lam panin a kal leh ta a. Mawlmang takin ngaihzawng a nei ve tawp a, hemi ṭum hi a neih hmasak berna a ni bawk.

       A naupan laiin kawmserh a ni fo a, ṭhianzaho awm khawm zinga a tel ve ṭum pawhin a ṭhian te chu midangin an kawm hran sak fo a, a tawpah mal taka hnutchhiah a ni leh ṭhin. Hei vang hi a ni mai thei, naupang ṭawng duh taka sawi a ni ngai lo va, tumah a ti buai hmasa ngai lo va; mahse, a dawih vang chu a ni miah lo. A nihna takah chuan naupang luhlul leh ngawichawi tak a ni, insual pawh a hrat khawp mai. Mal tak leh khawhar taka hun hmang ṭhin a nihna chuan luhlulna mai piah lamah tawrhchhelna a neihtir a; chu a luhlulna leh a tawrhchhelna chu a puitlin hnu-ah a chhawr ṭangkai ta a ni.

       Luhlul, sual, huaibak, nawrh leh suakbak chu a naupan lai aṭanga a awm dan a nih miau avangin a pa thunun pawh a tawk nasa reng a, amah pawh hian, "Kei chu, ka pa vuak ṭhat ka ni," a ti mai zel. High School a kal ṭantirhin a tleirawl ṭawng duh a rawn chhuak ve ṭan a, hmeichhiain a bula awm nuam an ti ve ṭan a; mahse amah chuan tumah ngaihzawng enin a en lo reng reng, fiamthuin a titi a, a kawm hlim a ni ve mai a ni. Chu'ng hmeichhe karah chuan Siamsiami chu a mitah a danglam bik a, a laka a awm dan pawh a danglam a, a tân chu tleirawl chu duhawm leh ngainatawm tak hi a ni ringawt mai a ni. Siamsiami awm dan pawh chu Muanawma aiin a dang vak lo; mahse Muanawma chuan eng tia han tih vak pawh a tum chuang lo va, chutih lai chuan Siamsiami ṭhiannu Hriati nen chuan an School bang an haw rual a, chumi ṭum aṭang chuan hemi zan anga Siamsiami nena an hun hman ang bulṭanna hi a inhawng ta a ni ber mai.

       "Muanawm, i pa lo ka ti," Hriati chuan a han ti ngawt a.

       "Engvang ngawtin maw?"

       "Siamsiami hian a duh che tih i hre reng a, bem pawh i bem ngam lo."

       Hriati'n chutia a tih hnu chuan Muanawma chu a ngawi reng a, a inngaihtuah nasa ta mai a, a ṭawng duh lo thar leh ta thut a, in a thlen hnu, zan lamah te chuan a ngaihtuah chian poh leh Hriati'n a tih dan chu tlàwmah a la a, amah chauhin khumah a insawh a insawh a. Siamsiami chu bèm a tum nghet ta bur mai a ni.

       Nikhat chu School an chawlh a, an veng bul hnaia kawngpui laih tharah Muanawma chuan Siamsiami amah chauha a awm lai chu a hmu a, a thil tih tum chu tih puitlin ngei tumin a pan a, thil eng emaw mai mai an sawi dun hnu-ah Muanawma chu rei deuh hi a ngawi ta reng a. Sawi ṭan dan tur a hre lo a ni, engtin nge mipain hmeichhia an bèm tih chu tumah a lo zawt si lo va, a ngaihna a hre si lo; mahse bèm ve ngei chu a duh si. A rukin a insehruh a, a ṭang mar ṭeuh a, a duhna chuan Siamsiami lakah a tizak a, ṭawng chhuah harsa a ti deuh ta tlat a, midang han tirha ṭhian te han sawitir ngawt lah chu pa lo a ti nasa mai si a. Mipa tân hmeichhe laka rilru put dan mahni pawha sawi ngam loha ṭhian te sawitir hi nep a ti ve tlat. Mahse a huphurh si, sawi chu a ngai si. A tawpah, "Ka hmangaih che," a han ti ve ta tawp a.

       A sawi dawn leh a sawi lai chuan a sa pup pup a, a sawi zo erawh chu a thaw a veng ta sawt a. A ṭawng a kal sawt a, sawi tur pawh a hre chawp ve ta mai a; a hmasa berah ṭawngkain hmun leh hmunah, hmaichhanah ngat hmeichhia a bèm ngam chu hlawhtling a inti tawk viau. Siamsiami chhanna erawh, "Exam zawh min nghak rawh," tih a ni.

       Muanawma chu a dawhtheih loh a chhuak a, Hriati bulah, "Min chhang nghal lo khanglang a, vawi thum aia tam ka sawi nawn dawn lo," a ti ve ta hmak a. Mahse vawi thum kher sawi chu a ngai ta lo a nih kha.

       Siamsiami chu a lian vak lo va, a sam a dum ngil seng a, hmel ṭha tia han sawi viau tur aia duhawm tak hi a ni mah mah zawk, Ralte hmeichhia tih takah mipa tih lawm a harsat vak lo va, ngainatawm leh duhawm, ngaihla deuha awm dan a thiam riau ṭhin; Muanawma nun chu amah avang hian a kim a ni. School kal te chu a nuam thar a, khawvel chu siam zawh hlim ang mai hian a thar ta ser ser a. Chuti ang chuan tleirawl inngaizawng ṭhenkhat dang te ang thoin an hlimin nuam an ti a; heti thleng thleng hi an thleng chho a, Siamsiami nu leh pa ram riah apiangin Muanawma Remthanga te inah lehkha zir turin a riak thla ziah a, hun hi a châng chuan an tan a kal chak mah mah deuh ṭhin.

       Thla mang lai a nih avangin zan thim chu a zual hle hian a hriat, thimthamah Muanawma chu Siamsiami te in lam panin a kal khat khat a, a hmanhmawh ru hle a, hmuh a chak tawh a, a ngai riau a ni. A tih tawh lam vekah chuan a rilru a pe na thei ve hle a, tawnhriat nei miah lovin a kum naupan aia zei ru riau tleirawl nen an inngaizawng a, a zûnah a uai nghet riau mai si a, a hmu kham lo va, hmeichhe panin a kal duan duan reng a, a chang chuan a ti lutuk deuh mah mah ṭhin mai thei.

       A thleng a, ti ṭhang leh hre ṭhang tih hriat takin kawngka pawh kik lovin dim tèin kawngkhar chu a hawng a, inchhungah chuan a pen lut a, chhuata puan phahin Siamsiami chu a lo muhil bêm a, a nau te chu an muhil vek tawh a ni ang, tumah a hmu lo. Ding chungin ngawi rengin a thlir a, chutah a ti harh a, Siamsiami chu a rawn zi ian ian a, Muanawma chu a melh chho ralh a, zawi téa phun sapin mu ve turin a han mitmei a. Ngawi rengin eng emaw chen chu an inkuah chial a.

       Muanawm hi a vawikhat ngaihzawng neihna a ni kan tih tawh kha, a thinlungah sex a lang lo a, a rilru hian a ngam pawh a ngam kher lo vang. Lungawi takin ngaihzawng a nei ve tawp a, a kuah a, innghenga an awm theih chuan a lawm tawk a tling ve em em a; mahse Siamsiami chuan, "Pindanah, khumah va insawn ang aw," a ti ta sap a.

       "I nau te an harh ang."

       "An harh ngai loh khâ. An mu nghet thei lutuk."

       "An harh palh chuan i pa bulah an sawi ngei ang. I pa, a strict si."

       "An harh lo vang, an harh ngai lo tih i hriat ve reng kha aw."

       Pindana khumah chuan an insawn ta a, eng emaw chen chu inkhawih lem lovin an awm ṭha ve mai mai a, a nakinah chuan Siamsiami zawk chu a che hmasa-ah a ṭang ta a, a che set set a, Muanawma chu a han kuah chèih chèih a, mipa tana hnar har tur tak hian a ti thiam riau a; mahse Muanawma chuan duhthawh taka lo fawh bak rilru dang a pu lem chuang lo, a thisenin a ngam lo nge, a naupan rilru dawih vang, sex hman chu ngaihtuah thleng mah se, chuti ang tihpui tumna tak tak a nei lo.

       A hmeichhia zawk chuan a ngam huai riau a, a phun sap sap a, maimi'chhing tlat mah se a taksa chu a phusa viau si. Muanawma pawh chuan a hrawm ṭan ve ta bawrh bawrh a, a tawp la thleng em lo mah se sumkar a nei ta bik lo; mahse, a tawpkhawkah chuan Muanawma rilru chu a 'hmul' tluantling ta chuang lo va, tin, Siamsiami chu a tak taka inhawng vek lo ni tlat hian a hria a ni.

       Chumi zan chuan Muanawm chu khawvar dawnah a haw a. Mak tak a ni; sex an hmang miah lo! A hnu-ah erawh Hriati hnen aṭanga a hriat leh danin, khami zana Siamsiami awm dan kha Muanawma'n amah a hmangaih tak tak leh tak tak loh a fiahna a lo ni awm e.

       Khaw hmuna awm dun ni mah se an rilru leh thinlung inhrilh tawn nan 'Love Letter' an hmang a, an ṭhian te an inpek tir loh leh an note book-ah an lo inzeh sak a, chhung te hriat lohin hmun fianrial an pan a, thinlung hlim leh nui san san chungin an chhiar a, duh tak te an duhtawka an inbunruahna lehkhathawn chhiar tluka hlimawm kha an tan chuan a vang riau a ni; Muanawma chuan Siamsiami lehkhathawn chhiar turin an in bul huan a pan ziah ṭhin.

       Vawi tam an inhmu fâl a, vawi tam lehkha an inthawn a, an inning lo va, an kara buaina awm ṭhin chu thikthu kha a ni deuh mai. Inkai rialin School kalkawng kha an zawh dun rel rel a, an inhmeh a ni. Chawlhlawkin an inpan chat a, chawhma banah an haw rual a, chawhnu lamah an kal rual a, ban hnu-ah an haw dun leh a, Siamsiami ṭhiannu Hriati te inah rei lo te tal an awm dun leh ziah bawk.

       Mahse rin loh lam aṭangin thil a thleng a, Muanawma'n a naupan laia a kawm ṭhin, mi kawm hran hrat tak mai, rawlthar hmel ṭha tak pakhat vangin Siamsiami leh Muanawma inkar chu a khi ṭan a, buaina neuh neuh an neih an neih tak hnu-ah Sangkima leh Siamsiami chu an inhaw lo hle a ni tih Muanawma chuan a hre chhuak ta a ni. Chu thil chu a hriat chian veleh Muanawma chu Siamsiami lak aṭangin a inla hrang nghal a, a la na thawkhat hle a, Siamsiami'n lehkha a thawn tawh zawng zawng chu a la chhuak a, a hal ral ta vek a. Chu chu a la duhtawk miah lo, Sangkima chu hnek a tum a; mahse, Hriati'n, "Hmeichhia avangin insual suh, insum rawh," tiin a khap a, Muanawma chu a inngaihtuah fim a, Sangkima hnek a tum chu a ṭhulh ta hram a ni.

       Karkhat chhung chu a la na hle a, a awmphung a khaihlak vek a, a ṭhianpain rilru dam nana ngaihzawng dang nei tura a tih pawhin ani chuan a tum lo. Mahse a tawpah chuan bet lo chungin an khaw tleirawl pakhat chu a bêm ve leh ta nge nge a, chu tleirawl chu hmun fâlah vawikhat a hmu a, a kiss pawh a kiss a; mahse chu tleirawl laka a rilru a beh theih ngang loh avangin amah chu a inthiam thei si lo va, a bansan leh ta ringawt mai a ni.

       Vawikhat atan tawnhriat nei lovin hmangaihna lipui an tih chu a liluh a, a tui hakin a kulcho der a, tâl chhuah leh chu khirh a ti hle mai; mahse a na rei lo. Lehkhathawna an inhlan ṭawngkam thlum tin reng te kha hun kal ta a ni chho a, hunin a natna a her liampuiin a dal hret hret a, khawvel a changkang zel a, mi nawlpuiin Mobile Handset an hmang chho ṭan a, Muanawma pawhin Mobile Handset chu nei vein a hun hman dan chu a inthlak chho ve ta dawrh a, lehkhathawn aiah sms an uar chho a, harsa lo takin hmun hrang daiha awm te chuan an thinlung an inhrilh tawn chho ṭan a, Muanawma erawh he thil hian a thinlung a kaihruai har deuh hlek a.

       Vawikhat chu a phone call a kalsual a, hmeichhe pakhatin a lo la a, chu nu nen chuan an inbe zui ta zel a...

       Muanawma chuan thawk  a han la ham ham a, a ngaihtuah, chu'ng hun liam ta te chu a ngaihtuah zui duh ta lo. "A dawt leh kha chuan pasal a nei tawh," tih sup pahin a nui suk a.

       Es-i lakah pawh a hrang leh ta.

* * * * * * *

       Kaslla chuan a hnung lamah mi an awm ngei niin a hria a, a mit latu thil aṭangin a han inthing harh a, muangchangin a hnunglam a hawi a, a thil hmuh avang chuan a dâng sawp sawp a!


Bung 4 Na

       "Ti suh.."

       Chu ngenna chu a pawisa lo a ni lo va, a tisa châkna so sang nasa tak chuan a tâwptir thei tawh lo a ni.

       Zodini chu nuthlawi, fa pahnih nei tawh a ni a, a la upa hran lo va, mite han sawi hat khawpa mualphona pawh a la nei lo, hmel fai veng mai a ni a, a ngo vák reuh a, nu te cher lam niin a awm bawr pawh a pawng nep hle a, hetia a tlawm ta mai hi a duh dan a ni lo hle a ni. A tir chuan an infawp ringawt kha a ni si a.

       Zan rei, mi mut reh tawh hnu a ni a. Dinsanga nen chauh an meng tawh a, a fa te chu an mu nghet hle mai. An titi sap sap a, an nui dun leh hak hak ṭhin; inpawh takin an inkâwm a, an inkuah chial a, an titi kârah chuan an inmelh leh zeuh ṭhin a. Zodini chu a meng sî sap a, ngaih la tak hian a meng hniam raih a; Dinsanga hi a ring a ni.

       Zan a rei tawh hle. Dinsanga chu a la haw si lo. Zodini chuan haw se pawh a la ti lo, a ngai a, a thlahlel a ni. Thawklehkhatah ṭek a rawn tla ri puak ṭhuai a, Zodini chu a phu zawk a, a tawm chàwih chàwih a, Dinsanga chu a kuah chàih chàih a, "Ka hlau a nia," a han ti a.

       "Lo haw vat zawk ila ni tur," Dinsanga chuan a lo ti a, pawi tih hmel deuh hian a han awm a.

       Pawi a ti tak tak a ni; bialnu te ina han riah ngawt mai chu mawi a tih chiah loh avangin a inngaihtuah neuh neuh a. A mipatpui ṭhenkhatte chuan an châk zawk ngei ang chu. Ṭek a rawn tla leh a, a bula hmeichhia chu hlauin chu a phu leh aih ṭhin a, chu chu hriain a han kuah nghet sauh a, ruah chu a rawn tla ṭan ta bawk. Curent a rawn thim a, anni pahnih chu an la inkuah chial a.

       "Didi?"

       "Eng nge, Din?"

       "Ka haw thei lo vang."

       "Nia, a sur hnem khawp mai; mahse..."

       "Mahse eng nge?"

       "Hâw thei hrâm zâwk la ka duh."

       "Ka hre thiam alawm."

       An han ngawi dun vang vang a. Biang insi châtin an inkuah a, Dinsanga chu a thaw ham ham a.

       "Didi?"

      Zodini chuan a chhang lo.

       Dinsanga chu a insiam rem hlek a, "Rawn hawi teh Didi."

       Zodini chu a han hawi phei a, Dinsanga chuan muangchangin a lo fawp a. A hmui, pan lam lek lek, nĕm nel thep chu a hne dek dek a. A duham telh telh a, a fawh dan a han thlak a, a kut chuan Zodini taksa chu a dap vel ruai a, chumi zawhah a kut pahniha a biang dawmin duhthawh zet hian a han fawp leh a. Dinsanga kut chu a awm mai mai thei lo. Zodini âwm bawr chu a han khawih a, duhthawh teh mah se, hmanhmawh lo leh dam deuh hian a han fawp leh a. Zodini chuan a lo chhanglét ve mial mial a. Dinsanga chuan a kut awmna chu muangchang hian a sawn thla hret hret a; Zodini chu a meng phal lo.

       Dinsanga chuan a dim lo ṭan ta hle mai. A tisa châkna rawn so sang chuan a nawr na tawh takzet a, a thaw ham ham a, Zodini thawmhnaw chu a phelh ṭan ta a. Zodini chuan a la dang lo, mit chhing diar diar chungin Dinsanga fawhna chu a lo chhanglét mial mial a; mahse Dinsanga'n a kekawr a han phelh dawn chiah chuan harh chhuak thut ang mai hian a rawn meng a, Dinsanga kut chu a man chat a, a chelh ta tlat a. Dinsanga erawh a chhungrilah nawrin a awm laklawh tlat tawh, ṭawngkâ nena phun sap sap chungin Zodini chu a han ngen a, a kekawr chu a han phelhsak ṭalh a.

       Zodini kekawr a phelh zawh chuan a tawp thlenpui nghal bawrh bawrh tum pawhin a lang tawh lo, Zodini taksa erawh a chul kual ruai ruai a, engvak sawi zawm chuang lo hian, "Didi..." a ti leh sap ṭhin a. A hnuai lama a ṭuan zui tâk loh avangin Zodini ngaih pawh a ngam leh deuh tawh a ni ang, hahdam deuh hian an infawp dek dek a.

       A dik tak chuan Dinsanga hian insum harsa a ti takzet a ni. A chhia leh ṭha hriatnain ṭha ti lo mah se, a thinlung chu a tuihal a, a tisa châkna so sang tak chuan a nawrin a nawr tlat mai si; a taksa chu a insangmar ṭang a, Zodini taksa chu a taksa chuan a mamawh takzet a ni. A khawih dan chu a han thlak a, a Panty chu a phelh sak hmawk hmawk a; chutah Zodini chuan, "Din...ti suh! Khawngaihin ti suh! Maw...ti suh," a ti mawlh mawlh a; mahse Dinsanga chu amah leh amah pawh a indang thei tawh lo.

       A tisa châknain a kiansan hnu chuan a thiltih chu Dinsanga chuan pawi a ti hle mai. Inthiam lo zetin Zodini chu a kuah chawt a, "Ka tihpalh lutuk...pawi ka ti lutuk...ka hmangaih che," a han ti ringawt a; pawi a ti takzet a ni!

       Dinsanga chuan Zodini leh a fate dinhmun chu a han ngaihtuah a.

       Fahrah nih hian ken tel a nei. A man atân mit tui a ngai a, khawhar leh lunglèn a ngai a, mal taka inhriatna pawh a bang thei chuang lo. Chuti ang dinhmuna din chu he chanchin neitu te tân hian a mikhual lo.

       A naupan lai aṭanga tun thleng tura a sei len chhoh dan chuan a suangtuahna a rawn luh a.

       Tu emawin a ṭawng khum dan, "I va han puitling lo tak," tih ri chuan a thinlung ril takah a luh a. He, a chak lohna nun hi manganna avanga sim theih nise a sim daih tawh ang. Fahraha ni saa lo pîang chhuak an awm a, chhungkaw keh chhiat avanga lo fahrah ta pawh an awm ṭhin; chu'ng zînga mi ṭhenkhat te chuan fahrah nun hrehawm tak pal tlang zo lovin sual kawng an zawh a, ruih theih thil bàwihah an tâng a, retheih hrehawmnain sual salah a saltântir tlat tawh ṭhin. Mahse, chu sual sala saltanna chauh chu fahrah nun nghawng a lo ni si lo va.

       Vanneihthlak kan ti dawn nge, vanduaina kara vanneihna tla zep awmchhun ni turin ani chu lang thei sual salah a tâng lo hlauh mai; mahse a thinlung chuan derdêpna lai a nei tlat thung. A naupan berh lai zawnga a pangchan ngam ve lohna zawng zawng khan, a puitlin hnu-ah nghawng a lo nei reng niin a lang. Puitlin hnu-ah pangchan a va awl si em. Pangchanna tur a zawng a, a tum lawk vang reng a ni bik lo.

       An unau zîngah amah chauh hi nu hrang lak ami a ni a. Ù ber dinhmun luaha rorelna leh remruatna fing tak neih kawngah a inthlahrun chang a awm lo thei ṭhin lo. Hei hi a chhungte sual vang phei chu a ni lo va, fahrah nun ek chhiain a thinlunga ser nasa tak a siam sak vang a ni zawk. Inthlahrung ru tak, a lang lama paukhauh tak si-a rem a ruat a, a pa thachhangdawla ro a rel ve a ngai a ni.

       Khuarel mawina a ngaina em em a, daiah a chhuakvâk fo va, a lunglenna leh khawharna a hri thla mai ṭhin. A chang chuan atan sual kawngzawh a va awl teuh ṭhin.

       A dinhmun a ngaihtuah fuh chang chuan a mit tui a hnâm sak a, a fahrah nunin ser a siam sak avanga a puitlin lohna pakhat rawn lang ve sek ṭhinin a kawppui te nena an inkara thil ṭha lo a rawn thlen ṭhinte a hai bîk lo; chu chu a nin avanga sim nghal duak theih ni se a ti takzet. Chuti chung chuan he khawvel hi a hmachhawn a, a hmaa harsatna awm chu a pal tlang a, derdêp tak chungsiin derdêpna harsatna chu a lo su tlang tawh ṭhin.

       A pangchang a ni! A chang phei chuan a ngaihzawngte laka insum hman lo leh ngaihtuah hman mang lova a lo tih lan vak chang a awm a; chuti ang bawkin a ṭhiante lakah pawh. A naupan laia a natna leh a tawrhna chuan chhelna leh luhlulna 'ṭhami'' pe mah se; eng emaw chenah nona ṭha lo tak, a tih tur ni àwm lo tak tih chang leh, mi puitling chêt dan tur ni âwm lo taka chêt chang a nei fo mai. A ngaihzawngte tan pawh kawp a hahthlâk chang leh, a ṭhiante tân lah hriat thiam a har chang a awm leh zauh zauh ṭhin.

       Heng hi fahrah nun nghawng chu a ni ngei mai si! "Hlauthawnna!" tih hi an thinlungah a lo ri nawn leh a. Hnawl nih tawh avanga hnawl nih leh hlauhna hi a thinlung aṭanga lâk chhuah sak vek ngawt theih pawh a ni lo. Mite ngaihah sual lo mah se, a thinlung hlauthawng hma leh lutuk zauh zauh ṭhin leh, thil ngaihtuah vak mai a chîng hi a puitlinna ti puitling lotu a nih chang a awm ta zauh zauh. A ṭhiante leh a ngaihzawngte tana chhenfakawm lo taka awm tirtu a ni palh ta ṭhin. A chang chuan thiante kâwm lova an hnaivaia awm loh a duh a; mahse chu erawh ṭhian ṭha a mamawh zia tichiangtu a ni ting mai si.

       Fahhrah awm tawh miah lo turin he khawvel hi siam theih a ni kher lo vang. Loh-theih-loh avanga fahrah nunkawng zawhtuten hma lam an pan theihna tura harsatna hmachhawn a, pal tlang a, an hnunga lo kal te tana puihna chhenfâkawm tak lo kawhhmuh hi fahrah thenkhat te duhthusam a ni fo. An tun dinhmun hi anmahni dinhmun anga dingte lo puih lêt theihna tur remchanga lo hman thiam ngei an duh a ni. Anmahni hre thiam a, an nihna ang anga pawmtu an mamawh ve em em a, an chak lohna leh panna laia dawmkanga hmalama nawr kaltu tur an mamawh a ni. Puitu hian puih an ngai ve fo a, midangten an ṭanpui fo mai pawh hian midang ṭanpui theihna lai an nei ve bawk ṭhin.

       Dinsanga chuan a ngaihtuahna chu sawi chhuakin, "Ka fate fahrahin ka siam lo vang," tiin a phun sap a.

       Zodini chian, "Eng maw?" a lo ti vat a.

       "Engmah a ni lo."


       Hetih lai hi chuan Dinsanga nun chu a ruak takzet a, he nun ruak tak hnawh khah hi a nghakhlel em em ringawt mai a ni. Tun hma, Social Media a luhchilh ve ṭan lai kha a han ngaihtuah kir a. Fb khawihin Pathian thu a post a, ṭhian fel tak tak a chhar a, an inpawhin a nuam, a hlimawm; mahse, tun hnu Pathian thu a post tâk loh hnu hian a ṭhian thenkhatte chu an hla ta tial tial ni berin a hria; la danglam chuang miah lo chu an awm.

* * * * * * *

       Kan hriat tur chu hei hi a ni.

       Naked pic nena Zoremi CK pui kha Remruata a ni. Kum 2016, October thlaa kan kawmthlanga a fasentè nena lo inawkhlum Remsangi kha ka bialnu hlui ni ta Dintei nutei, Siamthangi fanu a ni a, a chunga thil thlengah Remruata hian mawhphurhna a nei bawk.

       Khatia kan kawmthlanga an lo inkhai mai hnu fé pawh hian nausen ṭap thawm hi ka la hre fo a; mak ka tih em em erawh, kei chiahin nausen ṭap thawm hriaa midang tumahin an hre ve ngai miah lo chu a ni. Mak ka ti a, ka hlau deuh bawk.

       Dinsanga chanchin kan sawi tel a ṭulna chhanah pawh hian Remruata hian telna a la nei ve zel ta cheu a, hmeichhe tam tak nun tichhetu a ni. A tira kan sawi Dinsanga nun hi kan chhui bing chho deuh rih dawn a; Dinsanga chanchin kan sawi dawn chuan Zodini chanchin hi sawi hmaih theih a ni miah lo bawk. Ka chanchin ka rawn zeh tel ve leh ṭhinna chhan pawh, engkim hi a inzawmna lai a awm zel si a, ka hmaih ngawt thei bîk lo a ni.
 * * * * * * *

       Zodini chu nula hmel ṭha tak a ni. A ti a nung a, a vun a mâm nâl hén a, a ngo satliah a ni lo; a ngo sen sak a. Ni sa hnuaiah siam sual palh ang hrimin a bîang a tài sen siah a; hmuhnawm tham, ngaih la tham, en nawn pawha en nawn leh fo chi a ni. Chuti ang mî chuan sipai a ngâizâwng miau mai si.

       A bialpa hna avangin an kar a hla a, ram rawngbàwl chu Sangliana hnà a nih avangin ngaihzâwng rawng a bâwl hman lo. Hel ramah ramhnuaia ramriah 'method'  hman a ngâi fo a, hmun râltî-ah nun râltî a hmang a, a ngaihzâwng midangin an rîmin an lo 'ambush' mai ang em? tia ngaihtuahna thinlung râlti tak râlkhêl ri chu midang hriatpui hauh si lova amah chauhin a hriat râlkhêl khêk ri ri ring tak a nih i ring ve tho ang. Chu chu a ni Zodini bialpa khawsak phung ni ta chu.

       Induh tawn ta na na chu kuta insuih dun hun a lo thleng a, thinlung pahnih kha mi pahnih inṭawm turin pakhata siam a ni a, khum khatah mu dunin zan lâi hlimawm an hmang dûn a, taksa inzawmin rilru a thuhmun a, a dân dik taka taksa inzawm tawhte chu thisena inzawmte aiin an inzawmna a nghet danglam bîk a ni mahna, chhungte tuithlar hial pawh an huam châwk asin.

       In tharah mothar niin nupui thar a tlângnêl chian hma hmain Sangliana chu silai hum turin a chhuah a lo ṭul leh nghal mai a; lunglenna filawr uchûak tak chuan uchûak takin sipai nupui nun chhungril chu a'n luh chilh tak tak mai tehreng a nia! Bîak reng a rem kher lo thei a; a khawhar thinlung chu 'social media' lamah inhri thlain zan rei tak thlengin a hring ta va va a, 'inbox' lamah mipa thinlung hlei, ngaihmelhna mit leh awmhleina thinlung pu hliah hliah ten ṭawngkam zamawhin an sâi a; a uchûak pâwlin an zahmawh thlalâk an la han thawn zui a!

       He khawharna zûn zâm, zâm thûi leh, a mi phuar nghet fêt mai hi a lawm tuar chhuak zo lova 'pasal hmu zo lo' Sipai nupui te an uire fo theih ṭhin le! Awm tleitu tur kha hlate khuaah 'trench' belin 'racksack,' lungtum thun puar akin zîng dai far a hul hmain kea 'paidal' chungin a 'long-run' daih a nih a rinawm; chutih kara Zodini'n khawhar hnêma 'social media' a lo khawih ve, chu hmeichhe awm tleitu nih lo tum phêt, tâwk chin nei lo khawpa mipa hur tak takte avangin a thinlungah 'pressure' a awm theite a nih ngài chuan thil mak vak a ni kher lo ang! Mipa pawh hi, hur duh chuan nupui neih mai tur niàwm tak a nih vei nen, tlangval chu sawi loh, kawp lâi nei mêk te pawh hi kawp lâi nei mêkte lakah deuh ngat hur hi zu han châk tlat hlawm a! Mak ve tak a ni; mi awmherh zia!

       Mite ṭawngkam hi a mak a sin; en teh mah-
      "Sipai nupui chu an khawpkham lo va, an hur duh!"

       "An uire duh!"

       "An rinawm nêp!"

       Heti ang mi hi an awm ang; mahse hei tak hi, a ni ve lote 'nì' anga lantirtu a ni ta hi sipai nupui te tân a lungchhiatthlâk ta bîk a ni. Amah chang dema den a ni lo; a pasal chungchâng chu rinthu leh zeldin thu bâwl phawn hmangin a hriatah sawi a ni a-
       "Sipai chu an hur tlangpui!"

       "An Pute nupui an mutpui fo!"

       Heti ang ṭawngkam hian a thinlungah hlauhthawnna a tuh palh ve thei tih hriatpui lotu hi a hriatpuitu aia an tam fê chu le! Hei chauh pawh a la ni lo; sipai nupui ṭhenkhat phei chu an pasala nu ten an la han mil lo zui a nia! An famo chu an fapa hnêna hêk tâwkte an awm a, dâwt muhluma puh tâwk lah bo lo; hmeichhia pawh hi mipa ten han humhalh viau che u mah ila, nu leh pa nih hnu-a mahni famo te tai rân mai leh sawi chhiatna ngawt zawng thin hi chu mipa ni lovin hmeichhia vêk an ni leh ṭhin. Mahni mawng hlimna mai a ni; heti ang nu ṭhenkhat phei chuan an fapa te nupui hi zuk mâk sak lek lek fo a mawle! Mahni nupui pawh ni hlei lo lo mâk sak châk em em hmeichhia ngat hi chuan an ti mah mah deuh chu a ni; heti ang thil a thlen mai theihna hi chu hmeichhe rorelna inchhung a ni duh phîan lehnghal.

       Fa an han nei a, a ṭanrual pui a nupui thlâwptu tur ber Sangliana awm ta lo chu, amah chauha enkawlin a fate chungah mawhphurhna a la ṭan a. Sipai chu hlawh a ṭha, thawn pawh a rawn thawn thei reng; mahse a nihna tak, pasala a neih chhan chu a hlawh, 'India chêng' kha ni lovin, amah, 'A pasal' ngei kha a ni reng si. A neiha ber chang lovin sawrkarin a chang a, sawrkar chuan a pasal aiah 'India chêng' a pe ang lek fang a ni.

       Ni e, 'India chêng' hi a hlu, amah leh a fate mamawh pawh a phuhru tak meuh e; mahse 'India chêng' hian chhungril thlamuanna tham thinlung a nei ve ngai dawn lo!l. Thlahlela kuah lumtu tur pangti lum a 'support' ve ngai dawn lo. Ih maw, awmze nei takin 'India Chêng' hian a melh ve lul lo vang. 'India chêng' chuan hmangaihna thinlung nei ve hek lo; chumi lan chhuah theihna 'Special power' mitmeng hmuh turin mit nei ve hek lo! 'India chêng' hmuh theiha mit awm chu Gahdhi Ji lem tarmit vuah phêna mit awm mai mai chauh hi alawm le; hei lah hian awmze neiin a melh no lo nasa dawn mai si.

       A pasal Sangliana kha pa fel tak pawh ni se hmun danga a awm daih si avangin zanlâia nau a damsam loh chângin puak chhâwktu tur pasal a hmu zo lo va, a hah rimtawng leh a men rei ṭhin avanga mitmeng sen râmin a fa damlo a buaipui a; a rilru a hah chângin inbunruahna tur pasal a hmuh zawh miau loh avangin zanlaiah mit tui nen ding taka a inngaihtuah châng a awm a, "Ka bulah ka pasal mu ve se...a âwm nghengin bei hle hle ila...ka sama chûlin min hnèm ve se..." ngawi teh, heti lam chu sawi lo law law ang; a mamawh zual laia a tawn theih loh duhthusam mangram mai a ni. Kuaha ṭawng thlamuantu turin Sangliana awm thei se a duh ṭhin ngawt mai.

       A rilru hah leh rilru nat a reh fel leh ṭan tawh tihah a pasal Sangliana, sipai ngei mai chu 'chhutri' lain, zan lam hun hlimawm hmabâk a ko hle tih hriat avanga phur takin a rawn haw leh ang nulh nulh roh a; sipai nupui tân chuan a duh, 'hmabâk ko tak' pe lo va lo khawn fawk a châkawm duh ngawt ang! A sarhu lai angin rilru hah leh rilru nat thu lo tharthawh leh chiam kha a rem ṭeuhin a hre tawh si lo; àwm pawh 'a àwmin a ang lo' thei;  Sangliana chu amah thlahlelin a chawlh hun rei lotè âmin a rawn haw vang vang ve tho a, khami chhung na na kha chu rim takin inhmang se la, inlawm dun hiam hiam rawh se; an phû a ni.

       Tichuan, chu chawlh hun chu a ral leh ta. Silai hùm turin Sangliana chu a 'duty' hmunah a kîr leh a; a kal san tâk hmeichhe khawhar, a khawhar hliah khuh nâ'na pawn lama nuih heh em em leh zau em em, 'social media' vela nawi nuam ti em em mai chu, a mamawh zual hun lai takin 'pasal hmu zo lo' a ni leh dâwn a ni. A liam san leh ta a. Sipai nupui a ni. Ṭap mah se, mi tam zâwkin an hriatpui lo. Na mah se, a hrilh châk a pasal a hmuh zawh loh avangin a thup ṭhin. Duh ber te ṭânga bei chunga pangchang leh, thuthawn hmang ngawta pangchang chu a dàn a dang hle ang.

       Hmeichhe chhel tak a ni , a chhuanawm; khawhar chhuanlama hum sual dai erawh a nun vaw lêttu chauh a ni ang.

       Chuti anga khawharna chu kum 7 zet pal tlanga a tawrh hnu-ah Zodini chu Sangliana chuan Malaria natna avangin a boral san a; a nunah tawrhna hi a mikhual lo ve ngawt mai! An rawn chawr chhuahna inchhungkhur kha a ngaihtuah lét fo a; a naupan lai hun kha.
* * * * * * *

       An inchhûng chu a hnawk niaih a!

       Zankhûain âng thawm hriat tur a awm. Rosiama'n zu a rui a; Zotei'n pa ber zurui zah zo zai tawh bik hek suh. 'Zankhûa' ka han ti tak na a; mut chhuak tawngkhawng tawh avanga, dar 2:00am vel bawra a muthilh tâk hma zawng kha chuan Zodini chuan a pâ âng thawm a hria a ni.

        Rosiama awrawl ring tak leh, a nupui Zotei vin ṭhat ṭhat thawm a inpawlh nawk a; a changin thil ri deuh bur bur hriat tur a awm leh zauh ṭhin bawk. Zodini chu thâwkkhat laia hlau thlabara a awm tawh avangin; chuti ang ri deuh bur burah chuan a phu leh dawrh ṭhin a; a lungphuin a zo lo ni berin a lang.

       Rosiama chuan zu a duh ve viau a; Zotei lahin, a pasal chu zahawma a awm loh avangin a zah zo lo va, inchhungkhur zahawmna phurh chhuah a tum bik hek lo. An fate chu hmel ṭha leh duhawm tak vek an ni a, an û ber Zodini pawh kum 10 bawr vel chauh a la ni nghe nghe. Zotei a awm loh ṭumin Rosiama'n eirawngbawl tum lovin zu a rui a, khawlaiah a léng vel mai mai fo; chuti ang chuan thimhlim thleng a teihawi ṭhin a ni.

      An fate chuan, mi chhungkuaa naupangte chaw ei hun angah chaw an ei thei lo fo a, buhfai chhum tur nei lova an awm châng pawh a awm zauh zauh; mahse, naupang, thil la hre thiam famkim lo na na chuan an tuar mai mai a, an inah chaw ei tur chhum a la nih loh chang chuan, an pi leh pute in lamah, "Chaw ka duh," an va ti mai ṭhin a ni.

       Zu zawrh leh zawrh lohah hian buaina ka nei lem lo viau a; mahse hetia, pa ber zu ruia fanaute ngaihsakna rilru thi ṭhak maia thle mai mai, tunlai thleng pawha an la awm erawh runthlâk ka ti ṭhin. He thu hi ka ngaihtuahnaah a lo lut ta hial a- 'Fanaute enkawl thei lo leh ngaihsak thei lo khawpa thil dang buaipui duh nupa chuan fa nei lo ngam mai rawh se' tih hi.

       An fate chu an hmel ṭhain a duhawm riau a, an nupa nun hi khaw lo chho zelin, inṭhen hial ta se; chu'ng naupang duhawm takte chuan an fahrah chan an chang ang a, an nunah, an puitlin hnu thlengin 'ser' reh thei lo an nei tawh ang tih lam reng an ngaihtuah lo pawh a ni ang; a tâwpah chuan Zodini nu leh pa te chu an inṭhen ta nge nge a ni.

       An ṭhenawm khawveng te leh chhungkhat ten suih zawm leh an tum nasa hle; mahse, loh theih loha min nawrtu thil thleng a awm tawh chuan, "Inṭhen suh u," tih ngawt a rem loh chin a lo awm ṭhin a; fate fahraha siam a ṭhat loh rualin, nupa innghirngho reng chhungkua aṭanga sei lian naupang nun chuan ser a nei ve dawn tho tho mai si a ni.

       Zodini chuan tun hmaa an chhungkua kha a han thlîr a; an buaina chu hei hi a ni- Zu hi, thatchhiatna! Rilru puitlin lohna! Chhungkaw tana ruahmanna tlachham! Pathian hnaih lohna! Inzah lo tawn! Pizawn/Puzawnte emaw, nu leh pate rin lutukna!

       A nu leh apa an inṭhen zan khan, a nau, an unau zinga naupang ber chu a ṭap hlap hlap a. A mit tui a tling pam a; chu chu, thimhlim zanriah kîl hun lai a ni tawh. Mahse, a nu chu thil pawimawh tehchiam lo tiin a kal bo a, a pa zurui tlai lêng a la haw lo bawk. Chaw an la chhum lo va; chhum a hnekin an tapchhak chu a dai dak mai. Chaw chhum tur a awm lo a ni! A nau mipa naupang ṭawng thei ṭantir chuan, "Anu bulah..." tih hi, thiam lo leh fiah lo takin a han sawi a. Chutih lai taka an ina an ṭhenawmpa léng lút thinlungah khawngaihna rilru leh thinrimna inpawlh chu a rawn piang a.

       Chu thimhlim, zân rorelna inṭan ṭanntir hnûai-ah chuan, ngaihtuahna tithui tak thil thleng chu an ṭhenawmpa chuan a ngaihtuah ta vang vang a; chutah, chu mipa naupang chu a pawm lawk a, a chhuahpui ta ngawt mai a. "Hemite nupa hi engtikah nge an puitlin ang?" tih zawhna a thinlungah a awm pawh a ni mahna.

       Chu'ng chu hun kal tawh ni mah se Zodini rilru-ah a reh tawh ngai lo; a lo ngaihtuah leh ṭhin.
* * * * * * *


Bung 5 Na

       Dinsanga nun erawh kha chu kawng hrang hrangin a vir vel nasa khawp mai; an chhungkua kha an hlim ṭhin, an hlim ṭhin tak tak a. A lo chhut ngai miah loh chu chhungkaw hlim ni reng tur hian kan mawhphurhna kan hlen vek a ngai tih hi a ni; leia tui luang darh tawh ruh leh erawh a namailo deuh ta chu a ni e.

       Hringtu hmangaihna kutin duat taka a kuangkuahna dawng miah lo a ni ber a. Mite'n anmahni hringtu, nu hmangaihna an sawi vul chûk a hriat hian, a thinlungah, "Dâwt a nih chu," tih hi a lo ri tel ve ziah ṭhin. Tuna a awmna khûa chiah hi, 'kan khûa' tia a chhâl theih ni mah se, khaw danga piang a ni; chu chu amah hringtu, 'Ka nu' tia a koh tura a bula awm ve ngai lo te khûa a ni a. Chumi khaw Damdawi ina piang chu a ni.

       Amah hringtu nu leh a pa kha inṭhen ta lo se tuna a dinhmun tam zawk hi chu a nihna a ni dawn si lo. A hriatnaah, 'Fahrah!' tih hi a lo ri fo a. Nu hmangaihna a dawn ve theih awm chhun chu 'nuhrawn' tih hmingpu hnen aṭangin a ni si. Engtikah mah a hringtunu kut dam takin a kuangkuahna hi a dawng ve ngai tawh lo vang.

      A pa hna avangin khaw dangah an pêm a, kum hnih pawh a liam hman hmain amah hringtu nu leh a pa chu an inṭhen a, amah hringtu chu an khaw lamah létin, ani chu a chhawm bawk a. An inṭhen hnu rei lo teah amah hringtu nu chuan a pa hnenah, "Nupui dang nei rawh," a ti a. "Chuti na na na chu," tiin a pa chuan tuna amah enkawl sei liantu ni ta, a nuhrawn hi a nei ta a ni. Hetih lai hian nikhua a la hre thiam lo va, kumhnih pawh a la tling lo. A hria te'n an hrilh dan chuan, naupang hrisel lo, sam kir chip chep leh, hrisel lohna avanga dul kiar lang mai niin an sawi ṭhin. Hnutè a khawpkham lo va, chaw ṭha ei tur a tlachham a, amah hringtu bula a awm chhung chuan a dinhmun kha ngaihtuahawm tak a ni. Chu achhapah amah hringtu chuan a enkawl thei ta lo va; a pa bulah, "Rawn la rawh," a ti ta hial a.

       A rilru a na ngawih ngawih ṭhin. Ngaihtuah loh a tum pawh hian a thinlungah a lo lût a, a thin a rim ṭhin a ni. A pa chuan a hnenah a hruai ta a, theihtâwpin a enkawl a, nu hnute tui lum mamawh khawp hmu lo kha, siam chawp bawnghnute chhuan lum chawp ringin a sei lian a. Hringtu hmangaihna kut lum dawng lovin khawvel a hmachhawn a. Tun ang kum thleng tur hian fahrah naupang, hringtu dik takin a thlavang a hauh ve ngai loh nun zawng zawng a pal tlang a. A ṭap a. Mite'n an vel a. Amah hringtu-in a thlavang a hauh ve ngai si lo. Mahniin a ṭap bang a, a cho leh a zuam vang ni miah lovin hrehawm a hmachhawn ṭhin a nih kha. Rilru na taka a ṭah laia an ṭhenawmnu chiah ṭap bang tura thlemtu a hmuh ṭumte kha a theihnghilh thei lo.

       Amah hringtu hnen aṭanga a pa te'n an lâk lai chuan a khawngaihthlak viau a nih a rinawm, tuna a nu, a nu hrawn mit tui hi a ti tla zung zung hial a ni. Chumi hnu chuan fahrah nun awmzia a zir ṭan dawn chauh a lo ni a.

       Naupangtê nichungin engkim a ti a. Ṭinpui lian takin a pumraw phu lova rit tui a kawt a. A naute a pua a, eirawng a bawl a. Chhuat a nawt a, nâ a neihin a sawi ngam lo va, a nat tawpkhawkah, amaha a lan chhuah loh theih loh chinah chauh a chhungte'n an hre ṭhin; chu chu a naupan lai thil mai ni mah se, naupang chumchiap tawrh atan chuan, 'a lutuk' a ti deuh a ni. Kum nga leh kum ruk inkar vel a nih hian a khûpah khawihlipui na tak mai a vei a, tiang hawla a bai lauh lauh thlengin a sawi ngam lo a ni.

       Mi zuam a hlawh a, mi velh a hlawh a, ṭhiante zingah kawmserhah a ṭang fo a. Mi nute'n an fate thlavang hauh avangin an inah an luh chilhin an bêng a; chuti anga a thlavang hauhtu tur amah hringtu lah a bulah a awm ve ngai si lo. A pain a vohbik avangin a nuhrawn laizawnte'n thinlung takin an la pawm lo zui a. Awww...hmeichhe lâk tlak loh sulhnu hi a va runthlak ngai em.

       A pa hian amah hringtu kha, 'uire' ti dawt chuan a sawi ngai lo nà a, finfiahna tura kut man a neih loh vang mai phei chu a ni tih a hria. Tichuan, nikhua a hre chho ṭan a, a rawlthar chhuak tihah amah hringtu lehkhathawn a hmu ve ta nge nge a. Naupang chumchiap, a hringtunu hmangaihna kut a mamawh em em laia ngaihven hlawh lo chuan, a leikâna tih theih a neih ve veleh, ngaihsakna der nge a tak tih hriat hleih loh a dawng ve ta chauh chu a nia.

       Amah hringtu lehkhaah chuan, "Thisen tam tak sénga ka hrin..." tih hi vawi eng emaw zat a chuang a, a run thei em em a. A lak aṭanga a dawn loh thil hriat chhuahtirtu mai a ni si. Ni e, a hria, thisen tam tak sengin a hring ngei alawm; mahse, mite chuan an fa te, thisen tam tak senga an hrin hnu-ah, chhawmdawl an ngaih lai zawng zawngin an hmangaihna leh ngaihsakna an pe ṭhin asin.

       Pathian khawngaihna azarah Pathian rawngbawla, thuhrilin a kal chhuak ve zauh zauh a, amah hringtute khûaa a kal châng hian, rawng a bawlna Kohhran member-te ina thleng lovin, a hla a hlain amah hringtute in a pan hram hram ṭhin a; chuti ang ṭum chuan a lo duhsakin, ei leh in tur tui ṭha ṭha a hlui a, a châk zawng apiang a hmehpui a, thawmhnaw a leiin Phone pawh a neih phak loh khawpa man tam a lei sak a, a mamawh phuhruk tumin a chungah a ṭha ṭhin. Mahse chungte chu a lem zo ta vek a. A mamawh hun lai chu nausen buhchip a nih lai kha a ni si.

       Mahse chhiartu duh tak, he chanchin hi hmabak nei lo khawpa mi beidawng chanchin ni-a i chhinchhiah tur khawpa tawp tir ka rem ti lo. Fahrah niin ngaihzawng neih kawnga tluang lovin, rilru na taka hnawl ni fo mah se la- hmangaih a la hlawh ve ang.
* * * * * * *

       Tunlai ṭhalai te nunah chuan Social Media(Whatsapp leh Facebook) hi inrîmna khawvel a ni.

       He kan khawvel siam chawp hi mak ve deuh asin. Fiamthuin bul kan ṭan a, a takah kan pakai a; hmangaih thu kan thlung chho a, status kan in-coment tawn a, a nuam chho a, kan inlaichinna a pâr vul zel a ni. Mahse, pangpâr pâr vul chu a lo chuai ve thei reng mai.

       I status coment peih tak kha liker satliahah a ṭang ta a, i status liker satliah pawha a ṭan tawh loh chinah phei chuan, hre thiam la, tawp san rawh. In thu tak ta lutuk a, a hne ta che a nih kha. Midang status a hlimpui viau kha thlir zui dûk dûk duh bîk tawh kher suh ang che.

       He facebook khawvelah hian nun lem kan hlimpui a, a nuam phian mai. Ṭhian kawmin fiamthu sâng kan thawh a, hlimna kan neih phah a nih chuan chu tluka hlu a awm lo; mahse nun lem hlimpui tawk chin nei lova nun lem khawvela inlaichînna lem hlimpuia khawsak tawk chin neih loh hian, nun tak tak zawka inlaichînna min neihpui duhtute nena kan inlaichînna a hawlh phel palh ve thei a ni. Chu mî ti fiah turin nun taka inlaichinna tak hi nun lema inlaichinna lem hian a lo ṭhiat tawh ṭhin ngei mai.

       Kei tak chuan ka tawng pawh a ni lo; mahse, Dinsanga hian hei hi a lo tawng tawh a, a taka tawng tawhtute tawn tak tak hi ka hre ve ta zauh zauh bawk. Mahni zahawmna hloh khawpa chêtna reng reng hi thil zahawmah a chhuak ngai lo. Mahse, inkawmhlimna khawvelah inkawm hlim nuam vek u le.

       I kawppui i rinna, duhna leh hmangaihna ti dai theitu ṭawngkam emaw, i kawppui nena in inlaichînna hawlh phelh zawnga i bula ṭawngkam chehtu emaw reng reng kha ring hlek suh ang che. I kawppuiin a humhalhna che kha thîkin rilru verther takin nangmah a beisei ve che a nih kha. Hei hi Laldinsanga nuna thil thleng chu a ni.

       Social Media nghawng ṭha lo chu a awm chîang alawm. Vawi khat chu Dinsanga a che sual ta zauh mai. Mi coment chhan lêtna-ah(a inrawlh ngeina turah) a lo inrawlh palh pek a; mîpa(?)/tlangval(?)/pathlawi(?) emaw ni chu a thin a tirim palh ta hlauh mai! Dinsanga pawh chu a rûk tak chuan a thin a rimin a zak ang reng hle a. A sim chîang ngawt ang.

       Mahse, heti ang thil hi a ngaihtuah chîang ta a- 'Social Media' lama kan fiamthu sâng lutukin(mipa leh hmeichhia an inlêm fiamna kawngah), mi nupa emaw, inngaizawng mêkte emaw kâr thu a tih khawloh vang zawk a ni ṭhin. Heti angah hian inenfiah ṭhin a ṭha khawp mai. Kei telin; nang pawh. Achhan chu, kawp lai nei rengte hi, kan kawp mêkte ni lo; midang nen fiamthuin kan inhmangaih a, fiamthuin kan inmuah a, 'Fiamthu fiamthu' kan tih chhungin kan kawppuite nena kan inkâr hi zâu takin a lo khi kéu kâu tûar tawh thei tlat mai a ni. He inkawmhlimna nuam tak mai hian mi nupa ṭâng a lo ti ṭhen fo tawh a, a la ti ṭhen fo bawk ang chu, lehnghal a.

       Kan hmangaih leh duhte humhalh kan tumna hi, kan hmangaih leh duhte'n an ngaithei lo a nih chuan, inṭhen a hnai tihna a ni. Tu emaw tana fiamthu kha, tu emaw tan chuan sawisel rem chiah mang si lova 'fiamthu runthlâk' tak a ni thei. Kan duh chu tumahin min duh ṭawmpui lo se ka duh ang a; kan hmangaih chu tumahin min hmangaih ṭawmpui lo se kan duh ang chu. Hemi chiah hi a ni Dinsanga te ingaizawng buaina bul chu.

       Mahse râl aṭang hian hmangaihna lem leh inlaichînna lem tam tak kârah, a tak tak, hmanngaih tak leh inngaihna tak, inlaichinna thûk tak a piang thei tih a tak ngeia tawng tawhtu chu amah Dinsanga ngei hi a ni bawk si a. A awm zawng a awm thei ngei chhap e; mahse hemi ṭum hi chuan buaina a tawk ta tlat si. Social Media vanga an buaina chu hei hi a ni.

       Pricila Etlar Hnamtè chu a nuna a thil tih sual avangin hmeichhe khawngaihthlak tak a lo ni ta; he hmeichhia hi facebook aṭanga Dinsanga bialnu hmasa a ni. Tlang takin ka han sawi mai teh ang, Dinsanga'n pawi tihna a nei lem lo bawk a.

       Pricila-i chuan Bialpa fel tak, amah duha hmangaih em emtu Dinsanga a nei a. Ani nen chuan tih palh thil takmeuhin an che sual tawh nghe nghe bawk. An inhmangaih tawn vangah a la sawi theih a, a àwm khawp mai. Hun a kal a, Dinsanga chu thil eng emaw avangin a buaiin a reh thei hle a, Pricila chuan a be khât a ti ṭhin hle, a vui pawh a vui ṭhin.

       Chutih lai chuan a Fb Profile-ah mipakhat, a Pro-name atana 'Tinuama' tih hmang, hnam hming dah tel, fake account tih chiang reng chuan a rawn be ṭhin a. A tir chuan kawm pangngaiin khawhar hnémah a chhawnchhaih satliah mai mai a; mahse, chupa chu a kam a hlei zel a; a tirah ṭawngkam polite pangngaiin rawn be mah se a huangtau sawt hle. A tâwpah chuan an inbiakna ṭawngkam, a inbiaa te tana fiamthu ṭawngkama lang si, amah hmangaiha duh em emtu tana mit ti kham tak taka an inbiakna chu Dinsanga chuan a lo hmu ve ta thung a. Pricila-i hnenah chuan a ngaimawh hle thu a sawi nghal a, Pricila-i thung chuan, "Fiamthu mai mai alawm," a ti ve tlat a, a tawp san duh bik ṭhak lo.

       Chu chu buaina a tling chho ṭan ta. A hma lama inngeih tak kha an intithiam lo ṭan ta zauh zauh a. An intih thiam loh apiangin Dinsanga chuan a pawi a sawi avanga hrehawm a tih thu sawiin ngaihdam a dil ṭhin. A duhin a hmangaih em a ni. Mahse Pricila-i chuan a runluih a, a awm dàn a thlak duh chuang lo. A tawpah chuan inṭhenna thu pawh sawi ni si lovin Dinsanga chu a reh ta hmak a.

       Pricila-i ve thung chu Tinuama nen chuan an inbe zel a, an inkâwm a, an inkâwm zel a. Tinuama chu a lo zeiin a ngaihsak thiam si, a inphah hniam thiam si, a khawhar chu a hném teh meuh e. Pricila-i pawh chuan a Profile a han check-in mi lerh tak leh hur tak a ni ang tih chu a ring thiam tho a; mahse an inkâwm an inkâwm a, an inhmu ta hial a.

       Tinuama chuan a 'Profile Name' chu a pu zo hle a ni ngei ang, a inven zawh loh khawpa an inkawm nasat tawh avangin mipat hmeichhiatnaah a luhpui ta nge nge a ni. Chupa lah chuan, a duh hun huna mipathmeichhiatna a hmanpui theih chuan a duh tawk em em a, midang a biak CK san leh ta zak zak a. An inbiak ṭantirha a laka a thutiamte chu a hla ta hle mai a ni. Amah hmangaih em emtu a bialpa kha vawi khattê pawh a lam hawiin a rawn nui leh tawh lo. A reh ta hmak si. Inchhirin awmzia a nei tawh lo va, tlai luat a pawi zo tawh!

       Pricila-i'n kei min rawn biak hmasak ber chuan a mangan leh inchhir thu a rawn sawi a, ka hnenah chuan a inphawrh zo vek niin ka hria. Kei chuan, "Khati kha ni mah se, tun aṭanga ṭha taka bul ṭan leh kha a theih a nia. I awm dan dik lo ser nghawng ṭha lo erawh i pawm thiam a ngai ang. Nangmah a hmangaih avanga nun zahawma i awm duhtu mipa i tawng leh a nih chuan hai tawh suh ang che," tih thu ka lo sawi a.

       Social media-ah fake account- Neinuami, Neizeii tih ang reng, Lunuama, Tinuama tih ang reng leh hming dang dang a tam hle! Mahni thlalak dik pawh Propic lama tar lang lo, mahni profile dik, pian kum, pian ni, awmna dik pawh tar lang lo lakah fimkhur a ṭha hle. Heng ho hi mahni nihna dik taka sex group lama lut lo va, fake account siama sex story ringawt buaipui, mipat hmeichhiatna ngawta tuihal an ni duh. Hming pangngai ve tho, fake account hmangte ang bawka sex ringawta tuihal hi a hmei apain an tam hle bawk. Va sawisel ngawt chi an ni lo va, anmahni lakah lo inven mai tur a ni zawk. Social media kan inrûn chhiat tir ve palh ang'e aw.

       Dinsanga pawh hi a hmangaihna kawng a bumboh fo mai.


Bung 6 Na

       Nun kawng bumboh zawh ve ve Dinsanga leh Zodini chu an inkawp chho ṭan ta a. An hlim, an nui, nuam tiin hun an hmang dun a. Zep lem lohah chuan kha tia sex an hman zeuh tâk aṭang phei kha chuan an hmang an hmang ta mai; an hmang ngun khawp mai.

       Mahse Dinsanga nun ruak chu engmahin a chhung khat tak tak thei lo. A nun chu a rûkin a rûak a, sex pawhin a tikhat zo lo! A dik tak chuan ngaihzawng a neiha sex hial a hmanna chhan hi a nun rûak beidawng awm ngaihna hre lo a ni ber. A thinlunga a hmangaih hmasak chu Remremi kha a ni, eng emaw avang khan an inṭhen a, Dinsanga thiam loh a ni bawk. An inṭhen hnu khan tumah hi bet takin a la kawp thei lo a ni ber a; mahse Zodini erawh a danglam deuh a ni mahna. Remremi dinhmun erawh a tluk chuang lo.

       Chuvang pawh chu a ni mai thei, a tira an hlimna chuan rei a daih lo chiang ngawt mai. Dinsanga chuan a natna, hahna, thinlunga a tawrhna laka hahchawlhna tur hmeichhia ni turin Zodini chu a beisei a; mahse Zodini chuan chu chu a hre thiam pha lo. An inhau ta zeuh zeuh a, a punlun zel avangin inṭhen ṭhat awm lovin Zodini chuan Dinsanga chu a be duh lo zui ta a ni.

       A tir chuan Dinsanga chu a na khawp mai, na tak a ni. Mahse a na rei lo, a dam leh ta vek a, a thinlung chu Remremi chungah bawk a cheng zui leh tho; hmangaihna erawh a dawng lét lo. Remremi kha chuan Remruata zawk kha a hmangaih a; mahse kan sawi tawh angin Remruata chu mi hrang hrang kawp kuala be kual chi a ni tlat. Remremi kha a phatsan a, ṭanpui a ngaih lai berin a kiangah a awm lo va, a tan a ding hek lo. An inkawp chhung zawng khan midang a be kual a, a bum theihte a CK pui ṭhin; chung zingah chuan Zoremi ang te, Hminghlui te, pasal pawm lai nei Sangpuii ang chi te kha an tel an ni.

       Zodini nena an han inṭhen leh tâk hnu chuan Dinsanga chu a mal hle a, a thinlung na lutuk inbun ruahna tur tak ngial pawh a nei lo. Khawhar leh mal takin a awm a; harsatna a tawh changa a biak ziah ṭhin Remremi lah a be ngam der si lo. Theihtawpin tawrh chhuah a tum a, mi hriatpui miah lovin a nun chu a chhungrilah a na ngawt ngawt mai a ni.

       Tunah chuan he thila ka lan a ṭulna, kan inzawm tawn dan chu ka han hrilh tawh ang che u. Dinsanga hi ka ṭhianpa ve em em a ni a, ka sawi tawh angin Remsangi(Remremi) hi a hmangaih hmasa ber a ni. Remremi hmangaih hmasa ber ve thung chu Remruata kha a ni thung a; Remremi'n harsatna a tawn lai, ṭanpui a ngaih lai takin Remruata hian a phatsan a, inṭhen a rawt zui bawk. Remremi Remruata avanga a rilru a nat lai takin ka ṭhianpa Dinsanga hian a lo bem ve leh chiah a; mahse Remremi rilru chu Dinsanga lakah a beh tak tak theih rih loh avangin an inṭha ṭhen leh tawp a, ka ṭhianpa ve em em hian hmangaih taktèin a lo hmangaih hman tlat a.

       Dinsanga hian Remremi nena an inṭhen hnu hian a rilru nâ a dam beiseiin leh, Remremi a theihnghilh theih beiseiin midang dang a ngaihzawng kual ve ta a; mahse a rilru midang lakah a bet tak tak thei si lo, rilru bet lo taka midang han kawp chu amah a inthiam  thei leh si lo va, a tawpah chhan mumal pawh awm vak lovin inṭhen a rawt leh nge nge ṭhin. A hnu-ah Zodini nen an han intawng leh a, ani hi a hmel ṭha a, midang lakah chuan a danglam deuh ta bawk. Zodini nen hian sex pawh an hmang dun ngun malh malh khawp mai; mahse ani nen pawh inkawp lo tur chi an ni leh tho a ni ang, inkawp hlei thei lovin an inṭhen ve leh ta tho si a ni.

       Zodini nena an inṭhen hnu fé-ah Remremi nen chuan inngaizawng ang pawh ni tawh chuang lovin an inbe chho leh ṭan ta a, an chanchin engkim hi Dinsanga chuan min hrilh ṭhin. Remremi nen chuan an inbia an inbia a, an chanchin chu hlimawm takin a kal chho a, a tawpah chuan an innei ta nghe nghe a. An inneih lawi ṭhat zan chanchin chu a danglam em avangin a hma lamah kan sawi tawh kha. Ka ṭhianpa hi zahawm khawpin Remremi chungah hian a dawh thei tluan chhuak zak a ni.

       He tia Dinsanga leh Remremi an inbiak ṭhat chhoh leh, an inneih chhoh lai vel hi Dintei nena kan inṭhen chhoh ṭantirh lai vel a ni ve thung. An nupa chu an hlim zui hle a, fa pawh an nei vat a; mahse dawt hmangin Remruata a rawn inrawlh ve leh tâk avangin buaina a awm leh deuh hat a. Dawt chu a lo tlo vak lo a ni ang, a reh leh thuai thung.

       Kan la sawi tel miah loh chu Remremi Patea fanu te zingah hian Lalremsangi, 'Remremi' tia an koh ve tho, tleirawl hmel duhawm zet a awm thu hi a ni; a hnu-ah he tleirawl chungah hian thil ṭha lo tak a thleng zui nghe nghe a. He thil hi kan kawmthlanga thleng a ni; zan rei tawhah nausen ṭap ri ka hriat ṭhin thu ka sawi tawh kha in la hria ang a. He nausen rawn ṭap fo mai hi kan kawmthlang thingkunga rawn inawkhlum Lalremsangi fasén thlarau kha a ni ang tih hi tun hnu hian ka ngaihtuah thiam chauh a.

      Lalremsangi leh a fasén chunga thil thleng hi Remruata vang a ni ber a; Lalremsangi'n a thih zana a lo puak nausén hi Remruata fa a ni tih hi sawi ila thil awmzia chu in chhut thiam tawh maiin ka ring. A hnu-ah Dinsanga'n Lalremsangi chu ka bialnu hlui Dintei nutei fanu a nih thu min hrilh a. Sawi tawh angin Lalremsangi hi Dinsanga nupui Remremi patea fanu a ni bawk.

       Lalremsangi nu leh pa, pu Chhuanawma(Remremi patea) leh pi Mawizuali(Dintei nutei) hi an inṭhen a, pi Mawizuali hian an fate pathum, hmeichhia hlir chu a awmpui ta zawk a. Rethei bakberhin an awm a, nausen tè nena inawkhlum ta Lalremsangi hi an fanu upa ber a ni.

       Lalremsangi te chhungkaw nun hi sawi mai aia khirh leh khauh a ni. A pa pu Chhuanawma hian a nupui nena an inṭhen hnu-ah nupui dang a nei leh vat a, anni lam hi chu an khawsa thei hle thung a ni; Lalremsangi te lam erawh an khawsak a harsa em em thung. A nu hian a hmeithaipui a, hah takin thawk mah se chhungkaw ei khawp an nei ṭawk ṭawk rih a ni ber mai; chutih lai chuan Lalremruata a rawn lang a, facebook aṭanga inhria an ni a, inbox lamah inkawmin an chhungkaw nun khirh tak avanga Remremi nun khawhar tak chu hneh a harsa lo hle dawn tih Remruata chuan a hria. A duh anga hman tur sum a tlachham lo va, pi Mawizuali pawhin a ngaina nghal hle a ni.

       An han inngaizawng chho a, Remruata chuan midang kawm hlim a thiam hle a, sawi tur a hriain fiamthu a duh hle ni hian a lang a, Lalremsangite chu a tlawh pawh ngun ta em em a. Anni chhung lam pawhin an hlimpui ṭhin khawp mai. Pi Mawizuali pawhin Remruata chu a rin em avangin a fanu nen chuan zalen takin a inkawm tir a, eng emaw changa a haw hman loh pawhin Remruta chuan a fate chu a lo riahpui mai ṭhin a ni; ngaih ṭhat lohna tur khawpin Remruata chu a awm ngai miah si lo va.

       Chuti ang khawpa inchen chilh ngun ta chu Remsangi leh Remruata chu an khawsa dun ta fo a, Remsangi chuan a hmangaih em avangin inthiam lohna pawh a nei chuang lo. Remruata fa chu a pai ta hial a; Remruata'n hmeichhia a kawp zînga a fa pai tu awmchhun a ni nghe nghe. A fa a pai tih Remruata a hrilh chuan Remruata chuan engmah a sawi miah lo, ngawi rengin duat tak hian a lo kuah ringawt a, chumi ringawt pawh chu ani tan chuan a thlamuanthlâk hle a ni.

       An inkar chu hlauhthawn tur awm lovin lang mah se Remsangi hian Remruata mizia leh awm dan hi a hre chiang lo hle niin a lang. Hetia an inkawp chhung zawng hian leh lamah midang kawp a bansan chuang lo va; hei hi Remsangi inawhhlum hnu féa ka hriat a ni. Hei hi ka hriatna chhan pawh Zoremi, Remruata nen inbox lama an khawsak dan avanga rilru hah leh inchhira ka hnena a rawn inbun ruah vang chauh a ni. Remruata leh Hminghlui awm dan ka lo hriat ve ngawt dan erawh ka sawi chhuah a rem rih lo thung.

       Facebook Account ka neih ve ṭantirh aṭang tawh khan Social Media hman sual avanga harsatna neite hi ka lo pui ve tawh ṭhin a. Chu'ng mite chu fuihin ka hau a, thurawn ka pe ṭhin; ka hetih avanga anni chanchin pawh hi hre thei ka ni a. An harsatna sawiin midang dang pawh hian ka hnenah thurawn an rawn beisei ṭhin; mahse, an mualphona tur emaw, an tana ṭha lo tur zawngin ka sawi chhuah sak ngai lo va, ka sawi chhuak a nih pawhin an phalnain midang tana ṭangkai tur zawngin ka sawi chhuak ve chauh ṭhin, an hming pangngai ka tarlang ngai miah lo bawk.

       Ka hriat chian tak em em erawh chu, midang puia thurawn pe ṭhin tu pawh hian puih an ngai ve fo tih hi a ni ta. Tunah pawh dam lai lusun dinhmunah ka ding a, ka rilru nâ leh hrehawm ti hi ramhnuaia kal bo ka tum mék a nih hi; mahse ka kal hmain ka thil sawi mek hi ka sawi zo phawt ang.

       Lalremsangi'n Remruata fa a pai thu a nu hnena a hrilh vel lai hian a rûkin Remruata chuan midang a kawp reng a, a bialnuin a fa a pai thu amah ngei a hrilh lai pawh hian Zoremi nen an inkawp chho ṭan mek a ni; Sangpuii, pasal pawm lai nei nena an inkawp pawh a ṭhulh phah chuang bawk lo, he nu hi fa nei tawh mah ni se, fa nei thei tawh lo tura insiam tawh, la valai leh tinung sen sak mai, îtawm tawk chauha ria chumbat mai a ni a, a pasal a vannei a, Remruata pawh a vannei tel fo bawk.

       Engmah hi thup hlen tak tak theih a ni lo tawp. Remruata awm dan chu tute hnen emaw aṭangin Lalremsangi chuan a lo hre ve ta a, a hriat tirh chuan a tlîak hnâwp a ni ber mai. A thinlung chu chhun angin a nâ a; amah hi tleirawl duhawm leh nu hnâp, mi pawisawi ngai lo zet a ni a. Chuti chung chuan chân a tum lo; Remruata hi a hmangaih a, a fa lo piang mai tur nen hian an mamawh a ni. Lalremsangi chuan inneih a rawt ta a, Remruata chuan engmah a sawi chiang duh ngai miah lo.

       Hun a kal a, Lalremsangi chuan nausén mipa duhawm zet mai a nei ta a. Remruata pawhin a nun dan a la sim chuang lo; chutih a hnekin nau a neih hnu lawkah inṭhen a han rawt zui lehnghal a! Lalremsangi chu a tawrhna chuan a ei chhia a, a nunphung a mumal thei lo. A ṭap a, a ṭawng mang lo va, a fapa chu a en ngawih ngawih fo va, a châng chuan a chûl heuh heuh ṭhin, a biang te chuan a nûl ne ne a. A fapa ngawi renga a en châng chuan a mit tui hi a rawn hnâm ṭiam ṭiam ṭhin a; a thinlung tawt chu 2016 Khuangchawi thla khaw nawm vang lai takin a fa sen puain zanlaiah a chhuak a. Zan dangah pawh nau nen a chhuak fo a, a rawn haw leh mai ṭhin, hemi zana a chhuak pawh hi a nu chuan a hre reng a, a rawn haw leh mai ringin a ngaihven zui duh lem lo va; mahse a rawn haw ta si lo a ni.

       Kha kha nausén ṭap ka hriat ṭhin lo inṭan dan chu a ni a. Engvanga kan kawmthlang kher khera thleng nge tih zawng ka sawi thei lo, tunthleng hian nausén ṭap ri chu ka la hre ta zauh zauh reng a. Ka bengchhe ri mai ni chuan ka hre bik lo, kohna aw pawh a ni mahna; ka hre lo le.

       Ka ṭhianpa Dinsanga leh Remremi te erawh kha chu an inneih lawi ṭhat zan hnu lamah khan nupa hlim tak an ni chho a, kawng engkimah, sex ngeiah pawh an thinlung a inhmuin an inlungrual a, an tan khawvel hi a nuam rih a ni. Dinsanga hi virgin-a nupui nei chu a ni bik miah lo, mithianghlim famkim pawh a ni chuang miah lo; mahse sex  chungchangah pawh thianghlim bik lo mah se, a hur herh ve hran lo, inbox pawh a leklam lo, a CK ve ngai hek lo, hum sual erawh a dai ve khauh thung. Remremi erawh virgin a ni a, a lakah Dinsanga hi a inthlahrun phah lek lek fo mai.

       Nikhat chu Dinsanga nen kan inhmu a.

       "Chhante, kal bo rih chu i tum ṭalh a maw?"

       "Nia...hawi harh ka mamawh a ni."

       "Khawi lam nge i pan ang?"

       "Ka hre mai lo..." ka hre lo takzet a ni.

       "I tana hmun remchang deuh tur ka hria asin," Dinsanga chuan a han ti a.

       "Dina, ka kalna tur hi nang pawhin hre lo la ka duh asin," ka lo ti ve thung a.

       Dinsanga chu a nui hak a, "I ho e a...i rilru nâ chu a dam leh vat mai ang," a han ti a. "Tak takin, Novelist tia la sawi theih tur, lehkha ziah nuam ti chi i ni a, i thawnthu ziah mek ziah chhunzawm nán ka sawi hmun chu a remchang ngawt ang," a han tih chhunzawm a.

       "Khawiah maw?"

       "Ka pute khua aṭanga hla vak loah ka chhungten Farm an nei a, anmahni an buai deuh avangin an farm house nghaktu tur an duh hle a, ka lo bia ang chu...a hmun a nuamin a reh a, current an la lut tho bawk si...chutah chuan hun hmang mai rawh...net signal pawh a ṭha."

       "I pute khua chu eng khua nge?"

       "I duh dawn chuan kan inhrilh chiang leh zawk dawn nia; mahse..." tiin Dinsanga chu a han ngawi dat a.

       "Mahse...eng'e?"

       "Ka pute Farm House aṭanga 1km khat vela hlaah chuan Farm House dang a awm ve tho a..."

       "A lo awm ve a ni mai alawm," tiin ka han nui a.

       "Chanchin duhawm vak lo a nei alawm..." Dinsanga chuan thu tak zetin a han ti a.
* * * * * * *

Bung 7 Na

       Ka thil hrilh tur che u ka sawi zawhah ka kal bo dawn tih thu ka hrilh tawh che u ang khan kal bo chu ka tum ta kha a ni a, ruahmanna fel fai tak ka nei chuang lo va, ramhnuai khawi maw laia rawl bo kha ka tum dan a ni ve tawp mai a ni. Mahse, Dinsanga min rawtpui angin ka awm ta zawk a, a Pû te farm-house lama hun hmang turin ka kal ta zawk a ni.

       Chu farm-house ka thlen chuan manhla ka ti hle mai. A reh a, a bul lawkah thing hmun ngaw a awm a, a thlang deuhah lui lian vak lo a luang bawk; Sava hram chiah chiah hriat tur a awm reng a, thlifim a thaw heuh heuh reng bawk si, hahchawlh nana hmun thlannahawm tak a ni. Current a lût a, zanah ka Novel ziah lai ka chhunzawm a, zingkar leh chhunah farm-house bul velah chuan ka tei kual ṭhin.

       Helai hmun ka thlen aṭangin vawiin hi ni ruk ka awmna chiah a ni ta; ka beisei loh lam aṭangin buaina karah ka tel ve leh dawn ta a ni. Hei hi he lai hmuna Muanawma nen kan inhmuh tak nawlh aṭanga lo inṭan a ni ber mai. Muanawma chu a ṭhen chuan in hre tawhin ka ring; 'PARADISE LODGE' buainaah khan kan hmel hriat tawh kha, kan inhmuh tirh chuan zép lovin tlang takin lunghlu dang awmna kha a chhui zui thu min hrilh a.

       Helai hmun ka thlen hian a nikhatna aṭanga a ni thumna thleng chuan eng thil dang lam mah ka hre lo tluk a ni. A nithumna zanlaiah erawh kha chuan ka mutna pindan ni lo, pindan danga thil ri rum rum thawm chu ka hre ngei a; mahse heti ang hmunah chuan Sazu an tam ang tih chu ka hre ve mai a, ka ngai thupui vak chuang lo. Ka tho a, ka va en fiah ve ngei a, choka lamah chuan thil a lo tla hnawk niaih a; Sazu an ni ang. Thil mak anga ngaih theih tur pakhat erawh, ka mut dawna kawngka ka khar chu a lo inhawng hiau a, chu chu ka khar ṭha a, ka mu zui leh mai a, eng thil danglam mah ka hre zui leh tawh chuang lo.

       A ni lina, chawhma chanve àwm velah chuan farm-house bathlarah pen leh lehkhapuan nen, dawhkan chawi chhuakin ka inchhawp hnawk a; chutih lai chuan ka piah thinghmun ngaw aṭang chuan mipahnih hi an rawn chhuak hlawl mai a, ral aṭang chuan ka lo thlir reng a, an lan danah chuan ka awmna farm-house lam chu rawn pan an tum niin a lang. Hnathawh thawmhnaw emaw, ramvah thawmhnaw emaw leh iptepui emaw tak ngial pawh an ak lo va, silai niàwm tak an ken avangin mak ka ti deuh a. Chu mi te pahnih ka awmna lam pan tura an rawn kal ṭan tih chuan ralkhatah hmeichhe ṭe thawm hi a rawn ri ta phut a, chu thawm an hriat ve leh mipahnih te chu thinghmun ngawah chuan an lét leh ta daih a. Hmeichhe ṭe thawm a rawn rik rual chuan ka ding chhuak a, chumite an lét leh tâk mai bawk si avang chuan mak ka ti hle a ni.

       Chumi hnu, chuta ka awm aṭanga a ni rukna chawhma lam thleng chuan eng thil danglam mah ka tawngin ka hre leh tawh lo. Lehkha ka ziak a, kehkhabu ka chhiar a, luiah ka zuk kal bawk. Ka awm dan chu ka nin deuh avangin chawhnu lam chuan farm-house piah thinghmun ngawah chuan ka lût phei ve ta ngawt a. A lo thelhin kal vel a lo harsa lem lo va, ka kal ka kal a, ka kalna hnu pawh chu ka chhinchhiah lem chuang lo va. A chhan ber pawh ka hre chuang lo, hmalam pan chuan ka pawng kal satliah a, a nakkinah chuan ka hma lamah chuan a lo veng deuh huai a, farm-house ni ngeia lang hi ka va hmu nghal a; ka rilru chuan, 'Dinsanga'n farm-house dang awm vea a sawi kha a nih dawn saw,' ka ti a. Dinsanga khan a chanchin a sawi ṭhat teh vak loh avangin va pawh phei kher pawh ka chak hran lem lo va, lét leh mai tuma ka rilru ka siam lai chuan, inchhung aṭangin, hmeichhe hmel ṭha tak pakhat leh mipa pakhat hi an rawn chhuak a, hmeichhia zawk chu a bai saih saih a, a thin a rim ni ngeiin a lang bawk.

       "Sangte, Zorema hi ka ngaina tawh lo, haw ka duh a ni," hmeichhia chuan a han ti a.

       Mipa zawk, 'Sangte' tia a koh chuan, "Kan kalpui a ni a, haw san ringawt chu dik ka ti thei lo," a lo ti ve thung a.

       "A awm dan te hi i hre lo a mi? Mi pangngai pawh a ang tawh lo, ka hlau deuh hial a nia,"

       "A awm dan hi chu a mak khawp mai...nizan a rawn lét bawk si lo," mipa chuan a han ti ve a.

       Kei, anmahni lo thlir rengtu chu mipa zawk chuan min rawn hmu ta a, min rawn pan hnai a, "Ṭhianpa, ka va hmu ngai lo che ve eng nge ni ta?" a rawn ti a. A hmel chu a pawr deuh chap a, a thawmhnaw chu a pangngaiin a zahpuiawm loh hle mai thung.

       "Chawlh hmangin heti laiah hian ka rawn kal mai mai; saw lai farm-house ah khan ka awm a ni. Saw mi thing hmun ngawah sawn ka rawn lût a, ka kal ka kal a, he lai hi ka rawn thleng ve ringawt mai a nih hi," tiin ka chhang a.

       "Mi pakhat, Jeans dum lam pang leh T-Shirt pawl ha i lo hmu em?" tiin min han zawt a, a ruka mangang hle hian a lang a. Ka hmuh loh thu ka sawi zawh chuan a thaw halh a, "Muana pawh chu rawn kal leh se ka va duh tak," a han ti ngawt a. Hmeichhe hnenah chuan, "Kan ṭhiante kha i va be teh ang, Lucy pawh a ziaawm theih loh chuan kan haw mai pawh a ngai tak tak ang," a han ti leh a, hmeichhia nen chuan an kal ta a.

       Farm-house lam pana an kal phei chu ka en reng a, eng emaw buaina an nei a nih ngei ka ring a ni.

       Mipa zawk chu a rawn hawi lét leh a, "Kan buai viau na a, lo leng ve ta che," min han ti hnuhnawh mawihnai a.

       Kei chuan, "Ka lét leh zawk ang nge," tiin ka lo hnial a.

       Inchhungah an lut a, kei pawh thing hmun ngawah chuan ka lût bo ve ta a ni. A hmaa ka kalna hnu chu ka hre tawh miah lo va, ka innghahna awmna lam nia ka rin chu ka pan ta tawp a. Muangchangin ka kal a, ka awmna hmun thlen vat ka duh hle a ni. Chutia ka kal chhat chhat lai chuan ka sir thlang lamah chuan thawm ka han hria a, ka ding det a, ka han ngaithla chiang a, ṭawng ri ka hria a ni.

       "He thilah hian i rawn inrawlh a ṭul lo khawp mai, keima'n ka zawng hmu ang a, ka nei ngei bawk ang."

       Vîn deuh féa chu thu chhak chhuaktu chu a thinrim hmel hle mai; mahse a mi biakin a chhanna erawh ka hre pha lo a nih ka ring, eng chhanna mah a awm si lo va. Hriat chian tuma pan hnaih ngei chu ṭul riau hian ka hria a, kha thu sawitu khan biak chu a nei ve phawt ang a, anmahni pawh chu ka hmuh theih ka inring a ni.

       Ṭawng ri lo chhuahna lam chu ka hnaih ta hret hret a, phun bul bul thawm a rawn awm leh ṭhin a, a sawi erawh chu ka hre chiang thei tawh lo. Ka hnaih zel a, an awmna chu ka hnaih tawh hle niin ka hria. Ka hmaa hnim chu ka han vai kiang a, ka thil va hmuh chu a ṭha lo hle mai.

        Thing pakhatah hian mipakhat hi phuar beh a ni a, a lu a kun deuh avangin a hmel ka hmu chiang thei lo va, amah phuar bettu àwm ang pawh ka hmu mai lo; mahse, chupa sir deuhah chuan thawm a lo awm a, mipakhat dang hi a rawn kal a, thinga phuar beh chu a han kuai dak lawp a; e heu! A phuar beh pa hmel kan han hmu chiang chu mak ka ti kher mai!

       Muanawma a ni tlat mai.

       Amah din chilhtu chu a meng sen rûm a, anmahni ka hlat vak loh avangin ka hmu chiang hle a, hriat tham mang loh hian a phun nuah nuah a. Muanawma chu a rawn meng a, amah kuai dâktu chu a han nuih a, engmah phei chu a sawi lo. Chupa chu la phun nuah nuah chungin a kal sawn ta a. Rei lo deuh ka han nghak a, kha pa thawm kha ka han ngaithla leh phawt a. A rawn lét leh mai loh avangin Muanawma lam chu ka pan phei thuai a, amah a phuarna chu ka phelh sak ta vat a. Mak takin Muanawma chuan min hmu chu mak a ti lo!

       "Min va rawn phelh har ve."

       "Ehh...ka rawn kal dawn tih i hria elo?"

       "Hre tawp nang; mahse helai hnaihah i awm tih chu ka hria."

       "Engtin?"

       "Hman zan khan ka rawn tlawh che a, ka fimkhur loh lûatah thil kha ka ti tla a. Nang chuan thlahrâng emaw i ti leh pek ang chu," Muanawma chu a han nui a.

       "Engtin nge heng lai laiah i awm theih a...eng nge i tih?"

       "Heta i rawn thlen hma khan hetah ka awm tawh," tih ngawtin min chhang a. Ka hmela zawhna awm chu a chhiar thiam leh pek tawh a ni ang, "Kal vat teh ang, Zorema kha a rawn lét leh ang nge...nakkinah ka hrilh fiah ang che," a han ti leh a.

       "Zorema a!?"

       "Aw."
* * * * * * *

       "Inchung lamah chho ang," a han ti thâwp sat a; tisa châknain a nawr na tawh takzet!

       Chu ṭawngkam leh a sawitu chetzia leh amah a sawngbawl dan avang chuan Rinsangi chu a tirilah a khur ru der der a; hlauh avanga khur chu a ni si lo. A thaw chu a lo rang a, a thâwk zawngin a àwm chu a insép dat dat a; chu chu mipa chuan a hai hauh lo.

       "Zo...ka...ka...kan...ṭhian te saw..." a han ti bah nak a.

       "Tuma'n min hre lo vang...kan tel lo pawhin an hlim khawp saw," mipa chuan a han ti su su a, tisa châkna avangin a meng thim raih a. "Kan pahnih chauh pawhin hlim takin kan awm thei asin...an tel ve kher a ngai lo," a han ti chhum leh hmak a.

       Rinsangi chu a la khur ru der der a, a aw pawh a pangngai lo hle. Zorema'n nghet taka a kawnga a kuah laiin derdép hmel zetin a nghawngah a lo kuah hnâp a, an thaw dun ham ham a. A kuahtu mipa taksa chu a insang mar ṭang a, a mitmeng thûk raih chuan amah Rinsangi chu a melh reng a, a mitmeng chu a ngenngawl kher mai.

       "Ka duhna che hi i tihhlawhtlin ngei a ngai a ni...heta kan inhmuh hma pawh khan khawih che hi ka duh tawh asin..." mipa chuan a han ti tlang leh hmiah a. Rinsangi chiai hmel chu hnaitèah chiang zetin a han bih a, a ngawih vang vang hnu-ah, "Min hnial leh tur si engvangin nge inbox leh whatsapp ah khan khatia min tihpui?" a han ti bul leh hmak a.

       Rinsangi chuan hnial ngaihna a hre lo, mipa chuan a dang chep hneh hle hian a hria a; nia, an inhmuh hma hauha inbox leh whatsapp lama an khawsak dan kha...zanin hi a taka a inhmuh vawikhatna a ni. A sawi dik a ni, khati khan a chetpui fo tawh a, a phur ṭhin hle a, engvangin nge a taka an inhmuh tâk avanga a dan tlat kher ang; a dik tak chuan hepa hian a taksa, ngaihtuahna, a phurna leh engkim hi a chawk tho takzet si a.

       "Tirawh, inchung pindanah khan i chho vat teh ang," dawh theih loh hmel zet hian mipa chuan a han ti leh a; Rinsangi chu dimtèin a han fawp a, a taksa chu a chul kual ruai a, a han fawp kual dan dan a. A nghawngah te, a beng kâwm te, a mit leh a awm bawr lang laiah te chuan, dimte hian...

       Rinsangi chu a thaw a rang leh zual sauh a, a âwm chu a thâwk zawngin a pawng dât dât a, zawi leh chauh hmel zetin mipa khabe hnuaiah chuan a kun nghaih a, a sam chu a inzam hnawk niaih a; chutah, "Zo, kal rawh...i chho vat teh ang," a ti thâm ta chhal a. Mipa chu a nui sak a.

       Anni pahnih inchung lama an chhoh laiin inhnuai pindan zau berah chuan an ṭhiante chu an bengchheng hle thung a. Woofer play-in zu ûm nen, beer nen an inchhawp hnawk a, Rinsangi te ṭhian dun chu an hre chang miah lo emaw tih tur a ni. He hmunah hian intihlim turin a kawp te te in an kal khawm a, chhungte mitmei venthawn tur a awm lo va, hetah ngat hi chuan an zalen a ni. Kum lama la naupang tak tak an ni hlawm a, an vaiin pariat an ni a, a ṭhen chu inhre sa, inkawm tawh sa an ni; a ṭhen erawh whatsapp leh facebook lam chauha inhria an ni a, zanin hi an vawikhat inhmuhna a ni hlawm. He lai hmuna inhmuh khawm hi whatsapp group lama an rawt a ni nghe nghe a; he hmuna an kal theih nan an chhungte ṭheuh bulah dâwt chhuanlam an nei vek bawk.

       "En teh...Singapore house-maid ho an tih dan hi chu a over mah mah zel ka ti...Zosap-ah lah hian an post ve ziah lehnghal," tiin tleirawl hmai fai veng pakhat hian a ṭhiannu chu a han kheuh a, Dawhkana beer chu a han lem hlak a, a bula mipa tleirawl pakhat chuan Whisky a lo thli chhuak mék bawk; anmahni vil rengtu a awm tih lam chu an ngaihven lo hrim hrim.

        "Kei chu Zosap hi nuam ka ti," mipa tleirawl chuan a lo ti a.

        "An post hoh theih theih nen."

        "Fb group zinga i active-na ber a nih kha aw...ho i ti lo tawp a niang."

        Hmeichhe hmel ṭha tak pakhat chuan, "An thu ziak tam tak hi chu Troll post mai mai a lawm...an trolling ve dan lah hi a class a la hniam em em zui," a rawn ti ve bawk a.

        Hetih lai hian chung mi pariat te zinga pakhat chu pâwnah a va chhuak a, an kal chhuah dawna a unaupa thu sawi kha a rilru-ah a riak reng a, a tir khan eng vakah a ngai lo; mahse, thim thet thetah he hmun hi an ṭhian za hoin an rawn thleng a, a hmunhma leh khaw awm dan avang chuan a unaupa thu sawi kha a nih duh hmel hlein a hre ta rum rum mai.

       Thla a éng no nghulh a, hemi zan ber kher hian chhum a zing chiai chiai a, chu chuan boruak chu a tihnawng churh hian a hriat a, khaw awm dan chu a hnîm ruih mai a ni. He farm-house hi a pu tà, a Papuia'n a rochun a ni a, eng emaw chen chu a neitute hian an tlawh ngai tawh lo nghe nghe; mahse, nu upa lam tawh pakhat hian khua aṭangin karkhatah vawikhat tal a va tih fai ṭhin avangin bal ṭawp lutuk chu a ni bîk lo. Chhawnghniha sak a ni a, a kawt zawl a zau thawkhat a, phaitual hnim a ṭo khat tlat bawk; hmun ṭihawm ni lo se hmun nuam tak a ni.

       Farm-house chhak mual pawng pharh ṭha ang reng takah chuan enkawl ngun tehchiam a ni lo tih hriat tak Oil-Palm hmun hi a awm a, ṭin hnih hmun vel chu a ni ang. A kawt zawl hmun ṭhenkhatah erawh Serthlum leh thei dang tlem azawng a awm thung a. Farm-house aṭanga metre sawmnga bawr vela hlaah chuan eng thing nge tih pawh hriat loh, kung lian tak hi a ding ther fur a, mak tak maiin he thingkung hi hring reng mah se a hnah a tla kawlh deuh reng mai a ni. A zar lian deuh pakhat chu hmar lam hawiin a zar phei dû mai bawk a.

       "Thla èn zan hian thingzar pakhat hnuaiah hlimthla mak tak a lang ṭhin a ni!"

       Heta an kal hmaa he farm-house chanchin hrilhtu a unaupa thusawi kha a ni; chu chu a han hre chhuak zawk a, tuna a thlir mék hi a unaupa thing sawi chu a nih ngei a ring. A rilru-ah chuan, "Zanin hi thla a éng a..." tih hi a lo lût a. Hrehna rilru nei chung siin thingzar hnuaiah hlimthla chu a awm leh awm loh hriat a duh hle a; a unaupa khan a tih der mai a nih a ring tlat a.

       Thing awmna lam pan tuma a ke a han pén chiah chu, "Sangte, khaw'nge i kal dawn...ka lo kal ve duh," tih ri a han hria a, a hawi lét a, a bialnu Rinpuii a lo ni a.

       "Khawiahmah ka kal dawn lo; lût tawh zâwk ang."

       An ṭhiante chu an thawm a lo reh deuh tawh a, a kawp hian an lo inṭhut hnaih hle a.

       Sangtea chuan, "Khaw'nge Zorema te hi an awm a?" a han ti a.

       Rinpuii chuan, "Inchung pindan lamah an chho," a lo tisap a. "Sangte, thil hrilh tur che ka nei a," a tizui leh sap a.

       "Han sawi la...eng'e? Nuam i ti lo mi?"

       "Aih, ni lo...chu lam pawh a ni lo."

       "Inṭhen i rawt dawn tihna maw?" Sangtea chu a han nui deuh a. "Hmannia i inbox kha ka hmu alawm...Rinpui, password inhriatpui hi ṭha ka ti lo, hei hi chu ti tawh lo vang," a han tihzawm a.

       Rinpuii chu a han ngawi vang vang a, "Remruata te chu i ṭhian alawm...i ho thei e mai," a han ti a.

       "Ni e, a ṭhian ka nih a theihnghilh a ni mai thei," Sangtea ṭawng danah chuan tiel awkâ hi a tel a. "I ṭawngkam pawh a bialpa ṭhianpa biakna ṭawngkam a nih hle kha tiraw?" a han ti leh ngat a.

       "Kan fiamthu mai mai a nih kha...hre thiam ve la..."

       "Eh..ka lo hre thiam nange?"

       "Sangte, hetiang chuan awm lo hram teh...hetah hian intihlim turin kan kal a ni lo'm ni? A nuam lo a nia."

       "Kei pawh hian fiamthuin bul ka ṭan ziah ṭhin asin...nang ka bém che pawh khan..." Sangtea chuan a han ti leh hrâm a.

        Rinpuii chu a meng hnual raih a, "Maw, inchungah chuan chho lawk ang...hetah chuan ṭhiante an awm ve sia thil sawi a nuam lo a nia..."

       "Zorema te kan ti buai ang."

       "Pindan pahnih a awm tho alawm."

       Sangtea ngaihtuahnaah chuan thildang a leng lo hle mai, a unaupa thu sawi khan a rilru chu a luah tlat a, khaw awm dan leh chu farm-house chu a ṭha lo zawng hian a inhmeh ruih hian a hria a, achhan sawi tur em em hre si lovin nuam lo a ti ru hle a ni. Inchung lama chhohpuia Rinpui'n a sawmna pawh chu a phurpui thei vak lo va. He hmuna kal rawt chhuaktu chu amah hi a ni a, Social Media lama a ṭhian chharte nena inhmuhna remchang a nih dawn bâkah, Rinpuii nena an inkar hi a ṭhat phah a beisei bawk; mahse, a rilru chu a nuam lo a ni, engvang nge a hre chiah si lo. He hmunah hian karkhat awm an tum chu a ni si a.

       Rinpuii chuan a lo la en reng a, ngen taktè hian inchung lama chhoh puiah a han sawm leh a, Sangtea chuan a lo hnial ve zel bawk.

       "Heta kalpuiah min sawm a, min ngaihsak ṭha leh duh si lo..." Rinpuii chu a lungawi loh hmel hle a.

       "Ka tihpalh a ni; ka ngaihtuahnaah thil dang a tam em a ni."

       "Eng thil dang nge?"

       "Ka hre bîk lo," a ti leh tlat si; hrilh kher ṭul a ti lo!

       "Hmmm...inchung lamah chuan chho lawk ila, ka bula awm i peih loh viau chuan ka sawi zawhah kan chhuk leh dawn nia."

       "I sawi ho àwm sia..."

       "Ho lo...a hrim hrimin zanin hi 'tinge beer tak ngial pawh i in loh a?"

       "Ka hre lo. Ka in châk lo. Nang paw'n in belh tawh suh, rui deuh bulah ka mu peih lo a nia."

       "Ka hre lo' i ti fai vek mai a...tu'nge i bula ka mu dawn ti? I nupui pawh ka ni hleinem..."

       "Zaninah ka bulah i mu dawn," Sangtea chuan a lo ti chhum hmak a.

       "I zak thei lo...i bulah ka mu peih bawk lo e."

       "Nuam i tih theih hle kha a," tih pahin Sangtea chuan a kutah a han hmer a, "Chho ang," tih leh inchung lama kaih chhoh a rual a.

       Rinpuii chu a nui rah rah a. Inchung chhohna kailawnah chuan an chho a, an awm tumna pindan va pawh tur chuan Zorema leh Rinsangi te awmna pindan pelh phei a ngai a, chu pindan kawngkhar zawn an thleng ṭep tih chuan inhnuai lamah ṭe ṭhawt thawm hi a awm thut a, anni pahnih chu an ding chawt a, Sangtea chu inhnuai lamah a tlan thla lehnghal vat a.

        Inhnuaiah chuan hlau tih hriat ngawih ngawih hian, "Saw..saw...saw...tah saw...saw...sawn ka hmu!" Lucy chuan a lo ti nawk nawk a.

        Sangtea chuan ngaih ṭhat lohna a lo neih sa tawh vang a ni mai thei, Lucy kawhna lam en tur chuan pâwnah a tlân chhuak ta vat a, a va kal kual thuak thuak a, farm-house chu a kal hual bâkah, farm-house aṭanga hlam nga vela thing hmun lamah pawh chuan a va phei a; mahse engmah a hmu lo! A rawn lût leh a, Lucy pawh a lo ziaawm ve tawh bawk.
* * * * * * *

       Zorema leh Rinsangi te inchung lam pindana an chho ta kha, pawisak leh zah em em nei lo dun tih takah pindan an han thlen chuan khumah an phusa dun nghal mawlh mawlh a, Social Media hmanga inhria, an inhriatna pawh a la rei lutuk lo, inbox leh whatsapp velah ṭawngkam uchuak deuh taka lo khawsa dun fo tawh an nih avangin an vawikhat inhmuhna mah ni se an tîm lo dun khawp mai; rilru leh thinlung lamin a hnar loh miau chuan sex hi chu puitlin mai a har ngai lo reng a ni.

       An thaw dun halh halh a, an taksa chu thlanin a bawh mawm hlap a, Zorema a chét nasat lai chuan Rinsangi chu a lo rûm det det a...

       An zawh fel hlimchhawn chuan an awmna pindan lam pana ke pen thawm an hria a, an han inen a, an innuih sak a, Rinsangi biang chu a tai ték a, tun maia hmangaihna pâr an tlan avanga a thinlung hlimna chu a hmelah a lang a ni. Zorema thung chu a tisa châkna avanga a mitmeng thûk leh thim raih kha hmuh tur a awm tawh lo va, a hmelah chuan hlawhtling intihna hmel a lang thung; cigarret a ṭan a, a han híp vang vang a.

       An awmna lam pana ke pén thawm awm chu a lo hnai zel a; chutih lai chuan Rinsangi chu a inha ṭha mawlh mawlh a. Ke pén thawmin an awmna pindan zawn a rawn thleng ṭep tawh tih chuan ke pén thawm chu a tâwp chawt a, ke pén thawm tâwp hma hreta inhnuai lama ṭe ṭhawt thawm pawh Zorema te pahnih chuan an hria; Rinsangi chu a meng phâwk hra a, hmanhmawh taka inhnuai lama tlan thla thawm an hre zui nghal bawk.

       "Ngati nge a?" ngaihṭhat loh hmel zet hian Rinsangi chuan Zorema chu a han en hâ a.

       Zorema chuan a chhang lo, thawm a han ngaichang leh a, inhnuai lama, "Saw..saw...saw...tah saw...saw...sawn ka hmu!" tu emawin a tih thawm chu an han hre zui leh a.

       Engmah sawi lovin an han inen a, "Chhuk ve teh ang, rawn kal teh," Rinsangi chuan a ti ta nge nge a; hetih lai hian Zorema chu saruakin a la awm a! Rinsangi chu hmanhmawh zetin inhnuai lamah a tlan thla a, inhnuai pindana awm te chu a zuk pawh thla thuai a.

      Lianmawia'n, "Khaw'nge i ṭhianpa?" a lo ti vat a.

       Rinsangi chuan, "Inchungah," tih chauhin a lo chhang a, midang chu a han en kual a, "Eng nga tinge a!?" a han ti phawk leh hrâ a.

       "Lucy hian tukverh darthlalang phen aṭang hian pâwn lamah thil hmuh a nei a."

       "Thlahrâng a ni ngei ngei ang...ka hlau kher mai," Lianmawia chuan a lo ti a, a nui kak kak a; Rinpuii chuan mitmeia khapin a lo melh vak a.

       Zorema chu inchungah a la awm ta reng a, a cigarret chu a fawp mawlh mawlh a, a ngaihtuahna chuan tunhma thil kha a chhui kir a; he hmun hi a vawikhat kalna a ni lo! Muangchangin a inha a, inhnuai lamah chuan a chhuk thla ve ta a ni. Inhnuai pindan a zuk thlen chuan Sangtea pâwn chhuak a rawn lût ve chiah a, "Hmun i nei em?" tiin Zorema chuan a lo záwt nghal a.

       "Engmah ka hmu lo!"

       "A hmuh sual mai mai a ni ang, engmah a ni lo vang."

       "Ni e, Lucy, i hmuh sual palh a ni ang...mu tawh hlawm ang u," Sangtea chuan a han ti ta a.

       "Sangte, ka hmu sual miah lo!"

       "A mak hle mai, pawnah sawn engmah ka va hmu lo a ni, engkim a ṭha leh mai ang Lucy."

       "A tlai tawh khawp mai," Zorema'n a lo ti bauh a.

       "Rinpui, lo kal teh."

       Sangtea lamah chuan Rinpuii chu a kal var a, "Eng'e?" a han ti zawi sap a.

       Sangtea chuan, "Kan mu ang...sawi tur i neih kha," a lo ti hmak a.
* * * * * * *

       Khuangchawi thla a ni a, zing ni chhuak a mawi hle mai, an awmna pindan chu tukverh aṭangin ni zungin a rawn chhun iarh a, Rinpuii chu Sangtea Bân lukhamin a la muhil a, a thaw ri sék sék a. Sangtea erawh a harh tawh a, Rinpuii nena zan lama an hun hman dan chu nuamin hlimawm viau mah se, nizan thil thleng leh khaw awm dan khan a ngaihtuahna a chhuahsan thei lo. Lucy thil hmuh chu a han ngaihtuah a.

       An awmna farm-house piah ngawah Sava kah tur zawn paha Zorema nena kal tum an ni a; an puan sin chu a han leng hlim a, inhnuai lamah a chhuk thla a, eirawng a bawl zui nghal bawk. Pâwn lam chu a han hawi a, an awmna farm-house lam pana mi pakhat rawn kal hi a hmu a, a lo en reng a, ani pawh chuan a rawn hmu ve tawh nghe nghe.

       Chupa chu chokaah chuan a rawn lút a, "Nizan in mu ṭha thei maw?" tiin Sangtea chu a han zawt nghal ngawt a.

       "Mu ṭha thei e...tunge i nih a?" Sangtea chuan hawihhawm lo a tih èm avangin a lawm vak lo va.

       "Muanawma," tih chauh hian a lo chhang a.

       "Eng'e i duh a?"

       "He farm-house leh a bul vel hi a hrisel vak lo a nia," chu pa chuan a han ti a, a ngawih vang vang hnu-ah, "Hmeichhe tân a ni leh zual," a han tih zawm a.

        "Tunge i nih ka hre ngai lo che a, helaiah rawn kalin i duh duh i rawn sawi ringawt mai..." sawi zawm ṭul ti vak lovin Sangtea chu a ngawi leh daih a; hepa hi a lawm tehchiam lo a ni.

       Chu pa chuan, "Thianpa, min lawm lo vak duh suh, he hmun hi in chhuahsan nghal dawn a nih si loh chuan min la mamawh dawn nasa a nia...chhuahsan vat erawh in tân a ṭha zawk ang," a lo ti leh mai a. Sangtea chu chiang zet hian a han en a. "Pu Hrângchîna tupa i ni tiraw?" tiin a han zawt zui a.

       "Lo ni pawh ni ila i tân eng'e a ṭangkaina?"

       "Ka hre bik lo le," tiin chupa chuan ke pen thawm awmna lam chu a han hawi a.

       Chutih lai chuan Zorema chu chokaah a rawn lût ve mék a, Sangtea leh a la hmel hriat loh mipakhat inbiakna ṭhenkhat pawh kha a rawn hre hman nghe nghe; chuvangin a hmel pawh chu a nelawm lutuk hran lo hle mai a, "Thianpa, helai chhuahsan chu eng kawngin nge kan tân a ṭhatna?" a rawn ti ram hmak a.

        Lo kal thar chu a nui sak duh chauh a. A hnu deuhah chuan, "Sawi mah ila i awih chuangin ka ring lo," tiin a tho a, a kal ta mai a.

        Sangtea leh Zorema chuan chupa kal phei chu mak ti deuh tak hian an en zui a, thui pawh a la kal hmain chupa chu a ding a, inherin a rawn lét leh a, Sangtea bul chètah chuan rawn dingin, zawi sap hian, "He farm-house leh a neitute chungchang hi lo chhui lét ve ta che," a han ti a. A kal phei leh a, thinghmun lamah chuan a pil bo ta daih a.

       Midang ho pawh an rawn tho ve ṭan tawh hlawm a, Lianmawia leh Rokima penṭawng chu an rawn ner nâng nâng a. Anni pahnih hi mipa dang pahnihte aia la naupang lehchhawng an ni a, rawlthar awm ṭha duh lo tak an nih thu hi zep kher a ṭul lo vang. Chaw ei kham lamah Zorema leh Sangtea'n ramvah an tum avangin anni pahnih hian hmeichhe ho tui an lo chenpuiin an lo intihhlimpui dawn a ni.

        Farm-house piah deuh, hmar lamah chuan swiming pool angreng hi a awm ve a, a khur chu fai lutuk lo mah se, tui a haw luh reng avangin a tui erawh a fîm hle thung.

        Zorem leh Sangtea chu an chhuak a, an piah ngawah chuan sava veh turin an lût phei a. A tir chuan an ngawi dun reng a, sawi tur an hre lo pawh a ni ang, an kal dun mawp mawp mai a ni.

       "Khapa kha eng angin nge i ngaih?" Sangtea chuan a rawn tichhuak ta phawng a.

       "Engah mah ngai duh suh...a ṭawng ve mai mai a nih hrep kha," Zorema chuan a lo ti hluk a.

       "Heti lamah hian i kal teh ang."

       An kal thui tawh fú mai. Zorema chuan hmâ a hruai a, hmanhmawh vak lo hian an kal a, an lan dan chuan sava veh tum pawh an ang tawh lo. Sangtea chuan an hma lama farm-house niàwm tak chu a va hmu ta a.

       "Saw chu farm-house pakhat chu a nih dawn saw."

       "I hria elo?"

       "He hmun kan kal hma khan ka unaupa Liansanga'n engkim min hrilh alawm," Sangtea chuan a han ti a; hlimthla chungchang leh a pu te farm-house chungchang dang Liansanga'n a hrilh dan chu a sawi duh lem lo va.

       "Liansanga i tia mi?" tiin Zorema chuan a lo zawt a.

       "Aw," tia chhan liam puat pahin an hmaa farm-house chu Sangtea chuan a thlîr a, "Saw, mi an awm a nih saw...i va pawh phei chhin teh ang," a han ti zui a.

       Chu farm-house lam pana kal an tum lai chuan hmeichhe mangang ṭe thawm ring tak hi an hnung lamah chuan a rawn ri ta tuar tuar a. Zorema leh Sangtea chuan chu ṭe thawm chu an han ngaithla chiang a; an awmna farm-house ngei kha niin an hria a, hmanhmawh fé hian an lét leh ta a, ngaih ṭha lo zet hian farm-house lam chu an pan ta hmawk hmawk a.

       An va thlen chuan thil chu a nih tur ang angin a lo thleng zo tawh a ni ngei ang, zan lama an zu inna pindan ṭhuthlengah chuan Rinsangi maltè sir lam hreta thil zumin a taina hliam chu zînga lo kal an hmel hriat loh pa khan a lo tuam mék a; Sangtea te pahnih rawn thleng chu nelawm vak loh hian a lo en a, engmah phei chu a sawi lo. Rinsangi na ti chu a ṭhen chak chak a, chupain a tuam lai chuan a lo ṭe leh ṭhat ṭhin a.

        Rinsangi hliam a tuam zawh chuan chupa chu a tho a, Sangtea chu a han en bîk a, "Helai hmun hi chhuahsan vat ula a ṭha ang," a ti chhum hmak a. Sangtea hnenah chuan, "Ka be duh che...a fâlin," a han ti zui a.

       A awm dan chu Zorema run tâwk a lo tling kher mai, "Mikhualpa, i thu thu-a awm turin helai hmunah hian kan rawn kal lo," a lo ti ram hmak a, "Kan duh hun hunah kan chhuak ang...kan duhna hmun apîangah," a han ti zui nghat a.

       "Ṭhiana lo ngawi rawh...i ngaihtuah phâk bâkin he lai hmuna thil thleng hi a ṭha lo vang," chupa, mikhualpa aw chu a hniam hle na a, a thûk raih hian Sangtea chuan a lo hria a.

      Zorema chu a sa ta phat mai, a che phut a, chupa chu a va hnek nghal ta mai a. Chupa chu a thlu hnak a; Zorema chu a ṭhian te chuan an rawn man bet nghal vat bawk. A hnek tluk pa erawh a tho mai rih lo, muangchangin a han inbeng kang a. Zorema an dawm behna chu an lo thlah dul leh hman tawh hi a lo ni a, chutia a tho tur inbeng kang chu Zorema chuan a va chhuih leh hràm a; mahse Sangtea chuan a lo dawm leh hman hlauh mai a, chuti ni lo se chu mikhualpa bekah chuan Zorema chuan a chhuih bur ngei ang.

       "Zoremmawi duh tâwk rawh...ti tawh suh..." tih ṭhat thawm hi a awm a; Rinsangi chuan Zorema chu chiang zet hian a lo en kal mai a, "Khawngaihin duh tâwk tawh rawh u," a han ti leh a.

       Chu mikhualpa chu a nui deuh hlek a, muangchangin a rawn tho a, "Duh tâwk lo vang," a han ti nghat a; midang ho chuan mak ti deuh hian an en ṭhap a. Ani chuan Rinsangi lam a han hawi a, "Ṭhiani, i zahawm viau na a, ka la duh tâwk ve lo," a han ti leh a, a la nui deuh reng a. Zorema lam chu a han hawi ve leh a, rum àl hian a han melh a, "Nang nen hian tih fel tur kan nei...tumah lo inrawlh suh u," hnial rual loh hian a ti ta tlat a.

       Zoremmawia chu thinur avangin a meng dur khup a, a hmel chu a lang thim vek hial a ni!

       Mikhualpa chu ngawi rengin pâwnah a chhuak a, tualzawlah chuan a va ding ta a, "Rawn chhuak ve ta che ṭhiana," a han ti dam thlap a.

       Zorema chu tlawmlâkna leh thinrimnain a khat a, a hmel chu a thim mûk a. Mikhualpa hi amah aiin a hniam zawk a, a tè zawk bawk, hneh loh reng a inring lo, sawisak hrep tumin a pan phei ta a ni. A hmel hriat loh mikhualpa chu inring tak a ni, Zorema'n a pan phei lai pawh chuan a che sawn lo reng reng, ding tak leh uluk zetin Zorema mitah tak chuan a lo en a, a rawn hnaih hle lai pawh chuan a che sawn chuang lo reng reng ringawt mai a, anmahni ngun taka lo thlîrtu Sangtea chuan mak a lo ti rilru hle tawh hial a.

       Zorema chuan a sualpui tur pa chu a pan hnai zel a, a hnaih hle tawh hnu pawha a la che sawn miah lo chu mak a ti ṭan hle tawh a, a na thei ang bera kutthlâk tumin a rilru a siam a, a hma ami chu a va bawh phei ta a ni. Chu mikhualpa thung chuan Zorema chu inring em em hian a lo en reng a, amah khawih tumin a che tawh dawn nia a hriat avangin a chét dan tur nia a hriat chu a lo hisâp a; chutah a khingpui pa chuan a rawn bawh phei ta a. A sir ding lamah tlém a lo tawlh sawn zeuh a, Zorema khabe ruh kual ding lamah chuan na zet hian a taksa rihna nena ṭangkawpin a lo hnek ta nghek a, Zorema chu a tlu chíang ngang mai, a che zui tawh lo. A hnekna lai hi na lo tèa inhnek pawha lu haia tlûk awlsamna lai tak a ni a; Boxer ho pawh hian an khingpuite heti laiah hian hnekin an knock-out fo reng a ni.

       "Sangte, ka be lawk thei che ang em? In lo kal hma hian he farm-house leh a chhehvel hi ni nga vel ka lo enthla tawh a, a him vak lo tih ka hriat avangin ka lo hawihhawm lo deuh bawk a ni, mi hre thiam dawn nia," chu mikhualpa chuan a han ti ta a.

       "A ṭha alawm," Sangtea chuan a lo ti mai a.

       "Mahse a falin aw."
* * * * * * *


Bung 8 Na

       Zorema leh Sangtea an kal chhuah hnu khan phur leh hlim zetin midang ho chu tuiah an chèng hlawm a, hmeichhe ho chu an nui awr awr a, mipa awm pahnih te chuan fiamthu an thawh a, an hlim khawp mai; mahse an hlim rei hran lo.

       Chutia tui chènga hlim taka an awm lai chuan Rinsangi chu farm-house lamah a kal a, zanah khan inchung pindana lukham hnuaiah a ṭhi a dah ṭha a, chumi la tura kal chu a ni. Inhnuai lama a awm lai chuan inchungah thil tla ri rak thawm hi a han hria a. Zorema leh Sangtea tih loh chu tui an chèng vek khan a hre si a, Sangtea leh Zorema lah Sava veh turin an chhuak daih tawh a; Rinsangi chuan mak a ti deuh hlek a. Muangchangin inchung panna kailawn rahkah chu a rap ṭan a.

       "Tunge awm che u?"

       Tumahin an chhang lo!

       "Inchungah khân awm in awm ami?"

       Inchung chhuat a chuang kâi chho a; tumahin an la chhang chuang lo. Zana Lucy awm dan leh thil eng emaw hmu-a a insawi kha a han ngaihtuah chhuak a, nuam chu a ti chiah lem lo hle; mahse a han inti huaisen lui a, zan lama Zorema nena an chétna pindan kawngkhar chu a han hawng a.

       Tumah an awm lo!

       Pindan pakhat zawk chu a va en leh a; tumah an awm chuang lo. An awmna pindanah khân a han lût leh a, chhùata Astray lo tla bal chu a han hmu a, a nui sak a, a thaw huai a. Lukham hnuaia a Ṭhi chu a va la a, chhuah leh mai tumin a han inher a; mahse inchhungah chuan thawm a awm ta tlat. Hnung lam a hawi rang kher asin. Dawhkan tereuhtè pakhata thil inrem chu a rawn tla ram ram a; thli a thaw lo va, in chu a nghing reng reng lo bawk. Chutah, bur pakhat tla chu amahin a rawn káng a, Rinsangi lam pan chuan a rawn phei ta mai. A ṭe ṭhawt a, hmanhmawh pheléngin a tlân chhuak a, a hmanhmawh lûatah a tlu a, ban pakhata perek lo awm chuan a tai ta a ni. Nâ a ti lutuk chu a ṭe rawng rawng a, a ṭap vak vak a ni ber mai; hei hi a ni farm-house pakhat zawka va kal an tum laia Sangtea leh Zorema'n hmeichhe ṭe thawm an hriat kha.

       A ṭhiante an rawn tlân lût a, chumi hnu deuhah an hmelhriat ngai miah loh, tlangval pakhat a rawn lût ve hlawl a, zei leh thiam zetin Rinsangi hliam chu a rawn sawngbawl nghal mawlh mawlh mai a ni. Chutih lai tak chu Zorema leh Sangtea an rawn thlen lai tak kha a ni a; Zorema leh an hmel hriat loh pa chu an buai zui ta a nih kha.
* * * * * * *

       Farm-house chu hmeichhe hmel chhe lem lo tak, a ruka danglam ru riau hian a vil reng a, tuna chawlh hmanga mekte khawsa zia chuan a nuih a ti za ṭhin hle bawk.

       Zanlama inchung lama an khawsa lai pawh a en reng a ni. Farm-house bul maiah chuan Sunhlu kung upa tawh lam hi a ding a, a zar ṭhenkhat chu Farm-house inchung pindan hnaih deuh hian a a zar phei hlawm a. He Sunhlu kung hi a kung lawn a nawm em avang leh a zar awm dan a rem hlawm em avangin chu hmeichhia pawh chu harsa lo takin a lawn a, Farm-house chu va hnaihin, pindana mipahnih khawsa vel chu a lo thlir reng a. A duh tawk a ngah hnuah a chhuk a, ngaw lamah chuan a pil bo leh ta nghal a.

       Khawvar hnuin a va kal leh a, an che vel chu ngaw aṭang chuan a enthla reng a. Mipa pahnih Silai kengin an kal chhuak a, midang zawngin tui an cheng a, an khek râwih râwih a. Farm-house chhungah tumah an awm ta lo tih a hriat chuan a pan phei a, Sunhlu kungah chuan lawnin a chung pindana luh chu a tum ta a ni. Mahse, a luh hmain thawm a han hria a, a han ngai chang leh rih a. Chutah pindanah chuan zan lama mipa nena khawsa hmeichhia kha a rawn lut ta a.

       Sunhlu kunga hmeichhia chu a nui sak a, pin dana hmeichhe rawn lut chu fiam a chak ta tlat a. Nui var var chungin hmawlh tawite hi a phawrh a, zawitein a phun sap a, dawhkana thil inhung chu a tla ri ram ram a.

       Pindana hmeichhia chu hlauhlawp mitmeng phawk hrâ chung hian hnunglam hawiin a inher vat a; a hlauh hmel kher mai. Tukverh lam han hawi ngat sela chu...

       Sunhlu kunga hmeichhia chu a nui var var a, a lam a rawn hawi lo tih a hmuh chuan, "Wingardium Leviosa,"  a han ti sap a; chutah, pindan chhuat a, bur pakhat chu amahin a kang ta va va a.

       Pindana hmeichhiain amah bur lo kang ta va va leh, a lam pana a rawn hnai ta mai a hmuh chuan a meng phar awn awn a, a ṭe tuarh tuarh a, pindan aṭang chuan a tlan chhuak ta nghal a.

       Sunhlu kunga hmeichhia chu a chhuk a, ngaw chin thing hmunah chuan a ding a, hawi letin farm-house chu a en vang vang a, eng ṭawng emaw ni hian a phun sap sap a, a thil sawi zînga hriat thiam theih awm chhuan chu, hming pakhat, 'Muanawm' tia a lam chu a ni mai. Ngaw chhung lamah chuan a pil bo leh ta a.
* * * * * * *

       Mikhualpain Zorema a hnek tlûk zawh chuan Sangtea nena inbe lawk turin midang hlat deuh hlekah an va kal hrang ta kha ni a; darkar chanve àwm vel zet hi an inbia a.

       Midang ho chuan Zorema nikhawhre lo chu farm-house chhung lamah an lo zawn lût a, a ṭhen chuan Sangtea leh an hmel hriat loh pa inbe mék chu an thlîr leh ṭhin; an rilru-ah chuan, 'Saw pa sawn eng nge a sawi ang le?' tih ngawt a awm a ni. Rei fé hnu-ah chuan Sangtea chu a rawn lût ve ta nge nge a, mikhualpa erawh chu ngawah a pil bo zui lehnghal daih thung. Sangtea chuan chu pa thil sawi chu mak a ti em em a!

       "Eng nge a hrilh che?" Lianmawia'n nghahhlelh hmel zet hian a lo ti a.

       "A tam lutuk."

       "Min han hrilh ve hlawm la," thu tak zetin Rinsangi'n a lo ti ve leh a.

       "Kan zavaia zînga sawi chi pawh a ni vak lo, ka tel vena chungchang a ni."

       "Sangte, min hrilh ve rawh," Rinpuii'n a lo ti vat a.

       "Ka sawi thei rih lo."

       "He hmunah hian ngaih ṭhat lohna turin vawihnih thil thleng a awm tawh a; chuvangin min hrilh ve a ngai a ni Sangte," tiin Remsiama'n a lo kar ve leh a.

       Sangtea chu a han ngawi vang vang phawt a, "Kan chhungkaw thil a ni, ka sawi thei lo, ka hrilh thei lo che u," a han ti ta a. Midang ho chu an ngawi ta ṭhap a.

       "He hmun hi nuam ka ti lo," Lucy chuan a lo ti bauh a.

       "Kei pawh," tleirawl hmel ṭha tak Awmawmi chuan a lo ti ve vat a.

       "Ka thil hmuh kha...ka mit vài a ni miah lo! Sangte, khapa kha kan bula a awm dawn loh chuan haw ka duh a ni," Rinsangi chuan a lo ti ve bawk a; a hliam avang chuan a ner nâng nâng a.

       "Zorema hi han harh se kan haw dawn nia," tih pahin Sangtea chuan ṭhuthlenga mu Zorema chu a han en a. A rawn rum ṭuah ṭuah a, a rawn meng chhuak thut a, a chilthli a tla buah buah a. A meng à rûai a.

       Mikhual, an hmel hriat lohin a hnek avanga nikhawhre lova a awm a rawn harh chuan Zorema chu a awm dan a pangngai lo hle a, a meng à deuh ruai reng hian a hriat a, amah lo en rengtu a ṭhiante chu a han en kual te te a, "Khapa kha khawiah nge a awm?" a han ti nghal a.

       "A kal bo tawh."

       "Ka hmu leh dawn."

       "Rinsangi a inhliam a...Zorem, haw mai a ṭha a ni," Sangtea chuan a lo ti a.

       Lucy chuan, "Kei pawh haw vat ka duh."

       "I duh leh haw rawh," Zorema chuan a lo ti hmuk a.

       "Zo, ka mal hi a na lutuk...haw vat ka duh," Rinsangi chuan a lo ti ve vat a; midang ho pawh chuan haw an duh vek.

       "A duh chu haw ula a ni mai, khapa kha ka khawih leh hma chu ka haw dawn lo," Zorema chuan a lo ti leh hmuk a.

       Rinsangi chu nâ tiin a ṭhen chak chak a, "Zo, a ṭul lo, haw ang, kan haw a ngai a ni," a han ti leh a.

       Zorema chuan, "Nang kha lo ngawi reng rawh...kan haw dawn lo," a lo ti leh tuar a, Rinsangi a melh dan chu a rapthlâk hle a; engmah pawisak nei lo mitmeng hi chu a dangdai tak zet a ni. Chutih laia Zorema hmel leh mitmeng hmu chiang chuan chu chu an hai lo.

       Midang ho chu an ngawi ṭhap a. Sangtea chuan, "Zorem, haw chu a ṭha zawk a ni," a han ti veleh nghat a.

       Zorema chuan a lam a rawn hawi phei a, meng sen rum chungin a rawn en run run a, a awm dan chu a duh loh em avangin Sangtea chu a lo inring ve hle; mahse Zorema chu a inher vut a, pâwnah a chhuak ta daih a.

       Zorema chu a reh vang vang hnu-ah zan rei tawhah a rawn kir leh a, midang ho chu an lo meng phawk deuh hra a, ani chu a berh deuh phung a, hrui hi a la chhuak a, ngawi rengin a chhuak leh ta a.
* * * * * * *

       Muanawma phuarna hrui ka phelh hnu chuan hmanhmawh zetin ka awmna farm-house chu kan pan a.

       Muanawma chuan, "Phuarin min kal san a, hrui chiah a rawn hmu tawh dawn si a, a sa khawp ang," a han ti a, a nui sak a.

       Kan thlen chuan zawhna hlirin ka khat tawh a. "He thil hi ka han hrilh phawt ang che," Muanawma chuan a han ti ta a. "Hun rei deuh tawhah khan Khawbungah khian chhungkaw pakhat an awm a, chumite chhungkua chu he ka thil bawh zui lai kaihhnawih avanga lo tuar ve ngawttu te an ni," a han ti phawt a, a sawi zawm lehnghal a.

       "Zâmpuii te chhungkua chu an retheiin an harsa ve hle țhin, amah hi unau rual tak zinga milai chhang chiah niin zirna lam leh kut themthiam lamah a tui hle a, nulât a hre harin Class-X a zir lai pawhin a la naupangchhia hle.

       "Rethei ta na na chu lehkha thiam thei viau mah se a zir kum tin thei lo a, a chawlh leh a kal hi a inchhâwk reng mai. A rawn tleirawl chhuak a, ama tâwkah a vul chhoh vanglai a hmang dawn ṭan a; chutih lai chuan khualkhua ațanga rawn kal, Pro. Pastor tlangval pakhat hi an khuaah chuan a rawn awm ve a. Zâmpuii hi hmel ṭha vantlâng tâwk tak a ni. Chu tlangval chu an khua leh an Pastor Biala nula hoin an beisei hlawm hle laiin tlangvala erawh chuan Zâmpuii chu a beisei ve tlat thung.

       "Tlangval chu Zâmpuii'n hnialin han hnar viau mah se la, zak miah lova a nu leh pa bul lama a ṭuan tâk zel avangin duh chin a lo nei ve ta nge nge a; chu tlangval chu rei lo tèa Pastor ni mai tur a ni nghe nghe. Chutia an han inzui tâkah chuan an chhungte lamin tih dàn tur an sawiho ta a. Zâmpuii chuan lehkha zir zawm leha Matric zir chhuah ve ngei a duh ta tlat a; achhan chu, ram danga awm thei dinhmuna ding a nih vangin a pasal tâna zahpuiawm lutuk bîk lova awm a duh a ni. A ngaihzawng pa erawh chuan inneih a duh deuh tut tut mai thung. Zâmpuii'n Pastor nupui, 'Under Matric' nih țha a ti lo va, a pasal a thlâwp zawh loh lutuk a hlau a ni.

       "Hetih lai hian Zâmpuii chuan kum 18-na a hmang mêk a; tichuan, mipa lamin palai tirin December, Matric exam zawha innei turin thu an dah ta a, Zâmpuii erawh chu Aizawlah March thlaah chhukin lehkha a zir zawm leh ta a ni.

       "Hun a kal a, a hlimin nuam a ti hle a, țhahnem a ngâiin a zirlaiah pawh a ti țha thei hle mai, a hma hunin a nawrna nen, a ngaihzawng neih chuan a ti chhe lo va, a țantir hle zâwk a, a lût tlai ber kha a ti țha pawlah a țang ta ziah bawk. A nungchang pawh a zawi raih a, kawng engkimah a fimkhur ve thei hle ṭhin. Amah chhangtu a û chiah hi lehkhazir lai tho a ni bawk a, țhahnem an ngai dun thei hle.

       "Pro Pastor-a ve thung kha chuan, "Min ngai lo e mai," tiin thla khatah vawikhat tal Zâmpuii chu a tlawh ziah a, an Sikulah te a tlawh țhin. Zâmpuii te Headmaster chu Kohhran Upa a ni a, a kâwm nêl thiamin an inngaina hle a, Zâmpuii nena an chanchin pawh a lo hrilh vek mai lehnghal a. Headmaster chuan, "Chuvang chu a ni ang, Zâmpuii hi a kum phu loin a puitling a, harh rûal lek si a nungchang hi a cool raih țhin," a ti ve bawk. A changin an Headmaster hnenah chawhnu chawlh a lo dil sak a, Uniform ha chungin Synod Office pawh an kal zeuh zeuh țhin. Zâmpuii chu a zak thei hle a, a bialpa lah, zah chu khawi lamah, an thlen chin apîangah an inkar thu chu mite leh a chhûngte zawng zawng a hrilh bawrh bawrh mai zel a, a zahpui ngai lo.

       "Hlim takin hun an hmang a, a chhûngte a tlawh kualpui a, chu Pro Pastor chu a Pain a rawn chah a, ani chuan Zâmpuii sikul kal hlanin a û te hnenah hruai a lo dil diam a, a dil diam tawh tih hre lovin Zâmpuii'n a hnial a, 'Ka û ten an phal dawn lo, ka rawn kal ve lo mai ang,' a han tih chuan, Pro Pastor-a chu a nui mai a.

       "August thla tâwpah Zâmpuii te sikulah a tlawh leh a, hlim takin an inkâwm a, a haw chho leh ta a ni. Zâmpuii'n selection exam ngawrh takin a bei bawk a, a ti țha ve thawkhat pawhin a inhria.

       "September ni 5 a lo thleng ta; Zâmpuii chu a tûk maia exam zo tur a ni tawh a, subject pakhat chiah a awm tawh a. An exam tur chu a huphurh bîk lo hle a, an haw dâwnah an Sir Siama'n a ko a, a hmuh țhan tak lehkha chu an section mi 60 chuang hmaah fiam chungin a pe a, chhiar nghal lovin Lower Khatla-a an in a thlenpui a, a Necktie chiah dahin lehkhathawn chu a han hawng ta nghal a.

       "A tawrh atân chuan a na khawp ang; chu lehkhaah chuan Pro Pastor-a chuan nupui a rûk thu leh, hmeichhia chu a rai thu te, Zâmpuii chiah neih a tum tho thu leh hmeichhe nuin a nawr nasat si thu te, amah tlawha an Sikula a kal khân a hrilh ngam loh chhan chu a exam theih loh a hlauh vang a nih thu te, a nupui rûk chu a nei phawt ang a, a țhen leh ang a, amah nena inneih a duh zâwk thu te leh thil dang a rawn sawi ṭeuh a.

       "Zâmpuii chu lehkhathawn chhiar zo lovin a lo tlu ta a ni awm e. A bek vei lam tauhin a beng a tauh chilh a, engmah hre lovin a awm ta a ni. A û ten an rawn hmuh chuan khawsik namenlova sâng neiin, a mit tui hruk sen rual loh tla chungin chhùatah an rawn hmu a! Zâmpuii hian a chhungte hriatpui lohin ngaihzawng a nei ngai lo; lehkha a lo hûm chu a û te chuan chhiarin thil awmzia an hre ve ta nghal mai a, an thin pawh a ur ngang mai.

       "Harh chiang thei lovin chawlhkar tam a awm a, an biak reng rengin eng pawh kha, "Aih...aih...aih..." tih chauhin a chhâng ṭhin! Damdawiina hruai an tum pawhin, "Aih," tiin a ṭang tlat a, an hruai ta lo a ni; mahse chu'ng thil thleng zawng zawng chu pakhatmah a hre lo! Thlakhat hnu velah chuan țawng ri thei lo, ri hre thei chang chang chauhin a rawn harh ve ta a, an inentir hnu-ah damdawi ei chungin zawi zawiin a aw leh beng pawh a inhawng ve hret hret a; mahse, a hnu thlengin a pangngai thlap thei ta lo a, a tlûk khân a aw bâwm leh ri hriatna nerve a lo sawh chhia a ni!

       "An selection test result chu a rawn chhuak ta a, tling lo saa inngâiin a en ngam lo va; mahse mak tak maiin a ti țha ber pâwl a ni ta hlauh a. Tichuan, damlo ni chungin Matric exam turin a theih ang angin a inbuatsaih ve ta tho a, lehkhazir erawh a tân a harsa tawh takzet. A hrisel ṭha ta lo leh, an Sir te thu sawi a hre ṭha thei ta lo chu a tân buaina a tling phâk ta tlat mai a ni.

       "Han kîr leh lawk ila; khatia lehkha a zir țhat leh hma khan Kohhran leh YMA lamah a inhmang hman fê a, an Bial mai ni lovin, Tuipuiral huapah pawh mite hriat a hlawh ve phian hman a ni. Khati ang boruakin a han dêng ta si kha, 'Mualphona hi a va han zauin a lo va nasa thei ngai em!' tia inngaihtuahtirtu a ni ta fo mai. Miten lo hre lar lo tawpin tuma hriat hlawh loh kha lo ni ta zâwk se a inti hnuhnawh hial ṭhin a ni.

       "Mahni tâwka lar leh, a mawi chhoh vanglai, a taksa leh a hmêl pawh a vul chhoh vanglai takin a nun chu ngaiawh leh tawh ngai lo tura tih chhiatin a awm ta a ni. A hnu thlakhat lek ațangin a nun ti chhetu tlangvala lah chu Aizawlah a rawn chhuk a, rem leh rem lo pawh sawi lovin Zâmpuii chu hmuh a tum ṭhin; amah Zâmpuii lahin ten tak tèin a lo ten tawh si. A hmaa amah rawn rîm ṭhintu, a phu loh Officer, he tlangval avanga a hnar tâk zawng zawng te a ngaihtuah lêt phéi chuan a thinrim ṭun ṭhin. Zâmpuii rîmtu pakhat phei chu tun hnu-ah Minister a ni chho ta hial nghe nghe asin, a hming chu ka hrilh lo zawk mai ang che. Chumi nen chuan kum 30 dâwnin an inthlau a; mahse Zâmpuii chu a âtchilh ve tlat a ni awm e.

      "Mahni nun ti chhetu na na na chu, a hmu duh thlâwt lo leh a ten em em mai chu buaithlâk hi a ti thei hle zâwk a, tlangvala lah chuan amah chu a ngai ve hlein a la ring ve ta dah a; mihring rilru hi a inhmu lo thei teh e. A nun a tih chhiat sak hmeichhia chu vawi sawm vel zet thlem pah ni siin a la vau ngam cheu a, engmah a sâwt thei tawh si lo. Zâmpuii chu a țap tawh lo a, ṭap leh chuang tur pawh a awm lo, a ngawng zo vek tawh zâwk a, thlathum chhûng vel chu khawlâiah a chhûak lo a ni.

       "Matric chu harsa takin leh dam lo nasa tak chungin St. Paul-ah hian a exam ta tho a; mahse a hlawhchham lêt der a ni! A nun tih chhiat saktupa tlangval han phakar zia leh suahsual zia lah chu, midang bulah, 'A beng leh aw țha lo vang hian ka îai a, ka nei leh duh lo a ni," te a lo la ti ngam zawrh zawrh cheu a. A hma, kha chenah, an Pastor Bial leh Tuipuiral huamchhungah, Kohhran leh khawtlângah Zâmpuii tel lova thil tih kha a vang ve țhin hle a, chupa ṭawng dan chu a tân chuan thangtlâwmthlâk tak a ni ang.

       "Zâmpuii Aizawla a chhuk leh tirhin lehkha sei tâwk tak, type-writer-a type-in a rawn thawn a, "Nang ka tawn hma che hian hmeichhe tam tak ka lo ti chhe tawh a, pawi tih leh inchhirna ka nei ngai lo, anmahni duhthu a ni a; mahse nang ka tawng che a, i rilru thianghlimna leh nula thianghlim zia dik tak mai, nungchang leh hmel țhat kawnga ka duhthusam, sawiselna tur reng reng ka hriat loh i nih avang hian i hnena inpuang lo thei lovin min nawr tlat a. Kha'ng ka thil tih tawh te khàn hlîng zum takin min chhun ang mai hian min ti na ngawt ngawt a, i mi hmangaihna leh ngaihdamna vang chauhin ka dam leh thei ang. Mi tenawm ka ni a, min ngaidamin min la pawm thei ang em?' tiin ngaihdam a la rawn dil nghe nghe a.

       "Amah kha Pastor ni mai tur a ni a; mahse khatia Zâmpuii a awm tâk leh, a hnena nasa taka ngaihdam a dil a, Zâmpuii'n a bîak duh tâk si loah chuan a chhuanchhe zawngin thil a sawi leh ta hlauh a, a inpuanna leh ngaihdam dilna a thawn kha Zâmpuii'n Synod Hotute a pêk ngei a ring a ni ang chu, Zâmpuii thawn anga lehkha ziakin, 'A hmaa ka lehkha pêk che u, ani inpuanna ka sawina lehkha kha lâk lêta hê'ng thil thleng hi theihnghilh ka duh a ni,' tiin Synod Hotute chu lehkha a thawn ta ngawt mai a. Synod Hotute lah chuan a hmain Zampuii lehkha pakhatmah an la dawng si lo va, an mak ti chuan Zâmpuii chu an zawh chian phah ta hlauh a, amah leh amah a inhêk thla a ni ta ngawt mai si, Pastor chu a ni zui thei ta lo a ni.

       "Hetih lai hian Synod Moderator chu..." Muanawma chuan a han ti zet a, "Ngawi teh, ani hming hi chu sawi loh a ṭha zawkin ka hria," a ti ta tlat a, a rûk tak chuan ka hre châk hle a; mahse ka zawt zui duh ta bik lo.

       "Synod Hotute chuan a inpuanna lehkha a thawn kha Zâmpuii hnenah an dìl tâk miau avangin ani chuan a pe ta a ni. He tlangval awmna khua hi Reiek chhehvela khaw pakhat saw a ni. Synod lam chuan a chanchin an han chhûiin an han hre chiang a, a rawngbawlna zawng zawng an chawlh tir ta vek bawk. A thil tihah a inchhir hle a, khaw pakhatah eng hna emaw ni a thawk a, tunah hian engtin nge a awm tih erawh hriat a ni lo.

       "Zâmpuii erawh a nun rahbi tleu tawh mah se ngaihtuahawm a ni tawh lo va, a nu leh pa an thi tawh a, pasal a nei a; mahse naupangtèin a hmeithai leh a ni. Laizâwn pathum leh nuța pali a nei a, mifel tak vek an ni. Amah Zâmpuii chawmtu nih an duh ṭheuh a, an ngaihtuah hlawm khawp mai. A u fa, a pawm tlei sak, hna zahawm tak thawk tawh pawh a awm; a ngaihtuahawm vak lo. Hmeichhe lung lian tak a ni a, a unaute a tinui nasa thei hle, a û chiah hi tunah Sawrkar Department pakhatah Officer-in a awm mêk bawk.

       "Zâmpuii nun ti chhetu Pro Pastor-a pû hi he ka thil chhui laiah hian telna a lo nei a, an chhungkaw chanchin hi ka chhui ka chhui a, Zâmpui chanchin lungchhiatthlâk tak hi ka hriat ve phah a, ka han hrilh ve mai mai che a nih chu....mu tawh teh ang, ka chau...naktukah tih tur ka nei lehnghal," a han tih zawm zat a.

       Hepa hi sawi tur khék a chîng a, ka run ṭhin takzet a ni.


Bung 9 Na

       Kei chu thil awmzia ni thei ni-a ka rin suangtuahin ka muhil thei lawk lo va, zîng lam khawvar dawnah ka muhil ve ta chauh a; Muanawma erawh a muhil hma hle thung.

       Zinga ka han harh chuan Muanawma chu a lo awm tawh lo va, khawiah emaw a chhuak bo a nih ka ring; kan piah farm-house lamah a ni bawk ang, ka ring. Chaw ka lo ei san a, a rawn lét hun chu ka lo nghak ta ngawt mai a, mut ka kham loh avangin ka mut a chhuak hle a, ṭhuthlenga ṭhu chungin ka lo muhil a. Eng thawm emaw hi chiang lo riai hian ka han hria a, ka han men chuan ka bulah Muanawma chu a lo ṭhu ve reng tawh a, "Eng nge chanchin?" tiin ka lo zawt nghal chawt a.

       "Kan khaw lamah lo zin ve zawk ta che, ka lo mikhual leh che ang a, tunlai chu keimah chauha awm hi khawharthlak ka ti ve riau."

       "E...e...e...eng a? Helai thil thleng chu i ching fel tawh mi?" haw tum anga a lan avangin mak ka ti hle a.

       "Fel lo; chuti maia tih fel theih a ni lo, helai hmun ni loah hian thil hriat tur ka la ngah mai. Zorema kha na deuh takin a inhliam a, thih chu a thi lo vang," tiin Muanawma chuan min lo chhang mai a.

       "Engvanga inhliam nge? A che sual tihna em ni?" tiin ka han zawt a. Muanawma chu a nui sak duh chauh a. "Haw chu i tum tak tak a ni maw?" ka han ti leh a.

       "Tum mai e, saw farm-house saw a hrâng deuh roh lehnghal a, ka awm peih tawh rih lo...min rawn zui ve mai teh," tiin thu tak zet hian min han sawm nawn leh a.

       "A ṭha alawm; mahse saw ta farm-house ami te kha engtin nge an awm dawn a?" tiin ka han zawt leh a.

       "An haw dawn a nih hmel. An tân sawn haw a ṭha zawk a ni. Hmeichhia kha hmanni-ah a inhliam tawh a, Zorema pawh a che thei lawk rih lo vang. Haw mai turin ka hrilh tawh a, ka sawi anga an awm vat loh chuan an chungah thil ṭha lo a thleng zel tak tak ang," tiin a han ngawi deuh vang vang a. "Kan Dawithiamnu teh hrep pawh hi a, a tum hi a ṭhelh chiang nasa dawn si a, ani pawh hi lo inthiarfihlim zawk se a ṭha ang," a han ti leh hmak a, min bia pawh hi a ang lo.

       "Dawithiamnu a!?" ka lo ti chiam a.

       "In siam ve vat teh, i haw vat teh ang," ka zawhna pawh chhang lem lo chuan a han ti leh a; ka thinlungah chuan a chhanna ka hriat châk zawhna chu a pung tam ta telh telh mai si.

       Ka han insiam zawh chuan Muanawma te khaw lam pan chuan kan haw ta a ni. Muanawma hi, 'The Lone Investigator' tiin ka vuah fiam ve ngawt mai a, amah phei hi chuan Detective anga inchhal a duh ngai lo. A in kan thlen hnu chuan ka awmna farm-house piaha thil thleng, ka la hriat ve loh awma ka rin tlat avangin ka zawt ka zawt ta mai a; mahse engmah a sawi chiang duh lo. "A hunah kan pahnihin kan la kal leh zawk dawn nia," a ti tlat zel. An khuaa kan thlen hnu ni hnihnaah chuan inléng a nei nghal a.

       Chumi tûk, zîngkarah chuan tu emaw hi a 'call' tlut tlut a, a Phone call chu an lâksak duh si lo va; Muanawma chu a rum nghat a, a lungawi lo hle a ni. Ṭhut khawmna pindana a ṭhu chu a tho a, tukverh, nizung lo luh iarhna lam chu a pan a, kut hnung suih meuhin a in bul huana Phengphehlep Pangpâr zû dawt lai chu a thlir a. A in chu mahni chauha khawsak nan chuan a lian a ti mah mah mai; chu thu chu amah pawhin a sawi fo a.

       Zinglam dar 7:30 a ni a, parawl ho tih dan dungthulin zan lama kan chaw ei bang kha rin a rawt a, chaw ṭhing kan bar ang a, chawhmehah artui pumhnih vel a kang leh mai dawn a ni. A vawi sarih nan a ngai bawk chu a han call leh a, a la 'ring kuit' ṭhak fo a.

       "Tu nge biak i tum a?"

       "Ramnghahi," tih chauh hian min chhang a; chu chu a biak ve ṭhin deuh a ni awm e.

       Hetih lai hian a damsam vak lo va, farm-house bul ramhnuaia a tal nasat vang pawh a ni mai thei. Ramnghahi chuan  a call a la miah lo va, a 'sms' a chhâng hek lo. Khawhar leh damsam loh avanga a mamawh lai taka, biak theiha a awm lo chu a hre thiam lo ve lek lek a; a hun kal taa a thil tawnte kha ka lo ngaihtuah lêt ve a...hautak ve tâwk tak chu a nih kha.

       Chutih lai chuan kawngka an rawn kik a. "Lo lût rawh," tih paha muangchanga inherin kawngka lam chu a han hawi a. Pu Rokhûma a lo ni a, a hnungah chuan nu te reuhte, sam mam than mai, mit meng bial kal leh a nu têt aia hmaifang fuh fêt mai hian a rawn zui ve nghal a.

       Muanawma chuan, "Lo leng rawh u....ka Pa Khûm eng'e ni ta a?" a han ti a.

       "Muana, i ṭanpuina dil duh kan awm a nih hmel; hei, kan ṭhiannu hi Ruatsangi a nia..."

       "Eng kawngah nge ni ta!?"

       Pu Rokhûma ṭawng hmain, Ruatsangi a tih chuan, "Ka fapa a bo a ni!" a lo ti vat a. A mit meng a val kalh a, tun hnaiah a mu ṭha lo hle a ni ang tih a rin theih.

       Muanawma chu, "Tikhan lo ṭhu lawk teh u..." tih pahin a tho a, choka lam a pan a, rei lo tê hnû-ah a lo let leh vat a, ṭhut hmun a rem fel hnu chuan, chu nu lam pawh melh chhin eih lo chuan Pu Rokhûma chu a han en ta daih a, "Ka Pa Khûm, eng'e thil awmzia hi?"a han ti a.

       "Eng i tihna nge Muana?"

       "Hei, ka pi hi, a fapa a bo a, chu a fapa bo thu min hrilh tur ngawt chuan em ni i rawn hruai?"

       Pu Rokhûma chu a han ngawi vang vang phawt a, "Aw ni e. Chumi thu hrilh tur che chuan a ni ka rawn hruai," a han ti ta a.

       "Chu chu ka tan eng'e a ṭangkaina?" tiin Muanawma chuan a han zawt ta khauh a.

      "I tan chuan a ṭangkai lo tawp ang Muana."

      N"Chuti si...eng'e...?"

       Muanawma'n a sawi zawh hma chuan Pu Rokhûma chuan a lo pawt chat a, "Muana, min lo ngaithla teh. I tan a ṭangkai kher lo vang; mahse ani tan hian a ṭangkai hle thung dawn a ni," a lo ti a.

       "Ka hre thiam e; mahse Detective ka ni lo, ka Pa Khum," Muanawma chuan a lo ti bul hmak a.

       "Mami thihna i buaipui dan kha Ruati hian a lo hre ve a..."

       Pu Rokhûma'n a sawi lai chuan Ruatsangi chu a lo inrawlh ve a. Amah hi kum 30 bawr vel a niawm e. A hmel chhe lo hle a, a incheina mawlmang zet chu a felfai riau thung. "Ka fapa bo min zawn sak la ka duh a ni," tiin Muanawma mitah a en kal a. 'Aw i tih hma chu' tih melh hian a han melh ngal mai a. A pumrua en ang aiin a luhlul ngat ang.

       Muanawm chu ngawi rengin a tho a, chokaah a lut a, eng emaw chen a va awm vang vang a. Chutih lai chuan Ruatsangi chuan, 'Engtia tih chi nge?' ti niawm tak hian Pu Rokhûma lam chu a han hawi a, a mit mengin a râwn a. Pu Rokhûma lah chu a lo nui suk duh chauh mai si a.

       Muanawma che tla chu ngun deuh hian ka lo en a. Ani chuan Tray-a thingpui no thum chawiin leh, chhang hmeh tur keng ṭu ṭu chungin an lam chu a rawn pan leh a. Ruatsangi chu melhin, a bula dawhkan chu hung rem turin a han ti a. Ka in tur min thlit kep ve lo chu chhuahchhalh ka châk deuh viau na a, kan inléng te an thu tak deuh avangin ka ti ta lo.

       "Ka pi, engtik kumah nge in inṭhen?" Muanawma chuan a han ti nghal ngawt a.

      NKan Pii chuan, "Kum 2013-ah..." a han ti ṭha ve mai a; chutah, hre chhuak thut niawm tak hian, "Engtin nge pasal ṭhen tawh ka ni tih i hriat a!?" a han ti ta hâ a.

       Muanawma chuan, "Ka hre hleinem," a lo ti leh si a.

       Pu Rokhûma chu a lo kiai leh suk a.

       "I fapa chu kum engzat nge?" Muanawma chuan a han ti leh a.

       "Kum ruk a ni."

       "A beng a parhin a mit meng a fiah em?"

       Ruatsangi chuan Muanawma zawhna chu mak a ti hle a ni tih a hriat. Chhan ngaihna hre lovin a hawi â hau mai a. Pu Rokhûma pawhin mak a lo ti ve deuh tih, a awm danah a lang.

       "A lu a mumin, a chal a arh em? A chalsam ṭona a chhak em?" tiin Muanawma chuan a la zawt ta deuh deuh a. A nui der si lo.

       Pu Rokhûma chuan, "Khai à...Muana...!?" a han ti ta ngawt a.

       Chutah, Ruatsangi chu a meng tal ta tap a, a hmel a dik lo nghal bawk. Chu chu Muanawma chuan a lo man thiam thuai a, Ruatsangi a ṭawng chhuah hma chuan a ṭawng ta vat a, "Ka Pi, pawimawh ti lo ila ka zawt lo vang che. Ṭha takin min chhang mai la ka duh a ni. I fapa bo hi ka zawng dawn a nih chuan..." a han ti leh a, a ngawih deuh hnu-ah, "A beng a parh em?" tiin a han zawt nawn leh nghal zat bawk a.

       Ruatsangi chu a hmel a han buai deuh a; chutah, "Aw, parh e. A lu a mum a, a chal fai pawh a thui ve khawp mai," tiin a han chhang ṭha ta a.

       "Naupang fing tak a ni..." tiin Muanawma chu a han phun sap a.

       "A Pa nge a ngainat Nangmah?" tiin a han zawt zui leh a.

       "A pa a nih ka ring; mahse zu in mi a ni..."

       Muanawma chu a han ṭhu ṭha a, thingpui chu a lem ri khalh a, chhang chu a tep chap chap a, "A nih leh, i fapa bo dan chu min han hrilh teh. Kim takin ka hre duh dawn a nia aw Ka pi," a han ti leh a.

       "Inrinni zan a ni a. Zanriah chaw ei kham hlimin Bawiha chu dawra kuhva lei turin a pu-in a tir a; chumia a kal chu a rawn haw ta lo a ni," tiin Ruatsangi chu a ngawi zui ta daih a.

       Rei fê hnû chuan, "A va tawi leh si ve!" Muanawma chuan a han ti boh a. "Engtik kumah nge pasal i neih?" tiin a han zawt zui leh a.

       "Kum 2012..."

       "In pûk lâwk em ni!?"

       "Aih, pûk lâwk lo," tiin Ruatsangi chuan a lo chhang vat a.

       Muanawma chuan a mitah chiang zetin a han en a. Ruatsangi mit meng chu a khup lap a. "Ka pi, heti ang thilah chuan dawt sawi zeuh hian kalna tur kawng dik ata kawng dik lo ah min hruai thei ngei ang..." Muanawma chuan a han ti leh nghat a.

       "Dawt ka sawi lo. U Rinsanga nen hian kan pûk lâwk lo tak tak..."

       A han ngawih vang vang hnû-ah Muanawma chuan, "Ka Pa Khûm, Hriangtlângah ka zin lawk dawn a, in hi min lo thlithlai ta che aw; mahse hei, Chhantea hi a lo awm leh si mai a niang chu," tiin Pu Rokhúma lam chu a hawi ta daih a.

       Ngawt ngawt a, in ka nghak duh bîk vak lo asin le.

       "Ihhh...eng lo...Hriangtlângah chuan..." tiin kan inlengnu chu a lo ṭawng ve leh a.

       Muanawma chuan, "Eng'e ka pi?" a lo ti vat a.

       "Aizawla kan awm hma hian kan awm thin â..."

       Muanawma hmel leh mitmeng chu phur avangin a a nung ta sarh a, "A nih tak chu. I fapa chu ka zin haw hunah kan hmu ang. Ni hnih bak ka thang lo vang," tiin a tho a, thingpui no chu a han seng fel a.

       Muanawma choka aṭanga a rawn lêt leh hnu chuan Ruatsangi chuan, "Engtin nge hma i lak dawn min hrilh thei em?" a lo ti a

       "Ka ngaih dan a dik leh dik loh hre turin ka chhuak lawk ang," tiin Muanawma chuan a lo chhang liam puat a. Pu Rokhûma lam chu hawiin, "Ka pa Khûm, biak lawk duhna che ka nei," a han ti leh a.

       Pu Rokhûma chuan, "Aw le...Ruati, min lo va haw san mai ta che..." a ti a, Ruatsangi chu a haw ta a. "Muana, Hriangtlangah chuan eng'e tih i tum?" tiin a han zawt nghal a.

       "Ka pa lehkha hnuhnunga a sawi chungchangah khan thil hriat chian duh ka la nei a; chumi hre chiang tur chuan kal ka ngai a ni."

       "A ni tak e...tun hma-a i pute khua maw ni kha?"

       "Aw ni e...Pi Ruatsangi chanchin kha zawh belh che ka duh deuh a..."

       Pu Rokhûma chuan a chhuah hmain pawisa tam tham tak hi Muanawma kutah hmeh bel a han tum a. A fanu, Zorinsangi thih dan a chhui chhuah lawmman hi pék a tum fo tawh a ni; mahse Muanawma chuan a la duh ngai lo. (Zorinsangi tualthih thu leh a nghawng zel chu, 'PARADISE LODGE' lamah a kimin a awm ang. A bialnu thihna kha heti lam, hnu chhuina lama Muanawma kaltirtu ber a ni ta a ni.)

       Muanawma chu, "Rintei kha ka hmangaih a, amah thattu zawn chhuah kha ka mawhphurhna a ni," tiin a ṭang tlat a, pawisa chu nidang ang bawkin a la duh ta tlat lo va.

       Nilênga a lêng chhuak a rawn haw meuh chuan khua a thim chhawlh tawh a; tui vâwt ver vawrin a inbual a, a harh hawk a ni ang, a zangkhai vah a. Muangchangin chaw a ei a, a tuka a zinna tura thil ṭulte a buaipui zawhah, ṭhut khawmna pindan ṭhuthlengah tluzalin a chhing ta riai riai a. A tûkah chuan kei min hnutchhiahin a zin ta a ni.
* * * * * * *

       Hriangtlâng aṭanga Muanawma a rawn haw leh hnu chuan, mipa naupang fel tawh tak, beng parh, hmaifang fel tak, hmel ṭha reuh tak, mitmeng fiah fê mai hi, pa pakhat nen a rawn hawpui a; chu pa chu chu naupang pa chu a ni. An pafa chuan Muanawma inah an rawn innghat nghal a, an thlen tuk zanah chuan naupang pa leh a fapa chu inchungah an inchhaih nui ar ar a. Chutih lai chuan Muanawma chuan ṭhut khawmna pindanah, ngunthluk zetin, 'The Good, The Bad, The Ugly!' tih lehkhabu, Cowboy chanchin chu a chhiar a. Hollywood lamah pawh Movie-a an siam, Cowboy Movie changtu lar tak, Clint Eastwood-a channa kha a ni nghe nghe.

       Dar 7:00pm chiah a ni a. Kawngka chu an rawn kik ta karh karh a. Muanawma chuan a va hawng a, Pu Rokhûma leh Ruatsangi an rawn inzui lut a. Ṭhut khawmna pindan lamah an ṭhu a, Ruatsangi chu a rawn ṭawng chhuak hmasa ber a. "Muana, ka fapa chinchang chu ka hre châk tawh takzet a ni," a han ti a.

       "Ka pi, hmanhmawh lutuk mah ta che, ka sawi dawn alawm; chumi hmain zawhna tlem azawng zawh che ka duh ang, ṭha taka min chhang turin ka beisei nghal bawk che a ni..." tiin Muanawma chu thingpui lum turin choka lam a han pan leh rih a. A lo let leh hnu chuan, a ṭhu fel chauh tihin, "Ka pi, i fapa bo ta hi, i pasal ṭhen tâk nena in fa a ni lo ti raw?"

       Ruatsangi chu a ngawi reng a.

       Muanawma bawk chuan, "I pasal ṭhen tâk nena in inneih hma khan midang, tu emaw nen fa in nei ti raw?"

       Ruatsangi chu a la ṭawng chuang lo. A meng tak ran a, thinrim leh lungawi lo hmel erawh a pu lo.

       "I chanchin leh i fapa chanchin kha ka hriatah i sawi tlem hle a; mahse, i chanchin hi hriain ka inhria," Muanawma chuan a han ti leh a.

       "Eng ka chanchin nge hriaa i inhriat a, ka rawn panna chhan che chu ka chanchin chhûi tur ni lovin, ka fapa bo min zawn hmuh sak turin a ni; chu chu i thei lo a nih chuan ka kal ang'e," tiin Ruatsangi chu a tho ta phat mai a.

       Pu Rokhûma chuan, "Ruati, ni rih lo ve...Muana hian thil eng emaw hre lo se, heta kal turin min koh ka ring lo," a lo ti ta vat a.

       Muanawma chu a han ngawi vang vang a, "Ka pi, i fapa chu tunah i hmu ang," a han ti bung nghat a. "U Thansang, in rawn chhuk lawk hman em...in pafa khan..." tiin inchung ami te chu a han au zui a.

       Chumite pafa rawn chhuk a hmuh chuan Ruatsangi chu a sen ṭawn ṭawn a, a fapa chuan a rawn pan nghal vat bawk a. Chu naupang chuan a nu chu a pawm cheng cheng a, a ngai ve viau tawh a ni ngei ang; chutih lai chuan, Muanawma mikhual ni ta Thansanga chuan Ruatsangi chu a lo en reng thung a. Ruatsangi hmai sen chu a la reh lo hle a, thinrim mit meng erawh a pu zui ta miah lo thung.

       Muanawma hi a tih loh chinah chuan mi frank tak a ni, a chang phei chuan a frank mah mah fo! Pu Rokhûma pawh chuan, a rûka boruak a zangkhai vak lo chu a hre thiam nghal mai a, "Eng'e thil awmzia Muana?" tiin Muanawma hriat tawk tur chauh ni maia zawi hian a han ṭawng a.

       Muanawma chuan, "Pi Ruatsangi hian a hre duh lo vang; chuvangin tun tut tutah chuan ka sawi rih lo mai ang'e," a lo ti a.

       Ruatsangi chuan Muanawma chu a han melh zawk a, engmah phei chu a sawi tawh lo.

       "Thingpui i in ho ang u aw?" tiin Muanawma chuan Choka lam pan mai a han tum a; mahse Ruatsangi chu a lo ṭawng vat a, "Kan in tawh lo mai ang'e Muana...ka lawm e..." tiin pha aw dai hian lawmthu a sawi a.

       "In thu thu le," Muanawma chuan a lo ti mai a.

       "Bawiha, i haw tawh ang le," tiin Ruatsangi chuan naupang chu a han pawm kang a. Naupang chuan Thansanga lam chu a melh zak zak a, Thansanga chuan a remti tih lan nan, chu naupang chu a han nuih a. Pu Rokhuma leh Ruatsangite nufa chu an chhuak ta a ni.

       Muanawma chuan, "U Thansang thingpui ka'n lum ang'a, in pahin Chhantea te nen hian kan titi ho dawn nia," a han ti a.

       "Aw le. Bawiha chuan a ngai ve viau a nih dawn kha."

       "A nu a ni tlat alawm. A vannei e, amah hringtunu ngei ngaihtuahtu a la nei tal a,"

       "Ni e tiraw?" Thansanga chu Muanawma hre thiam takin a ngawi ta vang vang a.

       "Kei chu min hringtunu enkawl sei len ka ni hlei nem," Muanawma chuan a han ti leh a.

       Muanawma thu sawi pawh chu chhang lem chuang lovin, "A la hmel ṭha hle mai, hman ang tho kha a la ni," Thansanga chuan a lo ti ta daih a.

       Muanawma chu a nui sak a, "U Thansang, hmangaihna mit mengin i en tlat a ni. Nu hmel ṭha tak chu a ni a, a pianphung avang khan hmeichhe lang nalh rei chi a ni ve reng reng bawk ang," a lo ti vei duah a.

       "Ni e; mahse..." tiin Thansanga chuan a han chhang a, sawi zawm lem lovin a tawp leh daih a.

       Muanawma chuan, "Ho mai mai, U Thansang ani i hmangaihna thinlung mu hnu kaih thawh leh ka duh rih lo...kha thingpui hi in mai mai teh..." a lo tih sak hmiah a. "Kei pawh, tun ni li chhung chu tuma'n min be lo va, tuma'n ka biak an chhang hek lo...ka lung a leng ve tho; chuvangin lungleng ve ve kan inchhem alh tawn chuan mipa puitling ve ve si kan lak tlak loh lutuk palh ang, thên kual mai mai teh ang," a han ti zui a, a nui suk a.

       9:00pm a ni a.

       Thingpui in pahin kan titi a, kan titi tui ṭan viau a, kan nui ho hak hak reng a; chutah kawngka kik thawm kan han hria. Muanawma chuan a va hawng a. Kan hmuh phak chiah loah chuan tu emaw, hmeichhia nen hian an inbia a.

       "E heee...!"

       "Eng'e?"

       "Eng lem ni lo ve. I lo va lêng tlai ve?"

       "Nia, tlai tâwka lên i phal lo em ni?"

       "Phal loh pawh a awm lo...lo lut la..."

       Inchhunga an han lut chu Muanawma chuan ṭhut khawmna pindanah a rawn luhpui nghal a. Kei leh Thansanga hnenah a inleng chu min han inhmel hriat tir a. "U Thansang, Chhante, hei hi Ramnghahi...ani hi U Thansanga, thian hlui, thar leh ta...ani hi Chhantea," tiin Muanawma chu a nui var var a.

       A rin loh taka Muanawma'n mikhual min lo neih avang chuan Ramnghahi zak chu a kimki deuh a, rei vak lo chu kan ṭhu ngawi ran hlawm a. Muanawma hian mi tu emaw chhuahchhalh chak deuh a nei tih a lang reng mai.

       Thansanga chu a tho nulh a, "Muana ka mu dawn, ka mut a chhuak," a han ti a, ti lui tih hriat zet hian a ham bui bui a.

"Ka pindanah khan han mu rawh."

       "Aih. He lai ṭhut khawmna sira mikhual pindanah hian ka mu duh zawk."

       "A ngai lo, helaiah chuan mu lo vang, ka pindanah han mu rawh."

       "Ka duh lo. I zakkha rim a la chambang pek ang."

       "U Thansang, heta mut chu ka phal lo, ka pindanah han mu rawh, a fai vek."

       "Heti laia mut pawh chu i va ui reuh e aww. Mi tu emaw tân i hauh deuh a ni lo maw?" tiin Thansanga chu a nui huk huk a.

       "Kal mai teh," tih pahin Muanawma chu a vei kiai suk a.

       "Kei pawh ka mu dawn...ka chau," ka han ti ve leh ta thung a, ka nui pah suk a. Inchunglamah ka chho a, thawm dim takin ka chhuk leh ṭhem ṭhem a.

       Thansanga Muanawma pindan pana a chhoh hnu chuan ṭawng zui mai lovin kan ṭhiana leh Ramnghahi chu an han ngawi dun ren rawn a, an inṭhut hnaih vak rih lo va. Chutah, Ramnghahi chu ṭawng tuma a ân zuau laiin Muanawma chu a tho nulh a, Bath-room a pan a, minute nga vel a va zung huau huau a, chumi hnu-ah a lo chhuak a, ṭhut khawmna pindan luh dawna dawhkan inhung kil sir chu a khupin a han tauh ta nghek a.

       "Awihahhh...!"

       "Fimkhur ta che...che phut phut suh...che dap dap ve la..."

       "Ka che phut phut em ni?" Muanawma chu a nui vur vur a.

       "Aw...i che phut phut zel," Ramnghahi'n a lo ti ve thung a.

       "Che dam dap i duh zawk em ni?" Muanawma chu a nui leh a.

       "Aw..."

       "Chuti chu ka dinhmun a va derthawng ve," Muanawm chu a la nui put put a.

       "Mai thei..."

       "I bula ka awm hi chuan ka lai ve deuh roh thin alawm..."

       An inkarah engkim mai chu a kal tluang leh vek tawh a; Muanawma tan mi chhuahchhalh hun tak a ni. "Mi i be miah lo va; ka biak dawn chein i chhang hek lo! Engvang nge?" a han ti ṭan a.

       "Ka Phone a bo daih a."

       "Hmm..."

       "Muan, haw har thei ka ni lo..."

       "Ngai lo; riak rawh."

       "Chi loh..."

       "Ka ngai viau che asin."

       "Kei paw'n..." tiin Ramnghahi chuan Muanawma chu a kuah ta chèih chèih a...

       Kei chu lungawi takin ka nui suk a, thawm dim takin ka mutna tur ka pan san ta a ni.


Bung 10 Na

       Karhnih zet chu Muanawma inah chuan ka awm ta a, ka rilru chuan ram lama farm-house pakhat zawk ngawt kha a ngaihtuah ṭhin a, kan hmela lah hian vawikhat pawh a la sawi chhuak leh lo. A changin nihnih te min zin san a, a rawn haw a, a zin leh daih a, keimah chauhin a in lianpui chu min nghahtir a, a rawn haw chang lahin Ramnghahi nen chuan an inhmu a, an han inhuat loh hmel em em khawp lehnghal.

       Chu ka thil ngaihtuah avang chuan Dintei nena kan inkar ṭha lo tak pawh chu ka ngaihtuah hman meuh lo va, PARADISE LODGE chungchang ka phurpui tluk zetin he thil hian ka rilru a luah a ni. Dintei nena kan chungchang hi Muanawma ka hrilh hran lo va, chu chu sawi loh, ka mimal chanchin hi chu Dinsanga hi ka hrilh awmchhun a ni mai.

       Zirtawpni a ni a. Muanawma chu hmel ngui lam lek lek hian a zin a rawn haw a; min chhuahsana min awm loh san reng avangin engmah hi ka zawt hman mang lo va. Ruatsangi leh a fapa bo chungchang te, a rawn hmuh leh mai dan chungchang te kha ka la zawt leh ta reng reng lo va, chu ber aia ka hriat châk chu chawlh ka hmanna farm-house piaha kha farm-house lo awm ve leh, a chhehvel zawk kha a ni. Chumi ni a rawn haw chu a chauh hmel riau hian ka hria a, lo biak bawrh bawrh pawh ka duh lem lo. Ṭhuthlengah a ṭhu mu a, rei lo teah a muhil zui ta ni maiin ka hria. A awm loh hlan hian ka Novel ziah lai kha ka lo chhunzawm ṭhin a, hemi ni pawh hian a muhil zui ni ngeia ka hriat avangin lehkha ziak turin pindanah ka han luh san dawn a; mahse amah chuan min rawn be ta nge nge a.

       "Chhante, ka chhungte kha an kut tuara thi ni ngeiin a hriat a..." a han ti ngawt a.

       "Ka hre thiam ve lem lo khawp mai," ka lo ti mai a. A sawi chu THE JUDGE chungchang a nih ka ring ve ngawt tawp a.

       "PARADISE LODGE chungchang kan buaipui laia ka hrilh tawh che THE JUDGE chungchang kha i la hria em?" a rawn ti ta chiah a.

       "Aw hria e; ngati nge?"

       "Ramnghahi hi ka hlauhthawnpui a ni," a han ti a, a ngawi det pgawt a. "Ngaihzawng nei thei pawh hi ka ni ve chiah lo; nupui pawh nei ila, nuamsain ka siam thei lo vang. Kei chu...ka mal tlat a ngai a ni," a han ti duah a.

       "I chungah engmah a thleng lo vang," ka han ti ve ngawt a.

       "Zoremsanga hian ka rilru a ti buai tlat a ni, an mi leh sa a ni ngat ang," a ti a.

       A thinlungah chuan enghelh tak a nei a nih ka ring, Zoremsanga chu a helh hmel em em mai a. Ka ngawi reng a, ka zawh ngai lo va a mahin a rawn sawi chhuak ta zawk chu ka lo lawm rilru hle a, ka lo ngaichang a.

       Mahse Muanawma chuan, "Mu hma teh ang, naktukah vai pathian thawh hmain farm-house lam kan pan tawh dawn nia," a ti a, ama pindan chu a pan zui nghal daih a.

       A tukah chuan chhun pachanah ka chawlh hmanna farm-house kha kan thleng a, Muanawma chuan zanah kan chhuah a ngaih tur thu sawiin, a theih chuan muthilh a ṭhat zawk thu a sawi a, amah chu muthilh tumin a mu zui nghal daih bawk. A ṭawng tam lo hle a, ka zawhna pawh a chhang ṭha duh vak hek lo, kei lah chu ka awm dan pawh ka inhre thiam chiah lo, ka phili ru a ni mai thei. Hepa hian eng'e min tihpui a tum tih ngawt chu ka ngaihtuah a, chhun chhuna han muthilh lehnghal phei chu thei teuh lo tak ka ni.

       Ka muhil ta miah lo reng a. Tlai lam dar li leh a chanve velah chuan kan piah ngaw, farm-house pakhat awmna lam aṭanga mipakhat rawn kal hi ka hmu a, chumi chuan kan awmna farm-house lam chu a rawn pan ding hle a, a lo hnaih tâk zelah chuan hmeichhe pakhat nena ka hmuh kha a ni tih ka hre ta a. Ka bul a rawn thlen chuan a mit meng chuan tu emaw zawn nei a ang hle a, ka lo en ngun ngang mai.

       "Khaw'nge Muana hi?"

       "A muhil," ka lo ti deuh tawp a.

       Thil eng emaw tak lo thleng tur nghakhlel hmel hi a pu a. A ṭawng tam lo va, keiin engmah ka zawt lem lo bawk; chuti chung chuan ka bulah chuan a ṭhu ve reng lawi a, a chang chuan a tho a, a chang leh a ṭhu a, a chang leh kan piah ngaw, farm-house pakhat zawk lam chu a thlir leh vang vang ṭhin. Kei chuan a awm dan leh chezia chu ngun tak hian ka lo chîk a, mak tihna riau hi ka nei a.

       Chutia lo thleng thar pa awmphung pangngai lo zeta a awm lai chuan, "Sangte, nghakhlel lutuk duh suh, kan hmanhmawh lutuk chuan kan chet sual phah thei a nia," Muanawma'n a rawn ti a, a lo harh reng tawh chu niin.

       Ani chuan Muanawma lam hawi pahin, "Zorema kha a rawn thleng ve tawh, farm-house chhungah khan ka hmu a ni, ṭhian pakhat a hruai bawk," a han ti a.

       "An hmu che em?"

       "Hmuh ka ring lo."

       "A ṭhat chu, anni chu enghelh an ngai lo vang, Mira khan anni buaipui dan tur a hre ngawt pek ang," Muanawma chuan a lo ti mai a.

       "Tunge Mira chu?" tiin Sangtea chuan a lo zawt vat a.

       "Saw farm-house hrâng anga miin an ngaihna chhan ber hi a ni," tih chauhin Muanawma chuan a lo chhang a; chutah, "Hlimthlâ kha Chhantea hian hmu ve hrim hrim se ka duh a ni. Nang paw'n i la hmu bîk lovin ka hria," a han tih zawm a.

       "Ni e, hmuh chu ka châk; mahse ka hlau deuh a ni mai thei, ka tirilah mi man deuh ṭhin. U Dinsanga khan min hrilh tawh a,"

       "A hlauhawm leh hlauhawm loh chu a tawngtu rilru azir a ni," Muanawma chuan a lo ti mai a. Hlimthla chu a lo hmu fo tawh a nih hmel hle mai.

       Kei chuan, "Dinsanga i tia mi?" ka lo ti a.

       Muanawma chuan a lo chhan khalh a, "Aw, i ṭhianpa Dinsanga a sawina a nih kha," a lo ti hmanhmawh a.

       Sangtea pawh chuan, "Ka unaunu pasal a ni alawm," a lo ti ve vat bawk a.

       "Remremi saw i unaunu maw?" ka lo ti leh ṭalh a.

       "Aw ni e; mahse unau dik tak chu kan ni lo. A pa leh ka nu unau an ni," a han ti a. "He hlimthla leh he farm-house chungchang hi chu ka unaupa Liansanga pawhin min hrilh vek a, ka lo ngai thu tak lem lo va; mahse, anni chuan an tlawh ṭha vak duh tawh lo, zan riak phei chuan an tlawh duh lo hrim hrim," a han ti leh a.

       Thim hlimah kan kal chhuak a. Thla chu a eng pup pup viau na a, ngaw chhung chu a thim dul ruih a, thim chhah tak a nih loh avang erawh chuan kal a harsa lutuk lem lo. Phone flash light kan hmang zeuh zeuh bawk. Farm-house chu kan hnaih phei tawh hle a, a lan theihna kan thlen chuan hma hruaitu Muanawma chu a ding ta a. Farm-house lam chu a han en vang vang a, "Awm chu an awm ngei a nih saw," a ti sap a. "Tikhan lo awm ula, ka va en chiang lawk ang'e, ka rawn kir leh vat ang," tih pahin a kal phei zui nghal a.

       Sangtea nen chuan kan lo nghak a, farm-house lamah chuan ṭawng bawrh bawrh thawm hi kan hre leh ṭhin a, a chang chuan thinrim aw te pawh a ang lek lek ṭhin; mahse an thu sawi chu kan hre chiang thei lo. Muanawma chu darkar chanve vel zet a va thang a, a rawn let leh a, Zorema leh mipakhat an awm thu a rawn sawi a, an inhnial buai deuh thu a sawi tel bawk.

       "Zorema kawchhungah sawn ramhuai a awm a nih pawhin mak ka ti miah lo vang; a mitmeng saw a sen rûm mai a, a mizia pawh a pangngai lo tawp a ni," Muanawma chuan a han ti a. "An inring khawp mai, Bawngtuthlawh leh Suahdur pawh an keng thlap a ni," a han ti leh a.

       "Muana, eng'e tih an tum chu le? Helai hmun Zorema'n a engto em em mai hi ka hre thiam lo khawp mai," tiin Sangtea chuan a lo zawt a.

       "Ka zawn ang bawk hi an zawng maw le!"

       "Chu chu eng'e ni?"

       "Ka la hre chiah bîk lo!"

       Muanawma chhanna chu hre thiam lo zet hian Sangtea chu a han thaw deuh hak a, "I thil zawn pawh eng'e tih hre lovin i zawng si tihna maw?" a han ti deuh hâ a.

       "Aw...a ni ber mai; mahse, i Pu te farm-house hi nelawm taka awmtir ka tum tih leh, i Pu ten an lei hmaa a neitu hmasa te thlah kal zela ânchhe awm zui zel hi tih tawp ka tum tihah chuan ka chiang tawk khawp mai," Muanawma chuan a lo ti leh mai a.

       "Eng ânchhia nge!?"

       "Inawhhlumna ânchhia a ni berin a lang!" a lo ti leh ringawt a.

       Sangtea chu inngaihtuah mûk hmel zet hian a ngawi vang vang a, "Lalremsangi kha...!?" a han ti ngawt a.

       "Aw ni e. I ring dik chiah. Lalremsangi kha he farm-house awmna hmun neitute thlah kal zel ami a ni alawm, i lo hre ve a ni maw!?"

       "Hria e. A thinlung hliamtu pawh ka hria asin, ka ṭhian a ni ṭhin a, ka ṭhian a ni ta lo bawk," Sangtea chu a ṭawng chhuah danah a thinur viau a nih duh hmel hle mai.

       "Αnchhia a lo thlen theih nan sual chuan eng pawh a hmang thei. He chhungkaw inthlahchhawnga inawk hlum ta mi pathum ka chhui let te pawh kha an thinlung nat denchhena inawk hlum vek an ni asin," Muanawma chuan a lo ti leh a.

       Kei chuan, "Lalremsangi in tia mi? Kan kawmthlang..." ka han ti hman chauh a.

       Muanawma chuan, "Aw, inkawmthlang thinga a faséntè nena inawk hlum ta kha a ni. A fa paina Lalremruata a pan a, a ni'n a lo hnar tâk si avanga khatia awm ta maiah khan a puh theih; mahse a bul ber chu, chu ai daiha thûk chu a ni," a lo ti a. A Phone a han en thuak a, "Rawn kal ru le, a hun ṭep tawh," tiin ngaw chhungril lamah a kal a, keini'n kan zui ve nghal bawk a.

       Muanawma chu a kal chak hle mai. Farm-house kawt zawl chhuak lo tawkin a dep ngawah chuan kan kal phei a, zawl tawp ngaw bula thing ding ther fur mai lan chian theihna kan thlen chuan kan ding ta a. Muanawma chu kan dinna bula Vang thing lian tak, sang vak lo va a kakpui rem zet awmah chuan a han inham kai chho a, a kakpui a han thlen chuan a kutin min rawn hui a, Sangtea nen chuan kan lawn ve ta a. A kakpuiah chuan thingtuai rinawm zet zet tur panga vel hi rem zetin a lo inkham a, chutah chuan nuam takin a ṭhut theih a ni. Chu Vang kung aṭang chuan farm-house kawt zawl tawp ngaw depa thing hreu ther fur mai leh, a zar pakhat zar phei dû mai chu a lang chiang hle a, kan awmna erawh a biru reuh hle thung. Muanawma chuan bengchheng lo turin min han hrilh sap a, "Heti hian ngawi rengin thil lo thleng tur kan nghak dawn nia," a han ti sap a.

       Kan nghak rei lo.

       Minute sawm hnu velah chuan farm-house kawngka chu a rawn inhawng a, a chhung aṭang chuan mipahnih, Bawngtuthlawh leh Suahdur keng hi an rawn chhuak a, kawt zawl tawpa thing hreu ther fer fur awmna lam pan chuan an rawn kal a. Hriat tham chiah si loh hian an rawn phun phei bul bul a, thing bulah chuan an han ding leh phawt a; chutah, thli a rawn thaw vuk vuk a!

       Thla chu a la eng kulh a, mipahnih te chu thing bulah chuan inhnaih vak lo hian an ding dun a, thla chuan van lai zawl a la thlen loh avangin chumite pahnih thla chu ngaw lam hawiin phaitualhnim chungah chuan a lang dung sei riah a, anmahni pawh chuan ngaw lam an hawi a, eng emaw ni hi an sawi dun sap sap a.

       Thli chu a thaw zual zel a, khua a dur miah lo va, thli thaw vuk vuk mai chu a ngaihṭhatthlak loh zawk kher mai. Ka rilru-ah chuan 'sârthli' tih hi a lo lut zawk a!

      Chutah Muanawma chuan min rawn kheuh zeuh a, mipahnih awmna thing bul lam chu a han kawk a, "Hlimthla khu i hmu em?" a han ti sap a, Sangtea pawh chu a kawhhmuh ve nghal a.

       Thla eng riai ruai hnuaia Sangtea mak ti hmel chu a hmuhnawm loh kher mai, kei pawh ka lak tlak loh hle bawk; thing bulah chuan mipahnih awm lovin leh, ka bulah Muanawma leh Sangtea chu awm lovin, tuna kan awmnaa keimah chauha awmin hlimthla chu hmu ni ngat ila chu hlauin ka ṭe chhuak ṭhawt ngei ang.

       Mipahnihte awmna bula thing ther fer fur mai zar rinchhan ni ngei tur hian thla eng hnuaiah chuan hruizen hlimthla a awm a, chu hruizen hlimthla hmawrah chuan hmeichhe pakhat hi a inkhai bawk! Pawnfen ni awm tak hi a feng a, a Pawnfen hmawrah chuan a ke rek chin hi a lawr bawk a, thli thawt avanga inthen niawm tak hian a che hluau hluau a; mahse, chu hlimthla chu thing hreu zar awn phei dû maiah chuan a tak hmuh tur a awm si lo! Mahse hlimthla chu a lang chiang hle si; a ke leh a Pawnfen thla chu a inthen vir deuh muai muai a!

       Mipahnih ding duna a pakhat zawk chuan hlimthla chu a hmu ve ta tih hriat tak hian a ṭe ṭhawt a, chumi rual chuan an dinna chunga thingzar phei dû mai chu a han en chho vat a, engmah hmuh tur a lo awm si lo, lei phaitualhnima hlimthla lang chu a han en leh a, a lo la inthen hluau hluau mai si a. Pakhat zawk chu phawklek zetin a han kawhhmuh ve a; chutah hlauh hmel zetin farm-house lamah a tlan phei ta a. Pakhat zawk chuan a hmu thiam ve lo nge pawh a hriat loh, a ṭhianpa awm dan chu mak ti awm zet hian a han en zui vung vung a, a thil ken lai a dah lawk a, a ṭhianpa tlanchhia chu a va um zui ve ta a.

       Farm-house a thleng ṭep tawh tihin chupa chu mak deuh mai hian a tlu vir nawk mai a, hmuh theih loha theh virtu an awm ang mai hian a rawn tho leh chu a tlu vir leh nawk ṭhin a, a tawpah phei chuan farm-house bang deng dawt khawp hian a tlu phei ta nawk nawk a; chutih rual chiah chuan farm-house chhung lam aṭang chuan mihring hlau ṭe thawm hi a ri chhuak ṭhawt mai bawk!

       Thlâ chu chhumin a rawn hliah a, thli thaw pawh a reh ṭan tawh. Muanawma chu pawi tih hmel deuh hian a chek tlak tlak a, "Lai hman hram se ka duh asin le, a awmna kan hriat phah ngei awm si a," a han ti a. "Chhuk ila, farm-house chhungah sawn i va lût ang u," a han ti leh a. Amah chu a chhuk a, farm-house lam chu a pan nghal a.

       Ka chhuk tur chuan thing hnuai phaitualhnim chung kha ka va en leh kher a, engmah hmuh tur a lo awm tawh lo! Sangtea nen chuan a ngaihna kan hriat loh hmel dun ngang mai a, Muanawma chu a kal ta daih si a, a hnuhnung berah ka zui phei a, ka ṭim sung sung a, ka mawng chu a za cham cham hian ka hria a ni.

       Farm-house chhung kan han lût chu ka rin angin tumah an lo awm miah lo! Muanawma chu ṭhuthlengah a ṭhu hnawk a, Sangtea nen chuan min han melh a, "Thil awmzia ka han sawi tawh ang'e, Chhantea phei hi chuan a hre thiam thuai ang," a han ti ta a. "Zorema ṭhianpa chu a lo chhuak hman a nih dawn hi," a han ti leh te te a, a sawi zawm ta zel a.

       "Khang Lunghlu pali zinga pathum awmna kha ka theihtawpin ka chhui zui reng a; chutih lai chuan ka ṭhian pakhat hian facebook inbox lamah he lai farm-house chungchang hi min rawn hrilh a, thil awm dan a han sawi aṭang chuan, a tira khang Lunghlu kawltute zinga Dawithiam thlah kal zel ten thil eng emaw avangin an chenchilh a nih rinna ka nei a, Lunghlu chungchangah a nih ngei pawh ka ring tlat bawk. Kei ka inrawlh loh chuan Dawithiam laka nunna chân an awm leh ka hlauh avangin he lai hmun hi ka pan ve ta vat a ni.

       "Ka kal hmain he farm-house neitute chungchang hi ka chhui hmasa phawt a; Sangte, chuvang a ni kan inhmuh hmasak ber ṭuma Pu Hrângchîna tupa i ni tih ka hriat nghal. He lai hmun ka thlen chuan ka rin dan chu a dik a ni tih ka hret thiam nghal mai a. He farm-house hrâng anga an sawi nachhan te pawh chiang lo deuhin ka hre thiam nghal zel chu a ni mai a. Kha'ng a hrâng anga lang kha, mi tumahin he lai hmun hi tlawh ngam lo se tihna avanga lo awm a ni; chu chu Dawithiam pakhat, Mira-i thiltih vek a ni. Chhante, PARADISE LODGE hmuna Dawithiam pakhat chungchang kha i la hria ang a, Mira-i hi khami ṭuma Dawithiam ka dawr tâk farnu kha a ni," tiin Muanawma chuan mi han en a, a sawi zawm leh nghal a.

       "A tir chuan tunge a nih ka hre mai bîk lo va, amah hi hmuh tumin ka zawng ngat ngat a; mahse ka hmuh turin a inlan duh tlat lo. Lunghlu awmna a zawng ang tih ka ring tlat a, he laia thil thleng duhawm lo tak hi a reh mai loh avangin Lunghlu chu a la hmu lo tih pawh ka hria. He'ng Dawithiam thlah ho tan hian kha'ng lunghlu pali te kha an pawimawh viau a ni ang, a pawimawhna chu ka hre thiam pha chiah lo na a, an kutah hian awm kim vat se ka duh ve bawk a; chuvangin he lai hmun hi ka chen chilh ve ta chawt mai a ni.

       "Sangte, in rawn kal hma khan he laiah hian ka lo awm fé tawh a, in chungah he Dawithiam hian thil ṭha lo a thlen tir ka hlauh avangin haw vat turin ka hrilh che u a; mahse in haw vat loh avangin i ṭhiante zinga pakhat chungah khan thil ṭha lo tak a thleng ta reng a ni. Zorema'n harsatna a siam zui a, eng vakah ka lo ngaih loh laiin ani chuan ka inring lo lai min man a, ramhnuai thingah min phuar bet a, Chhantea hian min rawn hmu fuh ta hlauh a, min chhuah ta a ni.

       "He lai hmunah hian ka Lunghlu zawn kha a awm leh awm loh ka hre thiam lo hle a, ka chiang ngam lo bawk; mahse Zorema'n min man ṭuma ka hnena a thil sawi aṭangin khawiah emaw hian a awm ngei ang tih ka ring ve ta a. Zorema kha tum nghet tak neia he lai hmuna rawn kal ve a ni tih ka hre zui leh ta bawk. Engtin nge Lunghlu chungchang hi a hriat ve ka hre lo va, chu chu ka la hre chhuak vat tho bawk ang.

       "Zorema chu a malpuiah ka tawk hliam ve ta a, lo inrawlh rih lo se ka duh vang a ni. Mahse a zia leh awm dan hi a mak sawt hle a, kawchhunga ramhuai lut ang mai hian a tumlum a, a dam hun hunah he lai hmun hi a rawn pan leh ngei ka ring tlat a, a chet theih loh chhunga ka thil hriat duh chhui chian ka duh avangin haw ka rawt ta a nih kha," tiin Muanawma chuan min rawn melh leh ralh a.

       A han sawi zawm leh a, "Ka thil hriat duh chu ka chhui ta a, he farm-house chhehvel ram neitu hmasa te chu tute nge tih ka chhui phawt a. Tichuan he lai ram, saw ti lai thing hreu re ru-ah khan a hmasa ber ni turin Pu Ngaihsiama a inawk hlum tawh tih ka hre chhuak ta a, chumi hnu kum tam a liam fé hnu-ah saw thingah vek sawn a tunu a inawkhlum leh bawk! Tichuan, Remsangi inawh hlum thu ka chhui thleng ta zel a, he ram lo nei hmasatute thlah ho hian inawh hlum an chîng hle mai a lo ni.

       "Chhante, ka thil hriat danin PARADISE LODGE Lunghlu, Pu Kawlsiama'n a tih ral tak kha engtin tin emaw Pu Ngaihsiama kutah a lo awm a, engti taka thianghlim loin nge a neih chu chiang tak chuan ka hre lo; mahse a neih dan a ṭha lo hle niin ka ring tlat. Pu Ngaihsiama'n Lunghlu a neih hnu deuhah amah chu a inawk hlum ta a, a hnu-ah Lunghlu kha a fanu pakhatin a hmu a, tih vak ngaihna a hriat loh avangin a thukru ta rih a ni awm e. Chu Lunghluin an chhungkaw hnen a thlen aṭang chuan an chungah tluan lohna a awm ta reng mai a. Pu Ngaihsiama tunu a inawk hlum a, a hnu kumah an thlahte zinga midang pakhat a inawk hlum leh ngawt bawk!

       "Lunghlu chu chin hriat loh a ni chho ta a, tu emaw berin he lai chhehvel khawi maw laiah hian an phum bo a nih a rinawm ta a ni. Zorema khan a hriat ka ring tlat a, zanina kan enthlak chhan pawh kha kha a ni; mahse Mira kha a rawn inrawlh ta tlat a, kan hre hman ta lo a ni. Ka hmuh chhuah vat a, a neitu, a kawltu tur dik takte hnena ka pek vat loh chuan he farm-house neitu hmasa te chungah hian ânchhia a la awm zel dawn a ni, tu emaw ber chu a rilru natna denchhenin a la inawk hlum leh lo vang tih sawi a har khawp mai. He lai ram hi Pu Ngaihsiama fapa Thansiama hnen aṭangin engmah hre lovin Sangtea Pu, Pu Hrângchina'n a lei a, tun hi kan thleng chho ta a ni. Zanina Lunghlu awmna kan hre hman ta lo chu a pawi ka ti khawp mai," a han ti a.

       Chutih lai chuan hmeichhe aw, Mizoṭawng awn tlai mai hian, "A awmna chu keima'n hria lawm," a rawn ti a.

       Kan pathum chuan kawngka lam kan hawi ṭhap a. Hmeiche hmel chhe lo tak pakhat hi a rawn lut a, a mit meng chu a lian ke kaw hle a, "Muana, nangmah nen lai ang, nangma sawi ang chuan nangmah chauh khan kan kutah pe dawn tih sawi a ni," a han ti leh a.

       Muanawma chuan kan lam a rawn hawi a, "Hei hi Mira-i chu a nih hi. Sangte, inchunga lama in ṭhiannu thil tawn te, saw ti lai thing hnuaia inawkhlum hlimthla awm te leh, he farm-house vela hrâng zawng zawng kha Mira-i tih vek hi a ni," a han ti a. Mira-i lam a hawi leh a, "Zorema leh a ṭhianpa kha engtin nge i tih?" a han ti a.

       Mira-i chu duhawm deuh mai hian a han nui a, "Anmahni ka that lo; mahse ngaihtuah buai ngai lo vang," a han ti ngawt, chu bak a sawi duh lo.

       Muanawma bawk chuan, "Chhante, Sangtea nen naktukah min lo haw san mai ula, kei chu Mira-i nen tih tur kan nei a nih âwm chu," a han ti a.

       Sangtea chu a bu nghat a, "Ka pu te farm-house hi a ralmuang tawh ang chu tiraw?" tiin a han zawt a.

       Mira chuan a lo chhang a, "Keimahni Lunghlu neih chuan hetah him tawh ang," a lo ti a.

       Muanawma chu inchung lamah a chho a, mi rawn mitmei zauh avangin ka chho a ve a, kan pahnih chauha kan awm dun hnu chuan, "Chhante, Dintei hi i hmangaih em?" tiin mi han zawt a.

       Ka ngawi vang vang a, "Engtin nge kan chungchang i hriat?" ka han ti a.

      "Dinsanga nen kan inkawm a ni, i hmangaih em?" tiin mi han zawt nawn leh a.

      "Ka hmangaih; mahse ka rilru a ti nâ a ni," ka han ti a.

       Muana chuan, "Ka hre thiam e; mahse tunah hian nangmah avangin khawhar leh rilru na takin a awm mek a ni. Naktukah haw la, naktuk tuk leh zan hi thla bial zan a ni a, he Lunghlu ânchhia avang hian a chungah thil ṭha lo tak a la thleng thei a nia, a bulah awm la, lo thlahthlam miah suh," thu tak zet hian a han ti a.
* * * * * * *

       A tukah chuan Sangtea nen chuan kan haw ta a. Chumi zan chuan thil ngaihtuahin ka tlaivar ṭhak a, Dintei nena ka chungchangte chu ka ngaihtuah kai zel a, amah han hmuh leh pawh chu ka hreh ang reng hle a; mahse Muanawma khan a chungah thil ṭha lo tak thleng thei ang khan a sawi tlat si, a thu tak em em lehnghal. A nutei fanu Remsangi ang maia a rilru nat denchhena a lo inawhhlum ve mai chu ka hlau deuh a, chutih rualin an in han kal chu ka châk lo nasa mai si.

       Zan lama ka mut loh avangin nilengin engmah ka ti peih lo va, ka rilru-ah chuan Muanawma hnena zawh tur hlir hi a inchhek khawl ṭeuh mai a. Peih lo zetin zanriah ka ei a, dar riat velah phur lo zetin Dintei te in chu ka pan ta a. Ka va thlen chuan Dintei û chauh a lo awm a, a lo mangan hmel hle a. "Dintei a awm em?" ka han ti a.

       "Chhante, lo kal teh...Dinmawii awm dan hi a mak lutuk, chaw a ei mumal ngai si lo, a chang leh a ṭap leh ringawt zel. A ṭap lai hi ka hmu leh ṭhin a, chaw ei kham khan a chhuak a, a lo la haw miah lo. Zan dangah a chhuak ngai si lo, ka hlauthawng khawp mai," a u chuan a han ti a.

       "Khaw'nge i nu te?"

       "Dinmawii zawng turin an kal, in nghak turin min dah a ni."

       Kei pawh chu ka ngaih a ṭha tawh lo; a awmna ka hre mai thei. Ka chhuak thut a, chu lam pan chuan a tlanin ka tlan a, ka va thlen chuan Dintei chu a lo awm ngei a; mahse ka tlai a ni!

       Hnam hrui chu a hmanhmawh zet ka han phelh a, Dintei chu a tla zawi hnawk a, thing aṭang chuan ka chhuk vat a, ka malchungah ka chawi a, "Dinte...Dinte...Dinte...ka thiam loh a ni..." tiin ka ko mawlh mawlh a; mahse min chhang si lo!

       Thla chu a eng bial kulh a, ka rum hawk a, mangangin ka au vak vak a, ka mit tui karah fiah lo ruaiin Dintei pa rawn kal chu ka va hmu a.
* * * * * * *

       Karkhat hnu-ah Muanawma inbox chu ka hawng thei chauh a, he thu hi min lo thawn a- "Lunghlu chu kan hmu a, a awmna turah a awm tawh e. Zorema kha THE JUDGE mi leh sa a lo ni," tih hi.

Up  Next Book Two