DENGEROUS CAVE IN AOKIGAHARA!

DENGEROUS CAVE IN AOKIGAHARA!

© Chhantea Pautu

       He ngawpui chhah ṭha zet hi Japan rama Mount Fuji, tlângkàng inphuh chhuakin a siam bula awm a ni, he tlangkang hmarthlang lamah hian a inpharh a, 30 Square Kilometre(12 Square Miles) vel a awh a ni; thinghmun chhah ṭha tak a nih bâkah, mihringin mahni intih hlumna hmuna an hman ṭhin avangin, 'Suicide Forestor Sea of Trees' tiin an sawi ṭhin; chu chu anmahni ṭawng chuan 'Jukai' tih a ni awm e. Hetia mahni nun ning ten mahni intih hlum nân taka an hman fo avangin leh, he ngaw chhungah hian mihring ruang tam tak an chhar ṭhin avangte pawh a ni ang, 'Ghosts of The Dead' tih te pawhin an sawi a; chu chu anmahni ṭawngin 'Yurei' tihna a ni. A ngaw han en a, a ram hmelhmang han chîkin mihring thlarau lêng nuaih nuaih àwm pawh a ni hmel reng reng mai.

       Chu ngaw chhah ṭha zet lairilah chuan thil danglam tawn leh hmuh chhuah châk tak tak Japanese ṭhalai ṭhenkhat, Akimitsu leh a ṭhian panga te chu tum loh deuhin an tawlh lût a, an chungah thil ṭha lo tak a lo thleng zui ta a ni. He ngawa an kal hma hian hriamhrei leh mahni invenna thil ken nachang an hre lo hi an thil tih sual pawi tak a ni.

       He ngaw hi ngaw nelawm tak a ni lo vang tih chu he ngaw chhunga mihring, mahni inti hlum an tam tawh dàn aṭang hian a hriat hle. Kum 2003 phei kha chuan mihring ruang 105 ngawt he ngaw chhûngah hian chhar a ni a; chu'ng an ruang chharte chu a ṭhen inawk hlumte, a ṭhen Drug Overdose avanga thi ni ngeia rinte an ni deuh ber mai; mahse, heti taka mihring ruang chhar nasat tâk mai chu mahni inti hlum chauh ni lova tualthah avanga thi ta te ruang pawh a awm ngei ang tih chu i rin dan a nih ve tho ka ring. Chuti ang thil a nih avang chuan thih dàn pangngai lo tak taka thîte thla hrâng nelawm loh tak tak lo vâk vêl nasa hle pawh ni ta se thil awm ngei ngei tura ngaih sa zâwk chi a ni hial ang chu.

       Kum 1960 khan Japanese Writer, Seicho Matsumoto chuan he Aokigahara ngawpui behchhan hian Novel, 'Kuroi Jukai(Black Sea of Trees)' tih chu a lo ziak tawh a; sawi tawh angin he ngawpui vêka thil thleng, tlângthang zui ta vak si lo, a thupui pawh phuah sa a awm mumal loh avanga keiman 'Dengerous Cave In Aokigahara ' tia ka vuah ve tâk mai, Japanese tlangval harhvang leh fing, Akimitsu leh a ṭhiante panga, Kota, Haruki leh an bialnu te, Misato, Kanaka leh Ayaka te ho chanchin kan sawi ve dâwn a ni.

       He Aokigahara ngawpuia thil thleng a tlângthan zui tâk vak loh chhan hi Akimitsu-a Pate Yuito-a, he thil thleng hretu berin Akimitsu ṭhianpa Kota Note-book a thup zui vang leh, a fapa chunga thil thleng chungchanga a ṭawng tui tam duh miah loh vang a ni ber a; mahse, vanneihthlâk takin engtin tin emaw he thil thleng chanchin hi ka hre fuh ta hlauh mai a, ka tui chilh ta hle a ni.

Akitmisu Leh A Ṭhiante Chu.
       Ṭhian ho inkawmngeih tak leh inngaizawng ni nghal, tuina lam inang tlâng ang reng tak an ni a. 'Adventure Club' tenau tak hi an paruk chuan an din ve ngawt mai a, inngaizawng an ni hlawm bawk a, midang tel miah lo pawhin an paruk chuan an hlim thei hle a ni. Akimitsu leh Kanaka an inkawp a, Kota leh Misato an inkawp a, Haruki leh Ayaka an inkawp bawk. Akimitsu hi pa lian vak lo mah se fing leh bengvar tak a ni a, a bialnu Kanaka hi hmeichhe hmel ṭha tak a ni. Kato hi Literature lama tui tak, thil chhinchhiah neuh neuh peih mi a ni a, engtik lai pawhin Note-book leh Pen a pâi reng ṭhin; a bialnu hi Kanaka angin hmel ṭha lo mah se, duhawm leh ngainatawm tak a ni thung. Haruki erawh mi phunglung, fiamthu ngaina leh tharum ngah tak, thil dawn thui vak lo chi a ni a, bialnu pian thiam zet Ayaka a nei bawk. An vai hian an inpawh em em a, an inngaina tawn hlawm hle a ni. Adventure lama an tui hlawm em avangin chawlh hmang ṭangkaia Aokigahara ngawpui chu, thui lotè tal luh chhin an rawt a; tichuan karkhat vel thang turin an inbuatsaih a.

       11 October, 2000 khan Aokigahara ngawpui chu an lût ṭan a; mahse an tum angin an va awm lo nge, karhnih hnu pawha an lo lêt ta miah lo chuan an chhungte ngaih a ti ṭha lo ṭan hle tawh a ni. An kal chhuah aṭanga karthum dâwn a liam tawh hnu pawha an la rawn haw theih loh avangin an chhungte chu an mangang tawh hle mai a; Kato leh Ayaka erawh fahrah niin anmahni ngaihtuah viautu tur chhungbul em em an nei tawh lo thung. An thangrei tak em avangin an chhungte chuan sawrkar lamah an thlen ta nge nge a; an ngenna ngaipawimawhin sawrkar lam chuan Aokigahara ngawpui chhung chu an dap ṭan ta ngawt mai a ni.

       Sawi tawh angin he ngaw chhungah hian ruang an lo chhar fo tawh a, ngaw chhungril thûk lamah erawh an la chhar ngai meuh lo. Ngaw chhungril thleng pha vak lo, ngaw pâwnlangah mahni inti hluma inawk hlum ruangte pawh a chhar tlangpui a ni. Mak tak maiin karkhat lai Akimitsu leh a ṭhiante zawnga chu ngaw, 30 squares kilometre bial vel ngun taka dapa an zawn hnu pawh chuan an ruang emaw, an hmel emaw leh an rim a ra hrim hrim pawh hmuha hriat tur reng reng an nei ta si lo va, a zawngtute mak tih pawh a hlawh hle nghe nghe! Karkhat chuang zet an zawn hnu pawha beiseiawm thil an hmuh hlek si loh avangin a nawlpuia zawn chu bansan zâi an rel ta ngawt mai a ni.

Akitmisu A Lo Kir!
       Mibo zawn an tawpsan a, an chhungte tân pawh beisei a bo tawh hle.

       Mahse, an kal chhuah atanga thlakhat leh a chanve zet a liam hnu chuan Akimitsu chu pawr leh dawldang, cher chhe zet leh mitmeng dava riai hian an inah a rawn lum lût ta hlawl mai a; khumbetin a dam lo zui nghal char char mai bawk. A thiante chanchin zawh tlâk loh khawpin a mumallo a, a muhilte hi a ṭawngvai niah niah reng a, chaw a ei mumallo va, a cher chhe em em a, a biak tlâk thlâwt loh a ni ber mai. A rawn haw aṭanga ni sawm hnu, a ni sawmpakhatna tuk khawvar ṭan tirh chuan Akimitsu chu a chatthla ta nge nge a! A ṭhiante chhungte tân chuan a hrilhhaithlâk hle a, an fate chanchin hriat theihna a nih an beisei a, a rawn haw chhun Akimitsu lah chu chanchin sawi hman lovin a liam leh ta mai si; engtikah mah an fate chanchin chu hriat an inring tawh lo.

       Mahse, Akimitsu khan a ṭhianpa Kato Noot-book a rawn keng haw hlauh mai a; chu chu Akimitsu Pate Yuitoa'n a kawl a. He Noot-book aṭang hian an ṭhianza hoin Aokigahara ngawpuia an thil tawn kimchang lo tak chu a hriat theih dawn ta tho a ni.

Note Book of Kato!
       "11 October, 2000(Nilai): Aokigahara ngawpui chu kan lût ta...2 kilometres vel kan kal hnuin Puan in kan kaih a, Haruki'n hmeichhe ho a tih ṭhaih a, kan nui nasa hle...a lunglenthlâkin a hlimawm bawk. Heti ang hmun reh leh fianriala Misato nena hun hman dun hi a hlimawm ka ti hle a ni.

       "Ngaw tawntirh mah ni se ramsa hràm mak tak tak hriat tur a awm a, thawm neuh neuh a tam khawp mai. Chinghnia a rawn û leh rawng rawng ṭhin a, puithuna la runthlâk chi tân chuan hriat a nuam lem vak lo vang.

       "Bûk tualah mei kan chhem hluah a, Haruki leh Akimitsu chuan fiamthu an thawh a, hmeichhe ho an nui tlawrh tlawrh mai. Akimitsu leh Kanaka chu insirialin an ṭhu a, an inhmeh hle a ni. Innei ta se nupa inhmeh ber pawl an ni ngat ang.

       "Haruki erawh chuan Ayaka chu kut thawh meuhin a fiam zauh zauh reng a, an intûm khum leh bar bar bar ṭhin. He mite pahnih hi an inhau fo a; mahse ka hriat chinah, inngaizawng zawng zawngah an la inngâi ber.

       "Misato pawh ka kokia a lu nghatin thlamuang takin mi ngheng chial mai; henu zet hi chu a duhawm thlâwt a ni.

       "Hnimhnah mak danglam tak tak a awm nual a, thingzung thlar mak tak takte, hruizam kawih niaih nuaih te pawh...he'ng hi a mâwi ka ti a, ka ngaina a, hmuh nuam ka ti a ni; karkhat kan thang hnu-a kan haw meuh chuan sawi tur a va tam leh pek dâwn em..."

       Heti chinah hi chuan tluang taka ngaw chu lutin harsatna an tâwk lo niin a lang; mahse a thu zîak hun a inkar hlat ta hle thung a. A thu zîak lehah chuan a ziah hun leh nî pawh a lang ta lo; i en zel teh ang.

Harsatna An Tâwk!
       "Vawiin hi eng nî nge ka hre tawh lo; mahse he ngaw kan luh tirh aṭanga vawiin inkara kan thil tawh zozai kha chu ka la hre chiang hle...thil thleng ziahna hun rei lotè ka neih lai hian a tlangpui tal ziah ka duh a ni. He ngaw kan luh ni aṭanga chhiar ṭanin vawiin hi thlakhat lai a nihna a ni tawhin ka ring.

       "Nasa takin hliam ka tuar a, damin ka haw tawh kher lo mai thei bawk. Misato chuan min kalsan tawh a, Haruki leh Ayaka pawh an liam tawh; Ayaka kha ka farnu ang maia ka en a ni asin. Kan chunga thil thleng hi a rapthlâkin a va han hlauhawm tak em. Tunah chuan Akimitsu, Kanaka leh Kei chiah kan ni tawh...Kei lah hliam na tak tuarin ka awm a, ka kal hleithei tawh lo, kan awmna chin kan hre lo va, khawilam nge pan tur tih lah kan hre si lo...Akimitsu leh Kanaka pawh an chau tawh hle.

        "Kan thil tawn ṭhenkhatte ka han sawi ang'e.

        "Ngaw tawntirha kan riahna aṭang khan ngaw chhungril lam panin kan kal leh a, 5 killometres vel kan kalin Puan In kan kaih a, mei chhemin hlim takin kan inkàwm a, chumi hnu-ah kan mu ta dial a...hemi zan hian kan buaina chu a rawn inṭan ta a ni.

       "Ka mu tui lai chu thil thlêr ri kàwk kàwk hian min ti harh hlawl mai a, ka thil hriat chu eng'e tih hriat tumin light ka han hmet êng a, chuta ka thil hmuh chu awihawm loh khawpa thil rapthlâk a ni! Tun thleng hian ka la awih lo va, mahse a tak chu a ni si. Ka ṭhiante pawh a rawn harh vek tawh a....thil thler kàwk kàwk ri ka hriat kha kan Puan in chung pawh thlêr ri a lo ni reng mai.

       "Kan Puan in chung rawn ham thlêrtu chu rapthlâk tham khawpa lian leh sâng a ni! Ka vawikhat chhunnaah khan a hmai tak ka han chhun fuh a, a hmel ṭihbaiawm dan leh hmel chhiat zia chu sawi fiah thiam loh khawpa rapthlâk a ni tlat a, sawi fiah ngaihna ka hre lo. Kan Puan in pawt thlêr kàwk kàwk thei khawp kut lah chu eng ang nge tih hre turin ka chhun ngam tawh lo. Ka tirilah mi ṭham a, ka khur chhe der a, ka kha a chih zo tawh a ni.

       "Thâwklehkhatah hmeichhe ṭè thawm a rawn awm thut a, inring lâwk pawh ni lem lovin ṭè thawm rîkna lam chu ka han chhun a...Ayaka a ni! Chu thil chuan a keah manin a khai kàng lawp a, ngaw ril lam panin a kalpui ta buan buan a.

       "Ayaka chu a ṭè vawn vawn a, a thim si, hlauhna nen a ngaihna hre lo zetin kan tawmim diak a; mahse Haruki chu a tho thut a, Ayaka au tuarh tuarh chungin a ṭè vawn vawnna lam pan chuan a tlân ve ta buan buan a. Haruki chuan eng êng mah a keng si lo, keini pawh kan harh chhuak thuai a, êng keng chungin kan zui ve ta vat a, Haruki chu kan au phei tuarh tuar bawk.

       "Mahse, Ayaka mantu thil nung chu ùmphâk rual a ni lo, kan inlenhleih em em mai si, a vawikhat pên pawh kan tân chuan a kar a hla em em dâwn tih ka hria...Ayaka ṭè thawm chu a zawi tial tial a, a tâwpah chuan kan hre thei ta lo.

       "Haruki chu kan ko chiam chiam a, êng chuan ka han chhun kual a, hrui zam karah hian a lo tlu vêt hnawk nuaih a, engmah a hre lo a ni ngei ang, kan biak pawhin min chhâng lo. A tlûkna aṭang chuan kan han la chhuak a, kan en chiang nghal a, a intauhna niàwm takin a chal chu a pem a  Kan bûk lamah kan zàwn phei a, kan Puan in a chhiat tawh avangin a buaithlâk hle mai...darkar khat hnu velah khua a rawn var ta hlauh zâwk a.

       "Haruki rawn harh chuan Ayaka zawn a tum thu chiah a sawi, a bak engmah a sawi lo; keini pawh chuan hlau hle mah ila, kir san kan tum bîk lo, kan panga chuan nizàna thil nung kalna lam kha kan pan ta a ni...chhui a lo har lo kher mai; mahse mak tak maiin chawhma zet kan zui hnu-ah a kalna hnuhma àwm ang chu a awm ta miah lo. Tichuan, kan rinna lamah kan rin kal ta tawp a, kan vâk kan vâk a, Ayaka chu kan au pah reng bawk. Thawm reng reng hriat tur a awm si lo. Kan vah nasat em avangin kan kalna hnu lah kan hloh tawh bawk si, Aokigahara ngawpuiah chuan kan bo ta a ni.

       "Nî a tla a, khua a thim dâwn ta mai. Keini chu kan la vâk kan la vâk a. A tâwpah chuan khampangah hian pûk kawngka niawm tak hrawl zet mai hi kan han hmu a, khua a thim têp tawh avangin chuta riah mai chu kan tum ta a ni...."

Pûk Huai Chu!
       "Zan khatnaah chuan eng buaina mah kan tâwk lo. Mahse khua a rawn var a, kan awmna vel kan han en chian nâk chuan ruh ro hi a lo awm rem rum mai a, kan hlau chu kan han inen hé háw hlawm a...chu hmun chhuahsan vat tuma kan rilru kan siam lai mêk chuan kan awmna pûk kawngka aṭanga êng rawn lût chu a thim khupa a, thil nung tihbaiawm tak rûangàm lian zet hi a rawn lang zui a, hlau em emin pûk kil thim lamah chuan kan tawlh lût ta vat a.

       "Chu thil nung chu zan thimah a hmelhmang ka sawi fiah thiam loh ang bawkin khaw ênga a hmel lo lang leh a pianhmang chu ka la sawi fiah thiam chuang lo. 'A râpthlâk lutuk!' tih pawh hian a sawi fiah zo ngang lo a ni. A thaw ri hrûk hrûk a, a rûm chhur chhur a, kan rim a hria a ni ngei ang, a hnar chu a lèn vut vut a. Heti ang thil nung râpthlâk hian Ayaka kha engtin nge a tih ang tih chu suangtuah pawh ka suangtuah ngam lo.

       "Haruki chu a thawk thut a, dan hman lohin chu thil nung râpthlâk zet lamah chuan a tlân phei ta vak mai, a au ruai ruai a, a meng â rùai mai bawk; a hmâ daih aṭang tawh khân a hmel leh chezia kha a dik zat tawh lo hrim hrim a, Ayaka a chân vangte pawh a ni ang.

       "Chu thil nung chuan Haruki chu hneh zet hian a lo ṭhâm a, a kut lehlamin a lu-ah a vuan a, a kut lehlamin a taksa, a kawngbâwrah a vuan bawk a, chutah, a han phih mai chu(h)...a râpthlâkin hmuh a hrehawm tak zet a ni! Hmeichhe pahnih chu an ṭè ṭhawt a, an ṭhu khur zawih zawih a, a mipate lah engmah kan ni lo. Kha thil mnung kha rùm ring hle lo se la chuan Kanaka leh Misato ṭè ri kha a hria ang a, kan chan chu a chhe ngawt ang.

       "Chu thil nung dum rùn mai chu pûk pâwn lamah a sawt chhuak thurh a, kan ṭhianpa ngainat em em Haruki, nunna nei tawh lo chu a seh kawh a, a kal bopui ta a ni...chutih lai chu remchangah laa pûk chu chhuahsan tumin kan han kal a, pûk pâwn kan va chhuah chuan kan ding nghal chawt a; Chinghne hrawl em em mai sawm vel hian ṭhen ṭhu chungin min lo en reng mai...mûangchângin min rawn pan a; mahse Chinghnia te chu mak tak maiin mei khupin an tawlh hnung leh vat a, beleuh ṭhat ṭhat chungin ngaw chhungril lamah an lût bo ta dial a.

       "Kei chuan chutia Chinghnia rual ngaw chhunga an lût bo ta diak chu mak ka ti hle mai a, eng'e an hlauh a, min bei lova an tawlh kir chhan chu ka hre thiam lo hle a, hmalam pana kal ka tum lai tak chuan Akimitsu chuan, "Pûkah lût leh vat ang; a lo kir leh a nia," a ti ṭhat a, rang takin kan lût leh ta a ni. Kan tân chuan pûk chhûnga luh leh mai kha a thlanawm ber a, thilnung râpthlâk tak kha Chinghne rual luh bona lo lam aṭanga rawn kal a ni a, Chinghne rual awmna lamah khan kal ta ngawt ila, a hlauhawm hle tho si...Chinghnia ten min beih ngam lohna chhan chu a rawn lang leh ta.

       "Hmanhmawh taka pûkah chuan lûtin a kil thim lamah chuan ka biru leh ta a; chu hmunah chuan karkhat deuhthaw chhuak ngam lovin kan tâng a, a hrehawm takzet a ni. A tâwpah pûk chhungril lamah lûtin chhuah theihna kawkel pakhat kan hmu ta hlauh a; mahse, chu pûk hlauhawm zet kan chhuahsan theih hnu pawh chuan hlauhawm leh hrehawm, harsatna tam takin min lo la hmuak cheu mai, kamrah leh hnimhnah nêm mai ringin kan khawsa ṭan a, khawi lam nge pan tur dik kan hre der si lo. A châng phei chuan Aokigahara ngaw chhungah kan vah kualna vel hi awm hauhin ka ring lo ṭhin. Khawvel pang lehlam khawimaw lai, tuma tlawh pawh lohna hmuna awm ni mai hian ka inchan ṭhin a, zan lamah thil mak leh hlauhawm pui pui kan tawng a, kan vâkvài tak meuh a ni.

       "Kan bo kualna lamah kha pûk huai kha kan tawng leh a. Misato chu kha pûk huai hlaua kan tlânchhiat laiin a che sual ta hlauh mai a, a tlu chu a rawn nangchîng a; ka chhan thei dawn lo tih hre reng chunga amah chhan tura kal ka tum chu Akimitsu leh Kanaka chuan min man bet tlat a, ka Misato chuan min kalsan ve ta a ni. Mit tui tla zawih zawiha ṭap chungin chu thilnung ṭihbaiawm zetin a pawt sawm lai chu ka en a...tih theih ka nei si lo.

       "Thil ziahna hun ka nei ta lo, hlauhawm tam tak kan tawng a, hlauhawm tam takin min ûm zui a, tunah pawh ûm zui rengtu, hmuithlâ ang maia min vila min uap rengtu thil hi chhun leh zanin a awm...kan chau tawh tak zet...kan thlâ a phang a...kan tlin lo têp tawh a ni e...chu thawm a awm leh ta...kan kal a hun...thihna chuan min hnaih zel a ni..."
* * * * * * *

       Khati chin kha 'Note Book of Kato' aṭanga Akimitsu leh a ṭhiante chanchin kan hriat theih chu a ni ta a, hmanhmawh taka a ziah a nih ngei a rinawm a, a kimchang kher lo vang. Kato thil ziah aṭanga kan hriat theihah hi chuan Akimitsu, Kanaka leh amah Kato hi an la dam a; mahse, Akimitsu chauh kha in rawn thleng thei awmchhun a ni si...