ZÀN THIM ZUNG ZÁM!
- Pjs
October thlà êng no nghelh chu, chhum chuan a rawn hliah zauh zauh reng a, thlanmual chu a hnim deuhhlek tawh avangin thli chuan hnimte chu a chhem ri seng seng a. Tluangpuii thlàn bulah chuan ka ṭhu reng a, a damlaia kan inkawm hlimna ber thawnthu chu ka ngaihtuah chhuak leh a. Engtikah nge kan inhmuh leh ang le?
Kha thawnthu kha a la tawp lo asin, ka la hrilh zo si lo che a. Nang chu khawiah emaw mihringte chhui chhuah phak lohna hmunah chuan thlamuang takin i chawl tawh ang a, mahse kei chu; hei zaninah i thlan bulah ka rawn ṭhu leh asin. Min lo hmu em? Ka va han ngai tak che em! La awm ve la ṭha tur.
Thli chu a thàw heuh heuh renga, ka rilru chuan Tluangpuii nena kan nunhluite chu ka chhuikir ta a.
Ka ú nen MA kal chhunzawm turin Aizawl lamah chuan kan chhuk thla leh ta a, in luah tur zawnging kan buai nghal a, Tuikual veng mawngah chuan luah tur kan hmu hlauh maia, rilru hah zualpui chu a kiam duak mai.
Kan inluah chu a ṭawng a ṭawngin chhawnghnih lai a la ni ve khanglanga, kan han enchianga, inhnuai zawk ban phei chu lei si lova inkhai a awm nual mai.
A chhunglam lah chu han hawi vel ila a ûngkhuk ti ila ka sawifiah ber mai awm e. An luah lohna a rei tawh a ni tih a hriat hle a, a chhunga bungraw awmte chu a bál hlawm hle a, ṭhutthleng chunga puan inphahte lah chu han ṭhut ila a khu chum chum thei. Rei ṭhut ngam pawh a ni lo, kan thak sep sep a ni mai. BA kan kal laia kan inluahte kha ka ngai rum rum mai.
Kan ceiling-ah chuan ruah tui far dawhnan burchhia hi a inkhai thluah maia, bulb chu nise kan inchhung chu a êng ngawtin ka ring. Kan luh tirh chuan burchhe inkhai a tamzawk chu kan han lathla leh riha, fur alo thlen hun chuan kan khai leh vek a ngaih hmel khawp mai.
Kan inhnuaiah chuan nupa tuakkhat leh pitar pakhat an chenga, pathum lek e tilochuan an thawm a ring thei khawp mai. Bathroom kan inṭawma, tui a ṭha vak lo nen, nuam lo tak a ni. Tuizém te tak té kan neih ve chuan tui a dawng hnem lo hle a, tui ren a ngai nen, tui a haw khat si. Ka ú hi tui ren thiam map lo, mut dawn leh thawh veleha inbual reng a ni a, tui ren nen a va han buaithlak em.
Bàzar a hnaih vak loh avangin hmeh a chhe thei hle a, 'Rumpum' kawr leh àrtui hawng hi kan bawlhlawh bawmah chuan a tam ber a, Thlatira chhungten pawisa min rawn thawn a nih loh chuan sà hi chu kan hmeh ngai meuh lo. Chutah pawh kg chanve bak kan lei ngam lo.
Kan inluah chu tereuhté e tilo chuan inléng hi kan han nghah thei khawp a, Class mate-te mai nilo, kan khawlama kan ṭhen leh rualte hi an rawn leng zantin ṭhin a,Thingpui no kan indaih loh changin plate kan hmang mai ṭhina, no pangai chang pha chu kan inchhuang ve thei hle. Thinpui hi zankhatah vawithum tal an inloh chuan an haw mai ngai lo a, kan Gas dinhmun hi an ngaihtuah phak lo. An haw reh diak hnua hmun hnawk lutuk mai ṭhinte hi mangan thlak tak a ni ṭhin..Zing ka han tho a, meizial bung, panhnah leh chinai lo let rum mai ṭhinte hi, zingtho mood fuh loh chang phei chuan ka kham ém em mai ṭhin.
Kan luhká bulah chuan Calendar pakhat hi a intar ve a, chu lah chu 2013 daih ami a ni leh nghala, 2019 calendar nena en remthiam a har ṭhin hle a, mahse tunah chuan phone-ah calendar a en theih tawh avangin calendar 2013 chu engah mah kan tihran lo. Kan rilru tihah ém em ṭhintu leh kan unau inkarah kan titi titam bertu chu, 'Engtikah nge kan Gas hi a zawh ang tih leh buhfai hi an rawn thawn dawn tawh ang em le?' Tih hi a ni fo va, thla tawp dawnah chuan pawisa indaih loh nen, haw leh daih hi a châkawm ṭhin.
Chu inah chuan zantin mai hian Sazu leh chhimtir hi an rawn lut ṭhina, a tirah chuan nuam ka ti. Bazara thirthang ka lei chu ka kam ṭhina, awktur hi an awm ve reng zela, thangkam nuam ka tihzawng tak a lo nibawk nen; mahse thang anlo hriaa, an awh ṭhat duhtawh loh chinah chuan an ninawm duh ngei mai, chhimtir rimchhe lutuk leh sazu buhfai heh lutuk chu sawi loh, an la ekkhum zui phei hi chu...retheih an tizual. Kan khawlama kan in chu engtehlua ni lo mah se, tuna kan inluah nena tehkhin chuan la ziaawm tak a ni ve..
Class kan han zawma, hunte a han kal deuh hnu chuan kan inluah sû dul dul thei chu ngaiah kan nei chho ve ta tial tiala, pangai takin kan han luahlum ve ta chu a nia..
Vawikhat chu inrinni-ah hian, ka ṭhianpa micky-a'n slap chhunga inhlawhna tur a hmufuh hlauh maia, kan thawk dun ta a, kawngpui bul mai a nih avangin, kawngkam maiah chuan Cement kan chawk turh turh a, kawnga nula pakhat rawn kal chuan ka mit a la hle mai a, University-a kan classmate a an em avangin ka lo melh rei hman êm em mai leh nghal. Labour Cement chawklai e ti lo chuan mi rawn pan hnai a, mi rawn bia a nih chu mawle. Mak tak maiin ka hming a lo hre tawh a, ka hmingin min rawn ko a.
Ka awih lo lutuk chu ka nui ta ringawt a, Class khata awm na na ná chu ka tirilru ta ringawt a, hnathawk lai kan nih avangin min kalsan leh ta mai a. Ṭhianpa Mickya'n a lo hmu ve chu niin, "A chhiat loh kha. Try chi," a rawn ti leh nghal mai pek a. Ani hi zawng a tuipui a, nula chhaih vel hi a nuam tih zawng tak a ni bawk.
In ka haw a, zán alo thlen thlengin kha nu hmel khan ka rilru a luah ta reng a, a hming tal pawh kha lo zawh ve awm hi a ni a, ka ngai nghal tawp, ti ila, a zúnah ka uai nghal a ni deuh tawp. Mi duh hi ka sam ve hrim hrim, an chhiat loh deuh phei chuan; mahse ka duhna chu a dahlau ṭhin hle thung. Ngaihzawng ang a, suangtuah nghal mai hi mi ka bêm hlawhtlin hnuaah pawh ka thei mai ngai lo bawk.
Monday-ah class kan han ṭan leh a, amah ngei kha hmuh leh ka tuma, a hmel pawh ka hre chiang mumal tawh lo nachungin min rawn be hmasa leh te a nih loh phei chuan ka hriat ka ring miah lo.
Class chhunga ka han zawn ngial pawhin ani hmel awmang ka hre thei miah lo va, a kal lo a ni ang nge, ka ti rilru ta a. Mahse break a lo ni a, class aṭanga ka chhuak chiah chu, pawnah chuan hmeichhe pahnih hi an lo ding a, kal pelh mai ka han tuma, an chhiat loh dun em avangin ka han melh chiang deuh a, ka melh tih a hriatin a chhe lo zawk chuan, min lo bia a, "Stephen, nimin ah khan i chau em?"
Ka han melh chiang leh deuh a, "Nang elaw...hehe..min lo be lo lang chuan ka hre miah lo ang che..." ka han ti ringawt a.
Canteen lamah chuan ka kal ho va, a chhiat loh teh reng nen eng vang teh lek nge ni, mi a nel nghal ém em mai hi mak ka ti. En reng reng pawha mi hausa fa tih hriat reng reng, mak ka ti a ni.
Kal pah chuan, "Stephen,(a nui sen sen a)Tluangpuii ka nia. Mak i ti em? Nang chuan min hre lo a ang khawp mai, kei chuan College kan kal lai aṭangin ka hre tawh che a."
"Ava mak ve, engtin nge min lo hriat a?"
"Aww...Literature Club-ah ka inhmang ve lawm. Johnson College Literature Club hruaitu i nih kha, in magazine te kan lo hmu ṭhin a, i thu ziahte pawh ka lo chhiar ve ṭhin alawm. In magazine kha chu college dang magazine aiin chhiar a nuam ṭhin a."
"Anih tak chu a, a lawmawm hle mai. Nia, kan Editor-te an ṭha a, kan chhuah ṭha ve thei phian a."
"Literature hi ka tui a, thu ziak mite pawh hi ka ngaisang asin."
"A, kei chu ka ti ve mai mai lawm, midang ziak tur chu awm se kei ni ang mai mai chuan kan ziak lo ang."
"I thiam lutuk, a ril thei sia, ka ngaisang lutuk che lawm. Kinah ka thawnthu ziah min chhiarsak ve la ka lo tia."
"Eee, eng lam pang nge a, chhiar a va chakawm ve."
"Love story a nia, heti'ang lam hi ka nuam tihzawng tak a nia."
"Nia, min la chhiartir ve dawn nia."
Canteen kan thlen chuan ṭhian dangte bulah ka kalsan ta rih a. Mak ka tihna pawh tlem chuan a kiam ta deuh; mahse engtin nge min lo hriat chat theih bik le?
Class-ah te hian a hmelhriat ṭha tak ang mai hian min bia a. Kawm a nuam hle a, a duhzawng sawi fuh tawh laklawh chuan ṭawng hi ka chang ve mang tawh ngai lo. Nitinin kan inhmu a, kan titi duhzawng a inan theih em avangin, ṭhian inkawmngeih tak kan ni chho zel a, ka university life pawh ani vang liau liau hian a nuam hle a ni.
Nikhat chu class-ah hian Tluangpuii chu a rawn lut a, a ṭhiante chuan an lo chibai nghal sap sap a, a Bag-a Sweet pack lian tak mai chu a la chhuak a, a theh darh kual ta vak vak mai a, a naupan chhiat zia kha ka la theihnghilh thei lo. A Birth Day anih ka ring nghal mai a, min hrilh ve loh avang erawh chuan a sweet sem pawh chu laksak ve loin ka chhuahsan ta daih a. Class aṭanga ka chhuak lai a hmuh chuan, min rawn um zui nghal a. Canteen-ah chuan min rawn umpha a, ka bul setah chuan a rawn ṭhu ta a.
Mi melh zeuh pah hian, "Ka birthday ni hian thil pek che ka duh a. Chuan i birthday ah thil mi present ve ang."
Kei chuan, "Aw ni e, i thu thu lawm, eng nge i b day a nih te chuan min hrilh ve tur che alawm. Choccolate ka pe tur che nia."
"Nia, hrilh che chu ka duh lawm;mahse ka zak deuh va."
"E, a nih tak chu. Nih leh khawi ka gift dawn chu, englam nge ni a, haha...mi'n an birthday ni a, gift min pek vawihkhat ka hriatna a ni."
"Englo a nia, a hmaa ka sawi, ka thawnthu ziah kha a nia, kha..." A bag aṭang chuan a rawn phawrh chhuak a. Chiar nghal ka han tum chu, "Lawk tunah chuan la chhiar suh, inah i chhiar dawn nia, tunah chuan a zahthlak."
"I thuvek alawm." Ka chhiar chak tawh hle mai a, kei ngei pawhin love story te chu chhiar nuam ka ti si a.
Paper tam takah , a rawn chilh khawm a, khawla chhut print a ni a, keinin kut ziaka kan dah ṭhat nen chuan a inang lo deuh. Tluangpuii chu mi awmthei tak chhungkua aṭanga lo chawr chhuak a ni a, a pa hi college-ah lecturer a ni a, a nu hi, high school zirtirtu a ni bawk. Aizawla in leh lo nei an ni a, kei ang thingtlang aṭanga lo kal ve mai mai, nel taka min kawm thei hi a ngaihsan awm ka ti a, a lakah pawh inthlahrunna nei hauh lovin ka duh duh ka sawi thei a ni. A hmel a chhiat loh em avangin hmel hriat a ngah ém em a, star-tu pawh tam tak an awm tih ka hria a, ngaihzawng pawh alo nei ru reng mai thei; mahse, kan inkawm changin ngaihzawng lam chu vawikhat pawh kan la sawi ri lo thung.
Zán lama tluangpuii thawnthu chiar tur chuan ka inbuatsaih ta a. A chhah ṭha hle a, a bul ṭanna a rei tawh a , mahse a ziah zawh lawk theih loh thute pawh chu min hrilh nghe nghe a. A thawnthu bû hming lah chu, a dangdai ém em mai a, a changtute pawh mihring an ni lo. A changtupa atan Zawhté a hmang a, a changtunu atan uité, a dangdai ve hrim hrim. Zawhtê leh uté chu an inneih thei lo hrim hrim a, mahse an inhmangaih tlat bawk si. Thawnthu lungchhiat thlak tak zawng a va han nichiang emm! Ka chhiar zan chuan ka nui kur kur reng a, amah phei chuan hria se min haw ngawtin ka ring. A lehlam zawng tak chuan a fakawm ru riauva, a spelling a uluk a, a grammar lah a felfai si a, chhiar nuam tak chu a ni ve tho mai.
Chúmi zán chuan mi rawn call-a, a tukah class-a a thawnthu ziaha comment eng emaw tal nei turin min duh a, Eng tak sawi ang i maww? A ngaihnawm ém em lo va, a common lo em a, chu chu ka fakna pakhat a ni a, Mizoṭawng ziak dan dik tak a ngaihsan zia leh a uluk zia chu ka fakna a ni leh ang a, chu bak chu sawi tur ka hre lo thung.
A tukah chuan Class-ah kan ṭhu dun a, min lo zawt nghal a. A thawnthu chu ka la chuak a, ṭha ka tih lai leh a ziah ulukna te, a idea te chu ka han fak ve luam a, a duh ang tak chhanna ka pe lo nge ni, ka lam a rawn hawi a, "Englo, nangmah hian thawnthu chhiar tur i nei lo maw, chhiar i phal ang em.?"
Ka ngawi vang vang a, ka mitah tak chuan min melh kar a, ti hian ka ngaihtuah ta a. 'Ka ziak mek alawm,' tiin ka chang ang a, chuan ani nena kan thawnthu hi ka ziak zel ang a, ka chhiar sak ṭhin ang a , a nuam ngawtin ka ring. Ka han melh zeuh a, "Umm...love story pakhat chu ka ziak alawm, a la tawp lo va, hmanni aṭang deuh khan ka ziak ṭan chiah a."
"Yess...ka lo chhiar ve, i phal chuan."
"A la tlem lutuk a, ka hman changin ka ziak zeuh zeuh ringawt zel a, i duh chuan nitin episode khat zelin ka chhiar sak ang che."
"Ka va'n lawm. A nih chuan, naktuk aṭangin aw?"
"Aw le, naktukah ka lo keng ang. Ka chhiarsak dawn che nia."
Chumi zan chuan ani ka hmuh ni aṭanga, ka thinlunga lo awm zawng zawngte chu ka ziak chawp chuk chuk a, a ngaihnawm thei tur ang berin a changtupa chu Siamtea a ni a, a chantunu chu Kimkimi a ni thung. A tukah chuan, class break laiin, canteen-ah chuan, ka chhiarsak ta a, a ngaithla tui lutuk chuan a thil ei lai pawh a hre chang lo va, ka ziah chin ka chhiar zawh chiah chuan, a ui lutuk chu ziak tlem min ti ta ém em mai a, a chetziate chu ka thlir reng a, a lawmawm ka ti a, a ui lutuk hmel lah chu kei atan chuan hmuh nuam tak a va han ni em.
Chutiang chuan zantin thawnthu chu ka ziak zel a, break apiangin ka chhiarsak ziah a, a thui deuh chang chuan nuam a ti ṭhin ém em a, a tawi deuh chang chuan a lawm lo der vel a. Test leh exam kan neih chang chuan tawite bak ka ziak hman ngai si lo va, mi chu a hre thiam ve thei lutuk.
Class kan kal ṭhat vak loh ni hian vawikhat chu kan ṭhian hova class room kawta kan awm laiin tluangpuiite ṭhian ho chuan kan ina rawn len an tum thu min rawn hrilh thut mai a. Kan in ka ngaihtuah a, anni ho rawn lenna chi ziazang a ni si lo. Ṭhianpa Micky-a te inah ka luhpui mai dawn nge, engtin nge ni ang? Chuanlam han siam mai tur lah chu ka hre si lo. Tluangpuii chuan ka banah vuanin a Scooty-a chuangtur chuan min hruai phei ta a, rilru a buai duh hle mai.
"Tluangi, i ṭhiante hi an lo kal ve dawn em ni? Nangmah chauh lo leng mai la."
Ani chuan, "Nia, ka hria lawm. In in a tê lutuk a, kan len i ring lo a nih kha. Anni chu an lo kal ve dawn lo."
Ava han mak leh zel em! Kan in a tet thu leh a ṭhat vak loh thute chu engtin nge maw a lo hriat leh tak ni? "Engtin nge i hriat a, Tluangi, a van mak. Tunge hrilh che a."
"Hmanniah, kan inchunga ka awm laiin Parvá-in min hrih alawm." Scooty lam hawiin a nuih seih a.
"Thil awihawm deuh hi chu a awm mawle. I mak ka ti."
Ani chuan, Scooty-a chuang turin min hrilh a, kan veng lam pan chuan kan tlan chho ta a. In kan thlen chuan zing lama ka chhuah dawna ka mutbu ka lo thleh ṭhat hlauh avangin fel tih ka hlawh ve a, kan in té lutuk leh hlui lutuk tawh chu a han en kual vel a, a han kal kual vel pah chuan in chu a sû deuh dul dul mai bawk a. Mark a va han chhe em. A zun a chhuak a, bathroom luh a tum, kan inhnuai pitar a lo awm, a va han zia lo em! Tui in a duh, tui thianghlim ka lo dah ṭhat a zo tawh si. Fridge kan nei bawk si lo. Dawr ami a han lei ringawt. Mark a va han chhe leh zel em! Khu ral thei ilang chuan khuk ral chem chem mai kha ka duh hle a ni.
Dawr aṭanga a lo kir hnu chuan, kan hmunphiah chu a la a, khum hnuai leh ṭhutthleng hnuai chu a han hawl vel a, Meizial bung leh a vap hlir mai a han hawl chhuak nghal pang a. Nizana Mickya'n, a zuk zawh loh Cegaret bung lah chu a la sei ṭha si. Tluangpuii hian ka mei zu lai a hmuh ka phal ngai lo a, mei ka zu tih reng a la hre lo.
Meizial bung chu a rawn la chhuak a, ka hmaah chuan a rawn khai chho va, "Hei...tu zuk nge le?" lung nih loh hmel takin mi a han melh kal mai a.
Ka melh ngam reng reng lo, ka nui suk a.
"Fiamthu ka thawh lo a nia. Nuih zatna chi pawh a ni lo."
"Ka ṭhianpa zuk a nia, nizan ami...a zu zo peih lo a nih kha."
"Ka awih miah lo. I zu ve chiang mai, thuruk neih ka duh lo, nang pawhin nei suh ang che."
Thip ru tak mai hian mi a han melh vel a. A duhawm dan kha tunah hian ka sawi fiah thiam lo. Chutia min tih takah chuan, "Aw nia...Tluangte, ka zu ve ṭhin alawm; mahse kha kha chu ka zukna a ni lo a nia, ka ti tak tak. Nghei tura min duh chuan ka nghei mai ang."
"Aw...vawiin aṭangin i nghei nghal tur a ni. I nghei loh vaih chuan i chak lo vang."
"Yess, miss...oh Boss. Ka nghei nghal ang." Ka han nuih tlawn vel a.
Ani chuan mi pawh a melh ṭha duh tawh lo va, a lungawi lo der vel hmel kha hmuh leh ka va han chak em. Khami ni aṭang khan ani chu ka Boss a ni ṭan a. Class-ah pawh Boss tih hlira ka koh a ngai a; mahse a nuam ka ti a ni. Ka boss chu a hmel ṭha êm em a, a pian a nalh ém em a, a fel ém em bawk. Ka bialnu a la ni tlat lo erawh hi chuan ka lawm a ti kim thei lo.
Ka thawnthu ziah a, a changtunu leh a changtupa pawh an la inngaizawng lo va, engtin nge ka inngaihzawntir ang le? Inngaizawng ang maiin an khawsa a, an inkawm a, an thuruk an inhrilh a, nula leh tlangval dang lakah thikna thinlung an pû a, mahse ṭhian angin an la inen reng tho.
Engtikah nge ka duh em em thu hi ka hrilh ang le? Tlaikhat chu a hnena ka thawnthu ziah tur ngaihtuaha ka ṭhut reng lai hian kawngkhar chu tuemaw hian a rawn kik a, ka va hawng chu, Tluangpuii a lo ni reng mai, a nui sen sen a. Ka ban a vuan a, min kai chhuak ta ringawt mai a. A Scooty nen chuan New capital lam chu kan pan ta a, eng tak chu min tihpui leh dawn ni maw? Hmun thengthaw nuam tak maiah hian kan ding a, ni a tlak dawn tawh avangin a sen no suk mai a, thlifim a thaw heuh heuh bawk nen, a va han nuam em?
Ni lam hawi chuan a va ding a, a ban a phar a, a sam sei mawi tawk tak mai chu thli chuan a chem leng seng seng a, nuam tih hmel tak hian a han chhing siar siar a, a vahan duhawm em. Kan dinna thlang deuhah chuan ṭhutthleng dawh hi a awm a, chutah chuan kan ṭhudun ta a.
Kei chuan, "Eng nge ni, Boss. Hetah hian kan kal a, a nuam chu ka ti lutuk; mahse a hman thlak e, ka ti..."
"Stephen (ka lam chu a rawn hawi a; inla boss tak mai hian a han dak deuh vah a....) Min kiss rawh."
Teh thut chuan...ka va han hre thiam loin mak ka va han ti em; mahse kan awmdun dan ka ngaihtuahin ka duh a, min duh bawk tih ka hre chiang hle thung si. Kei chuan mak ti hmel tak mai hian, ka melh kawk a, "Engtin maw, Laltluangpui? I timak e a, tumah ka kiss ngai lo, ka thiam bawk hek lo."
"I Boss-in min fawp rawh a tih chuan fawp mai rawh." A ti tak hmel ṭan riau mai a.
Zahzelah zawite hian ka va chuk keuh a.
"A va ho ve, " tih pah chuan chiang fahran hian min rawn fawp ta chawih mai a.
Ruih a nei nge, mi tû emawin an lo bawl zawk ni ang le? Ruih nei awm hmelin a lang si lo; chubakah ani ang mifel lutuk, zû chu sawi loh, bear takngial pawh a la inchhin lo a ni si a. Min fawh zawh chuan hnunglam a hawi ta nghal daih a. A zak leh hnuhnawh a ni ber mai.
Kei chuan, "Tunge bawl che a, i ṭhianten em ni?" nui kur kur pah hian ka han sawi a.
Hnuai lam melh chung hian zawimuangin a rawn inher a, "Min duh ve lo em ni? Ka duh lutuk che a..."
A mitmeng chu ka en reng a. A inthlahrung hle a ni tih a hriat theih. A ruk tak chuan ka nuih a za ém em a; chutih rual chuan ka hlimnain a tawng a sang hle bawk. Mahse ka lan chhuahtir duh miah lo a.
"Kan inngaizawng thei ang em..?"
A rawn ti leh a..
Ka la ngawi ta renga..
"Ṭhian mai atan ka duh lo che..ka bialpa ni la ka duh a ni..Min duhve loh chuan chiang deuhin sawi ang che..chuan khati'ang thil ka ti kha pawi ka tilutuk.."
A khabe ah chuan zawimuang hian ka zuk dawma..ka fawp veleh ta ringawta..
Rei tawk ka fawh hnu chuan..
"BOSS ka duh che a ni mai lo..ka hmangaih che a ni.."
Ka ti ta a..
Chutia ka chhan hnu a a hlim hmel tluka ṭha kha , tunhnu hian tuhmelah ma
ka la hmu leh lo..
Ka koki-ah chuan a lu a rawn nghata, nitlatur lam kan hawia, ka thawnthu ziah a a changtu nu leh a changtupa ngei mai kha..tunah chuan an lo inngaizawng tak tak ta..
Nitlatur senriai mai chuan a mit chu a detle ser ser a.. a vun no chek mai chu a det engset mai bawka, a vahan duhawm chungchuang em....
Chutia kan inngaihzawn hnu chuan..ka thawnthuziah pawh tlemin ka han herdanglama..a changtunu leh a changtupa an in ngaizawng tawh a, an hmahun awmdan tur ngaihtuahin an zirlaiah ṭha takin an rilru an pe a..an inhmangaihna a zual zela..inkawp awm tak an lo inkawp a ni ber mai..
Ka inngaihzawn hnu chuan ka thawnthu ziah chu Canteen-ah kan chhiar tawh ngai lova..Class ban veleh, kan inah ka chhiarsak ṭhina..a changtunu inlak boss zia leh boss intisi a, engmah a nih si loh zia thu ka ziah lai ka han chhiar thlen chuan a lungawi lo lutuk chu min melh thip em em mai a...A duh loh thu a sawizawh a, "boss chuan a kid hnenah thu a pe anga, a thawnthu ah pawh boss chu thil tithei tak a ni tur a ni"..tih a edit turin min han vau leh a..A thawnthu ah pawh thil tithei ber nih a duh tlata a ni..
Tlaikhat chu a changtunu in a changtupa chu ka fawh tir a..A boss thu a awih ṭhat em avangin..ka han chhiar zawh chiah chuan
A lo sawisel nghala..
"Aa..a hmeichhia zawkin a kiss hmasa thei lo..kha chu cut rawh." A rawn tichhuak phawng mai..
"A thawnthu a a inziah dan a lawm..i kiss a ngai tlat.."
"Ummhh a theih loh..aih..a dik lo nih chu..ka kiss hmasa dawn lo che.."
"I kiss a ngai..hei..meizial pawh a bialnu vangin a nghei tawh a nia..i kiss ngei a ngai a tenawm lo.."
"Aih..ka ten lam a nilo..hmeichhiain an tihmasa ngai lo...kha min kiss hmasa rawh..
Hei ka meimitchhing a nia..kha..min kiss rawh.."
A mit chu a ching leh ta tak tak a, fawh rem tak mai hian a hmui chu a rawn dah hnaia..ka kiss ngam bik teuh lo..mahse a vahan duh awm em..fawh vawng vawng ka chak a..mahse..ka zak si..
"Meng teh..khawi..i men laiin ka lo kiss ang che.." a rawn meng,
"Khawimaw.".tih pah chuan min kuah beta, min hmangaih thu a sawi a..kei pawhin nghet zawkin ka han kuah ; a hnungzangah chuan ka kut ka dah a, duat tak hian ka chul hliau hliaua , ka hmangaih thu chu ka hrilh ve ta bawk a...
Ka u in Tluangpuii nena kan chungchang a hriat hnu chuan ; mi a awtrû em em a, chaw ei lai leh mut paha kan titi chang pawhin kan sawi tam ber a ni ṭhin..Nia, tluagtei chu a chhelo em em a, a duhawmna chu tehchhuah theih chi rual a ni lo.. ka phu lo em em nachung hian vannei ka inti hle thung si..
Kum khat chung chuan, English department pawh kan inpawh tlang tawh hle hlawm a, khawi khawiah emaw..tour- kan neih ṭhinna te chu a nuam thei hle mai bawk, kei ang thingtlang tlangval tan chuan thilthar hlir an ni a, tawn hriat leh ka la hmuh ngailoh te ka tawngin ka hmu a, a hlawk tlak hle ṭhin..Tluangtei nen pawh kan inhmangaihna a zual zela..kan thawnthu pawh a phek a tam tawh khawp mai.
Tlaikhat chu ruah a sur nasa em em a..Tluangtei , kei leh ka û chu inah kan awm a, kan ceiling-a burchhe inkhai pakhat chu a rawn tla bur maia, tui a lo tam tawh lutuk a niang, a khaina a peh chu lo niin, chhuatlaiah chuan a let ta reng ringawt maia, a huhhnup mai bawk si..Kan pathum chuan kan inmelha, kan innuih tut tut hlawm a, a va han fuh lo ṭhin em...Chu chauh a ni lo inhnuai lamah tui a farthla ta tluk tluk mai...
Rangfaharanin inhnuaipa nihliap nen a rawn tlanchho, a rawn sa nasà mai..An khumah a lo zuk far chu niin..A rawn lut kan lo melh kar ringawt maia..
"Ngati nge ni..kan khum khu bualfai kher a ngai lo a nia.."
A rawn ti ta char mai..hmanhmawh phelengin chhuat chu ka han nawt sawk sawk a..
Tluangtei chuan
"Ka pu kan bur dawh a rawn tlathla a, tui a lo tam sia..a baw ta a nih kha..kan tihpalh lutukk.." tihpah hian a lo nui kur kur a, In hnuaipa thin a sa zual sauh..
"Fimkhurna hi inthlachham lutuka..zanah lah mut hun tawha, in ri luih luih zela..In nunzia hi a mawi lo lutuk.."
Ka boss a lungawi lo..
"E ka pu..tihluih pawh a ni lo, ruahsur vang liau liau a ni leh nghal..i tihdan hi kan duh bik lo.."
In hnuaipa.
"In neitute bulah, hnawtchhuak tur cheuin ka lo sawi ang.." tih leh chhuah a rual a..
Ka boss chuan..
"Kan hlau lo..i duh leh han sawi rawh..he in lo pawh hi luah tur dang a tam.." ring lenglawng hian a han tizui ve ta hmak mai..
Ka u nen chuan ka nui char char a, ka mittui a tla thei hial..
"Boss i pa lutuk.." ka tih chuan..
A nui sen sen a..mi a vahan tihlim em..khami tlai zet kha chu..a hmel enin leh a zia-ah, khati ang a rawn tingam kha..mak ka la ti..
Mahse..thil pawi ka ti dawn nge lawmawm lam zawk pawh ka hre lo..thlathar kan chuankai chuan, kan inneitute hnen aṭangin thu kan dawng tlat mai..Chhuak turin min duh a,kan chhuah mai a ngai dawn a. Mahse Tluangtein an vengah inluah tur a lo hmu hlauh mai a...tuna kan inluah ai hian a to deuh na chu, a ṭha fe zawka, a changkang zawk bawk...a lawmawm lamah ka ngai..
Mahse..tluangpuiin a mah vanga min hnawhchhuak tih a hriattin nuamlo a tive angrenga, mahse..kan hma a ngaia, min chhan ve ah a inngai miau a...a inchhir hauh lo thung...
In thar luah tura kan indah luh zawh hnu chuan a ngaite bawkin, zantin mai hian kan intharah chuan kan ri leh ta luih luih maia, tunah phei chuan tluangpuii ṭhianten min rawn belh ve tawh bawk nen..kan inhlui ai khan a lun zawk a, tluangpuiin a guiter a rawn dah tawp bawk a, zantin kan zaihova, a nuam thei ngawt mai..
Tluangpuii chu zai ngaina mi tak a ni a, ka hlaphuah te ka saksak ṭhina, a ni pawhin a zai rem khawplek chu guiter pawh a thiam ve a, saphla phei chu sathiam tak a ni..
Kan inthar chu a nuam em em a, lo chhawr ṭangkai tawk lah bo lo..ṭhianpa Micky a, leh ṭhianpa Remate tan pawh bialnu an neih ve ṭanna in a ni ve tlat..Tluangpuii ṭhiante zinga mi an lo chhai tlu ve thei a, mi tihpui nuamti tak ka boss tluangpuii a awm miauva..
Nuam hi an han tithei khawpah..
Ka Boss nen a kan thawnthu chu ka la ziak zela, tlaitin chhiar dun thei tawh lo mahila..kan inhnaih tawh avangin, tamtham deuhhlek ka ziah hnuah chauh ka chhiar sak ta ṭhin a..Kan thawnthu a nih avangin, ani chuan ngaihnawm a tibang lova, kan inhluia kan inhnuaipa a tihdan vel ka ziah chu, min chhiarnawn tir sek zela.. Huaisen hi a intibang thei thlawt lo...
Kan MA kumkhatna a zawh chuan Krismass a lo thlenga, in ngaitak chungin kan inthlah a, rinawmna nena kan inhmangaih avangin a ni lakah chuan ka rinna ka nghat a, rinhlelhna hian kan karah awmzia a nei lo..min hmangaih tih ka hria a, kan khaw lamah pawh kan thawnthu chu ka ziahzawm zela..zantin kan inbia a, kan inning ngai lo, a mak ka tizawk..
A chang chuan ka phullo lutuk hi hrehawm ka ti ṭhina, nuam lo ka ti leh ṭhin, mahse min hmangaih a ni tih ka chiang si..nupui atan pawh neih tum ngawt ila..thingtlang tlangval ve mai chu a chhungten min duh ka ring ngai lova, ngaihtuah pawh ka ngaihtuah ngam lo.. Ani chuan min neih chu a inpeih reng anga, min hnawl hauh lo ang tih ka hriaa, mahse chhungkua chawmzo khawpa, sum leh pai thawhchhuahna ṭha tak ka neih phawt angai tih erawh a hai lo ang..chuti ang tur chuan taima taka ka thawh a ngai a, lehkha zir kawngah pawh ka ṭan a ngai a ni tih ka hria..
Engtik ni ah emaw chuan ka nupui a la ni ve ngei anga, inkhatah kan awmdun anga, kan khuaa ka hawsan a ngai tawh lo anga, fate neiin khum khatah kan mudun tawh bawk ang..ka va han chak tawh tak emm...
Kumthar a lo nih chuan Aizawl lamah kan chhuk thla leh ta a, kan thlen tlaiah chuan Tluangpuii pawh an rawn leng nghala, Phone-a min hrilh miah loh..a sam tihkir chu a rawn chhuang nasa mai a, hria awmang pawhin ka lang duh miah lova, a inhmehzia chu ka hmu reng a, ka ngaihtuah chian erawh chuan ka thik lek lek... tikir kher lo sela ṭha tur hi a nia..ka lo tirilru neuh neuh a..Chumi tlai chuan inlak zei chhuahin ka û chuan room-ah kan pahnih chauhin min awm tir a..ka lo ngai tawh viau a niang..ka kuah vawng vawnga..mahse..ani buaina ber chu a sam tihkir fakna a la dawng miah lo a..ka fak duh ṭhak lo a ni..
Ani chuan lungawilo hmel tak naupang chhia tak chung hian..
"Ka sam hi ka inhmeh lo mi..??"
A rawn tichhuak hlawl maia..
"Hmeh mah mah a ni.. ka duh miah lo..startu i neihnem sia..min kalsanna hmanrua mai chauh hi a lo ni ang tih ka hlau.."
Chutia ka sawi zawh chuan inthlahrung tak hian ..
"Aa..a nu-in ka inhmeh zawng tak a nih a ringa, min tihkir sak a nih hi..
naktukah ka lo pawtmam leh daih ang.." a ti ta rinngawt a..
Ka khumah chuan kan ṭhu duna..kan khuaa ka awm chhunga, ka thawnthu ziahte chu ka chhiar sak leh ta a..
A ngaihnawm tih a la bang thei lo..ka kokiah chuan a lu chu a nghat a..a ching diar diar renga..
Khami tlai kha ka kokia a lu a nghah hnuhnun berna a ni ta a ni..
Pangai takin class kan la a, Department zinchhuah ni a lo thlen dawn hnaih chuan, tlaikhat chu Tluangpuii chu a rawn kal a, ka thawnthu ziah te chu kan chilh khawm a, a lo tamtham tawh em em mai leh nghala, kan bag-ah chuan kan ak a, New Capital lamah chuan kan kaldun leh ta a..
Ani chuan
"He hmun hi, kan inhmangaihna bulṭanna a ni a, vawiin hian kan bulṭanna hmunah hian kan thawnthu hi a vaiin chhiar ang hmiang.."
Tiin phur hmel tak hian a rawn sawi a..
Tichuan kan chiar ta a..a bulṭanna aṭanga a ka ziah tawpchin thleng chuan kan lo nundan leh kan inkar thawnthu a nih avangin a ngaihnawm dan a dangdai hle a, kan va han hlimpui tak em...
Ka chhiarzawh zawh chuan, kan inhmuh ṭantirha kan awmdante kha kan sawichhuak a..fiamthu nen hlimtakin kan inkawm a..
Hlimhmel taka a nuih sen sen lai chuan ka kuah hnai a.. A inrinloh lai chuhin Duhthaw takin ka fawp ta vawng vawng a..khami tlaia ka fawh kha kan inngaihzawn tirh ata ka fawh rei ber ṭum a ni...
A hmui no leh lum ther ther mai ka fawh hnuhnun berna tur a ni tih lo hria ila chuan kha ai rei kha ka lo fawp tur hi a ni a...
Khuaruat hi ka tuarthiam hlawl lo..ka natna hi sawifiah thiam tehreng pawh ni ila..eng damdawi mahin min enkawl dam theiin ka ring lo..tu in nge hmangaih ber chán avanga thinlungna chu hnemthei tehlul ang ni..?? Thihna vang lehnghal..chu mai a ni lo..thihdan pangai a ni si lo..Ka vahan ngai tak em!!! Thihna chauh lo chuan min ṭhen suh se..kan ti kha a nia..Min ṭhen theitu awmchhun chu thihna ngei hi a lo nisi a..Tawrhthiam a va han har tehlul em..ka hmangaih..i mamawh hunah ka awm si lo..i mangang aûthawm kha tuman an hre lovem ni..ṭanpuitu ngai em ema, i thinlung a rum tur hi ka ngaihtuaha, ka vahan lainat tak che em..
'Kum khat liamta a, bus driver Jail-a an khung tak chu, engtin nge nataka ka siam zawha, ka tihhlum theih ang' tiin zantin mai hian ka muthmunah ruahmanna ka siam fo a, ka rilrua lian ber a ni.. ka hmangaih nun a la a, ka nun hi a tichhia a, nataka a tawrh hnu a, thihchák ngawih ngawiha a nun hman tir chu ka duhthusam a ni...
Chu thlanmualah chuan boruak a vawt tawh hle maia, vawt hle e tilo chuan ka sa up up a, ka mittui a far leh zung zung ṭhin..Zán thim hian ka tan natna min thlena, hrehawm ti takin ka hmangaih tluangpuii an zalhna hmunah chuan min hruai thleng fo a ni hi..
Ka ṭhianten min hnem ngaihna an hre lova..keimah chauhva awm ka duh avangin ka inthiarfihlim zela..Zirna lam reng reng ka ngaihsak thei lo.."Bus driver ka hmuh hma chuan Aizawl ka chhuahsan lo ang" tiin thu ka lo tiam tawh a.."ka lo nghak char char dawn a ni..." tiin..
Awm ngaihna ka hre thei thlawt lo..ka hmangaih..min ngaidam ang che..heti anga awm tur hian min duh lo ang tih ka hria lawm..mahse i tawrhna nat zia ka han ngaihtuah hian ka thinlung a dam thei tlat lo a ni..hma ka sial vang nge ni ta ang..mite chuan 'mi hmasial tak a ni' tiin min lo sawi pawh ni se..ka thiltum hi ka basan lovang..nang chauh i nà lova..kei pawh ka nà a sin..Khawngaihin entin nge ka awm anga, engtin nge ka nun zel theih ang nii...??? A va han nà teh reng em...
Thla engruih mai chu chhum chuan an hliah zo ta a..Thli chu a rawn thaw ri leh seng seng ṭhin a..ka hmangaih-i nena kan nunhlui chu ka chhuikir leh ta a..
Department zinchhuah dawnah chuan, khawsik lunàin min tlakbuak ta tlat maia, zing karah chuan ka tho chhuak peih ta lova..class-mate te chuan innghahkhawmna tur hmun chu an thleng tawh hlawma..Tluangpuii pawh a phur hle na chu ka telloa kal a hreh ve hle a..mahse..kal tura ka tihluih avangin a kal ta a..Nithum cham tura kal an nih avangin, ani pawh ka ngai ngawtin ka ringa, an thlen veleh min lo call tur leh a hun awl apianga min lo call turin ka ti bawka..
Tlai lamah chuan a thlen veleh min rawn bia a, nuam a tihloh thute min rawn hrilh luama..kei ka lo damṭha vaklo bawk nen..ka duhdan takah chuan kal lo mah se pawi ka tilo hle a..ka mamawh hunlai tak a ni nghe nghe..
A zan khatna tuka an kalna hmun vel chu tlailamah chuan min rawn hrilh leh a, nuam a tive viau a niang..a hlimhmel khawp mai..Hlim taka a hun hmang tur leh min rawn ngaihtuah lutuk lo turin ka hrilh nghal bawk a..chumi zan chuan rei tak kan inbia a, midang an mut reh tawh hnuah phone call hmanga inbiak reng chu nuam a tihloh avangin, pawnah a chhuah thu min hrilh a, pawn a va chhuah chuan tumah veng thawnglovin kan inbe thei ta a..
Ka ngaih em avangin phone pawh chu dah mai lo se..ka ti a, dah ka phal mai lo nghe nghe..
Pawna a chhuah hnu hunrei lutuk lo kan inbiak hnu chuan, tuemaw ṭawngri chu ka hre thei a, tluangpuii chu a rawn bia a ni tih ka hre thei bawk..Chutia a rawn biak hnu rei lo te ah chuan..Tluangin a phone a thlauh a ni tih hriat tak hian a thawm ṭak ṭak a..
Ka Helo" Vak vak pawhin min chhang thei tawh lo..
A hmui hupsaktu an awm a ni tih chu Tluangpuii thawm aṭang chuan ka hrethei a..thawm chu a hla tial tial a..hun reilote hnuah chuan Ka hello vak vak pawhin chhangtu an awm tawh lo a, a reh ta vung vung mai a..
Phone ka off hnu ah chuan..ka ngaih a ṭha thei miah lo mai a..engtia tihchi nge maw..ni ang le..???Tihmai dan tur ka hrelo chu ka rilru a inkhap kual vela..
Darkar dawn a liam hnu chuan Tluangpuiin ṭhiante zianga a mirin ber chu ka call ta a..vawithum vel a ring hnuah..a lo la ve thei ta hrama..mutchhuak aw tak hian.."eng nge ni..??"
A rawn ti a..
Kei chuan Tluangpuii ka biak laia min chhang thei ta miah lo chu ka ngaih a ṭhat loh thu ka hrilh ta a..ani chuan tluangpuii a awm lo tih a hriatin zawng turin a chhuak ta nghala..
Tluangpuii chu a call pahzela..pawn kawtzawlah chuan tluangpuii phone chu a lo let reng a..a ngaihṭha lo chuan
Inchhunga awmte chu a kaitho ta hlawm a..tluangpuii zawng tur chuan an chhuak ta a..
Kin lawkah chuan ka phone a rawn ri ral ral a..
"Hello..??"
"Aw Stephen..(ṭap aw ṭuau hian..) tluangi a thi.."
tih thu te chauh chu a rawn sawi thei...
"Nge awmzia...engtin maw..han sawi ṭha leh tehh..???"
Ka phone ken lai chu khum aṭang chuan ka thlauh ri ta bur a..
"Ka awih thei lo"..engmah a sawi thei tawh lo..Khum aṭangin phone-a tluangi ṭhiannu ṭap ri hawm hawm thawm chu ka la hre phaka.
"Dawt a nih chu..tluangi a thi lovang..eng vang ngawtin maw..ngati maw..a thilo..Hei hi ka mumang mai mai a nihhi..nakinah ka harchhuak anga, tluangi chu ka bulah a lo awm mai ang..ka mumang a nih hi..ka mu mang..a tak tak a ni lo.."
tiin ka inbe ta bul bul ringawt mai a..
Eng nge tihtura, tihloh tur pawh ka hre tawh lo..ka mumang ni se ka va han ti tehlul em..!!
Dar 1 rik dawnah kan inchhung kiltin maiah chuan ka veikual sek reng a..a tak nitheiin ka hre lova..a changleh ka va mu a, ka mumang a lo nih takin..ka harhchhuak leh thut maithei asin..
Kin lawkah chuan ka phone chu a rawn ri leh ta ral ral a..kan professor a lo ni a..
"Stephen a pawi khawp mai..kan chhan hman ta lo a ni....ani chu pawngsual a ni a, pawngsual a nih zawhah a nghawnga rehhlum a ni bawk.."
"Sir..thil awmzia hi ka va han hrethiam lo em..!.."
Ani chu a ngawi vang vanga..thawk a han la hawk a.. a sawizawm leh ta a..
"Police kan ko a..tualthattu pawh tunmai khan an man chhuak a ni..Kan zinna a min hruaitu bus driver Rozika kha a lo nia..A pawi khawp mai..ka dah phawt ang nge.."
Phone a dah zawh chuan thil chu a tak tak a ni tih ka hmufiah ta a..ka khumah chuan ka ṭhu hnawka..ka mit ka chhinga..Tluangi ka hmuh tawh dawn loh avangin..ka mit aṭangin mittui a rawn luang chhuak zung zunga..ka u pawhin camp aṭang chuan min rawn call-a..a theih anga ṭha chuan mi a rawn hnem ve tak ngial a..Mu leh mal reng ka nei thei ta lo..ka phone chu kan chokà lamah chuan ka peih phei ṭhuai a..khumah chuan ka tlu ta hnawk a..
Tuemaw hian, ka taksa chu a lo thing nawk nawka, ka han meng a, Tluangpuii pa a lo ni reng mai..ka meng hleithei lova.. a bulah chuan tluangpuii nu chuan lainat hmel tak hian min lo melh a..Ka mit meng chu a la fiah hleithei lo..ka awmna hmun chu ka han harh chiah chuan Hospital a lo ni reng mai..Engtin nge ka awm reng reng ka hre ta lo..Ka mumang a nih ka ring lova..Tluangpuii pawh a thi ngei a ni tih chu ka hrechiang hle a ni..Ka men theih tak chin ah pawh chuan ka mittui chu a la luan chhunzawm zel a..Mi khawngaihthlak tak zawng ka va han ni chiang emm...!!!
Nithum chhung damdawiina ka awm lai chuan mu leh mal reng ka lo nei lo hi a ni a...lo nei ila chuan ka hmangaih-i hmel kha vawikhat tal chu ka hmu leh tur hi a nia..
Tunah chuan a thlan bulah mittui far chunga lo kir leh tura auh bak hi tih theih ka nei tawh si loo..
Chutia ka hmangaihi thlan bula ka ṭhut reng lai chuan thli thaw chu a reh duak a, ruah a rawn tla ta seng seng a..ka bag aṭang chuan Tluangpuii nena kan thawnthu ka chhiarsak ṭhin kha ka lachhuak a, a thlan chungah chuan ka dah ta a..
"Ka hmangaih ..Hei hi kan thawnthu tawpna chu a lo ni si.. tui deuhin muhil ang che..Mangṭha aw.." tiin..Tluangpuii thlan chu tlawhnawn leh tawh ngai lo turin ka kalsan ta a..
THE END
Comments