HMUN DANG HUN DANG

HMUN DANG HUN DANG(bung khatna)

Pjs

He ka awmna, ka hmuhlai mek leh ka hriatlai mek hi a ni lova,
Hmundang daih a ni..
Chu hmun chu ramngaw durkhup hnuaiah hnim te tak tê te an ṭo a...Thingzarah chuan sava mawi leh nalh dangdai tak takte chu an inchhaih kual vel a, an hram mawi tak takte chu ka han ngaithla a, ka kalkual zel a,thinghnah tlaro te chu ka han rap ri riap riap a, tlema a thelh lai deuhlek ka han thlen chuan, thingbuk kar aṭangin nizung chu mawi tak mai hian a rawn lang siar siar a, thlifim chu a rawn thaw leh heuh heuh ṭhin bawk.

Ka han kal zel a, tlang thengthaw nuam tak mai ka han thlen chuan tuemaw hi ka han hmu a, ka hmuh hnu a an em avangin ka han pan hnai a, Ka han hmuhchian chuan amah ngei kha a lo ni a..Min hmuh veleh chuan a nui sen sen a, a nui hmel mawi tak mai leh a biangsum mawi tak mai chuan ka duhthusam kha a tak ngei a nih thu min hriattir a, a bulah chuan ka han ṭhu a, "He hmunah hian i lo kal ve lo ang tih ka hlau lutuka, ka thlen tirh phei kha chuan rawn haw leh a, hruai ve nghal deuh che kha ka duh em em a, mahse ka thei si lo..ka han kalkual vel a, ka duhthusam piahlam daih a ni..tumah an awm lova, keimah chauhvin ka awm a, ramsa leh sava mawi tak tak te tih loh chu..kan duhthusam ai pawha nuam a nih hi.." tiin ... Chutah chuan kan pahnih chauhin kan awm a, tudang kan ngai lo..

Ani nen chuan hun dang leh hmundang chu kan chen a, kan buaina te kalpelin kan hringnun khawsak harsa tak mai kha kan mangṭha tawh ang, hawilopar ti a an sawiṭhin pangpar ngei chu kan tawn anga, tudang kan ngai tawh lo ang..

Inbox ka han hawng a,

"Ka nu leh pa'n kan inneih an phal lo a, ka hrethiam lo a ni..engtin nge ka tih ang? A fa ka pai tawh si a, duh lo mah se, kan inneih a ngai a ni..An ni chuan ka la naupan vangin kan inneih chu an phal lo a ni ber a, mi'n in nei tawh mai tura min hriat tawh hnu ah, he tianga an phal leh ta lo hi ka hrethiam lo, engtin nge ka tih ang?."

"An va timak ve, keini pawn in ineih vat kan lo ring a, ui chung chungin kan lo thlahliam fel vek tawh che asin.."

"Chu chu lawm..ka zak ngawih ngawih, taka, nang chiah ka la hrilh che a nia, fa ka pai thu hi, tumah hrilh ve suh ang che.."

"Nia, ka hrelo le..ka lo tum dawn nia,"

"Tum dawn nia a?"

"Haha ka ti mai mai nih kha..mahse hei ṭhiante nena, han titi ho nikhua hian lo sawichhuah leh thut hi ka ching ṭhin a.. Ka sawichhuak a nih pawhin min lo ngaidam dawn nia.."

"I sawichhuah na chuan i chak lovang.."

"Tak takin , khiang i awi mai tur hi ka va han ui em..!! Ka lo duh ruk ve deuh kha i ni si a.."

"Ninawm..fiamthu na hun pawh a nih loh hi..thu tak ve teh..kei chu..thih daih ka duh a ni..intihhlum mai ka duh.."

"Engtin maw!! I â emai a, chutiang ngaihdan siam loh tur a dawihzep thlak emai.."

"Nia..ka hria lawm..mahse tunah chuan a hrehawm ka ti tak zet zet..khawi hmunah emaw..mahni chauhvin awm ila..hmun thawveng tak mai ni bawk sela..thlifim thaw heuh heuh bawk sela..tuman ka awmna chu hreve lo se la..tumah awm ve lo bawk se.."

"Nia tiraw..a nuam ngawt ang.."

"Chu hmun chu, thi ta ila..ka awmna tur a ni mial lo mawle..ka lo tia..ka chak takzet..Tunah hian thi ta thut ila..chu ka suangtuahna hmunah chuan awm thut mai ila..ka va han ti.."

"Hehe i awm maithei sin..kei pawn ka chak thei lutuk..chu hmunah chuan ngaw dur hringdup hnuaiah, sava hram mawi tak tak leh, lui luang ri her her thawmte nen..thingzarah te chuan sava mawi tak tak thlawk vel sela..ngaw kar aṭangin nizung rawn lang siar siar sela..thli chu rawn thaw leh heuh heuh zel bawk sela..a nuam ngawtin ka ring.."

"Nia..nuam ngawt ang..a nih phawt ka tibuai palh ang che..bye phawt.."

Amah kha Elf tiin ka ko ṭhina, kan ṭhianho zinga ka duh ruk em em ṭhin a ni..A pasal neih tur thu ka hriat ni aṭanga fa a pai thu ka hriat thleng khan, ani chu ka la duh em em reng a, ka thinlung nâ ti taka rum chu tuman an hre lova, ka ṭhian pakhat chauh lo chuan..Elf chuan bialpa a neih thu ka hre fova, thik em em chunga, a thuruk tam tak hriat kha ka tan chuan nâ viau mah se, ka chan tawk a ni a, ka lawm em em tho ṭhin..mahse ka duh rukna leh vei em em na thu hi ka hrilh ve a rem si lo kha a nia..

A buaina leh a manganna chu ka chungah a bunruaka, a lawmin ka lawmpui em em ṭhina, a natin ka nâ a, a tawrhin ka tuar ve lo thei lo ṭhin..ka hmangaih vang pawh a ni ang e..ka damchhunga ka mi duh ber leh ka thlah theih loh hmeichhia, eng ang pawhin thlawi sawmsarih mah se, ka pawm em em reng tho in ka ring a ni..

"Eng nge i an a, i lo hre ve emm?"

"Eng chu maw...??

"Kha, I Elf i'n pasal a nei leh lo maithei ni..a pa'n a phallo a ni awm e..Nizan hmasa palai an rawn kal a, a rawn dil ani awm e.."

"E a va mak ve..an inruk tawh ber te chuan , pa Mawia pawh lo phal ve tawh mai awm.."

"Nia..tiraw..englo a nia..a nu'n kan ina a rawn lena, a sawi dan chuan 'kan dinhmun a inthlau si, kei ni ang tan chuan an khawsak a sang si a, kan dinhmun a inang lo, Chu lovah, mami zawng naupangchhia mai ala nia..a la hun lo hrim hrim..' a tia..kei pawh ka ngaihdan a ni ve tho.."

"A chutin tingawt suh..an inruk tawh chuan phal lo mah se, an inru nawn tluk tluk chawk a nia..an buai rei mai mai dawn.."

"Hmm..i ui viau emaw ka lo tia, chutianga an lo tih te chuan hlim hle tur i ni..Taka'na, a bialpa kha, zù a heh lutuk an tia..eng damdawi dawi emaw pawh a ti ṭhin e an tia.."

"A nih ka ring..an ingaihzawn lai pawhin Elfi buaina ber alawm.. Nia nei rih lo mah se..a pawi lo ngawt ang, kan ṭhian ho he tia awm dual dual hi a nuam ber.."

"Nia..nupui pasal an neih tawh chinah hi chuan, kawm hlaihtheih an ni tawh ṭhin si lova.."

"An inhmangaih hman viau chuan, elf pawh ka khawngaih ang reng khawp mai..a vanduai ve thei sia...ngaihzawng lamah hian a tluang lo ve e.."

"Nang te hi lo duh ve che sela ṭha tur a nia..kan hlimtlang zawk tur..in han inhmeh dawn nen..i duhthu hi a hma daih kha n hrilh tawh tur che a nia.."

"Chulam chu duh tawk ang..ka sawi peih lo..a hahthlak..ani lo pawh hmeichhe dang an tam hi..ka duh em em reng bik lo a nia.."

"Haha..tak tak maw..a nih chuan a ṭhat chu..nih leh Elfi te inlamah kan va leng ve dawn em niang..insiam la.."

"Nia va leng ang..tun ang hunah chuan a ṭhiante hi kan pawimawh a nia.."

Elfi te inlamah chuan kan va leng ta a..kan thlen hnu chuan, Elfi nu leh pa te chu leng turin a chhuak a. Elf chuan a phone a sik neuh neuh renga, biak hlaihtheih pawh a ni lo..thil eng engemaw ngaihchan ruk reng a nei a, keini ṭhian dun kan leng chu a lawm rilru hle mai bawk, mahse, a thiltum chu, A bialpa rawn luhhun a chhuah nghal daih a ni thung..Chumi zan chuan a bialpa a lo kal dawn a, rawn hruai a tum a ni tih reng reng keni chuan kan hre ve hauh lo. Kan va lan chiaha, Elfi nu leh pa an chhuah khan Elfi bialpa tan hun remchang kan va siam ta a ni ber mai..Rei pawh rial lovin Elfi bialpa chu a rawn lang hlawl mai a, Pindan aṭangin Elf chu a bag nen a rawn inkhai chhuak a, a bawrfu mai leh nghal..

Keini ṭhian dun tan chuan thil mak a ni hran lo..kan rin sa reng a ni, mahse Ka tan bik chuan thil thleng pangai mai mai a ni lova, ka rin lawk mah nise, ka duh ai chuan a rang mah mah lo thei lo a ni..Elfi' leh a bialpa an chhuah dawn chuan, inthlahna thu a sawi a, a sawi zawhah lo zep sak turin min ngena, kan sawi chhuah sak loh tur thu kan sawi zawh chuan an tlan liam ta a..elfi te an liam hnu lawk chuan a nu leh pa te chu an rawn haw veleh chiaha..

Inchhunga Elfi a awm lo tih an hriatin, an lung a awi lo em em mai a, thilawmzia chu an hrethiam a, a bialpa'n a hruai a ni tih an hriatin, keini ṭhiandun chu an ruahmana a bultumtu ah, Elfi pa chuan min puh ta a..min hau hrepa a, kan chungah a lung ni lo hle mai leh nghal. Chutia min hauh hrep hnu chuan min haw tir a, an inla kan len leh pawh chu a phal ta lova..

Thinrim leh lung ni lo tak chungchuan kan haw ta a..
Ka muthmunah thil eng eng emaw ka ngaihtuah avangin ka muhil lawk thei ta lova..Ka lo duhruk em em mai Elfi, tlangval dangin a duh dan dana a kuaiher leh a thuhnuia a a thinlung mai nilo, a taksa a dah thei chu mak ka tihle a, Elfi mizia ka han ngaihtuah a, chuti'ang khawpa, tlangval hmaa lo nem leh lo inphal a ni ta mai kha mak ka tihle mai bawk. Ka thinlung a nà a, tawrh dan erawh ka thiam hle a ngai thung si..

Chumi zan chuan zan a rei tulh tulh a, inchhirna hlirin ka khat a, hun rei tak ata tawh ka duhna tihlan ka duh ṭhin; ka ngam loh avanga, ka ta ni thei ngai tawh lo tur, Elfi sakruang leh hmelte ka han ngaihtuah a, dawihzep ka inti em em a, nep ka intibang thei lo..

Elf a kalbo hnuah ni tam tak chhung min rawn be ta lova..ka ta nilo mah se, hmuh reng ka duh ṭhin a, a biak pawh vereng nih pawh ka beisei fo a ni..

Tlaikhat chu ka ṭhianpa nen kan inkawma..

"Ṭhian Elfin a rawn bia che em?"

"Aizawla a chhukthlak hnu ah, vawite khatmah min la rawn be lo.."

"A va â rauh em em..Pa mawia'n Elfi chu koh a tum loh thu misawi ka hria..a duh ang anga awmtir mai a tum a ni awm e..''

"A awm reng a ni..hmeichhe ho mawlzia a chiang ngawt mai..an hmangaih tawh laklawh te hi chu thihna ruamah pawh nise an umzui duh tho ang..hmagaihna dik tak hi an nunpui a ni..'"

"Haha..nih duhhmel lutuk..nia..nuam titak chuan a awm bikin ka ring miah lo nia..a pasal zū heh bawk nen..a nuam rei miah lo ang.."

"A.. lawm takin a pawma, eng ang pawhin sual se, pawm dan a zir anga, a pawm reng thei tho ang.."

"A mak khawp"

"Nia..kan thlah fel tak tak a ngai, nang pawhin ngaihtuah tawh lo la.."

Ka ngaihtuah tawh lo ang ka tithei lova, ka bansan hmak ang ka tithei bawk hek lo..

Nikhat chu phone call ka dawnga, Elf a lo ni reng mai, a rawn haw tur thu min hrilh a, a chhan ka zawh lahin engmah min hrilh duh ta si lo..A nau hrin a hun ṭep tawh a ni si a, eng emaw buaina an tawk a ni lo mawle.

Elf a rawn thlen chuan a pain an ina a luh a phal ta lova, a pum a lian tawhsi a rawn cher haw dawk mai a, kei ngei pawh chuan lainat viau ka han tum a, a hma ang kha chuan ka thinlungah a tlana ta lo hle mai a ni. Ka duh ngawih ngawih ṭhin khan mi fa a pai tasi a.
An ina a pa'n a awm phal tak loah chuan kan inah ka hruai haw ta ringawt a. Zanah chuan a ṭap renga, chaw a ei duh bawk si lo, mut a tum lova, pawnah eng eng emaw ti a, amah chauha awm chu a duh ber a ni.

Chumi zan chuan ka rilru zawng zawng ani hnenah chuan ka sawichhuak ta a, ka duh em em thu leh ka vei em em ṭhin thu te chu tlai tawh viau mah se, ka thinlunga awm zawng zawngte chu ka sawichhuak ta a.

Mahse a rilru tihahzualtu mai ka ni ta si.
Ani chuan "Ka innghahna awmchhun ka ṭhian ka belh ve awmchhun i ni a, chuti'ang thu chu sawi tawh lo hram teh..Awm ngaihna ka hrelova, ka rilru a buai a ni." A ti ta a.
Lungawi a har ka ti a, a innghahna ber ṭhian nih pawh chu ka tum chhunzawm ta lova. Chutia a sawizawh chuan amah chauha awm a duh thu a sawi a, inchhungah ka luhsan ta daih a.
Chutia ka luhsan hnu hun rei fe ka nghah hnu pawh chuan a rawn lut duh ta reng reng lo maia , Ngaihṭhat lohna em em pawh ka nei lo. A rawn haw chhan min hrilh duh bawk si lo, a buaina ber ka hre bawk si lo, milo maha huat ruk nak alaia, duh leh vakvak mai rawh se, hmangaihtu hnawla hmangaih lotu lam a pan ṭalh man chu a la hmu dawn chauh a ni.

Mahse zan a reia khua a vawt angreng bawksi, ani raipuar tan chuan pawn vawta awm reng chu a ṭhat ka ring lova, hruailut tur chuan ka han chhuak ta a..kan awmdun na hmun ka thlen chuan a lo awm ta reng reng lo mai, ka han zawnkuala ka han auh vel pawhin min chhang tur a awm ta reng reng lo maia, ka ngaihtuah ta a, ka bula awm nuam a ti lo a ni ngei ang..pawi love, a duhna na ah kal rawh se, tih pah chuan inchhung ah chuan ka lut leha, ka mutsan ta daih a..

Hmangaih phu miah lotu ka hmangaiha, tunge maw ka nih le..mi â tak zawng ka va han ni em.

Zing a lo thlen chuan ka rilru hah leh min delhtu boruak rit em em mai chu a kiam ta a, ka phone ka han hmeh en chuan Elfiin messege a lo hnutchhiat ta ṭeuh maia.
"A pawi ka ti, duhthlana siam a harsa ka tibawk, ka nun hi a buai a, mihring hi eng nge maw kan pianchhan ni angle? tih ringawt te hi ka ngaihtuah leh ngut ngut ṭhin, ka pianna chhungkua chu mi awmthei ti a sawi a ni lova, chumi a nih avang ngawta, mi hausate chanvo ang neih ve chu kan phulo tihna em ni ang? Kan chan ve tur hi a awm lo em ni? Hmangaih nei ve turin thinlung ka nei ve a, ka chanvo a ni ve tho asin.
Mahse ka thlangsual te pawh a ni ang, ka mi duh leh inghahna thlaka ka ngaih mi hausa fa chu ka tana thihna thang a lo ni si a nih hi. Nia a chhungte hmuhsit ka ni a, amah ngei pawhin min hmusit asin, a zuruih leh thinrim changa a kut minthlakna te, min nghaisakna te kha ná ka ti a, ka tuarzo ta ngang lova ka rawn haw ta a ni.

Ka nau pai pawh hi rawn piang lo law law sela, he khawvel hrehawmna hi tem ve lo law law sela ka duh a ni. Ka hriat ngailoh i mi duhna leh ka tana i inphal em emna te tal khan min chhawk ka lo ring ṭhina, mahse nang chuan a ni lo zawngin ka natna chawk i tum si, ka rilru nat leh buai taka ka awmlaia, i inpek ṭhin anga ka tana ṭhian ṭha ber ang kha la ni la ka ti lutuk asin.

Chuan tunah chuan ka suangtuahna khawvel hi ka khawvel chen ve theih awmchhun a nih tawh hi, ka kalna tur chu khawihmun pawh nise he hmun ai hi chuan a nuam zawk ngei ang.

Tunah chuan ka chhungte tana min tenawm ka nizo tawh a, ka ṭhiante tana mi laktlak loh ka ni zo tawh, ka nun hi hman aṭang tawha tluanglo a ni tih chu nang pawhin i hrechiang ngei ang. Kei chu mi ang lo mai ka ni, ka nun hi a hahthlak a, damchhan ka nei ve lo, ka tan thih hi a nuam zawk a ni.

I hnena ka sawiṭhin ka lo ngaihtuah fo hmunah khan ka kal dawn a ni. Ka mangṭha ang che..bye"

A awmzia ka hrethiam lo hle maia, a messege rawn thawn hun ka han ena, dar 4 leh 34 a ni a, khawiah tak awm ang maw..ka ṭhiante kan han phone kual a, tu inah mah a kal lo a, hmutu an awm hek lo.

Ka ngaihtuaha nizan kan inbiak zawhah ka lo luhsan ta kher kher kha ka inchhira, ka tihsual lianber a ni nghe nghe ang.

HMUN DANG HUN DANG (BUNG 2 na)

ELf-i bo hnu nihnih liam ta chhung chuan inthiamlohna hlirin ka khat a, kan zawnga, 'lo hmutu an awm mahna' ti a mi kan zawhkual vel pawhin hmutu an awm thei ta si lo. Kei chuan a thih ka ringa, a chakber fo a nih avangin.

A chhungte bulah chuti'ang sawi chu ka duh lova, an inthiam thei leh tawh ngai dawn si lo, a pawi ngawt mai! Eng nge maw ka tih tak hi le? A thi a nih chuan ka thiam loh a ni, ka thiamloh chhiava a ni, ani chu khawiah tak awm ang maw..?

A nithum ni ah chuan Elfi ruang chu kan hmu ta a, engtia thi nge hriat a ni lo, a taksa a chhe tawh hle a, a hmel hmuh tlak a awm tawh lo bawk. Awmna tur hre lo, innghahna tur ṭhian leh chhungkua a nei tawh miau silova, a thihchhan chu ama duhthu ngeia intihlum a ni tih bak lo chuan sawithiam chi a ni lo.

Indem reng rengin ani chu kan thlahliam ta a ni.

Elf chu thlamuang takin chawl hram sela ka va han ti em! A tân khawvel hi damrengna tlak a ni lo te pawh a ni ang nge, mahse engvang kher nge ni ang, ka hmangaiha a tân ka awm rengfo ṭhin kha a ni si a, min pawm ve mai sela heti'ng boruak hi kan tawng lo tur asin.

"Ṭhian Elfi hii"

Kei chuan "Khawngaihin sawizawm suh, efl tih hming hi sawi tawh lo ang, eng nge sawtna awm chuang? A awm ve tawh lo."

"Nia..sawi tawh lo ang, mahse ka lainat ngawt mai, a nun kha a hahthlak ṭhin lutuka, han hnem leh ṭanpui viau dan a vang thei si a."

"Aa..kei chu a huaisen tawk lovah ka ngai, kan nun hi kan sual ve tak meuh meuh a ngai a lawm, kan hausa emaw kan rethei emaw, kan chantawka lungawi leh kan phutawk tur ngaihtuah a, ngaihven tur a ni a. Elf zawng a buaithlak ṭhin em a ni."

"Nia.. sawi tawh lo ang, a thih hnuah thla pawh a liam leh tawh hi."

"Elf tán chuan a suangtuahna kha a tana khawvel awmchhun a ni miau mai si a"

: Ka hun kal tawh ka ngaihtuah let fova, beidawn leh innghahna nei tawh lova, inhriatchang ka neih te hian inhnemna tur ka zawnga, ka nat em em lai pawhin ka beidawnna chuan min hneh ka phal ngai lo, chak taka awmzel ka tumfova, ka ṭhiannu Elf i nun ngei aṭang pawhin thil tam tak ka zir chhuak a, ka mihringpuite hian heng natna leh hrehawmna te hi an lo tawng ve ṭhin a ni tih ka hria a, beidawn ngawih ngawih chang awm mah se, kan hneh thei a ni tih hi mite hian hreve se ka ti a, ka theih anga tam Social Media ah heti'ang lam hawi hi ka thehdarh ta ṭhin a.

Mi hausa tak chhungkua aṭanga chawrchhuak ka ni bik lova, ka pa in min boral san tawh a, unau pianpui ka nei lova, ka nu nen chauh kan awm tawh a ni. Kan khawsak chu pahnih chauh kan nih avangin a harsa lutuk lova, kan ei a tlema, ka pa pension- hlawh chauh pawhin min la chawmzo hle a ni.

Tlangval hrisel lo tak mai leh ṭenghneng tak mai ka ni a, ka lung a ṭhat loh avangin thawhah leh thut thut ching ka ni a, hna ka thawk hlaithei lova, ṭhen leh rual zingah pawh a hnukhawi pawl ka ni ta reng mai a ni.

Ka nu chuan min hmangaihin min enkawl thiam em em maia, khawvela nuropui ber a ni. A kum upa tawh mah se, ka tan a nun leh hunpum a hlana, kei ang fa tlaktlai lo lutuk min nei hi erawh a chang chuan ka zaka, ka inthlahrung ṭhin.

Ka nuna mipawimawh ber berte zinga ka ṭhianṭha tak mai, Lawmtea hi ka tan chuan Vantirhkoh a ni ringawt ka dinhmun a hrethiamin ka natnaah te min enkawla, ka rilru zawng zawnga ka kawm leh ka hnaih ber pakhat a ni, khawvel a ṭhian ṭha ber a ni. Ka thuruk zawng zawng ka hrilha, ka vei zawng leh ka rilru tihah zawngte chu ka hrilha, anin inhawng takin min lo ngaihthlak sak ṭhin, he khawvelah hian a lo piang lovang tih hi ka hlau ngawt mai.

Hun chu a liam duak duaka, ka thuziah leh mite fuihnana ka article ziahte chu chhiartu an lo tamve ta hle maia, mimal taka min rawntu leh min faktu pawh ka tawng ve ta nual mai, hun ka senghnem lem lova, hunawl ka neih changa ka ziak a nih loh chuan, ziahnan hun bituk chin pawh ka nei ngai meuh lo, a rawn lang hmasa a piang ka ziak tawpa, mite tana malsawmna leh mite tana thurawn ṭha tak a nih theihnan ka ṭawngṭaia, Pathianin ka dilna min tihhlawhtlin sak te pawh a ni ang , ka phulloh fakna leh ka thuziah ṭha tih leh dik tih avanga lo inhmuchhuak leh beidawnna lak ata lo chhuak leh te pawh an awm ve ta nual mai. Ka tum tak pawh a ni renga ka lawm tak zet zet a ni.

Zan khat chu hmeichhe tleirawl pakhat Caroline inti hian min rawn bia a, a ngaihzawng nena an inkar thuchhia vanga a rilru natna te chu min rawn hrilh ta vek mai a.
Ka theih ang anga ka lo hnema ka lo hrilh ve na chu lawmthu sawiin mi a kawmngaih ta hle maia. Zantin kan inkawma, ka thuruk te leh kan chhungkaw nun thlengin inpawh takin kan inkawm chho ta zel a, hun a lo rei a, kan lo inngai ta em em mai a, zana kan inbiak loh chuan kimlo riau in kan inhre leh tlat ṭhin.

Kan awmna hmun a inhlat a, phone kaltlang chauhin kan inbe thei a ni , mahse kei ngei pawh chu a zunah ka uaiin amahah chuan ka innghat thui ta hle maia, a ni chuan ka dinhmun hrethiamin min kawm thiam em em mai a..A ni ka tawng ta chu ka lawm em em mai a ni

Amak khawp in hmu thei lo mahila, ka ngai em em tho mai, a thlalak ka ena, ka inhnem ve a, a aw ka hriatin ka hlim em em a, zantin a aw hriat ka duh a ni. Hmel tak hmuhloh hmeichhe zúnah hian a lo uai theih viau zawng a nih hi.

Ka hriat ve chhun chu mi an ingaihzawn hian in ngaizawng mai mai an ni a, an inkawp reng kher lova, induh hle mah se, in hmangaih viau mah se, an inṭhen leh tho ṭhin tih chauh hi a ni. In ngaizawng tam tak pawh hi an ni reng a.

Mahse ani hi chuan hetihian min hrilh ṭhin a,
"Kan induh a, kan inngaizawng a nih chuan kan inhmangaih tur a ni a, kan inhmangaih tak tak a nih chuan kan inṭhen thei tawh lovang, thihna chauh lo chuan hmangaihna dik tak chu a ṭhen thei ngai lo."
Tih leh."In ngaizawngte kan inṭhen leh ṭhin chhan chu kan in hmangaihtak tak loh vang leh inṭhen leh mai tura in ngaizawng emaw kan nih hi kan ti ṭhin a..hei vang hian alawm..kan ingaihzawn hnu pawha kan inṭhen leh ṭhin. In hrechiang lo mahila kan ingaihzawn hnuaah kan inhrechiang anga, thil ṭha leh ṭha lo te kan sawidun anga, kan infuih tawn tur a ni a, eng ang dinhmunah pawh ding ila, kan inhmangaih tak tak a nih chuan kan indawm tawnin kan inpui tawn tur a ni,"
"Sum leh pai vanga duh che ka ni lova, i dinhmun chhiat leh retheih avanga hmangaih che ka nih hek lo, i nihna chu eng pawh lo nise ka hmangaih che a ni" tiin..

Hei vang hian a ni, ani hi ka duh em em mai ni.

HMUN DAN HUN DANG BUNG 3 NA.

Caroline chu mi hausa tak chhungkua aṭanga lo seilian a ni a, hmuh chak hle mahila, ka hmuh hun tur chu ka ngaihtuah thui ngam hauh lo thung. Kan ingaitawnin kan inbe ngawrh hle maia, ka nihna ang anga min pawm ka ringhlel lova, hmangaihna dik taka min hmangaih ngei pawh ka ring ṭhin.

Inhmuh hun tur kan ruat lawk thei lova, mahse hei tak hian kan induhna leh inngaihna a tizual zawk ṭhin niten ka hria.

Engtik niah emaw chuan kan la awmdun ve ngei in ka ring, naupang tê mah nise a huaisenin a tum a ruh em em a, a duh chu neih ngei ngei tum leh a duhnaah chuan mi mitmei veng hauhloa thil tih pawh a hnial hauh lo a ni.

Tukkhat chu ka nu zing tho a fuhlo riau mai a, tarchak tawh lo tak a ni nen, a khawsik chu a tlun nasa mai a, damdawi ka pek hnu pawh chuan a damhlai thei tlat lo maia. Mang a ang duh ngei mai, kan ṭhenawmten an hriat chuan min puiturin an rawn lut hlawma, ka nu damlo chu a nâ riau maia, doctor kan han entir pawh chuan a damchhuah leh pawh a ringlo hial a ni.

Ka hriat ve hauh lohin ka nu chuan a natna chu a lo zep char char a, Doctorin a natna a hmuhchhuah chiah chuan inenkawlnan hun a lo tlai tawh hi a lo ni a..

Damdawiinah kala kan han inenkawl chhunzawm ve na chungin, karkhat chhung chu a natna pawhin zia lam a pan ve a, mahse a taksa chak lo chuan, hma a sawn mawh hle mai. Karthum dawn kan awm hnu chuan damlam aiin zuallam a pan ta zel zawk maia, thi mai tura doctor ten an ngaih tawh avangin kan awmnan room hran min buaitsaih saka, ka nu natna avangin a bula awm tur pawh chuan kan hmai khuh a ngai a, a thih veleh a ruang chu pack nghal tur a ni bawk.

Chutia a zual zel takah chuan a bula awm chu doctor ten an phal ta lova, a natna hri chu awlsam taka mi dang a kaichhawn theih tawh avangin, ka nu taksa chu a puam veka, a vung a, chet pawh a che thei tawh lo.

Doctor chuan ka hnenah a sawi a, ka nu chu hahdam taka a chawlh theihnan inchiuna hmanrua hmanga chiu hlum mai a duh thu chu, mahse kei chuan ka ngaihtuah a, ka remti thei ta ngang lo a ni.
Hun reilote hnu ah chuan ka nu chu a boral ta nge nge a.

A natna a zepa kha leh chen ka tana a thawhna te ka han ngaihtuaha, a thihdawn thlenga, ka tan chauha a nun hlantu ka nu chan hi a fair ka tithei thlawt lo. Nâ ka ti a, ka tuar dam thei lo a ni, engtin nge maw ka han awmzel dawn le?

Chutih hunlai chuan ka ṭhian ngaih em em mai, Lawmtea chu ka hnenah a awma, Carolini erawh ka kiangah a awm thei lo, awm se tihle mah ila, kan awmna a inhlat si, ka ngaih a zuala, ka kiang dinga, ka manganna min chhawk theitu tur awmchhunah ka ngai lo thei lo.

Ka ṭhianpa Lawmtea chu kan inah chuan a rawn awm ta chawt maia, ka nâ a chhuah chang leh, ka mittui a far changa, min hnemtu ber a ni ta zawk a. Ka piang vanduai ve reng reng em ni ang, mahse he thu hi ka ngaihtuah ngam lova, min hneh ka phal hek lo. Ka tawrhna leh ka ṭahnate hian beidawna ruama min hruailuh ka phal lova, ka hmangaih ten mual min liamsan zel mah se, min siamtu Pathian hnen lam chu ka pan ṭang ṭang a ngai a nih si hi.

Ka nu thih hnu chuan ka nun a buai chho hle a, thih ve daih chu ka duhthusam a ni fo bawk, mahse ka ṭhen leh rual te aṭanga Caroline thleng chuan min hnem thiam em em hlawm a, hmangaih tak leh duat taka min enkawlna avang chauh chuan a ni , ka la dam ve ṭawk ṭawk ni..

"Tuemaw hmeichhia lo naupan hmel takin a rawn zawng che a, kan inah a awm..ka rawn ko tawp mai che.."

"Tunge ni ang aw?"

"Ka hre lo, ani chuan 'rawn kalse min hmuh chuan a hre mai ang" a ti ringawta,"

"Awle ."

Tichuan min rawn hrilhtu pa chu ka zui ve ta ringawta,
'min hai a ni lo maw le.'
Kei min lo zawng lo a nih palh chuan a zahthlak ngawtin ka ring..ka hming ang hmingpu hi an awm ve nual si a..

Mahse chua tia, an in kan thlen chuan, nula duhawm zet mai hi a lo ṭhu a. Min lo hmuh chiah chuan..a lo nui sen sen a, a hmel a ṭha em em mai lehnghal, a bul ka thlen chuan a rawn ding chhuak a,
"Hi..keimah ka nia, rawn surprise che ka duh a, ka rawn hrilh lawk duh ta lo che a ni."

"E..Caro, nang maw..? Eng nge maw i rawn tih dawn ni..engtin nge a nih theih a...?"

"A..sawi rih lo ang..ka hmu che chu ka lawm hle mai, khaw nge i in a awm, kal ila.." a han ti a.

A lo awmna ina mi te a thlah zawh chuan ka in lam chu kan pan ta a..

HMUN DANG HUN DANG(bung 4)

"Ka nu leh pa ka dil a, i malzia leh i natna tawrhte ka hrilh vek a, i nu a boral thu ka hrilh ni phei kha chuan rawn kalve turin min ti hial a, mahse thil tih laklawh deuh ka neihlai kha, ka hrilh chein ka hria, nia, mahse tunah chuan hei kan awmdun tawh alawm..i thla a muang tawh em? Chuan i hlim ve em? Kei chu ka hlim asin.."

Kei chuan ,"Nia..ka hlim lutuk, i thlalak aiin a takah hian i chhe lo lehzual a nih hi..hmuh i nuam hle mai, mumang te pawh a ang lek lek.."

Ani chu lai hmel ru angreng tak hian a han nui seih a.

"Anih leh engtik thleng nge i cham ang..?" Ka han ti leh a..

A han ngawi deuh vang vang a, hmundang melh pah chuan,
"Ka hre lo, i inah hian, min chentir ve phal a ngem...?" A han timauh mai..ka lam a rawn hawi chuana nui sen sen a.

Kei chuan "Phal e, i duh chen chen awm ang che, khual ṭha i nih kha..cham reng mai rawh," kan han tive leh mai a..

: Ani chuan "Ka nu leh pa'n an hmu ve duh che a, kan khawlamah i rawn zin hman a ngem..? A rang lamin kan tum anga."

Mak ka tirilru hle mai a, eng vang chuan nge maw..min hmuh an duh le?

Mahse Caroline chuan,
"Neih che ka duh a ni, ka chhungte bulah pawh ka sawi vek tawh a, mahse hmuh ve phawt che an duh a, i rem tih zawng a nih chuan.." a rawn tileh a..

Ani neih chu duhhle mah ila, ka phu lo lutuk tih leh, kei ang mi tan chuan a dinhmun a sang lutuk a ni. Mahse an'in a duh miau si chuan midang tan ka phal bikin ka ring lo, phulo hle mah ila.

Tichuan, Caroi te khawlam chu a tukah chuan kan pan ta a, an khua chu a lo hla ngei mai, kan thlen chuan khua a tlai tawh hle maia, an in kan thlen chiah chuan an in pawh a ṭhain a changkang em em maia,a lian hle bawk. An in leh a vel chu fai tak a ni. Inchhung kan luh chiah chuan, ani chu hlim hmel tak mai hian
"Hei..ka lo hawn a nia, lo en ve ru.." a tita chul mai a , a zahthlak duh ngang mai.

A nu leh pa, a unau te chuan min rawn dinhual ta ṭhup maia, ṭhutthlengah ka ṭhu a, min han exam tak tak mai chuh..Caro ka haw hlur mai a ni, ani lah chu a lo nui ang uarh uarh lehnghal a..

Zahviau ka han tuma, an mizia leh mi an treat danah zahzum viau hlaihtheih a ni ta lova, thil kan inzawta, kan titiho a, a nuam phian mai. Mi erawh an iai deuh tih chu ka hre reng , kei pawhin nuam ka tichiah lem lo. Mahse An fanuin min duh miau si a.

An zau viau na a, an chhungrilah thil eng emaw a awm a ni tih ka hria a, kei ang an fanu duatlai hmelṭha leh duhawm em em mai tan chuan min duh teh fahran lo a ni.
Ni e, ka dem lo ve..ka iai awm reng a ni.

Zan hnih Caroi te khuaa ka cham hnu chuan ka haw leh ta a, Caroi nu chuan thu min chaha, i rem chan hun hunah palai tir turin, phur viau lo mahila, Caroi vang chauhin, ka tih ngei a ngai dawn si a..

A chhungte ka bulah an awm dawn hlei nem, Caroi a lawm awm dawn..tiin ka inhnem ve tawp.

Caroi te khua aṭanga ka haw leh ni zanah chuan Lawmtea hnenah kan chanchin te chu ka sawi ta veka.
"Nia, Kha, a duhawmsi a, neih ngei ngei tum teh..Nupui enkawltu tur che i neih chuan i awlsam sawt mai ang, i thawhah pawh, a chhuak zen zen tawh lova, i pa pension hlawh pawhin in inchawmzo daih ang chu, Caro in eng eng emaw sum lakluhna a dap thei bawk ang a, in inchawmzo lutuk ang.."

"Nia..chu tak chuan min kap em em lo, min hmangaih tak tak a ni tih ka hria a, ka tawng hi ka lawm khawp maia.."

"Taka, ṭhian, naktuk khi, Elf thih cham kha a nia, a thlanah kan ṭhianhoin kal ila, Rema te, Nui te pawh ka lo hrilh dawn nia.."

"Awle, in thu thu, kan kal dawn nia..pangparte pawh kan dah ang a.."

Zantir lamah chuan Lawmtea nena kan inkawm chu kan hlim dun hle maia, Caroi nena kan inneih dan tur leh palai tur chungchangte chu kan han rel ve a, kan vawikhatna a nih avangin a ngaihna hriat a har ngei mai.

Chumi zan ka mu chu ka awm a nuam thei reng reng lo mai a, khumah chuan ka tal ka tala, ka mitthlaah, Efl i hmel a rawn lang leh zawk zawk ṭhina, a ruang ka hmuh tirh a, ka awm dan te, a thlan bula, ka ṭah lai te kha a rawn lang uarh uarh a, ka mumangah chuan Elf chu amah chauha a ṭhulai hi ka hmua, a bula kal ka han tum ṭhina, ka hnaih tial tiala, a bo leh daih ṭhin.

Mak ka ti tak zet...

HMUN DANG HUN DANG (Bung 5)

Lawmtea nen chuan, palaia kaltur chu kan han sawm kual chhin a, Caroi te khua a hlat lutuk vang nge ni, an phur lo hlawm hle mai a. Mahse kei meuhin nupui ka neih dawn thu an hriat chuan min lawmpuiin vannei min tihle thung si.

Rei pawh rial lo chuan, ka putea leh Lawmtea chu palaia ṭang tur chuan Caroi te khawlam chu ka panpui ve ta a..

Inneih hun tur te kan bithliah hnu chuan kan haw leh tarih a, Caroi chuan kan khawlamah chuan min zui ve leh ringawt bawka, a nu'n phal lo hle mah se, fimkhur tur leh lo puklawk lo tur chuan min chah uluk hle mai bawk a ni.

Caroi chu an fanu neihchhun an duat em em mai leh , a thu thu a an awmtir ṭhin a ni a, mahse chuti chung pawh chuan an ringtawka, an duhloh thil tilo turah an dah hmiah..an chhungkaw inrelbawldan hi ka fak lo thei lo a ni.

Kan khawlam kan thlen leh hnu chuan, Caroi nen chauh chuan ka inah chuan kan awm ta a, nupa la ni chiah lo mah ila, ka dinhmun nena tehkhinin a rem em lah taka, mahse ani chuan, khum khata mut a la hun loh zia a sawi chuan ka nu room-ah a mu ta ṭhin a ni. Kan tum lo ve ve, nupa nun hmang turin nupa kan la ni miau lova.

Hun rei pawh rial tawh lo chuan inneih ni kan theng a, kan han innei ve ta a, kan inbuatsaihna pawh pangai ve tak a ni nen, kan inneih ni chu a ropui thei ang bera lawm a ni a, Coroi chhungte inpekna pawh ka fak em em a, ka nu kha la awm ve sela ka ti hle a ni.

Caro-i te insen dan leh an fanu an thlah danah erawh chuan ka inthlahrung hle thung si. Mahni insit leh in duhkhawp lem hi ka nei thei ngai dawn lo niberin ka hria.

Chutia ka mi duh ber mai Nula hleitling leh hmelṭha em em mai, ka nupui a han ni ta chu ka nun hi a hahdam em em mai a, engkima min hrethiam a, ka nihna ang anga min pawmtu ngei kha a ni tih ka hriat nawn leh chang phei chuan ka lawm leh zual.

A hmaa khum hranga mu ṭhin khan khum khatah kan mu ve thei ta a, ani pangtilum leh no tak mai chuan khawvel nawmna min chen tir a, a pian nalhna leh taksa mawina te chuan ka duhthusam a tifamkim hliah hliah ṭhin.

Kan khawsak a harsa lova, an'in eng engemaw sumdawnna buaipuiin sum a la lut thei bawk a, kan pahnih chauh tan chuan ei a tlem nen, lungkham em em nei lovin inngaih tak chung siin kan cheng dun thei a ni. A la naupang a, a chhungte a ngaih chang chuan an khaw lamah te chuan kan zin leh ṭhin a, rei tak tak chamin kan va awmchilh ve fo bawk.

Chung hunlai chuan ka taksa ah chiangkuan lohna a tam chho hle mai a, hmun hla tak tak ka kal ṭhin vang nge ni ang ka hre lo, ka thawhah chu a rawn chhuak leh thut zel mai a. Ka nupui lakah pawh chuan ka inthlahrung em em mai a ni.

Ka damdawi man leh eng eng emaw ah kan inseng tam chho tial tial a, Ciroin a sumdawn na lamah pawisa a mamawhna a lian chho zel mai bawk si, rilru hah kan nei ve ta zauh zauhva.

Nikhat chu Coro-i chu lung nilo hmelzet mai hian a raw haw a,

A chhan ka han zawh chuan a sumdawnna hmuna thil a kaltluan loh avangin bansan mai a duh ta a. Mahse hmelhriat ṭha tak a neih thu leh a hmelhriat hnenah chuan a mah pui tura sawm a tum ta a.

Chu a mi biak nen chuan sumdawnna dang buaipuiin an thawk ngawrh ṭhin hle a, zan rei tak takah te a rawn haw a, nilengin ka hmu lova, zingkarah pawh hun reilo te bak inah a awm hman meuh lo. Tukṭhuan ei loa a chhuah chang pawh a tam khawp mai. Mahse a kaltluang phian a nih ka ring a, nuam pawh a tiṭhin hle a ni.

Kum hnih dawn kan chendun hnu chuan a rai loh nana a indanna pawh chu ei tawh lo turin ka ti a, fa neih ve ka chak tawh em avangin, mahse ani chuan a duh tlat lo mai a, thinrim viau dawn lahin tihngaihna ka hre si lo. Ani chuan fa nei tura inbuatsaih dawn chuan dinhmun ṭha leh sang tak a din phawt chu a duh a ni.

A hma ang bawkin a hna ah chuan a buai em em reng a, kum laihawl vel thleng pawh chuan min enkawl hman meuh lova, zan lamah te hian khum khatah kan mu nge mulo pawh ka hre ta lo, ka hrisello chho tial tiala, chuti chung pawh chuan a hnaa a inpek zawh emvangin mi a enkawl hman ta meuh lo a ni ber.

Zankhat chu tlai lam aṭangin ka awm a nuam lo zual hle a, eng emaw ni tak tawng turah hian ka inngai tlat mai a, ka mitthlaah chuan Elf-i hmel a rawn lang zuaih zuaih reng mai a, a thih dawn leh a thlan bula ka awm lai kha ka hrechhuak leh zawk zawk ṭhin. Elfi ringawt ka ngaihtuahna a awm lai chuan ka ngaih a zual em em a, ka nupuiin mi a ngaihsak hman si lo. A hnathawhna hmuna a awmdan leh eng ang taka buai nge a nih lah ka hriatpui hek lo. Ka nu kha la dam ve se chuan ka bulah a awm anga, eite min siam sak ang a, min chhawk deuh tur hi a nia..ka ṭhianpa Lawmtea lah ka phut ngam tawh si lo.

Chu mi zan ka mumangah chuan Elfi thlan bulah hian ka lo ṭap, ka lo ṭap a, ka mittui te chu a luang zawih zawih reng a, a thihdawna ka thiltih te ka ngaihtuaha, ka inchir ta em em mai a, a ruang kan hmuh tirha a hmelte nen lam chuan ka la theihnghilh si lo.

Chutia thlan bula ka ṭah lai chuan ka hnuangah hian amah chuan min rawn au a,
"Rawn kal ve mai rawh a nuam asin..ka lo la nghak char char che a nia.." tih thu hi a rawn sawi a..
Ka harh hlawl chu, ka han inchul vela, ka mittui a lo tla nasa mai a, ka thlan hluama, ka ṭahchhuak a la reh thei reng reng lo. Chutia ka ngaihtuahna bing tak mai a a kal lai chuan, kawngkhar inhawng thawm hi a rawn ri a, Caroi a nih ka ringa, a rawn mutlaia lo harh kur chu ka duh loh avangin ka muhil der ta a..

Amah chauh a ni lo tih hriat tak mai hian, thawmdim fahrana kepen thawm hi ka hre thei bawk a, Chutih lai chuan kan room kawngkhar chu a rawn inhawng riai riai a, rizai kar aṭang chuan ka va melh a, Caroi a lo ni a, ka harh lo emaw tiin kawngkhar chu a khar leh daih a..

A mi rawn hruai nen chuan thawm dim tak mai hian, ka nu room ah an lut a, eng nge an tih ang tih chu ka hre lo, tunge a rawn hruai chu ka hre lova, mipa nge a nih hmeichhia tih pawh ka hre hek lo.

Chutia ka nu room-a an awm rei deuh takah chuan ka ngaih a ṭha ta lova, thei leh thei loin kan room aṭang chuan thawm dim tak mai hian ka chhuaka, ka nu room bang aṭang chuan an thawm chu ka ngaithla ta a.
An ṭawng se se reng a, eng tak nge an sawi erawh ka hrethei lo. Khumah an awm ngei a ni tih ka hrethei a, Caroi chuan "ṭawng tawh lovang, ka pasalin a hria a nge.." a tih thawm chu ka hre thei a, mipa âw tih hriat tak mai hian a mihruailuh pa chuan "awle, a hre lovang' a tih thawm hi ka hre leh ta a..

Dim fahranin chu room kawngkhar chu ka keu hawng a, ka han hmuhchian chiah chuan khumah an lo mu duna, sex an lo hmang a nih chu.

Va luh a, chupa va sawp hrep mai chu ka duh hle a, Caroi ngei pawh chu ka haw em em mai a ni. Ka thin natna leh ka thinrimna chu a hrehawm hle a, insum hram erawh ka tum hle a, ka rilru chu na hle mah se, ka chan tawk a ni tih chiang takin ka hria a, rei pawh en lo chuan room lamah ka luhsan ta zawk a.

Ka khum aṭang chuan an thawm chu ka hre phak lova, hriat phak pawh ka duh hek lo. Caroi mizia leh hmanna a awm dan aṭanga, tun hun thlenga a awm dan ka ngaihtuah hian mak ka ti a, ka hrehawm ti lutuk chu engtia tih chi nge ka hre si lo, zan engzata tam nge ka nu roomah chuan an lo mutdun tawh ang le.??. zan rei tak takah a lo haw a, ka bula a mutlohna chen chu engtia rei tak ni ang maw..

Eng ngati nge hetiang thil hi a tih le, eng nge a chhan ni ang.? Min hmangaih em em ṭhintu engkima min enkawla, min duat em emtu ka nupui khan kan inah ngei tlangval dang a mutpui ta chu a ni a. Eng nge maw ka tihsual le..??

Ka natna tawrh leh ka dinhmun chhe lutuk hian, a mi hmangaihna kha a umbo ta em ni.? Nge min lo bum mai mai zawk..Min hmagaih emaw ka ti kha a nia..

HMUN DANG HUN DANG (bung 6)

Kâwl chu muang changin a rawn eng a, tlang phen aṭang chuan nî chu a rawn pawng ṭial ṭial tawh a, a rawn chhuahna lam chu ka hawia, mit lawnga en ngam tawk lektê hian ni chu a rawn lang tawh a, ka mit ka han chhing a, vanlam hawiin zing boruak thiang tak mai chu ka han hip kawk a, thlifim chu a rawn thaw leh heuh heuh ṭhin.

Lawmtea chu ka bulah a rawn ding a,
"Ṭhian, vawiin chu Elf-in thu min chah asin. Khi tilai lawkah khian a ṭhu a, 'ka lo nghak ang' a ti che a."

"Ka hria lawm..nizan khan min rawn hrilh a, ka hmu hreh asin..chuan ka lai deuh ṭut bawk sia..ka kal ṭep..mahse..aa..ka hmu chak tawh lutuk tho.."

"A ngai lutuk che lawm..a ni pawhin. A hmu chak lutuk che, a hma ang kha a ni tawh lo. A duh lutuk che a, a awmna hmunah chuan i awm ve hlan a nghakhlel lutuk asin".

"Awle..Lawmte ka ṭhian ṭha tak i ni..hehe..ka lawm lutuk..kan han kal a nge.."

Phul hnim te tak tetê te chu ka rap thle siau siau a, ná an tih ka hlauh deuh avangin, ka han rap na duh lo va, dimte chuan ka kal a, thlifim chu a rawn thaw leh heuh heuh ṭhin bawk a, sava hram mawi tak tak te chu an ri chiah chiah a, van laizawlah vamur leh changkak te chu an inchhaihkual vel bawk a.

Ral aṭang chuan ka'n thlira Elfi chu ka hmu phak tawh a, ka hmuh veleh chuan ka mur chem chem a, a bul ka thlen hunah engtin nge ka tih ang aw..eng nge ka sawi hmasak ber ang le..??

A bul ka hnaih tial tiala ka zam tulh tulh mai leh nghal. Ka thawm a hriat chuan ka lam a rawn hawi a, nuih sen sen pah hian,
"I va rawn thleng har ve..ka nghah rei tawh zia che hi ..ka lo haw hman lutuk che a..lo kal rawh, ka bulah hian lo ṭhu la.."

Ka tihngaihna hre lo chu ka nui ta ringawt a.
Tichuan a bulah chuan ka ṭhu a, ka kokiah a lu a rawn nghata. Zawi te te hian kan ti ti a, kan han nui leh rih ṭhin bawk.

Chutih lai chuan kawngkhar rawn inhawn thawm chu a ri a, ka han harchhuak hlawl a, kawngkhar lam ka han melh chuan Caro-i hian,

"Pa a, ka chhuak aw, hei i eitur chawhmeh fridg-ah ka dah a nia..bye aw.."

Ti thu a rawn sawi zawh chuan a chuak ta a.

Tunge maw a nih chiah le , "pa a" min la ti ngam a nia, eng nge maw he inah hian a la awm reng duh zawk le..? Nge kei hi awmlo ila, kan hlim zawk ngei ang maw..

Ka kalbo a nih chuan zalen takin ngaihzawng te chu nei leh zawk sela, a duh leh an khawlamah pawh a kir leh ang a, ka chhuak phawt anga, thil chu a ṭha vek mai ang.

Enge tihtur ber ka va han hre lo em, khawvelah hian tunge ka neih ve tak ang le? Eng nge tunah hian dam thlakhlelhna chhan ka neih tak, dam chhan ka nei tawh em mawni le, eng hian nge min la chelh ve hram hram ni?. Min chelh tawh lo mai sela ka va han ti em. Ka mumang ram kha khawiah nge maw a awm tak le? Mit ka han chhing leh lawk anga ka tawng leh mahna le..? Mahse a sawt si lo.

Tlailamah chuan khawiah nge maw ka kal ang ni? Ti a ka inkhap buai vel lai tak chuan Caro-i a rawn lang thut a, a hnungah chuan nizana a mutpui pa khan a rawn zui bawk a, ina an rawn luhchhiah chuan biak pawh kan inbe lova, sitting room lamah chuan an lut phei a, an hna buaipui laite chu an bag aṭang chuan an la chuak a, a titi dun nghal ta mawlh mawlha, nizana an awmdun dan vel ka hmu tih reng an hre si lo.

An awm dan leh titi kalphungah chuan ṭhian satliah mai an ni a, nizana thil thleng te pawh kha an tan chuan thleng lo ang hmak a ni. Caroi ṭawng mawlh mawlh lai chu ka thlir reng a, kan intawn tirh aṭanga tun thlenga a awmdan ka tehkhinin, a thiltih ṭha lo chu eng tia ti thei nge a nih ka chhutchhuak zo lova, ka hrethiam lo tak zet a ni.

Kei hian a duhzawng ka pe lo nge ni ang le? Tlinlohna tam tak chu ka nei ngei ang, keimah hi ka thiam lo a ni ang nge, ka siam danglam theih loh thil a ni zawk, ka thil hmuh leh hriatte chu na in hrehawm hle mah se, ka pawmthiam a ngai si a.

Chutia tui taka an titi lai chuan Caro-i chu a rawn hawia, min rawn bia a.
"Pa a, zanin chu chawhmeh tui deuh ka siam sak dawn che nia, i ril a ṭam tawh em?"

"Aih, hei Lawmte a'n an inah chaw eiturin min rawn sawm a, ka va ei zawk dawn mawni ka lo tia.."

"Ngati maw..chaw kan eidun khat em hi..zanin bak chu ka hman leh mumal tawh awm si lova.."

"A..hun ala awm mai ang, inkhatna cheng kan nih hi, hun a la awm mai ang.. hei tunah ka kal nghal mai dawn a nia..'

"A va buaithlak ve...aw pawilo, hun a la awm mai ang, nih leh puar deuhin i va ei dawn nia.."

Chhuah ka tum chiah Caroi bawk chuan "taka, zanah ka chhuak leh dawn a nia aw..min lo nghak lo mai dawn nia..kan buai rei leh maithei.."

"Awle" tiin ka chhanga, ka chhuah san ta a..

HMUN DANG HUN DANG (LAST)

Lawmtea chuan kawngkhar chu a rawn hawng a, ka hmel a hmuh chiah chuan ka lan danah a hriat viau nge ni ang.

"Ngati nge, ṭhian.? I awm a va nawm loh hmel ve.."

"Eng ngati nge, dik lohna ka neih pawh ka hre lo, ka thawhah a chhuak zeuh zeuh tih chauh lo chu..chu pawh a nasa lem lo."

"Caro-i hi a la chhuak deuh reng em?, a buaipui mumal hman meuh lo che chu a nih hi."

"Nia, a hna ah hian a inpum pek a, a ṭha phian mai, a hlima, sum pawh a thawkchhuak hnem tawh asin."

"A niang, a thawk rim bawkah, nupui fel tak i neia. I vannei teh e.."- " chaw i ei tawh em,?"

Kei chuan ",Ei tawh e..Ka ei peih tawh lo ang, ka ril pawh a ṭam lem lo.."

"Awle, kha tv te kha lo en la, chaw kan han ei a nge..lo ṭhu rawh.."

Chaw a eikham chuan, kan chhuak dun ta a, khawlaia inkawm chung chuan hman aṭanga kan tih ṭhin dan ang chuan kan titi dun leh ta a..

"Ṭhian, Caroi mizia hi a dang tawh khawp mai, zanah te hian, a rawn haw tlai thei lutuk a, i ngaih te hi a ṭhalo velo em ni..? Ka nupui nise, hetiang hian ka awm tir miah lovang, fa te pawh hi in nei ve dawn lo vem ni?"

Kei chuan "Nia, a dik khawp mai, pasal ṭha tak ka ni lo a niang, nupui neih hi, a nuam chinzawng chauh kha ka lo ngaihtuah em mawni dawn ni..hehe..Nia.. fa chu neih loh kan la titlu deuh aa, kan nei ve vat mai ang.." ka han ti ta ringawt a..

"Anih chuan, fa chu nei vat rawh u, ka lo awm sak ṭhin dawn che u nia..hehe"

Ka rilru hah leh hrehawm em em laia, ka ṭhian Lawmtea ka kianga a la awm reng thei hi ka va han lawm em.. Zanin ah chuan ka ngaih em em Elfi zuiin, hmun dang hun dangah chuan ka kal anga , chutah chuan he ka awmna lei hi kan theihnghilh tawh ang..Ka damchhunga ka tana awm reng leh a tawp thlenga ka tana awmchhun chu Lawmtea chauh hi a lo ni ta a nih hi.

Hun rei tawk tak kan inkawm hnu chuan an in lamah chuan ka va thlah a, ani ka thlah zawh chuan Elfi zalna hmun thlanmual chu ka pan ta a..

Thla a lang lova, a thim khupa, thlanmualah chuan indap chawpin Efl-i thlan awmna hmun chu ka thleng ve thei ta hram a, chu thlan bulah chuan ka ṭhu a,
"Efl, zanin chu i kiangah ka rawn kal ve tawh dawn asin, min lo hmu em? I thlan bulah ka lo kal leh asin, tun ṭum chu a vawihnihna a ni bawka, min duh ve zia thu chauh tal chu min hrilh ve tawh dawn nia, a der tal pawhin min chhang la ka ti, chu chauh pawh chu ka mamawh a ni. i hmagaihna em chu ka la phut ngam lova, mahse tlemte tal pawhin min ngaihtuah zia lo tilang ve hram ang che..

A thlan bulah chuan ka ṭhing ṭhi a, ka mittui chu a far zung zunga, "He kan chhenna lei hi kan tan chuan natna ram a ni a, kan tana siam leh ruat a ni ve lo a ni ang tiraw..?"

Kan sawi ṭhin hmun dangah chuan natna a awm tawh lo ang tiraw, a hma khan rawn zui ve nghal mai awm che ka nia, mahse hei tunah chuan ka lo kal tak tak tawh dawn a nia.

Ka bawk thlawpa, ka mit ka chhing ta riai riai a,

Ka han harchhuah leh chuan, Nî chu a lo tlangsang tawh hle a, ramngaw hnuai chu thlifim chuan a rawng fang kuala, hnim te leh thing hnah te chu a chhem ri seng seng a.

Thing zarah te chu sava mawi tak takte chu an fuh kuala, thehlei te chu an lo inum kawi zar zar bawka, hmuh an nuam ngei mai, thing buk kar aṭang chuan nizung chu an rawn lang siar siar mai bawk a.

Tichuan ka kal zel a, tlema a thelh lai deuh ka thlen chuan, phul hmun hi a lang thei a, ka han thlir chhoh chuan, tuemaw hi ka han hmu a, Elf ngei kha a nih ka ring ta a, ka han kal hnaih chuan ka lam a rawn hawi a,Elf ngei a lo ni, muang changin min rawn pan a, ka hnen a rawn thlen chuan, kan innuih sek a, inthlahlel takin kan inkuah ta vawng vawng a.

THE END