INTAWNG LEH NGEI ANG AW

INTAWNG LEH NGEI ANG AW.
- Chhantea Pautu

Sangtei:

       Muanawma'n Aizawl a rawn thlen thlak ni chuan, ka lo hriat dan leh Rintei'n min hrilh dan hmehbela hmuh ka lo tum a; mahse hmuh ka tum dan ang ngawt chuan ka hmu lo.

       Rintei khan Muanawma hnenah a chanchin lungchhiatthlak tak pakhat hrilh turin min ti ṭhin a. Muanawma'n hre ngei se a duh si, ama'n a hrilh ngam si loh vang a ni a; khatia Rintei a boral tâkah chuan hrilh ngei ka duh a, amah Muanawma lah tih tur eng emaw a neih avanga Aizawla a rawn kal remchan lai tak a lo ni hlauh a. Amah la hmu lo mah ila a hming ka lo hre fo tawh a, kan Ina a rawn kal ṭum pawh chuan han zah em emna ka nei lo. Kan Inah a innghat nghal a, karkhat zet a cham a ni.

       Amahah mipa zia dik tak ka hmu: a luhlul ruk riaunate, chutih laia hmeichhia a care em em site chu ka hriat loh karin ka lo hmuh hmaih miah lo va; a awm chhungin amah chu ka thinlungah ka khung fel der a.
Mak ka va ti em; mahse tunhnaiah buaina tam tak a neih avangin a haw chho leh ta mai si a.

       A hnu fê-ah reilotê chamin a rawn kal leh a; hemi ṭum hi chuan ka rilru a hre tawh a, kei pawhin ka laka a rilru puthmang ka hre tawh. Mahse a va cham rei lo si tak.
Min rawn hmua rawn kal leh ngei turin ka intiamtir a

"Kan vangkhawpui bela chhingkhual i rawn chan ni khan e,
Kar pawh awm hman lovin ka lo hmangaih reng che a maw;
Mahse tuan tul vang hian min liamsan leh ta si,
Kan intawng leh ang tih tal min tiam rawh"

Muanawma:

       Sangtei chu a hmel ka hmu a, ka mitthla a, ka ngai hle dawn tih ka hria; tun ṭum ka haw tur zet chu le.

       A mi en dan ka hmu a, a mit mengah min hmangaihna ka hmu a; chuvangin amah hmu tura kal leh tura min ngenna pawh ka tan tihhlawhtlin a harsa dawn lo. Rinawmin awm se ka duh a; ka tan a rinawm ngei ang tih pawh ka hria. Amah ka duhna ringawt pawh hian thil ṭul chhuanlam tur zawng chawpin a lamah min kaltir ngei ang.

"Tuar i har dawn ngei ka di i sakhmelmawi ka thlirin,
Hmangaihna chhingmit ngeia min thlir vang hian;
Ka tiam nang che rinawmin lo awm reng la,
Duhluat vangin lam ang ka lo lêt ngei ang"

CHORUS:

       Muanawma leh Sangteite inhmangaihna chiang tak hi, eng emaw avanga pawh ṭhen ni ta se, awlsam tak chuan an tuar dam lo vang! An pahnih inkarah, an inhmuh lehna tur hian kumkhat hman chhung ringawt pawh hi an tan a rei lutuk mah mah a ni. Nikhat pawh a la rei lutuk mah mah fo. Thihna chauh chu an pahnih kai hrang theitu awmchhun ni se an duh ngei ang.

"Ka tuar nem thei dawn lo sam ang kan inṭhen chuan,
Sakhmel mawi leh ka di lalnunnemte...awww,
Kumpui sul vei hma ngei hian intawng leh ngei ang aw,
Thlafam chan hma loh chuan ka ṭangah bei hle hle"

Sangtei:

       Hmangaih dang, kawp mék dang nei reng chung a, "Ka hmangaih che," min tih ka hlauhna chu a lian hle a; ka hlauthawng a ni!

       Hmeichhiaten kan hlutna leh zahawmna neih chhun Muanawma'n min chenpui zawha min kalsan leh mai hlauhthawnnain min chen chilh lai phei chuan; ngaihtuah pawh ngaihtuah thui ngam lovin ka hmai ka hup ringawt a.

"Hmangaih dang nei reng chung chuan biahthu di min hlan lo la,
Ka thianghlimna pârmâwi thliaka min liamsan leh si chuan;
Riakmaw îanga vàiin dairial ka chang ngei ang,
Ka dawn sei ngam lo awww ka chan tur hi"

Muanawma:

       A laka ka rilru put dan chungchanga a hlauhthawnna ka hre thiam. Hlauthawng lo se ka duh takzet a; a hlauhthawnna reh ṭhak khawpa a laka ka rilru ngheh zia sawi thiam ka duh hle a ni. Ka nunna meuh chhala a laka ka rinawmna thu chu tiam nawn leh ngat ka duh a.

       Ka hmangaih a ni. A mak khawp mai! Chu chu min Siamtu Pathian hian min hriatpui se ka va han ti em.

"Siktui luankir hma loh chuan rinawmin awm reng nang e,
Ka nunna chhalin ka tiam nawn leh nang che;
Ka hmangaih che duhlai di enchim loh;
Min hriatpui turin khuanu ka thlang nang e"

Sangtei:

       Ka laka a rilru puthmang ngheh zia leh rinawm zia min hrilh fiah chuan ka thinlung hlauhthawnna a ti dam a; ka hmangaih a, rinawm takin ka nghak dawn a ni. A nupui duh tak ka nih thlengin ka hmangaih reng ang. Ka chiang a ni; Muanawma hi ka hmangaih reng ang.

"Suihlung muangte'n hmangaihnain ka lo nghak reng ang che,
Kumtluang i thai ka chan thlengin ka hmangaih reng ang che"

Muanawma:

Thlamuang takin, ngaihngam takin zanah muhil se ka duh. Tlin lohna tam tak ka nei ve ngei ang; mahse a tana ka rinawm kawngah a ngaih ngam se ka duh a ni. Hmangaihna, rinawmna, nghehna leh thildang kan sawi dun zawng zawng kha kan pahniha hria a, thinlunga vawn reng ka duh bawk!

Sangtei hi ka hmangaih a ni.

"Suìhlung muangte'n zan mu lo chhing tawh la,
Kan tiamthu di zawng kha i vawng dun zel ang aw"

He hla-in-chhang hi a fuh riau asin. Ka thawnthu ziah, PARADISE LODGE lama a changtupa Muanawma leh Sangtei  inkar thu angin ka rawn thai chhuak a ni. Ka thu ziah hian a nihna a phawk zo hauh lo vang; mahse mahni remchan danin he hla hmang hian mipahnih inkar ka rawn ngaihruat a, ka rawn ziak chhuak ta mai a nih hi.

CFL-a  hla kha i han ngaithla lawk teh ang!