DRöMVäRLDER: Stugaz av Paradis😉
(Fantasy Love Story)
© Chhantea Pautu
Chapter One
DRöMVäRLDERIAN ho chu a phu sang sang a, an hmelah lungngai hmel hmuh tur a awm lo. An zavai mai chuan nelawm deuh hian an nui sâng hlawm a, an hmel chu a nung siah a, an vun rawng inang hlawm lo mah se an vun chu a nung sar vek a, chhungril lama an hlimna chuan an pawn lam lan dan chu awhawm leh hlimawm deuh mai hian a siam a.
An awmna hmun chu niin a chhun êng sût a, thingkung mawi tak tak a ding thliah thluah a, phaizawl cham dep zîngah chuan tlang pawng lian teh chiam lo, phaitual hnim hring hlepin a bawh khah tlat hi a bawk thliah thluah bawk a; chung phai zawl leh tlang pawng bul velah te chuan Ramsa chi hrang hrang hi an awm a, intaina leh inhûatnain hmun a chang lo reng reng a ni.
Chu hmun chu DRöMVäRLDERIAN te chuan, 'Stugaz av Paradis' tiin an sawi a; chulai hmunah chuan ruam rai nuam zet mai, zâu fê hi a awm a, a khat tawkin fel thlap leh awmze nei deuh mai hian an chenna in lian leh te deuh tak te, 'Stugaz' an tih chu a awm a, chu tiang pakhat zelah chuan a chhungkua kuain an khawsa hlawm a, chhungkaw khata mi an tam chuan an 'Stugaz' chu a lian ve zel mai a ni.
Ruam rai hmar lam tawpah chuan in lian deuh bik tak mai pakhat, 'El Stugazsi' an tih chu a awm a. Chu in chu in dang te ai chuan a lian hle a, 'Stugaz' an tih ho zawng zawng pawh chu, chu in lian bik tak hawi zawng veka awmze nei taka rem vek leh sak vek a ni bawk. Mak tak maiin 'El Stugazsi' an tihah chuan tumah an cheng lo va, engtik lai pawhin a ruak reng mai a ni; mahse a chhung chu a thianghlimin a fai reng a, bawlhhlawh reng reng chu in lianpui maiah chuan a awm ngai lo. A pianhmang chu sawi fiah thiam loh khawpa ropui leh mawi a ni a, in chuan pindan mawi leh lian tak tak sawm 77 lai a nei nghe nghe a, a chung chu a ṭhen laiah chuan a chhip a zum a, a chhip zum te pawh chu a ṭhen a sang a, a ṭhen a hniam a ni; a awm zia chu El Stugazsi chung zum te chu a inchen lo sung tihna a ni.
Ni chuan El Stugazsi chung zum te chu a chhun tle sût a, chu lai ruam rai chu Nî chuan a chhun no nghelh a, ral aṭanga han thlir ngawt pawhin hah a ti dam sawng sawng thei a ni. E, kan sawi hmaih ṭep alawm; chu chu hei hi a ni- El Stugazsi chu chhawng hniha sak a ni a, a chhawng chungah chuan bathlar zau tawk tak pali a awm a, hmar lamah pakhat, chhim lamah pakhat, thlang lamah pakhat, chhak lamah pakhat a awm a ni. Chung bathlar leh a chhung chhip zum te chu engti hawi zawng pawhin a lan dan a inang vek a, a mawi em em a, a mawi tih hian a hril fiah zo lo hial a ni.
El Stugazsi chu a ruak a ni tih thu kan sawi tawh kha. A ruah chhan chu a chhunga cheng tur, lo la kal tur mi pahnih, hmeichhia leh mipa DRöMVäRLDERIAN te chuan an lo nghak a, an mi nghahte an lo thlen hma chu El Stugazsi chu a ruak reng mai dawn a ni. Lo la kal tur te chu DRöMVäRLDERIAN ho chuan, 'Stugazanans' an ti a, an sawi danin an chunga roreltu tur te an ni awm e.
Hun rei tak kal ta khan Stugaz av Paradis chu, chulai ruam rai leh phai zawl tawpa awm tlang pakhat, 'Helveteror' an tih maia misual tak pakhat Diabolto chuan tih chhiat tumin a lo rûn tawh a ni awm e; mahse chumi ṭum chuan Stugaz av Paradis chu a ti chhe thei ta lo va, beidawngin a kir san leh ta tih thu an sawi ṭhin a ni.
Stugaz av Paradis velah chuan nun chu a nuam em em a, thil reng reng chuan a hlimawm lam a hawi vek a, chu ruama chengte khawsak phung chu mawlmang leh tlâwm tak, hnawksak lo zet leh hawihhawm tak mai hi a ni a, thil reng reng chuan a hahdam lam zawng hi a hawi fai vek mai hian a hriat a ni. Chu hmun chu nun chawlhna zawngte tana thlannahawm, chhenfakawm leh belhfâkawm a ni a.
* * * * * * *
Rainer chu tlangval hlim thei tak a ni, a nun chu a hahdam em em a, a hnawk lovin engtiklai pawha mite ṭanpui inpeih reng mai leh, ṭanpui ngai a hmuh tawh phawta puih tum tlat mai ṭhin hi a ni a. Ṭanpui ngai puih tur a hmuh phawt chuan amah thil tih tur lam chu a ngaihven tawh ngai lo, phur takin puih ngai chu a pui mai a, hlim takin a tih tur chu a ti mai zel a ni.
Rainer-a hmelah chuan hlim hmel hmuh tur a awm reng ṭhin a, harsatna tawkin han buai ve ṭhin mahse, hnualna leh manganna hi a ti lang ngai lo a, nui chungin a khawvel chu a hmachhawn a, a beisei a hmuh rih loh pawhin a nghak mai ṭhin. Hmeichhe duh deuh mai hi a nei a, a hming chu Cloudine a ni a; mahse a duh a ni tih thu a sawi ngam ngai lo. Ral aṭangin a thlir ngam ṭawk a, biak te phei chu a inthlahrung a, vawihnih khat engemaw avangin an inbe ve tawh tih loh chu biak pangngai tak leh hnaih takin an la inbe ngai lo a ni.
Cloudine chu milian leh hausa fanu a ni a, Rainer erawh mi pangngai, hausa lem lo fapa a ni. Cloudine a duhin a vei em em mai chu hrehawm tih chang a nei ve ṭhin a, a chan phakah a ngaih loh avangin a hnaih ngam si lo va, ni khatah vawikhat tal chu an in chhehvel leh kawt vela Cloudine chetla lai chu thlir turin a kal ṭhin a ni.
Cloudine hian tlangval pakhatin a duh em em tih hi a inhre miah lo va, ama hlim hlimin a hlim a, a nun chuan enghelh a nei lo va, sum leh pai, khawsak phungah harsatna an nei lo va, a nu leh pa hausakna ringin nuam takin a khawsa a, hrehawm a hre lo va, nawmsak nawm zia pawh hre tak tak chuang lo mah se, tuna a nun hman danah hian a lungawi ve tawk em em mai a ni.
Rainer chuan Cloudine chetla vel a en zawha a haw kawngah chuan hmeichhe au thawm a han hria a, a ding chat a, au thawm rawn chhuahna nia a hriat lam pan chuan hmanhmawh deuh hian a tlan ta nghal a. Au thawm rawn chhuahna hmun a va thlen chuan thil awmzia chu a va hmu ta a ni.
Hmeichhe pakhat hi Sakawr chung chuang pathum hian an lo hualin an lo chhaih buai hi a lo ni a. Rainer a va thlen lai tak chuan hmeichhe darah pakhat chuan a han man a, hmeichhia chu a lo tal nasat ve bawk avangin a kawr a thler ta a. Hmeichhe mangang leh kawr ṭet an han hmuh chuan Sakawr chunga chuangte chu an nui ta vak vak a.
Rainer chu a han inngaihtuah a. Chutah, a bula lung pahnih chu a han chhar lawk a, hmeichhe lo hualtu te lam hawi chuan a han vawm ta vak a. Sakawr chung chuang pakhat chu a tla tawp a, pahnih dangte chuan Rainer lam chu an rawi hawi vat a, eng sawi set set lovin um tumin an Sakawr chu an pawt her a, a lam chu an rawn pan ta mai a.
Rainer chuan lung chu a han vawm nawn leh a; mahse tun ṭum chu a ṭhelh ta tlat mai. A bul chu an rawn thleng ṭep tawh a, an rawn thlen veleha lo chet dan tur chu a han ngaihtuah a, a bula hmawlh sei vak lo chu a la lawk a, inring deuh hian an rawn thlen hun chu a lo nghak ta a.
To be continue...
Comments