DA MUSE: The Adventures of Remruatfela

 DA MUSE

The Adventures of Remruatfela

©Chhantea Pautu 

Prologue

Remruatfela chuan hmeichhe hmangaih em em a nei a, an induhin an inngâi a, an inthlahlel tawnin, inhmu lo leh inbe lovin an awm thei lo a ni ber. Ni tin zan tin an inbia a, an inhmuh loh karin Phone hmang talin video call hmangin emaw, voice call hmangin emaw an inbe reng ṭhin.

Amah chu mipa sa nghet lam, hmel ṭha viaua sawi tur aia hmel pa lam pang zawk tak, hmel chhia ni chuang si lo, rilru pawh nghet ve tawk tak, thinlung nêm tak ni si, hmeichhia a kawp tawh vekte laka a rilru leh thinlung pe bur chi a ni a. Hmeichhe pakhatah a nghet a, a lerh lo va, a rinawm pawh a rinawm; a thîkthu erawh a chhe ve hle. Hmeichhe lakah a induh ve thiam lo va, hei vang hian harsatna a neih phah ṭhin a, a na zawkah a ṭan phah ṭhin a ni; mahse, a lakah hmeichhia zawk chu eng ang pawhin rawn che hmasain rawn be hmasa mah se, a ngai nêpin a nin phah ve ngai lo va. Amah hi adventure lam thila tui tak, a la hriat ngai loh leh a la tawn ngai loh thil hriat leh tawn châk tak mi a ni a, Detective lehkhabu a ngaina hle bawk.

Mahse, hmeichhe laka a induh ve ngai lo lutuk leh, a hmangaih hmeichhia a duhna a ti lang mawlh mawlh reng mai chu a hmeichhia zawk chuan a laka induh phah nan a hmang ta tlat mai. A hma angin a ngai pawimawh ta lo va, a ngaihsak ṭha duh lo va, chhan awm lovin a be duh lo ta fo bawk; chu chu amah hmangaihtu Remruatfela tân chuan tawrh thiam a har hle mai si. A hmeichhia chuan fiamthu-a sawi theih ni tho si hian mipa dang chhaihin a lerhsan ṭhin a, a tâwpah chuan loh theih lovin an inṭhen ta a ni.

Mipa zawk mah ni se Remruatfela chuan a la na hle a, mal ngawih ngawiha inhriain a khua a har em em a. Thinlung hliam chu rei tak a kawl hnu-ah a mizia a dang chho ta vek a, a nun dan pawh a thlak chiang ta kher mai; hmeichhe dang dang a kawp lawr ṭan a, rei lote kawpin a thlah leh zung zung a, hmangaihna avanga a thinlung chu hliamsak tawh a nih avangin hmeichhia a ring leh thei tawh lo. Zan khat emaw, vawihnih khat sex hmanpuia kalsan leh mai tlak lek hmuhin hmeichhia chu a hmu a ni. 

Chutiang lamah chuan a nun chu a kal ta a, ruih theih thil erawh a khawih lo; mahse, hmeichhe lakah a nghal ve tâwk a ni. A duh duha a khawih theih hmeichhia a tawn hnem tak em avangin hmeichhia chu a ring lo tawlh tawlh a, bialpa nghet nei reng chung si-a sex a hmanpui mai mai theih a tawn hnem em avangin hmeichhe rinawm hi an awm thei tak tak pawhin a ring lo.

Chutiang chuan khawsa mah se, kha a hmeichhe hmangaih avanga a thinlung ruak hnawh khahna chu a hmu si lo. A nun chu a ruak ngawih ngawih a, sex hmanga hnawh khah a tum a, a hlawhtling si lo, sex chu nawmna rei lote chauh a lo ni si. Hmeichhe rinna nei lo leh, nawmsip bawlna ang leka a ngaih a, eng atan maha a ngaih loh lai chuan hmeichhe pakhat, a duh duha a tih ve theih miah loh a tawng ta tlat mai. Chu hmeichhia chu a han bel chiang a, a hnaih tulh tulh a, a lakah a bet telh telh bawk. Tichuan, an inkawp nghet chho a, a hmeichhe kawp lawr a bansan chho ṭan ta bawk.

Chu hmeichhia nena an inkâr chu duhawm takin a pâr chhuak ṭan dawn chauh a, a kalsan tak hmeichhia kha a nunah a lo lang leh ta. Remruatfela chu hmeichhe pahnih inkârah a rilru a insual a, a thinlung chu chiai takin a awm ta tlat mai.

Rebecca-i chu a bo a; rûk bo nge, engtia bo nge hriat a ni lo. A thi tawh hial maithei. Remruatfela-a chuan khawi kawng nge a zawh dawn...a tâwpah chuan a tân hmeichhe pakhat chauh, kawng engkima fuih phur theitu chu a awm a...

* * * * * * *

Chapter One

Muse Melpomene.

"Heti khawp hian ka ngaihsak che a, ṭha taka chhan hi ka phu ve lo em ni? I duh hun hunah min be duh lo va, i duh hun hunah min be ṭha leh hle tho si," a han ti sap a.

Hmeichhia zawk chu a ngawi tlat a, eng tin mah chhan tum awm pawhin a lang lo.

"Laklawh deuha mi dang dah hi a ṭha lo asin. I rilru put dan dik tak chu min hrilh turin ka ngen che a ni, khawngaihin engkim sawi tlang rawh," a han ti leh a. 

Henu lakah hian a thinrim rei thei lo; hmangaihna avangin a tlâwm ngawih ngawih a, a lehpek awm leh thei tawh lo khawpin a inphah hniam ṭhin.

Hmeichhia chu a la ngawi tlat a. An piah deuhah chuan mi dang, Park-a rawn lêng an awm ve nak nak a; an pahnih awmna tak erawh a fianrial deuh a.

"Khawngaihin...ka ngen che a nih chu," mipa chuan a han ti leh a.

Hmeichhia chu nin hmel deuh hian an han thaw hak a, "I duh leh min kalsan daih la a ni mai alawm. Ninawm lutuk, ka hne," a han ti hmak a.

A thinlung chu tlawmlaknain a khat a; mahse, chu hmeichhia a hmangaihna chuan engkim hi a luahlan fai vek ni berin a lang. Hmangaihna avangin mipa a nihna a ti lang thei lo; chutih lai chuan hmeichhia chuan a Phone a la chhuak a, tu emaw hi a text mawlh mawlh a.

"Kalsan che ka duh lo. Nangmah zawkin min kalsan i duh niin ka hria a, i rilru puthmang chîang taka min hrilh turin ka duh che a ni. Khawngaihin engkim tunah hian sawi chiang hram rawh, nat leh ka na mai ang," a han ti leh a.

Hmeichhia chu a tûm hmak a, "I duh duh hian rilru kawi min puttir suh," a han ti leh hmak a.

"I awm dan hian a ti lang si a nih hi; nizana i awmpui pa kha tu nge ni reng reng? Vawi tam ka zawt tawh che a, min chhan ṭhat duh miah loh hi," a han ti leh a.

Hmeichhia chuan, "I hriat a ṭul lo," a lo ti leh hmak a. "Hlim taka inkawm turin min len chhuahpui dawn emaw ka ti a, hetiang mai maiah hian a ni maw i lo buai, nep lutuk," a han ti zui leh salh a.

A rilru chuan tlâwm hi a inti ngawih ngawih a; mahse, a hmaa hmeichhia thinrim taka ding chu a han en a, a hmangaih a ni. "Min ṭhen hi i duh a ni tiraw?" tiin a han zawt leh hrâm a.

"Ninawm, i duh zawk em ni? I duh leh min ṭhen la a ni mai alawm," hmeichhia chuan a lo ti leh hmak a. "Kal rawh, min kalsan rawh. Kal vang vang rawh," a han ti zui leh salh salh a.

Hmeichhiain a ṭawng khum dan avanga thinlung na tak chunga ṭawng tuma a kâ a àn leh zuau lai chuan, an lam panin mipa pakhat hi Bike hian a rawn tlan a, an bul a rawn thlen chuan a ding chat a. Hmeichhe hnenah chuan, "Kal ila," a han ti sup a. 

Chu pa chu nizana a bula a hmuh mipa ngei kha a ni. A hriat ngai mi a ni lo va, nizan leh tun bak hi hmuh pawh a la hmu hek lo.

Hmeichhia chu amah chu en pawh rawn en tawh lo chuan chu pa bike-ah chuan a chuang ta daih a, an tlân zui leh nghal daih a.

Ani chu rei tak chhung chu hawihai zetin a ding ngawi reng a, a hnu-ah harh chhuak thut ang mai hian a Bike lam a pan a, chak zet hian ammahni chu a um zui ve ta nghal a. 

A tlan chak vet vet khawp mai; mahse  a va um pha hman ta chuang lo. An inah a um zui phei nghal a, a hmangaih chu chuti maia chàn a tum hauh lo; hetiang tak maia atthlaka awmtirtu chu hmangaihna niin a lang ber a, amah chuan a awm dan chu a dik em, dik lo em tih pawh a ngaihtuah hman tawh lo, kalsantu hmeichhia kha neih lêt leh duhin a um mêk a ni tih chiah a thinlungah a awm a.

* * * * * * *

R15 V-3 chu in lian ve tak kawtah chuan a rawn ding chawt a. A hnunga chuang zawk hmeichhe pian nalh tak mai chu hmanhmawh hmel zet hian a chhuk a, in chhungah lutin in chung lam pindan a pan chho nghal a, a hmel chu a nelawm lohin a meng thip hle a, chokaa lo awm Sêntei chuan eng harsatna nge a neih a hre lo. A nutei nena an inkar chungchang pawh hi a hre chiah chuang lo va.

In chung lamah chuan rei lo teah inhau thawm a hre zui ta nghal a, a hma ang bawkin buaina a awm leh dawn tih a hria a; hetiang a thlen chânga a lo tih fo tawh danin a room lam pan chuan a kal vat a, a lut a, kawngkhar a khar a, ear-piece hmanga hla ngaithlain a inkalh khum ta hmak a.

A nuteite inhau thawm chu a room aṭang chuan a zawi ta deuh hlek a, a ziaawm deuh; mahse, hetiang a thlen chang chuan a awm a nuam thei ngai lo va, hlau leh ṭi dêkin a awm a, a thin hi a lo phu dep dep ṭhin a ni. A chαng chuan a u hi a khawngaih thei em em a, a lo hlauhthawnpui thei hle a ni. A u erawh hi chu chuti maia derdep erawh a ni bik lo, a hmel ṭha a, a paukhauh a, a tih loh zawngah chuan a khauh thei hle; chuti chung chuan a rûka mi zakzum leh zei lo ru tak a nih chu Sêntei pawh hian a hai lo va, a chang chuan a mizia hi a hre thiam lovin mak a ti ṭhin. A thinlung chhungrilah erawh mi sual a ni lo tih chu a chhut thiam ve dan a ni tawp mai.

* * * * * * *

A um phak loh hnu-a an in a va thlen chuan a han inkiltawih leh deuh a, a rilru chu inthlahrunna hlirin a khat leh ta thung si a. Rei deuh chu lût mai ngam lovin a ding reng a, a tâwpah chuan a inti paukhauh lui a, in chhungah chuan a lut ta nge nge a.

Kawngka chu tîm deuh hlek chung hian a han kik a, a vawi thum kiknaah chuan a rawn inhawng ta a. A rawn hawngtu chu hmeichhia, kum 20 mi vel, lian vak lo, ngo vir ver, hmaifang fuh deuh mai hi a ni a, a lo nuih seih a, "I lo lêng dawn em ni? U Rebecca-i chu a awm lo va; mahse, lo lut tho rawh," a lo ti a.

Kawngka lo hawnsaktu chu Sêntei a ni a, Rebecca-i nutei fanu, Aizawla lehkhazira rawn awm a ni.

"Khawiah nge i u chu a awm a?" tiin a han zawt a.

"Ka hre lo. U Johny nen khan an rawn inphur haw a, ânu Mawii nen khan an inhau leh vak vak a. Chuan u Rebecc-i khan u Johny kha chhuahpui leh daih turin a ngen a, a bag-ah a thawmhnaw tlem a ak a, an chhuak leh ta daih a nih kha," Sêntei chuan a han ti a.

"Ni dangah a nu nen chuan an inhau ṭhin em ni?"

"Aw, an inhau ngun khawp mai."

"Eng thilah nge?"

"Ka hre lo. An inhauh tawh chuan ka room-ah ka lut a, ka inkalh khum a, ka inthiar fihlim daih zel," Sêntei chuan a han ti a. "U Rebbec-i hi i hmangaih hle a ni tiraw?" tiin a han zawt zui a.

Ani thung chuan, "Chutiang sawi pawh ka châk rih lo," a lo ti mai a. "Khawiah nge nu Mawii chu a awm a?" tiin a han zawt daih a.

"U Rebbec-i te a um zui ve ta a nih kha. In hi lo nghak turin min ti a," Sêntei chuan a lo ti mai a.

"A nih tak chu. Kei pawh ka haw a ṭulin ka hria," tiin Rebecca-i te in chu a chhuahsan ve ta nghal a, kal leh pawh a tum tawh lo, a ṭulna lah a awm tawh hek lo.

Sêntei chuan khawngaih hmel deuh hian a chhuak ta chu a en zui vang vang a, a Bike-a a lawn a, a inkhalh chhuah thleng chuan a thlir zui reng a, a kal liam hnu chuan, "Eng mah hi i hre thiam si lo, a pawi ngawt mai," a ti sap a.

Ani thung chu inngaituah ding tak chungin a inkhalh haw a. A lungngaihzia leh a khawharzia chu nasa tak a ni. In a thlen chuan a nau pawh be lovin a room-ah a lut tlang a, a inkalh khum ta hmak a. A nau chuan mak tih hmel deuh tak hian a lo en hâ a.

Mipa ṭah nan a ho em? A thinlung chu chem zuma vih ang maiin a na a. A lehpek awm thei tawh chuang lo tura hliam, ser nei tura hnutchhiah, a rinna pheh thluksaka awm mihring a ni si.

A khum bul chhuatah chuan a ṭhingṭhi hnawk a, "Min theihnghilhtir rawh LALPA, theihghilh ka duh a ni, theihngilh ka duh a ni," a ti a. A inhup a, a mittui chu a rawn hnâm a, khum bawh chuan a ṭhen tlawk tlawk a. Heti tak maia inngaihzawnna thil a la na mai ṭhin hi amah pawh hian inhriat thiam har a ti. Loh theih lova a kalsan a tum tâk hmeichhia phei kha chu a hmangaih a ni, a hmangaih takzet a. Hmangaihna la na chi leh larun chi, ani ang mipa hi an tam kher lo vang; mahse hei hian a na zawkah a ṭantir fo si a.

Rei tak chhung chu hmeichhia ang maiin a room-ah a inkhung a, a eng tih mah a tui thei lo va, a rilru leh thinlung chu chemtea chhun ang maiin a na kan tih tawh kha. Mi thinlung nêm, hmangaihnaa nghet kha a ni si a, eng tin nge hetiang thil hi a chungah a thlen theih zawk?

A room kawngkhar chu a rawn ri dawt dawt a. Remruatfela chuan a ngaihsak lo va, a room pawn lam aṭanga a nauin a rawn kohna pawh chu a chhang duh hek lo. A mittui hnâm kha a reh tawh a, a melh ngai melhin khumah a ṭhu kun chal a, a hmel chu a nelawm loh lam mah mah a ni. A mittui tla te, a thinlung natna te, a chhungril natna tawpkhawk avanga a room-a a inkhunga a awm dan zawng zawng, a natna a lan chhuahtir dan hi pawn lama a tih lan ngai loh, mi hmuha a thup ṭhin, a pindan chhungril nun dan thuruk chu a ni. Hetianga a awm ṭhin hi a nau Melody chiah hian a hria; ani hi chuan a hriatpui a, Rebecca-i avanga a nat ṭhin dan zawng zawng hretu leh a kîanga awm ṭhin a nau duat em em a ni. Mahse, tun dinhmunah meuh chuan a nau takngial pawh a hmu peih lo va, mahni chauha awm a duh a ni.

A room kawngkhar chu a rawn ri leh dawt dawt a.

Nu leh pa nei tawh lo chu a ni lo. A nu leh a pa chu Remruatfela nausen laiin an inṭhen a, a pa chuan nupui dang neiin Brendon-a chu a pa bulah nuhrawn hrawnin a sei lian a, hrehawm tin reng pal tlangin a naupan lai hun zawng zawng kha a hmang a; chuvanga a rilru pawh no ta deuh a ni maithei bawk. Tichuan, loh theih lohna avangin Aizawlah a chhuk thla a, mahni kea din tumin bul a ṭan a, a khawsak a harsa ṭhin hle a ni. A chhuahsan tâk a chhungkua khan a awm loh hnu-ah boruak ṭha leh hlimawm an neih ngei a beisei a, amah hringtu a nu hnen lam pan emaw, a chhuahsan tak a pa in lama let leh emaw a tum tawh lo.

Harsa takin bul a ṭan a, a vanneihna kawng a inhawng a, buaina awm lovin tluang takin a ei zawnna kawng a zawh a, a harsatna ber chu hmangaihna lama a tluang thei lo hi a ni. Rinawm bur, pakhata nghet bur a nih avangin a thinlung tih natsak pawh a awl bîk a, inngaihzawnna hi ho mai maiah a ngai ve thei lo a ni. A nau Melody hi a pa nupui hnuhnung zawk hrin niin, a unau dang zawngte aiin an inngaina fal bik a, hna thawkin a kîangah a rawn awm ve a ni.

A room kawngkhar chu a rawn ri leh dawt dawt a. Pawn lam aṭang chuan, "Uuu...lo hawng teh ka tih chuuu...ngati nge khatia i awm? Lo hawng teh...mawww...uuu...lo hawng teh," Melody chuan a rawn ti ṭawk ṭawk a.

"Melo, kal rawh. Ka ṭha," Remruatfela chuan a lo ti bung nghut a.

"I ṭha lo. Lo hawng teh...khawngaih takin...uuu...lo hawng hrâm teh," Melody chuan a la ti ta ṭawk ṭawk a.

Remruatfela chu muangchang hian a tho a, kawngkhar chu a va hawnsak ta nge nge a. 

A han hawn chuan a nau chu a lo lut vat a, "U, ti nge hetia i awm leh a?" a han ti nghal a.

Remruatfela chu a nui ringawt a, a hmelah chuan thinrim hmel emaw, lungngai hmel emaw, rilru na hmel emaw pawh a lang leh tawh lo. A nau chu duat deuh mai hian a han kuah a, "Eng mah a ni lo Naute, ka ṭha. Chaw ei tawh ang aw. Zanin chu len chhuah ka duh a nia," a han ti a.

"Naaa...min lensan ve ziah a."

"Awh! Ka hnawk mai mai a ni lo'm ni?"

"Hnawk a? Eng maw i sawi?" Melody chuan a u chu a han en hâ a.

"Sangtea a rawn lêng leh awm si a," tiin  a nui suk a.

"Kha pa kha min dem ve ziah suh, ka ning a nia," tih pahin Melody chuan a u chu a han chum taih a, "Chaw ei ka siam dawn," tiin a u room aṭang chuan a chhuak ta daih a.

* * * * * * *

Ni a liam a, kâr a kal a, thlà a vei a. Thil a inthlak zo ta.

Brendon chu zan reia chhuah a ching zeuh zeuh ṭan a; mahse, chhuak ngun tak chu a la ni lo. Rebecca-i nen chuan an inhmu leh tawh ngai lo va, biak pawh an inbe leh tawh hek lo. A len chhuah loh chuan a room-ah a inkhung chawt a, pen leh lekhapuan a inchhawp a, eng eng emaw hi a ziak malh malh ṭhin.

A awm dan thar chu a nau Melody chuan mak a ti ru hle tawh a, bang awng te reuhte awm aṭang hian a u, a room-a a inkalh khum tlat chu a bih thla ṭhin a; mahse a hlauthawn thil chu a hmu ngai lo va. A u-in thil a ziak mawlh mawlh leh ding taka a ingaihtuah lai chiah a hmu ṭhin a ni. Mak a tih deuh erawh chu, zan rei leh eng emaw changa inchei tak maia a u a chhuak ta fo mai chu a ni. A hmain hetiang hian a la awm ngai lo va, a awm dan ṭhen khat chu a hre thiam chiah lo. A u, ina a awm changa a room-a a awm dan leh, a pâwn chhuah dawna a inchei dan vel chu inmil lo riau hian a hre ṭhin nghe nghe a ni. Chu lo pawh, a u chuan vawithum lai inah chuan hmeichhia a rawn hruai haw tawh a, hmeichhe ngai hlir ni lovin, hmeichhe hrang hrang an la ni zui lehnghal a, an hmel pawh a chhe lo hlawm hle bawk. A u awm dan chu mak tiin duh lo ru hle mah se, Rebecca-i avanga a thinlung natzia hriatpuitu a nih tlat avangin sawisel enah a en lo. Chu lovah, a u chuan a duat ngaiin a la duat reng a, a chungah a la ṭha em em reng tho a ni, a nun a thlahdah ṭan ta erawh pawi a ti ru hle thung.

Zan khat chu a u chu zan rei tawh lamah a lêng chhuak leh ta a. Ani chu a la meng a, a u a chhuah veleh chuan a room-ah a va phei ta vat a, a hmaa a lo en châk em em ṭhin, dawhkana a u thil ziahna lehkhapuan chu a han la a, keuin a han chhiar ta a. Mak a ti kher mai!

Remruatfela chuan chu lehkhapuanah chuan Poem eng emaw zat hi a lo ziak reng mai a, a ṭhente phei chu a awmzia hriat thiam har a ti hle a; mahse, a thil chhiar chuan a u thinlung natzia leh khawharzia chu a puang chiang hlein a hria.

"Hùatna, ka dùatna i rulh lêtna kha,

Ṭahna, zahna min thlentu a lo ni;

Vaihna, ka thinlung nat i hriat hmaih a,

I kalsan thinlung rûak hnawh khahna ka zawn hi.

I zûn, lêngduna ka phurh ṭhin khan,

Kûrin ka lung a ti zûr zo ta a nih hi.

Khat thei lo i rauhsan thinlung hian,

Râwl chhàng khawpin a au che a;

I hriat loh ka thinlung rùm ri ring tak chu,

Ih maw, i awmna lam hawiin a thangkhawk asin."

Chu lai a chhiar thlen phei chuan, a uin Rebecca-i a ngaihtuahna a la reh lohzia chu hre chiang hlein a inhria a. Chung poem zawng zawng chu a uin Rebecca-i avanga a phuah vek a nih a ring a, a u chu a khawngaih em em a ni. A chhiar lai chuan thawm a han hria a, a han hawi chhuah meuh chuan, a uin room kawngka aṭangin a lo en reng tawh a. A u thil ziahna lehkhapuan chu muangchang hian dawhkanah a dah thla a, inthiam lo deuh hian, "U, ka tih palh, hei hi ka lo chhiar a," a han ti ta ngawt a.

A chhang lo va. A nau chu ngun deuh hian a en ta reng a, thinrim hmel emaw, lungawi lo hmel emaw pawh a pu chuang lo. Room-ah chuan a rawn lut a, muangchangin khum tlanga a nau bulah chuan a rawn ṭhu a, a han ngawih leh vang vang hnu-ah, "I hre thiam ve ngawt ngawt em ni?" tiin a han nui ta suk a.

Melody chu a thaw huai a, chutia a mimal thil a lo khawih ve mai chu a u chuan a hau dawn emaw a ti a; mahse, a rin loh tak maiin a hau ta si lo. "Ih, a ṭhen ṭhen chu ka hre thiam ve deuh," a han ti a. "Hei hi Rebbeca-i i sawina a ni tiraw?" tih pahin a lo chhiar zawh tâk chiah kha keu lehin a han kawhhmuh a.

Brendon-a chu za vak lo hian a nui sak a, "Aw a nih kha. A dang pawh kha amah vanga ka ziah vek a ni. Tuna i sawi te hi chu a rhyme pawh ka set vak zawk hleinem," a han ti a. "I hre thiam ve vak awm si lo va, i va chhiar peih zawk ve. Ve biu beu che hian," a han ti zui a.

Melody chuan mood thlak nan a u chuan a fiam a ni tih a lo hre thiam ve nghal mai a, "I zak lo e a. Ka hre thiam vek e aw," a han ti ve leh hnuhnawh a.

"I mut a chhuak tawh em?"

"Aih, chhuak lo. Nang?"

"Chhuak lo ve, hei ka lo haw chauh a nih hi," Remruatfela chuan a han ti a.

"U, ti nge zan rei tawh hnu-ah i chhuah ziah a?" tiin Melody chuan a lo zawt ve thung a.

Chhang mai lovin a han ngawi vang vang phawt a, chumi hnu-ah, "I mut a la chhuah loh chuan, heng thil ka ziah ho innghahna thawnthu tlem ka hrilh ang che aw, i ngaithla peih ang em?" a han ti ta daih a.

Melody chuan, "Ummm...peih chiang e," a lo ti vat a.

An han insiam rem a, Brendon-a chuan a sawi ṭan ta nghal a-

"Hmanlai Greek Mythology-ah chuan, 'inspirational goddesses' an tih, kawng thum- literature leh arts leh science lama mihringte chawk phur thei 'MUSE' pakua an awm a: Calliope(epic poetry), Clio(history), Euterpe(flutes and lyric poetry), Thalia(comedy and pastoral poetry), Melpomene(tragedy), Terpsichore(dance), Erato(love poetry), Polyhymnia(sacred poetry), Urania(astronomy) te an ni. 'MUSE' awmzia chu, 'fuih phurtu' emaw 'chawk thotu' tihna emaw a ni. Muse-te chu Greek hoin Pathian thil ti thei ber anga an ngaih Zeus-a fanute an ni. A tir chuan zai mi anga ngaih niin, a hnu-ah kawng hrang hranga mihringte fuih phurtu anga ngaih an ni chho ta a ni," ti-a sawi ṭanin, hmanlai Greek ho thawnthu chu a sawi tan ta a.

Remruatfela chuan, a nau chu darkar khat zet Greek ho thawnthu a hrilh zawh hnu chuan, "Writer te chuan, 'My Muse inspired me to pick-up my Pen,' tih ṭawngkam an lo nei ṭhin a. Ka hrilh tâk ang che khan, kei teh meuh hetiang Poem ziak tura min turtu chu Rebecca-i hi a ni. Ka thinlung a ti na em em a, nang pawhin min hriatpui hi. Amah avanga ka nun ruak lutuk hi eng mahin a hnawh khat zo lo va, tu mah hian an la ti khat thei lo a ni. Ina ka awm chuan ka hawhar hian inbun ruah ka duh ṭhin a, Poem hi ka ziak ka ziak ta mai a ni. Hetiang ziak thei tura min inspire-tu, ka 'Muse' chu Rebecca-i hi a ni ber tihna a nih chu; chutah pawh, amah avanga ka tawrhna, khawharna leh lunglennna lam ka ziak nasa a, ka thinlung lungngaihna ka puang a ni ber mai. Ani kha ka hmangaih takzet a, ka duh a ni. Ka tân chuan, a chanchin ka sawi tawh, 'Muse Melpomene' kha a ni ringawt," tiin za vak lo hian a han nui sak a.

Melody chuan a u chu khawngaih hmel zet hian a lo en a, "U Rebecca-i hi ka haw tlat," a han ti a.

Remruatfela chuan, "Naute, huat a ngai hleinem, eng emaw harsatna a nei ve te pawh a ni maithei asin," a han ti a. Chutah, "Kha tin mi en suh, i khawngaih ka ngai kher lo aw," tih leh pahin a nau hnar chu a piaisak zauh a.

Melody chu, "A naaa..." tiin a lo ṭe ṭhat a.

"Va mu tawh rawh, i vawih cheh si."

"I zam lo, Valrianga i nih kha."

Remruatfela chu a nui vur vur a. A nau hnenah chuan, "Tak takin, va mu tawh rawh, naktuk thawh hma i ngaih kha. Chuan, ka helmet hi kha laiah khan min lo khaisak nghal la aw," a han ti a.

Melody mu tura a room lama a kal hnu chuan, Remruatfela chu a han ṭhu chhuak leh a. Dawhkana Pen leh Lehkhapuan chu a la a, a thinlung tâwt lutuk bun ruak turin a inpeih leh ta. A thaw hak a, ding takin a inngaihtuah zui a, a duh thu reng vang erawh a ni lo; a khawharna leh lunglenna chu a zual deuh deuh vang a ni.

An awmna hi khawpui daifem deuh a nih avangin pawnah chuan rannung an hram chiah chiah a. Thla chu tawrh har khawpin a eng a...

* * * * * * *

"Nizan zanlai vela thah a nih hmel! A kut vei lam, a banrek hnaih deuhah hian phengphehlep lem tatoo a neih a nih hi."

"Chuti em emin a thihna hi a la rei lo maithei. Khua a vawt a, a thisen hi a khang hma phah a ni ngat ang!" 

"Hmmm...a thisen a chhuak hnem kher mai!" 

"Pu Dinsang, hei chu a khirh khawp ang. A namai dawn lo tlat."

"Ka ring. Mahse, a fel leh mai ang."

Chu lai tuihawk luankawr thuk zeta hmeichhe ruang en chiangtute titi chu a chhak ko aṭangin police constable ṭhenkhat leh, police ni lo, pate lam pakhat hian an lo en ṭhap a. 

Zingkar a ni a. Khua a eng uau uau chauh a ni a, khua a bawt vin tuk a, chu lai hmuna awmte chu an thaw hu laih laih a. 

Ruang awmna bula Police lo zawk chuan hnai zetah ruang chu a han bih nawn leh a. Thisen thanv rim leh miruang, pem leh hliam rapthlak tak nei chuan a ti danglam ve lo tawp ni hian a lang. Kawr lum lian deuh a ha hnuk a, savun pheikhawk lawk zet, uṭawk kawng kan vei pet nana itawm fahran hi a bun a, cotton jeans kekawr dum dak ṭha tak a ha a, chutiang bawkin a kawr lum pawh a dum a ni.

"Pu Dinsang, ruang hi ka kuai let dawn..." tih leh a biaka chhanna pawh nghak lem lovin a han kuai let zui nghal zat a. 

"Nang hi chu awww..." tih pahin a bula awm chu a chek tlak tlak a. 

"Mmm...ka hmu e...a la thler zui ka ti...khaia, poem lam lam a ni maw!?" 

"Poem a!?" Police zawk chuan a hre thiam lem lo tih a lang. 

"Mmm...a nih hi. A thler na a, heta hi a bung leh lam a awm e. Thisen a kâi a nih hi."

"Han chhiar teh..." Police zawk chu a nui zui huk a. 

"Ka ṭhiana khian chhiar rawh se, ani khian a hre thiam turah ka ngai." tiin an chhak lam chu a han melh chho a.