SUDDEN: CLEAR THE NAME- Complete

 SUDDEN: CLEAR THE NAME!
Author: Chhantea Pautu

Chapter One

       Hmun hnâwng leh phaitual hnim awmna, tlâng leh ruam leh thlaler khawro tak tak an pal tlang hnu-ah, a Sakawr chuan Texas leh Mexico inrina bula awm Del Rio kawtthler vaivut chu a rawn rap khu ta sat sat a, Big Ben Saloon tih intârna kawt a lo thlen chuan a chunga chûang chu muangchângin a han chhuk a; fual hnalh hian Puakruk pahnih a pài a, a Puakruk kâwm leh a kut, a khel zawna a thlâk thlâk chu a inhlat lo hle. La naupan hmel teh mah se a mitmeng leh a chezia en chuan zuam sual awl tak a ni ang tih a rin theih.

       "He khua hi mikhual tân a him loh lai tak a ni...nanga tân lek phei chuan...Putara thah a ni a..." mipakhat chuan a lo ti nghal tâwng a.

       Chutia lo betu chu en kânin Saloon kawngka bula bang nghenga ding, nelawm vak lova lo melhtu mipakhat chu ngawi rengin mikhual thleng thar chuan a han melh lét ve ta a, ṭawng lova an inmelh reng lai hmutute chuan an en hrek hrek hlawm a. Rei ngial an inen hnu-ah mikhual zawk chu a nui suk a, muangchangin amah betu lam chu a hawi ta a, "Amigo, hetah eng'e i tih ve chu le? Hmun hrisel lo hi i ngaina ve riau zawk a ni ang chu maw?" a han ti ta a.

       "I tân hian a hrisel lo zawk a ni!"

       "Kan la hre chhawm ang chu; thlaler roreltu kan Nî pui khian zah a ngai lo nasa mai si a, ka dang a ro nasa a nia."

       "I tâwpna tur hi engtikah nge ni ang ka hre lo; naktuk emaw, a tuk leh emaw, vawiin emaw pawh a ni thei...ti rawh...i thih hmain zu ka khilai ang che," tiin amah lo betu chuan a han sâwm zui ta a.

       "Parson, ka lawm e," tia nui sak pahin, "Ka lei hi ka dangah a bet lo chauh tawh reng a ni," mikhual chuan a han ti zui a.

       Parson-a leh mikhualpa chu Saloon lam hawiin an han inher a, mikhualpain ke a pen chiah tih chuan aw thum pawr deuh chhak hian, "Mikhualpa...ka zawhna fel taka i chhàn loh chuan i lei chu i dangah a bet tak tak ang," tiin tu emaw hian a rawn au ta a.

       Mikhualpa chu a ding chat a, muangchanga hawi letin amah rawn autu chu a rawn hmachhawn ta a. Amah rawn autu chu sam buang thar mai, sa pan lam leh ria lampang, ban sêi zât mai leh a kut zungṭang pawh a taksa phu tawka sîn sêi sang mai hi a ni a, a mitmeng chu a thîp hle a, a hmai a fai tehchiam lo bawk. Puakruk pahnih hi fual hnalhin a pai a, a kut zungṭang sêi sîn sang mai chuan a Puakruk kawm chu a hlat lo hle nghe nghe a.

       Del Rio khuaa rawn thleng thar zawk chuan a hmaa ding chu a han en vang vang a; chutah a nui sak a, "Mikhual chu ka ni ngei mai a, keimah hi em ni zawhna zawh i duh chu le?" a han ti ve a.

       Chupa chu mikhualpain a chhàn dan avanga lungawi loh hmel zet hian, "Nang lo hi mikhual an awm em ni?" a han ti hul hak a.

       Mikhualpa chu a la nui ta fo a, "Ka tân chuan mikhual ve bawk chu i nia lawm," a han ti ve leh ngat a.

       Amah betu chu a thinrim tawh kher mai, a meng sen râm a, a kut chet dan leh hawiherah chuan Silai chuh mai duh tawh hmel hian a lang a, chulai hmuna midang lo awm ve te pawh chu Silai mu leng tawn palh hlauin an inthiarfihlim hret hret bawk a.

       Chutih lai boruak chu a ṭang hle tawh a, mikhualpa pawh chu a inring tawh takzet a, engvanga he thil hi hmachhawn ngai nghal ngawt nge a nih tih chu a chhût neuh neuh a, engpawh thleng se hmachhawn mai turin a rilru a siam ta bawk a ni. Mahse chu boruak ṭang tak karah chuan nichina mikhualpa lo entu, Saloon kawngkhar bula bang nghenga lo ding kha a rawn inrawlh ve ta a.

       "Bucky, i Silai kha chuh mai rih teh suh, kei pawhin mikhualpa hi biak ka duh ve bawk a ni," tiin mikhualpa lam chu a han hawi a, "Mr. nichina min ena i nuih khân fiamthu ka thawh niin i hria a ni phawt ang a; i hming min han hrilh teh," a han ti teh tawp a.

       Mikhualpa chu za lo zet hian a ṭhen sak a, "Mr. ka hming chuan i tân pawimawhna a neih vak hran ka ring lo; i hming hriat ka tum lo ang bawkin ka hming hriat chu tum duh lo mai rawh," a ti ve ta nghat a. A chhànna pawh ngaihsak zui lem lo chuan, "Ti rawh Parson, Bar lam i pan thuai teh ang, ka dang hi hremhmun tluk zeta ro a ni," a ti zui ta daih a. Parson-a nen chuan Saloon chhungah an inzui lut ta a.

       Bang nghenga lo ding pa chuan a melh zui vang vang a, a hmelah chuan thinrim hmel ai mahin mak ti hmel a lang zawk a; mikhualpa rawn be hmasa tu, 'Bucky' tia a koh chuan, "Ben, engtin nge kan tih dawn?" a lo ti bauh a.

       Chupa chu a ngawi vang vang a, a hmel chu a lo dur ta khuih khuih a, "Lo hmanhmawh vak duh suh," tiin a rûm nghut a, "Lo kal la, mi zui vat rawh," a ti bul leh hmuk a. Saloon piaha In pakhat lamah chuan an kal phei ta a.

       Parson leh mikhualpa chuan Bar-ah zu a indun mêk a, chu thil thleng awmzia chu an sawidun mêk bawk a ni.

       Hetih lai hian Texas pumpui mai chu hming pakhatin a tuam chhuak a, Law-man te, Outlaw te, Bounty Hunter leh rukru rual satliah zingah pawh hre lo an awm lo tih theih a ni. Puakruk phawi rang leh kah thiam 'Sudden' tia an koh chu, a hming a chhe zawngin a thang zui zel a, ṭhenkhatin an hlauha an ṭih laiin Bounty Hunter, 'Kei ka ni' inti chin ṭhenkhat chuan amah hmachhawn tumin rilru an siam ve mêk bawk a; Texas rama Sherrif ṭhenkhatin man tumin an veh ve reng bawk. Hmun hrang hranga thil sual tih, inrawk leh tualthahna ṭhenkhat chu he Sudden-a tiha chhal a ni deuh zel a, Texas ram pâwn lamah a hming hi a ṭha zawngin lang ve tho bawk mah se, Texas ramah hi chuan Sudden-a chu 'Wanted' niin a hming a chhe hle a ni.

       "Buddy, thil awmzia leh thuthang chu i hriat kha; hetah hian lo kal lo la a ṭha zawk tur a nia," Parson chuan a han ti a.

       Mikhualpa chuan a zu no dawm lai chu a han in leh te te a, muangchang hian Saloon chhûng chu a han thlîr kûal te te a, "Mahse ka lo thleng tawh chu a nih si hi," tiin fiamthu duh hmel zet hian a han nui deuh a.

       Parson chuan, "Mi â tak i ni reng a ni, i dinhmun leh i hming nia an hriat hre reng chungin Texas ram chhung i rawn lut a nih hi," a han ti a. "I â takzet," a han tih zawm leh hrâm a.

       Mikhualpa chu a nui mai a, "Saloon kawta mipahnih te kha tute nge an nih chu le?" tiin a han zâwt ta daih a.

       "Bang nghenga lo ding kha, Ben Harvey a ni, Del Rio khua leh a chhehvelah hi chuan Bucky nen khan a phawi rang bera sawi an ni. Sam buang, cher rîa sîn deuh kha Bucky chu a ni a, a Puakruk kha a hmang thiam hle a, nimin khan Marshal Johnson Putara kha a that a ni. Johnson Putara chu nang pawhin i hriat kha, Puakruk a phawi ran zia leh a kah thiam zia pawh i hriat tawh kha," Parson chuan a han ti duah a.

       "Kan Putara chu a ṭuan a muang ve tawh pawh a ni mahna; Ben Harvey chanchin kha han sawi belh teh," mikhualpa chuan a lo ti leh bauh a.

       "Ka hre tam lo, phawi ran leh kah thiamah chuan Bucky nen khan miten an khaikhin fo va; mahse, Bucky chu a la naupangin a mawl a, a fimkhur lo fo bawk rualin a phawi ranna leh a kah thiamna hian a humhim ṭhin. Ben Harvey erawh a fing a, thil a chhût ngun ṭhin, a chan a ṭhat hle dawn loh chuan tumah a hmachhawn mai mai ngai lo. Bucky kha a hnuaia thawk a ni," Parson chuan a han ti leh a.

       "A nih tak chu. Saloon piah Hotel-ah sawn ka innghat dawn a, kan la inhmu leh dawn nia," tiin a no dawm laia zu la awm zawng chu a tlak pap a, Saloon aṭang chuan a chhuak ta a.

       Parson chuan a chhuak ta chu en zui vang vang pahin a lu a thing nar nar a, ama hriat tham lek hian, "He khua hi chhuahsan zawk la i tân a ṭha a sin," a ti sup a.

       Mikhualpa leh Parson-a hi eng emaw lai kha chuan thil pakhatah an lo inkawp tawh ṭhin a, Parson-a hian a mizia leh a theihna pawh a hre chiang hle bawk. A hmaa mawhphurhna awm leh sut tur chu a pehhel ngai loh zia hre chiang em em tu chu amah Parson-a hi a ni a; mahse, a dinhmun leh amah eptute a ngaihtuah tel erawh chuan a hlauhthawnpui hle mai si a. Phun nuah nuah chungin Saloon chu a chhuahsan ve ta a, Dawrkâi Big Billy In lam a pan ve ta a ni.

       Mikhualpa kha erawh chuan Saloon piah lawka Hotel chu a pan ding nghal a, a pindan luah tur a tih fel zawh chuan a han lût a, a Gun Belt chu a hlîp a, inmêt faia a han insil fai te te hnu-ah a Silai pahnih chu a theih ang ang ṭhiat darha uluk zeta hriak hnawihin a ti fai a, fimkhur taka vuah khawmin a mu a thun khat ṭhap ve ve a, chumi zawhah a Puakruk pahnih chu a han chelek chhin vel a, a vawrh virin a paiah a khung a, rang zet zeta phawiin a khung leh ṭhin a; a Silai chelek vel na na chu a rang takzet a ni.

       A lakah buaina hi a mikhual loh em avangin engtik lai mahin a inthlahdah ngai lo va, ngaihsam leh inthlahdah hi khawthlang ramah hi chuan thihna tluk deuh thawa hlauhawm a ni tlat a. Texas ram huam chinah ngat phei hi chuan ani leh mipakhat dang tân chuan inthlahdah a pawi leh zual ang. Duh tawk a ngah hnu chuan muangchangin in-hnuai lamah chhukin chaw a lam a, a inei puar zawh chuan pâwnah a chhuak a, Sakawr hûanga a Sakawr thlun chu a han nul thuak thuak a, a Sakawr dum pian ṭha zet a han biak luam hnu chuan Big Ben Saloon lam bawk kha a pan leh ta chhat chat a.

       Saloon chhûng a va luh chuan mi an lo ṭhahnem tawh viau a, a ṭhen chu an bengchhengin an nui thler duai duai a, Bar lama zu in tawk leh poker khel tawk an awm bawk. Cowboy tuai te te pathum vel hian hmeichhe pakhat hi an lo dinchilh ṭaih a, han en reng reng pawhin an lungawi hmel hle hlawm bawk a.

       Bar lam chu a pan phei chhat chhat, Whisky a han lam a, Bar nghaktu naupang lam deuh Danny chuan a lo thlit sak vat a. A no dawma chawi kang chunga a lehhawi dawn chiah tih chuan Puakruk a rawn ri ṭhuai a, a no ken lai chu a keh darh nghal chuai a. Mikhualpa chu a han lehhawi a, Saloon chhung kilkhata Bucky-a lo ding kak ṭah chu a va hmu nghal a, a Puakruk chu a kuta hum lovin a Paiah a lo awm leh tawh a, a piah deuhah chuan Ben Harvey pawh a va hmu nghal bawk a, a bulah chuan rorum hmel tak tak mipathum hi an awm ve bawk; mikhualpa rilru-ah chuan Ben Harvey kaihhruaite an ni tih hi a rawn lût nghal a.

       Mahse, hawi sawn chuang lo hian Saloon chhung kil tin chu a han melh kual a; chutah a nui sak a, Bar nghaktu lam chu hawiin, "Kan ṭhiana sawn ka no dawm lai min tih buak sak palh hlauh mai a, a dang mi han thlit leh mai ta che, ka dang a ro nasa a nia," a han ti a.

       Bar nghaktu chuan khur dar dar hian a han thli leh a, mikhualpain no a chawi kang chiah tih chuan Puakruk a ri leh ṭhuai a, no pahnihna pawh chu a keh leh nghal chuai a. Mikhualpa chuan thinrim hmel a la pu lo na a, a nui tawh lo thung. Muangchangin a han inher leh a, Bucky chu a hmachhawn ve ta a.

       Bucky chu a lo ṭhen ṭha a, rang deuha a Puakruk vawrh vir pah hian a pâiah a han khung a, rang zet bawka phawi leh pahin mikhualpa bul Bar dawhkana Whisky um chu a han kap keh leh chuai a. A Puakruk khung leh pahin mikhualpa chu ngun zet hian a rawn en ta a.

       "Mikhualpa, i dang a ro ṭhin awm hle mai; mahse nang leh kei hian sawi fel tur kan nei hmasa tlat a ni," Bucky chuan a han ti ta chhak a.

       "Naua i â hle mai. A lan danin mi thinchhe tak niin i lang bawk, i Silai pawh kha hman dan i thiam meuh maw? I intipalh hlauh ang nge," mikhualpa chuan a han ti ve ta ngat mai a.

       Chumi te pahnih inchona aw chu Saloon chhunga awmte chuan an hai lo, Silai mu leng tawn palh hlauin a sir lamah an insaseng ṭan nghal a.

       Bucky chuan mikhualpa ṭawngkam dengkhawng zet chu a la na hle a, a sen ṭawn ṭawn a, a meng sen vek tawh mai bawk; a lo ngaih dan chuan Silai vawithum a hmeh puah khan a Silai hman thiam leh thiam loh chu a ti chiang hle hian a lo hria a, khati chunga mikhualpain chaldelh awkâ taka a han ṭawng khum ta mai chu pai dam harsa a ti hle a ni. Bucky kut veilam chu a phe zawk a, a Puakruk kawm a thleng thla nghal a, chumi rual deuh thaw chuan mikhualpa kut pawh chu hmuh hman mang loh khawpa rang hian a phe ve vuai a, a puak ṭhuai a, Bucky chu a âwm dawmin a ṭhingṭhi ta hnawk a, Saloon chhuatah chuan a tlu zui ta nghal a, mikhualpa Silai mu chuan a lungah a va deng ta a ni. Bucky khan Silai kha chuh hmasa mah se, mikhualpa chu a lo khan lo kher em a, a puakruk kha a phawi fel ve hman ṭawk chauh a ni.

       Chu mikhual chuan Ben Harvey te lam chu a han hawi leh a, fimkhur taka Saloon chhung melh kual pahin, "Niminah Bucky khan in Marshal Johnson Putara a that tawh a, ani kha ka ṭhian hlui a ni a; tunah hian Marshal thar in la nei lo tih ka hria, hremhmun lam pan châk deuh in la awm em? Min man turin Law-man helaiah hian an awm hauh lo a nia," tih chhak chhak pahin Ben Harvey chu a han melh bîk a!

SUDDEN: CLEAR THE NAME
Author: Chhantea Pautu

Chapter Two

       Mikhualpa chuan fimkhur takin Saloon chhung a chhuahsan tawh a, a thlenna Hotel lam panin a kal nghal daih a. A tân fimkhur a ngaih em avangin hmalam bawh buan buan hi buaina bul a ni tih a hre chiang a; chuvanga Saloon aṭanga inthiarfihlim ta vat pawh kha a ni reng a.

       Ben Harvey erawh Saloon chhungah, a ho te nena an dawhkan kîl bulah chuan a la ṭhu mi tak rùn a, a hmêl chu ngaihtuah thui awm deuh hian a lang a, Bucky ruang chu a melh vang vang mai bawk. Khatia Bucky kah hlum a nih zawha mikhualpain amah Harvey a rawn cho leh khan a rilru chuan a tlawmla hle mai a; mahse amah cho zuitu hmel a han en khân, a ṭawng satliah lo tih a lang chiang nasa mai si a. Harvey hi mi â a ni tlat lo; chuvangin mikhualpain amah a chona pawh chu la na duh lovin, "Ṭhianpa, Bucky cho chhuah a nih kha, zanin atân chuan tawk tawh rawh se," a ti damthlap thei ta zawk a ni; mahse a rilru chhungril erawh rul tûr nei ang mai a ni a! A inngaihtuah fé hnu chuan Harvey chu verther zet hian a nui ta vur vur a, a ho te nen chuan Saloon chu an chhuahsan ve ta a ni.

       Mikhualpa pawh chuan a innghahna Hotel a thleng thuai a, pindanah a luh hnu chuan vaihlo a zial a, pak khuk hlat hlat pahin thil kalzel dan tur nia a rin chu a chhût zui neuh neuh a, a meng zîm san a, a nunna chu a fimkhur leh fimkhur lohah a innghat zel dawn a ni tih chîang takin a hria. He khuaa a kal nachhan chu a han ngaihtuah a, dinhmun hlauhawm takah a ding dawn tih inhre reng chunga a luh nachhan te pawh.

       A hma karkhat chuang liam taa Hattchet Folly bul YZ Ranch-a mi va hmuh chungchang te thlengin a ngaihtuah kâi chho ta zel a, ṭha tak leh chiang taka inthlah an nih zia te, amah kha va hmu lo thei lova Texas rama thil awm danin a zir viau si zia te pawh a ngaihtuah neuh neuh a; amah ngei pawh khan Del Rio hi a rawn thleng har tawhin a ring lo, a lo thlen hma hian a chungah eng nge lo thleng zel dâwn tih erawh sawi lawk theih a ni lo va, ngaihtuahna a hman thiam a ṭul hle zel dawn a ni.

       He'ng lai leh a chhehvela mi tuemaw ni-a an hriat dan hre chiangtu chu Puck Parson-a kha a ni; amah Parson-a hmu pah tùra kal a nih erawh hi chu a la hre hauh lo va, hrilh pawh a hmanhmawh hran chuang lo bawk. Tunah chuan Ben Harvey hian a hma lawka thil thleng kha eng angin nge a ngaih zui dawn tih chu a rilru luahtu ber a ni rih zawk a.

       Chutia a inngaihtuah uluk hle lai chuan a pindan kawngkhar chu an rawn kik ta karh karh a, a han insiamrem a, fimkhur rilru tak hian kawngkhar lam chu a han melh a, "Tunge ni?" a han ti chhum hmak a.

       Pawna aw chuan, "Parson...Parson ka ni...Jim, kawngkhar hi han hawng thuai teh..." a lo ti nghal sawk sawk a.

       Kawngkhar chu a han hawng vat a, Parson chu hmel hmai phawk deuh tak hian a rawn tek lut nghal vat a, hmel hriat thiam harsa zet hian a hmaa ding, pa sâng ve tâwk tak, dar pharh hlai phak mai leh inkhaithli ru tak chu a han en hrâ a, 'He khua hi chhuahsan vat rawh,' tih melh hian a rawn melh niin a hria a. "Parson, eng nge ni ta mai? Arte Mu ṭham ṭhelh ang maia khatia i awm chu le?" a han ti nghal a.

       "Jim, Bucky kha...a thi ta tih ka lo hria a?" Parson chuan a han ti a.

       "A hriat chu i hre dik alawm," 'Jim' tia a koh chuan a lo ti mai a.

       Parson chuan lu a thing nar nar a, "Tunah hian Ben Harvey te chu Big Ben Saloon-ah an awm khawm leh mek a ni...Jim, an ziarâng saw ka duh lo," a han ti ngawt a.

       "Tichuan, khua hi ka chhuahsan ang a?"

       "Mi â pa, i ring dik khawp a lawm le," Parson chuan a han ti chîam a. Parson-a hian a ṭhianpain a thu sawi a ngai lolam lutuka a lang chu a run hle tawh a. "Bounty Hunter leh Gunman ho luh khawmna pakhat a nih chu i hai lo a ni lo'm ni?" a han ti leh a.

       "Buddy, i mi ngaihtuahna avang chuan ka lawm e; mahse helai hmunah hian awmze nei lo leh lu zûar ngawt tura lo kal chu ka ni lo alawm," mikhualpa chuan a han ti ve ta a.

       "Eng nge i lo kal chhan chu han sawi ta che."

       "Amah ngei pawh a lo thleng har tawh lo vang," tiin mikhualpa chuan Parson chu a han chhang ngawt a. "A lo berah karkhat hnu-ah ka lo beisei tawh asin," a han tih zawm leh a.

       Parson chuan, "A rawn thlen hmain i thi hman mai thei bawk," a lo ti hmak a.

       Mikhualpa chu a ṭhen sak a, "Thi hman mai thei a ni," a han ti bauh a.

        "Fimkhur hle chu a ṭul ang. Sudden-a hmel hmang hi eng ang chiah nge a nih mi tam zawkin hre lo mah se, hre chiang tak tak an awm ngei ang a; chu chu i vanneihna, dawrawm tak si pakhat chu a ni mai," Parson chuan a han ti leh nghut a.

       "Eng nge i sawi awmzia, Puck?"

       "I Sakawr dum hi thlak rawh ka tihna a nih chu," a lo ti leh hmak a. "Sudden-a hmel hre chiang lo ho hi i tân an hlauhawm zawk asin. I Sakawr dum saw an hmuh phawt chuan..." tiin a ngawi zui ta daih a.

       "Ka Sakawr tluka ṭha hi chu ka hmu leh mai mai tawh lo vang; YZ Ranch ami tih loh kha chu," tih pahin mikhualpa chuan meizial chu a pak khu talh talh a. "Puck, nangmah hmuh tuma lo kal hi ka ni pah ber zawk asin," tih leh pahin amah ngaihtuah em emtu a ṭhianpa chu a han en a.

       A ṭhianpa chuan, "Eng chungchangah maw?"

       "Hmana kan thil hmuh chhuah kan dah ṭhat chungchangah khan maw le; tunhnai maiah hian ka mamawh dawn tlat a ni."

       Parson chuan, "I mamawh chuan lo la mai rawh, chulam chu theihnghilh la, tunah chuan i nunna hi veng ṭha hle turin ka duh che a ni," tiin ngaihtuah hmel zet hian a han en leh a.

       "Ka hre thiam e."

       "Ka kalsan ang che, chauh te pawh i chau ang," tiin Parson chuan a chhuahsan ta nghal a.

       A ṭhianpain a chhuahsan hnu chuan mikhualpa chu a nui sak a; heti ang hmunah, dinhmun hlauhawma a din laia amah ngaihtuahtu ṭhian a nei hlauh chu a lawm hle a. A Gun-belt a phelh a, a Puakruk pahnih chu lukham hnuai sir ve ve ah dahin a mu zui ve ta nghal a.

       Del Rio khua hi Khawpui lian taka sawi ni ngai si loah chuan khaw lian ve tak a ni a, Saloon pawh pathum lai awmin Big Ben Saloon kan tih kha a lun ber ṭhin a, Ben Harvey leh a hote tawmna ber pawh a ni. Marshal tân rorum mai piah lamah, fin leh huaisen leh chêt ran a ngai a, Marshal daih rei tak hi an la awm lo reng a ni.

       Khua hi Ranch pangain inramri kual vekin an hual a, hmar lamah Little Twinkle Ranch leh BB Ranch a awm a, chhim lamah Big Folly, Ranch tereuh tè a awm leh a, thlang lamah Obera, lui lian lo tak hnaiha Double D Ranch awm lehin chhak lamah Sweet Vally Ranch zîm tak; mahse a hmunhma nuam em em thung si hi a awm bawk a ni. Heng Ranch te zingah hian Ben Harvey-a Ranch, BB Ranch hi a lian ber a, a ram erawh chu a ṭha ber bik lo. Heng Rancher te inkarah hian buaina liantham la chhuak lo mah se, neuh neuh chu a awm ve fo tawh a ni. Ben Harvey hi a fin em avangin Del Rio leh a chhehvel hi a thunun thei riau mai pawh a. He khuaah hian Bounty Hunter, Gunman leh Killer rorum leh phawi rang, Puakruk kap thiam tak tak te an fuan khawm fo a, chuti ang khaw nasa ve tak a nih avang chuan inkahna a thleng zing hle ṭhin. Nitin mitthi awm em lo mah se, he khua aṭang hian ruang a chhuak hnem tawh em em a, nikhata ruang pathum a chhuah chang pawh a awm leh zeuh ṭhin.

       Chu'ng Gunman leh Killer rawn fuan khawm ṭhinte zingah chuan Ben Harvey hi a phawi rang ber chu a ni hauh lo ang a; mahse, he laia cheng nghet zingah chuan phawi rang ber pawla sawi a ni thung; amaherawh chu, phawi rang leh phawi rang hi an inhmachhawn phawt loh chuan a rang zawk a hriat tak tak ṭhin lo. Ben Harvey hi a fingin a dawhthei a, chet hun leh tawp hun a hre hle bawk a, he khuaa Gunman leh Killer rawn lut ṭhin, ama anpui misualte hi khawingam loh a nei ngai lo, a phawi rang leh mipahnih inti buai inhmachhawna a dingchang zawk te chu lamṭangah a siam nghal hmiah mai ṭhin a; chu chu a naute zinga a kut ke ber, Bucky-a kap hlumtu mikhualpa chungchanga a rilru pawh a ni. Lamṭanga a siam theih loh chu eng anga phawi rang leh rorum pawh ni se, langsar mang vak si lo va dah ṭhat mai a hreh bawk hek lo va.

       Zankhua deuh thawin a inngaihtuah a, a meizial zûk bung pawh a awm khawm ram tham nghe nghe a, mikhualpa khan a rilru leh ngaihtuahna a luah tlat a, engtia chin fel chi nge ni ang? Lamṭang atâna duhawm, hmelma atâna hlauhawm tak a nihna pawh a hmu thiam nghal vek a, engtik lai pawha a Puakruk paina zawna a kut a thlak zawi hniang reng mai te, a Puakruk pai dan te, a hawiher leh chetzia, a inrin hmel em em reng mai te leh, a mitmeng rum ni chuang miah lo va eng emaw ti riau si te chuan a awm a ti nuam thei lo a ni. He khuaah hian langsar tak ni chiah si lovin thu a lo nei rei tawh a, hmingchhiatna tur lakah a fihlim thei zel a, a langa hmingṭhatna chu a chungah a awm leh thung ṭhin; chu chu a fin vang a ni a. He a dinhmun hi tumahin an tih chhiat a rem ti ngai lo vang. A tâna hnawk thei nia a hriat te chu lamṭanga siam zel mai hi a duh dan a ni a, a thei deuh zel bawk. A tawpah Ben Harvey chu amah chauh chuan a nui ta vur vur a, mikhualpa chunga chet lak dan tur ṭha chu hre ta ngei niin a inhria a, a tuk zingah hmalak ṭan nghal ngei a tum ta bawk a.

      Mikhualpa chu a chau bawk a ni ang, a han harh meuh chuan chawhma chanve zet a lo ni reng tawh mai a. Muangchangin a han tho a, a Silai a endik te te hnu-ah a Gun-belt hrêngin chaw ei turin inhnuai lamah a chhuk thla ta nghal a; chutah chuan mi pakhat hian a lo nghak reng tawh a. Chupa chuan chibai tumin a kut a lo phar chhuak a, "John Denver ka ni a, thil eng emaw chungchangah biak che ka duh a ni," a lo ti a.

       Mikhualpa chuan a kut chu a lo vuan ve mai a. "Eng chungchangah nge mi biak i duh?" a han ti ve a.

       Denver-a chuan, "Engtin nge ka koh ang che, hming inhriat tawnna hian ṭhian ṭha a siam fo asin," nui var var pah hian a han ti te te a. Amah chu kum 50 mi vel tur, hmai tluakpui leh pa lian ngo phuk mai, chal arh phekphawk leh chuar deuh, hmel zahawmpui mai pu hi a ni roh a.

       Mikhualpa chuan, "Jim' tiin min ko thei ang," tiin Denver-a mitah tak a han en a.

       "A lawmawm e, Jim. Ka biak duh nachhan che chu ka han sawi nghal mai ang nge; i hriat angin i lo thlen hma mai khan kan Marshal John Travius chu kahhlum a ni a, a kaphlumtu pawh nizana i kahhlum tak Bucky kha a ni nghe nghe a. Del Rio khaw mipui te hian Marshal thar thlan kan duh a ni; chuta tan chuan i hming pe lut ve tura ngen che hi ka duh a," Denver chuan a han ti a.

       "He tah hian mikhual leh mithar mai ka ni a," tih chauhin Jim chuan a chhang a.
(Tun aṭang chuan mikhualpa hi 'Jim' tiin kan sawi zel tawh ang.)

       "A ni khawp mai; mahse chu chuan i hming theh luhna a dal chuang hlei nem," Denver chuan a han ti leh a.

       "Dal miah lo; mahse, khaw mipui te chuan mikhual tharlam, a rawn thlen zana mi kaphlum nghal chu Marshal atan an duh kher nang, ka hming chu ka thehlut hming chhe ve kher duh dawn em ni?" nui rah rah chung hian Jim chuan a han ti ve thung a.

       Denver chuan, "Bucky-a i kahhlum chungchangah chuan thiam lohna i nei hlei nem, a cho chhuah a nih kha," a ti ve leh a.

       Jim chuan Denver-a chu chîk zet hian a han en a; a rin dan chu, 'A dik mai angem awww,' tiin a han ngaihtuah phawt a. "Marshal thar tur thlan chungchangah hian Ben Harvey-a'n tel vena a nei em?" a han ti ta thut a.

       Denver-a chu a mitmeng a han danglam deuh a; mahse pangngai deuh hian, "Nei lo, he thil hi chu mipui rawt chhuah a ni zawk; mahse, Harvey chuan nangin Marshal dinhmun i luah chuan a lawm vakin ka ring lo," a han ti ta a.

       "Lawm vak lo tawp ang," tih nghat pahin Jim chu ngun deuh hian a han inngaihtuah a; awlsam taka ṭhiana rawm siam tumtu te hi a tan an hlauhawm nge hlauhawm lo tih a chhût a ni. John Putara thihsan tak Marshal dinhmun han luah pawh chu chona phurawm tak ni thei hian a han hria ta a, he khaw mipui te cheng han deh chhin nan leh Ben Harvey chetzia han thlîr nan pawh ṭha dawn riauin a hria a ni. A mi nghah a lo thlen hmaa hun khawhralna ṭha tak pawh a ni ang chu.

       Chutia a inngaihtuah mêk lai chuan Denver-a chu a rawn ṭawng leh ta a, "Engtin nge ni dawn ta?" a han ti bauh a.

       Hmanhmawh miah lo hian Jim chuan, "Ka hming chu lo va theh lut ve ta mai che; tukṭhuan pawh ka la ei lo va, ka han inhnawh puar ve ang nge," a ti ta a.

       Denver chuan lawm hmel zet hian, "Aw le, ka lo theh lut ang. Del Rio khaw mihlun kan ni ve bawk a, ka thlawp che a nih chuan mipui pawhin an pawm ngei chein ka ring tlat; Marshal thlan vel chu dar 01:00pm ah Stranger Come Back Saloon-ah buatsaih a ni ang," a han ti a, Jim chu a chhuahsan ta nghal a.

       Jim chuan chaw a lam a, muangchang hian a ei a, puar pangngai taka a ei hnu-ah Hotel chu a chhuahsan ve ta a. Telegram Office lamah a kal zet a, Bank kal pelin Stranger Come Back Saloon lam chu a pan phei ve ta a. Kawtthler sirah chuan a kal phei zel a, a hmalam piah deuh fê-ah chuan Sakawrtawlailir chung nei lo chi hi a rawn kal phei mek a, a chungah chuan a khalhtu bakah hmeichhe pakhat, Nihliap khum hi a chuang bawk a. Chu Sakawr tawlailir chuan Stranger Come Back Saloon kawt zawn chu a rawn thleng ṭêp tawh a, Jim pawh chuan Saloon chu a thleng ve ṭêp tawh bawk.

       Chutah Silai a puak ṭhuai a, Tawlailir hnûktu Sakawr chu an chiai ta nghal a, chutia Sakawr chiai avanga Tawlailir insawi che thutah chuan a chunga chuang nula chu a tla dawn ta mai a, Jim chuan Tawlailir bul chu a thleng phei chawpchilh nghal a, Sakawr lakamah chuan a chelh vat a, thunun tum chuan a han che vel ta a. Sakawr chu a thunun thei thuai a, nula pawh chu tla lovin a lo ṭhu ngil leh hman tawh bawk a.

       Saloon kawtah chuan Cowboy pathum, la naupan hmel tak tak, a hmaa Big Ben Saloon chhunga Jim-a'n a lo hmuh tawhte kha an awm a, chumi te zinga a hmel ziawm ber anga lang chuan nula chu a han bia a, "Seniorita, i hmel ṭha kher mai, i kut min lo pe ta che," tih pahin a han nui sâwng a.

       A hmel zah theih loh hmel zet chu nula ngei zawng tak mai a lo ni a, hawisan hmak pah hian Tawlailir khalhtu hnenah chuan, "Tim, kal ang," a han ti hmak a; nula hian Silai hmet puak ngawttu kha amah lo betu Cowboy hi a ni tih a hre tlat bawk si a ni.

       Chu Cowboy chu Jim chuan a lo thlithlai ru reng a, a hmaa thil thleng pawh kha chiang takin a lo hmu bawk a. Tawlailir hnûktu Sakawr tih buai tum sa leh nula lo chhaih tum sa khan Silai a hmet puak a nih a ring tlat a, zirtirna pek deuh hlek pawh ṭulin a hria ni.

       Silai ri avang khan mi an rawn dâk chhuak hlawm a. Nula chuanna Sakawr Tawlailir a kal ṭan dawn chiah tih chuan, Cowboy naupanga nui sâwng hmela danglamna chu Jim chuan a lo hmu ru reng tawh a, rang zetin chu Cowboy chu a hnaih chilh vat a, Cowboy-in a Puakruk phawi tuma kut a han siam rem chiah chu, "Che tawh suh naua..." a han ti a.

       Chupa mitmengah chuan mak tihna a lo lang a, a Puakruk chu a han dap a, a lo awm tawh hauh lo! A thinhnûn tak zâwnah tak hian ama Puakruk kaw hmawr ngei chuan a lo tin reng tawh mai a. An thawmah chuan nula pawh chu a rawn hawi let ve nghal vat a.

       Jim chuan, "Nula hnenah hian ngaihdam dil rawh," a ti ram hmak a.

       "Mr...ka...ka..." tiin Cowboy chu a han riat niah niah a.

       Jim chuan, "Ngaihdam chu dil mai rawh. Silai hi hmeichhe chhaih buai nan mai maia pai tur a ni hlei nem; Silai i pài ve a nih chuan a hmanna tur hre tawh ang che," a ti leh hmiah a.

       Chu Cowboy chuan hreh hmel deuh hian nula lam chu a hawi a, "Ka tihpalh a ni...Miss, min ngaidam rawh," a ti ta nge nge a.

       Nula chu a bu nghat ringawt a.

       Jim bawk chuan, "Tun hnu-ah hmeichhia hi zah tawh ang che, zu ruih vang maiin chhaih buai tawh ngai suh," a han ti leh a. A Puakruk mu chu a phawrh chhuah sak vek a, a pe lêt leh ta a.

       Silaia tin a ni ta lo tih a han inhriat chuan chu Cowboy chu a han pawr thar ve leh a; Bucky nena Jim-a an inhmachhawn lai khan khawiah emaw an kal bo a, engmah a hre ve lo va. Bucky phawi khalha kap hlumtu chu a hma lawka ding hi a ni tih a hre miah lo. "Mr. i inrawlh lohna turah i inrawlh a ni," a han ti pawr ve hiar a.

       An inkar chu a la hla hman lo bawk a, Jim chuan a va hnaih chawp chilh leh nghal a, "Naupang zu rui mawl lutuk, " tih pahin hnek pawh hnek lo hian a han beng ṭhuai mai a, chu Cowboy chu vaivutah a tlu khu luih a, Jim chuan a ṭhian te lam hawi pahin, "Heta ṭang hian hruai bo vat teh u," a han ti ṭhat a. Nula lam chu a hawi a, "Min hre thiam dawn nia, Lady," a han ti leh a.

       Nula chuan, "Tehreng mai, i chungah ka lawm e," tih pahin a heh sen no chek sàwi sèih hian a kareh mawi tak, a zau lam hret emaw tih tur; mahse chu ai chuan zîm se mipa tumahin an tih hauh loh tur ni si chu a han khîk tir sak a, "Ka pa pawh i chungah a lawm ngawt ang," a han ti zui a.

       Jim chuan nula kal phei ta chu a en zui vang vang a; nula chu a hmel ṭha em kher a, tu tan pawha en zui vang vang tham a ni tlat a ni. Jim chuan Hatchett Folly-a YZ Ranch lalfanu Nory(Noreen an tih bawk) nen khan a han khaikhin a, lu thing nar nar chungin Stranger Come Back Saloon-ah chuan a lut ve ta a.

SUDDEN: CLEAR THE NAME
Author: Chhantea Pautu

Chapter Three

       Saloon chhungah chuan mipui an lo ṭhahnem tawh fu mai, Jim-a a han lut ve pawh chu ṭhenkhat chuan an lo en hrek hrek hlawm a. Zan lama Bucky-a laka a chet dan leh, he Saloon chhung a lo luh hma maia a chet dan hmutute an nih hlawm avangin, 'Hepa hi pawngpaw namnul mai mai chi a ni lo' tih chu an rilru-ah a awm deuh ṭhum mai a ni.

       A han hawi kual deuh a, Puck Parson pawh a lo awm ve a, Saloon chhung kilkhatah chuan Ben Harvey leh a hote pawh a va hmu nghal a, Platform ang reng an siamchawpah chuan Denver-a leh midang pahnih hi Dawhkan hnung Chair-ah chuan an ṭhu a; hemi te hi Del Rio khaw Marshal tur thlanna huaihawttu te an ni a.

       Denver chu a rawn ding ta a, chiang fiah deuh mai hian Marshal nih tuma hming pe lut te chu a han chhiar chhuak a, mak tak maiin Ben Harvey hming pawh a tel tlat mai; Jim-a hming a han lam a, tunge a nih a han sawi lai chuan mipui chu an thum hak a. Denver chuan an nihna leh dinhmun chu thiam zetin a han sawi zui a, Jim-a chungchang chu sawi tam lo mah se, a chiang tawk hle mai thung.

       Marshal chu an han thlang ta ngei a, Jim-a rin lawk ang ngeiin Ben Harvey chu chiang takin an thlang tling a, Marshal atâna thlan tlin hming an han puan chuan a ṭhen sak a; chutih lai chuan amah chu Harvey chuan a rawn en reng tih a va hmu a.

       Ben Harvey chu a han ding a, "Khawngaihin min lo ngaithla teh u, kei aia Marshal dinhmun luah àwm zawk an awm tlatin ka hria...a hming a pe lut ve tih ka lo hre hauh lo va, hre lâwk ni ila chu ka hming ka pe ve hauh lo vang...min thlang tling chauh nà a, Marshal hna hi tlin tak tur midangin thawk se ka duh a ni," a han ti lung lung a.

       "Ben, tu chuan nge han luah se i tih a?" Carlos-a, Marshal thlanna huaihawttu pathum zinga pakhat chuan a lo ti bauh a.

       "Saw ti laia mikhualpa sawn," Ben Harvey chuan a han ti a, Jim-a chu a han en a.

       Jim-a lam chu an rawn hawi phei nghal ṭhup a, an phun sup sup a. A rûk tak chuan chuan mak pawh a ti deuh a. Ben Harvey thil tih dan hi a rin lawk loh tawp thil a nih avangin a ruk taka inphiarrúkna eng emaw riau a awm a ring tlat mai a.

       "Ben, nangmah hi thlan tlin i nih angin kal tlang se a ṭha a ni," pa hmai hriam hrêk hráwk Gregor chuan a lo ti a; ani pawh hi Marshal thlan huaihawttu pathum zinga mi tho a ni a.

       Mipui chu mahni ngaih dan ṭheuh sawiin an phun ri mur mur mai a; chutah Denver kha a rawn ding chhuak a, mi te chu ngawi tura a han khap hnu-ah, "Dan pangngaiah chuan mipui ten kan thlan tlin hian Marshal dinhmun chu a luah ngei tur a ni a; amaherawh chu Harvey berin ngaih dan dang a neih si chuan Jim hian eng angin nge a ngaih han sawi ve se la a ṭhain ka hria," a han ti a.

       Mi ṭhenkhat chuan, "Ni e, han sawi ve rawh se," an lo ti hlawm a.

       Jim chuan Platform lam chu a pan phei chhat chhat a, mipui lam hawi chuan a ban a han phar a, "Pi leh Pu te u, thlan tlin chu Ben Harvey a nih angin Marshal hna chu a kutah awm rawh se; kei chu mikhual mai ka nih rih hi maw," a ti a, Harvey chu a han en phei ve ngat a, Saloon chu chhuahsanin Big Ben Saloon lam a pan nghal ta daih a. Saloon chhung a han luh chuan Marshal thlanna lamah an kal deuh vek avangin mi an lo awm mang lo va, Bar nghaktu leh Putar lam deuh tawh hi an lo awm ve a. A han hawi kûal deuh chuan, kilkhata Cowboy pakhat naupan hmel tak leh sa pan lam deuh hlek hi a va hmu a; a hmel pawr deuh chap leh a thawmhnawa vaivut niawm tak paw thâr aṭang chuan vawiin lama rawn thleng thar a nih ngei a ring a, chu Cowboy pawh chuan a rawn melh ve zawk a.

       Jim chuan Bar lam a pan ding nghal a, a nghaktu hnenah chuan, "Whisky a awm chuan min han thlit ta che," a han ti a. Bar ngheng chuan kawngka lam hawi hian a han ding sawi deuh a. Vei ren run nei awm lo zet hian muangchang hian a zu no dawm lai chu a han in a. Kil khata Cowboy naupan hmel deuh chu a han melh leh ralh ṭhin a. Ani chuan kun deuh hlek hian a lukhum chu a khum a, kun deuh chal chung hian zu no a dawm ve mek bawk.

       Tuibur hmuamda awm velah chuan Ben Harvey leh a ho te panga chu Saloon chhungah chuan an rawn lut ve ta a, Harvey kawr awmah chuan arsi lem hi a inbel vâ tawh bawk a.

       Jim chuan ngawi rengin zu no chu a dawm a, rawn lut thar te pawh chu ngaihsak vak awm pawh hian a lang chuang lo va. Chutah Harvey chuan a rawn pan ta a; Bar nghaktu hnenah chuan, "Danny, min han thlit ve ta che," a han ti a. Jim-a bula ding ve nghalin zu chu a han in ve nghal a.

       A chezia chu Jim chuan a lo chhut ru neuh neuh a, thil eng emaw tak thleng dawn tlat hian a hria a, a nunna atana hlauhawm a nih erawh a ring hran lo; Harvey chuan amah chu engti zawng tak emawa biak tum hi a ang a ti mah zawk a ni.

       "Jim...chu chu maw i hming?" Harvey chuan a han ti phawt a.

       "Chuti ang chuan min ko ṭhin chu a nia lawm," a lo ti mai a, a ṭhen sak bawk a. "Marshal ka lawmpui che; i inhmeh ngawt mai," a han ti zui a.

       Za mang lo hian Harvey chu a han nui ngial a, "Marshal dinhmun luah tura ka duh che nen; i duh lo chu a nia..." a han ti ve a, a ngawih deuh vang vang hnu-ah, "Tunah pawh kha rilru kha ka la pu reng asin," a han ti leh a.

       "Ni lo ve, kei zawng mahni thu duh deuh mai hi ka ni a, hnathawh duh dan zâwng tè te hi ka nei ve tlat ṭhin a, midang thunun theih leh an duh dana thuneihna han tlawhchhan hi ka thiam ve mang ta ṭhin lo," Jim chuan nui chung hian a han ti a.

       A chhânna avanga lawm mang lo hian Harvey chuan, "Chu, eng nge sawi i tum?" a han ti deuh hmuk a.

       "Eng dang sawi tum lo ve, Marshal ka nih vaih chuan ka inlek hle awm si a, i ho te ṭhenkhat hian min ngeih mang lo vang, Harvey. Nang lahin i ho te thlavang i hauh ve ngei a ngai àwm si a," Jim chuan a lo ti leh mai a, nui hmel hi a la pu reng a.

       Harvey ngaihtuahna chu a kal thui hle a, he tlangvalin pawisak a neih loh hmel zia leh, amah ngei pawh tham lo hmel deuha a dawr ṭhin chu mak a ti hle a, a lo hriat tawh ṭhin mipakhat ang hle hian a han hre deuh lehnghal a.

       "Ṭhian anga min ngaitu te chuan 'Ben' tiin min ko ṭhin a sin," Harvey chuan a han ti ngawt a.

       Jim chu a ṭhen leh sak a, "Ṭhian atâna kan insiam pawh chu ka lo la hre ve hlei nem," a lo ti leh mai a. Harvey-a'n a chhan leh hma chuan, "Mahse i duh dan anga koh che chu ka hnial hran chuang lo va," a han ti leh hnuhnawh a.

       An piah kila Cowboy naupan hmel deuh khan an inbia vel chu a lo mitmei leh zauh ṭhin a, an han inchhan dan velah chuan phurna riau hi a lo nei ve a. Marshal badge bel lo zawk chuan mipakhat a hriat chhuah tir leh nghe nghe a, an hnunglam aṭang phei chuan an inang hle hian a hre hnuhnawh nghe nghe a ni; a chezia reng reng mai pawh chu.

       An ngawih dun vang vang hnu-ah Harvey chuan, "Jim, Deputy-ah ṭangin min thawhpui ta che," a han ti leh a.

       "Ngawi teh, Marshal nih tumin ka hming ka pe lût a, nang hi i tling ta daih si a; chu lo rengah, i Marshal hna hmuh chu min pém buhbel i tum a, keiin ka lo hnar a, chumi hnu-a i Deputy-a han ṭan leh hnuhnawh pawh chu hnungtawlhna a nih ngawt dawn chu le," tiin Jim-a chu a nui ta hawk hawk a.

       "Thawhpui che hi ka châk zâwng tak a ni asin."

       "Ni lo ve, ka nih tum ka nih phak loh chuan, a aia hniam chu ka beisei lo ve, Marshal."

       "A nih leh, ka Ranch enkawl ta che," Harvey chuan a la ti ta fo a.

       Jim chuan Harvey lam chu a hawi a, amah en ran chung chuan, "Ben..." tiin a han ṭhen sak a, "Del Rio-ah hian hnathawh tur zawngin ka rawn kal lo va, ka mamawh tawk pawisa chu ka nei rih e," a ti ta a. Zu no chu dahin chhuah tum hian a kal ta a. Kawngka a thleng ṭep tawh a, mipakhat ṭawng avang hian dingin a han lehhawi leh rih a. Chutia a din leh nachhan chu Cowboy naupang lam pakhat lo awm ve reng vang kha a ni.

       "Marshal, Deputy hna chu keima'n ka duh a ni," chu Cowboy chuan ring deuh tak hian a rawn ti a.

       Chu thu rawn sawitu lam chu Harvey leh a ho te chuan an en phei ta ṭhap a. A hmel leh pianphung reng reng chu a la naupan hmelin a huphurhawm loh hmel em mai a; chuvang chu a ni ngei ang, Harvey ho te chu a nui ṭha hlawm a. Jim pawh chuan thil awm zel dan tur hriat a duh avangin kawngka bulah chuan kutkuangkuaha bang ngheng hian a ding ve ta rih a.

       Harvey chuan, "Tlangval, i la naupang lu deuh lo maw?" a han ti a, a hmelah erawh nuihzat hmel a lang ve lo thung.

       "I nu hnute pawh hnetu mamawhin a ṭang tawh hle ang. Naua haw leh zawk teh," Harvey ho te zinga pakhat chuan nui uar uar chung hian a lo ti ve bawk a.

       "Ka nu chuan kei min hring hi a inchhuang ngawt ang," Cowboy chuan a han ti ve ta khauh a.

       Chupa nui lai chu a tawp chawt a, "Khanglang che chuan...i nu chu nawhchizuar vakvel a nih nghal loh..ka'n..." a han ti a, chu Cowboy chu a han pan ta nghal mai a. He pa hi Bull Bulock a ni a, Harvey ho te zinga thinchhiata lar a ni a, pa huatthu chhe tak, tih lawm loh awl zet, midang kutthlâk mai sam zet hi a ni a; mahse, chu Cowboy naupang tak chu a lan dan ang ngawt a ni lo tih a hriat phah dawn ta a ni.

       "Mr. khatah khan ding nghal rawh," fiak ṭhak hian Cowboy chuan a lo ti a.

       A rin loh dan deuh maia Cowboy la naupan hmel tak maiin a lo tih avang chuan Bull Bulock chu a ding chawt a, thinrim avangin a hmel a lo dur nghal khup khup a.

       Cowboy bawk chuan, "Mr. vawikhat chauh ka sawi ang, ka nu chungchang i sawi dan avang khan thupha i châwi tur a ni; chu chu i ti lo a nih chuan i silai kha i chuh ngei tur a ni bawk ang," a han ti leh hmak mai a.

       "I duhthusam a nih lek chu," Bull Bulock chuan a lo ti nghut a, rum em em hian chu Cowboy chu a han melh a.

       Jim chuan thil awm dan chu ṭha a ti lo kher mai, kutkuangkuaha a ding kha a insiamrem a, a kut pahnih chu a kawng zawnah a thlâkthla hnak a; engpawh ni se thil fair lo tak a awm a nih vaih chuan a telna lam tur dik takah tel ve ngei a tum tlat a ni.

       Harvey chu Marshal a ni tawh a; mahse chu boruak ṭang tak chu ṭhelh a tum miah lo; chu Cowboy naupang tak chezia chuan a hneh ru riau a, tun mai khan Deputy hna a rawn dil a, heti ang khaw rura ve tak, Gunman leh Killer fuan khawm fona hmuna dân kengkawhtu pui turin a tling ve reng em tih fiahna hun remchang tak pawh a ni ang chu. Chubakah Bull Bulock hi a tân buaipui a buaithlak deuh fo a, a che chhe zawkah a ṭang a nih pawhin pawi a ti hran lo. Cowboy hi lo thi ta pawh ni se, a hloh hranpa chuang bawk hek lo vang. Tin, khawthlang lamah hian mite hian Silai cheleka tualthah hi sam hle hlawm mah se, hmeichhia, a bîkin Lady dik takte hi chu an zah thiam em em a, misual tak anga an ngaih ṭhenkhat pawh hian dâwta hmeichhe puh hmingchhiat hi an duh ngai lo va; chuvangin Cowboy pakhatin Bull-a a chona hi chhan ṭha tâwk a tling ve tlat a ni.

       "Silai hmanga kan chin fel a ngai ta a nih chu!" Cowboy chuan a ti ta hmiah a.

       Mipahnih te chu an inhmachhawn ta ran mai a, Saloon chhungah chuan midang pawh an rawn lâwi lût leh ṭan dawn tawh a; mahse mipahnih thinrim em ema lo inhmachhawn te avang chuan kawngka bul hnaihah an ding khawm deuh lat lat a. Silai mu lêng tawn palh hlau si, hmuh chian loh hlau bawk siin an ring a fân dâk dâk hlawm a.

       Thawklehkhatah Bull Bulock chuan a silai chu a chuh ta thut a, chumi rual bawk chuan rang lutuk hian Cowboy chuan a silai a phawi ve nghal a, silai chu a ri rual ni mai hian a hriat a; mahse Bull Bulock-a Puakruk chu chhuatah a tla ri bawl a, a kut chu a dawm nghal chawt bawk a, ama Silai mu erawh chuan Cowboy naupang tak taksa aṭanga hmalam hlam khat vela chhuat chu a va verh sawt chauh thung a; Cowboy chu a ran zawk miau avangin silai chuh hmasa mah se Bulock chuan a khingpuipa chu a tin zawn hman ta lo a ni.

       Cowboy chuan, "Mr. vawihnih nan chance ka pe leh ang che, ka nu chungchanga i thu sawi kha sût leh rawh...i ti lo a nih chuan ka that ngei ang che," a han ti leh nghat a.

        Bull Bulock chuan a hreh hmel ngang mai a.

       Cowboy bawk chuan, "Vawiinah ka lo thleng chauh a, han thah nghal ngawt che chu..." tiin a han ngawi dat a, "...mahse a ṭul a nih phawt chuan ka hreh dawn miah lo a ni," a han ti lehnghal zat a.

       Bull Bulock chuan a amah Puakruka tintu chu a han en a, hreh teh mah se a phût ang chu a tih ngei a ngai dawn a ni tih a hria a. A mitmeng han enin he tlangval hian a that hreh hauh dawn lo tih pawh a hre thiam nghal mai a; chutah, Harvey chu a rawn inrawlh ve ta bawk.

       "Bull, tlangval hian a ti dik a ni...i thu sawi kha sût la, he thil ṭha lo tak hi ti tawp tawh rawh u," Harvey chuan a lo ti ve ta a.

       Bull Bulock chu a la ngawi ta fo a.

       "Bull, i tih loh chuan he tlangval hi khap ka tum hauh lo; i tih tur chu ti thuai la, i kut kha va enkawl vat rawh," Harvey chuan a han ti leh hmuk a.

        Chutah zet chuan thih a la duh lo a ni ang, Cowboy hnenah chuan hreh àwm zet hian, "Ka tihpalh a ni, i nu chungchang ka sawi dan kha a dik lo tih ka sawi e," a ti ta a. Thinrim hmel la pu reng chung chuan pawnah a chhuak ta hnu hnu a.

       A chhuah hnu chuan Cowboy chuan a silai chu a paiah a khung ve ta chauh a, a ṭhutna ngaiah khan a han ṭhu leh a. Harvey chuan, zu um nen a va pan phei a, zu chu thlit sak pahin, "Tlangval, Deputy hna chu i tlin viau dawn hi maw le, Bull kha a rang viau asin; tunge i hming?" a han ti a.

       Cowboy chuan, "Yorky' tiin min ko ṭhin," tih chauhin a lo chhang a.

       Jim chu a nui sak a, chu Cowboy naupan hmel tak chet dan chuan a hneh ru riau a, thil pawi a thlen a rin tawh loh avangin Saloon chu a chhuahsan ve ta a.

       Jim-a a chhuah hnu chuan Harvey leh Yorky chu an indawr zui ta zel a.

       "Yorky, Deputy Marshal nih chu i la duh em?"

       "Marshal, chu hna chu ka duh alawm; chaw ei te pawh ka ngai ve a, Bawng enkawl ai chuan ka phur zawk daih chu a nia lawm,"

       "A ṭha e, Office-ah min zui phei nghal thei ang," Harvey chuan a han ti a.

       "Mahse..." tiin Yorky chu a han tawp chat a.

       Harvey chuan, "Eng i ti leh si nge?" a lo ti nghal hmuk a.

       "Marshal, ka thu ka sût leh turah i ngai deuh em ni? Ni lo ve, ka rawn thleng chauh a, intih fai a, hawi thawven ve lawk te pawh ka duh a. Naktuk lamah hna chu rawn zawm ka duh zawk a ni," Yorky chuan a lo ti vat a.

       Harvey chu a ngawi vung vung a, a tawpah chuan, "A ṭha a e; naktukah chuan rawn kal ngei ang che," a ti ve ta a.

       Yorky chuan Saloon a chhuahsan ta a. A chhuah hnu chuan Harvey chu a nui vur vur a, a ho te hnenah chuan, "Naupang hmantlâk tak a nih hmel, Bucky aiawhtu kan nei hma khawp a lawm; Bucky ai pawh khan a rang ngat ang," zawi sup hian a han ti a.

       Del Rio khuaah chuan lo thleng thar Yorky leh Ben Harvey 'kit' Bull Bulock te buaina tih loh chu buaina dang a awm leh hran ta lo va. Ni chu a sa rumrut mai a, khaw lum chu a rûm hian a rûm vung vung hian a hriat a hial a. Chawhnu her hret vel a lo nih chuan Double D Cowboy hawklak rual hian kawtthler vaivut chu an rawn pal khu rum rum a, an rawn au khek tuar tuar mai bawk a. Chung Cowboy rual ho sakawr chungchuanga tlan liam ta te chu Jim chuan Dawr pakhat, Silai mu leh eng ilo zawrhna kawt aṭang chuan a en zui vang vang a. Cowboy ho chu Lucky Chance Saloon, Del Rio khuaa hmeichhiain a enkawl Saloon awmchhun kawtah chuan an chhuk a, Saloon chhungah chuan an lut ta dial a. He Saloon nei tu hi nuthlawi hmel ṭha leh duhawm zet, Mina Chrisandy a ni a.

       "Mipa ho hi chu in mak ngawt mai."

       Amah rawn betu aw avang chuan Jim chu dinglam hawiin a han inher vat a. Chu hmeichhia chu chawhma lama mipakhatin chhaih buai a tum, a lo chhan tak kha a lo ni a.

       Nula chuan, "Rosalyn..." tiin a lo nui sen sen a.

       "Jim' tiin min ko deuh ber," tih ve paha nui chung hian Jim chuan, "Miss, mipa kan mak i tih nachhan kha ka hre thiam phak hauh lo?" a han ti a.

       Nula chuan la nui reng chung hian, "Tuna i lo thlir liam tak Cowboy ho pawh kha an engthawl em em a, tikhan an thlakhat hlawh dollar 40 chu an nuam tih zawng atân an khawhral leh nghal ngei ang. Anmahni ti thinrimtu an tawn hlauh chuan an silai an chuh nghal ngei bawk ang a; nupui fanau neia dinhmun nghet neih lampang an ngaihtuahnaah a awm hlawl lo a ni," a han ti a.

       "Kei pawh hi chuti ang chu ka ni ve ang a?" Jim chuan a lo ti a.

       "I nih ngei ka ring," nula chuan nui chung hian a lo ti leh mai a.

       Jim chuan thu tak awm zet hian, "Tak takin Miss, a ṭul huna silai chelek hi chu khawthlang ramah hi chuan mipa tan a ṭul chang a awm ṭhin a ni," a han ti leh a.

       Nula chuan amah chu enin a han nuih séih a, "Ti teh, ka Patea'n a hmu duh ngei ang che; hei hi a dawr a nih hi," a han ti a.

       Jim chuan Silai mu leh thil dang lei a lo tum sa tho avangin dawrah chuan nula chu a zui lut ve ta a. Rosalyn chuan a thlavang a hauh dan vel kha a lo hrilh tawh avangin a Patea chuan lawmthu a lo hrilh luam a.

       Zanriah a ei zawh chuan Hotel-a a pindanah Jim-a chu a awm zel dan tur ngaihtuahin Meizial a zu hlat hlat a; chutih lai chuan a kawngka chu an rawn kik leh karh karh a, "Puck, lo lut rawh," a han ti thla ngawt a.

       Mahse lo lut chu chumi ni-a khuaa lo lut thar zawk kha a lo ni a. Jim-a'n a han hmuh chuan, "Yorky...?" a han ti a.

       "Hmu tur chein min duh a ni," Yorky chuan a lo ti a.

       An han ngawi dun renrawn a. Jim chuan, "Amah chu engtikah nge a rawn thlen ang?" a han ti a.

       "Ka sawi thei lo; Tucson lamah a kal hmasa a ni."

       "Min hmuh thu hi i pu thar khan a hre em lo vang chu maw?"

       Yorky chu a han nui a, "Hria se pawi ka ti hlei nem, ka hna ka la zawm rih lo va," a han ti ve a.

       "Yorky, fimkhur ang che," Jim chuan a han ti leh sap a.

       "Ani pawhin min chah ngun khawp asin," tia nuih pahin, "Zawngfian phel an tih ang em chu in ni lo tih thil chauh a ni," tiin Yorky chuan a chhuahsan leh ta a.

       A chhuah pah chuan Karkhat chuang liam taa Hattchet Folly-a YZ Ranch lama an remruatnaa tel loh a hlauh zia te kha a ngaihtuah pah nauh nauh a, han rik deuh rep rep nuam tihna riau hi a nei ve tlat tawh a ni.

* * * * * * *

SUDDEN: CLEAR THE NAME
Author: Chhantea Pautu

Chapter Four

       Nikhat chu chhun pachan lai tak hian mipakhat, Sakawr dum lian taka chuang, fual taka Pistol pahnih pai, inkhaithli tawk tak leh darpharh hlai ṭha tak hi Hattchet Folly-ah chuan a rawn lut hlawl mai a. Chupa chu a hmel han en reng reng pawhin a rawn kalna kawng chu a thui thawkhat hle a ni tih hi a hriat ngawih ngawih a. Saloon chhungah a lut a, a dangro zet tih hnawn nan ti niawm fahran hian zu a han khiat khawlh khawlh a, khuaah chuan rei pawh awm lovin YZ Ranch awmna lam chu khua ami te a zawt a, chulam pan chuan a kal tlang leh ta mai a.

       Ranch a va thlen lai chuan a neitupa chu a lo awm lo va; mahse pa te lam, ke kual deuh ṭaih mai pakhat a khel tawn tawna Puakruk pai fual hnalh mai hian a lo dawngsawng a; chumi chu YZ Cowboy Snap Lunt an tih chu a ni. A bulah chuan Cowboy la naupan hmel tak, dawldang lek lek anga lang hi a awm ve bawk a.

       Ralkhata Sakawr chungchuang chu a lo hnai zel a, mi eng ang nge a nih hriat chian theihna awm tawk vela hnai a rawn thlen chuan Snap Lunt-a bula Cowboy chuan, "Saw chu Nigger-a a ni hauh lo mai; mahse Sakawr ṭha tak a nih saw le," a han ti a.

      Snap Lunt chuan, "A chunga chuang pawh saw Sudden-a ni mai awm a nih saw, a hnunglam aṭang chuan ka hai thei ngei ang," a lo ti ve bawk a. "Yorky, ti rawh, i lo dawngsawng dawn chhin teh ang," a han ti zui a.

       Chu Sakawr dum lian zeta rawn chuang chuan Ranch tualzawl chu a rawn thleng ta a, a Sakawr chu Snap-a te dinna bulah chuan a han pawt ding a, inthazo awm zet hian a han chhuk nghal. Amah lo dawngsawngtu Snap leh Yorky chu a han melh thuak a, "Ṭhiante u, hei hi YZ Ranch a niin ka ring," a han ti a.

       "I ring dik khawp mai; mahse ṭhian nge i nih hmelma kan la hre ve hauh lo," Snap chuan a lo ti bauh a.

       Chupa chuan, "Jim Silver ka ni a, hetah hian James Green, hming lar tak dang pakhata an koh bawk hmu tura lo kal ka ni," nui chung hian a han ti a.

       Chu thu a sawi avang chuan Snap Lunt chu a meng zim san a, fimkhur awm deuh hian chupa chu a han en a. Chhân tuma a ṭawng dawn lai tak chuan an hnunglam aṭang hian, "Min be duh tihna em ni? Mikhualpa, thu i rawn khuh ang reng hle mai a," tih ri an han hre ta a.

       Aw lo chhuahna lam chu Jim Silver chuan a hawi thuai a, amah pana inrin hmel zeta 'Sudden' tia an sawi ṭhin lo kal mek chu a va hmu a. A bul a rawn thlen chuan chîk deuh hian an han inen a, "Kei hi i mizawn chu ka nih ngei ka ring. Eng nge ni ta Mr...?"

       "Jim Silver," Snap Lunt chuan a lo ti sap a.

       "Jim Silver maw...eng nge i duh tak le?" Sudden chuan a han ti a.

       "I hmingthanna hian kei leh nang hi min um zui zel a ni ber mai; chumi chungchanga rawn hmuh tum che ka ni," rawn thleng thar chuan a han ti ve a.

       "Tichuan i rawn kal chhan chu eng nge ni ta ber?" Sudden chuan a han ti leh a.

       "A fala inbiak ka duh a ni."

       Sudden chuan a han en vang vang a, Ranch In lamah chuan a chhohpui ta, inchhungah chuan hmeichhe pakhat, hmel ṭha zet mai hi a awm a, Sudden chuan, "Norry, hei ani nen hian thil sawi dun lawk tur kan nei a," a han ti a.

       "Aw le, Snap leh Yorky kha min ṭanpui lawk tura duhna ka nei, ka han bia ang nge," tiin Norry chu a chhuak ta a.

       Sudden chuan mikhualpa chu a han en a, "Eng nge i lo kal chhan chu ni ta?" tiin a han zawt a.

       "Petterson tih hming hian i tan awmzia a nei em?" mikhualpa chuan a han ti phawt a.

       Sudden chuan a chhang lo va, amah chu uluk deuh hian a han en a, "Ṭhiana, i sawi tum chu sawi tlang mai rawh," a lo ti mai a.

       Chu mikhual, Jim Silver inti chuan a sawi zawm leh ta a.

       "Texas ram chhung, Del Rio khua leh a chhehvelah chuan kei hi Sudden-a nia hriat ka ni a; chuvang chuan ka tlanchhiat pawh a ngai fo a, ka Sakawr dum aṭang ringawt hian mi ṭhenkhat chuan Sudden-a luman îtin min zawng ṭhin, mi ṭhenkhat, thil hre chiang mang lovin Sudden-a nia min ngaih miau avangin, ni lo mah ila Texas ram hmun ṭhenkhatah chuan ka nun a ralṭi hle mai a, chuvangin Del Rio khaw kianga Ranch pakhata ṭanpui ngai em ema awm, ka tâna mipawimawh tak pahnih te chu ka ṭanpui hleithei rih ta lo a ni."

       Sudden-a chuan, "Tichuan, Sudden-a niin min hria tihna a ni ngei ang chu maw?" a lo ti bauh a.

       Mikhualpa chu a nui sak a, "Thil pehhel hi ka thiam mang ṭhin lo va. Sudden-a chu i ni tih hre saa rawn kal ka ni alawm. Ka rawn hmu che a, Sakawr dum ka neih ve bakah, kan pumrua vel pawh a lo inang hle mai tih ka rawn hmu ta a nih hi; mahse nangmah hre chiang tân chuan kei hi Sudden-a ka ni lo tih hriat a har hauh lo ang, hmelah pawh kei ai chuan i upat hmel zawk a, chubakah, i chanchin mi sawi ka hriat ṭhin aṭang hi chuan nang aiin ka rang hauh lo vang tih ka ring," a han ti a.

       Sudden-a chuan nui chung hian, "Han chhinte i duh lo'm ni?" a han ti fiamthu a.

       Mikhualpa Jim Silver-a chu a nui ve mai a, a thil sawi chu a han sawi chhun zawm leh a, "Mi ṭhenkhatin Sudden nia min ngaih miau avangin ka tlanchhiat reng a ngai a, Bounty Hunter leh Gunman leh Killer thil hre chiang mang lovin min um zui ṭhin a, Sudden-a ka ni lo tih ka hrilh fiah hmaa silai chelek a ngaih zel si avangin ka tlanchhiat a ngai ta a, thla thum vel liam ta khan Texas ka chhuah san a, New Mexico ah ṭhian pakhat ka chhar a, chu chuan Sudden-a tak tak chanchin chu min hrilh a, amah chu zawn ngei ka tum ta a ni."

       "New Mexico aṭang chuan Arizona ram chhung ka rawn lut a, mi ṭhenkhat hnen aṭangin khawi khawi emawa i chetna te ka rawn hre zel a, helai Hattchet Folly i then fai dan pawh ka rawn hre ta a, ti hian nangmah ka rawn hmu thei ta che a nih hi. Ka hmu che hi ka lawm khawp mai," a han ti a.

       "Chutah chuan ka lo tel vena tur ka hre thiam lo hle mai."

       "A tir chuan amah ni-a min hmeh bel Sudden-a chu a chanchin ka han hriat khan tlanchhiat tho ka ngaih avangin ani chu mi eng ang nge a nih hriat châkin ka zawng ru ta zel a ni ber a, mahse Arizona ka rawn luh takah chuan a chanchin ka hriat belh zel avangin ka thil tih tur, tlanchhiat ka ngaih avanga ka tih theih rih si loh nen inzawmna an nei thei tih ka hre ta a, hmuh ngei che tumin ka zawng ngawrh lehzual ta che a ni. Hattchet Folly ka rawn thlen hma hian mipakhat nunna ka chhanhim sak hlauh mai a, chupa chuan tun hmaa Petterson tih hming lo pu ṭhin Ranch humhim tura i chet dan min hrilh a, chu pa chu tunhma khan Joe Tarman hote zinga tel ṭhin niin a insawi nghe nghe a, chupa Tarman-a lah chu misual, i tukzal tak kha a ni a," a han ti dap dap a.

       "Eng nge Petterson hmingpu chuan i tan pawimawhna a neih tak?" Sudden chuan a han ti khauh a.

       "Del Rio khuaa ṭanpui ngai em em pahnih te chu Nancy Petterson leh a pasal Mac Matthew te an ni," Jim Silver chuan a han ti ta a.

      MSudden chu ngaihtuah thui awm deuh hian a han ngawi vang vang a, "Chu chuan ka tel ve ngei a ngai tih eng tin nge a kawh?" a han ti leh a.

      .Silver-a chuan, "Engtin nge ka hriat tih chu min zawt duh lo mai la, ka sawi chuang bawk lo ang a..." a han ti te te a, chutah, "A hmaa hemi Ranch neitu, Petterson kha nangmah hringtu, i pa a ni," a han ti ta a.

       "Tichuan..." Sudden-a chuan a lo ti bauh a.

       "Nancy Petterson chu Texas-a Crawling Greek hmuna Ranch nei ṭhin Petterson-a fanu a ni," Jim Silver chuan a ti leh ta a.

       "I chiang chiah maw?" a mak ti hmel deuh thup tlat chung hian Sudden chuan a han ti a.

       "Ka chîang tawk chuan ka hria. Mac Matthew chu ka ṭhian ṭha tak a ni a, kei hi mi chuangtlai mai ka nih avangin an nupain ka chungah an ṭha hle ṭhin. Nancy chanchin pawh ka hre chiang thawkhat a ni. Tun hma chuan Crawling Greek bawr velah a nu nen an awm ṭhin a; mahse pasal a han nei a, a nu chu a han boral hnu chuan Matthew chuan Del Rio khuaah luh puiin chumi bulah chuan Ranch lian vak lo hi an enkawl ve ta a, tunah hian an bul vela mi te lakah buaina an tâwk mêk a ni," Silver-a chuan a han ti leh ta a.

        "A nih leh, Nancy Petterson chu engtin nge Petterson-a fanu a ni tih i hriat?"

       "Amah Nancy min hrilh a ni. Petterson-a chuan nupui a sûn a, chumi hnu-ah a nupuiin a hrin sak a fapa chu a han bo zui leh a. Petterson-a khawhar lungleng leh Nancy nu chu an intawng ta a, Nancy hi a lo piang ta a ni. Petterson chuan Nancy nu chu a rai tih pawh a hre lo; chutih lai chuan Petterson chu chin hriat lohin a bo zui ta daih mai bawk si a ni. Chu chu Nancy-i'n Petterson nena an inlaichin dan a nu hnen aṭanga a hriat chu a ni," a han ti ta.

       Thil awmzia Sudden-a chuan a han chhut a, chupa, Jim Silver-a mizia awm ang tur te chu a han chhut chuan thu dik tak a sawi ngeia rinna a nei a, thah tuma a lo zawn ngar ngar kha a pa a lo nih chuan, nu hrang laka farnu a lo nei chu thil mak leh zual a ni hran bik lo vang tih chu a ngaih dan a ni.

       A mikhualpa lam chu a han hawi leh a, "Tichuan Nancy Petterson te nupa puihna kawngah chuan lo tel ve turin min duh ta tihna em ni?" tiin a han zawt leh a.

       "I theih chuan a lawmawm ngawt ang," tih chauh hian a lo chhang a.

       "Chung lai ramah Sudden-a ang hiala an ngaih si che chuan, i phawirangin i kap thiam thawkhatin ka ring a; chuti chu i tân anni ṭanpui chu thil awlsam tak a ni phawt ang," Sudden chuan a sawi tum hriat hauh loh hian a han ti leh a.

       A mikhual chuan, "Khawthlang lamah chuan phawi rana kah thiam poh leh nun hi a derthawng a ni tih chu i hre ve tho ang a, luman tam tak neia Sudden-a, Outlaw anga an puanna Texas ram velah ngat phei chuan ka tân a ni lehzual, ṭhenkhat lah chuan Suddena emaw min la ti tlat zui lehnghal," nui chung hian a han ti a.

       "A ni khawp mai; engpawh ni se zanin chu hetah riak la, naktuk lamah thu chiang ka nei chauh ang," Sudden chuan a han ti ta a.

       "Dik taka sawi chuan, ṭanpuitu ka mamawh a ni," mikhualpa chuan a han ti leh hrâm a, pawnah chuan an chhuak dun leh ta a ni.

       Chutih lai chuan Cowboy ho hnathawk pawh an rawn haw khawm ṭan tawh a, Sudden chuan lo thleng hlim hlawt Sammy Red-Hair hnenah chuan, "Sammy, kan ṭhianpa hi riahna tur leh insilna tur lo kawh hmuh ta mai che," a han ti a, mikhualpa leh Sammy chu an kal sawn ta a. Sudden chuan Snap Lunt chu a zawng nghal a, Chhekin siamin Norry nen, Yorky nen chuan an lo buai hle a, "Snap, biak lawk che ka duh a ni," a han ti a, Snap Lunt chuan a zui ve nghal bawk a, Sudden-a hmelah chuan danglam deuh awma an hriat avangin Norry leh Yorky chuan an hnung deuhah an rawn zui ve vat bawk a. Sudden-a leh Snap chu inchhungah an lut a, Jim Silver-a nena an inkawm dan zawng zawng chu a han hrilh ve a, "Eng nge i ngaih dan?" a han ti zui nghal a.

       Snap chuan ngun deuh hian Sudden-a chu a han en a, "Ka hre lo; mahse Jim, Texas-ah i kal a nih chuan ka tel ve ang," a han ti nghat a. Eng dang mah sawi lovin a chhuahsan ta daih a.

       Sudden chuan a chhuak ta chu a enzui vang vang a, amah ngaihtuah tak taktu ṭhian a nei chu a lawm hle a, a nui sak a, pawnah chuan a chhuak zui ve ta a. Pawnah chuan Norry leh Yorky chu an lo awm a, ngawi reng leh mi tak deuha Snap-a'n Bankhouse a pan nal nal mai chu an lo en zui hê hâw a.

       Norry chuan, "Eng nga ti nge Snap kha khatia a awm?" tiin a pasal chu a han zawt a.

       Sudden-a chuan nui var var chung hian, "Texas lama zinpuiah ka sawm ve loh a hlau a nih kha," a lo ti mai a.

       Norry chuan, "Texas a...!?" a han ti hlak a.

       A nupui chu duh hmel deuha han melh pah hian, "Ti teh Norry, thil hrilh tur che ka nei a ni," a han ti a, inchhungah chuan a luhpui ta a.

       Yorky chu a ngaihna hriat loh hmel zet hian a hawi â hau mai a. A tawpah chuan Snap Lunt-a kalna lamah chuan hmanhmawh zet hian a kal phei ve ta a, thil awmzia va zawt sateh mah se engmah a zawt chhuak thei ta chuang lo a ni.

       A tukah chuan Del Rio khuaa inhmu tura an intiam hnuin Jim Silver-a chu YZ Ranch aṭang chuan a Sakawr dum lian zet nen chuan an chhuak leh ta a; a hmel leh YZ Ranch neitupa hmel chu inang tehchiam lo mah se a. kalnaa Sudden-a hmel hre chiang lo tute emaw chuan Sudden-a emaw an lo tih leh ngeiin a rinawm.

       YZ Ranch hnathawk zinga Sudden-a nihna tak hre chiangtu tumah chuan Texas rama a kal tur chu an duhpui hauh lo. Mahse ani chuan hnial rual loh hian kal a tum miau mai si a, a kal tumna tak leh a chhan erawh chu mi tlemte bakin an hre chuang lo va.

       Larry Barton tak chuan a rem ti lo va, an pahnih chauha an awm dun laiin, "Jim, luman sang tak i nei a, kal lo la ka duh ngawt mai," a han ti a.

       "Larry, Ranch hi lo enkawl rawh, Snap-a'n hnial rual lohin mi zui a tum miau mai bawk si. Foreman nihna chance ṭha tak a ni hmel hi...i hauh lawk tawh ang khan," nui chung hian a lo ti satliah mai si a.

       Larry chuan, "Mi â pa, thluak thawl tak chu i lo nih hi maw le...nangmah man tuma phe sek ho Texas Sheriff ṭhenkhat te hnenah, 'Kei hi Sudden-a chu ka ni' i va tih nulh nulh duh mai dawn hi," a han ti hmak a.

       Sudden-a chuan, "Nang baka thluak thawl hi an awm zawk lo vang...thluak thawl te chu mi ti ve khanglang suh," a han ti a.

       Chutia an infiam zui bawrh bawrh lai chuan piah deuha Pi ber rawn kal chu Larry chuan a va hmu a, thu tak deuh hian, "Miss Norry hian hrehawm a ti dawn e mai, Jim " a han ti ṭha leh a.

       Sudden-a chuan, "Ka rawn kir leh hma chu ṭha takin lo enkawl ang che," a han ti sap a. "Tun hi Texas rama ka hming mawi lo tak ka hliahkhuhna tur a ni mai thei asin," a ti leh lai chuan Norry chuan an bul hnai a rawn thleng ta a.

       "Larry, ka pasal hi a falin ka lo be lawk thei ang em?" Larry hnenah chuan a han ti a.

       Ani chuan, "Tehreng mai ka pi," tia zah taka biak pah hian, "Kan lungmawla kha han khawng harh teh," tiin Sudden chu a han fiam leh hram a, a kal ta daih a.

       Norry chuan a kal ta chu en zuiin a nui sen sen a, "Jim, kan mi te hi duhthusam an ni" a han ti sap a.

       A pasal chuan, "A ṭha ber te an ni. Snap-a'n min ngaihtuah zia te hi a mak zawk a ni," a han ti ve bawk a.

       "Mahse Jim, kal lo thei la ka va duh em, kal chu a ṭul tlat em ni?" Norry chuan a han ti a.

       "He ka hming pakhat hian min um zui zel a, he lai thlengin a rawn thleng tawh a, a lo awm ṭanna hmunah ngei chin fel a ngai a ni. Engkim a fel vek mai ang," tiin Sudden-a chuan a nupui chu duat deuh mai hian a han kuah a.

       "Mahse Jim, ka hlauthawng a ni..."

* * * * * * *

       Mi pathum, Snap Lunt, Yorky leh Sudden-a chuan YZ Ranch chu tukṭhuan ei khamin an chhuahsan ve dawn ta a, an chhuak tur chu Norry chuan bathlar aṭangin lungngai awm deuh hian a thlîr liam a.

       Hattchet Folly an pelh chuan an inṭhen a, Sudden-a chu Tucson lam panin a kal a, Snap Lunt leh Yorky chu kawng dangah kalin Texas rama Del Rio khua an pan ta a ni.

       Heng hun lai hian Silai chelek thiam tak leh rang tak nih chuan ho tè-ah hmingchhiat mai theih a ni tih chu mitin deuhthaw hriat a ni a, Puakruk phawi rang deuh chu phawi rang nia inhria tu emawin fiah tumin a rawn cho a, tualthah hreh em em tân pawh nawrh luiha awm tawh chuan an nunna hum tuma silai an chuh ve mai a ngai ṭhin a, an inbeihna hmuna rawn hmu ve lem lo Law-man te chuan tu nge dik a, tu nge thiam tih chu a nihna tak an rawn hre kìl kèlh ngai hauh lo va; chuvang tak chuan thiam lohna nei hauh lo pawh ni se, Puakruk chelek rang tak chuan amah invenna lama mi a thahin dan pawnah hnawl a ni a, 'Outlaw' tia koh a hlawh tawh mai ṭhin.

       Chu chu Texas rama Sudden-a Outlaw a lo nih ṭan dan pawh a ni a, hmingthannain a ken tel thil ṭha lo tak Law Officer te zawn nih chu a chungah hian a thleng ta reng a ni. Ama tih ni miah loah puh a la ni fo a, amah anga inchhâla hmel thupa che duh tawk, mi suamhmang leh rukru an awm fo bawk a; mahse Sudden-a'n tumah a suam ngai lo va, a ṭul tâwpah lo chuan Silai a chelek ngai na hek lo.

       Gunman leh Killer, Silai pahnih fual taka paia vak vel ṭhin, mi ten 'Gunfighter' tia an sawi te reng reng hian tunhma chanchin an nei châwk a; heti anga an rawn awmna chhan bul hi, duh se sawi tur an nei vek ṭhin. Mahse Silai phawi rang zînga dik taka midang hmachhawn ṭhin te reng reng hian a pawng apuiin an ran thu an chapo pui ngai lo.

       Khawthlang ramah chuan hmel hriat loh kara mimal chanchin inzawh ngawt hi tumahin an ngaina lo va, a hrisel lo. Mi tu emaw phawi rang tak chanchin chungchanga kam tam viau mai chu thihna a ni chawk a; mahse phawi rang an awm chuan a rûkin phun sep sepin sawi mah se, khual thuthang leh ar pan chuk an sawi ang deuhin an thil tih ni lo deuh thleng pawhin an tih niin a thang tawh mai ṭhin.

       Snap Lunt ngei pawh hian chanchin hmasa chu a nei ve ngei a, hepa, ṭawng tlem tak, pa lian lo tak leh Puakruk pahnih fual hnalha pai hi a ṭawng tam ngai lo va, a hmelma leh a hmel hriat loh te kârah a awm chuan a kut bawr pahnih hian a Puakruk pai hi a hlat ngai lo.

       Tuna kan sawi tur Sudden-an a hming than mawi lohna ching fel tura a beihna chanchin pawh hi Texas rama Puakruk hmaga mimal inbeihna awm tamna ber chanchin a ni hial ang. Thu buai chu Puakrukin an ching fel mai ṭhin a, chuti ang thil a thlenna hmun panin tunah hian an kal mêk a ni.

       Ni chu a sa rum rut mai a, Sudden chuan a Sakawr Nigger hmang lovin Blue Devil zawk chu a hmang a, chumi ni khaw lum zet maiah chuan a Sakawr chu a be mawlh mawlh a. A tum dan chuan Tucson khuaa Governor Bleke hmuh phawt a, chuta ṭanga Arizona ram chin pelin New Mexico a lut ang a, kal zelin Texas rama khaw pakhat Del Rio chu a pan ve dawn a ni.

       "Blue, kan va fimkhur hle a ngai dawn a ni. Nigger ang chuan Texas chu i hre bel hauh dawn lo va, Nigger-a'n misual leh thil hlauhawm laka signal min pek ṭhin ang kha chu i lak aṭangin ka phut thung dawn a ni," tiin a Sakawr chu a be mawlh mawlh a. Blue Devil pawh chuan a hre thiam a ni ve mahna, a puin chutia a han biak chuan a hram deuh nghur nghur a.

       Sudden chuan a va kalna tur hmun chu a han ngaihtuah a, fimkhur a ngaih tur zia leh a ṭul chen chen chu amah man tumtu Sheriff pathum lai te pumpelh turin a rilru a siam a, a kalnaah pawh nidanga a tih dan angin mihring hmu tlem thei ang bera kal a tum a ni. Norry a han ngaihtuah a; mahse ngaihtuah thui duh lovin a hmalam chauh chu ding takin a en a, chumi ni tlai lam khawthim dawn tawhah chuan a Sakawr chu a fuih ta sauh sauh a. Tucson khua a thlen chuan khua a thim tawh a, Governor Bleke chenna a pan ta nghal a.

       Governor chuan a lo beisei lo tih a hmelah a lang a, "Jim, eng thil nge ni ta, i lo lan tak nawlh mai," a lo ti a.

       "Ka pu, tun ṭum chu i mi koh ka nghak thei lo a ni, min hre thiam ang che," tiin zah takin a han chibai a.

       "Jim, han sawi ta che," Bleke chuan a ti ta nghal mai a.

       "Texas-ah kal ka tum a ni," Sudden chuan a han ti a.

       Bleke chu a ngawih vang vang hnu-ah, "Chhan ṭha tak a awm a ni ngei ang chu maw?"

       "Texas rama ka dinhmun chu nang tluka hre chiang an awm hlei nem. Ka tih ni si lo, ka tih anga chhala thil titu te hi chin fel ka duh a ni."

       "Ka ṭanpuina i mamawh ngei ang."

       "Ka mamawh ngei ang; chu chu ka beisei ngam lo va, nangma hrilh lo chea kal erawh ka duh lo a ni," tiin Sudden chuan a chhang a.

       Governor Bleke chu a han tho a, kut hnungsuihin tukverh bulah chuan a va ding vang vang a, rei deuh fe hnu-ah chuan a rawn hawi let a, "Ka ṭhian, ka hna thawk turin a ṭul hun apiangah ka ko che a, i hnialin i sawi buai ngai lo, thih theihna hmunah pawh i kal mai zel a, tunah nangma thilah kal ve tumin ka hnenah i rawn sawi a...a ṭha e...Texas-ah chuan va kal ang che. Texas Governor pek tur i tân lehkha ka ziah sak che ang a, i chanchin pawh hi zep nei lovin ka hrilh ang," a han ti ta a.

       Sudden chuan, "Ka pu ka lawm e," a han ti sap a.

       Governor chuan, "Ka ṭhian, Del Rio khuaah Nancy Petterson a awm tih ka hria a; chu chu i kal chhan tur pakhat a nih ngei ka ring. Ben Harvey saw a fing a, langsar khawpa ngaimawhawmin pawi a khawih ngai si lo. Ka bial chhung a ni lo nà a, Del Rio khuaa thil a kalpui fel leh lutuk saw a fel lo a ni, rawn ching fel nghal la a ṭha ngawt ang. Fimkhur ang che ka ṭhian," a han ti ta a.

       Sudden-a chu za vak lo hian a han ṭhen sak a. Arizona Governor Bleke a ngaihsanna leh a zahna chu a zual sawt a, thil a hriat em em ṭhin dan leh a chhui peih zia mawlh chu mak a ti zawk hial a, amah nena an inchhar pawh chu vannei a inti hle bawk. Zah taka Governor chu chibai buk lehin a chhuahsan ta a.

SUDDEN: CLEAR THE NAME
Author: Chhantea Pautu

Chapter Five

       Ben Harvey Marshal a nih aṭanga karkhat hnu velah, chhun pachan lai hian Del Rio khaw chhungah chuan mipakhat Sakawr chung chuang hi muangchang hian a rawn lut bauh bauh a, a Sakawr aṭang chuan hruizen hian mihring sual hmel deuh pahnih hi a rawn kai lut a, kawtthlerah chuan an rawn kal phei zel a, an bulah chuan Putar deuh leh a fapa niawm tak, la naupan hmel tak hi Sakawr tawlailir hlui tawh lam hian an kal ve zel bawk a. Ami rawn kaih te avang chuan khuaa mi te chuan mak tiin an zui hlawm a.

       Mipahnih phuara rawn kaitu chuan Marshal Office lam a pan a, a thlen chuan pâwn aṭang chuan ring fé hian Marshal chu a han au a. Office-ah chuan Marshal chu a awm loh avangin a Deputy, tlangval la naupan hmel tak mai hi a rawn chhuak a. "Eng nge ni ta a? I va han au ring ve, Marshal a awm hlei nem...i sawi duh chu ka hnenah hian sawi mai rawh...kha tute nge ni ta a?" Deputy chuan a han ti puat puat a, mihring a kaih leh a kaitu a hmuh chuan a phu deuh zuk a.

       Chu Sakawr chung chuang chuan Deputy Marshal a han hmuh chuan a nui suk a, "Tlangval, i pu chu koh tir vat mai teh, nang zawng i la naupan hmel e mai. Lu man nei ngeia ka rin misual pahnih ka man a nia, lu man an neih tak tak phei chuan ka la nghal duh dawn a ni...sum ka neih loh dan chu...ka Ipte hi a kawrawng ṭan tawh a nia," a han ti duah a.

       "Lo nghak rawh mikhualpa," Deputy chuan a han ti zet a, "Tuemaw chuan Marshal min han koh sak teh u," a han ti leh a.

       Chutih lai chuan mipahnih phuara rawn hruaitu hnunglam aṭangin, "Yorky, hei eng nge ni ta mai?" mipakhat hian a rawn ti a, amah chu Del Rio khaw Marshal Ben Harvey a ni a. Marshal chuan sakawr chungchuang chu a han en a, "Tunge i nih reng reng?" tiin a han zawt a.

       Chupa chuan, "Ka ṭhian ni lem lo te chuan 'Green' tiin min ko châwk," a lo ti mai a. Amah hi Texas rama Outlaw lar leh hmingthang, Puakruk phawi rang leh kah thiam chungchuang, 'Sudden' tia an hriat ṭhin chu a ni.

       Marshal chuan, "I mi rawn hruai te hi tute nge an nih i hria em?" a han ti leh a.

       Ani chuan, "Hre dawn lo'm ni, Pathian thu hriltu chu an ni lo alawm," nui chung hian a lo ti a. An bul vela awm te chu an lo nui ham ham a.

       Marshal chuan, "Fiamthu ka thawh lo a nia Mr. Green," a han ti hmuk a.

        Sudden-a chuan, "Marshal, kei pawhin fiamthu ka thawh bik lo. Pakhat hi Beneto, tualthah avanga lu man nei mêk, a sual ang aia dawihzep zet si a ni tih ka hria, pakhat hi erawh a hmel chhiat tluk zetin a lo berah mi rawk leh suam chîng a ni ngat ang, an lu man min pe theitu Sheriff hnena ka hruai hmain i Jail-ah min lo kawl ṭhat sak ang chu ka ti mai asin," a han ti a.

       Marshal chuan, "Khawiah nge i rawn man reng reng a?" a han ti leh zel a.

       Sudden-a chuan, "Heta ṭanga mel nga vela hlaah sawn helaia putar pafa hi suam an lo tum a, a remchang ema ka rawn kai nghal ta mai alawm maw le," a han ti awlsam leh mai a.

       Marshal chuan, "Chuti maia mikhual thusawi awih chi ka ni lo; hemi te hi Del Rio-ah pawh an rawn kal fo va, buaina an siam awm ka hre ngai lo; bakah tunge i nih ka hre miah lo che lehnghal, hmel hriat loh satliah..." a han ti hman chauh tih chuan Sudden-a mitmeng chu a inthlak nghal daih mai a.

        Chutih lai chuan Sudden-a man pakhat zawk chuan, "Marshal, hemi te hi kan lo fiam mai mai a ni; chutih lai chuan hepa hian Silaiin min rawn tin a, min phuar ta ri ngawt a nih hi," a lo ti phar phar a.

       "A nih pawh a ni mahna, in thu sawi ka awih loh ang bawkin tunge tih pawh ka hriat loh he mikhualpa thu sawi pawh hi ka ring chuang lo," Marshal chuan a lo ti nghut a.

       Sudden-a ngaih dan chu a pel ta kher mai, "Marshal, hemi te pafa hi han zawt ta che, thu dik chu i hre mai dawn alawm. Tunge ka nih tih thu-ah chuan fiah i duh deuh em ni?" tiin Marshal mitah tak chuan a han en a, a meng rum ta hle mai a.

       Marshal nen chuan ngawi rengin an han inen a, amah entu mitmeng a han hmuh chuan Marshal chuan chu mikhualpa chu pawngpaw zuam ngawt chi a ni lo tih hi a rilru-ah a lo awm a, hmun dang a melh san ta zawk a.

       Chutah, Sudden-a chu a nui ta chiam a, "Marshal ka fiamthu a nih kha, nang berin misuala i ngaih loh chuan kan chhuah anga a ni mai alawm," tiin a Sakawr aṭang chuan a han chhuk thla chhak a, chemte phawiin mipahnih a rawn kaih te kut a phuarna chu a zai chat a, "Kal bo rawh u, in tui te pawh a hal lo'm ni? Mahse hei hi hria ula, inkawhmawh bawl lai ka hmu leh a nih vaih chuan a thiin nangmahni duhtu Sherriff hnen ka thlen tawh ang che u," a han ti a. Marshal lam chu a hawi leh a, "Marshal, nang berin misual an ni lo i ti miau mai si a, kha ka chhuah leh ta mai, he khuaah hian misual nih a har hle àwm hi maw," a han ti zui salh a. Kal sawn tumin a han inher ta a.

       "Mr. Green, la kal teh suh," tiin Marshal chuan a han au a.

       Sudden-a chu a hawi lêt leh a, "Marshal mamawhna che ka nei lo va, min mamawh hran hek lo; ka dang a ro," tih pahin Marshal Office aṭanga Saloon hnai ber Big Ben Saloon-ah chuan a lut ta daih a.

       Marshal chuan a en zui vang vang a, a hna thar leh a dinhmun leh thil ruahhman dan chu inhmeh lo chho dawn riau te hian a han hre ṭan a. A mi chhawr zinga tel te chhan an ngaih fo dawn si chuan khuaa mipangngai te lakah a zahawm lo thei hle ang tih a ring ta a ni.

       Sudden-a chuan Bar lam a pan ding nghal a, zu chu a han lam a, Bar nghaktu hnenah chuan, "Min han dawmpui ve nghe nghe la a ṭha ang," a han ti a.

       Bar nghaktu Danny chuan, "I lo thleng chauh em ni?" a han ti ve a. Zu chu no hnih a thli zui nghal a.

       Sudden-a chuan, "Rawn pan ding nal nal tâkah chuan ka rawn thleng ve chu a nih hi," a ti sam puat a, "In Marshal saw tunge ni?" a han ti zui nghal zat a.

       Danny chuan, "Mr. Ben Harvey a nih saw, he Saloon pawh hi a ta a ni asin," a lo ti thuai a.

       Sudden chu a ṭhen sak a, "Pa che thei tak a nih àwm chu maw le. Ranch pawh a nei lian viau ang chu maw?" a han ti nghat a.

       "Nei e, Mr. Ben-a Ranch BB hi heng lai Ranch awm zingah chuan a lian ber a ni alawm; bakah..." a han ti zet a, mikhual mai bulah a ṭawng tam ta deuha inhriain a ngawi zui ta daih a.

       An inbe vel hre phak hian an piah deuha chuan mi pathum hian dawhkan pakhat kilin zu no an dawm a, Sudden-a chuan chu'ng mi pathum ten an rawn mitmei dan chu a pangngai chiah lo ni hian a hria a, ngaihven ang chuan a lang duh hauh lo thung. Zu chu muangchang hian a in a; mahse chu'ng mi pathum te rilru chu en chhin a châk rilru ta tlat a, tih dan tur a han ngaihtuah ta a.

       Rei mawi tawk a awm hnu chuan, "Dang char tih hnawn nan chuan i zu chu a tui kher mai, ka chhuahsan tawh teh ang che," a han ti a. "Ti daih ila, in Marshal hi a zaidam awm hle mai, in khuaah hian misual nih a har dawn riauin ka hria," ring leng lawng hian a han ti leh hrâm a.

       A mit sir chuan dawhkan kila ṭhu pathum zinga pakhat han che deuh chu a hmu a; mahse chupa chu a bula ṭhu pakhat chuan mitmeiin a khap tih pawh a va hmu nghal mai a. A rin dan chu a dik ngei tih hriain Saloon chu a chhuahsan ta a ni. Hotel a pan nghal a, a pindan luah tur a tih fel hnu-ah engtia chet lak tur nge tih ngaihtuahin a pindanah chuan a tawm ta vang vang a. Zan lamah chauh Hotel pâwn lamah chuan a che chhuak leh chauh ta nghe nghe a ni.

       Tlai thimhlim hian Hotel chhawng hnuaiah chaw ei turin a chhuk thla a, chaw a han lam a, mi pakhatin ngawi renga a lo kil dawhkan lam chu a pan phei ve ta a. Chupa hnenah chuan, "Yorky-a thil tih saw i hriatpui em?" a han ti nghal tawp a.

       "Jim, inhria angin kan la awm lo; a thlen ni khan mipakhat nen buaina an nei a, Ben Harvey sawn a ruai zui ta a ni awm e."

       "Snap, helai lai hmun hi eng nge i ngaih dan?"

       "Gunman leh Killer luh khawmna khuaah chuan a fel fai mah mah a ni."

       Sudden-a chu a nui sak a, "Ni e, Snap, misual nih a har hmel khawp mai," a han ti a.

       "Vawiin tlai khan, Black Wolf an tih, Johny Lumbo leh mi pali lai khuaah hian an rawn lut a; hepa hi ka hre tawh ṭhin," tiin a mitmeng chu a nelawm lem lo hle mai a.

       "Uluk deuha thil kan chîk a ṭha ang."

       "Jim, engtia hmalâk nge i tum?"

       "Bounty Hunter ang maia kan chêt pawh a la ngai ang. Thil awm dan a zirin chêt dan tur chu kan hre chhawm mai ang chu."

       "Fimkhur a ṭha khawp ang."

       "Yorky chu hre lo anga kan awm rih a pawina a awm lovin ka ring. Zanin chu Big Ben Saloon lamah kan va lawi lût ve a niang chu," Sudden-a chuan a han ti a, a chaw lam chu a ei mawlh mawlh a.

       Zana Sudden-a leh Snap-a'n Saloon chhung an va luh ve chuan mi an lo ṭhahnem tawh hle a, a ṭhenin Poker an khel a, a ṭhenin zu ina dawhkan kilin an lo nui bawk bawk a, Cowboy pangngai niàwm tak tak pawh an awm nual mai. Sudden-a chu a han hawi kual a, Saloon chhung kilkhata dawhkan awm, hnunglam bang rinchhana ṭhut theihnaa mi pakhat, la naupan hmel tak chuan a mit a la deuh a, "Fimkhur thiam hle mai," a han ti sap a.

       Bar lam chu an han pan dun a, Bar-ah chuan Marshal leh a Deputy pawh an lo awm ve bawk a. Sudden-a chuan zu a han lam a, "Marshal, in dun ang hmiang," a han ti a. Chutih lai chuan Snap Lunt chuan dawhkan awl pakhat chu ngawi rengin a lo pan tawh a.

       "Mr. Green, eng ti turin nge Del Rio khuaah hian i lo kal?" Marshal chuan a lo ti a.

       "A ṭul ṭul a ni mai ang chu. Lu man nei ho te inhlawh nan ka vai khawm ang chu ka ti a, ei leh in man tur ka duh ve reng dawn si a," Sudden-a chuan a lo ti mai a.

       Marshal chu a nui suk a, "I phawi ran viau a ngaih dawn chu " a lo ti bauh a.

       Sudden-a chuan nui chung bawk hian, "Han chhin te i duh lo'm ni?" a han ti ve a.

       Sudden-a fiamthu avang chuan Marshal chu a nûr deuh nang mai a, chu pa chuan ti tak tak pawh ni se, a phawi ran em em thu hrilhtu an lo awm tawh avangin chu chona chu chuti maiin a hmachhawn hauh lo vang. A rilru chuan Sudden-a mizia àwm ang chu a chhût neuh neuh a, pawisak a neih loh hmel zia a han hriat chuan, thil engmah la tak ren run lova ngaizam mai mai ṭhin a nih a han ring thla ngawt a. Mahse, chupain a chhân dan chu a ngainat zawng a ni lem lo hle thung mai. "Mr Green, fiamthu i duh awm hle mai," a han ti sup a.

       Sudden-a chu a nui ta hawk hawk a, "Marshal, vawiin aṭang khan Marshal zaidam tak i nih hi ka ring tlat alawm, huatah i lak ka ring lem lo ve," a han ti ta zaih a. A ruk chuan Saloon chhunga mi reng reng leh thil awm dan chu a thlir uluk em em a, a mi hriat tawh an awm leh awm lo pawh a en ngun hle bawk.

       Marshal chuan a zu no dawm lai chu a han tlak pawp a, a Deputy hnenah chuan, "Yorky, Saloon dang ka va fang kual ang nge, buaina a awm chuan i kutah ka dah a nia," a han ti a, Saloon chu a chhuahsan ta a.

       Tun dinhmun mai-ah chuan Saloon chhûngah chuan buaina han chhuak mai awm hian a lang lem lo va, mahni buai buai hian an buai hlawm a, mihring awmte chu hmel pawr leh bumro pui pui ni hlawm mah se, buaina han siam duh mai tur hmel an awm rih lo a ni.

       Sudden-a chuan a mi hriat tawh ṭhin te la hmu rih lo mah se, he khuaah hian mi rura leh rothap pui pui an luh khawm fo chu a ring nghet tlat a, he Saloon-ah hian nichina Snap-a mi sawi te kha an lo awm tawh a ring hle a; mahse a ṭhianpa mitmengah chuan engmah a lan loh avangin chu'ng mite chu an la rawn kal lo tawp a nih a ring a ta zawk ni. Johny Lumbo hming a sawi laia Snap-a mitmeng kha a lo hmu ru reng a, he Saloon-ah hian an rawn kal a nih a, Johny Lumbo leh Snap Lunt chu an inhre chiang tawn a nih ngat phei chuan eng thil emaw chu a thlen ngei a ring tlat a, uluk taka thil awm dan lo thlithlai chu a duh tlat a ni.

       Chhún lama a mi man te kha a la hmu leh ta miah lo va, khuaah hian an la awm ngeiin a ring tlat bawk a. Beneto kha phawi rang leh Gunman ni lo mah se, misual hnawksak zet mai a ni tih a hre chiang a, Marshal Office bula Marshal-in a lo chhân dan leh a lo dawr danah khan, a mi man pahnih te kha a chhan deuh ni tlat hian a hria a, Del Rio khaw Marshal chu eng mi nge a nih rin dan tawk pawh a thiam ta mai a ni. Kha'ng mi pahnih te a man dan kha a ngaihtuah chhuak a, a ngaihtuahna avang chuan a nui sak a.

       Heti ang hi a ni- Sudden-a'n Del Rio a rawn pan chuan a hmanhmawh duh lem lo va, a kal pah chuan a Sakawr Blue Devil chu a be mawlh mawlh reng a. Chutia a Sakawr a biak mawlh mawlh lai chuan aw vin taka han in vau thawm hi a han hria a.

       "Thih i duh loh chuan min pe vat mai rawh!"

       Sudden-a chuan chu aw lo chhuahna lam chu fimkhur tak hian a pan phei a, mi pahnih, hmai tuam hian pafa Sakawr tawlailir khalh hi ti dingin rawk an tum hi a lo ni a. An pawisa ip pawh an lo laksak tawh nghe nghe a. A han inngaihtuah dat a, chutah nui vak vak chung hian chumi te chu a va pawh phei ta a. Hmai tuam pahnih chuan phawk fe hian an rawn en rual ṭhawt a, an Silai chuan an rawn tin nghal bawk a. An suam pafa te pahnih lah chuan mak tih hmel deuh hian an lo en hé hâw bawk a.

       Sudden-a chuan, "Ṭhian te u, thil nuihzatthlak deuh ka hrilh ang che u. Ka lo kal kawngah suamhmang ka tawk a, min rawk a, min suamtu te chu nangni'n hetah rawkin in lo suam leh a, " tiin a han nui leh vak vak a, nuih pah chuan a mal te chu a beng vei thlarh thlarh a. Hmai tuam pahnih te chuan an en ngun hle na a, a awm dan a vang chuan an inthlah dul deuh a.

       Chutah Sudden-a nui chu tawp thut a, "In silai kha thlauh nghal rawh u," a han ti chhum ta hmak a. A mitmeng a inthlak nghal vek a, nelawmna leh nuihza hmel reng reng a hmelah a lang tawh lo.

       Hmai tuam pahnih chuan mak tih hmel deuh hian an han en a, Sudden-a chuan a Puakruk pahnihin anmahni chu a lo tin reng tawh mai si a, a phawi lai reng reng an hre si lo.

       Sudden-a chuan, "Second khat chhung lekin ka kap hlum ve ve thei che u a nia, in Silai kha thlauh rang rawh u," a han ti leh a.

       Anmahni vautu hmel leh mitmeng an han hmuh chuan a nelawm loh em avangin chumi te pahnih chuan an Silai chu an thlauh ta a.

       Sudden-a chuan, "Tlangval, in pawisa ip an laksak che u kha la lêt leh rawh," a han ti a. Chumi zawhah amah chuan an hmai tuamna chu a han hlih sak a, pakhat hmel a han hmuh chuan a nui suk a. "Hemi te hi khuaah ka kai lut dawn a ni. Tlangval, min han pui rawh le," a han ti leh a. Chumi te pahnih an phuar zawh chuan khaw lam panin an inkai ta a ni.

SUDDEN: CLEAR THE NAME
Author: Chhantea Pautu

Chapter 6

       Sudden-a chuan Tucson-a Governor Bleke a hmuh hnu leh, Tucson chhuahsana Del Rio a rawn luh dan te ngaihtuah pah chuan Saloon chhung boruak chu a chik ru em em reng a; mahse darkar chanve emaw lai tur chu boruak ṭang tak thlenna tur khawpin engmah a thleng mai lo. Snap Lunt pawh a dan ngai tèin a dawhkan kil bulah chuan a la ṭhu kun ve chal bawk a.

       Bar-ah chuan Sudden-a leh Deputy Marshal Yorky chauh chu an awm tawh a. Yorky chuan thil awm dan leh chinchang vel hrilha han ti ti pui a duh viau a; mahse amah nena inṭhian an ni tih ti lang tur khawpa han kawm chu a la hun chiahin a hre rih lo va. Chutia ngawi renga awm ai chuan han ti ti pui erawh a tum ta tho a.

       "Mr. Gree...a...Jim, Del Rio hi eng nge i hmuh dan?" a han ti bah deuh nak a.

       Sudden-a chu a lo nui hawk hawk a, "A va mak nawk nawk ve Deputy Marshal, min han zawh tâkah chuan, he khua chu misual nih a har hmel ngawt mai," a han ti a.

       Yorky chuan han sawi leh mai tur a hre leh ta chuang mang si lo va. A ne ne kual vel ta mai mai a; chutih lai chuan Saloon chhungah chuan mipanga hi an rawn lut a, pakhat rawn lut thawm chu a nat em avangin Saloon chhunga awm ṭhenkhat chuan an lo en deuh ṭhap hlawm a. An zinga mi pathum te erawh chu an ngawi run hlawm a, an hmel chuan nelawmna reng reng a nei lo. Bar chu an rawn pan hlawm a, pahnih te chu an rawn tlangnel nghal phar phar hle mai a.

       Pakhat chuan, "Danny, han thli vat teh, hei hi Johny Lumbo, Texas rama phawi rang leh kah thiama sawi tlak mi tlem te zinga tel a nih hi," tiin a bula hmel nelawm lem lo zet chu a han kuah thuak thuak a, "Sudden-a an tih ve sek pawh hian a khalh bik kher lo vang," a han ti leh zuah zuah a.

       Sudden-a chu a rûkin a lo nui rah rah a. Chu pa, thawveng deuh mai chu a nuihzat rilru hle nghe nghe a. Chumi te lo luh laia Snap-a hmel leh mitmeng chu a lo hmu ru reng a, a awm dan a danglam a ni tih pawh a hai lo a ni; mahse Snap chu awmze nei miah lo va chuti maia che duh tur khawpa dawhthei lo leh â chu a ni lo tih a hria. Lo lût thar te erawh chuan Snap chu an rawn ngaihsak tehchiam lo niin a lang a, an hre lo emaw, an a la hmu fuh lo emaw pawh a ni ang.

       Johny Lumbo chu a ṭawng tlem hmel hle mai a, chutia a ṭhianpain a chungchang a sawi lawng lawng lai pawh chuan a lo rum nghut duh chauh a. A ṭhianpa hnenah chuan, "Razo, Dawhkan saw i kil teh ang u," a han ti nghut a.

       "Lumbo, lo va kil rawh u, he laia mikhualpa hi ka han kawm lawk teh ang," tiin Sudden-a chu a han melh a. Johny Lumbo te pawh chuan kal sawn chu an tum lem chuang hlei lo va.

       "Mikhualpa, tunge i hming min han hrilh teh," 'Razo' an tih chuan a han ti thâwr a.

       A han tih dan teh tawp chu Sudden-a ngainat zawng a ni lo tawp mai a, "Ṭhiana...Razo...i hming chu eng pawh ni se, Texas ramah hi chuan hming inzawh chawt hi Puakruk kaw hmawr hmuhna a ni fo asin," nui chung hian a lo ti a.

       "Chu i phawi rang viau e lo?"

       "Chu chu tunge sawi?" nui chung bawk hian Sudden-a chuan a lo ti a.

       Razo chuan, "Lumbo nen tunge rang zawk tih han fiah i ngam em?" a han ti leh hram a.

       Sudden-a chuan a ning ṭan ta hle a, "Nang hi midang chotuah chîng tak i nih dawn hi le, a ṭul hle loh chuan ka ran leh ran loh hi fiah ngai ka ti lo; fiah chu i duh deuh elo, han tum chhin la," tiin Razo chu a melh ta ran mai a.

       Razo an tih chu a thin a rim hmel kher mai, Silai chuh mai duh hmel hian a lang a; mahse, Lumbo chuan a lo khap ta a, "Razo, insum rawh, ani hi kan buaipui tur a ni lo," tiin Saloon kilkhata mipakhat lamah chuan a han thle deuh nghat a.

       "I ṭhianpa thu chu zawm rawh," Sudden-a chuan a lo ti ram hmak a. Chupa cheng han deh chhin nan reng renga chutia ti chu a ni a. Johny Lumbo chuan a lo melh zawk a, an kal kiang zui ta daih a.

       Saloon chhung boruak pawh a kal tluang zel ni hian a lang a, nichina mi panga te pawh khan dawhkan pakhat kilin zu an in a, lehkha an deng a, eng vak thlenga a rin loh avangin Sudden-a chuan Saloon chu chhuahsana mut hahchawlh mai a tum ta a ni.

       QKawngkhar lam panin ke a han pen ṭan a.
* * * * * * *

       Jim Siver chuan a mi nghah ber chu a lo thleng tawh tih a hria a, a hmel pawh a hmu tawh a; mahse biak maina remchang a awm loh avangin chuti mai chuan a la pawh duh lo. Big Ben Saloon chhung chu a han lut leh a, Bar lam pawh pan lovin Saloon kilkhata dawhkan ruak chu a pan a, fimkhur taka ṭhutna thlangin bang hnungchhawn chiah chuan a ṭhu a, amah chauh hian lehkhaden a khawih let thak thak a. A luh hnu deuha Saloon chhunga mi panga rawn lut te chu an zinga pakhat thawm a nat em avangin a lo melh ve zawk a; mahse a hriat ngai mi an awm lo.

       A thiltih ngai chu a chhunzawm leh mai a, a nakkinah chuan, "Mr. i ṭhutna aṭang khan rawn ding chhuak rawh," tih ṭhat ri hi a han hre ta a.

       Jim Silver chu a han hawi chhuak a, amah betu chu a han en a, lo lut thar mi panga te chu amah ngei hmachhawn chuan an lo ding reng tawh mai a. A hma zawn chiahah chuan Johny Lumbo kha a ding a, sir lehlam lehlamah chuan midang ho chu an awm bawk a. Jim Silver-a tana thil a harsat zawk nan ti niàwm fahranin inkar hlat deuh takin an kal sawn ṭheuh a.

       Jim Silver chuan ding chhuak chuang lo hian, "Ka din chhuah chuan Dollar khat min pe dawn tihna em ni?" a han ti a.

       An zinga pakhat chuan, "Dollar chu theihnghilh rawh Mr. Sudden, i luman hi keini hian kan tél dawn zawk a ni," a lo ti nghut a, inring tak hian a ding kâk ṭah mai a.

       'Sudden' tih hming lam rik a nih chiah chuan Saloon chhunga awm te chuan hual chêpa awm mek tlangval pakhat, Cowboy inchei dan pangngaia inchei ve mai, Saloon dawhkan pakhat kila thu kun deuh chal chu an rawn en ṭhup a. A ṭhen chu Silai mu tawn palh hlauin an insaseng ṭan nghal bawk a.

       Johny Lumbo chuan, "Ding la, min hmachhawn rawh," a lo ti bul ve hmuk a, a meng rum ul mai bawk a.

       Deputy Marshal Yorky chuan thil awm dan a hmuh chuan, la naupang teh mah se, boruak ṭhelh daih a ṭul a ni tih a hre thiam ve nghal mai a; chuti a nih loh chuan zaninah, hetah ngei hian inkahna namailo tak a awm ngei dawn a ni. "Hetah tumahin buaina an siam tur a ni lo," a han ti fiak ve ta ṭhak a, a Silai erawh a la phawi mai lo.

       Mi pangate zinga pathum chuan Yorky lam chu an rawn hawi phei a, Johny Lumbo erawh chuan fimkhur zet hian a hmaa Jim Silver chu a la en ngur mai thung a.

       Lumbo chuan Jim Silver la en reng chung chuan, "Naupang, lo inrawlh lo la a ṭha zawk ang," Yorky hnenah a han ti nghut a.

       "Mr...a chhuah dawn khan Marshal-in helai hmunah eng pawh a thleng a nih chuan mawhphurna la turin min chah a; ni lo, ka inrawlh ngei a ṭul a ni, ka inrawlh ngei bawk ang," a han ti ve ngat a.

       Chutah, Lumbo te zinga a hmel chhe ber, dawithiam a nih duh hmel em avanga Dirty Wizard an tih mai, pa lian zet mai chuan Deputy Marshal chu a va pan hnai a, hnai set sawta din chilhin, "Naua, kal kiang vat mai rawh," a ti hmuk a.

       Yorky chuan, "Ni lo ve Mr...Marshal a awm loh chuan mawhphurhna chu ka kuta awm a ni. Tumahin Silai in chelek tur a ni lo," a lo ti ve ta tlat a.

       Chutah, Dirty Wizard kut chu a phe zawk a, a kuttum hrawl zet chuan Yorky khabe ruh kual veilamah tak mai chuan a hnek ta bur mai a. A kutthlak a na tham bawk a, Yorky chu thingtum thlauh thlâk ang mai hian a lir hlawl mai a, nikhaw hre lovin a awm zui ta nghal a. Mi panga te chuan Jim Silver-a lam chu an hawi leh ta vek a.

       Fimkhur tak hian Jim Silver pawh chu muangchang hian a han ding a, dawhkana a no inchhawpa zu la awm zawng chu a han tlak pap a, hnunglam bang hnaih zawng chuan tlemin a tawlh hnung hret bawk a, a nui deuh ṭha mai a, dan chepin a awm tih pawh a lo hmu tu tan chuan hai theih a ni lo. "Tichuan eng nge tih in tum tak ber chu le?" tih chhak pah hian ngun em emin a hmaa amah hmachhawna ding tlar thap te chu a han en ve ta kal mai a.

       Chung mi te chu verther zet hian an nui ṭhaw hlawm a, pakhat chuan, "Mr. Sudden, Sheriff hnenah chuan a nung chungin kan hlan thei dawn ta lo che a nih hi. Mi panga kan ni a, eng ang pawhin phawi rang la, damin i chhuak hauh lo vang," a han ti leh a.

       A duh vak lo chungin nawrh luih a ni tih a inhria a, mi han thah teh fo pawh chu a duhzawng a ni miah lo; mahse an zinga ṭhenkhat hi chu a thah ngei a ṭul dawn ta a ni, ama pawh a thi ve mai thei bawk. Chu'ng chu a han ngaihtuah a, "Kan han tum chhin dawn em ni?" Jim Silver pawh chuan a ti ve ta hmiah a.

       Boruak chu a ṭang ṭha ṭak ṭak hle tawh a, inring tak maia inhmachhawna ding ṭhâm mai te pawh chuan Silai an chuh dawn tawh ang tihah chuan, mi panga te sir lam aṭang hian, "Lo la ngawi rih teh u, mi pakhat lek mi panga laiin han beih rawn chu a dikin ka hre lo, ani hian a that vek thei che u pawh a ni mai thei a; mahse ka lo tel ve teh ang," tiin mi pakhat hi a rawn pen phei chhat chhat a.

       Sudden-a'n Saloon chhuahsan tawh mai a tum lai khan, Jim Silver leh mi panga te chu an inhmachhawn ve ṭan chiah a, chu chu a va hmuhin chhuak bik mai ta lo chuan inhmachhawn te chetzia thlir ran chungin a lo tawi khawmuang leh hi a lo ni a. Dirty Wizard an Yorky a hnek thluk tawp lai khan inrawlh tawh mai kha a tum a, a nau chuam Yorky chunga thil thleng chuan a ti thinrim takzet a ni; mahse a inrawlh ngawt mai chuan mi pali te khan Silai phawiin an tana ṭha tur ni hauh si lo-ah awmze nei lo va Silai mu an dawn a hlau tlat bawk si, insehruh ṭeuh chungin Yorky tlu lai chu ngawi rengin a en liam ta ngawt a.

       Chutia a rawn inrawlh ve hnu chuan Sudden-a chu Jim Silver-a bulah chuan a va ding a, pawisak neih loh hmel deuh hian a nui a, Razo chu a han melh bik a, "Ṭhiana, ka hming chu James Green a ni; mahse, ka ran leh ran loh i hriat meuh chuan hremhmunah i awm tawh ngei ang," a han ti leh a. A kut pahnih chu a khel zawnah a thlak zawi hnak a, pawisak nei lo awm zet hian a han ding a, a mitmeng han en erawh chuan a inrin hmel em em mai thung.

       Johny Lumbo-a'n Sudden-a a han hmuh chuan a awm a nuam ta lo hle mai a, a pian zia, hmelhmang leh chetzia chuan engtin emaw ni riau hian a khawih a, khawiah emaw hmu tawh tlat hian a inhre nghe nghe lehnghal a. Chutia Sudden-a a teh vel mek lai chuan a thil mak tih tak mai a la rawn thleng leh ta nghal a. An hnunglam aṭang chuan mi pakhat dang hi a rawn kal phei veleh chhat chhat a, Sudden-a leh Jim Silver-a, anmahni hmachhawntu mi panga ten Sudden-a ni-a an ngaih bulah chuan a va ding ve leh a, "Kei pawh ka rawn tel ve duh tlat. Lumbo, a lo rei ta hle mai ti raw?" tih pahin Johny Lumbo chu mitmeng nelawm loh zet hian a melh ta ngar mai a; mi pahnih bula rawn ding thar chu Snap Lunt a ni a.

       Johny Lumbo-a'n Snap Lunt a han hmuh chuan a awm chu a nuam lo lehzual a, Snap Lunt chuan a phawi khalh ang tih hlaua awm nuam lo chu a ni bîk hauh lo va; mahse a tirilah chuan ṭhamtu eng nge maw tak hi a awm a. Kum thum vel liam taa New Mexico chhunga khaw pakhat, Chuzi Creek-a thil thleng kha a ni. Snap Lunt a han hmuh chuan kha thil thleng kha a han hre chhuak a; engvangin nge a theihnghilh tehlul ang, Snap Lunt chuan a hre reng ang a, amah Johny Lumbo tan pawh hian theihnghilh mai theih a ni lo.

       Jim Silver chu a bula mi pahnihte an rawn din ve hnu pawh chuan thlamuan hmel emaw, lawm hmel angin emaw a la awm chuang lo va, a hmel chu a pangngai reng a, a la ngawi reng bawk a, ṭawng tum tawh hauh lo hmel hian anmahni hmachhawn tu mi panga te chu ngun em em hian a la melh reng a.

       Sudden-a chuan, "Tunah chuan pathum leh panga...a fair lo lutuk tawh hran lo ve. In Silai chu han chuh ta che u," a han ti salh a, ngawi reng leh ngun em em hian an han inmelh ta hlawm a.

       Chutih lai chuan puakruk hi a han ri ṭhuai a, chulam chu an han hawi phei a, Marshal Ben Harvey chu inhmachhawn te lam pan chuan a rawn kal phei mek a, "Zaninah inkahna a awm lo vang," a han ti a; chutia Marshal a rawn inrawlh tâkah chuan Johny Lumbo te ho chu hahdam ta huai hian an han lang a. Chu chu Sudden-a chuan a lo hmuh hmaih hauh lo va, chumi te panga chu a ten ta em em mai a.

       "Marshal, heng mi panga te tan hian a hun takah i rawn inrawlh leh ta a nih hi," ti el awka deuh hian Sudden-a chuan a lo ti a.

       Snap Lunt chu a ngawi reng a, chutia boruak ṭhelh daitu an rawn awm ta chu pawi ti awm deuh hian a awm a, zawi sup hian, "Lumbo, hun dangah aw niang," a han ti sap a.

       Jim Silver thung chuan, "Marshal, i mikhual te hian Sudden-a emaw min ti a ni awm a, ka lu man beiseiin an silai kaw hmawr min bih tir an lo tum mek a ni; a nihna takah chuan chu chu ka duh vak bîk lo va, kan pu te pawh hian a  pawmpui chiah lo a nih ka ring. A awmzia chu, an mi puhna hi kan awih lo tlang a nih hmel; chuvangin kan lo inkhel mai mai a nia," a han ti ve ta a.

       "Sudden-a pawh chu i lo ni mai thei," Marshal chuan a han ti nghut a.

       "Chu min man i tum ve mai dawn elo!?" Jim Silver chuan nui chung hian a lo leh ti bauh a.

       "Lu man i nei tak tak tih ka hriat hun atan ka khek ang," Marshal chuan a han ti leh ṭalh a.

       Sudden-a chuan, "Marshal, vawiina ka rawn man, lu man nei Beneto kha khaw'nge a awm tak le?" a lo ti ve khauh a.

       Marshal chuan chhan ngaihna a hre ta lo hle mai a, "Lawman zahna in nei lo tlang kher mai," a han ti leh hmuk ringawt a.

       Snap Lunt chu a lo rum nghat a, "Kha, i Deputy kha en rawh Marshal, khapa hnek thluk kha a ni. Tu nge Lawman zah lo chu ni ta le?" a lo ti ve hmak a, a kut zungchala Dirty Wizard kawh pahin Marshal chu rum zet hian a han melh a.

       Marshal-in Snap Lunt-a mitmeng leh Sudden-a leh Jim Silver-a chezia a han hmuh leh, an ṭawngkam a han hriat chuan, Del Rio-ah hian, a hmelma atâna a duh miah loh, lamṭang atâna a siam theih khawpa a thunun theih ni miah bawk si lo an awm ve ṭan a ni tih a hre thiam nghal mai a; chhuata Yorky la mu niaih chu a han en a.

       Chutih lai chuan, Yorky chu a rawn harh chhuak ṭan mek a, a rum ṭiah ṭiah a, rawn tho chhuah pah chuan a lu a dawm vang vang a, a khaberuh kual taka hnektu chu thîp zet hian a han melh a; chutah ngawi rengin a Deputy Marshal badge, a kawr âwma arsi chu a phih thla a, Marshal chu a ban thu engmah pawh sawi chuang lovin a pe nghal hmiah a, ngawi reng bawkin Saloon chu a chhuahsan nghal daih a.

       Ben Harvey chuan Yorky chhuak ta chu mak tih hmel zet hian a en zui a; tunah chuan Yorky chhu thlu tu chuan leiba rulh tur a nei dawn ta a ni. Marshal hmel chu lungawi lohna hlirin a khat tawh a.

       "Marshal, Deputy thar i mamawh dawn ta a ang hle mai maw?" Sudden-a chuan a lo ti leh ta nghal a.

        Marshal chuan chhan ngaihna a hre lo.

       Thil chu a pangngai leh vat hian a lang a, Saloon chhunga awmho te pawhin an thil tih lai ṭheuh an chhunzawm leh tawh a, Sudden-a leh Snap-a pawh chu an chhuak zui nghal deuh mai a, a hnu deuhah Jim Silver pawh chu fimkhur deuh hian a chhuak zui ve ta bawk a; mahse Saloon chhunga awmho zingah chuan Sudden-a chanchin hre lo an awm lo va, amah an hmu tawhin a hmel an lo hre tawh phei chu a ni lo; mahse chutia Sudden-a hming lam rik a nih tâkah chuan a chungchang sawiin ṭhenkhat chu a phun sap sap hlawm a. Sudden-a dik tak zawk ni lovin Jim Silver zawk chu an rilru-ah awm deuh ṭhup a; thil áwm lo tak chu a ni lo. Texas leh State dangah pawh Sudden-a hming chu a chhe lam leh ṭha lamin a lar hle tlat a ni.

       Sudden-a leh Snap Lunt-a chhuak ta chu thim chinah hian Yorky chuan a lo nghak reng a, an han inhmuh chuan Sudden-a bulah chuan a lo phun nang nang a, a bulah chuan naupang chhia deuh tak hian a lang a, "Jim, khapa khan ka lakah leiba rulh tur a nei a ni," a ti hmak hmak reng a.
[Jim Silver hi a ṭhianpa Puck Parson leh amah hmel hriat ṭha te chuan 'Jim' tiin an ko ve tho a, Sudden-a(James Green) hi Yorky hian, 'Jim' tiin a ko tih pawh kan hriat kha, an hming hi hriat loh vanga tih sual palh lam a ni chuang lo va, an ṭhian te ve vein an koh dan hi a inang ve reng reng zawk a ni tih hriain ngaihpawlh lo turin kan chhiar uluk dawn nia. James Green hi chu inbiakna ṭawngkam a nih loh chuan Sudden tiin kan sawi zel ang]

       Sudden-a chuan dam thlap hian, "Yorky, hahdam rawh, dawhtheih lohna hi fimkhur lohna bul inṭanna a ni. Fing taka che ṭhin tur leh fimkhur turin ka hrilh ṭhin che kha, i fimkhur tawk lo ṭhin," a han ti a.

       Yorky chuan, "Jim, ka hre thiam e; Ben Harvey chet dan hi hriat thiam a har khawp mai," a han ti ve leh a.

       Sudden-a chuan, "Fimkhur tak leh awmze nei taka kan chet zel a ṭul ang. Yorky i hna i bansan tih a chiang a, Hotel-ah innghat ve tawh mai la, inṭhen darh rih hi a ṭha ang; Jim Silver erawh ka biak a ngai dawn a ni," a han ti a. An awmna hmun aṭang chuan an inṭhen ta a.

       Sudden-a chuan Jim Silver-a lo chhuah hun chu a nghak ta a, rei pawh a nghah hma chuan ani chu a rawn chhuak ve ta a. Thimtham zing aṭang chuan a lo ko a, Jim Silver-a thlenna Hotel-ah chuan an lût dun ta a.

       "Silver, ka rawn thlen hmaa thil thleng hriat ka duh a ni," Sudden chuan a han ti a. "He thila i dinhmun chiah hi ka hre duh ngawt mai bawk," a han ti zui nghal a.

       Jim Silver chuan, "Lo ngaithla rawh, ka han sawi ang nge," tiin mei a zial te te a, pak khûk hlat hlat pahin a han sawi ṭan a. "Zanina i hriat tawh ang leh i hnena ka sawi tawh ang khan mi ṭhenkhatin nangmah, Sudden-a angah min ngaih tlat avangin awmna ngaia awm hleithei lova ka kal sawn reng a ngai a, a hma chuan Del Rio khua hi a chanchin ka hre ngai mang lo; mahse ka ṭhianpa Mac Mathew leh Nancy Petterson te an pem hnu chuan khaw chhung lût lo hian ka tlawh ta zeuh zeuh a ni. Vawikhat chu ka ṭhianpa Puck Parson leh Johnson Putara te nen Del Rio hi kan lut a, thil eng emaw a thleng a, ka tâna a hlauhawm tâk deuh avangin kei chu ka awm rei ta lo; awm rei lo tak ka ni, chawhma chanve pawh ka awm lo va, khaw chinchang pawh hi ka hre hman hek lo. Chu chu hun rei ve tawh tak kal ta kha a ni.

"Del Rio ka chhuahsan hnu chuan ka kual ka kual a, in Ranch lama ka lo kal ṭuma ka hrilh tawh ang che khan i chanchin tam tak ka hre chho a, hmuh ngei che tumin ka rawn zawng pah ta zel che a ni. Hattchet Folly i then fai dan kha mi ṭhenkhatin an sawi nasa a, Mr. Petterson-a nena in inlaichin dan te kha erawh chu i dah ṭhat tak Joe Tarman-a kawppui Seth Laban-a kâ aṭanga ka hriat a ni tih ka hrilh tawh mai ang che. Kha mi dawrawm zet kha a nunna ka chhanhim sak a, a lawm chengchawng khawp a, i chanchin, ka ṭhianpa nupui tâna awmze nei deuh chu tum loh deuhin ka hriat phah ta hlauh thung a ni.

       "Nangmah hmu tura Hattchet Folly ka rawn kal a, ka chhuahsan leh hnu khan i lo lan ve vat beiseiin Del Rio hi ka pan ding nghal a, he khua ka luh ni chuan loh theih lohin Ben Harvey ho te zing ami Bucky an tih chuan min nawr luih miau avangin ka thah a ngai nghal ngawt a, thiam lohna ka neih lem loh avangin hatsatna em em ka tawh phah lem lo.

       "Tichuan chu Bucky chuan ka ṭhian, Del Rio khaw Marshala lo ṭang zui ta chu he khua ka thlen hma chiah hian a lo that a, Del Rio mipui te chuan Marshal thar thlan ṭul an tih avangin Marshal thlanna chu an huaihawt ta a. Ka ngaihven lem lo va; mahse Stranger Come Back Saloon neitu John Denver-a'n hming pe ve tura min ngen avangin ka pe ve ta ngawt a, Marshal lo ni ta ila ruahmanna chu ka nei ve tho a.

       "Mahse Marshal atân chuan Ben Harvey saw thlan a ni ta a. Mak deuhin Ben Harvey chuan amah thlangtu mipui hmaah Marshal dinhmun chu min ken a tum a; mahse a rilru tur àwm ang ka chhutin, lamṭang atân min sawmna mai niin ka ring a, ka pawm duh ta lo a ni. A hnu-ah a Deputy turin min sawm leh a, ka hnial zel a, a Ranch enkawl tur hial pawhin min sawm a ni. Ka thawhpui chak vak lo a ni ber awm e.

       "Kei min sawm hlawhchham lai vel chuan in nau Yorky hi a lo thleng a, Deputy Marshal hna chu a duh thu a rawn sawi ve ta thung a. Chumi ṭum chuan, Ben Harvey ho te zinga pakhat Bull Bulock an tih nen buaina an nei ta a, a chet danin Marshal Ben Harvey rilru a hneh deuh ni awm a ni, Deputy atan an inla ta a nih kha," a han ti a. A ngawih vang vang hnuah, "In nau hi a la naupan nen, a phawi rang vei hrep mai lehnghal," a han ti leh a.

       Sudden-a chuan, "Fimkhurna a la tlachham rih deuh a ni," a lo ti bauh a.

       "A dik alawm. Snap Lunt-a in tih a lo tel ve hi a pawi lo kher mai," Jim Silver chuan a lo ti leh a.

       "A ṭangkai tih piahlam a ni ang," Sudden chuan a lo ti ve mai a. "Mrs. Nancy chu i tlawh tawh em?" a han ti zui a.

       "La tlawh lo."

       "Eng nge an harsatna ber chu ni ta?"

       "Rawk an ni ṭhin tih chiang taka ka hriat bak chu; tu ten nge rawk a, tu ten nge suam chu ka hre lo, min la hrilh lo."

       "An Ranch hming kha?"

       "Sweet Valley, hmun nuam tak a ni," Jim Silver chuan a ti sap a.

       "Anmahni kan tlawh hunah a chiang mai ang; a hran ṭheuha kan va pawh a ṭhain ka ring," Sudden-a chuan a han ti ta a. "Mahse, min lambun a, hnunglam aṭanga min kah loh nan kan fimkhur a ngai thung ang. Yorky erawh ka rualin kal se," a tih zawm leh zat a.

       Sudden-a chu a thlenna Hotel lam panin a kal zui ta a.

SUDDEN: CLEAR THE NAME
Author: Chhantea Pautu

Chapter 7

       Zing khaw var lam hnaih a ni tawh a. Sudden-a muhil chu a harh hlawl a, pâwnah chuan zawi tèa thawm ri hraih hraih hi a han hre zui nghal a, a Puakruk a phawrh vat a, inring takin thawm chu a han ngaithla ta a. A han reh vang vang a, a rik deuh hraih hraih hnu-ah Puakruk han ri ṭhuai leh han thum deuh dawp hi a hria a, a reh zui leh hmiah a; chutah a pindan kawngkhar chu zawi té hian an rawn kik ta karh karh a.

       Mipakhat hian, "Jim, Snap ka nia," a rawn ti sap a.

       Kawngka chu a han hawng a, pindan pawn chhuatah chuan mi pakhat hi a lo tlu reng tawh a, Snap chuan ruang chu ten hmel zet hian a lo en reng a. "Jim, ka kap ta mai a ni, kei pawhin beih ka tawk tho a; mahse Silai ka hmeh puah a ngaih hmain thim thamah an tlanchhia," a han ti a.

        "Chuan, kei pawh," Sudden-a chuan a lo ti bauh a. "Snap, ka lawm e," a ti leh sap a.

       "I pindan an tlawh ve ngei ka ring a, ka rawn en fiah a, ka thawm hriain min rawn hmu a, Silai a phawrh zui tâk mai avangin ka kap ta mai a ni," Snap chuan a lo ti a.

       Sudden-a chuan, "Hotu lu ber tuemaw tak an awm ngei ang," a han ti ngawt a.

       "Khaw var ṭan veleh Sweet Valley chu ka lo va pan ang," Snap chuan a ti ta a, Sudden-a pindan aṭang chuan a kal sawn ta a ni.

       Sudden-a chu a pindan bula mi pakhat kah hlum a nih chungchangah Marshal chuan thu a zawt fiah a. Sudden chuan thil thlen dan chu tawi fel tak hian a hrilh a, tu kah hlum nge tih erawh chu a hriat loh thu a sawi tlat thung.

       "Nangmah thah tum che a niin i ring em?"

       "Ka pindan kawngkhar bula thi chu a nia lawm," Sudden-a chuan a ti mai a.

       Chupa thih dan chu Marshal tan pawh han tih vak ngaihna awm hek lo le, an buaipui zui ta lo a ni.

       Chawhnu lamah Sudden-a chuan Yorky nen Del Rio chhuahsanin Sweet Valley an pan ta a; khua an chhuahsan lai chu Ben Harvey chuan a lo hmu a, an pahnih chuan a thlir zui vang vang a. Ngaihtuah thui àwm zet hian a lang a, a lu chu a thing nur nur a.

       Yorky chuan Sudden-a kîanga a han awm leh thei ta chu nuam a tiin a hlim em em mai a, a la naupang deuh bawk a, Sudden-a bulah hi chuan naupangchhia ang mai hian a awm a, a ngaisâng em em a, dan pangngaia inhmachhawn chuan tumahin Silai chelek ranah an khalh a ring ngai reng reng lo a ni.

       Ni chu a sa rum rut mai a, hmanhmawh miah lo hian phaizawl, hmun ṭhenkhat hla deuh hleka tlang pawng lian lo tak tak awmna velah chuan an kal bauh bauh a, chulai ramah chuan thing lian pawh awm lo hian hnim bawrchhawr te te, a ṭhen chu thur bim bem, ṭáwi ve laih si te hi an ni hlawm a. Hmun ṭhenkhat laiah chuan thlalera ṭo ṭhin hnim chi khat, Cuctus pawh hmuh tur a awm zeuh zeuh a, Laiking vak vel hmuh tur pawh a awm leh zeuh ṭhin.

       "Jim, Del Rio khaw boruak hian min ti phur khawp mai," Yorky chuan a han ti a.

       "Yorky, helai vel boruak hi a lum telh telh dawn a ni," Sudden-a chuan a han ti ve thung a.

       "Jim, chu ti ang chu alawm ka duh,"

       Sudden chu a ruk hian a nui tat tat a, Yorky huaisenna hi a chhuang em em a ni.

       "Yorky, mi i hmachhawn reng rengin fimkhur turin ka hrilh ṭhin che kha; he zirlai hi i thiam thei lo hle mai," a han ti leh a.

       "Jim, pawi ka ti khawp mai, kha pa kha ka la hmu leh khawp ang," a han ti nang nang a. "Min din hnaih lutuk a, bakah, khati ang khan min hnek ang tih ka ring lo a ni," a han ti zui a.

       "Kan khingpui te chet dan tur chhût lawk hi a pawimawh em em a; chubakah, khati ang boruak ṭhelh dai tur chuan i Silai i phawrh tur a ni. Lawman ni chunga Puakruk phawi sa lova kha'ng mite i hmachhawn mai kha tih dan tur a ni lo," tiin Sudden-a chuan a lo zilh a.

       "Tharum ai chuan Silai ngeia hmachhawn a ni ka duh," Yorky chuan a lo la ti bal bal a.

       Sudden-a chuan, "Puakruk phawi rang nih hian nunna leh thihna a keng tel asin."

       "Jim, ka phawi rang ve tawh i tihna em ni?"

       Sudden-a chu a nui suk a, he a nau hian zir tur a la ngah hle tih a hria a, tunah pawh a ngaihtuahawm viau tawh lo tih erawh chu a hre tho thung. "Jim Silver-a khan he khuaa i luh tirhin mipakhat nen Puakruka in inhmachhawn thu a sawi asin, rang a ti khawp che a nia," a han ti a.

       Chu thu chu Yorky chuan phur zet hian a lo sawi zawm ve vat a. Bull Bulock-a'n a nu chungchang mawi lo taka a sawi vang a nih thu te, chumi hnu-ah Marshal Ben Harvey-a'n Deputy atâna a rawih zui tak thu te leh, Deputy Marshal a nih hnu-ah Del Rio khuaa Gunman ni àwm tak tak an rawn luh fo thu leh, buaina a awm pawha Marshal-in tumah a man ngai loh thu te chu a sawi ta ṭeuh mai a. Yorky chuan, "Kan Jail chu a ruak reng mai a ni," a han ti a.

       "Del Rio khaw Marshal saw a mak ang reng ngawt mai," tiin Sudden-a chuan thil a ngaihtuah ta vang vang a.

       An ngawih dun ren rawn hnu-ah Yorky bawk chu a rawn ṭawng leh a, "Jim, ka phawi rang ve viau tawhin ka inhria asin," a han ti leh phawng mai a.

       "Phawi ran hi a pawi lo; mahse lawm suh, a hlauhawm a ni," Sudden-a chuan a lo ti bauh a.

       Mak tih hmel deuh tak hian Yorky chuan a han en a, "Jim, hlauhawm i tih nachhan ka hre thiam lo tawp; miin Silai a phawi ran viau chuan mahni a inveng thei tawk tihna a ni mai lo em ni?" a han ti hâ a.

       "America khawthlang lamah leh Mexico velah hi chuan phawi rang nih leh kap thiam nih chu a pawimawh tehmeuh mai; mahse Yorky, lo chhinchhiah rawh, Puakruk i phawi rana i kah thiam viau chuan Gunman leh Killer tam takin hming chher tumin an rawn zawng che ang a, anmahni aia i ran leh ran loh fiah turin an rawn hmachhawn ang che, chu'ng ho chu i lo that a nih a, midang i phawi khalh zel a nih chuan Outlaw niin i tih loh pui thil sual ti-ah an sawi mai ang che; chu chu khawthlang rama thil awmzia a ni. I fimkhur viau lo chuan i phawi ranna chu i thihpui vat ang, hnunglam aṭangin a la inkah theih bawk a nia; chuvangin in tih lar nan Silai chelek ran hi chîng ngai suh ang che. A ṭul a nih chuan kan khingpui te chu huaisen taka hmachhawnin kan phawi khalh thei ngei tur a ni thung a, i phawi ran thu erawh a nazawngin sawi tawh ngai suh," Sudden-a chuan a lo ti ta hmiah a, tun hmaa ama chunga thil thleng te kha a han ngaihtuah leh ta neuh neuh a.

       Yorky chu a ngawi ta rauh rauh a. Sudden-a thu sawi chu a ngaihtuah zui ta a, a dik dawn hle hian a hria a. A mi ngainat leh ngaihsan em em anga fing leh dawhthei tak, hnu chhui thiam bawk si leh Puakruk phawi rang leh kah thiam em em nih chu a tum ve ta tlat a. Sudden-a hnenah chuan, "Ka hre thiam e, Jim," a han ti ta sap a.

       Ngawi rengin Sweet Valley awmna Del Rio khawchhak lam chu muang changin an pan zel a. Hnim leh thing bawrchhawr te te awmna kha an kal pel ṭan tawh a, an kalna hmabâk hla vak loah chuan thing pangngai, lian ve deuh deuh hi a lo awm ṭan tawh a, thing hmun thlen hma deuh chuan lungpui lian pui pui hi a khât tâwkin a awm thliah thluah a, a ram leilung pawh pharh duai ni tawh lovin, ruam leh mual pawng lian vak lo hi a awm thluah mai bawk a, hnim chhe te te chu a ṭo phauh phauh tho a.

       Sudden-a chuan chulai ram awm dan chu ngun deuh mai hian a han thlir kual a, a ruam awm dan leh tlâng pawng lian vak lo awm thliah thluah vel a han hmuh chuan, inlambun nana hmun duhthusam ni hian a hria a, a rilru-ah chuan a hun hmaa thil ṭha lo an chunga a thlen loh nan an fimkhur hle a ngai dawn tih pawh a rawn lang ve nghal chiah bawk a ni. "Yorky, i ding leh vei kha uluk takin en ang che. Nizan lama kan ṭhian kawmngeih lem loh tak te khan rilru hrisel vak lo an lo pu zui zel pawh a ni thei," a han ti a.

       Chutih lai chuan an kalna hmabâk sir dinglamah chuan Sakawr tlan thawm hi an han hria a, chulam an han hawi phei chuan an piah rala Sakawrin vaivut an pal khuk leh Sakawr chunga chuanga mi pali vel hmanhmawh hmel zeta rawn tlan hi an han hmu a. Ding meuhin an han thlir a, Sudden-a chuan, "Kan awmna lam hi an rawn pan a ang hle mai. Yorky, i lo nghak chhin teh ang," a han ti a, chumi te chu an lo nghak ta a.

       An hmanhmawh hmel bawk a, chu'ng Sakawr chungchuangho chuan Sudden-a te awmna chu an rawn thleng ta thuai a. An awmna bul an rawn thlen chuan an Sakawr lakam chu an han pawt cháwih a, an tlan chak laia ding an nih a vangin vaivut khu chu a leng chum chum mai a. Mi panga lai hi an lo ni a, an hmel leh thawmhnaw chu vaivutin a bawh paw uarh a, pakhat tih loh chu la naupan hmel tak tak hi an ni a. Sudden-a te ṭhian dun chu an rawn en ngun khawp mai a, pakhat phei chu thinchhiat hmel zet hi a ni nghe nghe.

       Sudden-a chuan an Sakawr khela chhinchhiahna chu a han en a, chuta ṭang chuan chung mi te chu Double D Ranch Cowboy an ni tih a hre thei nghal mai a; Double D Ranch chu Del Rio khawthlang lama awm niin Jim Silver khan a hrilh si a, a rilru te te chuan, 'He lam lamah Double D Cowboy ho hian eng nge an tih chu le?' a ti a, mak a ti deuh riau mai a. An zingah erawh a hmel hriat emaw, a hmuh tawh hnu emaw an awm lo. "Ṭhiante u, helam hi Sweet Valley, Mr. Mac Mathew-a Ranch panna kawng a ni ang chu maw?" tiin Sudden-a chuan an kal hmabâk lam chu a han kawk a.

       Chu'ng mi te chuan an chhâng lawk lo va, a nakkinah chuan a thinchhiat hmel ber leh a upat hmel ber chuan a lu a bu nghut a, "Chutah chuan eng nge in tih dawn a?" a han ti a.

       Sudden-a chuan, "Chaw nghei kan duh bik si lo va, Mr. Mac Mathew-a hnenah chuan hnathawh tur te pawh kan dil ang chu," tiin a chhang ṭha mai a.

       Chupa chu a rum nghut a, "Mac Mathew chuan hnathawh tur a nei lo, nei pawh ni se hlawh pek tur che u a nei chuang lo vang," a lo ti hmuk a.

       Sudden-a chuan, "Ṭhiana, i va hriat chian hmel ve, han rawk tlak pawh an awm nange?" Awmze nei deuha a tih hnu-ah, "Sweet Valley te pawh chu kan va thleng ve phawt ang chu maw le," nui chung hian a lo ti leh mai a.

       Chupa bawk chuan, "In thu thu le; mahse ka thu sawi hi awih ula, in Sakawr te kha an hah thlawn lo tihna a ni mai," a han ti leh hrâm a.

       Sudden-a chuan, "Kan lawm e. Ṭhiante u, kan kal phawt mai ang nge," tiin kal mai hi a han tum a.

       Mahse thinchhiat hmel ber bawk chuan, "I sakawr chu a ṭha hle mai," tih pahin awh hmel deuh hian Sudden-a Sakawr Blue Devil chu a en ta vung vung a. Chutah, "Nang hi, Mr. Ben Harvey mi chhawr te zinga pakhat, Bull Bulock kap tu leh a hnu-a Deputy Marshal-a ṭang zui ta kha i ni maw?" tiin Yorky chu a han en a.

       Chupa ṭawng dan leh awm dan chu Yorky chuan a lo ngei riau mai a, "Ka bâng tawh," a lo ti deuh hmak a.

       Chupa chu a nui suk a, "Nang pawh hi nizana Big Ben Saloon-a midang inhmachhawnnaa rawn inrawlh ve ngawt kha i ni ngat mai," tiin Sudden-a lam chu a hawi ve leh a.

       Sudden-a chu a nui mai a; mahse chupa hnenah chuan, "Ṭhianpa, buaina chhuahna hmunah i awm theiin thil i chhinchhiah thei awm hle mai ka ti. Ka Sakawr chu i awt deuh elo?" a han ti ve ta a.

       "Sakawr ṭha tak a ni; engzat nge i chhiar ang?"

       "Mr. ka zuar lo; mahse i lei zo lo vang."

       Sudden-a'n, 'I lei zo lo vang' a han tih deuh kher avang chuan chupa chu a lawm lo hle tih a hriat a. "Khawi aṭanga i neih nge?" a han ti leh khanglang a.

       Sudden-a chuan zawhna a zâwt tam lutuk chu a ning ve ta deuh a, la nui reng chung leh a mitmeng erawh danglam tawh deuh tak hian, "Mr. zawhna i ngah hle ṭhin dawn hi le; Texas ah hi chuan zawhna inzawh vak hi a hrisel lo khawp asin," a han ti ve ta nghat a. A'n ngawi leh te te a, "In Sakawr khela chhinchhiahna ka han en hian Double D Ranch mi chhawr in ni ngeiin ka ring a, in Ranch chu Del Rio khawthlang lama awm a ni a, helam khawchhak lam lamah eng nge in rawn tih teh daih zawk chu le?" tiin a han zawt lui ve ta ngat a.

       Chupa chuan, "Chu chu in lo hriat ve tur a awm lo," a ti hmuk a.

       Sudden-a pawh chuan, "Kei pawh, ka Sakawr hi khawi aṭanga ka neih nge tih chu i lo hriat ve a ṭul lem hlei nem," a ti ve ta khauh a.

       Chupa chu a thinrimin, a hmel chhe zet chu a dur khup khup a, a han rùm nghut a, a rawn kalpui te pawh chu an awm dan leh hmel a danglam ve nghal bawk a; mahse eng thil mah ti zui ta lo chuan, "Mathew chuan hlawh a pe thei dawn chuang lo che u, hnathawh tur in duh chuan Double D Ranch rawn pan mai rawh u," a han ti bul leh hmuk a.

       Sudden-a chu a nui leh mai a, "Kan lo hre reng dawn nia. Ka Sakawr hi chu lo awt duh suh Mr., i chuang rei thei chuang lo vang," a han ti ve leh hrâm a.

      Chupa chu Sudden-a'n a chhan dan avang chuan a thinrim tawh takzet a, Yorky leh Sudden-a chu a melh tawn ta sek a; mahse Sudden-a hmel leh mitmeng a han en chuan, pawngpaw cho mai mai chi a ni lo tih a hria a, a khel zawna a kut a dah zawi hnak mai te a hmuh phei chuan, Silaia eizawng ṭhin Gunman a nih ngei a ring a; Yorky leh Bull Bulock an inhmachhawn ṭuma Yorky Silai phawi lai lah kha a lo hmuh tawh bawk si avangin a rilru-a a thil tih tum chu an ti hlawhtling ngam ta lo a ni. A Sakawr chu a pawt her mawp a, Del Rio lam panin a tlan tir ta a, midangho pawh chuan an zui ve ta dam dam a.

       "Kha pa chu a thinchhiat hmel kher mai, a hawihhawm lo em em mai lehnghal a," Yorky chuan a han ti nang nang.

       Sudden-a chuan, "He lamah eng nge an tih ang le?" a lo ti daih thung a.

       "Ka hre lo tawp. Jim, Silai an chuh tawh dawn emaw ka lo ti hman a, ka lo inring khawp asin," Yorky chuan a lo ti leh a.

      Sudden-a chuan, "A tum chu an tum a nih kha," a lo ti mai a.

       An hmalama thing leh lung lian deuh deuh awmna hmun lamah chuan an kal leh ta zel a, anmahni lambun duh mai awm a hre lo na a, Sudden-a chu a fimkhur em em a, lambun duh an awm a nih chuan Del Rio khua a rawn luh ni-a hruizena a rawn kaih luh Beneto leh a ṭhianpa kha an ni thei mai thei a, nizana Jim Silver-a man tumtu te khan an hmangaih viau chuan a ring lem lo bawk.

       Lungpui lian pui pui awm khupna chu pelin thing awmna ngaw chu an lut ṭan tawh a. Thing chu awm bawk mah se, a awm zing lutuk hran lo va, lungpui pawh a phena biruk theih maina khawpa lian chu a khat tawkin a bawk thliah thluah a, hmanhmawh chuang miah lo hian an kal zel a, Yard za emaw vel thing hmunah an lut tawh tih-ah chuan Sudden-a Sakawr, Blue Devil chuan beng a tun ta hru hru a, a hnar chu a tum dut dut mai bawk a. A sakawr awm dan Sudden-a'n a han hriat chuan an chheh vel chu a melh kual vat a, zawi sap hian, "Yorky, fimkhur rawh, thil dik lo a awm a ni; Blue hian a hre tlat," a han ti a.

       Fimkhur lutuk mai hian an bul vela thing hmun rem tehchiam lo leh lungpui bul chu an melh kual ruai a, thil awmzia ngaichangin an awmna ngaiah chuan ngawi rengin an ding ta a; mahse, minute nga emaw vel an han ngaihchan hnu pawh chuan engmah, thawm emaw Silai puak ri emaw leh thil danglam emaw pawh a thleng ta si lo va.

       "Blue, eng nge i hriat chu le? A lo thlawn mai chuan khati khan i awm lo vang tiraw? Nigger-a ang bawka hman tlâk turin ka beisei che a nia; chuti a nih loh vaih chuan ka piai hlak ang che," tiin Sudden-a chuan a Sakawr chu a han hau fiam a, kal turin a han tur leh ta a.

       Thui pawh an la kal hma chuan Blue Devil chu a ngai ang bawk chuan a han awm leh a, a beng tunin a hnar pawh chu a tum dut dut reng a, hawi hru hru pahin zawi tè hian a hrâm nghur nghur a.

       "Yorky, i sakawr aṭang khan chhuk vat la, kein i kal lawk teh ang, Blue hian eng thil emaw tak chu a hria a ni ngat ang," Sudden-a chuan a han ti a, amah chu a chhuk nghal bawk a.

       Yorky pawh chu a sakawr aṭanga chhuk ve nghalin fimkhur deuh hian an sakawr kai chungin kein an kal ta a. Thui pawh an kal hma chuan, "Saw saw Jim Silver-a Sakawr kha a ni lo'm ni?" tiin an piah sir deuh hnim buk bula Sakawr dum lian leh pian ṭha zet mai chu Yorky chuan Sudden-a chu a han kawhhmuh a.

       Sudden-a chuan, "A nih ngei dawn saw, Nigger-a unaupa te pawh a ni hial ang ka ti; a neitupa Sudden-a emaw an ti ṭhin pawh hi a mak vak lo ve. Khaw'nge maw a neitupa hi a awm ang? Ka ngaih a ṭha lo tawp mai," a han ti a.

       Chu Sakawr bulah chuan tumah an awm lo va, a Saddle ah chuan hruizen, Winchester Rifle leh Tuithawl pakhat hi a la awm thlap a, chu Sakawr chu nungchang ṭha awm deuh hian a lo ding a, Sudden-a te rawn kal phei a hmuh chuan a lo chik nghur nghur a, anmahni a rawn en hnu-ah a awmna bula hnimbuk lam chu hawiin a hràm leh nghur nghur a.

       Chu sakawr awmna chu an pan phei zel a; chutah Yorky chu a phûl ta hlut a, "Saw en teh, Jim, Sakawr dinna bula hnimbuk phen a saw mihring ke ka hmu tlat mai. Jim Silver-a hi...an lambun a ni ngat mai," tiin Sudden-a chu hnimbuk lam chu a kawhhmuh ta vat a.

       Sudden-a'n a han hmuh ve chuan Blue Devil a kaih lai chu thlahin hnimbuk lam panin a tlan ta vat a, hnimbuk chu kal hualin a phena mihring chu a va hmu ta a. Chupa chu bawkkhup hian a lo tlu a, a tukkhumah tak chuan silaimu luhna kua hi a awm a, amah lambuntu te chuan an kah hlum hmain an lambun a ni tih a hre hman a ni tih hriat deuh hian amah chuan a dinglamin Puakruk hi a lo la hum ve a. A lan dan chuan hnunglam aṭanga kah hlum ngei a ni tih a hriat bawk.

       Sudden-a hmel chu thinrimna hlirin a khat a, ruang chu a han kuai zangthal a, a hlauhthawn ang ngeiin he lai hmuna kal tura amah rawn ngentu, Hattchet Folly thleng thlenga amah rawn zawngtu leh, Puakruk a phawi ran leh a kah thiam mai bakah, Sakawr dum lian tak a neih ve avanga miten amah Sudden-a emaw an lo tih fo, an ṭhianpa chhar thar Jim Silver a lo ni a. Yorky nen chuan lukhum an phawk a, rei vak lo chu Jim Silver-a ruang en chuan an ngawi dun reng a.

       "Yorky, ti khan lo awm rawh, saw ti lam aṭanga kah saw a ni ngei ang, ka va thithlai ang nge," tiin Sudden-a chuan silai mu lo kalna lam nia a rin chu a pan nghal a, thing hmun leh lungpui hrawl zet zet awmna lamah chuan a pil bo ta daih a.

       Lung hmun leh thing hmun velah chuan a han vei thuak thuak a, minute sawmpanga hnu velah chuan mual pawng deuh, mahse lungpui leh thingin a hual avanga biru zet si-ah hian hmun pakhat, lo bel deuh tlan hi a han hmu a, chuta ṭanga a han hawi chhuah chuan, Yorky nena an rawn kalna kawngṭum leh Jim Silver-a ruang lo awmna lai chu chiang tak hian a lang thei a, kawngṭum aṭang erawh chuan chulai hmuna mihring biru chu hmuh harsa deuh tur a ni ngei ang tih Sudden-a chuan a ring thiam mai a. Chulai hmuna mihring hnuhma leh, an meizial zûkna vap leh bung tam dan te leh an kal chuah lehna hniak pherh veng vung danah chuan, he lai hmunah hian Jim Silver chu rei tawk tak an lo chang a ni tih leh, an kah hnu-ah hmanhmawh takin an tlanchhe zui nghal tih chu a chiang hle hian a hre bawk a. An lo chânna leh a chhehvel chu ngun lehzual hian a han en kual a, Winchester Rifle Cartridge ruak pakhat leh Spur(Sakawr khen kalna) pakhat lo tla hi a han hmu a, chu chu a chhar a, Yorky va pawh leh tur chuan a kal leh ta a.

       "Jim, eng'e chanchin?" Yorky chuan a lo ti var a.

       "An hnuhma aṭanga a lan dan chuan, mi pahnihin rei tawk tak an lo chang a ni. An hniakhnu pherh zet avangin kan la man chhuak vat turah ngai ang," Sudden chuan a han ti a.

       Yorky chuan, "Jim Silver hian an lambun hi a ring lawk lo em maw ni le?" a lo ti bauh a.

       "A Sakawr hi Sakawr fing tak niin a lang a, a pu hnenah warning a pe ngei ang a, chu chu Jim Silver hian a hre thiam ngei tih pawh a lang a, a Puakruk a phawrh ve hman tlat a ni. A lambuntu te hian vawikhat chiah silai an hmet puak niin a lang a, a kaptu hi Silai kah thiam tak, dawihzep tak si a nih ka ring," tiin a thil chhar, Cartridge ruak leh Spur chu Yorky a han hmuh a.

       "Jim, engtin nge ni dawn?" a lo ti a.

       Sudden chuan a Sakawr Blue Devil chu a han chul thuak thuak a, "Blue, i ti ṭha e. Nigger-a nen hi chuan thuhmun in ni mai," a han ti a. "Blue hian Silver-a thisen rim kha a hria a ni ngei ang. Yorky, Jim Silver-a Sakawr chungah hian a pu ruang kha phuar bet ila, Sweet Vally lam pan pui phawt mai teh ang, khua lah chu a hla deuh tawh si a. Mr. Matthew leh Mrs. Nancy te pawhin ṭha taka phum an duh ngei ka ring," a han ti zung zung a. Chu hmun khawkrawk leh ralṭi ru takah chuan kal zelin Sweet Valley lam pan chuan an kal leh ta zel a.

       Eng ang buaina chiah nge an la hmachhawn zel ang tih Sudden-a chuan a ngaihtuah neuh neuh a, helai hmuna amah kaltirtu pakhat chu tenawm takin a hnunglam aṭanga kah hlum a ni ta a. Buaina eng pawh lo thleng se Jim Silver chu a mi duh ber te zinga tel a ni. Engtikah emaw chuan anni pawh hi dawihzep taka hnunglam aṭanga kah hlum an la ni ve mai thei. Del Rio-ah chuan Gunman leh Killer an lut chhuak reng a, Bounty Hunter pawh an rawn kal ṭhin bawk. Gunfighter rura tak tak an rawn kal fo tih pawh a hria a, chu'ng ho ruaia kilkawitu tuemaw tak chu awmin a ring tlat a. Governor Bleke sawi ang khan Ben Harvey hi a ni thei ang em tih a han chhut a; mahse thil a hmu tlemin a la hre tam rih lo em a, thil lo thlen dan azira ngaih dan siam chu a tum nghet ta zawk a ni. Nakkinah chuan amah hretu, Sudden-a a ni tih hretu ngei Gunman emaw, Bounty Hunter emaw a la tawn ngei a ring tlat a, buaina chu pehhel hram hram tum ṭhin mah se, phawi rang ve tawk nia inngai Gunfighter tuemaw nen gunfight an neih ngei a la ngai bawk ang tih chu a ring sa a ni.

       Sudden-a chu chuti ang thil ngaituah chuan a han nui sak a, tuna a awmna hi Texas a ni tawh miau a, eng pawh thleng se hmachhawn turin a inpeih thlap a, a Puakruk pahnih, a enkawl ngun em em leh a kâwm hnum hlarh mai te pawh chu hman mai theih turin a khel lehlam lehlamah fual hnalh hian an awm ve ve reng bawk a ni. Mi a hmachhawn reng rengin a sang mar ṭung ve ngai lo va, a taksa a inthlah dul hnak a, a kut pahnih chu a khel zawnah a thlâk thla zawi hnak a, a hun takah a che mai ṭhin. Texas-ah hian misual tam takin an hlau a, a ṭhen chuan thah emaw, man emaw an duh bawk.

       Khua chu a tlai lam tawh a, mual pawng lian ve deuh pakhat hi an va chuang chhuak a, chu mual pawng thlangah chuan ruam rai ṭha zet hi a awm a, ruamah chuan In pathum vel hi a ding a, pakhat chu a lian deuh bik hle nghe nghe a.

       "Yorky, khu khu Sweet Valley chu a ni ngei ang," Sudden-a chuan a han ti a.

SUDDEN: CLEAR THE NAME
Author: Chhantea Pautu

Chapter 8

       Sudden-a ten Jim Silver-a ruang an hmuh lai vel chuan BB Ranch-ah ama chungchang sawiin mi ṭhenkhat an ṭhu khawm a. Heta awm khawm ho te hian Sudden-a hi an lo enghelh tlang ṭheuh a ni.

       Mi pangain Jim Silver-a an nawr chep ṭuma a lo inrawlh dan te kha an zinga ṭhenkhat hian an hmu ve hlawm bawk a, amah leh a chezia reng reng hian an ngaih a ti ṭha thlawt lo a ni ber e. An zinga tumah hian Del Rio khuaa a lo luh hnu hian a Silai chelek lai erawh an la hmu miah lo va. Engtin nge an hmuh reng ang, a la chelek lo miau a ni. Kawng laka midang lo suamtu Beneto te ṭhian dun hmaah khan Puakruk kha  a phawi chu a phawi ngei a; mahse khami te khan a phawi lai an hmu hman hlek lo chu a nih kha. Awm khawm zingah hian Beneto te ṭhian dun kha an awm ve lo na a, kha thu kha chu an hre tawh hlawm tho a.

       An zinga pakhat Jason Curse an tih mai chuan an mi sawi lai mek chu eng ang hmel pu nge tih a han zawt a. Midang ho chuan Sudden-a hmel leh pian hmang vel te chu an han sawi a; chutah Jason Curse chuan, Puakruk pahnih fual taka pai a nih leh nih loh te, a Puakruk paina a thên a thên loh nana a malpuia a ṭawn beh leh beh loh te, a mi thah zat chhinchhiah nana a Puakruk kawm a zai rek leh rek loh te chu a zawt ta zel a.

       Midang ho chuan Jason Curse a zawhna chu an han chhang a, an hmuh dan leh hriat dana an chhan hlawm hnu chuan Jason chu a han ngawi vang vang a, a ṭhian ten an sawi hmangah chuan hman deuha mi pakhat a hmuh tawh, Puakruk phawi rang lutuk leh kap thiam lutuk tak mai pakhat, a Sakawr dum lian tak chunga chuanga hmun hrang hranga kal kual ṭhin, tlangval la naupang tak, sam dum hlap mai leh mitmeng pawl ram mai, fiamthu duh hmel deuh taka nui thei deuh reng mai, a hnu-a 'Sudden' tia an sawi zui tâk kha ni thei dawn tlat hian a han hria a; Sakawr dum chunga chuang a ni lo tih thu an sawi erawh chuan a rilru a ti buai deuh a.

       Lumbo leh a midang thenkhat te hian Big Ben Saloon-a an dan chép pa, Sakawr dum lian ṭha tak nei kha Sudden-a niin an sawi tlat bawk si a; chuvangin an mi sawi lai mek chungchanga a ngaihtuahna chu a ṭhian te hriatah chuan a sawi chhuak duh ta rih lo va. Midang ho chuan Saloon chhunga an buaina chungchanga rawn inrawlh ve ngawt mai, Puakruk pahnih fual hnalha pai a, a kut bawr a khel zawna dah zawi hnak mai chu Gunman tuemaw tak a nih chu an ring ṭheuh a ni.

       Jason a rilru-ah chuan a reh mai thei ta lo va, a lo hriat ṭhin Sudden-a kha chuan a mi thah zat chhinchhiah nan Puakruk kawm a zai rek ve ngai miah lo va, loh theih loh a nih chauh loh chuan mi hmaah Silai a chelek ve mai mai ngai lo bawk a ni. A hmelma te tana zuam sual awl tak a nih tur zia a mitmenga a lan ṭhin zia te pawh a ngaihtuah kâi ta zel a; chutih rualin an zinga mi ṭhenkhat leh Lumbo ten Sudden-a ni ngeia an hriat pawh khan a Silai kâwm a zai rek bik chuang hauh lo tih an sawi tawh a, amah Jason hian a la hmu miah lo bawk a, Sakawr dum lian tak a neih thu an sawi avangin Sudden-a an tih chu a ni thei tho a ni tih erawh a hria.

       Chu'ng ho chuan Sweet Valley leh Mac Mathew te nupa chungchang pawh an sawi kai ta zel a. Chutia an lo ti ti lai chuan Johny Lumbo kha a rawn lut ta a, an lo ngawi ṭhap a, hepa hi engtik lai mahin nelawm takin a khawsa ngai lo. An zingah chuan Jason Curse hian a thunun thei ber a, mi thinchhia, Puakruk kah thiam leh phawi rang tak a ni a, tumahin tih thinrim an duh ngai lo. A nun a rawng hle a, a mi thah ṭhenkhat te chu na tak tuarin rei tak a awm tir ṭhin a, nun chhe tak a nih avangin hmeichhia pawh a dim vak ngai lo bawk; mak tak maiin hmeichhe a khawih mai mai ngai lo thung.

       Inchhungah chuan thinrim hmel deuh hian a rawn pen lut chhut chhut a, midang ho chuan ngawi rengin an lo thlir ṭhap a, chutah Jason Curse chuan a lo be hmasa ta a. "Lumbo, eng nge chanchin?" tiin a han zawt a.

       "Beneto leh Delreido an kal a, a thi tawh," a han ti nghut a.

       "A ṭhat chu, Delreido kan tir chu a ṭha e, kan zingah a ni tluka Rifle kap thiam hi an awm ka ring lo," Jason chuan a lo ti leh a.

       "Chuti chu inhmatawnin ka la chhin pui ang nge," Lumbo chuan a lo ti hluk a.

       Jason Curse chuan Lumbo chu thip zet hian a han melh a, "Lumbo, kan zingah hian buaina a awm ka rem ti hauh lo a nia, Delreido i puhna kha duh tawk tawh teh. Nge, keimah nen hian inhmatawnin Puakruk kap thiam leh rang zawk han chhin i duh zawk em ni?" a han ti ta hmak a.

       Inchhunga awm zawng zawng te chu an ngawi ṭhap a, rei vak lo chu tumah ṭawng lova an awm hnu chuan Lumbo chu a nui ve vei suk a, "Jason, ka tihpalh a ni, ka hah deuh a ni e," a han ti ta a. A dik tak chuan Jason hi a phawi khalh a inring lo a ni.

       Johny Lumbo hi a thangna chinah chuan Gunman lar tak a ni a, mi a hmachhawn hnem ve tawh hlein amah phawi khalhtu chu a la tawng bik hauh lo va; mahse tupawhin Jason Curse hi an hlauin an zah a, lar lo zawkin lang mah se tumahin phawi khalh theih an inring lo.bJason Curse hian Puakruk pahnih a pai reng a, engtik lai mah hian chung a Silai pai te chu a kut bawr hian a hlat ngai lo, a taksa peng pakhat ni mai awm hian a enkawl uluk a. Amah hi Killer dik tak a nih avangin, a tana hnawksak deuh anga lang chu, Puakruka inhmachhawn a ni emaw, Rifle hmanga lambun emaw leh chemtea thah emaw pawh ni se, a remchan hun leh a remchannna hmuna tih hlum a tîm ngai map lo a ni.

       Jason nena an inchhân deuh hnu chuan Lumbo chu a kal hrang a, zu um hi a han hawng a, amah chauh chuan kilkhatah a in ta mial mial a; a ngaihtuahna chu zana thil thleng hlir khan a luah a. Mak a ti hle a. Engca tinge ni le  a awm a nawm theih miah loh chu le? Sudden-a ni ngeia an hriat amah leh a ṭhian te pali nen an hmachhawna an hual chep laia rawn inrawlh, mikhual Puakruk pahnih fual hnalha pai leh inring em em chung si-a ding zawi deuh hnak mai a enghelh rukna chu thu hran ni se, Snap Lunt-a hmel a hmuha mak a tih ruk zia kha a la hre reng a ni. Ani kha a that tawh ngei khan a hre si a, tinge hetah a lo lan leh chu le?

       A ngaihtuah chian poh leh mak a ti a, kha pa leh Snap Lunt hian hetah eng nge an rawn tih? Eng emaw chhan neia rawn kal an ang tlat hian a hria a, Snap Lunt tak pawh chuan a awm a ti nuam thei hauh lo a ni. Mikhual pakhat Sudden-a nia an ngaih kha a chhui zui viau ṭhin a; hmun dangah pawh Sudden-a a ni tih sawi rik a hre ṭhin, an inhmachhawn ṭuma a chunga thil thleng kha tlâwmthlak a la ti reng a, chuvangin lambuna thah pawh pawi ti tawh lo va Jason Curse hnena rawt a ni a. Chu chu Jason chuan a duh vak lo hle a, a chhan pawh ṭhenkhatin Sudden-a nia an ngaih chu hmuh ve phawt a duh a ni.           Mahse Lumbo erawh chuan, Ben Harvey-a'n theihtawpa a sawm hnu-ah pawh an zingah a tel duh tawh lo va, Jason-a hnenah thah a duh a ni tih sawiin a rem ti lo chung chuan lambun turin an ti ta ni.
* * * * * * *

       Sweet Valley chu Ranch tenau anga chhiar theih chu ni ve bawk mah se, Ranch ang chuan an sawi ngai meuh lo. Ram zim te, tui hna ṭha tak awmna ruam lian vak lo hmuna phaitual hnim hring cham dup mai awmna a ni a, chu ruam phaitual hnim cham dup maiah chuan Mathew te nupa chuan chenna In leh Sakawr huang lian lo tak leh In dang te pawh an nei ve ngei a; mahse an ram a zim deuh avang leh an nupa bakah ei siamtu atana an hman, Putar Hodden-a chauh an khawsak avangin bawng tlem te chauh an vulh a. An ram hi a zim tiin kan sawi na a, tuna an bawng vulh lét pawh hi vulh se an chaw mamawh khawp chu an ramah hian a awm tho a ni.

       Sweet Valley chu mi rothap pui pui leh hmai tuam tlat ṭhenkhat hian a khat tawkin an tlawh fo mai a, Mathew te nupa hnenah chuan sum leh thil dang an phut ṭhin a. Mathew hi Silai chelekmi a nih loh avangin lo do let thei dinhmunah a ding lo a ni. Ben Harvey hian a Ranch chu lei sakah a dil fo a; mahse chhan ṭha tak avangin an phal mai bik lo va.

       Jim Siver khan he Sweet Valley hi panin tukṭhuan ei khamin Del Rio kha hmanhmawh hauh lovin a chhuah san a, chutia a chhuahsan lai vel chuan Mexican pakhat hi hmanhmawh leh chak zet hian khua aṭangin a tlan chhuak ve nghal a, khua aṭanga mel khat vela mi pahnih lo awm te chu va finin chanchin a va hrilh a, amah chu BB Ranch lamah a let leh ta nghal a. Mi pahnih te kha chuan hmanhmawh em emin Sweet Valley panna kawng awlsam ber lam chu an pan a, thing leh lung lian pui pui awmna an thlen chuan an Sakawr an thukru a, hmun pakhatah an thil duh chu an lo chang ta a ni.

       Rei tawk tak chu lai hmuna an awm hnu chuan, Jim Silver chu a Sakawr dum lian taka chuangin muangchang hian a rawn kal ta bak bak a, thing hmun an han luh aṭanga thui tehchiam lo a kal hnu chuan a Sakawr fing tak chuan a beng a tun a, kal reng chung chuan a hram chîk nghur nghur a, a ke te chu a per leh deuh ut ut ṭhin a. A pu Jim Silver pawh chuan thil dik lo a awm a ni tih a hre thiam ve nghal mai a, a Puakruk pakhat chu a phawi a, fimkhur deuh hian a han hawi kual a, a Sakawr chul thuak thuak paha fimkhur thu hlaa chhuk a tum lai tak chuan Rifle a ri ṭhuai a, a Sakawr aṭangin Jim Silver chu a tla hlawm tawp a, che leh tur a awm tawh lo reng reng a ni. Amah lo changa lo lambuntu te chu dawihzep tak an nih avangin, chulai vela lo awm hnai mi tuemaw chuan an Silai kah ri chu an hre ngei dawn a, midang hmuh leh hriat an hlauh avangin hniak pherh vungin an tlanchhe ta a ni. Winchester Rifle kengtu chu a inbilh nawk a, a pheikhawk chu lung leh lung inkarah a tla zep a, a hmanhmawh bawk si chu a han pen lui a, a ri hlawk a, a ke tâng chu a chhuah tak avangin hmanhmawh zetin a ṭhianpa chu a um zui a, Del Rio khua helin an Sakawr chu chak zetin an tlantir ta nghal a.

       Silai a han rik ṭhuai khan Jim Silver-a Sakawr chu a tlan phut a, thui vak lo a tlan hnu-ah a ding a, thawm ngaichang niawm tak hian a beng pahnih chu tunin hnunglam, hmalam leh ding leh veiah a ti che tawn vel a, chutah a han hram nghur nghur a, chulai hmuna rei fé a din reng hnu chuan a pu ngaihvenin a kir leh ta a, hnimbuk ṭawih laih bula bawkkhup zawnga a pu lo let reng bulah chuan a ding a, a pu chu a hmui chuan a han nawr ṭhin; mahse a pu chu che leh tur a awm tawh si lo!

       Heti ang huna Sakawrin mihring thisen thang rim an hriat tawh chuan zawi zawiin mihring ruang chu an kal hlatsan hret hret zel a, thlun an nih loh chuan mihring ruang bulah an ding reng ngai meuh lo. Mahse Jim Silver-a leh a Sakawr, 'Big Wolf' tia a koh hi chu an inhrawn nasa em em a, chubakah Sakawr fing fal tak a nih avangin a pu chu a kalsan mai duh hauh lo va, thisen thang rim pawh pawisa lovin a pu ruang bulah chuan a ding ve ta reng mai a ni.

       Big Wolf chu a khat tawk hian ṭanpuitu au niawm tak hian a han hram a; mahse a beisei angin tumah an rawn lang ta lo tih hre thiam niawm takin a din rei tak deuhah chuan a hram duh ta lo va, hnim peh pawh tum chuang lovin a ngawi ta reng a. Lambun an nih aṭangin darkar hnih zet a liam tawh a, a pu chu kalsan tum lovin a la ding ta reng a; chutih lai vel tak chu a ni Sudden-a ten an awmna lai an va pawh tâk.

       Cowboy tan chuan an Sakawr te hi an hlu em em a, an Sakawrah hian an nunna thui tak a innghat tlat a, Cowboy emaw, Gunman fing leh thil chik takin emaw Sakawr fing leh ṭuan ṭha, chak bawk si an neih ngat phei chuan, an hmelma mihring leh an tâna hlauhawm thil dang lakah an him phah fo a; mahse Sakawr fing takin thil hlauhawm laka warning an pek hre thiama chhawr tur chuan pa fimkhur leh fing tak nih a ngai ve thung. Cowboy fing lo leh thil chhuta chik nachang hre lo tan Sakawr fing neih chu awmzia a awm tak tak lo va, an rula-raw-neih mai mai lek a ni ṭhin.
* * * * * * *

       Big Wolf chuan a pu ruang chu a phur hnawp hnawp a, Sudden-a te chu zui zelin a pu Jim Silver-a'n a lo tlawh tawh ṭhin Sweet Valley lan theihna mual pawng chu a thlenpui ta kha a ni a.

       Yorky chuan, "Jim, hmun nuam tak a ni ngei ang, kan hun tawnin zir deuh se ṭha tur," a han ti a.

       Sudden-a chuan, "An ṭhianpa ruang phur lûttu mikhual chu an lo beisei hauh lo vang le?" a han ti ve a.

       "Inléng an nei a nih dawn khu," Yorky chuan a lo ti leh sap a.

       Chulai ruam kuam nuam zet maia In awm chu panin hmanhmawh chuang vak lo hian an chhuk thla ta a. In lian ber kawtah chuan Sakawr, a Saddle belsa hi a awm a, Sudden-a ten awihtlan tawpa phaitual hnim awmna zawl inṭanna an thlen chiah chuan Inchhung aṭang chuan mipakhat hi a rawn chhuak a, a Sakawrah lawnin Sudden-a te awmna lamah chuan a rawn tlan phei auh auh a.

       Sudden-a chuan, "Marshal a ni reng mai ka ti, teh hlauh a," a han ti sup a.

       Jim Silver-a ruang an hmuh khan, Del Rii lama kirpuia Marshal hnen han thlen kha a duh hle a; mahse chulai hmun aṭanga khua kha a hlat tawh zawk avangin Sweet Valley hi an pan pui ta mai kha a ni a. Chutia Marshal an han hmu remchang hlauh chu tih chi hle hian Sudden-a chuan a hria a.

       Marshal-in an bul a rawn thlen a, an mihring ruang rawn phurh a han hmuh chuan mak a tih hmel hle mai a. A Sakawr chu a pawt ding a, Sakawr dum lian ṭha takin a phurh mihring ruang chu a han en a, chumi hnu-ah Yorky leh Sudden-a chu a en tawn ta sek a. "Hei, eng nge ni ta mai? Tunge ni?" a han ti a.

       Sudden-a chuan, "Marshal, Sweet Valley panna kawng, thing hmun inṭanna hmunah khan thiin kan chhar a ni, tu ten emaw an lambun a nih hmel," a lo ti a.

       Chutia an inbiak lai chuan Mathew-a chu pâwnah a rawn chhuak ve mek a, Sudden-a te chu a rawn pan phei ve ta a, mihring ruang phurtu Sakawr a han hmuh chuan ngaih ṭhat loh hmel deuh hian Sudden-a te chu a han en a. "Hei eng nge thil awm zia? Hei chu Jim-a Sakawr Big Wolf a nih hi..." a han ti a, mihring ruang chu a han hmu chiang a, "Khai awww...hei chu Jim a ni reng mai ka ti...engtizia nge mikhualpa?" a han ti a, a hmelah chuan tuarna hmel a lo lang nghal a.

       Sudden-a chuan, "Mr. Matthew, in Ranch a rawn panna kawngah an lo lambun a nih hmel. Hei, Marshal a awm hlauh bawk a, inchhungah lut ila, thil awmzia kan inhrilh dawn nia," a han ti a.

       Chutih lai chuan Mrs. Nancy chu a pasal ṭawng ri avangin inchhung aṭangin a lo chhuak ve a, bathlar aṭang chuan Sudden-a te chu mak tih hmel deuh hian a lo en a, engmah phei chu a sawi lem lo.

       In chhungah chuan an lut a, Sudden-a chuan thil awmzia leh Jim Silver-a ruang an hmuh dan chu kimchang tak hian a hrilh a. Marshal hnenah chuan Winchester Rifle Cartridge ruak pakhat a chhar thu chu hrilhin Cartridge ruak chu a pe nghal bawk a.

       Mrs. Nancy chuan a hmai a hup a, a pasal chuan duat deuh mai hian a lo kuah a.

       "Engtin nge nangmahni kah a ni lo tih ka hriat theih ang?" Marshal chuan a lo ti nghut a.

       Chu chu Sudden-a beisei loh lutuk dan a ni; Marshal chu rum leh thip zet hian a han en a, "Chu tualthattu-ah min puh i tum deuh tihna em ni?" a han ti ram hmak a.

       Marshal chuan, "Man in ṭul chuan ka man ngei ang che u," a lo ti bung ve nghut a.

       Sudden-a chu za lo zet hian a han ṭhen sak a, "Marshal, i sawi awlsam mah mah deuh lo maw?" a lo ti duh lek a.

       Marshal Ben Harvey hi, Sudden-a te rawn thlen hma hian Matthew nen hian an lo indawr fuh vak lo va, lungawi lo deuha chhuaka haw tum kha a ni a. Yorky chuan a lo ngei khawp mai a.

       Sudden-a bawk chuan, "Marshal, kha Cartridge ruak i nei a, ka Rifle aṭanga kah chhuah a nih leh nih loh chu fiah ta che," a han ti leh a. "Chubakah, nizana Johny Lumbo leh a ṭhian ten he pa an dan chep lai khan ka pui a, nangmah kha a ni lo'm ni kan inkâp ngei dawn tih hriaa rawn inrawlh ta kha? Min rawn ṭhelh avangin kha'ng mi tenawm ho kha an thaw huai mai a nih kha. Ani Jim Silver-a ka thah duhna chhan tur ni ngeia i hriat chu han sawi ta che," a ti leh ta sak sak a.

       Marshal chu a ngawi run run a, "Kan la hria ang chu," a la ti ta hrâm a, a han ding a, Yorky lam chu hawiin, "Nang hi mikhual satliah ṭhian i nih ka lo hre miah lo," a ti leh hmuk a, pâwnah chhuakin Sakawrah a lawn a, chak deuh hian Sudden-a te lo kalna lamah chuan a lim chho ta puat puat a.

       Yorky chuan a enzui vang vang a, "Jim-a thattu-ah a la puh mai thei che a nia," a han ti a.

       Sudden-a chuan, "Min puh zui ngam lo vang," a lo ti mai a.

       Marshal a kal liam hnu chuan Mathew te nupa chuan mak tih hmel deuh tak leh ngaih ṭhat loh hmel tak hian Sudden-a te pahnih chu an en tawn deuh sek a. A chenpui Putar Hodden-a pawh Inah chuan a rawn lut ve tawh a. "Min lo hre thiam ula, tu te nge in nih min hrilh hram rawh u. Kan ṭhianpa Jim Silver-a chu thah niin a ruang in rawn phur lut a, kan tan chuan a hrilhhaithlakin a lungchhiatthlak takzet a ni. Tu te nge in nih chu le?" Matthew chuan a han ti ta khawl mai a.

       Sudden-a chuan, Jim Silver-a'n Hattchet Folly hmuna an Ranch-ah rawn kala a rawn zawn chhuah dan te leh helai hmuna kal tura Jim Silver-a'n a sawm thu te, Hattchet Folly aṭang chuan anmahni pui tura mi pathum an rawn kal thu leh, ama'n Del Rio a rawn luh hnu-a thil thlen dan leh helai hmuna Jim Silver-a ruang an rawn thlen dan thleng chuan tawi fel deuh hian a han sawi a; amah chu Sudden-a chu a ni tih leh, Jim Silver-a'n Nancy nena an inlaichinna a sawi chhuah chungchang erawh kha chu a sawi tel duh lo va. A thu sawi tlângkawm nan, "Jim Silver-a ruang hi ṭha tak leh zahawm taka in phum duh kan rin avangin khua pan lovin helam hi kan rawn pan nghal ta mai a ni " a han ti a.

       Mathew te nupa chu an thaw huai a, an hmêlah hlim hmel tlem a lang tel nghal bawk a. "Eng pawh ni se, harsatna kan tawk reng a, mi te angin hlawh kan pe ṭha ve thei dawn lo che u a, in nunna atan pawh a hlauhawm thei dawn a ni," Mathew chuan a han ti a.

       Sudden chuan, "Chulam chu engto duh suh u, ei tur min pek chuan a tawk mai," a han ti a.

     NnNancy chu a lo ṭawng ve ta a, "I nau tlangval hian 'Jim' ti khan a ko che a, Silver-a kha 'Jim' ti hlirin kan ko a, in hming min hrilh thei lo'm ni?" a han ti a.

       Nancy hi hmeichhe hmel ṭha leh ngaihnobei deuh mai a ni a, a sam chu a dum hlap a, a mitmeng chu Sudden-a ang maiin a pawl râm a, a meng mâwi hle bawk. Thil thlengin a ṭhawn a vangin a dâng lep hian a hriat a. A hmel ṭhat avangin helai vela misual, anmahni ti buai ṭhintu te lakah harsatna a tawk zeuh zeuh a, a pasal Mathew atan tak hian nun a derthawn phah bawk a ni.

       Sudden-a chuan, "Kan insawi nghal lo va, kan thiam loh a ni. Kei hi James Green ka ni a, ka ṭhiante chuan 'Jim' tiin min ko ve mai bawk, ka nau hi chu 'Yorky' tiin kan ko mai," a lo ti thuai a.

       Mathew chuan, "Kan ṭhianpa Jim Silver hian chawlh hahdam a mamawh a ni, khaw thim hma ngeiin phum fel phawt teh ang u," a lo ti a. An vai chuan Jim Silver-a ruang phum tur chuan an chhuak ta a.

       Putar khan, "Khaw'nge in ṭhianpa pakhat chu a awm?" a lo ti ve bauh a.

       Chutih lai chuan an piah lamah chuan Sakawr chungchuang pakhat hi a rawn lang a.

       "Jim, Snap a nih dawn saw?" Yorky chuan a lo ti sap a. A lu chu a rawn tuam bar mai a.

SUDDEN: CLEAR THE NAME
Author: Chhantea Pautu

Chapter 9

       Sudden-a hnena a sawi angin khawvar rualin Snap Lunt chuan Del Rio a chhuahsan kha a ni a, kawng a hre sa lem lo va. Sweet Vallley chu khawchhak lamah a awm tih a hriat tawh avangin chu lam chu a pan ve chawm mai a, harsa lo taka a pawh ve mai pawh a inring a ni.

       Hmanhmawh lem lo tak hian a kal a, a kal hnu-a Sudden-a leh Yorky-a'n an rawn zawh kawngṭum, Jim Silver-a ruang an rawn chharna kha chu a zawh ve lem lo va, a kual zawngin a kal tih inhre miah lo hian Sweet Valley chu a hel chiam hi a lo ni; chumi avanga a ṭhian te ai pawha thleng hnuhnung a nih bakah harsatna pakhat a tawk ve reng reng bawk a.

       A kal bauh bauh zel a, hmun pakhata lui tereuhtè lo luang ker ker hi a han hmu a, Saddle-ah tuithawl a lo pai miah loh avangin a tui a hal tawh hle bakah a Sakawr chuan tui in tumin a pan nghal ruak ruak mai a. Chu kawrtea tui thianghlim zet chu in tumin a Sakawr aṭang chuan a chhuk a, tui chu a in ta khalh khalh a. Chutia tui ina a kun kât kât lai chuan thawklehkhatah Silai hi a rawn puak ṭhuai a, a bula tui chu silai mu chuan a deng per chuai a, a han hawi chhuah chuan Rifle kaw hmawr hian a lam a lo hawi reng tawh mai a; lungawi lo zet hian chung mi pahnih te chu a han en a.

       "Che tawh suh!"

       Chutia rawn ti ngawttu te chu a han en a, pahnih an ni a, pakhat chu Mexican a ni nghe nghe a. Chupa chuan Mexican lukhum parh hlai zet hi a khum a, a hmuihmul a awm chhur a, a hmel chu a bal hle mai bawk; hepa hi zanah khan Salloon chhungah a hmu ngei tih a la hre thei a. Pakhat zawk erawh chu Western tlangval dik tak ni hian a lang thung a.

        "I ban kha chunglamah phar chho rawh."

       "Miguel, i kal zawk teh ang, ani hian kan pawi a sawi hlei nem," pakhat zawk chuan a lo ti vat a.

       'Miguel' tia a koh chuan, "Ho mai mai, a hmel hi ka haw hrim hrim," a lo ti hluk a.

       Pakhat zawk chuan Snap chu ngun deuh hian a han en a, a Puakruk pahnih a pai dan chu chîk zeta a en hnuin, "Miguel, i tih tlat chuan le; mahse kei chu ka tel ve lo, in pahnih inkar thu ni teh se," tiin Mexican pa piah lamah chuan a sakawr chu a kal phei tir ta daih a, ngawi reng hian chuta ṭang chuan a lo thlir a.

       "Belly, i dawihzep hle mai," Mexican pa chuan a lo ti nghut a.

       "Ka dawihzep maw, Miguel? A nih chuan mikhualpa hi kaltir la, kan han en chhin dawn em ni?" Belly chuan a lo ti ve ta ngat a.

       Mexican pa chu a ngawi ngul a, chutah a ṭhianpa chu a ti thinrim tih a inhria a ni chék ang, nui huah huah pah hian, "Ka fiamthu a nih kha Belly, hepa hi ka'n buaipui lawk a nge, Puakruk pahnih pai fual ve ngawt satliah..." tih pahin Snap Lunt chu a han melh rum leh zual a.

       Snap Lunt chuan thuawih tak hian a ban chu a phar chho ve mai a. He Grasier lakah hian thil ṭha tak a beisei lem loh avangin hun remchang hmasa berah risk lak a tum tlat a, thah a tum emaw tum lo emaw a dinhmun tur àwm ang a han chhutin a ṭul ang leh remchan angin Silai chelek ve mai a tum nghet ta a ni.

       Mexican pa chuan, "Gringo, i Gunbelt kha phelh vat rawh," a han ti vin leh tuar a.

       Chu hun remchang, a khel bawr lama a kut dah thlak theihna hun chu a ni Snap Lunt-a'n a lo nghah reng chu. Muangchang hian a kut chu a thlak thla zel a, a Gunbelt phelh tum niawm tak hian a kut chu a han dah hniam hret hret a, thawklehkhatah a Puakruk chu a chuh ta thut mai a, Silai chu a puak dun ṭhuai mai a, Mexican pa chu a Sakawr aṭangin a hlawm thla tawp a, Snap Lunt-a silai mu chuan a khabeah tak dengin a chhip lamah a lût chho a. Snap pawh chu Mexican pa silai mu chuan a lu-ah a thâwi a, a tlu ve tawp tho a, a lu-a silai mu thawina avang chuan nikhawhrelo hian a awm zui ve ta nghal bawk a.

       A han harh chhuah leh chuan a lu chu a lo intuam thlap tawh a, mak ti deuh tak hian a han meng a, a hawi kual vel a, a bul maiah, nichina Mexican a kah pa rawn kalpui kha a hmu ta a. Ani chuan meizial hi a lo zu hlat hlat a, a pak khu talh talh a. "Kha i rawn harh ta maw? A teuh ther ther hle mai che," nui chung hian a lo ti a.

       Snap Lunt chuan thil thlen dan chu a han ngaihtuah let a, a thih teuh zia leh a laka hepa awm dan te pawh chu a ngaihtuah a, a lawm hle rualin mak a ti deuh hlek bawk a. "I ṭhianpa ka kap hlum a; engvanga min lo buaipui leh si nge i nih min hrilh thei em?" a han ti a.

       "Ka ṭhianpa pawh a ni chiah lo; tin, Miguel kha ka ngaina lem lo bawk a ni?" tiin chupa chuan a lo chhang a.

       Snap chuan amah leh Mexican pa an inhmachhawn laia chupain a chhan dan te a han ngaihtuah leh hnu chuan, "I chungah ka lawm hle mai," a ti ta sap a.

       "Belly ka ni. Khawia kal tur nge i nih chu le?"

       "Sweet Valley Ranch lamah kal ka tum a, a panna kawng awlsam deuh min hrilh thei lo maw?"

       "I kal kual hle mai a," tiin Belly chuan Sweet Valley pawhna hnai ber nia a hriat chu a kawhhmuh ta a.

       Snap chu a tho a, a Sakawrah lawnin, "Belly, ka lawm e. Ka kal mai ang nge," a han ti leh a, kawng a kawhhmuhna lam pan chuan a kal leh ta a. Sweet Valley a thlen dawn chuan hmanhmawh zeta Marshal-in a Sakawr a rawn tlan tir puat puat chu a tawk a, a en zui vang vang a.
* * * * * * *

       Marshal ngaihtuahnaah pawh chuan heng mi ṭhenkhat ten Sweet Valley an ngaihven ta viau mai chu a riak reng a, a hre thiam lo kher mai. Del Rio khuaa lo thleng thar te hian engvanga Sweet Valley pan kher nge an nih hlawm tih chuan a rilru a kap ru tlat a.

       Snap-a'n Sweet Valley Ranch a va thlen chuan Jim Silver-a ruang phum tura an lo inbuatsaih mek lai chu a va nang ta a ni. Sudden-a te ho chuan an lo en ṭhap a, a lu a tuam bar mai te leh a hmel pawr phang mai te chu mak an tih hmel deuh a. Amah pawh chuan ruang a han hmuh chuan mak a ti ve hle tho bawk.

       "Snap, engtizia nge? Buaina i tawk elo?" Sudden-a chuan a lo ti a.

       "Mexican pakhatin min ngaina vak lo a ni," tiin a thil tawn chu a han hrilh hlawm a. "Nangni zawk hi...Silver a ni maw?" a ti zawi ta sap a.

       Sudden-a chuan Jim Silver-a ruang an hmuh dan leh thil awmzia chu a han sawi nawn leh a.

       Snap bawk chuan, "Jim, helai boruak hi kan beisei aiin a ṭha lo a nih dawn hi," a han ti leh sap a.

       "Puakruk hmang ngeia mimala inhmachhawnna a la tam khawp ang," Sudden-a chuan a lo ti nghat a.

       Jim Silver-a ruang chu mi paruk te chuan urhsun deuh hian an phum a, an vai chuan an ngawi nghiai hlawm a.
* * * * * * *

       Del Rio khuaah chuan Sheriff pakhat hi a lo lut a; chu chu San Angelo khaw Sheriff a ni. Tunhmaa Gunman sawi lar tak ni ṭhin, mak tak maia a thil tih sual an ngaihdam sak tak Cole Griffin leh Deputy pahnih hi a rawn hruai a.

       Sudden-a ten Sweet Valley an thlen aṭanga karhnih deuh thaw chhung chu eng thil danglam teh vak mah a thleng lem lo va. Del Rio-ah chuan Sudden-a leh a ṭhian te pawh chu an la lut leh ta lo reng reng bawk a ni.

       Chumi karhnih chhung deuhthaw chu Sudden-a chuan Sweet Valley ram fan kual nan a hmang a. A chhehvela Ranch te lak chuan Matthew-a ram chu a zim hle na a, ram leilung ṭha lo leh chhawrtlak loh lai a awm miah lo thung a ni. Chipchiar deuhin a fang kual a, a Sakawr Blue Devil nen chuan nitin deuhthaw mai hian an chhuak a, thil hriat belh emaw, ruahhmanna thar siam theihna tur khawp ngaih dan nei thei turin thil awmzia leh kalphung hriat chian a duh a ni.

       Matthew chu Bawng vulh tur lei belh turin thurawn a pe a. Tunah chuan Sudden-a pawhin Marshal Ben Harvey hian Sweet Valley hi lei a dil fo tih pawh a hre tawh a, a ram ṭhatna piah lamah lei ngei a tumna chhan thil dang awmin a ring tlat a; mahse Mathew te nupa hian eng teh vak an la sawi duh chiah lo si lo va, amah ngei hian thil awmzia hriat tumin a ngaihven reng rih ta zawk a ni.

       Snap leh Yorky chu an chhuak ve ngai lem lo va. Sudden hian Matthew te nupa ti buaia rawn len chilh ṭhintu hmai tuam ho kha an la rawn kal leh ngei a ring tlat a; chumi huna lo awm turin Snap leh Yorky hi a duh tlat a ni. Sweet Valley hnaiha awm Ranch pahnih hi an lakah chuan Ranch lian tak an ni tih pawh a hre tawh a, an mi chhawr te chungchang pawh a hre chiang ṭan viau tawh a, indona chu a thleng mai chuan a ring lo; mahse midang ṭha tak chu mamawh belh hle hian a inhria a. Puakruk kah lama ngaihtuahawm loh tak, mimal inhmachhawn a ṭul pawha rang ve tawk tak pakhat chu a duh khawp mai a. Helaia khawpui lian lutuk ni lo, khaw te tak pawh ni chuang lo, Texas leh Mexico inrina hnaih deuh tak Del Rio, Outlaw, Gunman, Killer leh Bounty Hunter te fuan khawmna a nihna hi an tana fimkhur a ngaihna a ni a; heti ang khuaah hi chuan an chungah eng pawh a thleng thei a ni.

       Snap leh Yorky chuan Matthew te nupa chu an pui ṭhin a. Ran In, Chhek In leh thil ṭul dang an khawih a, engmah ti buaitu awm lovin hun an la hmang zel rih a, Yorky ṭawngkam takin, han rik deuh rap rapna tur thil an la tawng leh ta lo a ni.

       Nikhat chu Sweet Valley-ah chuan Cowboy pangngai inthuama inthuam tlangval pakhat hi a rawn lut hlawl mai a; chumi nî tak chuan Sudden-a pawh a kal chhuak lo va, rawn kal thar chuan Matthew te nupa hnenah chuan hnathawh tur hi a rawn dil a; mahse Matthew chuan hnathawktu tur an mamawh loh thu sawiin ṭawngkam ṭha tak si hian a lo hnar a. Chupa chu Snap leh Mexican pa an inkah ṭuma lo awm ve Belly kha a ni.

       Sudden chuan Matthew chu kai hrangin thil a han sawipui a, a thil rawt chu Matthew-a'n a rem tih hnu-ah Belly bulah chuan a rawn kal a; amah a han en vang vang hnuin mi rintlak tak a nih a ring ta a, nakkinah thil eng emaw thleng ta se midang an la mamawh belh dawn a ni tih a hre reng a. "Midang hnena thawh angin hetah chuan hlawh kan dawng mumal dawn lo va..." Sudden-a chuan a han ti nghal phawt a.

       "Chu chu ka beisei ber pawh a ni lo, mi dik lo lama awm ka hlau a, helai ram vel boruak hi la lum hle dawna hriat rukna ka nei a; chu chu hun awl hman ṭhat nan ka duh deuh maw le," Belly chuan a lo ti ve mai a.

       "A ṭhat chu, mi rintlak chu kan la mamawh viau ngei ang," Sudden-a chuan a lo ti leh mai a.

       Chupa chuan Snap chu a han en a, a nui sak a. Snap pawh chuan pangngai tak hian a lo be ve a. "Khua aṭangin em ni i lo kal?"

       "Aw ni e."

       "Thu thar te a awm em?"

       Belly chuan, "Nimin piah khan Del Rio-ah chuan San Angelo Sheriff a rawn thleng a, tunhmaa Gunfighter turu pawla an sawi ṭhin Cole Griffin pawh a rawn hruai," a han ti a.

       Cole Griffin hming a han sawi rik chuan Sudden-a chu a lo nui sak a, "E heu! Griffin chu, dan chhungah an lo la lut tawh elo?" a lo ti a.

       Belly chuan, "A lan dan chuan Deputy niin a lang," a lo ti leh a.

       "San Angelo Sheriff chuan he'ng lam lamah eng nge a rawn tih chu le?" tiin Sudden chuan a zâwt ta zel a.

       "An sawi hmangin Outlaw pakhat, 'Sudden' an tih ṭhin a rawn zawng a ni awm e," tiin Belly chuan a sawi ta zel a, "Hman deuh khan Johny Lumbo leh a ṭhian ten Big Ben Saloon-ah Sudden-a beih rawn an tum a ni awm a, chu thu thang chu San Angelo Sheriff hian lo hriain Silai chelek rang tak hruaiin a rawn thlithlai niin an sawi," a ti leh ta zel a.

       "Sheriff chu khuaah a la awm em?"

       "Khua ka rawn chhuahsan thleng kha chuan a la awm."

       Sudden-a chuan nui chung hian, "Sheriff chu ka hmu ve teh ang," a han ti a. A insiam a, kal nghal mai hi a tum a.

       "Jim, ka kal ve ang," Yorky chuan a lo ti vat a.

       "Yorky, hetah lo awm rawh, keimahin ka kal dawn," Sudden-a chuan a lo ti mai a.

       Snap chuan Sudden-a chu ngun zet hian a han melh ren rawn a, "Jim, a âtthlak kher mai," a han ti a.

       "Snap, hmuh ngei a ṭulna riau a awm a ni," Sudden-a chuan a han ti leh a.

       "Ka hre thiam e," Snap chuan a ti ta sap a, a thil tih lai chu a chhunzawm ta daih a.

      BSudden chu a nui mai a, Belly hnenah chuan, "Mr. Matthew chuan i awm a rem tih kha, lo inti tlangnel rawh," a han ti a, Del Rio khaw lam pan chuan Blue Devil chu a kal tir ta nghal a.

       An khawsa zia chu Belly chuan mak a tih hmel hle mai a, Sudden-a kal ta chu eng emaw chen a en zui reng nghe nghe a.
* * * * * * *

       Lehlamah BB Ranch-ah chuan Jason Curse leh a ho te chuan chet dan tur an la ruahman reng a, tun maia bawh zui tut tut erawh Ben Harvey chuan a rem tih loh avangin San Jose leh a chheh vel chu a la reh rih mai zawk ni hian a lang a ni. Sweet Valley lamah mi pathum an lut a, hna an thawk mek a ni tih te pawh chu an hre ve vek tawh a. A lut zinga pakhat phei chuan Sweet Valley ram chhung chu a fang chipchiar hle tawh tih thlengin an thlithlai a, an la ngawi rih mai mai a ni.

       Ben Harvey chuan Jason Curse hnenah chuan an ruahman lawkna a hlawhchham avanga Del Rio khaw Marshal a ni zui ta zel chu an tân leh amah Ben Harvey tan ngei pawh a ṭhat tâwk loh thu a sawi tawh a. Ni e, an mi chhawr te zingah Owtlaw an awm nual a, a ṭhen te phei chu Del Rio khaw chhunga mi zahawm chin leh mi pangngai chinin misual tak an nih thu an hriat chian em em te pawh an ni a, chu'ng ho chu an awm hle hle theih loh chang a awm lo thei lo va, buaina an siamin Ben Harvey chuan Marshal ni chunga a hum a ngai deuh fo ta si a, chu chu khaw mipui zinga a zahawm leh mi pangngai te chuan hriat thiam loh chin an nei thuai mai dawn a, Ben Harvey-a'n mi te zah a kàina hi a pawt hniam thei hle dawn tih a hria a ni.

       A dik tak chuan Marshal thlan ṭuma a inrawlh chhan pawh, inthlan tlin tir a, mawihnai leh hming thatna hlawh chunga Jim Silver-a hnena Marshal nihna kha hlan a, an lamṭanga siam tum a ni a; mahse Jim Silver kha a lo â bik si lo va, an ruahmanna a tlawlh ta a nih kha. Marshal a nih reng chuan Sweet Valley ruam neih an tumna kawnga an ruahmanna a ti sukuk thei dawn tlat hian a hre tawh a ni.

       Jason Curse leh Ben Harvey hian midangin an hriatpui ve miah lovin Sweet Valley neih an tum tlat nachhan ṭha tak hi a awm a, Matthew-a hnena kalin Ben Harvey hian vawi tam a ram hi lei a dil tawh a; mahse a man a tana Dollar tam tham tak a tiam pawhin a la hlawhtling thei lo a ni. Jason Curse hian mihring ruaiin inthup chungin Sweet Valley hi a rawk thung a, hrek chera hralhtir mai theih an beisei a ni; mahse ani pawh a la hlawhtling thei chuang lo. Tunah phei chuan mi thar pakhat leh a ṭhian te pahnih an awm ve tawh lehnghal. He mi thar lah hian Sweet Valley chu a vil hneh hrep mai lehnghal a, awlsam lam aiin a harsa tawlh tawlh dawn nia a lan avangin a lung a awi lo ṭan hle tawh a ni.

       Jason-a rilru-ah chuan mi thar(Sudden-a) chu a lo awm leh ṭhin a. 'Tunge maw a nih le?' tiin a inzawt a.

       Chutih lai chuan Johny Lumbo a rawn lut a. "Curse, Del Rio-ah San Angelo Sheriff a rawn kal a nih chu," a rawn ti lung lung a.

       "Khati khan min ko tawh suh ka tih kha Lumbo," Jason chuan a han ti hmak a.

       Lumbo chu a nui suk a, "Jason, Sheriff chuan a hmu duh ngei ang che," a han ti leh a.

       Jason chuan, "Min rawn hmu se la," a lo ti ve mai a.

       "Nangma'n i hmu dawn lo em ni? Del Rio i kal lohna pawh a rei tawh viauin ka hria," Lumbo chuan a lo ti leh ṭalh a.

       "Sheriff chu cham rei lo se a tân a ṭha ang " Jason chuan a ti hmak a.

       Jason Curse hian, tumahin an ruahmanna leh an thil tih tum hi an tih sukuk a rem ti dawn hauh lo, Lawman pawh ni se, Gunman dang emaw, Bounty Hunter pawh an dang chuang lo, a ṭul chuan a dah ṭha leh mai ang. Amah dotu leh kalhtu hi a mamawh hauh lo a ni. A han inngaihtuah vang vang a, chutah Lumbo lam chu a hawi a, ṭhen suk pahin a Winchester Rifle a la chhuak a, "Lumbo, Sheriff chu ka hmu chak ta riau mai, Del Rio khaw boruak pawh ka hîp khat teh tak e," a han ti a. Pâwnah chhuakin a Sakawr chu Saddle a bel a, inthazo deuh hian a lawn kâi a, a ṭhianpa chu a han thlek a, "I lo kal ve dawn em Lumbo?" a han ti a.

       "Ka rawn kal ve ang nge."

       Chu'ng Gunfighter pahnih te chu Sudden-a'n Del Rio lam pana a Sakawr a kaltir nî, tlai lamah chuan khaw lam pan chuan an kal ve ta a ni.

       Buaina awm lovin Del Rio chu karhnih dawn a awm ve tawh chu a ni a; mahse rei chu a reh kher lo mai thei bawk. Mak deuh maiin khawi khua emawa Gunman lar tak emaw, Killer, mi te ṭihkhai an luh reng reng hian buaina a awm duh khawp mai a, ruang hi a chhuak duh khawp mai bawk. Del Rio khuaa kuang siamtu hi heti ang hunah hian mi tam takin an lo dawr tawh ṭhin a ni.

SUDDEN: CLEAR THE NAME
Author: Chhantea Pautu

Chapter 10

       Sudden-a'n khua a thlen chuan San Angelo Sheriff awmna leh a thlenna Hotel a ngaihven nghal a. Sheriff chu nuthlawi hmel ṭha leh duhawm Mina Chrisandy-i Saloon-ah a awm tih a hria a, a thlenna Hotel lam zawk chu a han pan a. Hmanhmawh tak chuan Sheriff chu midang tamna zinga hmuh nghal mai a la tum lo va, mimal taka hmuh phawt a duh a ni; chuvanga Lucky Chance Saloon pawh pan rih lo a ni.

       Hotel a pan a, khualchhawn hnenah pehhel deuh tak hian Sheriff pindan a zawt a, a han hriat chuan lawm takin a nui sak a, John Denver-a Saloon, Stranger Come Back-ah a lut leh a, Bar-ah zu a in a, rei tawk fang a awm hnu-ah Sheriff thlenna Hotel lam chu a pan leh ta a ni.

       San Angelo Sheriff, Jack Murdock hi pa rothap leh ngap, huaisen zet mai a ni a, Silai chelek lamah ai mahin a rorum ṭhin em avanga lar leh, Outlaw ṭhenkhatin an hlauh a ni. A bial chhungah Sudden-a chetna ni-a an sawi hian a hnen a thleng fo mai a, inrawkna leh insuamna, Bank rawk leh mi lambun bakah Sudden-a tih ni-a chhal tualthahna pawh a thleng fo tawh a ni. Amah Sudden-a hi hmaichhanah ngei a lo hmu ve tawh a; chutih lai chuan naupang tak a la ni. Miten a Puakruk phawi ran zia leh kah thiam dan an sawi hi khual thu thang leh ar pan chuk satliah mai a ni lo tih pawh a hria a; heti khawpa  miin khawthlang rama an sawi lar hat tawh hi chu mi namailo tak an ni ṭhin tih hi a hre ve tlat. Del Rio Town Marshal Ben Harvey pawh a hmu tawh a, Johny Lumbo leh a ṭhian ten beihbrawn an tum mi pakhat chungchang pawh chu a zawt tawh nghe nghe a ni. A ruk tak chuan Ben Harvey hian San Angelo bial  Sheriff rawn kal hi a ngaimawh hle a, Law Officer ve ve an nih si avangin a tan tihngaihna a awm der si lo, a awm chhunga buaina a thlen loh a duh hle a ni.

       Lucky Chance Saloon-a zu ina rei mawi tawk a han awm hnu chuan Sheriff Jack Murdock chuan Cole Griffin chu a han bekbawr zauh a. Saloon chu chhuahsanin a thlenna Hotel chu a pan ding ta nghal a.

       Chutih lai chuan Hotel khualchawn dawhkan nghengin Sudden-a chu kawi sawi fe hian a ding a, a lukhum chu hmalamah a hmai chanve hliah hian a kuai kun a, lo lut thar chu ngun zet hian a lo chîk a. A thlenna pindan lam pana a chhoh hnu chuan rei vak lo a han nghak leh hlek a; chutah, Hotel chhawng chung pindan lam chu a pan chho ve ta a ni. A pindan duh chu a pan phei zel a, inthlahdah miah lovin a inring ru em em a. He Sheriff hian a hmel hi a la hriat ngei a ring tlat a, khatih lai khan la naupang hle mah se, an intawn dan kha Jack Murdock-a tan chuan chhinchhiah a awl dawn tlat a ni. Tunah hian amah man tumin a rawn kal ni ngeiin a lang a, Sudden-a chu a fimkhur hle a, in mantir ngawt chu a tum lo hle bawk; mahse, amah zawngtu Law Officer te hi rang taka a hmachhawn vat loh chuan a tan thil a buaithlak zo vek thei zawk dawn tih a hria a, eng pawh huama a nihna ang anga hmachhawn turin hmuh nghal mai hi ṭha a ti a ni.

       Kawngka chu a han kik kauh kauh a, a reh vang vang hnu-ah, "Tunge ni?" inchhung lam aṭang chuan a rawn ti ta a. Sheriff Jack Murdock-a aw hi a thum pawr deuh chhar a, amah hi a lan dan maiah pawh Western pa dik tak nih a tling a, hmui hmul a zuah chhap a, Suit dum hain Lukhumparh tlâng chhah parh hlai lutuk lo, parh tawi chi ni si lo hi a khum a, a kawrâwm dinglamah Sheriff Badge arsi lem a tar va a. A kawng hmalam veilam sir deuhah a Puakruk Navy Cold .44 hi dinglam hawia a kâwm dahin, kut dinglama phawi theih turin a pai a, a hawiher leh chezia reng rengah Wild West hun laia Sheriff niawm hliah hliah hmel hi a pu sa reng reng a ni.

       Sudden chuan Pindan pâwn aṭang chuan, "Sheriff, i mi zawn chungchangah biak che ka duh a ni?" a han ti a.

       Sheriff chu tukverh bulah hian a lo ding a, a pindana lo lêng lut chu ngun deuh mai hian a lo en reng a. Sudden-a chu kawngka bul maiah chuan a la awm a, muangchang hian kawngka chu a khar a, kawngka bula bang nghengin zawi deuh hnak hian a han ding kawi sawi deuh a.

Sheriff chuan a chezia chu a lo en ngun kher mai, "Tlangval, eng'e ni min biak i duh nachhan chu?" a han ti a.

       "Sheriff, kei hi min rawn zawng tih ka lo hria a?" Sudden-a chuan a han ti nghal tawp a.

       Mak ti hmel zetin, "Ka va hre thiam lo ve. Kei hian ka zawng che maw? Tu nge i nih a?" Sheriff chuan a lo ti ta hû a.

       Sudden-a chuan a lukhum chu tlemin a kuai dak hret a, ngun deuh maia Sheriff khawsa zia en pahin, "Ka hming chu James Green a ni; mahse Texas ah hi chuan 'Sudden' tia koh ka ni," a han ti leh a.

       San Angelo Sheriff Jack Murdock chu thawklehkhatah a hmel a rawn danglam nghal vek a, a chezia leh mitmengah chuan a inring em em nghal a ni tih a lang thei bawk, ṭawng miah lo hian Sudden-a chu a en reng tawh mai a; hmana rawlthar hlimhlawt a lo hmuh tawh kha tunah a hmaah a ding leh ta a ni. A tir khan a lo hre nghal mai lo chu mak a ti hle a; mahse a lukhum a khum kun bakah tlema a lo upat ve deuh tawh avangin a âwm tho mai. Amah hmachhawntu chu a han en chiang lehzual a, a hmel pangngai thlap leh inring ru em em tih hriat si, thinrim hmel pu miah lo chunga a mitmeng en chiana zuamawm der si lo leh, a dar pharh leh kawng fek tak, sang ṭha zaih mai leh, a kut pahnih a khel zawna a thlak thla hnak mai te chu a hmuh hmaih hauh lo. Eng nge lo thleng dawn tih ngaichangin inring em em hian a awm a. Sudden-a hi man tumin a zawng rei tawh a, a veh kual fo tawh, a hlau miah lo va; a Deputy te leh Cole Griffin-a tel lo va hmachhawn a ngai ta mai erawh pawi a ti hle a. A rilru chuan Silai phawi mai tumin a inbuatsaih ta a.

       Sudden-a chuan Sheriff mitmeng aṭang chuan a thil tum chu a lo hre thiam nghal mai a, "Sheriff tum duh suh, min khalh hman chuang lo vang," a ti ta sap a.

       Sudden-a chu a ṭawng ring lo hle na a, a chiangin a fiah hle thung; a mitmeng aṭang chuan a ti mai mai lo tih leh awmze nei lo va sawi a ni lo tih chu Sheriff chuan a hre chiang hle a, a thil tum a rawn hre thiam nghal mai pawh chu mak a ti hle a. Silai phawi mai tuma a rilru a siam chu a inthlah dul hret a, mahse a la inring ve em em tho a ni, 'Hepa hian thu awmze nei lo a sawi lo vang' a ti rilru a. Ni e, Sudden-a hian thu awmze nei lo a chhak chhuak mai mai ngai tlat lo.

       Sudden-a bawk chuan, "Sheriff thah che tuma rawn kal ka ni lo, thil hriat thiam loh a awm avangin nangmah hmu tur leh be tur chea lo kal mai ka ni zawk," a han ti a.

       An ngawih vang vang hnu-ah Sheriff chuan, "Outlaw i ni a, thlahnih kal ta mai pawh khan San Angelo aṭanga mel 50 vela hlaah mi i rawk a nih kha, i rawk pa chu i that zui nghal bawk a nih kha," a han ti a, Sudden-a chu rum zet hian a han melh a; chutah pawn lamah chuan ke pen thawm a lo awm a. Sheriff chuan Cole Griffin-a a nih ngei ringin chulai hun remchang chu chuh vat tumin a rilru a siam ta nghal a.

       Sudden-a chu za lo zet hian a ṭhen sak a, chutah a kut chu a phe vuai a, mitkhap kar pawh tling mang loah chuan  a kutbawr dinglamah a Puakruk hman ṭhan zet chu a rawn chawr chhuak nawlh a. Sheriff-in a rilru a siam fel meuh chuan Puakruka tin a lo ni reng tawh a ni. "Sheriff, Killer ka ni lo, ni ila chuan tunah hian i thi tawh ang," Sudden-a chuan a han ti te te a, "Ka mi hmachhawn tawh te khan min nawr lui ṭhin, Silai an chuh hmasa ziah bawk; chubakah thlahnih kalta khan Arizona State-a Hattchet Foly khuaa ka Ranch-ah ka awm daih a ni. In thil hriat fuh loh ching fel turin leh ka hming thang mawi lo zet hi siam ṭha turin Texas hi ka rawn lut leh ta a nih hi," a han ti ta a.

       Ke pen thawm chu a reh ta daih a, Cole Griffin-a chu a ni lo tawp a ni ang. Sheriff chuan Sudden-a Puakruk kaw hmawr thim raih chu a melh ran mai a; he Puakruk hian amah thah tumtu te nunna a lo la fo tawh a ni.

       Sudden-a chuan a sawi zawm leh a, "Sheriff, hmanah kan inhmachhawn tawh kha, ka la hre reng asin. Khami tuma min man i tum nachhan ka mi thah pa kha Killer dik tak a ni a, ani khan a Silai a phawi hmasa a, keiin Silai ka chuh ve chuan a phawi chhuak kim tawh a ni; ka sahim nan ka kah hlum mai a  ngai ta a nih kha. Chubakah, ka tih anga an sawi tam tak hi ka tih a ni ngai hauh lo, mi ka rawk ngai lo va, ka suam ngai hek lo, loh theih loh thilah lo chuan Silaiin mi ka hmachhawn mai mai ngai lo bawk," a han ti leh a.

       Sheriff chuan, "Bounty Hunter leh Gunman ṭhenkhatin hming chher tumin an veh reng che a, ka lak aṭangin tal chhuak mah la i him tak tak chuang dawn lo, Mr. Sudden," a lo ti leh chhar chhar a. A hmelah chuan a la hmin lo hle tih a hriat a.

       Sudden-a chu a lo nui mai a, "Hei hi en la chhiar rawh," tih pahin a Ipte aṭangin lehkha pahnih hi a phawrh chhuak a, Sheriff Jack Murdock chu a pe ta a; chu'ng lehkha chu Arizona Governor hnuaia Deputy Sheriff a nih thu lanna leh, Governor Bleke-a'n Texas Governor Edmund Jackson Davis hnena Sudden-a chungchang dik tak a sawina lekha a thawn hnu-a, Del Rio khuaa a kal a rem tihna leh mawhphurhna a pekna lehkha Texas Governor hming ziah hnan ngei hi a ni a. "Wanted nihna tur khawpin thil ka la ti sual lo," Sudden-a chuan a ti leh nghat a.

       Jack Murdock chuan chung lehkha pahnih te chu a thlek vung vung a, a tawpah chuan a thaw huai a, hahdam hmel deuh zawk hian, "He khua leh a chhehvelah hian mi tuihnai lo tak tak an fuan khawm ṭhin a, i tân an hlauhawm thei hle ang," tiin Sudden-a hnenah lehkha chu a pe lét leh ta a.

       "Sheriff, helai hmun hi chu ka kutah dah rawh, ka tih ṭhin danin ka ching fel dawn a; buaina hi hmuh theihin a alh chhuak thuai tawh ang," a ti bung nghat a.

       Chu Law Officer chuan amah len chilha zep miah lo va Sudden-a a nih thu rawn sawitu, Puakruk pahnih fual hnelh hnawlha pai chu chik lehzualin a han en nawn leh ngat a, a thu sawi hi a hlen ngei dawn tih pawh a ring nghet ta tlat a, ṭul lo tawpah he khuaah hian a kal ni te hian a han inhre lek lek a, nui huah huah pah hian Sudden-a chu a han en a, "Mr. Green, i silai kha dah tawh rawh, Governor Bleke chanchin chu ka hre ve tawh ṭhin, ani leh Governor Edmund-a'n an rin phawt che chuan ka inrawlhna tur chhan a awm lo vang; naktukah Del Rio kan chhuahsan ang," a ti ve ta a.

       "Ka lawm e. Sheriff, helai buaina hi a lan dan ang hi a ni lo vang tih ka hlau ngawt mai," Sudden-a chuan a lo ti leh a.

       "Chu, eng i sawi tumna nge?"

       Sudden-a chuan, "Mi hi an thi zeuh zeuh ang," a lo ti sam mai a. A Silai chu a bawmah zei zet hian a han thawlh lut ve ta a

       "Ni e, Gunfighter hnawksak leh Killer ho te, Outlaw ṭhenkhat te hi chu thi ṭhen nual rawh se," Sheriff chuan a lo ti ve mai a.

       "Ṭhenkhat chu thu-a sawi fel pui theih an ni dawn lo va, ka Silaia ka hmachhawn ngei pawh an ngai hlawm ang," Sudden-a chuan a han ti leh a.

       "Mr. Green, fimkhur ang che; helai hi i chin fel ngei erawh ka ring."

       Sudden-a chhuah hnu chuan Sheriff chuan an inbiakna chu a ngaihtuah zui vung vung a, a tawpah chuan a nui vur vur a. Chu tlangval chezia leh huaisenna chu ngaisâng ru tak hian Hotel chhawng hnuai lamah chaw ei turin a chhuk ta chhut chhut a.

       Zan lamah chuan Big Ben Saloon chu a bengchheng hle mai a, a ṭhenin Poker khelin, a ṭhenin zu no an dawm a, rui phur hawklakin hmeichhe awm ve ṭhenkhat an lo chhaih kuah nawk nawk hlawm bawk a; he tih lai hian Town Marshal Ben Harvey erawh chu a Office lamah a awm a ni.

       Jason Curse leh Johny Lumbo chu Saloon chhungah an rawn lut ve ta a. Lumbo zawk chu a rui tawh hle ni hian a lang a, Jason erawh chu a meng fim kar mai thung a. Hetah hian an ṭhian te tam tak an awm tih an hria a, he hmun hi chu an nghawng lenna hmun a ni. Lumbo chu a ṭhian ṭhenkhat ten dawhkan an lo kil mêk lam pana kalin a ṭawng lung lung a; hepa rui fuh tawh laklawh hi chu a harhfim laia a ṭawng duh loh leh nelawm loh ang aia phunglung leh nikhualo zet mai hi a ni thung a. Jason erawh chuan Bar lam a pan nghal a, Danny hnenah chuan San Angelo Sheriff a rawn kal leh kal loh zawi sap hian a han zawt a, Bar nghaktu chuan a lu a lo thing nar nar ringawt a. Chutah Jason chu a chhuak zui nghal vat a.

       Jason Curse a chhuah hnu lawkah Snap Lunt chu Big Ben Saloon-ah chuan a rawn lut ve nawlh mai a. Ani hian Sudden-a'n Sweet Valley a chhuahsan hnu lawk khan a rukin Yorky leh midang ho pawh hrilh hran chuang lovin a zui ve ta vat a, hepa hian ngawi reng chungin YZ Ranch lama an Pu ber hi a ngaihtuah fo a, chu chu an Pi ber Norry(Noreen) i duh dan leh Snap Lunt hnena a ruka a chah dan a ni reng a, an Pi hian Sudden-a hi hmeichhiaa thuchang takin a ngaihtuah em em si a, a ruka veng ṭha tur leh vil tlat turin Snap Lunt hi a duh a ni. Sudden-a hi amah chauh pawhin ngaihtuahawm a ni miah lo tih a hre chiang a; mahse Puakruk phawi rang leh kah thiam tak pawh hi hnunglam aṭanga kah hlum theih an nih ve tho avangin leh an Pi ber hnena a intiam tawh angin Sudden-a bula awm turin a kal hnu lawkah khua a pan ve ta nghal a ni.

       Khawthlang rama Puakruk phawi rang leh kah thiam, Gunfighter turu zinga chhal ṭhenkhat te pawh an hnunglam aṭanga kah hlum an lo ni tawh ṭhin a. Will Bill Hickock chu Deadwood-ah a hnunglam aṭanga kah hlum a ni a; chuti ang bawkin Doc Holiday leh midang chungah pawh a lo thleng tawh a. Mi dawihzep tak tuin emaw hnunglam aṭanga Sudden-a an kah ve mai hi Snap hian a hlauhpui ṭhin a ni.

       Sudden-a thung chuan  khuaah riah mai chu a la tum deuh deuh a; chu chuan thil pawi tak a thlen ang a, Del Rio-ah leh Sweet Valley lamah thil thleng pawi tak a awm ve ve phah dawn ta a ni. Hemi zan aṭang chiah hian Sheriff hnena a lo sawi lawk tawh ang leh a rin aia rangin helai chhehvel boruak chu a alh chhuak ta ngei reng a. Snap Lunt-a'n khua a rawn luh ve thu chu a la hre hauh lo va.

       Marshal chuan zan dang ang lo takin ama Saloon pan lovin Mina Chrisandy Saloon chu a pan, chutah chuan Sheriff Jack Murdock leh a Deputy ṭhenkhat te pawh an awm nghe nghe a. Cole Griffin erawh chu Denver-a Saloon-ah a awm thung. Stranger Come Back Saloon-ah hian Sudden-a pawh Bar dawhkan bawhin zu no a dawm a, Cole Griffin chuan amah chu a hre ve lo tih a hria a, ani Sudden-a erawh hi chuan midang nena an inhmachhawn lai a hmu tawh thung a ni.

       Denver-a Saloon, Stranger Come Back leh Mina-i Saloon, Lucky Chance hi inhnaih te an ni a, Harvey-a Saloon, Big Ben erawh chu heng Saloon pahnih te nen hi chuan a inhlat deuh hlek a, thawm bengchheng karah chuan Silai pawh ri se a hriat lutuk lo vang.

       Sudden-a chuan tlem te te hian a no dawm laia zu chu a in a; chutih lai chuan Silai hi indawt zatin vawi thum a rawn ri ṭhuai ṭhuai a, Denver-a Saloon chhunga lawi lut te chu an phawk hra hlawm a. He Saloon-a lawi lut ṭhin te hi chu mi pangngai tak tak vek an ni tlangpui ṭhin. Sudden-a chuan Silai rikna chu Lucky Chance Saloon ni ngei hian a hria a, Sheriff kha chu Saloon-ah chuan a kal tih a hre bawk a. Denver-a Saloon ang lo takin Ben Harvey Saloon leh Mina Chrisandy Saloon-ah hi chuan mi ṭawp tak tak an kal fo tih pawh a hre bawk a, eng nge thleng tih hriat tumin Lucky chance Saloon chu a pan ve ta nghal a ni. Denver-a leh midang ṭhenkhat pawh chuan an zui ve bawk a.

       A va thlen chuan Saloon chhung lai takah chuan Sheriff Jack Murdock chu a lo ding a, a dar veilam chu a lo dawm a, a bul mai chhuatah chuan Sheriff Deputy pahnih te chu an lo let reng a, pakhat chu a la thi lo tih hriat deuh hian rum ṭiah ṭiah chungin a lo la che ṭial ṭial a, pakhat erawh chu a thi tawh a ni ngat ang, che miah lo hian a mu hlawm reng mai a. Sheriff hmachhawn chuan mipakhat, Cowboy inthuam pangngaia inthuam, ria sâng lam leh sa pan hlenghlawng, kut zungṭang zum sei sal mai, a kut veilama Puakruk hum hi a ding kak ṭah mai a; hemi hi Jason Curse a ni. Sherriff chu nui ṭha hian a lo en a, ani chuan rum em em hian a lo melh let ve thung a.

       Chu mipakhat a han hmuh chuan Sudden-a chu, "Black Curse Jason," tiin a phun sap a.

       Jason Curse chuan nuihzat awm deuh hian San Angelo Sheriff chu a han melh a, "Sheriff i rawn tla hla mah mah lo maw? Kei aiin i phawi rang si lo," a han ti a. "Tunah hian chance ka pe dawn che a ni; i Silai phawina kut lam a la ṭha a, i Silai kha i chuh ngei tur a ni," a han ti chhak chhak a, a Puakruk chu a pai ṭha ta nghal a.

       Marshal Ben Harvey chuan an chezia chu a lo en reng a, chutah a rawn inrawlh ve ta a, "Duh tawk tawh rawh u, ka khuaah buaina ka duh hauh lo," tih pahin Jason chu a han melh hrâk a.

       A sawi zawh rual deuh thaw chuan Jason Curse chuan a Puakruk a phawi dawk leh zawk a, a puak zui nghal thawr a, Marshal khel dinglama a Puakruk pai chu a va deng siah a, "Marshal i khua maw? Lo inrawlh suh, Mr. Murdock nen hian mimal taka chin fel tur kan nei. Nang chu i Ranch lamah va haw rawh," awmze nei zeta tih pah hian rum lutuk maiin a han melh zui a.

       Marshal chu a ding ngawi run a, kal sawn tum hmel hian a lang hauh lo.

       "Marshal kal rawh, thah che hi ka hreh hauh lo a nia," Jason chuan a han ti chhum leh hmak a.

       Marshal Ben Harvey chuan a mitmeng chu a han en a, namnul mai chi nia a hriat loh avang a ni chêk ang, muangchangin pawnah a chhuak ta a. Saloon aṭanga a chhuah hnu chuan a nui suk a, 'Jason, Sheriff kha han that ngei ang che' a ti rilru a. Del Rio khuaah Sweet Valley mi chhawrho an rawn lut kim vek tih a hriat avangin Jason-a sawi ang ngeia a Ranch BB lama kal chu a tum ta a ni. Chumi hmaa tih tur a neih pahnih chu a han hre chhuak zawk a. Denver-a Saloon-ah a lut a, Denver-a chu Lucky Chance Saloon-ah khan a rawn kal ve avangin mipakhat hnenah chuan a Marshal Badge chu a dah a, Denver-a lo pe turin a ti a, chumi zawhah hmanhmawh deuhin a Ranch lam pan chuan a Sakawr chu a tlantir ta pur pur a. A suangtuah danah chuan, Marshal hna a bansan chuan Del Rio khua, Outlaw leh Gunman tam tak luh khawmna chu a chiri leh nuaih ang a, chutah Low Officer awmchhun Sheriff Jack Murdock a thih phei chuan...a ngaihtuahna chu hlimpuiin verther zet hian zan thimah hnuaiah chuan a nui sun sun a. 'Chutih chhung chuan a duh tawkin a lo che thei tawh thung ang' tiin a duhthu a sam zui nuah nuah.

       Marshal a vau chhuah hnu chuan Jason Curse chuan a thu sawi ngai bawk sawiin Sheriff chu a han cho leh a, a Puakruk pawh a pai ṭha leh thlap tawh. A phawi khalh dawn a ni tih inhre chiang hle lo se la chuan Jason hi heti ang hian a awm kher lo vang, a chan a ṭhat dawn loh chuan tumah fair takin a hmachhawn ngai tlat lo a ni.

       Lucky Chance Saloon-ah chuan mi an ṭhahnem tehchiam lo va, Denver-a Saloon aṭang pawh khan tlema huaisen deuh chin lo chu an kal ngam lo. Mak tak maiin Cole Griffin pawh kha a rawn kal ve miah lo va.

       Sheriff leh Jason chu an inmelh ran mai a, a tu ve ve mai pawh chuan Silai an chuh ngei chu a ngai dawn ta a ni. Pakhat hian engti kawng zawng pawhin Sheriff hi thah a tum tlat niin a lang a, chu chu Sudden-a rem tih zawng a ni miah lo.

       Jason chu a dawhthei lo ṭan tawh hle a, Sherriff erawh Silai chuh tum awm pawh hian a la lang lo va, ṭawng erawh a ṭawng miah lo va, a hmaa a mah cho em emtu chu nelawm loh zet hian a melh a, hlau emaw huphurh hmel emaw a pu miah lo va. Ning âwm zet hmel a put zawhah Jason chuan a tum hlen chhuah ngei tumin a Silai chu a chuh ta nge nge a, midang ngawi ṭhup karah Puakruk chu a ri ring hlein a hriat; mahse Jason-a Silai chu a puak lo va, Sheriff pawh kah a ni ta hek lo.

       Sudden-a chuan Jason-a chezia leh mitmeng kha ngun deuh hian a lo en reng a, a mitmeng a danglama Silai a chuh dawn tih a hriat veleh a tih tur a tih theih nan a inher rem ve nghal a, Jason-a'n Silai a chuh rual chiah chuan a kut chu hmuh hman loh hian a phe vuai a, Jason-a'n Sheriff kah tuma a Puakruk a lek kawh hma hretin a Puakruk chu a kah per sak ta lawp hi a lo ni a.

       "Kei chu ni ila ka tum hauh lo vang."

       Jason chuan a dinglam, veilam tluk zeta a hman thiam chuan Silai chuh a han tum leh a; mahse, àwka nelawm loh leh vawt raih, zawi leh fiah tak si hi a han hre ta a ni; chu thu phuh chhuaktu mit chuan amah chu a rawn en ran mai bawk a, a Puakruk kaw hmawr thim raih mai chuan a rawn tin zawn nasa mai.

       "I han ti chhin dawn em ni?" tih pahin Sudden-a chu Jason-a hmachhawn zawng chuan a kal chhat chhat a. Sheriff hnenah chuan lo inthiarfihlim turin a han hrilh a, chutih lai chuan Saloon neitu Mina Chrisandy chuan hlau leh ṭi deuh dai chung hian Sheriff hliam chu a rawn bawihsawm ta a. Deputy pahnih te erawh an thi fel ve ve tawh a ni ang, nichina tal tal pawh kha a che tawh miah lo.

       "Kah hliam tawh hnenah i kah hlum ngei theih nan Silai chuh turin i nawr lui a, a dik ka ti chiah lo a ni. Kha Marshal ṭawng zet, Ben Harvey kha i tirbo ta bawk a, Sheriff hian min rem tih sak loh ka ring hran lo va; chuvangin ka duh danin kan inremsiam dawn a ni," Sudden-a chuan a han ti ta a.

       Jason chuan, "Eng ang inremsiamna nge ni a?" a lo ti nghat a.

       "Kei chuan ka kap hliam ve lo che a, i khel dinglama kha Puakruk i la pai a, Black, ka hre chiang hle che asin, veilam hmang ṭhin i ni a, dinglam pawh veilam tlukin i hmang thiam tho bawk. Keiin dinglam ka hmang ṭhang a, veilam pawh ka dinglam tlukin ka hmang thiam ve tho bawk. Tunah hian ka Puakruk hum lai, ka dinglam ami hi ka dah ang a, veilam ka hmang ang a, nangin dinglam i hmang ang," a ti ta hmiah a.

       Jason-a'n a hmaa dingin a hming ngeia a rawn koh takah chuan chupa chu tunge a ni tih a hre chhuak ve ta nghal a. Texas rama Outlaw hmingthang ber mai chu tunah hian a hmachhawn mek a ni; a ṭhian ten Sudden-a nia an sawi, an lambuna an kah hlum tak kha Sudden-a a ni lo tih chu a rilru-ah a rawn awm nghal a. Chutah, "Kan en ang chu," a ti ve ta nghat a.

       Sudden-a chuan a hmaa ding chu uluk zeta en reng chung hian muangchangin a Puakruk hum lai chu Bar dawhkanah chuan a dah a, muangchang tak leh fimkhur tak zela chein a kut chu a khel zawnah a pahnihin a thlak zawi ta hnak a. Mipahnih te chu Silaia inhmachhawn turin an inpeih ta.

       Chutah hmeichhe aw fiah tliangral mai hi a rawn au ṭhat a, "Ka Saloon-ah tumah in inkap tawh lo vang," tiin Sudden-a leh Jason Curse chu Puakruk pahnih hum chung hian a rawn en a, an pahnih chuan a tin ta ve ve a. Chu nu chu Mina Chrisandy a lo ni a, a hlauhtawng hmel te chu a lo reh vek tawh a, a hmel chu a tumruh hmelin a thu sawi chu tih tlang ngei a tum tih a hriat hle. "Mi pahnih an thi tawh, a tawk. Nang kha, Mr. Jason ka Saloon aṭang hian chhuak rawh," a han ti leh ṭhat a.

       Sheriff Murdock pawh chuan, "Green, Jason kha kal tir rawh, mi pahnih an thi tawh a, zanin atân chuan tawk rawh se," a lo ti ve ta bawk a.

       Khawthlang mipa te hi an rothapin an rorum a, zawhna emaw chhanna emaw, thil ho teah pawh Silai chuh mai awlsam em em mah se, hmeichhia an zah thiamin hmeichhe hmel ṭha tak an en dan phei chu a zahawmin an thlavang an hauh na ṭhin hle a ni; chu chu Western mipa dik tak te rilru put hmang a ni. Jason Curse pawh hi Gunman leh Killer dik tak niin, eng kawng leh hawi zawng pawha mi thah mai hreh lo leh tim miah lo mah ni se, Western tlangval dik tak dang te ang bawkin chhungrilah Lady dik tak te zahna rilru a nei ve tlat a, Silai chuh tumna rilru pawh pu lovin a inthlah dul zui ve ta mai bawk a ni.

       Sudden-a chuan, "Black, kan inṭhen mai a ngai ta chu a pawi hle mai," a han ti a, a nui zui sak a.

       Jason erawh chuan engmah a sawi lo, muangchanga a Puakruk pakhat chu chharin a han ding chhuak a, chutih lai te chuan Sudden-a chuan inthlahdah hauh lo leh ngun em em hian a lo en a; mahse Jason chuan Mina-i avang chuan engtinmah chet a tum tawh bik lo. Muangchang leh fimkhur deuh mai hian Saloon chu a chhuahsan ve ta a ni.

       Hetih lai vel hian Big Ben Saloon-ah chuan inkahna a lo thleng ve mek bawk a.
* * * * * * *

       Sudden-a'n Sweet Valley a chhuahsan hnu chuan Yorky chu ngaih ṭha zan lo hian a awm a. Snap chu a hmuh loh zui tâk mai bawk si avangin a zui ve ngei a nih a ring nghal a, tlai thim dawn a ruaiah chuan a za sek tawh a, chumi ni maia rawn kal thar Belly hnenah chuan khaw lama kal ve mai a duh thu a sawi sek tawh mai a ni.

       A tawp a tawpah chuan Matthew te hnenah a kal a, Del Rio pan a tum thu sawiin a Sakawr a buatsaih ta nghal a, a kal chhuak tur chu, "Ka rawn kal ve dawn," tiin Belly chuan a zui ve nghal bawk a.

       Hmanhmawh deuhin khua chu an pan a, khaw chhung an luh chuan khua a thim tawh nghe nghe. An luh ṭhanna Big Ben Saloon chu an pan nghal chat a, an va luh chuan Snap-a chhuah tum chiah chu an va nang hman vel chiah a ni.
* * * * * * *

       Yorky leh Belly-a'n Big Ben Saloon an thlen hmaa thil awm dan chu heti ang hi a ni.

       A tih dan ngai tein Snap chu Saloon dawhkan pakhat kilin a ṭhu ngawi reng a, Johny Lumbo leh mi pakhat, a la hriat ngai hauh lo rawn lut pawh chu a lo hmu reng a, chupa chu a chhuak leh vat nghe nghe a. Saloon chhungah chuan mi an ṭhahnem phian a, Cowboy pangngai nia lang ṭhenkhat pawh an awm a. Snap-a'n a chhut danin Johny Lumbo leh a ṭhian te chu mi pakua vel lai niin a hria a, an bengchheng hle nghe nghe mai bawk.

       Chutah an zinga pakhat, Razo chu Bar lam panin a rawn kal a, Danny chu tham lo zet hian a rawn bawlzan vel a, Zu chu thlit sak turin a han ti a, Danny-a'n a han thlit sak chuan ti lui tih hriat zet hian amah Bar dawhkanah chuan a han ti bua a, chuveleh, "Engvanga min tih buak sak ngawt nge i nih?" tih tuarh pah hian Danny-a kawr âwmah chuan a ṭham a, a phih lawp lawp mai a, "Thli lehnghal rawh," a han ti vin zui leh tuarh a.

       Anmahni lo en rengtu Snap-a ngaih dan a ni ta hauh lo, "Thlit sak tawh suh," a lo ti ta hmak a.

       Chupa chuan Snap-a lam chu a rawn hawi a.

       "Ani kha thlah rawh," Snap chuan a lo ti chhum leh hmak a.

       Chupa chuan Danny chu a thlah ruai ruai a, Snap-a hmachhawn zawnga inherin Silai phawi mai tum hian a lang a. "Mr. engvanga lo inrawlh ve ngawt nge i nih?" a ti bul nghut a.

       "Chu chu i hriat reng kha," Snap chuan a lo ti leh nghat a.

       "Hria ila ka zawh che ring suh. I tenawm hle mai, tunah i rawn inrawlh ve ngawtna chhan ka sawitir ngei ang che," chupa chuan a lo ti ve leh a.

       Snap chuan aw pangngai thlap hian, "A ni maw? Chu, engtin nge min tih ang? I Silai kha i phawi mai dawn em ni? Han phawi dawn chhin ta che," a lo ti ve leh hmiah a.

       Chutih lai chuan Johny Lumbo chuan, "Razo, lo kal rawh, ani kha chu i khan lo deuh ang," nui huah huah chung hian a lo ti a.

       Razo chuan a tawp nan ti niâwm tak hian Snap chu a rum thei ang ber hian a han melh leh a, a ṭhian te lamah chuan a phei ta chhut chhut a.

       "Ka lawm e," Danny chuan Snap-a hnenah a lo ti sap a.

       Chuti ang thil a thlen hnu lawkah chuan mi pakhat hi Saloon-ah a rawn lut a, Johny Lumbo chu a rawn hrilh ru sur sur a, ani chuan midang ho chu en kualin eng emaw hi a han sawi leh sup a. Snap chuan an thu sawi chu a hre phak lo va. Chumi hnu-ah an zinga paruk chuan Saloon chu hmanhmawh deuh hian an chhuahsan ta a. Danny-a âwma ṭhamtupa kha chu a la awm a.

       Snap-a ngaih chu a ṭha chiah lo va, chung mi paruk te an chhuah hnu chuan Sudden-a zawn tum rilru chungin Saloon chu chhuahsan a tum zui ve ta a, chutia a chhuak tur chu a ni Johny Lumbo chuan Puakruk ruai meuha a lo tih din tak.
* * * * * * *

       Saloon aṭanga Snap-a chhuah tum an tawh chuan, "Snap, khawng'e Jim?" Yorky chuan a han ti nghal a. A sawi zo hman ṭawk a, Silai a puak ṭhuai a, Silai mu chuan Snap-a ke bul chhuat chu a rawn verh sat a.

       "Snap Lunt, la chhuak mai bik suh, nang nen hian chin fel tur kan la nei," mi pakhat hian a han ti pawr chhuk a.

       Snap chu a han hawi let a, rui meng sen rum chunga Johny Lumbo lo dingin amah hmachhawna Puakruka a lo tin reng tawh chu a han hmu ta a. A ngawih ren rawn hnu-ah, "Lumbo, i ngam a nih chuan mipa takin inhmachhawn ang hmiang," a ti ve ta chhak a.

       Lumbo chu a nui huah huah a, "Ni lul e Snap," tiin a ṭhian te lam chu a hawi a, "Naute u, lo en ngun rawh u," a ti nghut a, a Puakruk chu a pai ṭha leh a. A ruih tawh avangin a fimkhurna chu ngaihthahin a awm tawh tih a hriat a, chuti ni lo se Snap Lunt-a hmaah a Puakruk a pai ṭha leh kher hauh lo vang le; chubakah a Puakruk a pai ṭhat leh mai danah, rang a inti ve tawkin Snap hmachhawn turin a inringtawk hle a ni tihna a ni thei bawk. "Snap, hmanah khan thi daih tawh tur i ni," a han ti leh hmuk a.

       Hemi te pahnih hi an lo inhmachhawn tawh a, chumi ṭum chuan Snap Lunt hi a muang zawk hret a ni mai thei, Johny Lumbo hian a kap fuh ta zawk a, thi tawh kalsanin a kalsan a ni. Chumi ṭuma an inhmachhawn chhan chu Snap-a ṭhianpa vang a ni a, chu thil a thlen hnu-a a khawsak zui dan aṭang chiah chuan a ni Snap Lunt hi Gunman anga mi ṭhenkhatin an hriat ṭan tak.

       An mitah tak inenin thawm chu a reh duk a, Saloon chhunga la awm ho chu hrilh chawp ngai miah lo hian Silai mu leng tawn palh hlauin an insaseng nghal a, a lo thlirtu ṭhenkhat tan chuan tunge rang zawk tih lo en chu thil phurawm tak a ni leh dawn a ni.

       "Tha ba ka rul dawn a ni, Lumbo."

       Snap chuan Lumbo ṭhian te chu a han en a, nichina Bar nghaktu Danny-a ṭhamtu Razo khawsa zia phei chu a duh lo hle mai a; mahse chutih lai tak chuan Belly kha a rawn inrawlh ve ta khauh a.

       "Midang kha, in lo inrawlh ve vaih chuan ka tel ve ngei ang," phur hmel zeta nui ṭha chung hian Belly chuan a lo ti a.

       Yorky pawh chuan, "Kei pawh," a lo ti ve nghal vat a.

       Lumbo ṭhian te pahnih pawh chu Belly leh Yorky avang chuan an tîm tih a hriat a, tel ve mai tum âwma an awm pawh chu an inthlah dul ta niin a lang. Tunah chuan Snap leh Lumbo chauh an ni ta.

       Chulai boruak chu a reh cool ruih a, mi pahnih te chu Silai phawi mai turin an inring dun em em tawh bawk a ni. A lo thlirtu ṭhenkhat te chuan thaw dep dep hian an lo thlir hlawm a, tu nge rang zawk ang tih chu an rilru-ah a awm deuh ṭhup vek mai a ni.

       Lumbo chu a'n meng deuh kawk a; chutah rang lutuk fahran hian a khel dinglama a Puakruk chu a phawi nghal a, Silai chu pakhat ri ang mai hian a ri rual ṭhawt a.

       A khingpuipain a Silai a chuh rual khan Snap pawhin a Puakruk chu a phawi dawk zawk a, a phawi leh a hmeh per chu a rual nghal a ni mai. A Silai mu chuan Lumbo lung zawnah a va verh sat mai a, ani chu chhuatah chuan a tlu hlawm nghal tawl mai a ni. Lumbo Silai mu erawh chuan a fuh ve ta lo. Muangchangin a mi kah hlum ruang chu a pan chhat chhat a, a kawrâwm chu a keu a, dim lo taka a thil awrhna hrui phih chah sawk pahin, "Hei hi i ta a ni lo," a ti sap a. Mi pahnih lam chu hawiin, "In ṭhianpa hi chhuahpui tawh rawh u," a ti bul leh hmak a.

       Chumi te pahnih chuan Lumbo ruang pawh ngaihven chuang loin Saloon chu an chhuahsan ta nghal a.

        Nui ṭha chung hian, "Rang kher mai a," Belly chuan a lo ti lang lang a.

       "Ranch rawn chhuahsan lo tur in ni asin. Ka ngaih a ṭha lo tlat, Jim zawng vat ila, a hma thei ang bera Ranch lama kir a ṭhain ka hria," Snap chuan a han ti a. Saloon aṭanga Johny Lumbo ṭhian te paruk vel an chhuah huk thu te chu a han hrilh ve a.

       Yorky leh Belly chu Sweet Valley lam panin an kir leh ta nghal a. Sudden-a zawng tur chuan Snap chu a chhuak nghal bawk a, darkar chanve hnu velah Lucky Chance Saloon aṭanga a chhuak tur chiah hi a va hmu a, a lam panin a kal nghal a; chutah a mak tih zawng deuh hian Sudden-a chu a che ta phut mai a. Sudden-a chuan a Puakruk a phawi dawk zawk a, a lam hawi chuan a Silai chu a rawn lek kawh mek a.

       Chutia Snap-a'n a rawn pan phei lai chuan Sudden-a chuan Snap-a hnunglama thil phe zeuh chu hmuin mak ti deuh tak hian a lo en tawh a; chu hlim thla chu mihring hlim thla ngei a ni tih a hriat rual chuan hlim thla chuan Silai a keng a, Snap chu tin zawnin kah a tum ngei a ni tih a hre thiam ta nghal a. Rang taka chein chupa chu  a kap ta thawr mai a ni. Mihring ṭe ṭhawm a ri ṭhat a, Snap pawh chu a inher ve nghal vat a. Sudden-a'n a kah hlum pa an han en chian nak chuan Big Ben Saloon-a Danny ṭhamtu, Razo kha a lo ni reng a, Sudden-a chuan a Hnarkawnah tak a lo verh siah a ni.

       Snap chu a ner nang nang a, "Dawihzep," tiin a phun sap a.

       Sudden-a hnenah chuan Saloon-a thil thleng te kha hrilhin khami vang kha a nih a rin thu a sawi a. Johny Lumbo nena an inhmachhawn thu leh a thah tak thu kha erawh a sawi tel lo thung. Thil awmzia a han sawi ta zel a, Ben Harvey mi leh sa ṭhenkhatin hmanhmawh taka Saloon an chhuahsan thu leh, chung mi te chu khuaah hmuh tur an awm tawh loh thu te, Yorky leh Belly pawh khuaa an rawn kal thu te, hmanhmawh taka Sweet Valley lama a lêttir leh tâk thu te chu a sawi kâi ta zel a.

       Sudden-a chuan, "Marshal pawh kha khuaah hian a awm hauh lo vang," a lo ti bauh a.

       Chutih lai chuan, John Denver-a chu an bulah a lo awm ve tawh a. Sudden-a te hnenah chuan Ben Harvey an Marshal Badge a dah tâk thu a han sawi a. Chu thu an han hriat phei chuan Sudden-a ngaih chu a ṭha zat tawh lo. "Snap, Sweet Valley lamah kan let vat a ṭhain ka hria," a han ti a. Denver-a hnenah chuan, "Marshal hna chungchangah ka rawn hmu leh mai thei che a ni," a han ti a. A Sakawr Blue Devil a dahna lam a pan zui nghal a.

       Sudden-a leh Snap Lunt chuan a zan a zanin Sweet Valley chu an pan ve leh ta nghal a ni.
* * * * * * *

       Ben Harvey-a'n Lucky Chance Saloon a chhuahsan hnu khan a Marshal Badge daha Marshal hna a bansan hnu-ah ama Saloon lamah a ho te zinga pakhat a tir nghal a. Johny Lumbo, Razo leh Dirty Wizard an tih te tih loh Saloon chhunga ami te kha chu an chhuak ta huk reng a, tichuan hmanhmawh zetin Sweet Valley lam an pan ta a ni.

       An va thlen chuan a lo reh ṭhiap tawh a, khawnvar erawh a lo la eng teng teng a, an Sakawr aṭanga an chhuk hnu-ah kawngka chu Ben Harvey chuan dim lo baksak hian a chum ta bur bur mai a.

       Matthew chuan kawngka chu a rawn hawng thuai a, chutih laiin Mrs. Nancy erawh chu hrilhhai zetin a awm a, misual ṭhenkhatin rawn tlawh zeuh zeuh mah se, tun ang zanah heti taka thawm na hian vawikhatmah a la rawn ṭhawng ngai miah lo a ni. A pasalin kawngka a han hawn ve leh chuan mi pathum hi kawngkaah chuan an rawn lang ṭhawt a, Matthew chu inchhung lamah an nawr lut rawk rawk a. Ṭhuthlenga dim lo zeta an nawr ṭhut hnu-ah, pakhat chuan a han beng zui nghek bawk a. Nancy chu a lo ṭe tuar a.

       Ben Harvey chuan ṭhut chilhin hnai set sawtah Mathew chu a han en run run a, rei deuh tak a melh hnu-ah, "Mathew, i Ranch tereuh te hi min lei tir mai rawh," a han ti ta nghut a.

       "Harvey, ka phal lo tih ka hrilh tawh che kha."

       Ben Harvey chu ngeiawm zet hian a nui vur vur a, "I hausakpui theih tur khawpin ka leisak ang che," a han ti leh hram a.

       "Engvangin nge he ka ram zimte hi i duh em em nachhan?"

       Ben Harvey chu a rûm nghut a, "Mathew, chu chu i hriat a ṭul lo, ka duh a ni mai," tih pahin a ding hluai a, a ho te chu a han melh kual a, "Tuna an awmna tih loh In dang zawng hi hal vek rawh u; hei hi a bulṭanna chauh a ni ang," a han ti leh a.

       Chu'ng mirawkrailo ho chu an nui khek uar uar leh phur zeta chhuakin, Chhek In, Sakawr Huang leh Sakawr chaw dah khawmna te chu an hal alh ta hluah hluah mai a. Matthew-a te tan chuan tih theih a vang hle mai, inchhungah a lut a, a Silai kawl ve chhun, .303 Winchester hlui tawh tak chu a va la chhuak a, hmanhmawh deuhin a rawn chhuak leh a; mahse Ben Harvey chuan ngun zetin a lo en chu niin, amah tin tuma Matthew-a'n Rifle a han lek kan veleh chuan rang zet hian a Puakruk a phawi a, Matthew-a Rifle vawnna kut chu a han kah sak a. Matthew-a Rifle chu a per lawp a, a kut chu a dawm chawt a; Nancy chu hlauthawng zet hian a ṭe tuarh a, zan thim hnuaiah chuan a dang sawp sawp a, a khur dar dar mai a.

       "Matthew, tunah chuan ka that rih lo vang che; mahse, hei hi warning hnuhnung ber a ni tawh ang. Sweet Valley hi chhuahsan rawh u, i mi chhawr te tan pawh," tih pahin Ben Harvey chuan a Sakawr a pawt her mawp a, a ho te nen chuan an tlan liam leh ta nghal a.

       Mei chu a alh hluah hluah a, mei eng hnuaiah Matthew leh Nancy te nupa, leh Putar Hodden-a chu beidawng deuh hian an ding a.

SUDDEN: CLEAR THE NAME
Author: Chhantea Pautu

Chapter Eleven

       Yorky leh Belly-a'n Sweet Valley an va thlen ve chuan a lo kang hluah hluah mai a, Ben Harvey leh a ho te pawh chu an va nang hman lo chiah chiah hi a lo ni a. A hnu lawkah Sudden-a leh Snap pawh an lo thleng zui ve nghal a. Kawtah chuan Yorky chu a lo ṭhu kun chal a, thil thlen dan vel chu kimchang deuh hian a lo hrilh a.

       Sudden-a'n In kang vel a han hmuh chuan a hmel chu a nelawm loh kher mai a, ṭawng miah lo hian thil kang bang vel chu a thlir vang vang a.

       Inthiam loh hmel zet hian Yorky chuan, "Jim, ka thiam loh a ni. He ta lo awm tur hi kan ni a," a han ti a.

       "Yorky inthiam lo lutuk suh. Khawiah nge Matthew hi a awm," Sudden-a chuan a han ti a.

       "Inchhungah a awm."

       Inchhungah an lut a, Sudden-a chuan Matthew-a hnenah, "Matthew, Ben Harvey-a'n helai ram a duh tlat nachhan hi min han hrilh teh, chhan ṭha tak a awm ngei tur a ni," a han ti nghal a

       Matthew chu engmah sawi lo hian a la ngawi tlat a, a hmel chu sawi tur nei, sawi hreh deuh si ni hian a la lang a. Mahse a nupui chuan, "Matthew hrilh mai rawh, kan buaina hi ka ning tawh em mai, anni hian min pui thei maithei asin," tiin a banah a han vuan a.

       Matthew chu a la ngawi reng a.

       Sudden-a chuan Matthew chu a mitah tak a han en a, "Matthew, Sudden-a an tih ṭhin hi i hre tawh ngai ang tiraw?" a han ti a.

       Mathew chu a rawn hawi chhuak a, chu hming chu hre lo an awm lo tih theih a ni a, misual rual a chimih dan leh hmun hrang hranga buaina a chin fel dan te chu mi ten an sawi nasa ṭhin hle a, Hell City a chin fel dan te phei chu a hre tawh phawt ten huaisenthlaka an sawi a ni.

       "Hria e; mahse kan buaina nen han sawi pawlh chhan tur eng'e awm a?" Matthew chuan a han ti hâ a.

       "Kha Sudden-a kha ka ni; chu chu tuna i buaina nen ka sawi pawlh chhan tur chu a ni ang."

       Chu thu Sudden-a'n a han sawi chuan Matthew-a chu a kâ ta hau mai a, Belly thung chu phur hmel zet hian a lo chek tlak tlak a, an awmpui Putar Hodden-a kha erawh a lo nui var var a; ani hi chuan Sudden-a a hmuh tirh aṭang reng khan mi eng nge maw tak a nih a lo ring sa tawh a.

        Matthew-a mak ti hmel chu pawisa lovin Sudden-a chuan a han sawi zawm a, "Texas-ah hian tih tur pathum neia rawn kal ka ni. Pakhatna chu Texas State huam chhunga ka hming thang mawi lo ṭhin hi Law Officer leh Gunman dang ho laka thai bo ka duh vang a ni a. Pahnihna chu Arizona Governor Mr. Bleke thurawn anga Texas Governor Mr.  Edmund Jackson hriatpuinaa Del Rio khua then fai a ni. Matthew min ring ngam chiah lo tih ka hria, mahse he lai buaina hi a alh chhuak tawh a nih hi, engkim min hrilh a ngai a ni. Tichuan, ka tih tur pathumna, ka ngaipawimawh ber tur chu in ṭhianpa Jim Silver-a, mi ṭhenkhatin hre chiang lo va keimah emaw an lo tih ve ṭhinin min ngen anga helaia inbuainaa ṭanpui tur che uin a ni; chu chu ka tih ngeina tur chhan ṭha tak a awm bawk," a han ti a.

       Matthew chuan, "Eng'e a chhan chu?"  a lo ti khauh a.

       Sudden-a chuan, "Silver-a sawi kha a dik chuan, i nupui Nancy Petterson hi ka unaunu a ni," a ti ta a.

       Chu thu a han sawi veleh Nancy chuan mak ti zet hian a rawn en ta kal mai a, chu thu chuan a ṭhawng pawh a ni mahna. Sudden-a Texas rama Outlaw hmingthang tak, Puakruk phawi rang leh kah thiam ber mai nia an sawi chuan a unaupa a nih thu a sawi zo chiah tlat a ni.

       Sudden-a chuan Nancy nena an inlaichin dan Jim Silver-a'n a sawi kha muangchang hian a han sawi fiah ta zel a, a sawi zawh chuan, "Chu chu a dik em Nancy?" a han ti a. Nancy chu a lo bu nghat a, mak ti deuhin Sudden-a chu a la en reng mai bawk.

       Tumah chu an ṭawng lo va, chumi hnu-ah Sudden-a bawk chuan, "Matthew, min rin a ngai a ni. Ka tih tur pathum chu helai chhehvelah hian ka ti thei dawn a ni," a han ti leh a.

       Matthew chu a han thaw halh a, muangchang hian Ben Harvey-a'n Sweet Valley neih a tum ruh em em nachhan nia a rin chu a sawi ta a, a sawi zawh chuan, "Kei pawhin a awm ngei tih ka hria a; mahse lehkha pawimawh tak pakhat a bo daih mai a, lehkha a bo aṭanga karkhat hnu lawk aṭangin Ben Harvey hian helai ram hi lei mi rawn dil ṭan ta a ni. Lehkha bo kha a nei a ni ngei ang," a han ti ta a.

       "A awmna hmun chu i hre lo em ni?"

       "Hria e, mahse tumah min ṭanpuitu tur an awm dawn loh avangin ka khawih ngam rih lo a ni; tin Ben Harvey hian a awmna chu ka hria tih a la hre lo va, ka hre ve tih a hriat hi ka hlau hle bawk a, a hriat chuan min that nghal duh mai dawn bawk tih ka hre chiang a ni."

       "A ṭhat chu, engmah kan sawi chhuak rih tur a ni lo; keima'n hun ka tih hunah BB Ranch-ah chuan ka kal ang," Sudden-a chuan a han ti ta a.
* * * * * * *

       Sweet Valley-a hal a nih aṭanga ni thum a liam chuan Sudden-a chu Del Rio ah kalin John Denver-a a va hmu a, Marshal hna chu thawh a duh thu a va hrilh a ni. Ani chu a lo phur ngang mai a, khuaa mi pangngai deuh deuh ko khawm nghalin ama Saloon-ah khaw mipui te nen an ti fel nghal ta bawk a. Marshal hna chelh tuma khua a pan leh hma hian Sweet Valley-ah buaina tenau an tawk leh a, mahse, hliam emaw, thihna emaw an tawk lem lo a, anmahni rawn ti buaitu mipahnih chu an kap hliam thung.

       San Angelo Sheriff pawh Jason-a'n a kahna hliam kha a dam fel tawh avangin Del Rio chu chhuahsan a tum ta a. Marshal thar chu dusakna a hlan a, "Jim, he khua hi han thian fai teh khai," a han ti a. Cole Griffin nen chuan San Angelo lam panin an Sakawr chu an kheng kal ta a ni.

       Sudden-a'n Marshal hna a thawh ni-a a thil tih hmasak ber chu BB Ranch tlawh a ni. Deputy atan Yorky leh Belly a hmang a, Sweet Valley-ah pawh ama thu rawn angin mi rinawm tak tak nia a ngaih hnathawktu pathum lak belhin Bawng vulh tur an lei belh nghal a, chulam chu Snap Lunt-a'n a enkawl thung a; Sudden-a hian Sweet Valley rawn chuh buaitu te hnenah insawh ngheh deuh deuh an tum a ni tih chu hriat tir ngei a ṭul a ti tlat a.

       BB Ranch chu amah chauhin a pan a, Yorky leh Belly chu khuaah an awm thung a, Yorky chuan zui ve tum viau mah se, a rem ti lo va. Ben Harvey Ranch a va thlen chuan a neitupa pawh chu a lo awm a, nelawm loh tak hian a lo melh khui khui a, Cowboy ho chu hnathawkin an chhuak a ni ngei ang, BB chu a lo reh hle mai a.

       "Hetah eng'e i rawn tih?" Ben Harvey chuan a lo ti nghal hmuk a.

       Sudden-a chuan, "Mr. Harvey, Law Officer ten boruak ralmuanna tura an hmalak ṭhin dan hi zah turin ka rawn hrilh dawn che  a ni," a lo ti ve nghal hmiah a.

       Ben Harvey chuan Sudden-a kawr âwma Marshal Badge, Arsi lem intar chu a han melh rulh a; ngeiawm zeta nui chung hian, "Marshal, eng thu chu nge i sawi ang a?" a han ti leh buk a.

       "Mr. Harvey, hei hi a ni..." tiin Sudden-a chu a han ngawi dat a, "Sweet Valley saw ti buai tawh miah lo turin ka hrilh che a ni?" khal zet hian a han tih zawm a, a aw chu a changin a ti mai mai lo tih a hriat hle.

       Ben Harvey hmel chu a dur khup khup a, "Marshal, awn lam nei sa tûnin dan ken kawh i tum a ni maw? I lo inrawlhna tur chhan a awm lo vang," a ti bung nghut a.

        "Awm e, ka la inrawlh dawn chauh. Mr. Harvey, awn lam ka nei miah lo bawk, kawng dik lam ka zawh mai zawk a ni, Sweet Valley-a awm te sawn i pawi an sawi lo. Hei bak hi ka sawi nawn tawh lo vang," Sudden-a chuan a lo ti ve leh hmiah a.

       BB Ranch neitupa chu a thinrim takzet tawh a, tunhmaa pa dawhthei tak ni ṭhin kha a thil duh neih ngei a tum luatah a so sa bulh tawh ni berin a lang. A rilru chuan Silai chuh a, a hma ami chu kah leh tawp mai hi  a duh tawh a ni; mahse Sudden-a chu a han en a, a mitmeng leh chezia a en leh chuan Silai chuh ngawt mai chu a ngam lo a. Del Rio khaw Marshal chu hahdam hmel taka awmin a inring em em lah tak a, Ben Harvey mitah tak chauh chuan a melh ngar mai a, a chezia leh rilru engkim chu hmu tlang veka hre tlang vek ni mai hian BB Ranch neitupa chuan a hria a ni.

       "Mr. Harvey, Gunman, dan pawna hnawl tawh i chhawr ang tih chu ka ring thiam mai a; mahse, Black Curse Jason saw i chhawr tih ka lo hre miah lo va," Sudden-a chuan tih leh pahin a mit chu a han la sawn zawk a, Ben Harvey mit chu a en leh vat a.

      NChutih lai chuan, Jason Curse chu Ranch tualzawlah a rawn chhuak phei mek a. Sudden-a chu a han ding a, "Ka sawi nawn tawh dawn lo ka tih kha," tih leh nghat pahin a Sakawr lam chu a pan ta a. A Sakawra a lawn kai fel chuan Jason pawh chuan a bul a rawn thleng ve tawh a.

       Jason Curse chuan Sudden chu ngun deuh hian a lo en a, a kawr âwma Marshal Badge chu a en leh hnu-ah, "Marshal i lo ni ta a ni maw?" a han ti sap a.

       Sudden-a chuan nui chung hian, "A nih hi Mr. Curse; tichuan ka thuneihna huamchhungah buaina ka duh hauh lo vang," a han ti chhak a, a chhan lehna pawh ngaihsak lo hian a Sakawr Blue Devil chu a kal tir ta nghal a.

       Jason chuan a enzui vang vang a; a rilru tak chuan Sudden-a'n a hnungchhawn nghal mai chu huaisen a ti hle a; Marshal chu a phawi khalh dawn leh dawn loah engmah rin dan a nei lo va, hepa hmingthang tak hi chu inhmatawn ngei leh fair taka hmachhawn a duh ve tlat a ni. Hnunglam aṭanga kap mai lo va, inhmatawn ngeia a hmachawn a, Sudden-a hi a phawi khalha a that thei a nih ngat chuan a hming a chher hle dawn si a; chu chu Gunfighter lar ṭhenkhat te duhthusam chu a ni.

        Zanah chuan Sudden-a chuan khua a fang kual a, Saloon pathum te chu a lut lawr a, a hnuhnung berah Lucky Chance Saloon chu a lut a, Saloon-ah chuan Double D Cowboy panga vel hi an lo awm a, an hlawh lak an chèn a ni ngei ang, Card dengin Dawhkan an kil a, zuin tur an inchhawp bawk a, an lo beng chheng hle nghe nghe a. Heng Cowboy te hian Del Rio khuain Marshal thar an neih thu hi an lo hre tawh a. He khua hian Marshal an nei rei ngai lo va, Marshal lo ni tawh te pawh khan Cowboy pawr deuh leh Gunman te kut an tuar fo tawh reng a. Ben Harvey khan a hma aṭanga khua hi a thunun deuh ṭhin tawh avangin Marshal a han nih pawh khan mi pangngai leh Cowboy te chuan harsatna an siam lo khawp mai a; mahse ama chhawr te bawk hi khuaa mi pangngai te tana hnawk chu an ni si.

       Marshal thar chu an hmuh hma hauhin Double D Cowboy ho chuan han chhaih deuh an tum tlat a; Sudden-a Silai phawi lai tak hi helai vel ami te hian an la hmu hauh lo va, an tan chuan mikhual a la ni ve mai rih a ni. Double D Cowboy ho zingah chuan hrang deuh tak hian Sudden-a ten Sweet Valley an pan dawna an hmuh thinchhiat hmel deuh pawh kha a awm ve bawk a, a ṭhut hran hma chuan thil eng emaw hrilhin a ṭhian te chu a bekbawr sur sur a.

        Saloon chhunga Sudden-a a han luh chuan chung Cowboy ho chu an lo ngawi ṭhap a, an lo en ṭhap bawk a, pahnih khat chu an phun sap sap a. Boruak inmung dan àwm ang chu hre thiamin a inhria a, a han nui sak a, Bar lam panin a kal nghal a, Mina-i hnenah chuan hawihhawm deuh hian, "Ka Pi, min han thlit ve dawn lo'm ni?" a han ti a.

       Lucky Chance Saloon neitunu chu a nui sèih a, "Jim...ahh...Marshal, min pi duh lo teh," tih pahin a han thlit sak a; chutah thu tak zawk hian, "Sawlaia Double D Cowboy ho sawn fiam che an chak riau a nia...Marshal, ka Saloon-a inthahna a awm ka duh lo a ni," a han ti leh.

       Sudden-a chu a nui mai a, "An duh ang chu kan tihtir mai a ngai a nih chu; mahse lungngai suh, tumah an inthat lo vang," tiin a han ṭawng thlamuan a.

       Mina-i hlauhthawn ang thil chu a thleng ta mai lo va, Saloon chhung boruak pawh chu a pangngai hle mai a, Sudden-a pawh chuan muangchanga zu chu in pahin eng emaw a thlen takin tih thu ah chik takin Saloon chhunga awm te chu a thlir kual reng tho a.

       Saloon-ah chuan Cowboy pathum hi an rawn luh belh leh a, rawn lut thar pathum te chu Double D Cowboy awm khawm zinga pakhat chuan a han melh zawk a, a hawi let leh vat a. Chutah, "Tunlai hian Ranch pangngai tak hrulah ram zim te neiin mi ṭhenkhat hi biak an har viau asin, Rinkie," tiin a ṭhian pa chu ring lenglawng, lo lut thar te hriat ngei tur chuan a han be lang lang a.

       Rawn lut thar zinga pakhat, a upa ber àwma lang chuan, "Ṭawng fimkhur deuh rawh Kyle," lo tih khauh pahin a han melh ngar mai a, chumi zawhah Bar lam panin a hnungchhawn leh ta mai a.

       Dawhkan beng ri dawp leh, ṭeng deuh chhaka, "Stravius, ka fimkhur a ngaihna ka hre lo, in pu Zuck Ork kha mi nikhualo tak a ni," tih ri chuan a hawi let tir leh ta a ni.

       'Kyle' an tih chuan Puakruk hi a lo hum sa reng tawh a, Puakruka tin a ni tih a han inhriat chuan 'Stravius' a tih, Big Folly Cowboy chu a thinrim hle tih a hriat a, che lo leh ngawi ngal hian amah Silaia tintu chu a melh ran mai a.

       Sudden-a chuan chumi te chezia chu a lo thlir ruk reng avangin a hun taka inrawlh turin a inbuatsaih ve a nghal a, inhmachhawn te inkar lam panin a pen phei nghal a, chumi te pahnih en tawn chuan a nui deuh hlek a. Double D leh BB Ranch hnathawk ṭhenkhat hian inzawm rukna an neih a ring tlat a, chu chu hmuh chhuah a la tum thuai dawn a ni.

       "Naute u, zaninah tumah he Saloon chhungah hian in inkap dawn lo. Nang kha, i Silai kha a bawmah khung ṭha rawh," tih pahin Sudden chuan Double D Cowboy chu a han melh a. Saloon chhung ami te chuan Marshal thar lam chu an hawi ṭhup a.

       Thinrim zet hian chu Cowboy chuan, "Lo inrawlh suh Marshal, ka kut i tuar tel palh ang'e," a lo ti ve hmak a.

       Sudden-a chu a lo nui mai a, "Ṭhiana i rui tawh a nih kha, huat thu zawn chawp ngawt chu a hrisel lo a nia, ka thu sawi chu zawm zawk mai la a ṭhat ka ring," a han ti a.

       Chu Double D Cowboy chu a rui tawh tak tak reng a, thinrim zet hian Sudden-a chu a han en a, "Marshal thar satliah...nang..." tih pahin Stravius-a a tin lai chu Sudden-a lamah a han lek sawn a.

       "Han hmet per chhin ta che, Naua."

       Chu aw vawt reih rawih chuan Kyle-a ngaihtuahna chu a ti chawl ṭhup a ni ber mai, a aw chu ring lo hle mah se a sawituin a sawi chhuah dan kawngah chuan awmze thûk tak a nei tih a hria a; thihna rim a nam tlat! Silai hmeh per reng reng chu a tum lo, an chhaih châk Del Rio Marshal thar chuan Puakrukin a lo tin reng tawh a, ani chuan tin pawh a la tin zawn hman si lo. Sudden-a chu en ṭhup mah se tuma'n a Puakruk phawi lai reng reng an hmu hman lo.

       Kyle chuan Marshal mit chu a han en chiang a, tunah chuan la nui deuh mah se, a hmelah nelawmna reng reng a lang tawh hauh lo. A tirilah hlauhnain a rawn tuam a, chu a chhapah, "Han hmet per ta che," a lo ti nawn leh ta nghal a; mahse a Silai chu hmeh per reng a la tum lo.

       Sudden-a nui hmel chu a reh a, àwkâ nelawmna tel miah lo hian, "I silai kha thlauh rawh Naua," a han ti leh ta a.

       Kyle chuan rang deuh hian a Puakruk chu a thlauh ri bawl a, Sudden-a chuan a va pan a, a kut veilam chu a phe vuai a, Kyle-a biangah chuan a han beng chawrh a, a Puakruk thlauh chu a chharsak a, "Zaninah Silai tel lovin i haw ang," a han ti zui leh zat a. Double D Cowboy ho chu a han melh kual a, "Zanin atân chuan in awm rei tawk tawh. Khua hi chhuahsan rawh u, nidangah chuan buaina siam inpeih sain khuaah in rawn kal tawh tur a ni lo," a han ti ram leh hmak a.

       Double D Cowboy ho chu an chhuak ta zal zal a, hmana  Sweet Valley an panna kawnga Yorky nena an hmuh tawh, pa thinchhiat hmel zet kha a la awm a, Sudden-a chuan, "Nang pawh, i ṭhian te kha zui ve ta mai che, tel vena i nei tih ka hria a ni," a han ti a. Chupa chu luhlul awm zet hian muangchangin a tho a, chhuak tura titu chuan a ti mai mai lo tih a hriat avangin zawm loh erawh a ngam lo.

       An chhuah hnu chuan boruak chu a pangngai leh thuai a, phun sap sap chungin Saloon chhung ami te chuan Sudden-a chu a en hrak hrak a, an Marshal thar chet dan chuan a hneh hlawm hle a ni; a ṭhen hi chu Jason nena an inhmachhawn lo hmu tawh tu te kha an ni nghe nghe.

       Big Folly Ranch Cowboy fiamthu duh zet mai Collin chuan, "Rang kher mai, khati ang taka Puakruk chelek rang kha ka la hmu hman miah lo," Stravius hnenah chuan a han ti sa sa a, a nui vur vur a.

       Sudden-a pawh chuan Big Foly Cowboy ho chu a rawn fin ve nghal a, an Ranch chungchang leh Kyle-a thu sawi te chu a han zawt thuphung a, anni pawh chuan an hriat ang ang chu ṭha deuh hian an lo hrilh ve bawk a; a remchan huna thil thlithlaia la kal ngei a tum ta a ni.

SUDDEN: CLEAR THE NAME
Author: Chhantea Pautu

Chapter Twelve

       Sudden-a Marshal a nih hnu nithum tukin Puck Parson chu Marshal Office-ah a rawn kal a, a hmel chu a lungngaih hmelin, a lungngai hmel phenah erawh thinrimna hi a hmuh theih bawk. Hmun dangah a mimal thil avangin a kal bo va, Sudden-a Marshal-a a ṭan hma ni mai khan Del Rio hi a rawn lut leh ta chauh a ni.

       "Marshal, Jim Silver-a ruang Sweet Valley thlenpuitu niin ka lo hria che a?" Puck Parson chuan a han ti nghal tawp a.

       Sudden-a chuan a lo melh vang vang phawt a.

       Puck Parson bawk chu a han ṭawng leh a, "Marshal, ka ṭhian ṭha tak a ni a sin. Dawihzep taka amah thattu hi tu pawh ni se Puakruka hmachhawn ngei ka duh a ni," a han ti leh a.

       Sudden-a chuan a rilru tur awm ang chu a hre thiam hle mai a, inṭhian ṭhatnain thil a tih theih zia leh a nghawng a nat dan te pawh a lo hre ve tawh a, chupa chu a ṭhianpa thattu zawn chhuah kawngah a theihtawpa puih a tum nghet ta tlat a ni. "Mr..."

       Parson chuan, "Puck Parson ka ni," a lo ti vat a.

       Sudden chuan, "A nih leh Mr. Parson, i rilru tur âwm ang chu ka hre thiam khawp mai, theihtawp kan chhuah ang chu," a ti ve ta a.

       Puck Parson chuan, Del Rio a lo luh lehin Jim Silver hmuh ngei a ngaih avanga khawchhunga a zawn thu te, a hmuh mai loh avangin Sweet Valley lamah a kal a nih a rin thu leh, a tuka chutah chuan a va zawn thu te; mahse Nancy Petterson chuan a thih tawh thu leh a thih dan a hrilh tak avanga lungngai leh thinrim taka a awm thu te chu a sawi a, Sweet Valley hmuna amah phur luttu hnen aṭanga thil eng emaw hriat a beisei avanga Marshal Office rawn pan a nih thu te chu a sawi kai ta zel a.

       Sudden-a pawh chuan Jim Silver-a an lambunna hmuna Rifle Cartridge ruak a chhar thu te, an hnuhma hnutchhiah aṭanga mipahnih an nih a rin thu te leh a kap hlumtu zinga tu emaw chuan Spur a ti tla ngei a, chupa chuan tun thlenga Spur pangkhing tel lo va pheikhawk a la bun reng a rin thu te chu a sawi ve bawk a.

       Puck Parson chu a lo bu nghat nghat a, a hmelah chuan tumruhna leh thinrimna hi a lang kawp a, Sudden-a lam chu a han hawi a, "Marshal, ka lawm e, kan hmu chhuak ngei tur a ni," a han ti nghut a

       Sudden-a pawh chuan hre thiam tak hian, "Ka kutah dah mai rawh, ka hmuh chhuah chuan a phu tawk chu a hmu ngei ang," a han tih hnu-ah, "Kan thudang alai chuan, Mrs. Nancy te sawn puih an ngai ngawtin ka hria, Sweet Valley sawn ti buaitu an nei deuh reng a, nang ang mi rintlak hi chu Snap Lunt sawn thawhpui a chak ngawt ang," a han ti leh a.

       Puck Parson chuan, "Ka lo inngaihtuah ang'e Marshal," a han ti ve a, Sudden-a chu a chhuahsan ta a ni.

       Nikhat chu Sudden leh Yorky chuan Big Folly Ranch an tlawh a, chu Ranch chu a lian lo hle a, hnathawk pawh Cowboy pali chauh an ni a, a neitupa Zuck Ork chu pa lian pui mai, kum 50 mi vel, zaidam hmel deuh leh mitmeng rinawm zet mai hi a ni a. Sudden-a te lo kal chu hlim hmel zet hian a lo chibai a, "E khai, Marshal in rawn kal chu ka va lawm em. Ka nauten Lucky Chance Saloon-a i chet dan an sawi a, Clumsy Collin-a phei chuan i Silai phawi lai a hmuh hman loh thu a sawi uar khawp a nia," a lo ti huah huah a.

       Inchhungah an lut a, titi khawchang an sawi dun viau hnu chuan Sudden-a chuan an titi a thlak thut a, "Mr. Ork, helai i ṭhenawm te hnen aṭang hian harsatna i tawk deuh ṭhin niin ka lo hria asin," a han ti thut a.

       Zuck Ork chu a ngawi vung vung a, a tawpah chuan, "Ni e Marshal, a chang hi chuan kan duh rum law deuh fo mai; Double D lam hian an ram zau tak hi zau an la ti tawk lo deuh ṭhin a ni," a han ti dam duai a.

       "I Bawng a bo ṭhin em?"

       "Bawng hi chu a bo meuh lo; Maxican ṭhenkhat erawh chuan min ruk sak zeuh zeuh. Kan harsatna ber zawk chu ṭhenawm te nena ram inchuh zawk hi a ni."

       "A nih tak chu, eng pawh ni se Mr. Ork, in ṭhenawm Ranch pawh chu ka tlawh ve nghal teh ang. Del Rio hnaiha awm Rancher te hi tlawh kim vek che u ka duh a, helai velah hian Outlaw leh misual an tam hle a, buaina hi ka thuneihna huam chinah ka duh dawn lo a ni, min thlawp ngei ka beisei khawp mai," tiin a han ding hluai a.

       Zuck Ork chuan, "Tehreng mai Marshal, dikna lama ṭan hi chu khawthlang mi dik tak te rilru put dan tur a ni e," a han ti ve a.

       "A nih leh le Mr. Ork," tiin Sudden-a chuan a lukhumparh tlang chu chibai buk nan a han khawih zauh a.

       Big Folly Ranch neitupa chuan Sudden-a te kal liam ta chu a thlir zui vung vung a, "Collin-a sawi kha a dik a nih ngat zawngin, Del Rio chu a danglam chak kher ang," ama hriat tham lekin a ti sup a.

       Sudden-a te chuan Double D Ranch chu an pan leh ta a, hnim buk ṭawi lii laih awmna hmun hi an kal pel mek a, Big Folly nena an inrina an pel fel tawh tihah chuan an hmalam la hla deuh hlekah chuan mei khu hi a zam chiai chiai a, "Tirawh Yorky, i va pawh chhin teh reng ang," Sudden chuan a han ti a, an Sakawr chu chulam pan chuan an tlantir ta nghal a.

       An va thlen chuan mi pathum hian Bawng no, ram tla ṭan tir rual vel khelah hian thir lingin Double D chhinchiahna an lo chhu mek a. Chulaiah chuan bawng 20 vel hi a lo awm a. Mi pathum te chuan Sudden-a te lam chu an rawn hawi ṭhap a. Pakhat chuan, "Hetah...kan ramah hian eng'e in lo tih," a lo ti hmuk a.

       Chupa ṭawng dan leh a hmel a han hmuh chuan, Sudden-a chu a nuih a za deuh hlek a; mahse nui chhuak ta lo chuan, "Ranch kan han tlawh kual mai a nih hi," a han ti thung a.

       Chulaia lo awm te chuan an lo lawm hmel viau loh; mahse Marshal Badge an han hmuh chuan engtin emaw riau hian an danglam hian a hriat a.

       Sudden-a bawk chuan, "Bawng chhinchhiah vel chu in hnehsawh hmel hle mai," a han ti satliah a, "In pu hmuh ka duh a, In Ranch lam min kawhhmuh theih chuan a lawmawm lam a ni ang," a han ti zui a.

       Pakhat chuan, "In hmalamah khan kal zel tur," a lo ti nghat a.

       Chutah, "Delreido, nichina Bawng note tlan daih kha va khalh kir leh teh," tiin pakhat chuan an zinga Mexican pakhat chu a han tir a.

       Mexican pa chu phun deuh nung nung chungin a Sakawrah a lawn kai a, chutia a phun nung nung chu amah tirtu pa chuan a han zilh zui a, "Phun khanglang ziah lo teh, i Sakawr dul te kha i kheng ri leh dup dup ang'e, mahni Spur tih tlakna hmun pawh hre hlei lo, nep thei ve si," a han ti leh hrep a.

       Chu thu a han sawi rikah chuan Sudden-a chuan Mexican pa lam chu a hawi vat a, "Mr. Delreido Meizial mi lo ṭheh teh, ka lo keng hauh lo mai," tiin a han pan hnai a.

       Mexican pa pawh chuan Meizial chu a lo ṭheh ve mai a; mahse Sudden-a hian Meizial a pai reng a, pakhatin Spur chungchang a sawi avang khan, Mexican pa Boot bun leh a Sakawra a Rifle dah chu en chian tumin chhuanlam a siam zawk a ni. Ngun deuh hian a thil hmuh duh chu a en chiang hman ta reng a, chumi zawhah Yorky nen chuan Double D Ranch House lam chu an pan leh ta a.

       Double D neitupa chu tlangval la naupang tak leh hmel fai vengvawng tak hi a ni a, bathlarah hian Cowboy upa lam, phakar hmel deuh leh, thinchhiat hmel deuh hi a lo awm bawk a, chupa chu Sudden-a chuan a vawithum hmuhna a ni. Sweet Valley an pan ṭum leh, Lucky Chance Saloon leh tunah hian.

       "Mr. Brad Cart i ni ang chu maw? Kei hi Del Rio Marshal ka ni a, ani hi Deputy," tiin Sudden-a chuan a han inhmelhriattir a.

       Double D neitupa chu a khi suk a, "Marshal, hetah eng'e i rawn tih ve chu le? Mikhual tharlam hi kan lawm mai mai ngai lo khawp a nia," a lo ti khauh a.

        A chhan dan chu a hawihawm loh em avangin Yorky chu a lo thinrim hle a; mahse Sudden-a chuan eng vaka ngai awm lo tak hian a lo nui mai a, "Mr. Brad, Del Rio leh a chhehvelah hian buaina ka duh lo tih hrilh tur chein kan lo kal mai a nia, midang, i Rancher pui te pawh ka hrilh vek dawn," a lo ti ve ta hmiah a.

       Brad Cart chu a lungawi loh hmel kher mai; mi hawihawm lo tak te hian hawihhawm lo taka dawr hi an ngaina lo hle ṭhin reng a. "Marshal, i hawihhawm lo hle mai," a han ti a.

       "I inleng te i dawr dan kha han chhut chiang deuh la a tih chi ngawt zawk ang," Sudden chuan a han ti leh a.

      Sudden-a ṭawng dan avang chuan Brad Cart chu a meng nur nang a, a bula mi chu a han melh ralh a, "Draco, kan inleng te hian min kalsan se a ṭha zawk ang tiraw?" a han ti nghat a.

       Chupa, Draco tia a koh chu a rum nghut a.

       Chutah, Puakruk a rawn ri thawr a, Brad Cart kut chuan a Puakruk paina chu a ten ta riau emaw tih mai tur hian a per lawp a, hlau em em hian a dâng ta sawp sawp a.

       "Mr. fimkhur deuh tawh la a ṭha ang," Yorky chuan a lo ti chhak a, a Puakruk chuan a tin ta ran mai a.

       Sudden-a pawh chuan Droco lam hawi chuan Puakruk chu a lo lek reng tawh a, nui suk pahin, "Yorky, i ti ṭha e," a han ti zet a, Draco lam chu hawiin, "Foreman i ni ngei ang chu maw?" a han ti a.

       Chupa chu a rum nghut duh chauh leh pek a.

       Yorky-a'n Brad Cart ṭawng dan leh chezia a hmuh khan rang lutuk hian a Puakruk a phawi a, a Silai dap a tum mek chu a Puakruk pai lai chu a va kah sak hi a lo ni.

       Silai ri avanga Cowboy lo pung khawm ho chu rum deuh hian Sudden-a chuan a han melh a, "In vaiin hre rawh u, helai chhehvelah dan bawhchhiaa buaina ka duh dawn hauh lo a nia, khuaah phei chuan buaina in siam tawh tur a ni lo vang," a han ti fiak ṭhak a, khaw lam panin an tlan liam leh ta a ni.

Del Rio chhehvela Ranch ho chu an tlawh kim ta vek a. Sudden-a chuan Ranch lian pahnih te chu buaina bul ber niin a hre ta bawk. Ben Harvey Ranch-a thawk misual rual leh Double D Ranch-a thawk ṭhenkhat te hi chuan inzawmna eng emaw tak an nei ngei a ni tih a hre chiang ta a.

       "Yorky, Brad Cart kha eng'e i hmuh dan?"

       "Jim, Kei ang bawka naupang, fing lo deuh a ang."

       "Chu midang fuihpawrh leh khalh kual mai theih a ni i tihna em ni?"

       "Aw, a ni ngei ang, a Foreman khan a duh duhin a ti kawi mai mai theiin ka ring."

       Suddena chu a nui ta hak a.

SUDDEN: CLEAR THE NAME
Author- Chhantea Pautu

Chapter Thirteen

       BB Ranch-ah chuan mi ṭhenkhat an inhmu khawm a, an chet lak dan turah ruahmanna an nei a ni, Ben Harvey hi Ranch neitu ber ni mah se, engkim ruahmantu a ni hauh lo va, a ruka thil ṭha lo tih leh Silai chelek a ngaihna chi-ah chuan Jason Curse-a'n ruahmanna a siam ṭhin. Mahse Harvey hian Sweet Valley neih a tum tlat tih leh a chhan hi an hriatpui kilhkelh lem lo, mipakhat chauh lo chuan.

       Double D mi chhawr zinga mi pathum te pawh an awm a, Ben Harvey chuan Sweet Valley beiha Nancy ruk chhuah a rawt mauh mai a, ṭhenkhat an  phur viau laiin ngaihtuah thui deuh ho chuan an duhpui vak lo thung. A duh vak loh zingah chuan Jason pawh a tel a, a ṭhian te hnenah chuan Sudden-a an buaipui mek a ni tih pawh a la sawi duh ta chuang lo va.

       Ben Harvey chuan a thu chu tih tluk ngei hi a tum bur mai a, tun hnaiah a tum anga thil a kal theih loh avangin a dawhthei lo em em mai a, ho tèah huat tur a zawng a, a âng tun tun reng mai lehnghal a. "An Marshal thar khi kan dah bo a ngai a ni, a inrawlh chikim tawh lutuk mah mah, helai vela Rancher te hnenah kal kualin a dan ken kawh a tum thu a sawi ve ngawt mai. Rancher te hi a thu thu-a awm tur kan ni lo tih hi kan hriattir a hun a ni," a ti pung pung mai a.

       An zinga pakhat Bob Trence an tih chuan, "Ben, nang ai chuan Marshal hna a tlin zawk a ang, a la thawh rei loh nen, khawchhung saw a thunun riau tawh asin," a lo ti zauh a.

       Ben Harvey chuan a lo melh rum ul mai a, "Nangni dan pawna hnawl misual ho phiangsen vang hian alawm Mrshal hna kha ka tan thawh a buaithlak, fing lo takin buaina in siam a, man loh hram dan che u ka ngaihtuah a ngai ziah a ni," a lo ti hmuk hmuk a.

       Chupa chu a ngawi ta dak a. Ben Harvey thu sawi hi a dik chiah reng a, Marshal a nih chhung khan heng ho vang hian Del Rio khawchhunga mi pangngai te lakah a zahawmna a hloh hle hman a ni; buaina an siamin a lehlamah a mi chhawr te an ni si a. He a buaina hi Jason Curse leh an Chief ber hnenah pawh a sawi tawh a, Jason-a'n San Angelo Sheriff thah a tum zan khan, Jason-a zawk chuan a thah ngei a rin avangin a Marshal nihna pawh a bansan ta a nih kha.

       An zinga Cowboy upa lam deuh, fin hmel tak, Meyer chu muangchang hian a lo ṭawng ve charh charh a, "Marshal saw kan buaipui dawn a nih chuan fimkhur a ngai khawp ang, ka hmuh tawh hnu a ni ngat mai, vawihnih ka hmu tawh a ni," a lo ti ve a.

       Beneto chuan, "Meyer, tunge a nih i hria em ni?" a lo ti vat a.

       Meyer chuan, "Ka chiang ngam chiah lo, a rei deuh tawh a, ka vawikhat hmuhna chu New Mexico-ah mi pakhatin a Puakruk phawi lo thei lovin a nawr lui a, chupa nen chuan an inbei ta a ni. A phawi rang kher asin, a beih pa chuan Silai a phawi hmasa a, chuti chung chuan phawi khalhin tin pawh a tin lo, a kawng zawn aṭangin a mit leh mit inkarah tak a verh siah mai a ni," a han ti leh a.

       "Delreido nena min man ṭum khan kan pahnihin kan tin reng a, chuti chung chuan min la phawi khalh hman tho, a phawi lai kan hmu hman lo hrim hrim," Beneto chuan uar fê hian a lo ti ve a.

       Thinrim hle e ti lo chuan Ben Harvey chu a rawn nui ta huah huah a, "Meyer, a inbeihpui pain a phawi hmasa chungin kan Marshal sawn a la phawi khalh a maw?" a ti lung lung a; zu a rui tawh a, a meng â bual lehnghal, tunhnai hian a nunphung a thlak nasa hle a ni.

       Meyer chuan, "Ni e, a phawi khalh leh tlat a ni; Marshal saw a nih leh nih loh chu ka chiang lo ka tih tawh kha," a han ti leh a, "Mahse kan Marshal saw a lo nih vaih chuan kha pa, Puakruk phawi rang zet kha Texas-ah hi chuan 'Sudden' tiin an sawi ṭhin; Outlaw-a chhiar a ni," a han ti leh chuar chuar a.

       "Delreido khan Sudden-a chu a kap hlum tawh alawm," Beneto chuan a lo ti ve bauh a.

       Mahse Ben Harvey leh midang rilru-ah chuan Marshal chu a riak tlat a, an kah hlum tak kha Sudden-a a nih leh nih loh tumahin an chiang lo, Snap-a'n a kah hlum tak Johny Lumbo ngaih dan mai mai a ni.

       Ben Harvey chuan, "Meyer, i vawihnih hmuhna chu han sawi leh teh," a lo ti buk a.

       "Ka vawihnih hmuhna chu Arizona State chhung Tucson-a ka awm laiin a ni; chumi ṭum chuan Governor Bleke-an a ko a ni awm e," Meyer chuan a han ti a.

       A sawi lai chuan Ben Harvey chuan, "Bleke a!? Bleke i tia mi? Arizona State Governor Bleke-a, huaisen leh duh ruma an sawi lar, mi hnawksak leh misual rual dah ṭha tura mi tuemaw tir ṭhin hian a ko a maw? Eng'a tan nge a tih a?" a lo ti chiam a.

       Meyer chuan a han sawi zawm leh a, "Aw, a ko fo ṭhin a ni awm e; midang thawh theih loh hna harsa leh khirh reng reng chu ching fel turin a tir ṭhin. Governor Bkeke-a'n a tirhna reng rengah midang hlawhchhamna pawh ni se a la hlawhchham ve ngai lo niin an sawi; Governor Bleke hnuaiah hian Deputy Sheriff niin langsar lo leh inthup chungin hna a thawk ṭhinin an sawi bawk asin," a ti ta zel a.

       An vai mai chuan an ngawi vung vung hlawm a; an rilru chuan Del Rio Marshal lam chu a hawi ṭhup mai ni hian a lang a. Ben Harvey chu inngaihtuah mûk hmel deuh hian a ṭhu kun run a. Meyer-a sawi chu dik ta se, hetah Sudden-a chu eng ti turin nge a rawn kal ang? A ruk tak chuan a rilru chu a nuam lo a ni; hepa hi a hmuh tirh aṭang reng reng khan eng emaw ti riau-a a thinlung vilhtu a ni a. An vai mai chuan an rilru a nawm loh hmel kher mai. Sudden-a chanchin hi a  hretu te an ni deuh vek a, Hell City a tih ṭiau dan te, Apache Red Indian te hnen aṭanga mingo nula a lak chhuah dan te pawh an hre hlawm vek mai, Sudden-a ep zawnga khawsa te tan chuan amah hi awm nawm lohna tham a ni tlat a ni.

       An ngawih ṭhap lai chuan Jason Curse chuan, "Sudden-a a nih in ring deuh tak tak a ni maw? Ka kutah dah rawh u, zanin hian ka va hmu dawn a ni," a lo ti a; chhungrila phurna riau nei chung hian a nui deuh ṭha a.

       Jason hi khatia an Marshal chanchin an sawi chhung zawng khan engmah sawi lovin a lo ngawi reng a, ani hi chuan an Marshal nihna hi a hre chiang a, tunge a nih, eng'e a tih theih pawh a hria, a rilru chuan, 'Ka phawi khalh a, ka thah vaih chuan...' a ti a, a nui ru var var a.

       Chutia Jason-a'n a rawn tih takah chuan Ben Harvey pawh chu a rawn pawngpawrh thar leh a, "Tu pawh ni rawh sek sek, mihring ve bawk a nih saw. Zaninah Sweet Valley chu kan bei ngei tur a ni," a han ti leh phur phur a.

       Midang ho pawh chuan an enghelh ber Marshal chu Jason-a, an zinga huphurhawm bera an ngaihin a bitum tur thu a sawi avang chuan an phur thar leh ta a, Sweet Valley beih ngei chu an rawt phur chho leh ṭan ta a ni.

       Bob Trence khan, "Ben, fimkhur a ngai khawp ang; Sweet Valley hnathawk Snap Lunt pawh saw ka mi hriat a ni a, namnul ngawt chi a ni dawn lo a nia, Johny Lumbo meuh pawh phawi khalha that theitu a nih saw," a lo ti a.

       Ben Harvey chuan, "Buaipui tham a ni lo ang, kan tam zawk dawn tlat a ni," a lo ti hmuk a.

       Chutih lai chuan Jason Curse chu a tho a, Del Rio lama kal tur chuan a Silai te a han pai ṭha a, uluk deuh hian a han en fel a, a kal chhuah dawn chuan Dirty Wizard an tih, pa lianpui mai khan, "Jason, ka zui ve ang che," a han ti a.

       Jason chuan, "A ngai lo vang, keimah pawhin ka ti thei ang, ka theih loh chuan ka thih a hun tihna a ni mai," a lo ti a.

       "A Deputy pakhat, Belly an tih zawk sawn ka lei a ba a ni," Dirty Wizard chuan a lo ti ve tlat a.

       Bull Bulock chu a rawn ṭawng chhuak ve chhur chhur a, "Kei pawh ka kal ve dawn, leiba ṭhin tur ka nei ve," a lo ti a.

       Ben Harvey chuan, "Bull, Yorky saw a phawi rang hrep a nia, Bucky ai pawh khan a rang ngat ang. A ṭha e, a ṭha e, va fimkhur hlawm ang che u, nangni pathum tih loh midang zawng chuan thimhlimah Sweet Valley kan pan ang. Cole pawh a rawn kir leh ṭep tawh ang," a han ti phur phur a.

       Beneto chuan, "Ben, kan mi hren khu, vengtu kan indah dawn lo em ni?" a lo ti a.

       "A ngai lo vang, kan phuar nghet tawk alawm; chubakah a chauh em khu. Cole a rawn thlen hunah a lo buaipui mai ang," a han ti leh a.

       Sweet Valley beih chu an rel thlu ta nge nge a. Jason Curse, Dirty Wizard leh Bull Bullock chuan Del Rio an pan ta nghal a. An vaia an ṭin darh hnu chuan Meyer chu a inngaihtuah ngun hle a, a rilru chuan Sweet Valley lama kal tur nge, Del Ruo lama kal tur tih chu a buk vel a. A lo upa ve tain misual rual leh pawisak nei lo pui pui awm khawm zinga khawsak hi a kham ve deuh ta a ni. A rilru chu a siam fel a, tuma hmuh loh laiin Jason-a te kal lohna lam aṭangin Del Rio chu a pan ve ta a ni.
* * * * * * *

       Sudden-a chu Yorky nen Sweet Valley-ah an kal a, Puck Parson pawh a lo awm ve tawh nghe nghe a. Matthew nupa leh Snap te nen chuan thil an sawiho a, tunhnaiah Sweet Valley an tih buai leh tih buai loh te chu a zawt a.

       Snap chuan, "Jim, tunhnai hian an reh vung vung a, a ngaihṭhatthlak loh zawk hial mai," a han ti a.

       "Lo inthlahdah lo tawp mai rawh u," Sudden-a chuan a han ti a.

       "Khawchhung boruak eng'e a an?"

       "A pangngai rih e."

       "Jim, fimkhur ang che, helai chhehvelah hian Black Curse Jason a awm ve tih ka hria a nia," a han ti a, "Noreen hnenah ka intiam a, i chungah thil ṭha lo a thlen chuan ka inthiam thei ngai lo vang," Snap chuan a han ti leh a.

       Sudden-a chu a nui mai a, "Snap, ka hre thiam e," a ti a, a ruk tak chuan a lawm hle a.

       Del Rio an panna lamah chuan Sudden-a chuan, "Yorky, Silaimu i lei ngun riauin ka hria, i tlachham em ni?" a han ti a.

       "Tlachham lo ve. Jim, nangmah tluk ngei turin ka inzir reng a ngai alawm, Silai phawi ran leh kah dik hi zir reng ka duh alawm," tiin Yorky chuan a lo chhang a.

        "Yorky, inzir hi a ṭha," tiin Sudden-a chuan a han chhang a; chutah nui deuh chung hian, "Dawr neitupa fanu vang zawk chu a ni lo ang ti raw?" a han ti thut a.

       Yorky chu a sen ap ap a, "Jim, ani ngaihven chu ka phu lo a ni," a han ti a.

       Sudden-a chuan nui rah rah chung hian, "Rosalyn hi chu a hmel ṭha ngawt mai tiraw; mahse buaina hi kan la hmachhawn dawn chauh a, i fimkhur dawn nia," a lo ti hlauh a.

       Khuaa an luha Marshal Office an thlen chuan mipkhat hian a lo nghak reng tawh a. Chupa chu Meyer kha a ni. An inhmel hriat hnu-ah Office-ah chuan an lut a, Meyer chuan, "Marshal, zanin hian Jason Curse chu nangmah hmachhawn tumin a rawn kal a ni," a han ti a.

       Sudden-a chu a han ngawi deuh vang vang a; chutah, "Lo kal rawh se, hei hi a la thleng tho tho ang, thil awm dan azirin kan lo hmuak a ni ang chu," a ti a.

       "Jason hi 'Black Curse' tia an sawi ṭhin kha a ni: chubakah Bull Bulock leh Dirty Wizard ten an rawn zui dawn bawk, anni pahnih pawh hi Gunman ve ve an ni," Meyer chuan a han ti leh a.

       Meyer-a'n chutia a sawi lai chuan phur deuh hian, "I hi, Dirty Wizard maw?  Lo kal rawh se," Belly chuan a lo ti ve a.

       Yorky chuan, "Bull Bulock chuan a lei ka baah a la ngai ngei ang," a lo ti ve bauh bawk a.

       Sudden thung chuan, "A theih chhung chu Silai chelek loh tur a ni," a lo ti a.

       An pathum chuan Horace-a chaw dawrah chaw ei turin an kal ta dial a.

SUDDEN: CLEAR THE NAME
Author: Chhantea Pautu

Chapter Fourteen

        A la hma hle a, Sudden-a chu John Denver-a Saloon Bar-ah no dawmin a ding a, Belly leh Yorky chu dawkan pakhat kilin Big Folly Cowboy Collin te nen Poker an khel ho a. He Saloon chhunga awm te hi chu mi nawi tak an ni ngai meuh lo.

       Sudden-a chuan a rilru te te chuan Jason-a ten an rawn zawn mai a lo ring a; mahse anmahni avanga zantina a tih ṭhin anga Saloon pathum te thlithlai chu ṭhulh a tum hauh lo va, buaina pawh chhuak dawn se hmachhawn ngei turin a inring sa thlap a ni.

       Saloon chhunga midang awm ve te chu an ri dar dar hlawm a, Sudden-a chuan a no dawm lai chu a han in zo te te a, Big Ben Saloon lama kal turin Stranger Come Back Saloon chu a chhuahsan ta a. Chutia engmah sawi lo va a chhuak ta chu Yorky leh Belly chuan an han melh zawk a, Yorky zawk chuan han zui ve nghal mai hi a tum a; mahse Belly chuan lo dangin, "Yorky, hmanhmawh rih suh, pathum pawhin hmachhawn se a buai hauh lo vang, nakkin deuhah kan zui ve dawn nia," a lo ti ta tlat a.

       Sudden-a'n Big Ben Saloon a han luh chuan a rin angin Jason-a te chu an lo awm lo hauh lo a; mahse Bar nghaktu Danny-a a pan phei a, ani chuan, "Marshal, Bull ten an zawng che a nia," a lo ti nghal mai a.

       Sudden-a chu a nui mai a, "Hetah ka rawn hmuh mai ka lo ring deuh asin maw le," a han ti a.

       Danny chuan, "Hmun danga i awm an ring a ni ang, tun mai khan an chhuak a ni. Nangmah hmu duhtu tak chu Jason Curse kha a ni a; Bull leh Dirty khan Jason-a remti vak lo chung kha an zui lui ve ta tho a nih kha. Marshal i fimkhur viau a ngai ang," a han ti leh a.

       "Chuti a nih zawngin khawiah emaw tak chuan kan la inhmuh hlawm ngei dawn chu," Sudden-a chuan a han ti a.
* * * * * * *

       Jason-a te chhuak ta chuan Lucky Chance Saloon lam an pan a, chutah chuan Big Folly Cowboy leh Double D Cowboy ṭhenkhat pawh an awm a. Bull Bulock chuan zu a rui tawh viau a, a thinchhiat pawh a pe na leh ṭan tawh hle mai bawk. An han lut phat chu buaina han siam mai chak tak hian min ṭhenkhat chu deusawh zet zet hian a han ṭawngkhum a; mahse tumahin an khin ngam loh avangin buaina chu a chhuak lo mai zawk a ni.

       Jason chuan Sudden-a chu a han zawng rilru deuh a; mahse, a awm loh avangin zu a lam a, muangchang hian a in a. Chutih lai chuan Bull Bullock chu a la ṭawng pung pung reng a.

       "Khawnge in Marshal hi a awm, han infiampui hlak a chakawm nen, a Office lamah a tawmsen mai mai pek a niang chu maw," Bull Bulock chuan a han ti lung lung a. Tumah chuan an chhang lem lo va.

       Saloon neitunu Mina-i chuan a ning ta deuh hlek a, "Bull, chuti taka Marshal fiam i chak chuan Stranger Come Back lamah va zawng chhin ta che," a lo ti hmak a.

       Bull Bulock chu a nui huah huah a, Mina-i chu han kuah mai hi a han tum a; chutah Mina-i chu a lo per sawn vat a, thinur zeta Bull Bulock melh ram ram pah hian an bul maia Jason Curse lo ding ve chu a han bia a, "Mr. Jason, ka Saloon-ah hian chet dan mawi ka beisei a ni, i ṭhian rawn hruai hian chu chu a theihnghilh a ang hle mai," a han ti a.

      NJason chu a lo nui mai a, muangchang hian a zu no dawm lai chu a in a. A dik tak chuan thil danga a rilru han dah chu a duh lo a ni. Hemi zan hian Sudden-a hmachhawn turin a rawn kal a, ani chauh chu a ngaihtuah a duh a. Zu chu a han in zo a, "Bull, i chhuak teh ang u," tih nghat pahin kawngka lam chu a pan nghal a, Dirty Wizard chuan a zui chhuak ve nghal mai a.

       Bull Bulock-a zu rui lung puam erawh chuan chhuah mai a la tum hauh lo. A ṭhian te an chhuah hnu pawh chuan Mina-i chu a la melh run reng mai a, kuah tumin a han pan hnai leh a; chutah Mina-i chuan Bar dawhkan hnuai aṭang chuan Puakruk hi a rawn phawrh a, hnai set sawtah Bull Bulock chu tin chungin, "Ka Saloon hi chhuahsan rawh," a han ti ta ṭhat a

       Rei lotè chu Bull Bulock chuan mak ti hmel hi a han pu deuh a, muangchanga inherin, chhuah mai tum niawm tak hian a han awm a; chhuah mai a tum tak tak nia ngaiin Mina-i chu a lo inthlahdah leh hman tawh a, chutih lai tak chuan Bull Bulock chu a inher leh thut a, Mina-i Puakruk hum lai chu a phih thlak sak lawp a, nui huah huah chung hian a han kuah nawk nawk a, fawh mai tum hian a han hnaih phei a.

       "Hmeichhia kha thlah vat rawh!"

       Chutia rawn titu aw chu a chang ṭha felfawl hle mai. A ti mai mai hauh lo tih pawh a hriat hle bawk. Chutia rawn titu lam chu Bull Bulock chuan a han hawi a, anmahni en reng chung chuan inring zetin Deputy Marshal Belly chuan a lo melh ran tawh a, a bulah chuan hmana amah kap hliamtu Yorky chu a awm bawk.

       Mina Chrisandy chu hlauhthawn hmel em em hian Bull Bulock-a'n a man behna aṭang chuan a tal chhuak vat a, a khur ru deuh dar dar mai bawk.

       Bull Bulock thung chuan Belly chu thinrim em em hian a melh run run mai a, "I lo inrawlh a ngai hauh lo asin, tlangval," a han ti pawr huar a.

       "A ngai a nih ka ring," Belly chuan a lo ti mai a.

       "Chuti a nih leh..." tih pahin Bull Bulock chuan rang deuh hian a Silai chu a chuh ta thut mai a, a hmet per nghal bawk a.

       Bull Bulock-a'n Silai a chuh kha Belly-a lo rin dan chiah a ni a, rang lutuk bawk hian a Silai chu a chuh ve nghal a. Bull Bulock-a Silaimu chuan a nakah a rawn thawi thiak a, ama Silaimu erawh chuan a tum chu a va hlah ta lo.

       Bull Bulock chu chhuatah a tlu thum dup a, a tal kawm ngawl ngawl hnu-ah a leng leh uih uih a, che leh tur awm lovin a chatthla zui ta a ni.

       Yorky leh Belly chuan Mina-i hnenah chuan a Saloon-ah  Marshal a kal leh kal loh an han zawt a, ani chuan a kal loh thuin a lo chhang a, a hmel chu hlauhthawn avangin a dang lap mai a, Belly te pahnih chuan a Saloon chhunga buaina an thlen a avangin thupha an han chawi luam a; mahse Mina-i chuan, "Kei hi ka lawm lutuk zawk a nia, rawn inrawlh lo ni ula chu engtin nge min tih dawn pawh ka hre thei lo," a han ti a.

       Yorky leh Belly chuan Sudden-a zawng turin hmanhmawh deuh hian Saloon chu an chhuahsan nghal a, pawna an chhuak chiah chu anmahni tawk zawngin Jason Curse leh Dirty Wizard chu an rawn kal mek a. Kawtthlera an han inhmuh chuan an pali chuan an dingchawt hlawm a, a chhan sawi tur ber awm si lo hian inring em emin an han inmelh nghal ngawt a.

       Lucky Chance Saloon-a Silai a han rik khan, Jason leh Dirty chuan Silai ri chu an lo hre ve a, buaina hmachhawn ngei tuma rawn kal, inpeih sa thlap an nih avangin leh, Lucky Chance Saloon aṭanga an chhuah khan Bull Bulock chuan a zui ve nghal mai lo tih an hriat bawk avangin eng nge thleng tih hre turin an rawn let leh hi a lo ni a.

       Mi ṭhenkhat chu Bathlar-ah an awm hlawm a, thla a eng ruih a, kawtthlerah chuan a inhmuh chian theih viau mai. Stranger Come Back Saloon aṭang pawh chuan mi ṭhenkhat rawn chhuakin, a rawn chhuak apiang mai te chuan Deputy Marshal pahnih te leh mipahnih dang inhmachhawna ding mek te chu an rawn thlir ṭhap zel hlawm a.

       "Bull kha engtin nge in tih? Nang phei kha chuan, han hnek leh deuh te i duh em?" Dirty Wizard chuan hmusit zeta Yorky en pahin a han ti nghal ngawt a.

       Yorky ten an chhan hma chuan Jason-a te hnunglam aṭangin, "Ni rih lo ve Dirty, inhnek thu-ah chuan tharum leh pumruaa i khingpui tawk deuh tur thlang ve ṭhin la a ṭhat ka ring, entir nan keini ang te hi," Sudden-a chuan a rawn ti a.

       Jason-a leh Dirty chu Sudden-a lam hawiin an inher nghal vat a. An han inmelh vang vang hnuah Dirty chuan, "Chu kuttuma insualah min cho ve deuh tihna em ni Marshal?" a han ti thum chhuk a, a hmel chu a phur hmel kher mai.

       Sudden chuan, "Deuh lo ve, i tiatpui lo deuh inring lo lai hnek chîng tak nia ka hriat che avangin ka cho hliah hliah zawk che maw le; mahse lo hmanhmawh teh vak suh, Mr. Curse nen hian sawi dun tur kan nei," tiin Jason-a lam chu a han hawi a, "Min zawng tih ka lo hria a?" a han ti zui ta a.

       Jason-a chuan, "I hre dik a nih chu Mr. Sudden," a lo ti ve nghat a.

      NA ṭawng ring tehchiam lo na a, Jason-a'n Marshal a koh dan hre pha chin ṭhenkhat chuan chulai boruak chu an rawn ngaihven zual sauh a, a ṭhen te chu an phun sap sap hlawm a. Stranger Come Back Saloon neitupa John Denver pawh a bang bik lo. 'Sudden' tih hming chu an vawikhat hriatna a ni lo va, an rilru-ah chuan Texas State chhunga Outlaw hlauhawm bera an sawi leh, Puakruk phawi rang leh Kah thiam hmingthanga sawi a ni tih hi a awm tlat. Chuti ang bawk chuan, Jason Curse hi 'Black Curse' tia hriat lar, Gunfighter dik tak, a huatthu sawitu te chu tîm miah lo leh engti kawng zawng pawha that hreh hauh lo, Killer dik tak a ni tih hretu te an ni hlawm bawk; he khuaah hian amah phawi khalh tum tute a lo that nual tawh tlat a ni.

       Sudden-a chu a nui deuh a, "Tichuan min hmu ta a, thuruk min hrilh tur i nei tihna a ni ang chu maw?" a han ti a.

       Jason-a chuan ram hmak hian, "Mr. Sudden, zanin hian tunge phawi rang zawk tih kan fiah tawh dawn a ni," a lo ti a; inring em em hian a kutzungṭang chu a Puakruk paina hnaih takah a phar darh sang mai a.

       Sudden-a chuan ṭawngkama buaina pumpelh tumin awmzia a nei dawn lo tih a hre ta a, Jason hian amah hmachhawn ngei tum sain khua a rawn lut a ni ang tih a ring tlat bawk. A kut chu a khel zawnah a thlak thla hnak a, "I tih tlat chuan le," a ti ve ta hmiah a.

       Sudden-a hnunglama awm te leh Jason-a hnunglama awm te chu an insaseng nghal sang sang hlawm a, mipahnih te chu chik zetin an inmelh ta ran mai a ni.

       Hun chu a chawl duk ni maiin a lang. Jason chu a meng zau deuh kawk a, rang lutuk fahran hian a Silai chu a chuh nghal a; chumi rual deuh thaw chuan Sudden kutah chuan a Silai a rawn chawr nawlh a, Silai pahnih te chu a puak ṭhawt a, Jason-a chaldarah tak Sudden-a silaimu chuan a va verh ta siah mai a. Jason-a silaimu erawh chuan Sudden-a ke bul vaivut chu a deng khu sat thung a. Rang dun tak an ni; mahse Sudden-a meuh chu tumahin an la khalh ngai tlat lo!

       Sudden-a chuan mitkhap kar pawh chawl lovin Dirty Wizard chu a Puakruk chuan a han tin zui nghal a; ani chu mak tih hmel zet hian a lo ka hau mai a, Jason-a phawi ran zia hretu a ni a, a hmachhawn tawh ten an la phawi khalh ngai lo, ani pawh hi rang hle mah se, Jason chu engtiklai mahin a tluk a la inring ngai lo va; mahse, Sudden-a hmaah zawng Jason-a meuh pawh a rang tawk lo a ni. A mak ti hmel chu thinur hmelin a rawn inthlak zui nghal a.

       Chutih lai chuan, "Dirty, nang kha, i Gun-belt phelh rawh, kuttumin kan insual dawn a ni," Sudden-a chuan a rawn ti ta a.

       Dirty chu thinur ṭeuh chung leh phur hmel tak si hîan a nui ṭhu a, "Marshal, i chiang chiah maw?" a lo ti let a.

       Sudden-a chuan, "I Gun-belt chu phelh vat mai rawh," tiin a Silai chu a han kau rap a.

       Dirty-a, palianpui mai chuan hnial chi a ni lo tih a hria a, a Gun-belt chu a phelh a, a sirah chuan a theh phei ta a.

       Sudden-a chuan, "Belly, a Gunt-belt saw va la rawh," a han ti a.

       Belly-a'n Dirty Gunt-belt a lak hnu chuan Sudden-a pawh chuan a Gunt-belt chu a phelh ve nghal a, Yorky hnenah chuan a pe ta a.

       Dirty Wizard chu a phur thurh thurh hle mai, a insualpui, tute mahin an la hneh ngai lo a ni. A kut chu a nuai nawk nawk a, Sudden-a chu kun deuh du chung hian a veh phei dun dun a, sawp nek tum rilru chungin a han zuan a. Sudden-a chu a inrin hle rualin chutia Dirty-a'n a rawn zuan tur lo lak leu tuma a inherna lamah a ke chheh chu a petek hlauh mai a, a khingpuipa chuan chiang zet hian a âwmah a rawn hnek dawp a, a kutthlak chu a na kher bawk a, leiah chuan a tlu hlawm tawp a. Chutia a tlu lai chu Dirty chuan bawhzui nghalin, nui huah huah pah hian a pan phei ruak ruak a.

       Mahse, chutia Sudden-a tlu tawh ṭham nek tuma a kun chu, Sudden-a chu a lo inlet thak a, Dirty khabeah tak mai chuan a lo tlawh nghek mai a, a ni chu a lêt dawr a, hnunglamah a pai phei uan uan a, tluk erawh chu a tlu em lo.

       An insual entu te chuan hmuh chian loh hlauin an rawn hnaih tuau tuau a, anni pahnih pawh chu a inveh leh theuh theuh tawh a. Sudden-a chuan fimkhur tak hian a veh phei a, Dirty chu amah aia a len avangin inman behtir loh hram a duh a ni.

       Chawpchilh deuh hian Sudden-a chuan a va hnaih thut a, Dirty nak nemah chuan a kuttum pahnih chuan a va tlir a, rang deuh hian a per sawn lehnghal a. Sudden-a hnekna avang chuan Dirty chu a thaw hawk a, rum ṭuah ṭuah chungin a tho a, Sudden-a chu sut nghek tum hian tlan pahin a rawn bawh phei ta buan buan a; chutia a rawn tih chu Sudden-a lo beisei loh tawp a nih avangin Dirty chuan a rawn nangching hman ta a. A dul nemah tak a luin a rawn su ngheng mai a, a thaw kawk a, a ṭhingthi rawp a, a pum chu namenlo tak hian a na tur ngan mai a ni. Chutah a nat sarhu lai chuan Dirty chuan a khabeah a han hnek leh hram a; mahse na tuar ve tawh tho a nih avangin a hnek fuh lutuk lo hlauh thung a ni.

       Dirty chuan a na tuar lai chu a ṭham tho a, theihpatawpa naa hnek a, a tawp khar mai tawh tumin a han insang phek a; mahse Sudden-a chuan a theihtawpin a na chu a haider a, chutia Dirty-a'n a na thei ang bera hnek a tum lai chuan a lo thle sawn zauh a, a kuttum dinglam ruh ṭha ṭeh ṭawh tak ngei mai chuan a khabe kual veilamah a lo hnek ta siah mai a, Dirty chu a lir hlawl mai a.

       Sudden-a chuan a rawn thawh hun a lo nghak a. Dirty chu eng'e maw chen chu che lo hian a han mu a, chutah a rawn tho tuah ṭuah a, a lu chu a thing luk luk a, pai deuh uan uan chung hian Sudden-a chu a rawn bawhphei leh ta a. Sudden-a pawh chuan lo awm sawn pawh a tum tawh chuang lo, a rem lai laiah a lo hnek ta mial mial a, Dirty pawh chuan vawihnih khat chu a hnek fuh ve leh a; mahse Sudden-a tan harsatna a awm tawh lo, Dirty chuan fimkhurna a tlachham tawh a, mumal nei lo zetin a bawh buan buan ringawt mai a ni. Man beh ngei tuma Sudden-a a bawh phei leh lai chuan, ani Sudden-a chu a lo inher sawn a, chutia inher pah chuan a keah a lo thai sak a, a tlu tur chu a khabeah tak a dâwm zui siah a; Dirty chu a tlu zawi hnuk a, che leh tur a awm ta lo a ni.

       Sudden-a chu a thaw ham ham a, ngawi rengin John Denver-a Saloon chu a pan a, a chhungah lutin Zu a lam a, no khat chu a han tlak pawp a, "Ka dula a sutna chu a namailo kher mai," a han ti zui a.

       A han hahdam deuh hnu chuan Yorky chuan Sudden-a Gun-belt chu pek a han pe a, "Jim, Jail-ah kan dah dawn em?" a han ti a.

       "A ngai lo vang, man nachhan tur a awm lo," Sudden-a chuan a lo ti mai a.

       Mahse, Sudden-a'n a Gun-belt a hreng fel zo awrh tihah chuan John Denver-a chuan Short-Gun-in a rawn tin a, "Outlaw Sudden-a i ni tih kan lo hre hauh lo; he khaw Marshal atan hian dan pawna hnawl, lu man sang tak nei chu kan ruai thei lo vang," a lo ti ta chheu mai a.

       Sudden-a chuan ngun deuh hian Denver-a chu a han en a, a ruk chuan a lawm lo hle mai bawk. "Sudden-a an tih ṭhin chu ka ni ngei e; mahse Denver, thil i hre sual a ni," a han ti a.

       "Eng chu nge ka hriat sual?" Denver chuan a lo ti leh hmuk a. "He khua hi a ṭawp a ni mai thei; mahse mi zahawm tak tak an awm ve bawk a ni, anni chuan dan hmelma rorelna hnuaia awm chu an duh hauh lo," a han ti zui a.

       Chutih lai chuan Sweet Valley mi chhawr pakhat William chu hmanhmawh zet hian Saloon chhungah chuan a rawn tlan lut a, "Marshal, thimhlim khan BB hoin Sweet Valley an rawn bei thut mai a, Mrs. Nancy an ru bo a, Mr. Matthew an kap hliam bawk. Chubakah..." tiin sawi zawm zui ta lovin John Denver-a leh Sudden-a Silaia an lo intin lai chu mak ti zet hian a en tawn ta sek a.

       Midang ho beng chu, chu thu thar chuan a verh ta hle a, chulai kar tè, John Denver-a a inthlahdah zawk lai chu chuhin Sudden-a chuan hmuhhman loh tawp hian a Puakruk chu a phawi dawk zawk a, Denver-a hnenah chuan, "Denver, an sawi anga misual ni ila tunah hian i thi tawh ang, ka lam hawia i Short-Gun kha i hmet per a nih vaih chuan midang hi i hliam tel ve ngei dawn a ni; chubakah, ka that ve hman tho ang che, tum chhin duh lo mai rawh," tiin Denver-a mitah tak chuan a en ta kal mai a.

       Yorky chuan, "Jim, Sweet Valley-ah chuan kan kal vat a ṭhain ka hria," a lo ti bauh a.

       Sudden-a chuan Denver-a la en reng chung chuan, "Ṭhian te u, ka chungchang dik tak chu in hre ta bawk a; tunah hian in Marshal aṭangin ka bang ta bawk a ni," tiin Marshal Badge Arsi chu a la thla a, Denver-a lamah a theh phei a. "Heng laiah hian he khua thian fai tur leh Ben Harvey dahbo tura lo kal ka ni a, tunah hian chumi tih ngeina tur chhan ṭha tak ka neih belh leh ta a nih chu. Tunah hian Sweet Valley a beih ngawt avang leh Mrs. Nancy a ruk bo avangin BB Ranch ka pan dawn a, keima chungchanga in thil hriat dik loh ti fel turin khuaah hian ka lo kir leh ang," a han ti zui a, Denver-a'n Short-Gun-a a tinna pawh chu pawisa lo zet hian Saloon chu a chhuahsan a, Yorky, Belly leh William te nen chuan Sweet Valley an pan ta a ni.
* * * * * * *

       A thawkten chaw an ei buai lai vel takin Sweet Valley chu ṭhawn thut a ni a. An inring hman thlawt lo a ni ber. A zan a zana Sudden-a ten Sweet Valley an va thlen pawh chuan sâwtna a nei lo hle mai a, Matthew chu na vak lovin a ban puamah an kaphliam a, Snap Lunt pawh a tlukna lamah a insawh na deuh a; mahse harsatna a thlen tham lo thung.

       Khawvar hnu rei vak loah chuan Mexican pakhat hian Sweet Valley-ah chuan ngawi rengin lehkha pakhat hi Mathew-a hnenah a rawn pe a, an han chhiar chuan, Matthew leh ami chhawr ten Sweet Valley an chhuahsan chauhin Nancy chu chhuah a nih tur thu hi a lo ni a. Matthew chu a lungngai hle mai a. Sudden-a chuan an phut ang chu tih hlawhtling a ṭhat thu a han  sawi a.

       Yorky chuan, "Engvangin maw Jim?" a lo ti vat a.

        Sudden-a chuan, "Sweet Valley enthla tur hi an indah ngei ang, chhuahsan angin kan lang anga, an rin loh lam aṭangin Ben Harvey te chu kan bei dawn a ni," a ti ta a.

       Putar Hodden-a chuan, "Ngaih dan ṭha tak a ni," a lo ti ve bauh a.

       Sudden-a chuan Puck Parson chu a han pan a, "Parson, Silver-a kaptu chu hre tawhin ka inhria. A hming chu Delreido a ni a, Double D mi chhawr zing ami a ni, BB misual rual ho nen hian inzawmna an nei bawk niin a lang; mahse i hmachhawn hunah Silver-a hming lam ri la, a mitmeng leh awm dan aṭangin finfiah hmasa ang che," a han ti a.

       Puck Parson chu a bu nghut nghut a, "A nih leh Sweet Valley kan chhuahsan chuan khawiah nge kan kal tak ang?" tiin a han zawt nghal a.

       "Big Folly kan pan phawt mai a niang chu. Zuck Ork hi pa ṭha leh dik tak niin ka hria, khuaah lah Jason vangin Sudden-a ka nih thu an hre tawh a, Ben Harvey ka chinfel hma chu khuaa luh ka la tum rih lo," Sudden-a chuan a lo ti a.

       Sudden-a a ni tih khua ami ten an hriat thu a han sawi chuan Puck Parson leh an mi chhawr thar pathum te chuan mak tiin an lo thlir ṭhap a. Sudden-a chuan a lo man thiam vat a, "Ni e,  Texas rama ka nihna dik tak hi in hriat hmasak a ṭhain ka hria. He ramah hian lu man nei, Outlaw ka ni a, man tuma veh mek ka ni; mahse an mi sawi ang hi ka ni lo, chumi ti fel tura lo kal pawh chu ka ni," a han ti te te a. "In duh chuan khuaah nangni chu in kal thei ang; mahse kei chuan Ben Harvey leh a mi chhawr ho hi ka thian fai ngei dawn a ni," a han ti leh a.

       An vai mai chuan mi ṭha tak vek an ni a, han kal bo tum emaw pawh an awm ta chuang lo va, an mi chhawr pakhat, Tucker an tih chuan, "A tawp thlengin Mrs. Nancy chhan chhuak turin ka tel ve ang," a lo ti a. Midang ho pawh chuan kal bo an tum loh thu an sawi ve hlawm bawk.

       Chawhnu herah an vai chuan Zuck Ork-a Ranch, Big Folly chu an pan ta nghal a, zing khawvar hma hreta BB Ranch chu bei turin an inruahman ta nghal a. Belly hi rei vak lo chu BB Ranch ah hian a lo thawk tawh a, ani leh Sudden-a chuan thimhlimah Ranch awm dan chu an va thlithlai anga chumi hnu-ah ruahhmanna ṭha tak nei chungin an va bei dawn a ni.

       Big Folly an thlen chuan zanriah chhum hun vel a ni a; chutia mi 10 laiin a Ranch an rawn pan mai chu Zuck Ork chuan mak a lo ti deuh a, "Marshal, eng thil nge ni ta?" Sudden-a hnenah chuan a lo ti hû a.

       Sudden-a chuan, "Mr. Zuck, Marshal hna kha ka bansan ta mai; Sudden-a ka ni tih an hriat khan Mr. Denver ten min pawm ta lo a ni ber e," tia chhan pahin thil awmzia leh, Sweet Valley in beih a tawh thu te, anmahni bum nana Big Folly chu pan an nih thu leh khawvar hmaa BB Ranch chu beih an tum thu chu a sawi tlang nghal ta vek a.

       Zuck Ork chu a han ngawi vung vung a, Sudden-a chu chik zet hian a han en a; chutah, "Ka en ka en che hian, Sudden-a pawh chu lo ni ta la, an sawi anga misual i nih ka ring thei lo; hmeichhe zahawm pangngai Mrs. Nancy te ang a rubo ngawt pawh chu a tih loh tawp tur Ben Harvey chuan a ti a nih chu, lawm takin ka lo mikhual ang che u," a ti ta a.

       Sudden-a chuan, "Mr. Zuck, kan lawm e, riahna thu-ah chuan Matthew leh Mr. Hodden tih loh hi chu pawnah kan mu mai mai thei ang," a han ti a.

       "Engtia Sweet Valley chu han bei ngawt che u nge maw an nih le?" Zuck Ork chuan a lo ti leh a.

       Matthew chuan, "Zuck, chu zawng ka mimal thuruk a la ni rih tlat mai; mahse Ben Harvey hian a kuang lo a nawr a ni," a lo ti ve hmak a, ani pawh hi a thinrim ve tawh takzet a ni.

       Zuck Ork chuan, "Ka hre thiam e, ka nau te pawh an duh chuan BB Ranch beihnaah chuan an tel thei ang; mahse anmahni duhthlanna ni rawh se," a han ti leh a.

       A Foreman Stravius chuan, "Ka pu, Double D mi chhawr ṭhenkhat leh BB Ranch mi chhawr misual rual ho hian inzawmna an nei tih ka hria a ni; chuvangin kei chu ka tel ve dawn," a lo ti nghal a.

       Zuck Ork chu a lo bu nghut nghut a.
* * * * * * *


SUDDEN: CLEAR THE NAME
Author; Chhantea Pautu

Chapter Fifteen

       Ben Harvey ten Sweet Valley bei tura BB Ranch an chhuahsan hnu lawk khan BB Ranch-ah Cole Griffin chu a rawn thleng zui vĕ nghal a. Chawchhumtu chauh chu a lo awm a, an awm loh duak chhan chawchhumtu hnenah a han zawh a, an chawchhumin a han hrilh chuan  a thinrim kher mai; a ruahmanna ni lo leh a thupek pawh ni hauh lo va Harvey-a'n ruahmanna a lo siam chu a lawm lo hle a ni. An chawchhum hnenah chuan a han ang chiam a, chumi zawhah, inruak pakhata an mihren chu a va hmu a, rei ngial a va awm hnuah a lo let leh a, Del Rio Marshal thar tuartir leh dah bo theih dan tur chu a ngaihtuah chhunzawm leh ta a ni.

       Zan darriat velah Ben Harvey te chuan BB an rawn thleng leh a, hlawhtling an intiin an rawn ri haw nasa mai a; mahse Cole Griffin chuan rum zet hian a lo melh hlawm a, "Engvanga ka thu lo va Sweet Valley bei nge in nih?" Ben Harvey hnenah chuan a han ti a.

       Ben Harvey chuan chhan ngaihna a hre lawk lo  va, a tawpah erawh, "Sweet Valley saw ram ṭha ṭak a ni a, a mi cheng te saw chhuahtir kan ngai a ni," a han ti ta hram a.

       "Chu chu ka hria; hmanhmawh a ṭul loh thu ka sawi fo a nih kha; Harvey, henu in ruk chhuah avanga khua ami te laka buaina kan  neih vaih chuan mawh i phur ang," Griffin chuan a lo ti ta hmiah a. An vai mai chuan a ngawi ta ṭhap a.

       Nancy chu inchung pindan pakhatah an dah a, phuar lohin an dah a, kawngkhar chu pawn lamah an kal tlat thung a, chu pindanah chuan tukverh zim tè pakhat chauh a awm a. A hlauthawng chu a dang lep a, a zia chu a zawiin a ngawi nghiai  mai a ni.

       Zanrei deuh tawhah Dirty Wizard chu hmai bui chuk hian a rawn let a, thil awmzia an han zawh chuan a sawi ṭha duh miah lo va, a hmel chu thinrim avangin a thim khup mai bawk. Cole Griffin chuan a falin a bia a, thil awmzia chu a han zawt a, Dirty chuan Del Rio Marshal te nen an intawn dan leh Marshal chu Sudden-a a lo nih reng thu te, Jason nen inbeia Sudden-a'n a kah hlum thu leh Bull Bulock pawh Belly kah hlum ngei a nih thu te chu a han sawi a.

       "A nih, i hmel heti taka siam chhetu hi tunge ni?" Griffin chuan a lo ti khauh a.

       "Kha Sudden-a nen khan kutlawngin kan insual a ni," Dirty chuan a lo ti deuh hmuk a. Chumi hnu-ah, "Cole, Sudden-a a ni tih an hriat hnu-ah John Denver te chuan Marshal aṭangin an pawm lo zui ta a ni awm e," a han ti leh a.

       Cole Griffin chuan Dirty Wizard thu sawi aṭangin ngaihtuahna thar a nei a, helai ram vel thunun zel tur leh, Ben Harvey Ranch pawh zawi zawia dan anga neih theih ngei dan la awm ngei dawna hriain a khi suk a. An mihren a dahna lam pan chuan a kal ta a. A va luh chuan chupa chu a lo chauh tawh hmel hle a. Griffin chuan nuihzat awm deuh hian a han en a, "Thah che ka hreh viau na a, ka la tih ngei chu a ngai dawn a ni; engvanga man che a, nungdama la dah che nge ka nih hi ka inhre thei lo. Kah hlum daih tur che hi a nia," a han ti a.

       Chupa chuan, "Griffin, min that ngam lo a ni; tin lo hre rawh, Del Rio Marshal James Green sawn tunge i nih hi a hai hauh lo vang, fimkhur hle ang che, i thih mai hi ka la rem ti lo, keimah ngei hian Governor hnenah ka hlan dawn che a ni," a lo ti chhar chhar a.

       Griffin chuan, "Khaw mipui ten Sudden-a a nih an hre chhuak a, Marshal aṭangin an ban a nih hmel asin, Jason pawh a that tawh; Jack, kei hi Marshal ka ni ang a, chumi phen aṭang chuan henglai vel hi ka thunun tlat tawh ang. Nang hi ka chungchang sawi turin i awm tawh dawn si lo va; achhan chu, ka that ngei dawn che a ni," a ti a, a chhuahsan ta a.

        Cole Griffin chuan Ben Harvey hnenah, "Del Rio-ah ka kal dawn a, i Ranch tal hi chu i loi thunun theih ka beisei, hmeichhia pawh kha chhuah tawh rawh, Sweet Valley an chhuahsan tawh tih Dick-a'n  a sawi tawh kha, hmeichhe chunga dik lo taka chet hi kan tan a la pawi dawn chauh a ni. Hei hi hre rawh, khua ami te sawn kan inhria tih an hre tur a ni lo," a han ti a, khawlam panin a kalsan ta nghal a.

       Ben Harvey chuan Matthew ten Sweet Valley an chhuahsan tawh hnu-a a nupui chhuah tur takngial pawha a rawn ngen miah lo chu mak a ti hle a; mahse chutia a ngaihtuah lai tak chuan Matthew chu a rawn kal ta hlauh a. Hei hi Sweet Valley an chhuahsan ni kha a ni.

       "Mr. Harvey, ka nupui min pe tawh rawh," tiin Matthew chuan a han ngen tawp a.

      NBen Harvey chu a nui vur vur a, "Mac, i nupui tlan tur chuan i rama ro phumruk awmna hriat theihna lehkha kha min pek phawt a ngai a ni," a han ti a.

       "Mr. Harvey, ka pe em em ang che; mahse tunah ka rawn keng lo a ni, ka nupui min pe la, lehkha chu ka rawn pe leh ang che, a nih loh pawhin min zui la, Zuck Ork-a Ranch bulah ka thukru a ni," a han ti leh a.

       Ben Harvey chu a han inngaihtuah vung vung a, "Matthew, chu thil keng chuan naktukah i rawn kal leh dawn nia," a ti ta tlat a.

       Matthew chu beidawn hmel deuh hian a han thaw halh a, "Ben, keimah chauh ka nih tawh hi, min chhuahsak mai rawh," tiin a han ngen leh a.

       "Ni lo ve. Mac, khaw'nge i mi chhawr te?" Harvey chuan a han ti a.

       Mathew chuan, "Min phatsan a, an kal bo vek tawh," a han ti ngui raih a.

       "An va han nep si ve; mahse, lehkha chu rawn keng phawt ang che," Harvey chuan a la ti ta tlat a.

       Matthew chu beidawng zetin a let leh ta a ni.

       A tuk zan, Sweet Valley beih a nih tuk zan, zan rei tawh lamah Sudden-a leh Belly chuan BB Ranch chu an thlithlai a, harsa lo tak hian Nancy an dahna pawh a hre thei ta mai a; tin, BB Ranch lam chuan Matthew leh a mi chhawr ten Sweet Valley an chhuahsan lai an hmuh a, an thupek zawma chhuahsan ni ngeiah ngaiin an inthlahdah deuh hle mai bawk. Suddena te chu an ṭhian te hnenah kir lehin, khawvar lam, an mut ngheh lai taka bei turin an inruahman nghal a.

       Khawvar dawn hnaihah chuan BB Ranch hnaihah an awm vek tawh a, Sudden, Snap, Yorky, Belly, Parson leh midang pathum te bakah Big Folly Cowboy pahnih an tel ve a, an vaiin mi sawm an ni a, Mathew erawh Sudden-a'n a kal a rem ti ve tlat lo va.

       BB Ranch mi chhawr zingah, Bucky, Razo, Johny Lumbo, Bull Bulock leh Jason Curse te an thi tawh a, chuti chung chuan mi Sawmpanga lai an la awm a, mahse Cole Griffin leh Meyer kha khuaah an awm avangin Ben Harvey nen mi sawmpathum Ranch-ah an awm a ni. Heng ho hi a ṭhen chu Mexican an ni a, an vai mai hian pawisak nei lo tak tak leh, chhuanlam ho tèa mi thah mai hreh lo tak tak an ni vek thung.

       An beih mai an ring lo a ni chék ang, ralveng pakhat bak an lo dah lo va, chu an ral veng chu Sudden-a chuan a veh phei ṭhan ṭham a, a Puaruk kawmin a lu-ah a chhut sak a, a ka hnawhin a phuar hlawm nghal bawk a. Chutah, midang zawng chu Cowboy ho riahna Bankhouse lam bitum tur chuan an insem darh nghal sang sang a. Sudden-a chuan inchhung a luh a, loh theih loha Silai hman a ngaih chuan, Silai a rik veleh Bankhouse lam chu an rawn kah dan azira kap nghal turin a ti a. Ani chu Ranch lam pan chuan fimkhur zetin a kal ta nghal a.

       Kawngka chu a han kik karh karh a, Ben Harvey chu a awm ngeia a rin avangin aw ti danglamin a han ko a, rei vak lo hnuah kawngka chu a rawn inhawng a, "Eng nge ni?" a rawn tih rual chiah chuan Sudden-a chuan a Puakruk kâwmin a lu-ah a lo chhu nghek a. Hmanhmawh leh fimkhur zet hian inchunglam a pan chho ta nghal a.

       Inchung pindan pakhat aṭang chuan Silai a rawn puak ṭhuai a, Sudden-a chu a inher zawk a, a nak chu a thip vang vang mai a. Silai kah detna zawn chu a han kap ve nghal a, mihring ṭe ṭhawt hi a han hria a, a hliam chu ngaihpawimawh theih a ni tawh loh tih a hriat avangin inchunga Nancy an dahna pindan nia a rin lam pan chuan hmanhmawh zetin a kal nghal a. Silai a rawn puak leh ṭhuai a; mahse Sudden-a chu a fuh tawh lo, Silai lo rikna lam chu a han kap let ve lehnghal zat a, thimthamah chuan  thawm ri hrawih hrawih a han hria a, a reh zui ta daih a.

       Chutih lai chuan pawn lamah pawh Silai a puak nasa ve hle tawh a, an inring lo leh inthlahdah lai an ṭhawn thut avangin BB Ranch Cowboy ho chu reilo te an han chiai a; mahse hmun ralṭia khawsa ṭhang leh Gunman pawisak nei lo tak tak an nih hlawm avangin an chiai rei lo. An rawn kap ta chu a hlauhawm thei fua fua hle mai a.

       Belly chu a ṭe ṭhat a, a hnu chuan, "Khanglang che u chuan," tia phun nang nang pahin amah rawn kap thawitu lam chu a han kap zawt zawt a.

        Sudden-a pawh chuan hun khawhral mai mai hman a ni lo tih inhriain pindan pakhat kawngka chu a han nek hawng rawp a, a chhungah chuan Sathau khawnvar hi a lo la alh teng teng a, Nancy chu phuar loh hian a lo awm a.

       "Nancy, kan hmanhmawh a ngai, " tih pahin Sudden-a chuan Nancy chu a kai tho lawp a, "Min zui rawh," a ti zui nghal a.

       Inhnuaiah an chhuk a, Kawngka bulah chuan hlim thlâ hi a lo awm a, Sudden-a chuan a ṭhian te kah palh a hlauh avangin, "Tunge ni?" a han ti a.

       Chupa chuan, "Jim, keimah ka nia," a rawn ti sup a.

       Snap-a aw a ni tih a han hriat chuan, "Snap, eng'e chanchin?" a han ti a.

       "Bankhouse lam ami te chu a hnung ngawah an tawlh lut a nih hmel, mi pali vel chu kan kap hlum tawh ang. Tunah hian ṭhenkhatin min la kap let ve reng a ni," Snap chuan a lo ti zung zung a.

       Sudden-a chuan, "Nancy hi, Sakawr kan dahnaah khan lo va hruai la, Big Folly lam panin lo va kal nghal mai rawh u; ka han thlithlaipui leh ang'e," a han ti a.

       Snap Lunt leh Nancy chu an kal ta nghal a. Sudden-a erawh chu a hmaa he Ranch a thlithlaia aṭanga fianrial deuha In te pakhat biru zet lam pan chuan a kal nghal a.

       An inkah chhung chu darkar chanve vel bak a ni lo vang, thim zinga inkap an nih avangin tu te lam mah mahin an inkah hlum zat an chiang thei lo va. Nancy ber an lak chhuah tawh avang leh BB lam aṭanga rawn kah let a awm tawh loh avangin Sudden-a chuan tawlh kira Big Folly pan nghal a rawt ta a ni. An Sakawr dahna an thlena Big Folly Ranch lam pana an tlan lai chuan khua a var ṭan tawh a.

       BB lam chu Bankhouse chhunga riak mipasarih kah hlum an ni a, a ṭhen chu Bankhouse hnung ngawah thawmhnaw pawh ha ṭha mumal hman lovin an tawlh lut a, khua a han var a, anmahni beitu ten an chhuahsan hnu-ah Ranch-ah chuan an rawn kir leh a. Ranch Ina Sudden-a'n a chhut thluk kha Ben Harvey-a'n amah awmpui tura a tih a ni a, amah Ben Harvey chu Sudden-a rawn kaptu kha a ni, Sudden-a'n a kah let vawikhatnaah khan a malpuiah kapin a vawihnihnaah a hrawkah tak a kap hi a lo ni a, a thi chiang hle a ni. A la dam ho chu an thu a rual lo hle a, anmahni beitu te chu tu te nge an nih hre chiang lo mah se, Sweet Valley ho leh Sudden-a te an nih ngei an ring thung.

       Ben Harvey ber a thih tawh si avang leh Cole Griffin chu khuaah a awm daih avangin engtia awm zel tur nge tih thu-ah an inhnial a. An zinga pakhat chuan, "Khapa, Marshal-a ṭang kha Sudden-a a nih zawngin kei chu ka bansan dawn," a lo ti a.

       Pakhat leh chuan, "Kei pawh, Sudden-a khin zui chu ka duh bik lo, Hell City a luh chhuah dan reng a huaisenthlak e mai, ka tel ve tawh dawn lo," a lo ti ve bawk a. A la dam panga zingah chuan Dirty Wizard leh Mexican pakhat chiah hian la awm zui an tum ta a ni.

       Del Rio-ah chuan BB beih a nih thu chu nihnih chhung chu tumahin an hre lo va, Double D Cowboy ten BB Ranch an tlawh mai loh bakah, Dirty te pawhin khua an la luh leh rih loh vang a ni. Sudden-a te ho lah kha Big Folly an thlen hnu lawkah Sweet Valley luah lum leh turin an kal nghal ta mai bawk si a.

       Sudden-a chuan a nakah hliam na vak lo a tuar a, nihnih hnuah chuan Del Rio lamah thil chingfel turin a kal zui leh ta nghal a; Yorky leh Snap-a'n an zui a.
* * * * * * *

       Dirty Wizard chuan Del Rio Marshal thar chu a bekbawr sur sur a, a thu sawi avang chuan Marshal chu a thinrim hle tih a hriat theih; chu chu BB Ranch beih a nih hnu nihnihnaah a ni.

       John Denver-a Saloon-ah chuan khuaa mipangngai tak tak china ngaih te an fuan khawm a, a ṭhenin Poker khelin an nui thawm mam mam a, chutih lai chuan Sudden-a te pathum chu an rawn lut ve a, a lo awm ho chuan an lo melh hrak hrak hlawm a.

       Sudden-a'n Cole Griffin a han hmuh chuan mak a ti deuh a. John Denver chuan nelawm vak loh hian a lo melh a, Cole Griffin pawh chuan a lo melh ve ralh a bawk a. Chutah Griffin chuan Sudden-a lam a rawn pan nghal a, "Outlaw, luman nei, man tuma veh mek tan chuan Del Rio-ah hian hmun a awm lo a ni," ring leng lawnga tih pahin, rang deuh hian a Puakruk a phawi a, Sudden-a chu a tin ta nghal a. Dirty Wizard-a'n BB Ranch beih a nih dan a lo hrilh tawh avangin a thinrim hle bawk.

       Sudden-a chuan Cole Griffin-a kawrâwma Marshal Badge a han hmuh chuan a nui sak a, "Griffin, Law Officer i nih thu hi ka hre tlai ṭhin ngawt mai," a han ti ve a.

       Thinrim zet hian, "Mr. Sudden, i Gun-belt kha hlip rawh," Cole Griffin chuan a han ti ṭhat a, Saloon-a awm ho lam chu a han hawi kual a, "Pute u, hepa, James Green inti hi Sudden-a a nih thu in lo hre tawh a, chu chauh chu ni lovin, hepa hian nihnih kal ta khan he khuaa pa zahawm taka kan ngaih Ben Harvey chu a that tih ani hian a sawi a ni," tih pahin Dirty Wizard chu a han kawk a.

       Saloon-a awm ho chu an thum hak a, pakhat chuan, "Khuaah hian thingzar a tam a ni lo'm ni?" a lo ti zauh a. Chuta awm zinga a tam zawk chu pawmpui tih hriat zet hian an lo rum nghut nghut hlawm a.

      Sudden-a chuan a dinhmun chu a ṭha tehchiam lo thei tih a hria a, Yorky leh Snap-a chezia a han hmuh chuan a mitmeiin a han khap a, amah chuan a Gunt belt chu hlipin Snap chu a han pe a; chutah, "Thil sawi fiahna hun ka neih ngei ka ring e " a han ti a.

       Cole Griffin chuan, "Sawi rawh" a han ti chhum hmak a.

       Sudden-a chuan Sweet Valley beih a nih ṭhin dan te leh, Ben Harvey leh  a hoten Mrs. Nancy an rukbo thu te chu a han sawi chho ta a.

       Cole Griffin chuan, "Mi inring lo lai i kap hlum a ni; chubakah, Dirty hian Ben Harvey-a'n Mrs. Nancy a rukbo nachhan chu Mr. Matthew-a'n a leiba a rulh theih loh avanga kar fiam nana a tih a nih thu a sawi a ni," a han ti leh a.

       "Mrs. Nancy chhanchhuah kan tumna lama thimtham zinga ka kah kha Ben Harvey a nih chuan, amah a ni tih ka hre hauh lo, min kaptu khan ka nakah min kap hliam a, Silai rikna lam hawia ka kah ve khan a fuh ta a nih dawn chu," Sudden-a chuan a han ti te te a, "Chubakah Mr.Cole, Matthew hian Ben Harvey-a lei a ba miah lo, khapa khan a phuahchawp a nih loh pawhin nangma phuahchawp a ni tal ang," a han ti chang ta fal mai a.

       Griffin chu a han ngawi deuh rih a, "He khua hi i chawk buai a ni," a han ti ngawt a.

       Za vak lo hian Sudden-a chu a ṭhen sak a, "Del Rio hi ka lo thlen hma pawhin a buai sa a ni tih hretu te chu heng mi te hi an ni," tiin a han en kual hlawm a, "A nih leh, hetah hian nang hi engvanga lo let leh nge i nih?" tiin a lo zawt lêt khauh a.

      Cole Griffin chuan, "Chu chu i lo ngaihven a ngai lo vang, tunah hi chuan i chungchang a ni kan sawi," a lo ti ta zaih a.

       Sudden-a chuan a ning ṭan deuh hle mai a, "Griffin, ka han hrilh mai ang che, Del Rio-ah hian Ben Harvey thunun tur leh helai chhehvel hrim hrim thian fai tura Arizona Governor Mr. Bleke leh Texas Governor Mr. Edmund Jackson Davis-a hriatpuinaa rawn kal ka ni a, Ben Harvey hi a khaipa ber a lo ni lo tih pawh ka hre tawh; tumah hian ka kawng an dal dawn miah lo," a ti ve ta hmiah a.

       Chu thu leh Governor pahnih te hming avang chuan mi ngaih dan chu a insual leh deuh ni hian a lang a; mahse chu boruak chu Griffin chuan a lo man vat a, "Chuti Ben Harvey i thah thu chu i pawm a ni maw?"  a han ti leh a.

"Thimthama ka kah kha Ben Harvey a nih a, a thi a nih chuan...aw, ka kah hlum a ni; mahse min kap a, ka kap ve mai a ni," Sudden-a chuan a han ti nghal a.

       Chutah Cole Griffin chuan, "Chu i thah ngei a ni tih i pawm nghet ta tihna a ni maw?" a lo ti nawn leh vat a.

      "I thu sawiin awmzia a nei lo, Griiffin. Kei hi thil sual titu-ah min puh thluk i tum hrim hrim a nih kha, Sudden-a an tih chu ka ni ngei a; mahse Texas-a an sawi ṭhin anga misual ka ni lo, mi ka suamin ka rawk ngai lo va, min nawr chep a, Silai an chuh hmasa a nih loh chuan tumah ka kap hlum ngawt ngai lo, helai hmunah hian Givernor pahnih hriatpuia lo kal ka ni ka tih kha; ka lehkha neih hi ka entir che a ngai dawn ta a ang hle mai," Sudden-a chuan a han ti leh a.

       Griffin chuan Saloon chhunga mi te chu a han en kual a, nui ṭhaw chung hian, "En teh u, chhuanlam tur a zawng kual mai mai a nih hi, in thutluknaah ka dah e," a han ti a.

        Pakhat chuan, "Outlaw khai hlum a khat tawh khawp mai," a lo ti zauh a. Midang chuan Sudden-a chu an hual ta tuau tuau a.

       Chutah Snap-a chuan a Puakruk a han phawi dawk zawk a, Sudden-a hnaihtu te chu rum zeta en chung hian a tin kual a, "Amah khawih hmasa apiang in thi ang," a ti chhum hmak a.

       Snap-a'n Puakruk huma Sudden-a thlavang a lo hauh chuan Griffin-a thin a ti rim kher mai, Snap-a hnenah chuan, "Nang kha lo inrawlh suh, khai hlum i duh ve em ni?" a han ti ngal ngal a.

       Snap lah chuan ngaipawimawh âwm lo fé hian, "Marshal, dik taka rorel a nih hmaa mi khai hlum tum hi Low Officer dik tak te tih dan tur niin ka hre lo; i Silai pawh kha han hmet puak chhin teh, hremhmun lamah i liam tel ve tho ang," a lo ti mai si a.

       Cole Griffin chu a meng dur ham mai a; chutih lai chuan John Denver-a chu a lo ṭawng ve ta a, "Marshal, Governor hriatpuina lehkha a neih chuan kan en ngei tur a ni ang," a lo ti ve ta chiah bawk si a, a rukin a han inseh ruh ngawt a.

       Sudden-a chuan, "Snap, khang mimawl ho kha lo enkawl rih rawh, thil sawi tur ka la nei," tiin Cole Griffin lam chu a hawi a. "Cole, dan bawhchhiain dan pawna hnawl i ni a, chumi hnu-ah mak tak maiin ngaihdam i ni a. Sheriff Murdock-a'n ringngam chein a hnuaiah a thawh tir che a; mahse nang chuan phatsanin i bum a, BB Ranch-ah i hrêng a ni lo'm ni?" a han ti a.

       Griffin chuan, "Dawt a nih chu," a lo ti hmuk a; a ruk chuan mak a ti hle mai thung.

       "Dawt nge thu dik tih chu kan la hre mai dawn alawm," Sudden-a chuan a han ti te te a, "I chungchang ka hriat dang hi ka han sawi leh ang'e. BB Ranch saw Ben Harvey ta a ni na a, thil sual tihna engkima thil ruahhmantu chu nangmah hi i ni, Sweet Valley ramchhungah thil hlu tham tak a awm tih in hriat avangin Mr. Mathew te nupa chu Ben Harvey nen nawr chhuah in tum a; mahse kei ka lo lan tak avangin in tum angin thil a kal thei ta lo a nih hi," a han tih zawm a.

       "I sawi àwm ang thiam hle mai; mahse Ben Harvey hi Sheriff Murdock te nen Del Rio kan rawn luh hma kha chuan ka hre lo tlat," Cole Griffin chuan a lo ti ve tlat a.

       Sudden-a chu a nui mai a, "Sweet Valley ka thlen hnu khan a rukin BB ram ka fang chipchiar hle asin, BB Ranch ramchhungah ka hmu fo che a, a tir chuan an michhawr i ni ve turah ka ngai mai a; mahse Sheriff Murdock i rawn zui khan mak ka ti hle a ni. Tichuan, San Angelo panin in kal a, Sheriff chu bumin i phuarbet a, BB Ranch-ah tantirin i kawng a dal loh nan thah i tum a ni. Jim Silver-a lambuna thahna pawh kha i remtihna ngeia tih a nih ka ring; a titu pawh Double D michhawr Delreido a ni tih ka chhui chhuak tawh asin," a han ti leh ta zel a.

       Griffin chuan, "Dawt phuahchawp i thiam hle mai Mr. Sudden," a han ti na a, a rilru chu a nuam tawh chiah lo. BB chu beih ni mah se, mipakhat an dahna hmun kha chu an hmuh chhuah loh a ring ve ringawt a. "I phuahchawp thu sawi chu fiah turin tunge hretu i neih tâk, Sheriff Murdock a awm leh awm loh hre turin San Angelo lamah mi kan tir mai dawn em ni?" tiel awka deuha tih pahin, a han nui lui chiam a.

       Sudden-a chuan awki hniam leh fiah tak si hian, "Chu chu a ngai lo vang, Griffin" a lo ti a.

       Cole Griffin chu Sudden-a ṭawng chhuah dan avang chuan a rilru a nuam lovin, a awmzia a han ngaihtuah a; chutia a inngaihtuah buai lai chuan mipakhat, chauh hmel zet leh hmel pawr phang mai hi a rawn lut a, chumi chu San Angelo Sheriff Jack Murdock a ni. Sheriff a han hmuh chuan Cole Griffin chuan a tan engkim a tawp tih a hre thiam nghal a, Sheriff chuan Governor hnen thlen a tum ngei dawn a, a chan chu a ṭha dawn hauh lo tih a hriat avangin Sheriff lam hawi chuan a Puakruk chu a han lek a; mahse Sudden-a chuan rang deuh hian a va zuan a, Cole Griffin-a Puakruk hum lai chu a petbthlak sak a; chutah na mangkheng hian a khabeah a han dawm zui a, Griffin chu chhuatah a let ta hual a.

       Jack Murdock chuan Saloon chhunga awm te chu a han melh kual a, "Mr. Green-a thu sawi kha a dik vek a ni; Sudden-a a nih thu pawh a dik e; mahse thil hriat sual a awm a, tunah hian kan Governor hriatpuina lehkha keng thlapa rawn kal a ni bawk. Jim, i lehkha kha Denver-a te ho hi han entir tawh ta che," a ti ta a.

       Sudden-a chuan lehkha chu a han phawrh a, Saloon chhunga awm te chuan, Del Rio leh a chhehvela a duh anga thil ti tura Arizona State Governor Bleke hnuaia Deputy Sheriff ni mek James Green chu tirh a nih thu Texas Governor Edmund Jackson Davis hming sign hnan thlap chu an inpe kual ta a. Chumi zawhah San Angelo Sherriff Jack Murdock chuan Del Rio an chhuahsan hnuaa thil thleng, Cole Griffin-a'n a tih dan leh BB Ranch-a a hren thu te, Mrs. Nancy an chhanchhuah ruala Sudden-a ten a rawn chhanchhuah tak thu chu a sawi ta dap dap a.

       Sudden-a chuan, "Sheriff, Griffin hi engtin nge i tih dawn?" a han ti a.

       "Governor hnenah ka hlan ang," Murdock chuan a lo ti sam et a.

       "A ṭha e; kei chuan ka hna ka la zo lo, Double D lamah ka léng dawn a ni," tih pahin Sudden-a te chu an chhuak zui ta nghal a.

        Dirty Wizard kha an buai lai takin a lo relhru bo hman a, Sudden-a chuan pawi a ti ang reng hle a. Khua an chhuahsan dawn chuan Puck Parson hi khawchhungah a lo lut ve mek a, Sudden-a chuan a ṭhianpa laka Delreido tha ba ṭhinna hun siam sak ngei chu a tum tlat a, "Parson, tih tur dang i neih lem loh chuan Double D lamah lo kal ve ta che," a han ti a. Parson chu a lo bu nghat a, Snap Lunt leh Yorky te nen an pali chuan Double D lamah Delreido hmu turin an kal ta a ni.

       An va thlen dawn chuan kawtah hian Sakawr chungchuan inpeih sa thlap hian Dirty Wizard, Double D Foreman leh Delreido chu Ranch kawtah an lo awm a, Sudden-a te pali an han hmuh chuan hmanhmawh zeta Sakawr chunga  chuangin a  tlanchhe ta nghal a; Dirty chuan engkim a lo hrilh tawh a ni ngat ang.

        Sudden-a te pawh chuan an umzui ve nghal vat a. Anni chuan Puakrukin tin pawh tin mumallo hlei lovin an rawn kap a, silaimu chu a ving fia fia a, Sudden-a te pawh chuan an han kap let ve nghal a, chutah Delreido Sakawr chu an kah fuh avangin a tlu tawp a, Dirty Wizard leh Double D Foreman chu an tlan ta zel a. Sudden-a chuan anni pahnih chu um a ṭulna chhan a hriat tawh loh avangin an ding a, Delreido chu an han hnaih a.

       "Hnunglam aṭangin chance pe miah lovin Jim Silver kha i kap hlum a, khai hlum mai hmabak i ni; mahse tunah hian chance ka pe ang che. Parson hi Silver-a ṭhianpa a ni a, ani nen hian Silaiin in inhmachhawn ang a, i phawi khalh phawt chuan ka kaltir ang che," Sudden-a chuan a han ti a.

       Delreido chu a zam hle a, Jim Silver-a a kah hlum thu chu zep pawh a tum lo, Johny Lumbo leh Ben Harvey rawtna anga Cole Griffin-a remruat a nih thu a han sawi a, a thi ngei dawn ni hian a inhria a; mahse  a chance neih chhun chu a hman ṭangkai theih hlauh chuan nungdamin a la awm ve dawn tih a inhriat avangin Sudden-a sawi ang chuan a ti lo thei dawn lo a ni.

   Parson leh Delreido chu an inhmachhawn ta ran mai a, a sirah chuan Sudden-a te pathum chuan an lo thlir ṭhap a; chutah Parson leh Delreido chuan a rual deuhthawin Silai an chuh ta a, an hmet puak dun nghal ṭhuai a, Parson chu hnunglamah a tlu tawp a, Delreido erawh chu a la ding ngal mai thung.

       Sudden-a chuan pawi ti awm deuh hian  Parson-a chu a en reng a; mahse a thutiam ang ngeiin ti dawn a ni. Delreido lam chu a hawi a, "Ka sawi tawh angin ka ti ang. Kal bo rawh, ka hmel i hmuh leh chuan i thi ngei ang," a han ti zui a.

       Delreido chu Puakruk pawh lek kawh tawh chuang lo hian muangchangin a inher a, thui lo te a kal hnu⁃ah a ṭhingṭhi hnawk a, leiah chuan a tlu bawkkhup ta a. Sudden-a chuan a va pan hnai vat a, a chuap zawnah hian Parson-a silaimu chuan a lo deng fuh ve reng hi a lo ni, a tlin ta bik lo. Delreido silaimu erawh kha chuan Parson-a hnarkawnah tak a fuh a.

       Sudden-a chuan, "Mexican Silai phawi leh kahah chuan zahpuiawm lo tak a ni," a ti sap a, Delreido ruang chu kalsanin Parson-a ruang bulah chuan a va ding a, inthiam lo ru tak chung hian a lukhum chu a phawkin a bu nghat a.

       Del Rio chuan Marshal thar an nei leh a, chu chu Belly kha a ni. San Angelo Sheriff Jack Murdock pawh chuan midang chah belhin an hren laia an sawisakna hliam a ziaawm deuh hnu-ah Cole Griffin chu San Angelo an panpui ta bawk a. Matthew leh Nancy te nupa pawhin thlamuangtakin Sweet Valley an luah leh thei tawh a, Del Rio leh a chhehvela thil a felfai tak hnu karkhatah chuan Sudden, Snap Lunt leh Yorky te chuan Arizona lama Hattchet Folly hmuna  YZ Ranch chu panin an Sakawr chu an tlantir ta a. Jim Silvera Sakawr, 'Big Wolf' kha Yorky hnenah Mathew te chuan an pe ta nghe nghe a.

       Yorky chuan Rosalyn chu ngaina in hmel ṭha ti teh mah se, YZ Ranch lama kir a, Sudden-a bula thil zir chu a la duh tlat avangin awm chilh chak tak chungin chu nula hmel ṭha tak leh duhawm em em mai chu a kalsan ta a ni.

       Rosalyn chuan, "York, lo kir leh ang che aw," a han ti a.

       "Ros, ka tiam thei lo che; mahse nang hmuh leh che chu ka thil duh ber a ni kumkhua ang," a han ti ve sap a, Sudden-a te tlan liam ta chu a Sakawr thar, 'Big Wolf' nen chuan an um zui ve ta a.
* * * * * * *

       Sudden-a'n Del Rio a pan hmaa  Texas Governor nena an inbiak dan hi i han sawi leh lawk teh ang.

       Governor Bleke khan Sudden-a chu lehkha kha a ziah sak ta a; Sudden-a'n Texas Governor a va hmuh chuan zép lovin Sudden-a a nih thu a sawi nghal a, ani chuan mak tih hmel zet hian a lo en a.

       Texas Governor Edmund Jackson Davis hi American Civil War hnu, 1870 - 1874 chhunga he dinhmun chelhtu a ni, amah hi Texas Governor 14 na a ni nghe nghe. Lawyer, Politician leh American Civil War laia Union Sipai General a ni bawk.

       Sudden-a'n a nihna a han sawi chuan a Silai han dap mai hi a han tum a; mahse Sudden-a chuan, "Ka pu, tum duh suh," a lo ti sap a. Governor-in a han en leh chuan Sudden-a Puakruk kaw hmawr thim raih mai chuan a lam a lo hawi reng tawh a.

   Governor chuan, "Inpék tuma lo kal i nih chu ka ring lo," a han ti nghut a.

       "Ka pu, i ring dik ngawt mai, hnathawk tura lo kal ka ni; Texas State-a ka hmingchhiatna leh Outlaw ka nihna thai bo hna thawk turin," tih pahin Arizona Governor Bleke lehkha chu a han pe a.

       Governor chuan chu lehkha chu rei ngial a han bih a, Sudden-a chu a han en leh vang vang ṭhin a; chutah, "I silai kha dah tawh rawh, hriatpuina lehkha chu ka pe che ang a, i duh danin thil i kalpui thei ang; Governor Bleke-a'n a rin phawt che chuan ka tih sual ka ring lo, ka ṭhian ṭha tak a ni si," a ti ta a ni.

   A tukah Sudden-a chuan Del Rio chu a pan ta a; i chhiar zawh tak te kha a hmingchhiatna leh Outlaw a nihna thai bo tura a hnathawh leh thil tih te chu a ni; dan ang chuan Texas Governor chuan dan pawn mi a nihna a hlip tawh a, hemi hnu aṭang hi chuan, a hming 'James Green' tih pawh, 'Donal Severn Petterson' tiin a thlak ta bawk a; mahse, amah hretu tam tak chuan a Puakruk phawi ran leh kah thiam em avangin an thinlungah 'Sudden' tiin an chhinchhiah reng tawh ang.

A TAWP TA!