VALENTINE'S DAY A NI ASIN!
(Short Story:
V' Day Pual)
© Chhantea Pautu
Thil ri bur thawm avangin inchung lamah chuan ka chho a, ka han thlen chuan inchung pindanah tumah ka hmu miah lo. Marami Dressing Table leh thil dang chu a lo let rum a, hmeichhe incheina thil vel chu pindan chhuatah chuan a thal ram a, Dressing Table-a invuah darthlalang pawh chu a keh darh nuaih a, darthlalang keh them tla darh nuaih bul chhuatah chuan thisen tharlam tak hi a baw niaih a, chumi hmun aṭang chuan inchung zawl chhuah theihna kawngka lamah thisen far chu hmuh tur a awm zui thliah thluah a!
"Siamte, ka tihpalh a ni, min hre thiam rawh, vawiin hi Valentine's Day a ni asin," tih ri hi ka han hria a. Hruaia aw a ni tih ka hria a, inchung zawl lam pan chuan ka chhuak ve ta nghal a.
Ka va chhuah chuan Hruaia kut chu Siami chuan puan nemin a lo tuam mek tawh a, a kut a tuam sak lai chuan, "Siami, ka fapa enkawl tur hian hmeichhia tumah ka ring zo tawh lo vang," a han tih leh a.
Ngawi rengin ka pawh phei a, dilchhut hun ni riha ka hriat loh avangin Siami'n Hruaia kut a tuam lai chu ngawi rengin ka lo en a; chutih lai chuan mipa naupang kum li mi âwm vel hi inchung zawlah chuan a rawn tlan chhuak chan chan a, "Âpa..." tiin Hruaia chu a va pan a.
Marami chu ka hmu ve miah lo va; tunhmaa Hruaia bialnu ni ṭhin Siami ka hmu nawlh mai chu mak ka ti thung hle a!
Hruaia leh Marami chu Biakin hawng ngata innei an ni a. Hruaia hi Aizawla hnathawka awm niin hnathawka a zinna lamah Marami nen hian Gauhati-ah an inchhar a, an innei zui ta vat nghe nghe a ni. Nupa hlim tak leh induh thiam tak an ni chho a, fa an nei zui vat a; mahse a chhang tur hi Marami zawk chuan neih mai a duh ta rih lo va, an fapa chhang hi a la piang leh ta lo a ni.
Siami thung hi chu sawi tawh angin Hruaia bialnu hlui, Marami nena an intawn hmaa a bialnu a ni a, thil eng emaw hotèavanga inṭhen ta daih an ni; hmeichhe fel leh Pathian ṭih mi, zaidam leh nunnêm tak a ni a.
* * * * * * *
Kum 2011 vel khan Hruaia leh Siami chu an inkawp ṭan a, an induhin an inhmangaih hle; mahse inhau deuh reng mai, Hauhuk nupa an sawi ang chauh an ni ṭhin. Siami zawk hi nula hrisel lo zet, nerve ṭhat loh avanga harsatna nei a ni a, Synod hnuaiah Missionary niin phai lamah rawngbawlin a awm a, harsatna karah nula chhel tak a ni, hmeichhe puitling leh vengva zet mai a ni bawk. Eng emaw avangin an inṭhen ta tlat mai kan tih tawh kha, ṭha takin la inbe fo mah se inngaizawng angin an inkawp leh ta miah lo va.
Siami hi Hruaia hian duhin hmangaih hle mah se, a rawngbawlnaah Siami chu a inpe thûk hle a, "Hruaia, min thlah tawh rawh, i thinlungah min dah tawh suh, kei chu ka rawngbawlna hi engtin nge a kal zel dawn ka hre lo, fa lu hloh ṭhaka ka awm pawh a ngai mai thei a, ka ti khawtlai mai mai ang che tih ka hlau a ni, nupui ṭha tak nei la ka duh a ni," tiin Hruaia hnenah a sawi fo a.
Mahse Hruaia chuan Siami chu a nghak ru tlat a, hun eng emaw chen chu ngaihzawng dang pawh a nei duh lo, midangah a rilru a pe hleithei lo a ni. Chutia inngaizawng pawh ni chuang lo va, ṭha taka Siami nen an inbiak ṭhin lai chuan, vawikhat chu thil eng emaw avangin Siami chu Hruaia lakah a thinrim a, a be duh ta reng reng lo va, Hruaia'n kawng tinrenga biak pawh a tum pawhin a chhang duh ta miah lo va. Hetih lai hian Hruaia hi a khua a har ru thei hle, amah hre thiama a nihna ang anga en theitu mi tu emaw a mamawh a, inbun ruaka insawi thâwlna tur hi a thinlungin a mamawh em em ṭhin a ni.
Hruaia chu khawhar takin a awm a; chutih lai chuan Gauhati lamah hna thil avangin a zin a ngai ta a, tluang taka zinin Marami hi a zuk tawng a, kum khat em pawh inzui lovin an innei zui ta a, Hruaia chuan Siami hial pawh a ngaihtuah reng lo thei ve ta hial a ni. Marami duh angin an inneih sarhù zawhah 'Muthi Park' lamah 'after shooting' an nei a; nupa hlim tak an ni zui a. Marami hi a hmel a ṭhain a nalh hle a, a pianphung leh a lan dan en chuan Hruaia hi a mipatpui te tana mipa vannei tih tur chi a nih phah chiang mai; amah Hruaia erawh pa lian lo, hmel pawh pangngai ve mai a ni a, a thinlung ṭhatna leh ruihtheih thila a fihlimna hi Marami hîptu a ni thung.
Hlim takin nupa an ni a, fapa an nei chho a, a lan dan chuan chhungkaw awhawm chho tak tur an ni bawk. An inneih hnu-ah 'Valentin's Day' a lo thlen apiang hian thilpek an inpe a, bati eng hnuaiah 'romantic dinner' an kil dun kum tin ziah ṭhin; mahse Hruaia ngaih ṭhat lohna tur thil chu kum 2017 kum tawp lam aṭangin a rawn thleng ṭan a. He thil inṭanna hi Marami'n 'Social Media' a tuipui tak em em aṭanga inṭan a ni; zan rei tak tak thleng a meng a, a hlimpuiin a tleipui hle tih a hriatin a tir chuan Hruaia chu a lawm rilru zawk hle nghe nghe a. Mahse a nupui chuan a tuipui ta mah maha a hriat chang leh, amah chu thlahlel ta lo riaua a lan takah chuan a ngaimawh ru ṭan a, mipa tana han ngaimawh thama a ngaih loh avang erawh chuan a sawi chhuak ngai lo thung.
A nupui awm dan chu Hruaia chuan a chîk nasa telh telh a, sawi thiam chiah si loh hian a ngaih chu a ṭha thei ta lo va, a nupui lah chuan len chhuahna tur chhuanlam a hre tawlh tawlh a, an fapa a lo leikan deuh hnu phei chuan chaw ei khawmnaa telna tur a hre thei ta riau mai lehnghal a, Hruaia thinlungah chiang ngam si lo va rinhlelhna a awm ṭan ta tlat! Fiahna engmah a nei lo, a thinlung erawh a ngaih a ngam si lo. A Phone a 'check' sak fo a, a nupui hi a fing nge, a rin ang thil hi engmah a thleng lo zawk tih pawh hriat lohin a nupui Phone-ah rinhlelh tur engmah a hmu ngai bawk si lo a ni.
Hruaia hi chhun lamah 'Private Company' pakhatah thawkin nilengin a chhuak a, tlai thim hma deuhin a haw ṭhin. Marami erawh chuan in lam a enkawl a, a fapa chu 'pre-school' pakhatah an kaltir a, a fapa chu a thlah zawhah inlamah a haw a, an ban hma chu a duh chuan hun awl a insiam thei hle ṭhin. A nih loh leh an in aṭanga hla vak lo, a nu unaunu fate chuan a fapa chu an lawm em avangin an awm sak fo a, Marami chu in lamah a awl ṭhin hle a ni. Zep lem lohah chuan inchhung chetah Marami hi hmeichhe taima tak a ni lo tlat bawk a.
Hun a kal a, ni a liamin kum a vei a. An fapa kum li a nih kum chuan an ṭhenawma nu pakhatin a ṭhiannu hnena a thil sawi chu tihpalh thil thuin a hre ta hlauh mai a; chu chu a nupui chungchang a ni, a chhe lam leh nghal. Chu thil chu a dik em tih fiah a duh a, a nupui zawt ngawt se, finfiahna a neih si loh chuan awmze nei miah lo va inhauhna bak awmin a ring si lo va, nu pakhat thu sawi chu a dik leh dik loh amah ngeiin fiah a tum ta a ni.
Hruaia chu chhuanlam siamin a hnathawhna aṭangin a haw hma thut ta fo a, a haw hma dawn hian a nupui bulah engmah a sawi lawk ngai lo; mahse mak takin engmah a hmuin a man ngai lo. A haw hma chang pawhin a nupui chuan tu mipa mah a lo awmpui ngai lo va, a lo haw hma chhan zawtin ṭha takin a lo dawngsawng thei zel thung si a. Heti ang a nih takah chuan nu pakhat thu sawi kha a ring lo ṭan a, a nupui a rinhlelh rûkna pawh a reh chho ṭan a, hun eng emaw chen chu a buaipui zui tawh lo a ni.
Mahse, an in bul vel ami te chuan a nupui awm dan chungchang chu an sawi sep sep a, zawitea an thil sawi ri chu a ring tial tial a, a hnathawh hlana an ina leng ṭhin mipa hming an sawi chuan Hruaia beng a thleng leh ta a. Sual hi chu thup hlen theih a ni lo an ti a, a dik pawh a ni mai thei; Hruaia chuan ni thei ngangin a hre ta lo va, awmze nei lova a nupui han chachhuah ngawt aiah engkim finfiahna neih phawt chu a tum ta a ni. A awm loh hlana an ina leng ṭhin mipa chu tunge a nih, khawia awm nge, eng ang mi nge tih leh, a kum leh hnathawh thlengin a chhui chhuak ta vek a. Chubakah, a hnathawhna panna kawnga a nupui ṭhiannu pawh dawp titih kàwm titih hian a len chilh zui nghal bawk.
* * * * * * *
Liansanga chu kum 29 mi a ni. Tlangval hleitling leh pian ṭha, hmel pawh chhe lo zet mai, hmeichhe ngainat chi tak mizia pu hi a ni a. A ler ang angin nula deh vel pawh a zei thawkhat hle. Hnathawh nghet a nei lo va, a pa hausakna ringa khawsa pawh a ni ve chuang lo va, harsa taka inhlawh chawpa ei hmu, mahnia awm leh khawsa, khawsak holam leh lolam zet, tlangval ngaihsam tak a ni. Tun hma eng emaw hun lai khan Marami nen an lo inngaizawng tawh ṭhin a; mahse a nun a hoh em avangin hmangaih teh mah se Marami chuan a ṭhen ta a, a ṭhen hnu rei lo teah Hruaitluanga nen hian an inchhar a, hun rei lovah an innei zui ta mai a ni.
Ṭum khat chu, Marami chawhmeh leia a bazar chu Liansanga nen an inhmu a, ani Liansanga chuan a ṭhiante inah Marami duh vak lo chung chu a hruai lui a; chuta ṭang chuan Hruaia te nupa inkarah buaina bul a rawn inṭan ta a ni. Marami hian Liansanga hi a hmangaih takzet a, an inṭhenna chhan pawh a nu leh pa ten, a theih hrâm chuan ṭhen tura an nawr vang a ni a, Liansanga mizia leh khawsa zia an enin an fanu hmakhûa chu êng lo riaua an hriat vang a ni ber. Chutia Liansanga nen an han inhmuh leh tâkah chuan a rilru khawhar ṭhin zia leh Liansanga a ngaih zia chu a thinlungah a lo thar leh, an inhmuh leh hmasak ber hian eng thil pawi mah sawiin khawsa lo mah se, engtin nge a hriat tih pawh a hriat loha an in ngeia a pasal hnathawh hlana Liansanga a rawn lén tâkah phei chuan an inkawm dan leh innel dan chu a thuk tawlh tawlh a, 'Social Media' lamah zanah an inbe zui a, nitin maiin Liansanga chuan a len chilh tlut tlut mai si a.
Marami chuan a awm dan chu dik a ti bik chiah lo; mahse a thinlung duhna chu a khap phal ngang lo a ni. Liansanga nena an inngaihzawn laia an chungchang engkim hretu a ṭhiannu, a pasal hnathawhna bul lawka awm Remruati bulah chuan an chungchang engkim chu a hrilh ta vek a. A ṭhiannu hian a awm dan chu ṭha a tihpui lo hle a; mahse ngen tak tea a ṭhiannu ve berin a ngen tâkah chuan a hnathawhna aṭanga a pasal a haw hma thut pawha Phone-a hrilh zel turin a intiam ta a ni. "Eng pawi mah ka tihpui lo vang," tia intiama a pasalin a hriat chuan a that duh mai dawna a hriat avang leh, Liansanga chu an ina leng tawh lo tura a tih pawha a rawn len luih zel vang a nih thu a sawi avanga Remruati chuan rem ti ngam chauh a ni. Ani hi chuan a ṭhiannu tân hian Hruaia hi pasal ṭha tak a ni tih a hriatpui tlat a.
Mahse Marami'n a ṭhiannu Remruati hnena a sawi leh Liansanga nena an awm dan dik tak chu chhim leh hmar ang hlauha inpersan a ni thung si. A nihna takah chuan Liansanga nen an inhmuh leh hma khan 'facebook coment' aṭanga inhre pawhin 'inbox' leh 'whatsapp' lamah nasa takin an lo inbe hmasa tawh a; hetia an inbiak nasat tawh avang hi a ni, a bazar pawh Liansanga'n ngampa taka a ṭhiante ina lénpui tura a pawh luih ngamna chhan.
Hruaia chuan a nupui awm dan chu a duh angin a chhui chhuak mai thei lo. A hna aṭanga a haw hma thut thut pawhin a man thei chuang si lo va, a tawpah chuan a inchhunga a tih atana a duh ngai loh thil ber mai chu a tih a ṭul tih a hre ta a, a nupui awm dan enthlâk nan an nupa pindanah 'cctv' a kam ru ta a ni. Chu 'cctv' a kam 'record' a hmuh hnu chuan a haw hma ṭuma a man theih miah lohna chhan chu a zawng chhuak leh phawt a, a tawpah chuan a hnathawhna bula a nupui ṭhiannu Remruati chu a pan ta a ni. Hruaia hian hetih chhung zawng hian a nupui chu a hau lo va, a rilru chu na teh mah se engmah a ti lang lo va, engkim a chînchhuaka chhui hmasak phawt a duh a ni.
'Valentine's Day' hma zan a ni a. Hruaia leh Marami chu an fapa muthilh hnu-ah an titi a.
"U Hruai, naktuk chu in Office chawlh te a ni bawk a, tlaiah Remi te inah IMC member hoin thil rel tur kan nei a, chaw ei nghal a ngai dawn a nia," a han ti a.
Hruaia chuan a chhang lawk lo va, a nupuiin 'Valentine's Day' apianga an tih dun ṭhin a ngaipawimawh ta lo chu a la na ru hle a. A nakinah chuan, "Maram, a va pawi ve aw...naktuk zan chu 'Valentine's Day' a ni a, kum dangah pawh 'romantic dinner' kan kil dun ziah kha; chubakah, mipawimawh tak chaw eipui tur kan nei asin, in thil tih tur chu ṭhulh mai rawh," a han ti a.
Marami chu an han thaw hak a, "Ṭhiante an va zahawm duh dawn ve, ṭhulh a rem lo asin; kan pahnih chauh kan nih dawn chuan loh chu, ka ṭhiante bula ka ei ve mai zawk ang," a han ti leh a.
"Maram, i ṭhulh mai a ngai a ni, Remi chu hrilh mai rawh," Hruaia chuan a lo ti bung ta nghat a.
"Ka hrilh ngam lo, ṭhulh bik nih chu a zahthlak khawp asin," lungawi loh hmel tak hian Marami chuan a lo ti ve leh a.
"Keima'n ka hrilh fiah sak dawn che nia," Hruaia chuan a lo ti leh mai a.
Marami chuan, "Nanga hrilh kher a ngai lo," a lo ti hmar a, lehlam hawiin a mu chu a inlet ta thak a.
Hruaitluanga chu a thin a rim ru tawh hle mai; mahse a tuk zana atâna a ruahhmanna avangin a insum hram hram a, "Maram, in thil tih tur chu ṭhulh phawt mai teh, mikhual pawimawh kan nei dawn ka tih tawh kha," a ti a, engmah dang an sawi tawh lo.
Chumi tuk zing hma takah Hruaia chu a tho a, a nupui Phone chu a la a, Liansanga chu whatsapp message a thawn ta a, Phone chu a thukru nghal hmiah bawk. Marami chuan a thawh hnuin a Phone chu a zawng nasa hle a, a awmna a pasal a zawh lah chuan, "Ka hre hleinem," tih bak a chhanna a hmu si lo. A rilru chu a mangang ru takzet a.
Tlai a lo ni a, khua a rawn thim a. Dar 7 velah Hruaia te kawngka chu miin an rawn kik ta a: hetih lai hian an fapa chu a muhil tawh a, Marami leh Hruaia chu ṭhut khawmna pindanah an awm a, Marami'n TV a en a, Hruaia'n lehkhabu a chhiar thung a. Kawngka kik thawm a awm rual chuan Hruaia chu a tho nghal vat a, a nupui hnenah chuan chaw ei siam turin a ti zui nghal bawk a.
Marami chuan chaw ei chu a lo va siam a, a pasal leh kawngka kiktu ni ngeia lang chu a hriat chian phak chiah si loh hian an ṭawng bawrh bawrh ni mai hian a hria a. Chaw ei chu a siam zo thuai a; chutah an mikhual, an chaw eipui tur chu a pasal chuan choka lamah chuan a rawn luhpui ta a...
Marami mak ti chu a meng kâwk a, Liansanga pawh a hmelah a phur miah lo tih a hriat theih. An pahnih awm dan danglam ta chu Hruaia chuan a hai hauh lo va; mahse ṭha tak leh pangngai tak hian chaw kil turin a han ti ve ve a, "Thil sawi ho tur kan nei," a han ti zui a.
Hruaia chuan chaw a bar mawlh mawlh a, chaw chu a tep chap chap a, Marami leh Liansanga chuan chaw ei chu har an tih hmel hle mai, an ngawi dun tlawk tlawk a. Hruaia erawh a titi vei luam a, an mikhualpa chu zawhna a han zawt leh rih ṭhin a, ani pawh chuan a rul tawk chuan a lo chhang ve mai bawk.
Liansanga rilru-ah chuan nuam tih lohna lianpui hi a awm a, chaw pawh a bar meuh lo. A tawpah chuan ni thei nganga a hriat loh avangin, "Hruaia ka haw tawh mai ang nge," tih pahin thawh mai a han tum a.
"Ṭhu rawh, Sanga..." Hruaia aw chu a ring lo na a, a vawtin a chiang hle mai.
Mahse Liansanga hi mipa luhlul zet a ni ve bawk a, an pumrua han en phei chuan tharumah Hruaia chuan a hneh dawn lo chiang sa; mahse Hruaia aw vawt leh nelawm loh tak chuan a la ṭhuttir mai mai a ni, a ngawi reng a.
"Sanga, ka nupui nena inkhawsak dan engkim hi ka hria asin, tunhmain in lo inngaizawng tawh ṭhin tih pawh ka hria..." Hruaia chuan a han ti ṭan a.
Marami chu a meng phawk hra a, a hmel chu a dâng sawp sawp a.
Thinrim hmel zet hian Liansanga chuan, "Eng maw i hriat, i nupui uiretu-ah min puh i tum deuh elo?" a han ti khu khu a; Marami nena an khawsak dan kha Hruaia hian a hriat reng a ring lo, Marami lah engmah hre lawk lo tih hriat zetin a meng phawk nasain a dâng sawp sawp mai bawk si, chu chuan a pasal hnenah engmah a puang lo tih a ti langin a hria a. "I mi puhna chu thil awm ang lo tak a ni..." tih leh pahin Liansanga chu tho ta uaih a.
Chutah, "Heta ṭang hian Ramengi tel lovin i chhuak dawn miah lo," tih pahin Hruaia chuan Revolver hi a rawn phawrh a, Liansanga chu a tin ta ran mai a.
Marami chu hlauin a lo ṭe ṭhawt a.
"Ramsangi hi ka tan chuan uire a ni tawh a...kan nupa khuma in khawsa lai video hmuh kher in duh pawhin in en thei tho mai..." Hruaia chuan a han ti leh nghat a.
"Chuan, engtin nge min tih ang? Min kap ang maw?" tiin Liansanga chuan namnul a han tum leh a, Chair a nawr sawn a, a ding leh ta uaih a.
Hruaia chuan silai a kau rap a, "In pahniha thah hial che u hi ka rilruk asin...heti khawpa mualphona leh zahna ka tawh hnu-ah nangni thah che u avanga mualphona chu eng vaka ka ngaih i ring reng reng em ni? Ka kap ngam khawp mai dawn che u a nia, kal chu han tum leh chhin la..." tiin Liansanga mitah tak chuan a han en a. "Ṭhu leh rawh," a han ti ram hmak a.
Liansanga chuan Hruaia mit meng chu a han en a, palzam mai mai chi a ni lo tih a hre thiam ve ta a; Marami chu hlauin a lo kimki châwih châwih a.
"Ramengi hi ka hmangaih em avangin inchungah emgmah ka ti dawn lo va, ka fapa hmâkhûa avang pawhin ka ti mualpho lo ang che u; mahse, ka nupui a ni tawh lo. Tihian i rualin a chhuak ang a, nangmah, a uiretu ngei hian i inah ṭha taka hruai hawin nupuiah i nei ngei thung tur a ni. I duh lo emaw, a chunga harsatna i siam zui emaw a nih vaih chuan ka hnen aṭanga thil chhe ber dawn inbeisei ang che..." Hruaia chuan a han ti leh ta hmiah a. A nupui lam a en a, "I thawmhnaw va siam la, Liansanga hi zui haw ang che, ka fapa hi erawh rawn beisei miah suh," a han ti zui leh a.
Marami hi hmeichhe lung lian ve tawk tak a ni a, a pasalin an awm dan hre chhuakin zakin hlau hle mah se, ṭawngkam khatmah a chhak chhuak lo. Hmel hmai dâng lapin, ngawi rengin a thawmhnaw a la a, a rawn chhuak leh chu a mit a bui châk tawh a.
Hruaia bawk chu a rawn ṭawng leh a, "Chhuak tawh rawh ule, rawn kir tawh miah suh," a han ti leh a, a nupui chu a melh ran mai a.
Pâwn lamah lirthei thawm a ri vung vung a, Hruaia thinlung chu namenlovin a rûm a, a chau hnawk a, dawhkan bawhin a indawmkun a, khawvel hi a nunrawng em em mai hian a hria a. A fapa avang chauha nungdama la awm a ni; dawhkanah chaw eina hnawk seng fel loh chu a awm ram a. Phone chu vawihnih a han hmang a, a hman zawhah inchung lamah a chho a, an nupa pindanah lutin an nupaa nupa nun an lo hmanna ṭhin, a nupuiin tlangval dang a lo khawsakpui tâkna khum chu a han en a, a rilru chu chem zuma vih ang mai hian a lo na thar leh a, khum awngphah chu a theh hlim a, a thinrim chuan puan te chu a theh darh chiam a; chutih lai chuan a koh avanga rawn thleng Siami chu pindanah a rawn lut ve chiah a. Hruaia chuan a nupui 'Dressing Table' darthlalang chu a hnek keh chhuai a, a kut chu a thi zaih zaih a, 'Dressing Table' chu a theh tlu ṭhuai a, a thinlung tawt lutuk chu inchung zawlah a tlan chhuak a, Siami chuan a um zui ve nghal vat a.
"Vawiin hi Valentine's Day a ni asin!" Hruaia chuan a han ti ngawt a...
* * * * * * *
Hruaia'n mi rawn call chuan dar 10 a ri tawh a. A ṭhat loh hmel riaua ka hriat avangin hmanhmawh deuhin an in lam chu ka pan a, ka luh rual deuh thawin chung lama thil ri bur ka hria a, inchung lamah thil thleng a awm a ni ang tih ringin ka chho ta nghal kha a ni a. Sawi tawh ang khan in chunga mutna pindan lo hnawk nuaih leh thisen te kha ka han hmu a, mak ti leh ngaih ṭha lo zetin inchung zawlah ka chhuak ve nghal a, Siami'n Hruaia kut a lo tuam mawlh mawlh lai chu ka va hmu ta ni.
Inchhunga kan luh leh hnu-ah thil awm dan leh nih dan chu ka han zawt ta a, engkim min hrilh hnu-ah, "Chhante, ka ṭhian i ni a, engkim ka sawi ta a nih kha. Ka 'cctv' kam chuan a la fuh asin aw...an khawsak dan chu ka tan chuan hmuh hrehawm tak a ni, Liansanga'n ka nupui a khawsakpui dan ang khan khawsakpui tum ila, ka lakah Marami kha a zak ang a, a kimki si ang a; khati ang khan sex ka hmanpui theih ka ring lo. Liansanga'n Marami a sawngbawl dan ang khan keimah hian sawngbawl dawn ta ila, ka nupui ni mah se a duh dawn lo tih ka hre chiang a ni; hmânah uchuak ni miah si lo hian khati ang khan sawngbawl ka tum tawh a, a duh miah lo asin. Liansanga'n a sawngbawl chuan nuam a tih hmel hle si a..." Hruaia chuan a han ti a, a thinlung chu a na hle tih ka hre thei a.
Chutih lai chuan awih mut tumin Siami chuan Hruaia fapa chu thawnthu a lo hrilh mek a, kan ṭawng chu an hre pha lo va.
Kei chuan, "Hmuh a hrehawm ngawt ang...sualna hian zahna a tibo a, sualna leh dik lohna hian zahtheihlohna a keng tel a, mahni kawppui, nupui emaw pasal te emaw nena sex hmanga zak leh lai ṭit ṭet si hi, pawn lamah emaw midang nen sex an hman emawa midang laka an uire hian uchuak deuh takin sex an hmang leh ngam tho si an ti ṭhin asin. An pasal te nena zak si kha, midang nen chuan zah an hre leh si lo va, uchuak leh over takin an khawsa leh tho ṭhin a nih hmel; sual lam thil leh setana duhzawng hian zahna a hnawt bo va, zahtheihlohna a neihtir vang a nih ka ring," ka lo ti a.
Hruaia chu a ngawi ta reng a, a inngaihtuah mûk hmel hle mai. Rei fé a ngawih hnu-ah, "Hmeichhia hi hriat thiam an harin an sual si, mahni mo ngeih lo pawh an mahni bawk hi an ni fo va, ka fapa enkawl tur pawh hian hmeichhe dang ka ring ngam tawh dawn em ni?" a han ti a.
Ka chhâng lo. Siami chu ka han en a, Hruaia nupui nih a tlin ber ang tih ka ring a; ani chu Hruaia fapa awiin a lo zai riai riai a.
Zan a rei ta, khawvel chu Hruaia tan chuan a châwl a, thinlung pakhat chu mi ten inhmangaihna lantira an hlim nî-ah hmangaihna vangin a na vawng vawng a...
Comments