LEHKHA LEH ZUNGBUN
© Chhantea Pautu
Japan rama ngaw pakhat, ṭihbaiawm leh nèlawm loh zet chanchin ka ziak a, he ngaw leh a chhehvela thil thleng chanchin ngaihnawm
leh lungchhiatthlak tak ka buaipui mêk láia ka hmuh fo thlarau pakhat chanchin ka rawn sawi dawn a ni.
Thlarau Vâkvài!
He thlarau hi ka hmuh hmasak berna chu Tuikual vênga kan in luahah a ni a; chumi hnu-ah ka khawi lo kalna leh chhuahvahna hmunah ka hmu ta zeuh zeuh reng a. A ṭawng ngai lo va, a châng phei chuan thi tawh a ni tih a inhre lo a ang zawk hial ṭhin; hmeichhe hmel ṭha tak a ni nghe nghe.
A Inṭanna Chu.
14 June, 2017(Nilai) zàn rei tawh tak a ni a.
Ka naute chu an mu reh ṭhiap tawh a, kei chuan Japan rama ngaw chhah zet, Aokigahara ngaw chhunga Akimitsu leh a ṭhiante chunga thil thléng mak danglam tak chanchin chu ka tui chilh èm avangin sana en nachang pawh hre lovin Computer hmaah ka ṭhu a, ka bih ngar ngar a; chutih lâi tak chuan ka hnunglamah thil eng emaw a tla ri rawk a, ka phu chiang hle nghe nghe. Phu chiang hle mah ila hlauhna ka nei zui lem lo va, sana ka han en a, zàn 12:07am a lo ni reng tawh mai. Ka nau pakhat, ka nu laizâwn fanu upa ber Hriati, Class-XI zirlai chu a rawn tho a, Bath-room-ah a va zung ri sur sur a, a zung zo chu a mu leh mai a, a muhil zui leh mai bawk.
Kei pawh chuan Computer Keyboard chu ka khâp zui leh mawlh mawlh a. Hetia phu chiang hle chunga ka hlauh zui lem loh chhan hi ka chanchin ziah laia ka rilru ka sawrbing lutuk vang a nih bâkah, kan in luah hi sazu tualchaina hmun lùn tak a nih vang a ni pakhat. Heti ang thawm hi chu zan dangah pawh ka hre fo tawh reng reng a. Ka naute hi lehkhazir vek an ni a, kan in luahah hian kan vaiin mi 4 kan cheng a ni. He tih hun lai vel hian Tuikualah mitthi an awm ngun hle mai a Information aṭanga mitthi an awm thu an puang ṭhin chu ngaiah ka nei hial tawh a ni.
Computer chu ka bih leh ngar ngar tawh a, thu chu ka chhu mawlh mawlh a, sawi tawh angin he Pûk huaisar tak chanchin ka ziah hi ka tui chilh em avangin mutchhûak pawh ka hre chang lo. Chutih lai chuan kan hnung lam, a hmâa thawm rawn rîknaah bawk chuan thawm a rawn awm leh a; sazu bawk a nih ka rin avangin ka ngaihsak lem chuang lo. Mahse thawm chu a khât tâwkin a awm ta reng mai a, a hnu phei chuan sazu chetla thawm pawh a ang tawh lo hialin ka hria. Khua chu vawt thar ta riau hian ka han hria a, ngaih ṭhat lohna emaw, hlaua ṭim rûk er erna emaw chu ka la nei hran chuang lo. Ka thu chhut laklawh lai chu ka han chawlhsan a; ka hnunglam, thawm awmna pindan lam chu ka han en phei ta a.
Kan in luah hi kawng àna awm, Assam-type Building, Tenis Court aṭanga Dinthar kawn pan thlâkna kawng àna awm a ni a, in hlui lam pang a ni tawh nghe nghe. Mi 4 lek kan nih avangin kan luah seng mang lo va, Pindan pakhat chu luah mang lovin kan dah a; mahse darthlalang lian a awm avangin kan lût chhùak fo tho. Chu Pindanah chuan a ni thawm chu lo awm ni. Ka han en chuan, chu Pindan kawngkaa kan Parda zar chu a lêng delh delh a; thawm ri hraih hraih a awm leh ṭhin, sazu chu a nih hmel ta hlek lohin ka hria. Ka thil chhut chu ka han save te te a, Computer shutdown lem lovin Pindan lam en fiah tum chuan ka ṭhuthmun chu ka thawhsan ta a.
Pindan chhungah chuan ka va lût a; ka thil va hmuh avang chuan vawikhat ka rak ṭhawt a, ka tirilah chuan mi ṭham er er mai bawk. Hmeichhe pakhat, ka hmuh fo, ka biak ngai lem loh hian ngun em em hian min lo en reng a; a mit a khap eih lo va, a dâng béi a, a thawmhnaw hâk pawh a lang chul rep a, a sam a thlah a, a thawmhnawin a khuh bâk a tisa lang ang ang chu a dâng var pap a. Chutia mit khap hlek lo va min en lai chuan chêt reng reng ka che thei lo; mi aikaih a ni awm e. Ka ding khawng lah a, kei pawh chuan amah chu ka en reng ve ta ringawt a.
Chu hmeichhia chu ka mi hriat chian a ni, a hming pawh ka hria, kan ṭhenawm lawk ami a ni nghe nghe. A ṭawng miah lo va, min en reng ringawt mai a ni. A thih thu ka hre lo va; mahse a dam lo tih chu ka hre chiang hle. Tun hnai karhnih kal ta phei kha chuan hmuh pawh ka hmu lo hrim hrim. A hming hre mah ila vawikhat mah ka la be lo va, ka la ko hek lo.
Ka intipachang lui a, inthin harh pahin thlarau nge mi tak tih rin ngaihna pawh ka hriat loh chu bìak ka han tum a. Ka aw chu a làwi rût a, a chhuak ṭha thei hlek lo lehnghal; mumallo zet hian, "Mma...mma...mahming i lo kal a ni maw...?" ka han ti thei hràm a. Min chhang lo. A mit a la sawn a, ngawi rengin min kal pel a, kawngkapui inkalh a hawng ri rak a, a chhuak ta a ni ang. Ka va en zui a, pâwnah ka va chhuak a, ka hmu zui ta lo.
Ka Computer chu ka han en a, a lo in-shutdown daih tawh. Tinunga thu ziah leh pawh tum tawh lovin ka mu zui a; muthilh chu har tak a ni. Ka ngaihtuah zui neuh neuh reng a; mak ti tak chungin. Chumi hnu darkar 3 vel a ralah, 03:00am ah chuan Tuikual Information a rawn ri a, Nl. Lalhmingliani boral thu chu an rawn puang a!
Hemi ni, 14 June hi ka Birthday a ni nghe nghe; zan tir lamah ka thiante pahnihin Mombati min chhem hlumtirin Present min rawn pe a, chaw kan ei khawm nghal a, kan hlim hle bawk. Zanlai zanreia ka present dawn leh erawh a dangdai ta hle a ni.
A boral hnu nithumnaah Dawrpui Vêngtharah ka kal dawn a; Dinthar kâwn ka zuk thlen thlâk chuan Taxi Stand atanga tlân chhuak mai tur Passenger pahnih phur Taxi pakhata a ṭhu ve hi ka va hmu a. Ka va hmuh rual chiah chuan a rawn hawi phei a, a bula chuang ve te nen chuan an hmel lan dàn a inang lo takzet mai. Taxi chu a tlàn zui ta mai si a, ka hmu zui ta lo a ni. Nilêng maiin ka rilru-ah a awm. Zan lamah chuan ka thil ziah lai kha ka ziah chhunzawm leh a.
Thlarauin Min Tlawh Leh.
Taxi-ah khân chuang vein Driver khan hre miah loin a tlàn liam pui ta kha a ni a; hmu theiin hmu ve ta thut mai se engtin tak nge a ṭhàwn ang tih kha nilêng maiin ka ngaihtuah a ni.
Zan dang ang bawkin ka naute mut reh ṭhiap tawh hnu-ah thu ziakin Computer Keyboard ka la ti ri ta tlat tlat a; mahse hemi chu ka bet lo deuh riau mai. A khât tâwka ka hnunglam pindan chu enin ka va lehhawi leh ṭhin a. Ka thil ziah lai hi zawh thuai duh lo ila chu ka naute mut rual khan ka mu ve daih tawh ngei ang.
Thawm danglam leh thil danglam a thleng zui ta chuang lo va; a thih hmâa a thlâ ka hmuh avang leh, ka hmuh hnu lawka a boral zui tâk mai si avangin keimah zâwk chuan hmuh leh beiseiin ka châng a ang ta mah mah zâwk e a. Engmah a thlena a awm tâk loah chuan a hma aiin ka thil ziah laiah ka rilru ka pe ve thei ta deuh a. Hnunglam pawh hawi lêt tawh lem lova thu ka ziah mawlh mawlh lai chuan ka ring, dar leh kàwng kham vel chu ka han chawl det a; chunglamah phar chhoin ka han zi mar kual ta vel a. Ka zi mar uar telh telh a, ka ṭhutna ṭhuthleng nghenchhan rinchhan siin hnunglam zâwngin ka han zi mar eu ta tak tak a; maimi'chhing chunga ti ka ni. Chutah, ka chal hi a rawn hit ta thlér mai a, ka ṭim nghal sung sung a, ka meng nghal kâwk a, ka chunglamah chuan Mahmingi hmel dâng lap mai hi ka han hmu ta thut a. Ka che lawih a, hnunglamah ka tlu ṭhelh a, ka chil hâkin ka khuh zui nghal bawrh bawrh bawk. Ka awm dàn khawlo tak thawm avang chuan ka nau pakhat chu a rawn harh a, "Ma'm...eng'a tinge a?" a rawn ti nghal vat a; chutih lai chuan Mahmingi chu kawngka lam panin a kal a, hawn pawh hawng lo hian a kal tlang ta mai a. Kei chu ka la khuh ta bawrh bawrh a, ka nau chuan a zawhna ngai bawk chu mi lo zawt leh a.
Heti teh fo chu, ngàia neih a har dawn kher mai aaa! Khatia ka thu ziak tui lai min rawn ṭhawn thut hnu khan vawi hnih chu zanah ka thu ziah lai bawk hian min rawn tlawh leh a, a hnu-ah erawh kan in lamah chuan min rawn tlawh ngai ta lo; mahse, pâwn lamah ka hmu fo a, Taxi-ah te ka hmu a, vawi hnih ngawt Private Car-a a chuang lai ka hmu bawk. Engmah a sawi ngai lo va, a ṭawng ngai lo hrim hrim. Ka hmuh ṭum ṭhenkhatah phei chuan min hmu ve àwm pawh hian a awm ngai lo va, khawhar àwm tak te hian a ding veuh veuh a, a chang leh naupang infiam lai te hi a lo thlir leh reng ṭhin. Ka hmuh ngun tâk deuh hnu phei chuan hlauh enah pawh ka en tawh lo va.
Zankhat chu Dinthar mawnga ka ṭhianpa, B.Ed Trainee, mahnia in luah mêk nen hian Khatla lamah lèn kan tum a, ani chuan kan in lamah min rawn sawm chho a, Tenis Court Road lamah chuan kein kan kal chho a. Tuikual North Local Council House kan thlen chuan ka ṭhianpa chuan min pawt ding a, "Enteh, saw nu saw i hmu ve thei em? A danglam ngawt mai," a han ti a.
A mi kawhhmuhna lam ka han en chuan Mahmingi a lo ni reng mai. Thlanglam hawi deuh hian a lo ding a, keini chu min hmu àwm pawhin a lang lo. Ka ṭhianpa hnenah chuan, "I lo hmu ve ṭhin elo?" ka han ti a.
Ani chuan, "Eh! I lo hmu ve ṭhin zàwk elo? Ka hmu fo tawh mai," a lo ti ve thung a.
Mahmingi chu a rawn inher a, keini ṭhian dun chu ngun zetin min rawn en a, a kal leh ta mai a. Ka ṭhianpa hi mi dawihzep tak a ni lo va, "Zui chhin ang, zui se min tih hmel riau mai," a ti ta ngawt mai a. Khatla lama kan ṭhiannu te ina leng tur kan ni; mahse ka hlauh tawh bîk loh avangin kan zui ta a.
Thlanmûal lam panin kan inzui zel chu a ni ta mai; amah kan zui chu a duh tak tak a ni ngei ang a rawn hawi lêt zauh zauh a, amah hmu pha rengin kan kal ve zel a. Thlanmûal chu kan thleng ta. Thlanvung tharlam deuh tak chungah hian Mahmingi chu a lo ding a, keini ṭhiandun chu min lo en reng tawh a; chutah kan hmuh lai reng chuan mak tak mai hian a lang fiah lo tial tial a, a ral ta riai riai a.
Ka ṭhianpa chu a han thaw ham ham a, "Kal ang," a ti hul hak a.
Kan kal dawn chuan thlan vung lam chu ka han en leh kher a, thil hmuh ka nei ta tlat mai; ka va en chian chuan, thlan vung chunga thil lian vak lo, sen duk raih leh love sign pianhmang anga siam bawm felfai thlarh hi ka va hmu a. Ka han la a, ka hawng a, a chhungah chuan zungbun leh lehkhathem hi a lo awm a.
"Eng'e i la tih reng, kal vat teh ang!?" tiin ka ṭhianpa chuan min raw ko a.
Chu bawm chu ka chhìn a, ka Iptèah chuan ka ak ṭha ta daih a.
A tukah chuan Luangmualah ka kal nghal a, ka kal tumna in kawngkhar chu ka han kik a, tlangval hmel pangngai tak pakhat hian min rawn hawn a, "Danny-a i ni em?" ka han ti a.
"Aw ni e. Eng nge ni ta?"
"Hei hi i ta tur a nih ka ring," tih pahin ka Iptea ka thil ah chu ka phawrh ta a...
Comments