A PAWI VIAU ANG!

A PAWI VIAU ANG!

[Teacher's Day Pual]
© Chhantea Pautu

       Mipa hian hmel ṭha kan tih deuh hmeichhia hi an ke a balh leh balh loh kan en ṭhin; kei phei chu a ke-chawn mawiah ka luang liam!

       Matric ka zir kum hian bialnu ka nei ve ṭat ṭat a. Vawikhat chu ka bêm dâwn ṭan tirh hian kan Inah a rawn lêng a, a haw dâwn chuan inbual turin bath-room ka lût dâwn chiah a, ani kawngkaa a chhûak tur chiah rawn hawi lêt zeuh chu zei tâwk tak(?) hian ka lo siai zeuh a. Tuma'n min hmu lo emaw ka tih laiin ka nauin min lo hmu khanglâng a, chawplehchilhin ka pa bulah, "Ka pa Mama'n Duati a siai!" a han ti vei khanglâng a; ngaihzawng neih kha ka pain a la duh vak lo nen, a hit lo ṭhang ṭhang riau!

       Kan han inngaizâwng chho ta a, a nuam riau mai; zânah ka ṭhiante Inah lehkhazir turin ka kal ziah a, Duati te Inah khan ka tlang daih zel; ka nu leh pate kha ka bum ve zeuh zeuh!

       Vawikhat chu a hmasa ber atân kan inmuah dâwn a, kan la ti ngai si lo; kan han inhmuam tur chu a Há leh ka Há kha a intauh ri ta bawp bawp mai a, a ngaihna ka hre lo khawp mai a, tih vak ngaihna a vâng duh khawp mai! A hnu chuan kan thiam ve leh viau tho a!

       Vawikhat thung chu kan inti thiam lo va('inti' tih lemah...lo ngai kàwi lo ula), kan leihkapuiah ka han din chilh rèn râwn a, ka chhuahchhal ta char char a; mahse mak tak maiin a ṭawng ve duh miah lo; chu chuan mi run tawlh tawlh mai si, min chhâng ve duh miau bawk si lo, "A PAWI VIAU ANG...A PAWI VIAU ANG...!" ka ti sek sek ringawt a; eng ber kha nge pâwi tura pawh chu ka hre mang chuang bawk si lo va; min chhânglêt zawt zawt ve duh miah lo hmeichhe hauh chîam chu mipa tân chuan a harin tih ngaihna a vâng duh fû a ni!

       Nu leh pa te 'permit' nei lo ve vea inngâizâwng kha kan ni miau a; a nu leh pate kha an lêng chhuak zan tin a, chumi hlan chuan kei an inah ka lo lêng zan tin deuh thaw a. Zan khat chu a nu leh pa chu an lêng chhuak leh a kei pawh an inah ka lêng leh a; hemi zân ber kher hi chuan kan han inthlahlel uchuak mai mai khawp a. Ka hâw tur chu ka bânah min han vuan det a, ka ṭang zo lo, ka hneh lo; ka hâw lo leh nge nge ṭhin. Mahse, a nu leh pate rawn hàw a hun ṭêp tawh si, hàw ka han tum lahin, "La hàw lo mai rawh," a ti tlat mai a. Kei lah chuan, "I nu leh pa an rawn hàw hman vaih chuan aw...A PAWI VIAU ANG!" ka ti a. Kan inthlah tawn ta zak zak a; vawi thum kan inthlah tawn.

       "A PAWI VIAU ANG!" ka tih ngun tâk viau-ah chuan min hàw tir phal ve ta hrâm a. Ka hâw ta a, an kawmchhakte in zâwn ka thleng chiah chu, a chhak 'Street-light' êngah chuan a nu leh pate chu an rawn kal thla ta mai, kei chu thim chinah ka ding chat a, an rawn kal hnai zel tawh mai si. Kan intawh vaih chuan ka lènna a chîang dâwn ropui; an in kha a thlang ber miau a ni; min hmuh chuan a tân leh ka tan A PAWI VIAU ANG!

       Hlauthawng hma chi kha ka la ni a, an rawn hnaih hlê tâkah chuan ka hlauthawng ta thut tak tak a, chak zetin ka tlân lêt leh a, ka bialnute inah chuan ka tlân lût a!

       Ani chuan phâwk zetin, "Ngati ngee...eng'e aaa...!?" a lo ti.

       Keiin, "Khi lai lawkah khian i Pate an rawn hàw...A PAWI VIAU ANG...!" ka han ti ngawt a.

       "Chhante, an rawn thlen hmain tlân chhuak leh mai rawh," tiin a turin min tur ta a.

       Kei chuan, "Nia, i pa a hlauhawm ropui si...A PAWI VIAU ANG...!" ka han ti leh a, tlân chhuah lah chu ka la tum der lo; a pa khan mi aikaih a ni ang!

       Ani lah, a hlauthawng tawh ropui, "Chhante, an rawn thleng hman ang'eee...tlân chhuak vat vat rawh," a ti ta tet tet a.

       "Nia, an rawn thlen hman chuan A PAWI VIAU ANG," la tih hrâm pahin ka inher vut a, chak zet bawkin ka tlân chhuak leh ta a.

       A nu leh pa te chu an rawn thleng deuh thaw tawh chu niin; chutia an in aṭanga hlauh hmel taka mipa tlân chhuak ta chu a pa chuan thil dik lo a awm a nih a ring a ni chêk ang, an inchhûnga lût ta mai lo chuan chak mangkhenga ka tlân chu chak mangkheng bawkin mi rawn ûm ta tak tak mai a...ka lim fua fua a; a buaithlakna em em chu ka bialnu pa a rawn lim fua fua ve tho kha a ni. Chutah ka tlu bawk khup thlawrh a, rang lutukin ka tho a, ka ke bawrah a rawn ban ṭhelh zuau zuau a, a biling a balangin ka pai phei nawk nawk a, Japan hlo hrui ka pal a, ka duh lo chungin kawngthlangah ka inbengberek liam a, ka ngum ka sawh avangin ka ai ṭhawt a, thim thamah ka pil bo thei ta hram a.

       Ka pian a hnulamah kha aia chak khan ka la tlân leh kher lo; hah hliam hliam tak ka ni. Min man hman vaih se chu...A PAWI VIAU ANG!

       Selction Exam nan kar khat a la awm tih ah, mipa dang inrawlh vangin kan inṭhen a, la na ngaih ngaih tak ka ni. Mahse, kan Zirtirtu pakhat kha engkim ka hrilh tlang ta vek a, min lo hre thiam hle a, ka tân chuan ṭhian ang chiah a ni, mimal thilah pawh lehkha ka thawn mai. Selection Exam-ah chuan ka fail phah ṭat a.

       Tak tak pawh va ni suh.

       Hei hi a ni- Literature lama ka mit kèu ṭan tìr, John Keats chanchin hmanga min châwmtu Sir Thanmawia te, mì hriatthiamna ngah leh zahawm Sir Tluanga te, mi dik leh fair Sir Sawma te, kum khat ka hrawn hman Miss Ruthi pawh kha...Hualtu High School Zirtirtute kha ka tân an hlu hle a, an mi zilhna, fuihna leh zirtirnate kha dawng lo ni ta ila...A PAWI VIAU ANG!

       Kha nu tè kha ka hmangaih pawh a ni lo, a hun lai khan ka la tak ve em mai pawh a; tuna ka duh hi chuan, midang i hmuam daih a nih chuan A PAWI VIAU ANG...i nuthlawi hun ka nghak tho tho ang! iiiiiiiii...