KRISTMAS HMAN DUN KA DUH!
(Ghost Short Story)
- Chhantea Pautu
Ka hmeichhe biak
chu thlarau mai a ni tawh tih ka hriat hnu pawhin amah ka hnaih châkna chu a bo
chuang lo. Ka pan hnai hret a, ani pawhin min hnar lo, a nui sèih a, lungngai
hmel reng reng a pu lo va. Hlauhawm leh ṭihawm hmel pawh a pu chuang lo, hman
ang mai kha a la niin ka hria a.
"Mimi,
engvangin nge i reh daih? Engvangin nge biak tlang theih loha i awm tlat?"
"Chhante,
nang pawhin i hriat kha..."
"Ka hre
lo..."
Ka hre lo tak
tak, hun rei tak ka be pawp thei tawh lo va. Kumhnih zet kan inkawp hnu-ah eng
emaw avangin kan inṭhen a, Sailo nula ngeng ngulh, dam thlup si leh ngainatawm,
nu lian bawp zén sei thlarh mai hi a ni a, a rilru len zia chu kan inṭhen hnuin
ka hre chiang leh zual a. Kan inṭhen dan pawh fel fai taka inthlah kan ni lo,
min be duh lo tawp a, ka Phone call a pick-up ngai lo va, ka sms a chhang duh
ngai si lo, vawi tam biak pawh tumin ka bei a; mahse min be duh si lo a ni.
Ka ngai thei ṭhin
hle a; tichuan kan inbiak loh vang vang hnu kumhnih a ralin fb lamah min rawn
be pawp leh ta hlauh mai a. A la dam thlup a, kan inbiak leh hnu rei vak lohah
Patna-ah Missionary-in a kal a, chutia a Missionary hnu chuan kan inbe chho ta
zel a; mahse mak tak maiin biak pawh theih lohin a reh ta hmak a, fb leh hmun
dangah hmuh tur a awm tawh lo, hemi zan hi chumi hnu-a ka hmuh leh hmasak berna
a ni a.
Thlarau mai a lo
ni tawh a. Ka rilru-a awm chu sawi chhuah ka duh a, "Kristmas..." ka
han ti hman a; mahse ka sawi tum chu tih hlawhtlin a rem dawn chuang lo tih ka
hriat avangin ka sawi zo thei lo.
"Eng'e?
Chhante, sawi rawh..." min lo ti a.
Kan Bulṭanna Chu.
Sailo nula a ni
a. A hming chu Mimi Ramnunpuii a ni; he hming hi ka hre reng ṭhin. Kan pahnih
chanchinah hian nuihpui tur in hmu a nih chuan kei aia 5" laia sang, nu lian
dam thlup a nihna hi a ni ang. A lan ang aiin fianrialah a zeiin awm dan a
thiam a; mahse hmeichhe zuamawm a ni ka tihna a ni lo. Kan pahnih chauha kan
awm dunin ka lungawina tawka awm dan a thiam hle a, ka duh min pe lo ni si lo
va inven a thiam hle a ni.
A lo rei ve ta.
Khatih lai khan fb hi kan la hmel hriat lo. Kan inbiak ṭanna chu mak ve deuh hi
a ni. Engtin nge a Phone number kha ka neih tih hi tun thleng hian ka hre
chhuak thei tawh lo. 'Chiang' taka ka hriat 'thawi' dan chuan miss call ka
dawng ni tain ka hria, ka miss call dawn chu ka han call back a, chu chu
Hualtua ka awm lai a ni. Chumi ṭuma ka zuk biak chuan thawm a bengchheng ngang
mai; a aw mawlh mai kha nalh ka ti ṭhin, hriat a hahdam em em a. Chutih lai
chuan ka Phobe Batery a ṭhat loh avangin ka buai thei hle ṭhin a.
"Tu nge
aw...?"
"Mimi-i ka
nia...tu nge ka biak aww...?"
Kei chu ka la
insawi mai lo va. "A va han bengchheng em em..." ka han ti ngawt a.
"Nia, hei
Bus-ah kan chuang a..." a lo ti a.
Chutih lai chuan
ka Phone Batery chu a low leh ta. "Hei ka Batery a low tlat...zanah kan
inbe ṭha leh mai dawn nia aw," ka han ti leh ngawt a.
Phone a off hmaa
a ṭhiante bula, "Ka Batery a low' a ti nia...ka khawngaih eee," a tih
ri chu ka hre hman a.
Chumi hnu aṭang
chuan kan inbe chho ta zel a, amah avangin Aizawl kalna tur thil ṭul chhuanlam
ka zawng nasa a, ka kal ta tlut tlut mai a ni. Amah kha Durtlang Women
Politechnic Hostel-a awma thil zir a lo ni a. Aizawl ka kal chuan Inrinnia an
Hostel-a ka tlawh loh leh, a chhuah theih ṭumin KV Paradise-ah kan leng ṭhin.
KV Pararadise-a kan kal dun tawh chuan a enkawltu Vaipa khan hre ṭhang leh hmu
ngun tawh tih hriat deuh hian min lo nuih var var ṭhin a. Kan kal dun ngun bawk
em a ni.
A bawp kha a sei
thlarh a, a thau lo va, hmeichhe ria sang zeih zawih tak a ni, a ngo lutuk lo
na, ngaihawm ru deuh hi a ni. Kan inhmuh hmasak ber ṭum chuan ka lai ve hle a,
Milinium Center-ah hian, a hnu-a kan khua aṭanga Women Politechnic Hostel-a
thil zira awm ve nen hian min lo nghak a, keini kha ka ṭhianpa nen kan ni thung
a. An hnunglam aṭangin kan pawh phei a, kan han inhmu chu ka rin aiin a lo sang
a, ka ti lang lo na a, ka lai ve ang reng hle. Ka innghahna ka ṭhiante In
Dintharah kan chhuk a, kan thlen hnuin kan ṭhian te chuan zei takin min chhuah
san a, New Capital Complex lamah an zuk kal ta daih a.
Ka ngaihzawng te
zingah ani nen hian kan inkawp rei ber a, ka duh takzet a ni. Fiamthuin kan
insan hleih zia hi kan sawi a, kan nui kan nui ṭhin. Ka sawi tawh ang khan ka
awm dan dik loh vangin kan inṭhen phah ta a, pawi ka tih zia chu sawi mai hian
a fiah lo vang, chumi hnu-ah kan inbe leh a, rei lo teah a chanchin hre thei lo
zui ta a ni.
Ka Inhmuh Lehna Chu.
Thlanmual hi eng
veng Thlanmual nge tih ka zep dawn avangin min hre thiam dawn nia.
Zan khat chu
Bazar Bungkawnah hian Damdawi leiin ka chho a, Civil Hospital luh chhohna Gate
bula ka hmeichhe hmuh chu Mimi ni ngeia ka hriat avangin ka han pan a; mahse
chu hmeichhia chu a kal zui leh mai si avangin ka zui ve ta ngawt a, ka thin
chu phur leh hlauthawn ruk avangin a phu dep dep a. Ka zui zel a, amah chauh chu
ka ngaihtuah tawh avangin thil dang ka ngaihtuah nep hle a, ka han harh chhuah
meuh chuan Veng pakhat Thlanmualah hian ka lo awm reng tawh a, chu hmeichhia
pawh chu Thlanlung pakhat bulah hian a lo ding ve bawk a.
"Mimi...?"
tiin ka han ko sap a.
Ani chu a rawn
hawi a, ka rin ang ngeiin Mimi Ramnunpuii chu a lo ni ngei mai. Mahse engvangin
nge Thlanmual lam a pan le, tih zawhna ka rilru-ah a lo awm nghal a, ani chuan
ka ngaihtuahna hria niawm fahran hian, "Chhante, a dik alawm...heti chung
hian hun rei tak ka vil tawh che a, i kiangah ka awm reng ṭhin. I rilru a nat
te, harsatna i tawh te, i nui reng leh fiamthu i duh em em phena i ṭah lai te
pawhin i kiangah ka awm ṭhin a ni; mahse nang chuan min hmu ve thei si
lo..."
Hun rei tak ka
hmuh tawh loh hmeichhia chu thlarau mai a lo ni tawh a nih chu! Ka rilru chu a
bing mup mup hian ka hria a, ka ngaihtuahna chu mumallo zet hian a vir kual ni
maiin ka hria. Amah ka biak pawh theih loh thu-ah ka han chhuahchhal ta ngawt
a. Mahse chu chuan awmzia a nei lo; ka rilru-a awm chu sawichhuah ka duh a,
awmze nei lo nia ka hriat leh si avangin ka sawi zo leh ngam si lo va. Mimi-i'n
sawi zo tura min ngen leh tak si-ah chuan, ka ngawih vang vang hnu-ah,
"Mimi, Kristmas hman dun ka duh a ni," ka ti ta khawl a.
Ani chu a nui
san san a, "Chhante, a theih loh tih ka hrilh che a ngai hi pawi ka
ti," a lo ti a. "Tuna i bialnu hi ngati nge ngaihdam i dil loh,"
a ti zui a.
Kei chu ka ngawi
reng a. Tuna ka bialnu nen kan inhmuh thiam loh thlengin a hria a lo ni reng
mai.
"Tuna i
bialnu i hmangaih em?"
A zawhna min
zawh chu mak ka ti deuh a; mahse, "Nang ang maia ka duh awmchhun a la
ni," ka ti a.
"I hmangaih
em ka ti alawm."
Ka chhang hreh
hle, amah hi ka zah a ni.
"Chhante,
min chhang rawh,"
"Aw. Ka
hmangaih…"
Ani chu hahdam
ta huai hian a lang a, "A ṭha e, ka hahdam ta sawt mai; Chhante, zaninah
ngaihdam dil ngei ngei ang che aw, i lulul ṭhin lutuk hi a ṭha lo a nia. Ka
lakah pawh i zaidam ṭhin em kha, chuan, i dawhtheiin mi i hre thiam em em ṭhin
bawk. I hriat kha, hmeichhia chuan inneih hma hauh aṭanga min thunun tum leh
lutuk hi kan ngaithei lo a ni. Zalen taka nun hi kan thlahlel ṭhin alawm. Ka
laka i awm dan duhawm deuh ang khan a lakah hian awm ve rawh...aw?" tiin
ngenngawl zet hian min en a.
Kei chu ka ngawi
reng a, sawi tur hi a va han vang tak em. Mimi-i chu a nui a, min pan hnai a, a
hmel eng deuh phét chu ka hmuhin lungléng ru tak siin ngaihngamna riau hi ka
nei a, a kutin ka biangah a han khawih a, eng feeling emaw chu ka nei tih loh
chu thil danglam vak awm lo, ka han maimi'chhing a, ka feeling chuan ngai a awh
leh ta vat a; chutah ka han men leh chuan Mimi-i chu a lo awm tawh lo!
Hrilhhaiin ka
ding tlawn ta reng a; chutia rei fé ka din reng hnu chuan ka inngaihtuah harh
a, a dinna bul Thlanlunga thu inziak chu Phone tiengin ka han chhiar ta a. Ka
chhiar zawhah ka lehhawi a, haw tumin ke ka pen a, ka ding leh dat a, ka
thinlung chu, "Nang nena Kristmas hman dun ka duh," tiin a rum a.
Thlasik thlifim
a rawn thaw vawt seng seng a, ka Jacket-a inkhawr ṭha ṭat ṭat chungin chu
Thlanmual chu ka kalsan ta a. Chiapcha ten thawm an rawn chhuah chiah chiah a,
leilung hi khawharnain a luah khat ni maiin a lang...
Comments