Pjs
Kum leh thlàte lo thar zelin kan hlim nite chu ngai hle mah ila ka thlahliam fo an ngai a nih hi..Hun tam kum tam liam tawh mah se, ngaih reng an bang thei lo..
Ka thawnhnaw bawm aṭangin Album hlui tawh tak mai ka haichhuak a, chawlhni tlaiah chuan tihtur em em ka neih loh avangin ka hun awl chu kan thlalak hlui tawh takte ennan chuan ka hmang ta a..A phek hmasa berah chuan kan chhungkaw thlalak hi a lo chuanga ..Nausen mai ka la ni..ka pa chuan nuisang hian min pawm a, chhia leh ṭha pawh ka hriat hma a ni ngei ang..A bulah chuan ka nu'n hlim hmel tak hian min lo en bawk a. A ni tak e an fapa thar rawn piang chhuak chu an lawm a, an nun hlimna ber pakhat ka nih miau avangin an tan chuan hlimna chhan tlak tak chu ka ni ve reng a..
Ka pa hmel chu ka zuk en a, a thinlung takin a hlim a ni tih ka hre thei mai a, kha tihlai khan tun ang hun hi ka thleng ang tihreng a ngaihtuah phakin ka ring lo..ani ka pa chu tunah chuan a awm ve tawh lova..natna khirhkhan tak maiin a taksa a tlakbuaka, rei pawh dam lovin a boral tawh a, a boral hnu ata ka nu chuan a ngai ṭhin hle a, he thlalak a en a piang hian a ṭap ṭhin a..ka pa nuihmel a hmuh apianga hlim taka awm ṭhin khan tunah chuan a ṭahna siamtu chu ka pa nuihmel bawk hi a ni ta si a..a en ka phal tawh ngai lova..ka dahṭha ta a ni..
Rei pawh en lo chuan album phek dang chu ka han keu leh a..A phek hnihna veilamah chuan ka nu leh pa hlimhmel taka an pahniha an thlalak hi a lo awm a..
Heti ang hian an hlimhmel hi hmuhreng tur awm sela..ka va han ti em..Ka la mithla thei ruai mai..an hlim dun thei hle a, ka pa a dam loh thleng khan ka nu hlimna chu ka pa hlimna ber kha a ni ṭhin a, tuna an hun tawn ang hi an tawng ang tih reng an hre bik lo..Heng thlalakte hi an danglam ve si lova..an ni nun erawh he tikhawp hian a lo danglam ta si..
Chutia thlalak ena ka ṭhut reng lai chuan ka nau chiah hian chaw ei a hun tihthu min rawn hrilh a..album chu ka dahṭha a chaw eitur chuan choka lam chu ka pan phei ta a..
Zanriah kan eikham chuan ka phone a rawn ri a..Apologize hla ringtoon-a ka hmanlai a nih avangin ka han sakpui phawta a chanve dawn ka sakpui hnu chuan..call chu ka han pick-up a, ka ṭhianpa Kevina a lo ni reng mai a..ani chuan
"I va han la har ve..hei..Caroline-in inthlahna program a siam dawn a, tel ve turin min sawm a..kinah ka rawn sawm ang che."
Kei chuan.."Ka hman ka ring lo..inkhawm banah duh leh ka rawn kal ang.."
"Inkhawm lo mai ang..ka rawn kal a nia".
A sawizawh chuan a dah nghal daiha..
Chutia kan inbiak zawh chuan inkawm turin ka insiam a, biakin lam chu ka pan ta nghal a..
Biakin ka thlen chuan, ka han ngaihtuah chiang a..Caroline-i chu khawiah nge maw a kal dawn le..Chungte tal chu min hrilh ve awm..a bik taka sawmna pawh dawn ve ka lo beisei a sin ka ti neuh neuh a...eng emaw hian min kap tlat mai a..biakin chhung pawh lut ta lo chuan Caroline-i te inlam chu ka pan ta a.
An kawtkai ka thlen chuan tukverh darthlalang aṭangin ka han biha kan ṭhianho chu an lo kim hle mai a..a awm lo awmchhun ka ni ngei ang..an kawngkhar bulah chuan ka ding reng a, rei fe ka din hnu..a tawp a tawpah chuan kawngkhar chu ka kik ta nge nge a..Amah Caroline-i chuan a rawn hawng a..ka lut ve ta a..
Ṭhiante chuan min lo dem nghal hat hat a, a chhan chu Caroline-i nen hian kan lo inngaizawng tawh ṭhin a..ṭhian ho zingah pawh inngaizawng langsar zual chu kan ni ve reng reng a ni..mahse karhnih dawn liam ta khan eng emaw vangin kan kar thu a chhia a..kan inbe tawh ngai lo hrim hrim a ni..
Inthlahna program chu a hlimawm hle a..Mahse a mah Caroline ber chu hmun hla taka a kal dawn vang nge ni ang a hlim lo hle a..nuam titakin a hmang lo a ni tih a hmelah a lang thei a ni..
Kan mitsir chu a intawng leh zauh ṭhin a..eng emaw sawitur kan la neih te chu sawina hun awm sela chuan sawinan hun kan inchuh leh tawh ngei ngei ang..mahse tunah chuan a danglam tawh a..kan taksa inhlatna chu sawiloh kan thinlung pawh a hma angin a inpawh tawh lo hrim hrim a ni..
Ani chu naktuk mai khian Singapore-ah a kal dawn a, ngai dawn viau mah ila..ngaihna chhan tur neiin ka inhre si lo..kan inngaizawng tawh si lova.
Zan a rei dawn hnaih chuan a mimal taka thlahna pawh nei tawh lovin ka chhuahsan ta mai a..kan inlam pan lovin ka ṭhianpa ka kawm ber ṭhin Stephena te inlam chu ka pan ta daih a..
An in ka thlen chuan a ngai te bawkin a phone chu a lo sik leh neuh neuh tawh a..ka han lan chiah chuan min lo melh hru hru a..zan dang anglo takin a phone chu zaizir hian enve turin min hrilh ta a..a hma chuan a phal ngai miah lo, ensak pawh tum ila, a tha zawng zawngin min sual nghal a ni mai..Chutia a phone enpui a phal mai chu a nu leh pa pawh chuan mak an ti ang reng hle mai bawk..
Tichuan a phone chu kan en dun ta a..
A gallerya kan pahniha kan thlalak chu a hmetchhuak a, hlim hmel tak hian min han hmuh a, a nui vur vur a, eng eng emaw a sawi bul bul renga, a mit aṭang chuan mittui hi a rawn hnam leh ṭial ṭial ṭhin..ka khawngaih em em a, chhan awmlova han ṭahpui chiam lah chu a dik theiin ka hre silo.. ani nen hian ṭhian ṭha ber berte inkawm ang aiin kan inkawm hnem zawk a..school kan kalho lai aṭang tawhin..kan ingai em em a..ka tello chuan a nun a hlim lova..a tellohna hmun ah chuan ka nun hi a hlim ngai bik hek lo..A Gallary a kan thlalakte chu ka han hmuh leh chuan ka lung a leng em em a..Kan college library chunga kan lak kha a ni a..Kha tih lai kha chuan ani Stephena hi mi pangai tak a la ni asin..Lehkha pawh a thiam thei em em a..a ma tawkah miropui tak a ni a..kan ṭhianho zingah pawh a hruaitu chan chang ber a ni a..a nghet a a rintlak hle bawk a ni..
Kan nunhluite ka han ngaihtuah a..kan thlalak hluite khan lung an tichhe tak zet a ni..a hmuh laia ṭahhmel ka han pu tur chu min melh leh hru hru a, vawi leh khatah hian a nui ta huk huk mai a..Nia ka hrethiam tho..ani chuan mi a ang tawh lova..mi pangai rilru hi a pawl pha tawh si lo..
Stephena hi MA kan kallaiin a ngaihzawng Tluangpuii chu Rapthlak taka pawngsual a nih hnu ah, thah a lo ni tawh a, tawrh har a ti em em a..a nà ti lutuk chu he ti ang dinhmun hi a lo thleng ta a..mihring pangai thinlung hi a pawl pha ta lo a ni..
A hmel chu ka en ṭhin a..ka ṭhiana kha a la ni reng thova..mahse hmanna mi ka thlalak pui ṭhin nen kha chuan an lo danglam ta si...
Ani bula awm reng chu ka lung a chhe leh ṭhin a..an inah chuan rei tak pawh ka awm ngai lo..ka haw san vat zel...ani khawngaih chu sawt tawh viau lo mah se, ka nun tikimtu ala ni reng si..
Zan a lo rei hnu chuan ka haw san leh ta a..in ka thlenga, ka roomah ka lut nghal a, khuma mutzal pah chuan ka phone chu ka han en a..kan thlalakte ka han en a, hmanni lawka ka wall paper-a ka hman Caroline-i nena kan thlalak kha ka zuk hmu a..
A kutah ka vuana, camera hmaah kan dinga, hlim hmel takin ka inmelh a..Nia kan hlim ṭhin ngawt mai..ani chu nula hmelṭha tak ni mah se mi rilru no tak..thinrim sam tak, thlem ngai reng hi a ni a..kan inmil lo a ni ber mai..
Kan thlalak dangte chu kan han en leh a..kan ṭhian hovin kawngah kan kal kan hlimhmel hlawm khawp mai..engtika kan lak nge phei chu ka hre tawh hauh lo..a rei ve tawh viau ang..Chutah pawh chuan Caroline chuan ka banah a vuan a..lungmuang tak hian ka ka bulah chuan a kal a ni..Khang hunte kha an liam a dan rual an ni si lo..he thlalakah hi chuan kan hlim lai ang ang khan a la awma..hei..Caroline-i pawn ka ban chu a la chelh reng a nih hi..He ti ang hian ka ban hi la chelh reng thei sela ka va han ti em...Nimah sela..ani nen chuan kan inbe tawh ngai lova..Chumai a ni lo, hmun hlatakah min awmsan tawh dawn a ni..Tunah chuan kan hun tlemte tal pawh kan inpe thei tawh lo a ni si a..Heng kan thlalakte hian nunna neiin Hoté vanga kan inṭhen thu hi rawn hre ta se engtin nge min tih ang le..??
Ka mut chhuak chu sawiloh ka harhfim ta tulh tulh mai peka..
Tlailama ka enzawh hman tak lo..kan chhungkaw album chu ka han phawrh chhuak leh a..
Ka keu hmabaka kan chhungkaw thlalak lo lang chu ka han en a..
"Ni chhuah veleh kan la nghal dawn nia"
Ti a ka pa'n a sawi kha ka hre chhuak a..chhungkaw thlala tur kan inpuahchah rei zia kha..zing kar aṭanga kan lo inbuatsaih kha a nia..ka han ngaihtuah leh chuan za lutuk lo hian ka nui sek a..
Khatihlaia kan hlimzia kha keini unau hnih leh kan nu leh pate kha kan inthlunzawm ṭha em em a..Malsawmna tam tak Pathianin min vur a..mahse tunah chuan a danglam ta..hlim taka kan thlalak lai en bak chu tihtheih a vang ta hle maii..ka va han ngai tak em..
A phek tawp lamah chuan keimah chuah hi ka lo lang a..kum 12 bawrvel ka nihlai a ni ngei ang..ka nui sen sen a..ka nun thawmhnaw thar min lei ni kha a nih ngei ka ring..khang hun lai khan ngaihtuah lem neiin ka inring lova..nun kha a zalen em em a..min kaptu engdang reng an awm lo..ṭhen leh rual kawma duh ang anga tal kual ve bak kha chu lungkham dang reng kan nei ngai lo kha a nia..tun dinhmun nena han khaikhin chuan a awihawmloh letling zawk...
Ka hlimhmel em em lai ka zuk inhmuh chuan khang hunlaia zuk kir leh kha ka chak em em a..theih nisela chuan ka kir leh daih tur hi a nia..
An ngai ve ṭhin ngei ang..
"Nunhlui liam hnu chuan kan hmalamah khian min rawn hmuak leh thei sela".tiin
Kei zawng ṭhen leh rual hlimthla chen hian ka thlir ning thei lo..
Ṭap hawm hawm ila..min khawngaih avangin siamtu hian min tawn tir leh mahna ka pa bawp chunga ka mut lai kha..
min chelh tir leh mahna ka hmangaih ka ngaihzawng Caroline-i kut..hlim takin kan inkawm leh mahna ka ṭhian Stve- a nen...Mahse chu chu khawvel dan hian a khap si a..
Dawnkir changin lungawi a har mang tak e,
Duhthusam lam ram chauh hi ka chan em ni lo ni ta;
Tawrh a har dawn mang nge khua rei-ah.
Ka chelh reng mai dawn che em ni?
Chelh reng theih han ni teh la,
Famchan hma loh chuan ka kiangah i pheichheh rem zel la..
Lungaihni chuan i kiangah ka lut anga, ka kokir leh fo tur che a nia.
Tunah lem hei chauh hi a ni ka chan tawk,
Kan hlimlai thla; chuai tawh lam chelh reng chauh hi;
Rún bang bela i awmhmun i sawhnghet hi, hei chauh hi em ni min hnutchhiah..
Chhingmit tui anga luang hi entikah tak húl ang maw..
An sawn zel si hmalam panin, an kiam zelnan chauh a ni..
Kan hlimlai nunhluia chang leh tur hi,
Tawrh thiam dan min han zirtir mawlh teh.
Comments