NUTHLAWI VIRGIN NEN!
(Nuthlawi Zûnah Ka Uai!)
© Chhantea Pautu
Anmahni rawn uai lêt lem lo mah se, nuthlawi zûnah hian ka uai zeuh zeuh tawh a; tuna ka sawi tur hi a tu ber nge tih kan thup a ngai dawn tlat hi a va ṭha em!
Ka hmêl ka han en a, a hmel te vir ver chu ka phu lo ka ti takzet a. Keia kara chawmpang kara aṭanga pawh chhuah hlim ang maia hmel pawr chip chep, lu kir bap mai, thau mum vei kâng si, pumthum chenghnih man vel min ngaina ve hle tih ka han hre phei kha chu, ka lawm lutuk hi midang hriat loh hian ka khek vei ṭhut ṭhut ṭhin a, ka hâ chu a lang reng mai bawk.
Tawn tirh lamah chuan Phone kan han bih dun a, ka Phone bih lai min rawn bihpui pahin ka lamah a rawn âwn phei a, mi rawn nêk tàlh tàlh a. Chu thil thleng chuan ka ngaihtuahna chu a ti pûk nghal ruih mai a! Ka han melh rulh a, ka meng mi tak ta rûn a, a chêtzia chuan min duh ve a ni tih a ti lang chiang mai. Insum hle lo ila chuan lawm avangin ka khek chhuak leh ṭhut pek ang chu.
Ka hmel en ang hi ka ni lo va; keimah leh keimah hi zei hi ka intiru em em zel ve ringawt a, ka zei zia erawh tu hmeichhiain an sawi tak tak ngai lo. Tichuan, kan han inbia a, kan inbia kan inbia a, kan inbe ta em em mai a. Kei chuan fing takin 'ṭawngkam chhawrthlapui' ka hmang duh ngai miah lo va, kan inhaw lo ve ve nia a lan hnu pawh chuan bem duh lovin inbem hmasak tir chu ka 'project' lianpui a ni nghal a. Mi ka bem dawn hian ka hlau pawh ni chiah si loh hian ka tiril a khùr ru tlat zel lehnghal. Mahse, min bem duh tâk miau loh avangin ka hlawhchham ta phawt mai.
A tâwpah chuan fiamthu nena ṭan la chhoin chatuan thunung thû-ah thu chu kan han thlung ve ta poh a; ka thu ziak lam hawi kî ka thlâk nghal bawk. Pathian thu ziaka 'status update' ṭhin khan nuthlawi thlavang hauhna thu ka'n ziak chho nghal pang a. Nula pangngaite aia nuthlawi 'chhai' a 'fair' zawk zia chu rilru-ah a ṭhang lian chho ta thúr thúr mai. 'Virgin' thu hlaah pawh, a langa nula pangngai si 'virgin' lo an tam tho si zia chu titi lamah ka han han vawrh chho ṭan ta a. Naupang ka'n ngainat belh sauh a; an lawm zawng leh ei duh zawng ka'n hre thei chho ṭan ta em em khawp a, 'Engtin nge khati tak mai a ka inpêk thûk theih?' tiin ka inzâwt ṭhin. A chhan chu keimah bawk hian ka hria; nuthlawi zûnah ka uai a lo ni.
A nu ka rim rualin a fate rim tel a ngai a. A nu ti tau ka thlem rualin a fanu 'chocolate' pêk zeuh a ngai a. A fanu 'chocolate' pêk rualin a nu tih lungawi nan pêk ve a ngai a. Nula pangngai kan rimin kan rimate tân 'chocolate' kan ken ṭhin kha; nuthlawi zûna han uai ngat chuan naupang pêk tura ken a ngai tlat tawh. An fate an lo fel chuan min 'pa' deuhthaw nghal a, "Min mutpui rawh," an tih palh tak hlauhin an In panna kawngah thawnthu hrilh tur ngaihtuah chawp a ngai a. Ka hriat chian vak tawh loh, 'MAURUANGI' thawnthu leh 'RUNGI NU leh THIALTEA' thawnthu ka sawi pawlh tâk nual ṭum pawh a awmin ka hria. A châng leh Bingtaii kha Muauruangi dinhmunah ka dintir a, a châng leh Rungi nu kha ka'n ti Bingtaii chho nawk nawk bawk ṭhin.
Tichuan, mizo thawnthu dik takin a fate lam kan han awi mu te te a; a nu lam ka belh bulh hman meuh chuan zan a lo rei tawh a, haw a lo hun leh chawpchilh tawh mai bawk si. Ka rima ber kha ka rim hman lo va, ka bialnu rim tura ka kal kha nau awmin ka hun ka hmang a, thawnthu ka hrilh a, ka châwi mu a, zun huh ka thlâk lo chauh chu a ni e. Tlangval, kum 30 pawh ka tlin hmain fate 'home work' ka tihpui dawn a ni tih hi ka pa tak ngial pawhin a hre lawk lo tawp ang.
Nu leh pa bula fing takin ṭawngkam ka rawlh tan a. Nu leh pa tlawn pahin, "Ka pa, ka nu, mo atan nuthlawi a pawi ang em?" kan han ti nui heuh heuh a. Kan fiamthu-ah ngaiin, "Pawi lah lo ve," an lo ti a. "Fa chhawm ngai pawh a pawi lo tiraw?" tiin kan han nuih tlawn leh ngial a. "Pawi chuang lo ve," an han ti leh ngat chu, ka ṭawng tawh lo, lehlam hawin ka nui vur vur mai asin. A ṭhuma ruh ngai zûna uai chu tih namai a lo ni lo; thluak hman hi a ngai em em a, hisáp kitáp nei sang tak tân lo chuan tih rual a ni lo.
A nu ka han tih lungawi loh ṭumte hian, a fate chu ka ngai ta em em mai ṭhin a. A lungawi loh avanga min be ṭha duh lo kha ka han call ngei a, "Matei kha ka ngai, ka be châk tlat, min lo biaktir teh" ka han ti zaih mai a; a dik tak chuan a nu 'hello' ṭawngkam khat lek pawh kha a thlakhlelhawm riau nia. Nupa an inṭhena an lunglêng khawharin an fate an chhuanlam ang chauh hi a ni mai, in hria, sawi tam a ngai lo aw.
Heiha...huiha...nuthlawi zûna uai zet chu nupa nun zirlai hi kan zir a ni ringawt!
An zûna uai chu a lo na tak tak a niang, khawi lo kal dawn hlek dawn apianga lirtheia chuan thlahlel em em zel kha, a nu rim turin, a fanu ngaih chhuanlam siin ke ngatin kan han 'paidal' tlauh tlauh mai a nia. An In panna, an In thlen hma theihna 'short-cut' te hi ka hre chhuak zung zung a. Thil ṭul danga hah hma em em khan, zan tin kal chungin hah ka hre ngai miah lo nia! An In chu panhnah cheh leh 'roll' ka 'training' nana duhthusamte pawh a lo ni lehzel a; nuthlawi zûn nei chin ngat hi chuan panhnah cheh leh 'roll' lah hi an chîng duh riau lehnghal a. Nuthlawi pathum chin zûna uai tawh ngat chuan rang tak hian panhnah kan 'roll' zet zet thei tawh mai ṭhin.
A ho ang reng sia a sei tawh mah mah. A tawpna atân- A tam zawk hi duh reng vang leh awm herh vanga thlawi ta an ni kher lo vang; chuvangin, chhaih a, dem a, fiam nawmnah a, zahmawh ṭawngkama sai ngawt hi kan tih tur niin a lang lo. A thlawiate lam pawh hian zahawm taka nun tum ve bawk se la.
Nuthlawi zûna uai chu, intih thiam loh avanga inṭhen hnu pawhin an fate zûnah kan lo uai tel hman a, naupang hi kan ngai vung vung mai nia!
NUTHLAWI THLAHNA!
© Chhantea Pautu
Lêng leh chan chang khawhara vài mala riangvài,
Hraichawi chunga mawhphur ṭuan ṭulin hrai a kài;
Lusûn thinlung khawhar chu a dinhmun a lài,
Dema chhaih a hlawh zahmawh tawngkama an sài.
Ka thlîr ka chîk a nunzia tleitir lêng a îang,
Khawngaih lainat thinlung puin ka lâwi a sîang;
Hnêma awih hlim lohin kumsûl tam a lo rîang,
Puan ang min pawm ka hlim ka nui a nuam a kîang.
Hmangaihna pâr chèna hlim lai kan chen thin kha;
Nau ang ka lawma hlima ka nuihtîr ṭhin kha.
Sûlhnu nun hlui hlui lote ka thlîr,
Demna thinlung ka khâwi lo i tân;
Ka dik lo, ka zêp lo nun ka zìr,
Tlâwmin ka dîl ngaihdam i dam nân,
Ka ngaihtuah che a;
Hlimin lêng ang che hmangaihna dawngin.
NOTE:
Ṭawngkam chhawrthlapui= Thu thlum leh thluaithlum dupa hmeichhe chhaihna ṭawngkam.
Nuthlawi Virgin: Vanduai vang, Pasal sùn avanga nuthlawi ta te ka sawina.
Comments