KEI VE

KEI VE...

Pjs

Chhun boruak lum leh reh ngawih ngawih mai karah chuan tukverh chu ka han hawng a, thlifim a rawn thaw lut heuh heuh reng a. Chunglam van boruakah chuan "Khawvel hi ka han em ut teh ang". ti niawm tak mai hian Nî chu a sa ṭha in a êng em em mai a.

Ralah thingzai khawl ri ri vung vung mai te ârlâ tuizo hlim dawk dawlak thawm te leh naupang inkhualte lem thawm te chu thawm awmchhun an ni mai.

Kan ṭhenawmte in hnuaiah chuan naupang pathum hi ka va hmu a, pakhatin hmawlh pahnih a kenga, pakhatin thingzaia siam ṭingṭang lem hi a keng bawka, pakhatin zaina tura hmanrua(microphone)niawm tak thing tawite hi a keng bawk a. Hmawlh tawite kengtu chuan "Ka zai tawh dawn a nia, lo inring rawh ru" a han tilauh lauh mai a. A ṭhiante chuan inring hmel fahran hian an thilken chu an han siamrem vela..

Chutah a zaitur a ber chu a han zai ta a..
"Hnapkhir chu, hnapkhir chu a siam leh a bai kan hna ang a,"tih hla kha a han sâ lau lau mai a. Ka nuih a zá, an hmuhnawm viau lawi si.

Hmawlh pahnih kengtu kha drum- vaw tu ah a ṭanga, a vuak mil phian mai lehnghal, chutia pakhat a zai zawh chuan..drummer- chuan
"Kei ve, ka zai ve ni" a tia a rawn ding chuak a. "Rulhutin solfa a vai ektumin rumset a vua, hnap a zai thlerh thlerh " ti laite hi ring fahran mai hian a rawn sa chhuak a..

Kan naupan lai chuan kan tive ṭhina, kan ṭhianhoin ramah ka han kal a, hnahthel te chu mipui sangtamtak ang ah kan han chan a, an hmaah chuan kan han zai vel ta ṭhin a, kan han lam a, zaithiam band lar tak kan ni ve ṭhin. A lo nuam ve ṭhin ngawt mai. Engdangmah kan rilruah a lut lo, vei êm êm kan nei lova, sikul kal kan ning lutuk ṭhinte kha kan thil nin awmchhun a ni  hial ta ve ang.

Lui kal hun laiin sairawkherh nen lui kan han kala, tui theh kanga, a vaihmasa nih inchhuhin kan thehkang hleithei lo ṭhinte, nghathal nena sangha man kan han inchhuh ṭhinte chuan kan ṭhianho boruak a tinghet zawk a, naupang rilru thianghlim ngang kha kan ni a, insualbuai chang leh invelh chang awm mah se, kan inhaw rei ngai lova, kan inkawm leh dial dial zel tho kha a nia.

School-ah game-ni a lo thlenga, karkhat chhunga nikhat chauh infiamna hun neih chu kan khamlo tlang ṭhin hle mai, chupawh chawhnu lam chauh a ni ṭhin lehnghal, lehkha zir leh class-a awm kha kan thil nin ber a ni  mai a, game hun a lo thlen tawh chuan kan phur ṭhin hle a ni.

Vawikhat chu khawro lai tak a ni a, kan ṭhianho zinga bawltheih awmchhun Mickya hi kan game ni a lo thlen chuan vaivut zingah kan chentir a, kan muttir a, vaivut chuan kan han phul kual veka, a lu-ah leh a beng velah te pawh chuan kan vur khat ta vek maia, field sir lama kan zirtirtu awmte chuan min hmu pha lem lo. Chutia Mickya kan phul kual vel vak lai chuan ani chu a rawn ṭapchhuak ta, a rawn tho a, a khu rum rum maia, a kâah te chuan vaivut hi a khat deuhvek maia, a meng sen rum mai bawk. Chutia a rawn tho chhuah hnu chuan field pawnlam panin a ṭapchhuak ta hliam hliam mai a..

Mipa lian leh mipa tê team hian kan inthliarhrang ṭhin a, keini ṭhianho chu mipa tê zingah pawh a chê pawl leh mi'n bawl peta an inkhelh luih luih lai pawha, vaivut zinga lo infiam chu nuam kan tizawk fo. Chuvang chu a niang keini ṭhianho pawh kan zirtirtu te chuan Vaivut uanaute tiin kan hming min phuahsak nghe nghe..

Kan lo len deuh hnu; highschool kan han rah ve chinah chuan kan thawnhnaw leh kan taksa te chu kan han uluk ve ta deuhva, keini ṭhianho chuan midang kan kawm ngai meuh lo, kan tette aṭanga inkawmho kan nih avangin kan inhrechianga, kan infiamnana kan ṭawngkam hman te pawh chu midang hriatthiam ve loh a tam ngawt ang. Kan taksa a ṭhang ang bawkin kan rilru pawh a ṭhang ve a, hmeichhe hnute ît na changte kan han hrechhova, hmelṭhate pawh kan han hrechho zel a, school sang han kai ve takah chuan ngaihzawng neihdan kawngte pawh kan han ngaihtuah ve ta a..

Mahse keini ṭhianho chu kan mak khawpa, tlema hmeichhe hnimhnai kan awm chuan kan dem luai luaia, tenawm kan ti a, kan dahhrang nghal deuh zel bawk, a dik tak chuan kan naupang rilru leh engmaw khan min la kiansan meuh lo a ni ber.

Kan tetlai chuan ngaihzawng neih chu thil zahthlak a ni a, hmeichhe kawm chu sawi loh an hmuhphaka awm hi kan tum ngai lo. Chhungten hmeichhe hminga min han demkual vel changte hian kan laná lutuk chu kan ṭahphah hial ṭhin.
"Bialnu i nei tawh em?"
Ti a min zawh changa "Aih" ti a kan han chhan leh a
"Aih' tihtham te a nei ve tawh" an han tite hian kan lung a awi lo a, ka ṭah te hial a chhuak ṭhin kha a nia..

Chutianga school a, nula in min han koha, an bula kalve tura min han sawmte hian kan hreha, kan ṭhianten min hmuh leh hriat kan hlau em em ṭhin.

Vawikhat pawh school hnahthawh ni a ni a, kan ṭhianpa Nghaka chu class hmeichhe ho chuan an rawn koa, an bula awm turin an rawn sawm a nih chu. A han hawikual vel a, kal duhna rilru a nei deuh nge ni, keini ho chu min han melh hrak hraka, a kal leh ngam chiah lo chhuanlamah chuan, a rawn kotu te hnenah chuan,
"Kan vawm dawn che u" a han tita ringawt maia..keini ṭhianho chuan lung kan la a , kan tawng ta chiam ringawt maia . Ngaihzawng neih chu kan la hlat ve khawp mai.

Ṭhianho zinga a chungnung bik ni leh luck bik nih kan tum lova, insawi luck-in awmzia a nei lo, kan inhrechiang tlanga, nitin kan hun tamzawk pawh kan ṭhianho tan chuan kan hlan vek a ni ber mai.

Highschool aia sang zawk higher secondary kan han kai chhoh meuh chuan keini ṭhianho chu kan darh ta a, kan kalna school a inan loh tak  avangin, inkawmna hun kan nei thei ta lova, kum tawp leh fur chawlha kan khuaa kan hawkhawm nikhuaa kan inhmu khawm leh te a nih loh chuan ka  awmn hmun a inhlat hlawm ém em a, ṭhian thar tam tak pawh kan neichho zel a, mahse keini ṭhian pali anga inkawmngaih leh inzui hnem tan chuan ṭhian ṭha dang siam leh chu a harsa viau a nih ka ring, krismass kan haw khawm nikhuaa kan titiho chang pawhin kan titi kalphungah a hriat mai theih a ni..

Chung hunah pawh chuan kan mizia a la dang lo, kan hauh ngaiin kan la hau reng a, kan titi lo hretute chu awmse hau min tilehzual ngawt ang,
Kan han inkawm leh tak tak mai chu, Sangate inah kan lenga, Sanga chuan chithlummun hi a rawn la chhuak a
"Hetah hian Chithlummum hi kan dah anga, tlem kan liak huh anga, fanghmir pakhat a lo kal a, amah chauh chuan a pu zo dawn si lova, a ṭhiante ko turin a kal anga, a koh hlanin chithlummum chu kan lo lasawn daih anga, a ṭhiante chuan dawhheh an ti ang chu aw.." tih mai mai te..
Lui kan han kalhova, Chakai sex hmandan tur leh a harsat hmelzia mai mai sawiin kan han nileng leh a.
Vawksa tuizia kan han sawia,
Ṭhianpa Nghakan "a kehniak te nen lam hian chhum theih se..a ketin te a hmul te hi chhumhmin vek theih se..ei zawh vek a chak awm" a tih mai mai te chu kan titi duhzawng a la ni.

Sazù sa hi tui an titlang hlawm hle maia, kumtira Sazù thangkam hunlai chuan ram kan riak hova, karkhat dawn kan riak tlang ṭhin.

Sazu kapnam hi ka eive thei lova, a thuhrimah sazu sa hi an ni angin tui ka tive lo hrim hrima..chumi min tihel nana an titi tam ber chu
"Sazu sa chu a kapnam hlang nise la, a kap aṭang hian han keu kau ila..han dungdih chho ila, a tui ber mai.." tih leh "Sazu sa chu a vun hlang nisela..a zavai hian a tui ngawt ang" tihte hi an ni a..
Intihel leh han insawisak vel hi kan nuam tih zawng tak a ni ṭhin a ni.

Vawikhat chu kan khawlama kan haw khawm leh ṭum hian bialnu kan nei haw hlawm alawm mawle..
Kan titi kalphung pawh ngaihzawng neih takah chuan a dang ve ṭan ta a..

Kan phone ṭheuha kan bialnute thlalak chu kan han inhmuh kual vel a..
Kan han insawichhiat sak leh ṭan ta a..
Mickya bialnu kan han hmuhchiah chuan..
"Deuh teh vuau e, " kan han tihmasa phawta..

Sanga bialnu kan han en leh chiah
Nghakan "Ekhai...!A hawi tumbu ul mai a.." a han timai chuh..kan han enchiang ṭhin a nih duhhmel lutuk a..
Enganga hmelṭha pawh nise, keini ṭhianho karah chuan an chhe em em vek a ni deuh tawp mai.
Engang pawhin insawichhiatsak mah ila, huat ennah kan en lova, kan induhtawk tlang hlawm em em tawp mai a ni.

Kan upa tial tiala..kan kalkawng a inang lo chho zela..
Kan hmel a inanglo ang bawk hian kan tuizawng leh nuam tihzawnga dang a, keini ṭhianho pawh chu kan inhlat ta tial tiala, kan taksa mai a inhlat tawh lo..kan rilru thlengin a inhlat tawh a ni.

Hmani lawk khan Sangan nupui a neih thu ka hria a, mahse an inneih hnuah ka khawlama ka chhungten min rawn hrilh aṭanga ka hriat chauh a ni.
Sanga chu kan khawlamah awmin lehkha a zirzawm hleithei lova, college a zawh veleh khan private schoolah a thawk ta a ni.

Ṭhianpa Nghaka nen chuan kan inbe pawp ve deuh renga, ani chu sipai niin, Mumbai ah a awm daih a ni, a dinhmun a ṭha khawp mai, nupui erawh a la nei lo ve tho a ni.

Ṭhianpa Micky-a ve thung chu a tetlai aṭanga hrisel vak lo a ni nen, tun thleng pawhin dam hleithei lo hi a ni a..Aizawlah awmin eng treatment -ment emaw ala deuh reng zela..Aizawl ka kal chang chuan ka zuk tlawh ve ziah ṭhin a ni.

Kei ve..

Kei ve tak hi..Thingtlang khaw pakhata ka bialnu chu ka han umzui a, nuthlawi a lo ni tih ka hriat hmain kan lo mudun khanglang peka, fa a pai ta si. A chhungten kalbosan an phal tawh si lo, kei ngei pawh chuan ka fâ a paihnua han hawsan leh lah chu thildik ni in ka hre si lo..

Ka thawhrah nilo naupang pathum harhzet mai te leh ka nupui hawi tumbu ul, dulkiar thau huarh maite leh ka thawhrah lo la piangtur  te nen in tereuhte ah kan  khawsa ve a, kan nu hian Primary schoolah zirtirtu hna a chelh ve a, kan chhungkua a chawm mek a ni..

Mahse min hlau ve teh mai a nia aw..

藍藍藍藍