KAWHTEBÂWKA
BUNG 3-NA
Sukte Râl Tawlh Thlu
Kawhtebaâwka chuan in lam a pan ta a. Karkhat chuang zet a lo vah tawhna mûal leh rùam, kawr kùam leh lui khawkrawk tak takte khan a lung an ti awi a, a tân chuan a thinlung chenna hmun thawveng a ni.
A rilru kawm chunga a kal thoh thoh lai chuan, nui awr awr ri hi hriain a inhria a. Hlauh vang ni miah lo hian a han ding chat a, a ṭhianpa Ṭhohliana aw niawm tak hi vawithum a han hre leh a, a vawithumnaah phei chuan a hming ngeia ko ni hian a hre nghe nghe a; chu chu, ni dang pawha a chhungrila a lo hriat ṭhin, a ṭhianpa nen thinlung lama an inzawm ngheh em avanga an inhriat pawhna râlkhel aw ri, ri miah si lova a hriat ṭhin ri ngei chu a ni.
A ngaih chu a ṭha thei ta tlat lo. Rilru-a helhkam nei run chung leh, hmanhmawh ru em emin in lam chu a pan ta hmawk hmawk hmawk a.
* * * * * * *
Chhum a zîng chûai a, Mualvùm khawper Pangdèp in 200 nufa vel awm chu a reh deuh raih a. Chawhnu tlang her, tlai lam tawh tak, zanriah chhum zawh hnu a ni tawh a, khaw dâiah chuan Sukte pasalṭha, rawlrâla che ṭhang tak takte chu langsar lo tak si hian an ṭhu ther fuk a, an ṭawng lo va, fimkhur takin an awm hmun aṭang chuan khuaa mite che vel chu an thlithlai a.
A kumkhaw thuin Lusei lal leh an khua leh tuite leh Sukteho hi inchemhar reng mai leh rawlrâla inveh reng mai an ni a. Sailo lal leh an khua leh tui, luseihote hi chhak pawi ral hlaua thlang tla an ni ber a; hei hi a chhan chu anni aiin indona hmanrua an neih chhiat zawk vang a ni ber awm e. Lusei lam ai hian chhak lam pawih râlte khan silai an nei ṭha hmasa zawk a, indo leh rawlrâla chet thu-ah an chelh loh zawk fo avangin an tân thlang tlak mai loh chu duh thlan tur a awm lo a ni.
Sailo lalte leh an khua leh tuite chuan thlang an tla a, an chhuk thlang zel a, indona hriamhrei leh hmanruate pawh an nei ṭha ve ta thuai a, silaite pawh an nei ṭha ve leh ta zel a. Chumi hnu-ah Sailo lal ṭhenkhat chuan chhak lam ram chu zuan lehin, chhak an han nawr ṭha leh ta ngat reng a. An chhak pawi râl leh sukteho ep turin a er chho leh ta a ni. Chung sailo lal, chhak nawr leh zingah chuan Lalsavunga te pawh kha an tel a, a hnu lehah a fapa Vanhnuailiana'n a nawr chho zui zel a, Vanhnuailiana fateho pawhin chhak lam dai an do zel a, Sailo lal dangte leh an khua leh tui luseite tâna chhak râl an chimawm lutuk tur pawh an vau dài nameuh mai.
Chapchar awllen laiin Mualvùm pasalṭha ṭhenkhatte chuan valupa Dohrânga hoin Sukte lal Ginlianlal-a khua Zalaisam chu rawlrâlin an han piai hlek a, mi panga thatin silai fung 7 lai an rawn hawn a, hemi ṭum hian Kawhtebâwka chuan râl pahnih thatin silai fungthum lai a khawm a ni. Hemi ṭuma an han chêtna thungrulh nana Sukteho hi lo er an ni ber a. Mualvùm tak erawh chu beih an zuam meuh loh avangin a khawper Pangdèp hi rawlrâlin beih mai an tum ta a ni.
Sukteho ṭanhmun siamna hi Pangdèp khaw dâi, mûal pawng poh lah pahnih awm dun inkar kuam chep lai takah a ni a, Sukte pasalṭhaho hotupa chuan mûal pawng poh lah mai pahnih chu a han thlir vung vung a, "Tah hian a ṭha. Hetah hian bul kan ṭan ang a, hetah bawk hian kan tâwp leh ang," a han ti sup a.
An kalna lam tur ṭheuh a han sem kual zung zung a, amah leh a hote zinga a rin ber, a tha-chhang-dawltu nen chuan mûal pawng poh lah phir inkârah chuan lutin, an hma zawna Pangdèp khaw ril lam chu fimkhur zet hian an pan dun ta a.
Hepa, Sukte pasalṭhaho hotupa hian nikhualoh riauna a neih roh a, ho te teah hian a tlu khut khut zel mai a, a tluk hian eng zawng pawhin tlu mah se, ri no chak khawp hian a khabe a tauh hman ziah mai lehnghal a, mak deuh a ni. Hetia a tluk apîang maia a khabe a tauh ziah avangin khabe zum pawh a nei vak tawh lo va, a bial màt tawh a, a khabe pawh a ner nasa tawh ang reng khawp mai. A nihna takah chuan khabe a nei tawh lo a hrim hrim a ni; a sawh ral vek tawh.
Chutia, Sukte pasalṭhate'n Pangdèp khawdâia mi lu lâk tur veha pawr pheng phung leh huh hliam hluama an chêt hrut hrut lai chuan, Pangdèp tlangval ṭhahnem tehchiam lo zinga an pasalṭha thei ber, Kawhtebâwka ṭhianpa, a ai-hnah-phahpui leh a sa-ngawi-zawnpui, a lui kalpui ni bawk Ṭhohliana zan nula zen mut hmu ṭha lo chu, ham bui bui hian khawdâi lama a inthiarna, kham ko hmawra lung chhawrdawh, inchherchhuan rem zet maia dailêng turin a kephah hlaipui mai chu leiah a rawn phah phei thlup thlup a. Ani chu Pangdép khaw mite zînga Sukteho hnaih ber a ni a; a lu a hloh phah maithei; mahse, a hlau hauh lo vang.
Sukte hotupa leh a tha-chhang-dawltu chuan mûal phir pawng poh lah mai inkar kûam chu an pêl vel chiah a, Pangdèp khaw luhna mûal zingzum, a sir tawn tawna mûal dung zên inkhawh phei awmna lai piah mai, khaw luhna depa in hmawr ber pelh chiaha tlangval, tho hlim tih hriat tak, rawn ham phei bui bui chu an va hmu a. Sukte hotupa chuan a kalpui pa chu zaizirin a han hawi vat a, amah chuan mûal zingzum vei lam zawka mûal dung chu a behchhan vat a, a kalpui pa pawh chuan ding lam mûal dung pang vel chu a zût phei ve nghal bawk a.
Ṭhohliana chu a kal chhut chhut a, a kephah chu uṭawk kawng kan vei pêt nan Sukteho hotupa chuan a lo ît ngang mai a, a that a, a lû a la thei a nih chuan, a ke pawh chu tan tel ve ngei a tum rân a, a fateho ṭap thlem nan a duh a ni. An khuaah chuan a fateho hi naupang harh ber an ni a, uṭawk an lawm em em a, an uṭawk khalh vel han thai leh vel nan, an mi chân mêk kephah vei lam chu a ît riau a ni.
Mahse, Suktepa tân thil pawi a thleng ta tlat mai. A duh thu sam vel aleiah a fimkhurna a lo tlachham deuh a, Kawhtebâwka ṭhiapa Ṭhohliana kephah veilam a hawn tel thei ngei dawna a inhria chu a lawm a, ri lova a nui vur vur kha duh tâwk mai awm a nia; chuti ta mai lo chuan a khek ta ṭhut ṭhut roh a, fimkhur a ṭulzia a hre chawpchilh nghal a, a hmui chu inthiam loh hmel zet hian a hup vat a, mûal lehlama a kalpuipa chu inthlahrun hmel zet hian a va melh tîm dui mai a. Pasalṭha rual hotupa ve ber tih atan chuan a tuai mah mah a ni.
Khek ṭhut thawm avang chuan Ṭhohliana chu a ding chut a. A beng chu a chhi vung vung a; mahse, a éng ve thei lo. A hawi deuh hruk hruk a. Zan lamah khan nula pahnih a zen a, a la hlawhtling ve ve zui; mahse mut a hmuh loh phah thung. A zan nula zen inhmang da lutuk chu hna thawk lovin khawchhungah a awm a, chawhma lam khan daihnaiah sava vehin a pingpei kual mai mai a. A sava veh vâk kûal vel chuan an khaw nula sihhnip leh buanchaklo deuh anga thang hat, amah lo ngaihmelh ru zauh zauhtu, a ṭhianpa hming ang zûl deuh pu, Kawhtebêli thingphur tur leh a zuitu, an khaw rawlthar derdep ve deuh Chaurauhluana a hmu fuh a. Ṭhohliana chuan Chaurauhluana chu a hnar hawsak hmiah a, amah chuan Kawhtebêli chu a zui ta hnuk hnuk a. A zui a zui tâkah chuan an khaw bul luite, Mûalnamlui thlen hma deuh kawrte kamah tlângnuam a han per kàipui leh hram a. Kawhtebêli hi zawng, nula azawnga pêngleng-pûng ber chi kha a ni ve a, zawlpuan an phah chungah chuan a rûm sai dar dar a. Ṭhohliana lah tlângsam bul ṭanchhanin, a hnunga herhse kung lian tak zung pira mawng-tai tâtin a ṭang sauh zauh mai bawk a. Zan lama a nula zenna lamah khan a chau ve em em lo emaw ni, kàwng tui tamna artui a hîp hnem hle pawh a ni mahna, a kàwng tuiin a daih rei em mai; kawrte kama an zawlpuan phah chungah Kawhtebêli'n a chhoh en hâ laiin, a khampheiin a dung sawh(sawt) lauh lauh mai a, a lo hmutu tân chuan, "Eng a han ti chu ni maw?" tih mai tur hian a phusa nasa a.
USA President, Donald Trump-a'n politic a rawn luh chilh tirh a, inthlanna atâna a campaigne lai leh inthlana a tlin hnu-a a lar tak tak lai khan, patling phanchang pui pui nia ka ngaihte pawh khan, ani, mize phunglung deuh sawi nan khan 'pênglêng-pûng' hi an rawn hmang hla zen a; chuti lam biahthu sawina a ni lo va, 'nula lerh ve tak' sawina a ni zawk a ni.
Ṭhohliana chuan khek ṭhut thawm chu a hriat zui leh tâk loh avangin a dailenna hmun nghet(a regular toilet) chu panin a kephah chu a phah chho leh ta thlup thlup a. Chutah, thawm a lo ri ta thut a, a ke bul lawkah chuan a rawn ri thla fua a, a veilam sirah chuan eng thil emaw ni, lianpui mai hi a tleng thla fua a, eng hram emaw ni hi a han hre zui zat a; chutah, a ding lam sirah chuan eng thil emaw ni hi a rawn phe deuh vuai a...
An mi chàn a rawn kal leh zel tâkah chuan suktepa chu a lo insiam rem sauh sauh kha a ni a. Sapuiin a sa seh tur a zuan dâwna a bawk phek ang mai hian a han awp hniam sùai sùai a, a mawng chu a ti poh tarh tarh bawk a; chutah, an mi chàn chu vawikhata a nghawng sah chhum hmawk tum hian a han zuan ta a. E khai awww! A zuan emaw a tih kha a zuan lo, a tawlh thlu a lo ni zawk. Lei a nêmin a hnip a, a nâl em a ni. A ke a phet a, a leu zawk a, a khabe, awm tawh lo chu a sawh leh chawrh zawhah a inbin thak a, a mawng poh tarh mai ngei chuan lei nàl nêmah a mi chàn lam panin a tawlh thla ta fua a. A tawlh thlâk rual chuan thing bul bâwk hi a mawngtamin a tauh zui a, a na ti chu a ṭe thla pah ruai ruai mai bawk a. Chutia a tawlh thluk rual chuan a kalpuipa chuan an mi chàn chu a a lo zuan ve nghal zat a.
Ṭhohliana chuan a sir ding lama rawn phe vuai lam chu a hawi vat a, mihring chawrche zet hian a lo zuan chu niin. Chu mihring chu a lo rek bet chat a, a rek âng chawp chawp ta mai a. A rawn zuantupa chempui chu a hawhsak lawk a, a chhip buruh chiam bawih khawp hian a han sat mai chu(h), chalchang pawh a nei lo. Hmeichhe kawhtebêl pathumah a kàwng tui lo sem rual tawh mah se, Kawhtebâwka ṭhianpa kha a ni miau a, tawrhhlelhawm tak a la ni tho mai. A thlanga ri thla ruai ruai chu râl a nih a hre zui nghal a, thinrim meng sen rum chungin thlang lam chu a han hawi thla leh nghal zat a; mahse, a hmel chu a rum rei thei ta ngang lo, a thil hmuh avang chuan a nui ta kiah kiah mai.
Dailêng tura a chhuah chhohna hi awi ve deuh mai hi a ni a, a nàlin a dîak a, ani Ṭhohliana anga kehphah hlai tan lo chuan tlu lova kal chu tih namai a ni lo. A thlang zâwlah chuan khuar deuh, hlam bial vel, tui tlin piauna, diak ṭha zet mai hi a awm a, Pangdèp khaw vawk rual inbualna kûang a ni; chutah chuan sukte pa chu a tawlh lut hi a lo ni a, a thawh tum chu chirh diak nalah a ke a phet a, a lo tlu leh zel mai a, a tlu berh phung tawh a, a samah te chuan chirh hi a kai liai luai mai.
Ban chat hian Ṭhohliana chu a pen thla chhut chhut a, khuar kotlângah chuan dingin sukte pa chu nuihzatin kutzungchal khur ngar ngar khawp hian a han kawk ta ngat ngat mai a, a nui ta kiah kiah a. Sukte pa tlawmla lutuk, thinrim bawk si chu a meng dur khup a, thawh a han tum ṭhin, a ṭan poh leh a tlu chiang ting mai si. Ṭhohliana chu a melh ṭawk ṭawk a, a hah chu a thaw hlui hlui mai a, mangang zet hian a phar uan uan a, a thawh apiangin ke vanvawr suau khawp hian a tlu leh ziah. A rilru chuan, 'Hei chen ka lo kal a, lusei ho lu hlawh tuma kal ka ni reng si a, kei lah chirh diak nalah ka tawlh thlu zel si,' a ti a, a mangang ṭan ta em em mai a.
Chutih lai chuan khawchhung lamah silai a lo ri a, nunau thlabar ṭe ri hian a rawn zui bawk a. Ṭhohliiana chuan thawm lo awmna lam chu a han hawi vang vang a. Chumi hnu-ah Sukte pa lam chu a han hawi leh a. Ani chu chirh diak nal thawhsan tum chuan a lo la bei nasa mai a, amah leh amah chu a inchhaih buai tawk em em mai a, a tho chauh a, a tlu leh zel a, a hmel han en reng reng pawhin a hah tawh hle tih a hriat a. A khabe a bul mùt mai bawk si. A han en ṭhin, a nuih chu a la za lutuk a, chulai khuar aṭang chuan sukte pa chu a chhuah theih pawh a ring lo va.
"Ṭhiana, ti khan lo tal vuat vuat rih teh, ka rawn ngaihven leh ang che," tih pahin a nui suk a, silai rikna lam chu a pansan ta a. Khawchhungah tlangval pakhat a hmu a, "Khilai vawkbualah khian sukte pakhat a tal a tal mai a, lo han ngaihven teh," a ti a, ani chuan hmalam a pan ta zel a.
* * * * * * *
Malvùm khaw thlen hma, lo fìng nga awm vela a la awm lai chuan, Kawhtebâwka chuan a ṭhianpa aw chu a han hre leh a. Ngun lutuk mai hian a beng chu a han chhi êng leh ta vât vât a. A kap bawr chu a rawn za mer mer a; chutia a kap bâwr rawn za ta tlat mai chu mak hi a ti em em mai a. Hetiang hunah hian vawikhat mah a kap a la za lo. A ngaih ṭha lo chu an khaw lama awm thut(in-teleport) a duh rum rum tawh a. Furniture tura a hual, thlanvawng kung a kih pawh kha a rilru-ah a awm hleithei tawh lo.
Hmanhmawh zetin a kal leh ta a, a hmanhmawh luatah vawihuih hrui a pal a, hmai nawr nawk bawk chuan a tlu leh ta a. A va pawi ṭhin tak em! Ner nûng chung hian a han tho a, "Ka in-teleport tak tak dawn a maw ni le," a han ti hmuk a.
In coment peih lo si, ka titau dawn. 😢😢😢😁😂
Comments