SANGU LUI RUAMAH
(Detective Story)
©hhantea Pautu
Bung 6 Na
Hetiang hi thil thlen dan chu a ni.
Bangladesh kan luhna kawngah harsatna kan tâwk vak lo va, ramri vengtute chu awlsam deuhin kan pal tlang a, chumi kawngah chuan Muanawma'n engtin nge hma a lak ka hre lo, awlsam taka kan kal danah eng emaw a ti a ni ang tih ka ring ve tawp; mahse, Bangladesh-ah chuan kan awm rei lo, Vaṭhuampuiah kan lét leh phawt a, chutah Lunglei lamah kan kal leh hnu-ah Bangladesh lamah bawk kan lût leh a, Bipajjanaka hmun lam belh chian Muanawma'n a duh tlat avangin chu lam pan chuan kan kal leh ta a ni.
Bipajjanaka hmun kan pan hma hian Muanawma leh Duhawmi inkarah thil thleng a awm leh a; mahse, he lam chu sawi lan ka tum rih lo. He thil a thlenna hi Lunglei lama Hotel kha ni tawh lovin Bangladesh lamah a ni teh daih bawk a, nakin lamah a rem leh kan la sawi lang chauh ang.
Lunglei kan luh lehna chhan hi Muanawma'n SI Remlalfaka hmuh a ngaih thu a sawi vang a ni a. SI chu kan hmu ta ngei a; hemi ṭum erawh hi chuan a Inah ni tawh lovin Police Station-ah kan va hmu a. He Police Station-ah hian Muanawma hmel hriat emaw, a thil tih emaw hriatpuitu tumah an awm lo. A awm chhun SI Remlafaka lah chu Muanawma nen rilru lamah an inṭhelhṭhaw deuh tlat mai bawk si a, buaithlak tak a ni ve.
Muanawma chu mak ka tih khawpin a inphah hnuai thei a, SI Remlalfaka erawh a letling hlauh thung. Muanawma a han biak dan reng reng chu a tham lo tih hi a hriat em em mai a, Muanawma zawhna chu ka duh thu samin a chhang ṭha miah lo bawk. Muanawma erawh a luhlul bawk a, a mizia chu a ngai reng a, SI Remlafaka a dawr dan pawh a la ngai reng, a dam dap a, a ṭawngkam pawh a la dawh thei em em zel tho. Keiin SI Remlalfaka awm dan ka run em em lai chuan ani chuan a hmel pawh a la ti danglam duh miah lo.
Darkar chanve chuang zet kan inṭhut chilh tawh a, Kimkimi chungchanga kan inbiakna chuan rah ṭha a chhuah lo kher mai bawk. A hnu-a ka hriat leh danin, SI Remlalfaka dawr a hrehawm em emna chhan chu, a hmaa Muanawma nen an indawr fuh vak lo chu thu hran, SI Remlalfaka chu a hnu chhui mek, Ramnunthara thihna chungchangah a hah hle chunga hmasawnna tih tlâk hmuh tur a awm miah lo chu, biak a hrehawm phah viau a lo nih hmel. A tawpah chuan awmze awm lo tawpa inbiakna a nih Muanawma chua a hai lo bawk a, a tho a, "Pu Fak, ka zawhna i chhan ṭhat avangin ka lawm e," a han ti el ve ta sak a.
SI Remlalfaka hmel chu ka han en a, Muanawma'n a ṭawng elna chu a hre thiam a, a run pawh a run hle tih a hriat theih. A bula Constable pakhat chuan mak tih hmel deuh hian Muanawma chu a han melh hrak a, eng mah phei chu a sawi zui ve lem lo. Ka ṭhiana thawh rual chuan ka tho ve nghal a, kan inher a, kan kal zui ta nghal a.
Thui pawh kan la kal hman lo, SI Remlalfaka ṭawng ri chu kan la hre chiang thei lauh lauh hle a. SI ngeiawma chu a thu sawi avang chuan a nui vei huk huk a, a thu sawi hmasak zawk pawh runin Muanawma chu a dingchat tawh kha a ni a.
SI Remlalfaka chuan, "Kha thlalâka hmeichhia kha a farnu a nih chuan a easy hmel reuh a nia..." a han ti nawn leh kher a, a bula Police dang te nen chuan eng emaw sawi zuiin a nui huk huk a.
Muanawma ding deuh chat chu a inher nghat a, muangchangin SI Remlalfaka ṭhutna lam chu a pan leh ta chhat chhat a. Muanawma hi pa liana han sawi tur chi a ni hran lo, a aiin SI Remlalfaka chu a lian hle zawk a ni. Ka ṭhianpa hmel ka han en a, a hmelah chuan buaina inziak ka chhiar thei a, a nelawm lo. A uang lo va, a thu tak hle a ni. SI dawhkan hmaah tak chuan a va ding ngal a, a hmaa mak tih hmel deuha Muanawma lo entu Constable pakhat tih loh kha chu an lo nui ṭhaw hlawm a.
"Pu Fak, thlalâka hmeichhia kha, ka farnu a nih leh nih loh thu-a i ṭawngkam kha i sawi fiah thei em?" Muanawma chuan a han ti dam dap a, a hmel erawh chu a dam lem lo hle thung.
Chu Police Officer nui chu zawi muangin a insût hret hret a, thir-seh-nuih kan tih pawh hi a tluk tawh lo. Rei vak lo chu chhang lovin a han ngawi a; chutah a inngaihtuah pâwr thar leh ni ngei tur a ni, a hmelhmang chu a rawn inthlâk a, thinrim mitmeng deuh hian Muanawma chu a han melh a, a ṭhutna aṭangin a ding ve nghal a, "Eng nge maw i la duh chu le? Police Station hi chhuahsan tawh rawh u," tiin ka ṭhiana chu a chhuk melh deuh run a.
Muanawma chu a ngawi ngal a, a mit chuan SI Remlalfaka mit chauh chu a en ngal mai a, a meng rum hran lo na a, a lawm lovin a thinrim ve hle tih chu hai theih a ni lo thung. Eng emaw chen chu an han ngawi dun ren rawn a. Police dang lo awm vete chuan an chezia chu an lo en ve reng bawk a. Constable pakhat, Muanawma en deuh hraktu ka tih kha a rawn inrawlh ta a. "Muana, kal tawh mai rawh u, min hre thiam ula, in harsatnaah Pu Faka ho hian kan pui thei rih lo che u a nih hi," a lo ti a.
Chu Constable upa lam tawh chu a fing ka ti hle a; Muanawma erawh chu ngawi rengin a awm dan ngaia awm hian a la ding khawng lah a.
Chutah SI Remlalfaka chuan, "Sanga, lo inrawlh suh, he nau hi a kâwlhrâwng deuh tlat a nih zâwk hi," a han ti nghut a. A hmel, ṭawngkam leh a cheziaah chuan a Police Officer nihna a chhuang hle ni hian a lang thei a, a aia kum upa zawk fê anga lang, Pu Sanga a koh dan lah a chaltlai riau;chutiang thil chu Muanawma huat zawng tak a ni tlat.
Dam thlap bawk hian, "Pu Fak, ka farnu nihna ni àwma i rin i sawi chhuah chungchang kha i sawi fiah thei dawn em?" Muanawma chuan a han ti leh ngat a.
"Sawi fiah a ṭulna ka hre lo."
Thawm a reh dak a, chumi hnu-ah Muanawma kut dinglam chu a che thut a, ri chawk khawp hian SI Remlalfaka khabe-kualah chuan a kuttum chu a pe ta siah mai a. A rin lâwk loh tawp thilin SI chu a ṭhawng a ni ngei ang; chuvanga inring lo pawh a ni ngei ang a. Chutia Muanawma'n a han hnek ta nghek mai chu a sir lamah Ṭhuthleng tih tluk rawp pahin a let ta tual a, a che zi ṭhawlh ṭhawlh a, thawh mai pawh a tum lo nge, a tho thei lo zawk ni? Chhuatah chuan a let ta reng a.
Muanawma chuan Police dang ho chu a han en kual a, "Hepa hian a hnu chhui lai hi a ngaihna a hre hlawl lo, ka hnena thurawn lâk hi atân a finthlâk ang tih lo hrilh ang che u," a ti hmak a. Kei pawh min en chuang lo hian a kal ta daih a.
Muanawma chét dan teh thut chuan a barakhaih deuh hlawm pawh a ni maithei, Police dang ho chuan ṭhelh emaw, lo inrawlh ve emaw pawh an tum miah lo va. Kei pawh chuan ka ṭhianpa chu ka zui ve ta vat a, eng mah ka zawt lo. Chutiang thil a thlen hnu chuan Pu Rosiamngheta te khuaah kan kal leh a, chuta Pu Rosiamngheta hnena Muanawma thil sawi chu mak ka ti ta hle mai.
"Pa Ro, I fapa hi a la dam thu hrilh ta che ila, i awih ang em?" Muanawma chuan a han ti phawt a.
Pu Rosiamngheta chuan mak tih hmel deuh tak hian ka ṭhianpa chu a han en a, "Eng nge i sawi awmzia?"
"Ka sawi awmzia chu, Ramnunthara hi a la dam a ni."
"!!!!???"
"Muana, a thi tih hi pawm harsa ti viau mah ila, ka fapa ruang chu ka khawih a, kan phum ngei tawh bawk a ni."
"Ni e, a mak khawp mai," Muanawma chuan a han ti leh ang lawi a.
Pu Rosiamngheta chuan Muanawma chu a thlek vung vung a, "Vaṭhuampui-ah i kal a ni tiraw?" a han ti ta a.
A ngawih vang vang hnu-ah Muanawma chuan, "Pa Ro, chulam chu a pawimawh rih lo, i fapa ruang in hmuh dan tak kha min han hrilh leh teh," a lo ti ta daih a.
Pu Rosiamngheta'n Vaṭhuampuia Muanawma a kal leh kal loh a zawhna chhan àwm ang chu ka man thiam ve nghal mai a; chu thil zawh maina chang a hriat danah pa fing tak a ni tih a ti chiang leh zual hle hian ka hria. A aw a han thian te te a, Muanawma beisei angin a fapa ruang an hmuh dan chu a han sawi leh ta a.
"Ka sawi tawh ang khan zanah tui tak leh nghet taka ka muthilh avangin eng thawm mah ka hre lo va, mi dangho pawh an lo mu tui ve hlawm vek a ni ang, eng thawm mah hriat an nei bik lo. Dar 11:30pm velah kan vaiin kan mu vek tawh a, kan mu rual vek anga ka sawi theihna chhan chu keimah ngei hi mu hnuhnung ber ka nih bakah, current ti thimtu ka nih vang a ni.
"A tuk zinga Mama kai tho tura a pindan kan luhin a pindan chhuatah a lo tlu reng a, a boralna a rei hle tawh tih hriat takin a pang a dai diak tawh a ni. Kimi mutna leh Mama pindan hi a inhnaih hran lo va, in hmuh angin helai hi Mama pindan a ni a, he lam thlang lam ami hi Kimi mutna pindan a ni. Kimi hrilh tuma a mutna ka han lût chu ka hmu ta hlek lo mai a, ka hrilhhai hle nghe nghe a ni. Kimi chu ka au vak vak a, 'Khawiah nge Kimi a awm?' tiin mumallo zetin ka vei thuak thuak a, ka hmuh zawh chuan si loh avangin Mama pindan lamah ka kal leh ta a. A nute ṭap thawmah ṭhenawm khawveng an rawn pung khawm a, kan belebut zo a, Police emaw, FIR emaw, ruang en dik lam emaw pawh ngaihtuah chang lovin khami ni khan kan invui liam ta a ni.
"Thil thlengin min ṭhawn thut avangin ka rilru kha a fîm lovin ka mang vek a, ka inngaihtuah fîm hnu-ah ka ngaih ṭha lovin FIR ka thehlût leh hnuhnawh ta a nih hi; mahse, Police lam hian hma an sawn thei vak bik lo niin ka hria. Mama chungchang chhuitu Pu Remlalfaka hi a thu buai khawih tawhah a hming ṭha viau a, Mama chungchangah erawh ka beisei aiin a hna a chak lo a ni," tiin Pu Roa chuan a thu sawi a han tlip a.
"Ani chuan engmah a hre lo," tiin Muanaawma chu SI Remlalfaka chungchangah a lo ṭawng nghat a. "A nih leh Pa Ro, Ramnunthara ruang chu tu'n nge hmu hmasa ber?" A han ti leh a.
"Mami hian a va hmu hmasa ber a, a lo awm danah a ngaih a ṭhat loh avangin kei min rawn ko a, ka va lut ve nghal a ni."
"Zan lama a thawmhnaw hâk i la hre ngei ang a, zinga i va hmuh lai chuan zana a thawmhnaw hak chu em ni a la hâk?"
Pu Rova chu a han ngawi deuh a, a han maimi'chhing vang vang a, "Aw, ka han mitthla leh pawh hian zan mut dawna a thawmhnaw hâk chiah kha zinga kan va hmuh lai chuan a la ha a ni, ka hre sual lo vang," a han ti a.
"A nih tak chu. A nih leh, Ramnunthara khan zan mut dawna inthlâk a chìn leh chìn loh i sawi thei em?"
"A inthlâk ngai lo. An chet sual avanga kea a kal theih loh aṭang khan keini'n kan buaipui ta zel a, a inbual emaw, a inthlâk emaw, zunram a thiar emaw pawh ni se, amah maiin kan tihtir ngai lo, a kawr tak erawh chu amahin a ha ve mai thei a, hâk pawh a ha fo; mahse, mut dawna inthlâk erawh a chìn awm ka hre lo," Pu Rosiamngheta chuan a han ti leh a.
"Zinga in va hmuh laia a thawmhnaw hâk chungchangah emaw, zan mut dawna a inthlâk leh thlâk loh chungchang emaw chu i hre sual ve thei tho ang em?" Tiin Muanawma chuan dilchhût deuh hian a han zâwt leh a.
Pu Rosiamngheta chuan, "Thil awm thei chu a nia lawm," a lo ti ve mai a.
"A nih leh, Ramnunthara taksa khawi maw laiah a chhungten in chhinchhiah tlat theihna tur bik thil a awm em?" Muanawma chuan a han ti leh a.
"Awm lo, Mama khan chutiang thil, khuavang langsar emaw leh thil dang emaw, amah chhinchhiah a awl riauna tur thil a nei miah lo."
"Chutiang a nei lo chu a pawimawh hle zawk a nih chu. Ruang kha han hmuh ka ve ka duh hle mai; mahse, a ṭawih chhe vek tawh si ang," Muanawma chuan a han ti a, a ngawi ta vang vang a. Nakinah chuan ngaihtuah chhuah thar nei niàwm tak hian, "Pa Ro, zan 11:30pm velah in mut vek tawh thu i sawi a, mu hnuhnung ber niin i insawi bawk a; a nih leh, dar 11:30pm vela in mut hnu chuan khumah i muhil nghal deuh mai em ni?" a han ti leh hlut a.
Pu Rosiamngheta chuan, "Muhil mai bik lo ve, kan nu nen hian Mama leh Kimi chungchang sawiin kan titi leh a, zan dang ang lo taka ka mut a chhuah zui tâk em avangin ka muhil zui ta mai a ni ang, zingah chauh ka harh ta a ni; mahse ka muthilh kha dar 12:00 hnulam chu a ni reng reng ang," a han ti leh a.
"Zinga in thawhin dar eng zat nge i la hre thei em?"
"Ka tho hmasa ber a, ka thawh khan dar 6:00am a la ri lo deuh, tûk dang aiin ka tho tlai hle a ni."
Muanawma chuan, "Darkar ruk..." tih ringawt hi a han sawi ve a.
Pu Rosiamngheta chuan, "Muana, chu chu eng nge a pawimawhna?" a lo ti a.
Ni e, kei pawh hian a pawimawhna chu ka hre châk hle a ni; mahse, ka lo ngawi reng a.
"I mut hnu-ah dar 12:00 hnulam chauha muhil niin i insawi a, Ramnunthara hi mi kut tuara boral a nih ngat chuan, in muthilh kim hma chu mi sual hi a che miah lo vang. Pawi khawih turin a lo berah in muthilh kim hnu darkar khat tal chu a nghak ngei tur a ni. Chuti a nih chuan, dar 1:30am vela che ṭan turah lo ngai ta ila, i thawhin dar ruk a la ri lo deuh a, dar 5:30am velah lo ngai ta hram bawk ila, thil thleng chu 1:30am leh 5:30am inkar, eng hun emaw bera thleng a ni tihna a ni a, thil thlen hun chu a hmâ lam emaw, a tlai lam emaw pawh a ni thei; eng pawh chu ni se, a hun chhung chu darkar li ṭha lam chauh a ni ang," Muanawma chuan a han ti a. A ngawih vang vang hnu-ah, "Zinga Ramnunthara in va hmuh khan a pang a lo dai vek tawh tih kha i sawi a; chuti a nih chuan, mihring hi kan thih hnu darkar li vel a ralah eng ang chiaha vawt leh khawngin nge kan taksa a awm theih tih hriat chu a pawimawh viau ang. Forensic expert kan ni lo va, kan hre der lo leh nghal," a han ti leh a.
Pu Rosiamngheta nen chuan kan ngawi reng a. Muanawma thu sawi chu ngaihnawm kan ti nge mak kan ti tih pawh ka hre lo, amah chu kan en a, ngun takin a ni kan en ve ve. Muanawma chu a inngaihtuah nasat hmel hle mai a, a meng kar thung a, a melh ngai erawh a melh vang vang a.
"Hun rei zawng chuan eng nge pawimawhna a neih ang a?" Pu Rosiamngheta chuan a lo ti boh a.
Muanawma chuan a chhang lo, a ngawi reng a. Kei chuan ngawi rei ka ti tawh hle mai. Pu Rosiamngheta'n zawhna a zawh hnu fé chuan, "Muthilhna hlo pek in nih vek emaw..." a han ti a, a ngawih leh hle hnu-ah, "Mitthi sa dahin Ramnunthara nen an thlâkthleng a nih ngawt loh chuan..." a rawn ti leh ringawt a.
Ka ṭhianpa thu sawi hnuhnung ber chu mak ka va ti tak!
Chutiang a nih hnu-ah Pu Rosiamngheta te khua aṭangin Lunglei-ah kan lét leh a. Lunglei aṭangin Vaṭhuampui-ah kan kal a, zanhnih riakin Ramnunthara chungchang kaihhnawih thil kan chhui leh hnu-ah Devasora kan lut a, chuta ṭanga kal lehin ramri kan kan a, Ruma-ah zankhat riakin Barpara-ah kan lut a, chuta ṭangin Thanchi-ah. Tichuan, Sangu Wildlife Sanctuary hnaiha khaw pakhat Singpa-ah nithum kan hahchawl ta phawt a ni. Hahchawl ka han ti na a, Muanawma chu a chhuak reng a, min hrilh ngai miau loh avangin eng nge a tih ka hriatpui lo.
Nithum hnu-ah chuan miten an hlauh leh ṭih rawn Bipajjanaka hmun panin Sangu lui chu Lawngléngin kan zawh a, kawng min kawh hmuh turin a ram mi mipakhat kan hruai a; mahse, kan kal tumna hmun thleng min zui duh lovin min kirsan leh ta daih a. Muanawma nen chauh chuan Bipajjanaka hmun chu a awmna zawng chawpa tlawh kan tum ta a ni.
Kan mi hruaiin min kirsan hnu chuan ke-in Sangu luikamah kan kal zel a, a awmna lai ni àwma min kawh hmuh leh min hrilh bâk chu eng mah kan la hriat loh avangin a buaithlâk duh hle a. Eng mah ken kan nei lo va, Muanawma hian amah anga chhel leh pachang turah min ngai a ni maithei, buhfai takngial pawh kan ak lo va, bungbel ken phei chu hla tak a ni. Ka thlamuan vena awmchhun chu, kan haw har dawn lo tih thu a sawi chiah chu a ni mai a.
Sangu luikam rem lai deuhah chuan Muanawma chuan riahbuk phuahchawp deuh tak hi min sakpui a; hetah hian ka ṭhianpa chet awlsam thiamzia leh a tlachawpa khawsak a harsat lohzia pawh ka hmu thiam ve ta chauh a ni. Thim dawnah engmah pawh sawi lovin Sangu lui a pan a, a rawn lét leh chuan Sangha lian ṭha tak pathum hi a rawn hawn a, engtin nge a va man lam chu a sawi hran lo. A Sangha man chu zanriah atan kan hem hmin a, a ei theih viau mai; mahse kei chu ka chaw châk a na viau nghal thung a.
Zanah hma takah kan mu a, khua a vawh lem loh avangin pawnthuah lamah harsatna kan nei hran lo. Zinga ka han harh leh chuan Muanawma chu a lo awm tawh lo va, kan meichhemna thuk siamchawp bula lungphek kan dah chungah chuan Sangha hem hmin thar pahnih hi a lo indah diam a, Muanawma chu eng emaw ti turin a kal chhuak lawk a nih ka ring thiam nghal mai a. Bipajjanaka chu ka luh ve kher a duh loh thu kha a sawi zauh tawh a; chuvangin ka tel lova chu hmun chu zawn chhuaha luh chhuah a rilruk a ni tih pawh ka hre thiam ve mai a ni.
Kei chu ka tho tlai reng reng a, ka thawh chuan sana ka han en a, dar 9:00am lai a lo ri tawh nghe nghe. Sangha hem hmin chu tukṭhuan atan ka han ring leh ta poh a, ka chaw châk chuan namenloin min tur a, Sangha lian ve tak pahnih ngawt mai pawh nise, chaw atan meuha han rin chu ka duhkhawp lo hle a ni. Eng mah tih ve tur ka hriat miau loh avangin ka ṭhianpa nghak chuan ka ṭhu ta ngawt ngawt a, a châng chuan ka lo muthlu leh ṭhin. Muanawma chu a thangrei ka ti tawh hle a, dar 12:00 a rik tawh hnu pawh chuan a lo la let der mai si lo, ka chîn dan ṭhan, ṭo ngai hlei lo pangngaiin ka ngaih a ṭha lo ṭan leh hle tawh pek a.
Ni a inher hret hret a, dar 1:00pm a han rik dawn hnaih chuan, ka awmna aṭanga hla deuh hleka thawm awm chu ka han hria a, ka ṭhu-mu chu ka han inbengkang deuh a, thawm chu uluk lehzualin ka han ngaithla a; mahse, a reh leh daih a. Ka beng chhe ri mai a nih ka ring a, muthilh leh mai tumin ka han insiam rem a; chutah, thawm bawk chu ka hre leh ta a. Tunṭum chu a chiang ta hle mai; mihring na tuar ṭe thawm a ni chiang a ni. Ka tho hlawl a, Muanawma ka ngaihtuahna thinlung chu a harh nghal kawk a, rang deuh hian thawm awmna lam nia ka hriat chu ka pan ta a, a tlan hian ka tlan a, thawm pawh chu a hnai sawt hle bawk.
Hnim ti chhirchher karah chuan ka tlan zel a, a tawpah hmun fai lai deuh, hnim ṭo tlem deuhna laiah hian ka va chhuak ta hlawl a. Chulaiah chuan mi pahnih hian Muanawma chu an lo khawih rawn a, mi pakhat dang chu an inbengberek buaina hmun piah deuhah chuan che lo hian a thal reng bawk a.
Ka va pawh phei lai tak chuan, mi pahnih zinga pakhat chuan tiang hraw tak hian Muanawma lu-ah a lo vaw chiah hi a lo ni a. Muanawma chu a tlu zawi hnawk a, a che leh tawh lo reng reng! Ka thin chu a so sa bulh a, mumallo zetin ka rak vak vak a, chumite pahnih chu ka pan phei ve ta nghal a. Ka thawm an han hriat chuan ka lam an rawn hawi phei vat a, keiin tlanin ka pan ve bawm; mahse, an awmna ka thlen hma chuan chumite sir khawimaw lai aṭang chuan hmeichhe pakhat hi a rawn lang nawlh a, mi pahnihte chu a thil ken khîn nelh nawlh tak chuan awlsam zet hian a rawn kuk thlu ta mai a. Chu thil thleng ka hmuh chuan min ti hrilhhai letling hle a, chu hmeichhe chét dan avanga hrilhhai pawh ka ni chiah lo; hmeichhia zawk chu a ni. Ka en ta vung vung a.
Chu hmeichhia chuan kei min ngaihsak miah lo chuan Muanawma chu a pan thuai a, a va pawm kang a, a ṭap ta zawih zawih mai a. Kei chuan ngawi reng hian ka lo en a, eng mah tihna chang ka hre lo, ka hamhaih vek a, thil thlen dan leh ka mi hmuhte chuan a ngaihna hre lovin min awmtir a ni ber maiin ka hria.
Ka inngaihtuah harh hnu chuan Muanawma chu pan vena chang ka hre ta chauh a. Ka ṭhianpa chuan a lu-a an vuakna avangin eng mah a hre lo va, a lu chu a duk ruih bakah, a khem nin nian a, a malpuiah chemtea vihna hnuhma ni ngei tur hliam a tuar bawk a, a kekawr ding lam chu thisen hlirin a khat a. Ka va pan hnai a, hmeichhia chuan la insùt hraih hraih pah hian Muanawma mar leh lungphu te chu a lo en dik mek a, "U Chhante, a lu-a an vuakna hi chu a thawi deuh a nih dawn hi, nakinah chuan a rawn harh chhuak ang a, a malpui hi na a ti ber dawn a ni, thih hlauhthawnawm a nih loh hram ka beisei," a lo ti a.
Mak ti deuh takin chu hmeichhia chu ka lo en a, chhàn maina chang pawh ka hre lo, ka hminga min ko ngawt thei mai te chu mak ka ti hle mai a. Chutih lai chuan hmeichhia chuan Muanawma lu leh malpui chu a puan neih ang ang chuan a lo tuam mawlh mawlh a. "Luikam hmun pakhatah lawngleng kan thukru a, Singpa thleng kan thlah che u ang a, chuta ṭanga Mizoram lama in luh theihna turin mi dang, nangmahni puitu tur kan ngaihtuah sak dawn che u a nia. A rawn harh har kherin ka ring lo va, a rawn harh veleh ka zui thei rih lo hi pawi ka tihzia min lo hrilh sak hram dawn nia aw. He lehkha hi min pek sak la, a lawmawm ngawt ang, a chhiar hunah eng kim a hre thiam vek mai ang," a han ti leh zung zung a.
Kei chu ka la ngawi ta fo a.
Ka mak tihna ti zual turin kan piah deuh aṭang chuan mipakhat hi a rawn bai phei lauh lauh a, chupa ka han hmuh chuan mak ka ti lutuk chu ka phun chhuak ve ta a, "Ramnunthara..." ka han ti sup a.
Chupa chu a rawn thleng phei ve chawpchilh nghal a. Hmeichhia chuan, "Ni e, Ramnunthara a nih hi," a lo ti ve mai bawk a. An pahnih chuan Muanawma chu an buaipui dun a. Hmeichhiain a kuk thlûk tak mi pahnihte chu an phuar a, a hmaa lo tlu tawh sa pa pakhat pawh kha an phuar ve nghal bawk a.
"Engtin nge kan tih dawn?" Ramnunthara chuan a han ti a.
"An awm awmin an lo awm ang," hmeichhia chuan a lo ti hmak a.
Muanawma chu dimte hian kan zawn a, luikama an Lawngléng thuhruk lam panin kan kalpui ta nghal a. Singpa kan thlen hnu, min thlahtu hmeichhia leh Ramnunthara te an kir hnu deuhah Muanawma pawh chu a rawn harh a. Min hruaia min kalpui zeltu tur min ngaihtuahsakte nen chuan muangchang lovin kal lama kan kal dan ang deuh bawkin kan haw a, Lunglei lam kan pan zui nghal a ni.
Lunglei-ah hian zan khat bak kan riak lo; Aizawl lamah kan phei leh nghal a. Nazareth Hospital-ah Muanawma chu an lo admit ta a.
Eng a ti nge Bangladesh-ah khan emaw, Lunglei-ah khan emaw in inenkawl mai loh tih ngaih dan awm thei a ni a, hei hi ka duh dan leh ngaih dan chiah a ni bawk; mahse, kha nula khan Bangladesh lama awmpui a remti tlat lo va, Lunglei-ah ngei pawh a remti chuang lo. A chhan ka han zawt a, "Ka û tan hian a hlauhawm lutuk," tiin min chhang tawp mai a ni.
Chu nula chu ka han en ṭhin a, la naupang té anga lang; mahse, inrintawkna hlira khat ni hian a hriat a. Kimkimi kha a takah ka hmu ve lo va, a thlalâk chiah ka hmu a ni. He nula hi Kimkimi thlalak chu a nih chiah hi. Mahse Ramnunthara chuan ka ngaihtuahna a ti buai hle a.
Damdawi ina karkhat zet kan awm hnu-ah chauh nulain lehkha min pek kha Muanawma chu ka pe a, ka pek lai chuan a hmelah danglamna pakhatmah ka hmu lo, chhiar tuma a hawn nghal mai ka rin nen, chhiar ta mai lo chuan a dah ṭha ta nghal daih a. Mahse, chumi zan zanlaia ka han harh chuan ngunthluk em em hian lehkha chu a lo chhiar a.
Damdawi in kan awm chhung chuan eng mah ka zawt miah lo. Hre châk hle mah ila Muanawma dinhmun chuan a zir loh em avangin zawhna tam tak ka neih chu ka up ve hram hram a, amah hian a hun a tih hunah chuan eng kim...han ti ila, sawi chhuah tur chin nia a hriat chu min la hrilh leh ngei ang tih ka ring tlat a ni.
Ni sawm zet kan awm hnu-ah Muanawma chu Damdawiin aṭangin kan chhuahpui ve ta a. Kei pawhin kan in lam pan nghal mai bik lovin Muanawma chu ka zui ve zel a. Hei hi a chhan chu, Muanawma'n thil tam tak sawi tur a kawl tih ka hriat bakah, thil dang a la awm; Tete-i chu a ni.
Comments