SANGU LUI RUAMAH
(Detective Story)
©hhantea Pautu
Bung 7 Na
Muanawma a dam a, duh duha a kal ngam leh tawh hnu-ah nikhat chu titi theihna hun remchang kan nei ta nge nge a. He mi ṭum, Ramnunthara leh Muanawma farnu chungchang kan buaipuina vela ka thil hriat thiam loh ka hriat thiamna nî-a kan titi hi Muanawma bulṭan zawk a ni nghe nghe a ni. Hemi nî hian Thingpui sen hang ngei mai, facebook lama thu ziak ṭhinho avanga ka hmel hriat pakhat, Sen-mawng-khali in châk em em mai chu in chungin Muanawma chuan a thil sawi bul chu a han ṭan a; an ina ka la awm lai a ni a.
"Chhante, Duhawmi nena kan inngaizawng ta mai i lo thîk viau kha ka nuih a za ru khawp mai..." Muanawma chuan a han ti phawt a.
Kei chuan, "Ka thîk miah lo che," ka lo ti ve vat a.
Muanawma chu a nui hak hak a, "Tak takin, hriat duh tam tak i nei dawn tih ka hre reng a; mahse, ka hrilh lawk theih lohna chhan che a awm tih i hre thiam ve tho a, dawh thei taka min nghah ṭhin avangin ka ngainat phah telh telh che a. I zawhna leh dilchhutna kawng hi a àwm viau zel bawk a, chuti chunga ka sawi theih hun i nghak mai ṭhin hi ka tan chuan a thawventhlâk ṭhin khawp mai..." a han tih duah hnu-ah a sawi zawm leh a.
"Duhawmi kan hmuh hmasak ber nî kha i la hre rengin ka ring a, a Hotel enkawl laiah kan thleng a, amah hmu turin kan kal dun a nih kha. Ka han hmuh phat a, a hmel leh a mitmeng ka han en khan a mizia tur àwm ang rin dan tawk ka nei nghal mai a; ka sawi awmzia chu, kan thil hriat duh kha Police ho ang maiin chîk zetin han zawt nghal ngawt ta ila, Duhawmi khan min chhang ṭha duh miahin ka ring lo a ni. Amah kan hmuh ni la la khan a chungchangah leh amah ka dawr dan turah ka rilru ka siam fel nghal a, Ramnunthara ngaihzawng hlui a nih bâkah, Kimkimi nena eng emaw laia lo inhmu fuh vak lo tawh a nih avangin thil hriat a neih ka ring tlat bawk si a ni. Tichuan, kan pahniha kan va hmuh tirh phat aṭang khan ka bèm nghal ta mai a nih kha."
A ngawih deuh hlek hnu-ah, "Ka rin aiin min lo duh a," tih pahin Muanawma chu a nui sak a.
"Mahse, Chhante, nuam kha ka ti thei ta lo. Ka rilru lo puia mi dang han ngaihzawn hi ka la nei ngai lo va, a hnu-a ka thlauh thlâk leh mai tur han ngaihzawn der ngat mai chu a hautak ka ti ve viau a ni. Chuan, nang thlahthlam ṭhakin Duhawmi nen chuan kan han inkawp ta kha a ni a, i mi ngaih dan tur leh i rilru tur àwm ang pawh ka han suangtuah chhin vel a, ka nuih a zat rualin pawi pawh ka ti deuh a ni. Hotel-ah khan ka awm ve hman ta vak lo va, Duhawmi inah kan awm chawt a, ka rin leh beisei ang ngeiin in-léng a nei nak nak ta hle bawk.
"Duhawmi hian fa a lo la nei miah lo va, zalen takin kan inkâwm a; mak ve deuh chu maw, amah ena a mizia aṭanga tehin mipat-hmeichhiatna lama derdép tak a nih duh hmel tehlul nen, chuti lam zawngin min nawr lo, keiin ka nawr loh vang nge chu ka hre bik chuang lo va. Ka sawi tawh angin in-léng kha a nei neuh neuh reng a, chung zingah chuan vawi hnih khat chu pa upa lam lek lek tawh, inchei felfai thlarh mai leh, han en reng reng pawh a pa namailo tak a ni ang tih rin theih pa pakhat hi a rawn léng lut ve a, a tir chuan han umzui pawh ka tum lo, ka tum ber chu Duhawmi vehthlem a, a hnen aṭanga Ramnunthara chungchang emaw, Kimkimi chungchang emaw hriat kha a ni mai a.
"Mahse vawikhat chu ka inbual hlanin chupa chu Duhawmi inah chuan a lo léng leh reng hi a lo ni a, a awm tih pawh hre lovin bual pindan aṭang chuan ka chhuak a, ṭhutkhawmna pindan ka va lut phei a, chu pa leh Duhawmi chu thil eng emaw sawi hian an lo titi chu niin, ka va lan tâkah chuan an thusawi lai chu an tawp a, chupa chuan ka lam a rawn hawi a, ngun em em hian min han en a, a mi en dan chu keiin ka bitum te ka en dan ang chiah a ni tih ka hria; Chhante, kha pa khan min zir a ni, keiin midang te ka zir ṭhin ang bawk hian! Kei pawh chuan a mitah tak ka en let ve tho a; mahse chutih lai chuan Duhawmi chu rawn inrawlhin ka hming sawiin min han inhmel hriat tir ta a ni.
"Chupa hming a sawi lai chuan Duhawmi chu a ṭawng sual ta zauh mai a, chuvangin a ni thlalak chungchangah Pu Rosiamngheta hnena ka tirh leh tâk che. Bual pindan aṭanga ka chhuah a, ṭhutkhawmna pindan ka luh khan an titi tâwp lam kha ka va hre hman a, chu chu Duhawmi'n Ramnunthara hming a sawi rik zauh chu a ni..." Muanawma'n a tih lai chuan ka lo pawtchat a.
"Duhawmi a ṭawng sual tih thu i sawi a, chu chu Pu Rosiamngheta hnena ka kal leh kherna chhan kha niin i sawi bawk a; mahse, Duhawmi ṭawng sual chuan eng'e a sawi i la sawi miah lo a nia..."
Muanawma chu a nui sak a, "A in-léng pa nen min han inhmelhriat tir khan a hming a sawi sual ta zeuh a, 'Pa Hming...' tiin a han ko zet a, '...awh...Pa Sangluai...hei hi ka ṭhianpa Muanawma a nih hi,' a han tih hnu-ah, nui awr awr pah hian, 'Tunlai chu Pa Hminga nen ka hriatpawlh deuh reng mai che u...' a han ti zui zat a; chutih laia chu pa mitmeng danglam zawk chu ka lo hmu hman a, engmah phei chu a sawi lo," a han ti a.
Kei chuan, "Ka hre thiam chuang lo, chumi avanga thlalak chungchanga Pu Rosiamngheta hnena mi kal tirna chan chu..." ka han ti leh hrâm a.
Muanawma chuan, "A châng hi chuan i thluak leh i hriatrengna hi hmang ṭangkai ve ṭhin la ka ti a ni..." a han ti zet a. Kei chu ka lo kiai vei suk a. "Pu Rosiamngheta'n Kimkimi ni àwma a sawi rawn kalpuitu pa hming kha, 'Hmingthanga' a ti a nih kha; Duhawmi a ṭawng sual chuan ngaih dan min neih thar tir tak tlat avang leh, chu pa mizia leh hmel ka han hmuh khan pa namai a ni lo tih ka rin tlat avangin Pu Rosiamngheta'n, 'Hmingthanga' a tih leh chu pa chu mi thuhmun an nih leh nih loh hriat ka duh ta a, a thla ka lâk theih nan remchang ka dap ta char char a, a thla ka lak theih hnu-ah Pu Rosiamngheta hnenah ka kaltir ta che a ni; tichuan, mi thuhmun chu an lo ni ta ngei a nih kha. I chhiar atan Ramnunthara thuziak, Duhawmi'n a kawl pawh ka rawn ruk sak nghe nghe che a nih kha," a han tihzawm leh a.
Muanawma chuan a sawi zel a.
"Chu pa chu chhui zui ka duh avangin tirhbona che remchangah kha thlalak kha hman nghal mai a rem bawk a, nili hmaa lo kir lo turin ka tih nghe nghe che kha. Kal bo tura ka duhna chhan che chu, kha pa kha pa hlauhawm tak a nih ka rin vang a ni...Chhante, khatin lo ner suh, keimah avanga dinhmun hlauhawma i din hi ka duh em em hran lo..." a han ti a, ka lo ner vel chu a lo hmu a khanglang a.
"Chupa chu hlimthla ang maiin ka zui ru ta a, Pu Risiamngheta te khaw lama i phei zan khan zankhua deuh thawin a awmna chin ka chhuiin ka dap a, chumi zana a bula ka awm loh avangin Duhawmi pawh ka lakah a thinrim kher asin, kei lah chuan ka pawisa der mai si lo va, chumi ṭum chiah chuan Duhawmi chuan a mizia a chhuah tak tak ṭan niin ka hria, chu pa ka enthlâk zawh hnu-a a bula ka kir leh chu min lo ànkhum nasa mai a, ṭawngkam lamah chuan a ngaihtuahawm loh hle. Kei hi hmeichhe thlem hi ka thiam ve vak lo va, ngaihdam han dil theihna hun pawh min pe lo bawk. Ngawi rengin a âng chu ka ngaihthlâk sak a, a âng rei peih phian leh nghal a. A tâwpah chuan ka ning ta deuh a, a âng titau, pindana a han vei tawrh tawrh lai chu ka pawt ding lawp a, ka kuaiher sawk a, ka dîm peih vak bîk lo va; a inrin hman hmain ka han fawp ta thut mai a, a âng rei zui lo khawp a nia..."
Kei chu ka lo nui ta char char a, Muanawma lah chuan a thusawi lai chu a chhunzawm hmiah hmiah a.
"Tihlungawi duhna chhan kha ka nei tlat a, chumi chu duh ni lo ila khati khan ka ti lo vang, ka chhuahsan nal nal ang. Mahse, Ramnunthara nena an chungchang te, Kimkimi chungchang te leh Ramnunthara chungchang hrim hrim hriat tur a awm ka la ring tlat a ni. Chumi zan chuan album en ka dil a, a khum lianpuiah chuan kan pahnihin album chu kan han en dun a," tiin a han chawl det a. Mi rawn en a, "Khatin lo ngai pûk ruih kher suh...engmah kan ti lo, tih a hnekin ka tithinrim a, kan haw kawng thleng thlengin min lo chàntir a nih zawk kha," Muanawma chuan a lo ti leh a.
Ka lo nui leh ringawt a, a thusawi lai chu ngaihnawm ka ti a ni.
"Duhawmi ṭhat vena riau chu, a sawi tawh chu tihpuitlin ngei a tum tlat kha a ni. 'Ka ti ang,' a tih kha zuk ti tak tak zel a mawle! Thlalak kan endun lai pawh chuan ka han chhimbudawi ve ngial a, hmeichhe lèm kual vel hi ka thiam em em lo tih i hriat kha. Mahse, thlalâk chu kan en chho zel a, a kawla ka rin ang ngeiin Ramnunthara nena an thlalâk chu ka hmu ta a, tunge a nih ka han zawt a. A tir chuan a ṭhian a nih thu-in min chhang mai a; mahse ka awih lo lui tlat a, eng tin tin emaw ka han lungawi lo der ve vel a, a tâwpah chuan a bialpa hlui a nih thu chu a sawi ta nge nge a ni. Kei chuan Duhawmi ka han kuah ve hlu hlu a, chutih pah chuan Ramnunthara nena an chanchin chu ka zawt zel a, ka hriat duh aia tam min hrilh ta a nih kha. Kimkimi leh Ramnunthara chanchin ni àwm tak pawh a sawichhuak nghe nghe a ni.
"A sawi tui chho ta khawp mai a, Ramnunthara leh Kimkimi chungchang a sawi kài lai erawh chuan, sawi tlang vek loh a nei tih erawh ka hria a, a in-léng pa, ka enthlâk zui tak hrep, Pu Rosiamngheta'n 'Hmingthanga' a tih nena an chungchangte pawh a sawi kâi zeuh a; mahse chumi chungchang a sawi lai chuan a laklawhah a ngawi chat a, a sawi zawm thui ta lo a ni. Zâwta han nawr vak pawh ṭul ka ti ta bîk lo va. A in-léng pa chuan thâawkkhat laia pawisa hlawha thil eng emaw a tih tir thu a sawi kha erawh a sawi lo vang tih ka hlau hle a ni. Heta ṭanga ka hriat tak chu, Ramnunthara chungchangah hian ka rin ang em ema pawimawh leh thûkin Duhawmi hi a inrawlh lo tih hi a ni. Ani hi chu eng emaw chhung atan chauha hmanrua mai a lo ni zawk.
"Ṭhen ta che ila eng tin nge i awm ang?' tiin Duhawmi kha ka zawt a. Ani chuan, 'Ka thinrim khawp ang, chhan awm lo leh ho tak thila min thlahthlam vaih chuan ka naute ka sawisak tir hrep ang che, i châk lo khawp ang,' a ti mai a. Ka nuih a za deuh hlek a; mahse ka han ngaihtuah a, a ti duh tak tak ang tih pawh ka ring. Chuti chung chuan thlah loh chu ka tum der thung lo! Ka hmangaih a, ka duh pawh a ni mang si lo va, kei pawhin han kawp hlen tumna ka nei bik der si loh avangin thil eng emaw ka ruahman chu a ngai ngei dawn tih ka hria a. Mihring nunphung pangngai tur áwm ang ka han ngaihtuah chuan demawm deuh ni hian ka inhria a; mahse, ka hna leh thil hriat duh avanga intat lut mai ka ni si, amah hi ka duh pawh a ni lo va, hmangaihte phei chu a hla nasa mai si a, ka tan tih vak ngaihna a awm der lo. Ramnunthara chungchangah misual ni ngeia ka hriatte nen an inthuruala a lan miau avangin ka rilru ka tikhauh lui ve ta mai mai a ni. Ka en leh hmuh dan ang hi a lo ni lo a nih hlauh chuan Duhawmi hi hmeichhe hlauhawm leh bum thiam ber a ni thung ang.
"Chumi zan zankhua leh a tuk niléng chuan Duhawmi bulah ka awm ta a. A in-leng pa ka enthlâk khan hriat chhuah amual mual chu ka nei ve bawk a. Mahni pawha lirthei nei hmel a put tehlul nen, mak tak maiin Vaṭhuampui pan tur lirthei-ah a chuang teh tlat a, a kal liam ta kha ka hmu tlat a ni. Chhante, chumi ṭum chuan alawm, khapa khan ka enthlain ka zui ru tih a lo hre vek a ni tih ka hriat tâk! Vaṭhuampui pan tur lirtheia a lut lai chu hla deuh hlek aṭangin ka en reng a; chutah, lirtheia a lawn lut tur chiah chuan ka lam a rawn hawi thut a, chiang em em hian ka mitah tak a rawn en vang vang a, kei pawhin ka lo en ve reng bawk. Tumah mahin mit kan la sawn lo. A mitmeng awmzia kha ka sawi thiam lo va, mak ka ti! Ka sawi tawh ang khan ka zir ang bawkin ka mitmeng aṭangin min zir a, min hmutlang vek emaw tih mai tur a ni. Kha pa kha Vaṭhuampui lam pana a kal vang alawm Lunglei aṭanga kan zan haw hnu-a keimah chauha Vaṭhuampui ka va kal leh ngat. Ka sawm duh lohna chhan che chu, khati ang mi hlauhawm tak chhui zui tur chuan mahni chauha kal kha ka duh a ni. Chubakah, Pu Rosiamnheta'n a fapa Ramnunthara kha Vaṭhuampui-ah eng enaw chen a awm thu a sawi kha i la hre reng ang a; kha a thil sawi avang khan Vaṭhuampui-ah chuan chhui zui tlak eng thil emaw a awm ka ring reng reng a, ka pan ta vang vang a ni.
"Tichuan, Hotel i chhuahsan hnu nithumna niléngin Duhawmi bulah loh theih lohin ka awm leh ta a, ka ning ru tawh khawp mai a, nili pumhlum tal awm tura ka tih che avangin pawi te chu ka han tih leh deuh phah a; achhan chu, lo kir vat la, a rukin Duhawmi chu Aizawla hawsan vat ka duh tawh a ni ber. Ka sawi ang chuan nili li i va awm chu ka ring lo sa a, nili pumhlum i awm hmain rawn kir i tum ngei ka ring a, ka la ring sual lo zui," tiin Muanawma chu a nui suk a.
Kei chuan, "A nih leh, Duhawmi kha eng vangin nge i lakah a thinrim em em?" Ka han ti a.
Muanawma chu a han nui ruh ruh phawt a, "I rawn lét leh hma, tlai thim dawn khan a rukin ka chhuahsan a, lehkha ka ziak a, a hmuh ngei turin ka hnutchhiah a, chu chu a chhiar a ni ang chu..." a han ti a.
"Eng'e i ziah?"
"Ka sawi duh lo."
Ka run thei ṭhin asin. Muanawma chuan min en a, a nui var var mai a, zawt zawt mah ila a sawi duh dawn chuang lo tih ka hre bawk si.
"Ka chhuahsan hnu chuan Hotel hnaihah ka awm ta reng a, i lo lét hun nghakin ka lo chang ta ngar ngar che a ni. I lo thleng ta ngei a, Motor i chhuahsan hma leh Hotel i luh hmain ka be thei ta hlauh che a, kan tan thil a kaltluang ta a nih chauh kha. Chhuk hmanin Hotel lut hman ta la, Duhawmi khan hmu vaih che sela chu thil a buaithlak vek ang, ka ning phéng khan ka lo chhaihkawlh hman khanglang bawk si a. Chutah, i rawn thleng a, ka rawn biak hnu che khan i inher muang ṭehṭuah lutuk a, ka Motor kha Duhawmi'n a hmu hman a, a lo chhinchhiah chiang nasa mai si a; tikhan, ka lehkhaah kan zan haw tur thu a mizia fiah nana ka sawi tel luih zeuh avangin kawngah a naute min lo chantir ta a nih kha. Hotel kawta i inher a, i liam hnu-a Duhawmi chezia leh ṭawngkam ka hriat hnu-ah, kawngsir thim laia i dinna hmunah khan ka rawn pawh ta chauh che a ni; i inher hnu-a Duhawmi thinrim che vel chu a hmuhnawm letling asin aww...a thinrim hmel te hlei hlei saw a nia duhawm...Dinna hmun i thlang thiam khawp mai," tiin Muanawma chuan min han fak pah zeuh a.
Kei chu ka lo nui suk suk a, "A nih, Vaṭhuampui-ah chuan eng thil nge i va chhui ber?" Ka han ti a.
"Eng thil tehchiam mah chhui tur a awm lo; mahse..." tiin Muanawma chuan thingpui sen hang, Sen-mawng-khali in châk ve em em chu a han dût ri khalh a...
Nghakhlel deuh hian a thingpui in lai chu ka lo en a. Ani lah chu a hmanhmawh lo khawp mai leh nghal a, muangchang hian min rawn en a.
"...SI Zodinsanga'n thlalak min peka lang mipa kha Ramnunthara a ni lo tih ka hria," a han ti ngawt a.
Kei chu a sawi belh tur hre châkin ka ngawi reng a.
"Chu ngaih dan chu Vaṭhuampui ka kal hnu-ah chauh neihna chang ka hria a ni, ka ngaih dan chu Pu Rosiamngheta kan hmuh nawn leha Ramnunthara'n a taksaah amah chhinchhiah awl riauna tur thil a neih leh neih loh ka zawh khan a dik tih ka hre ta chauh nghe nghe a. Pu Rosiamngheta khan, a fapain chuti ang chhinchhiahna a neih loh thu a sawi a nih kha.
"Vaṭhuampuia ka va kal chhan kha chu, a hmaa Ramnunthara a awm bo lai khan eng'e a tih ṭhin a, engtin nge a khawsak tih hriat ka duh bakah, Duhawmi in-léng pa hnu chhui zui theihna tur thil a awm ka rin deuh vang a ni. Chanchin ka han ngaihven a, a rukin Vaṭhuampuia Ramnunthara a awm laia a va belh, a Patea te chhungkaw member zinga pakhat chu ka kawmngeih thuai a, Ramnunthara nena kan inhriat thu chu sawi satliah mai mai anga lang thei turin ka sawi chhuak a; chutah, ani chuan amah chu a hriat thu leh a pa û fapa a nih thu a sawi ta mai reng a. Chumi hnu-ah kan inzawt chho zel a, Ramnunthara chuan Vaṭhuampui a thlen hnu rei vak lo-ah inhlawh tur insawiin Bangladesh lam a pan thu a sawi ta a ni. Vaṭhuampui-ah a awm rei lo tihna a nih chu. Chumi nena kan inkawm hma chuan, thlalâka mipa kha Vaṭhuampuia an hmuh ngai leh ngai loh ka han zawt kual a, an lo hmu ngai ngang mai a; mahse, chin hriat lohin a bo tawh tih thu an sawi zel thung, khawtlangin ni sarih an zawn hnu pawhin an hmu zo lo a ni awm e. Amah kha chhung bul nei vak lo, mahni tal tala tal ṭhin a nih thu ka va hre bawk. Chuti chu a nih avangin Ramnunthara khawsak dan leh nih dan nen chuan a inhmu rem thei ta lo a ni. Thlalak hi han ennawn leh la, kha thlalaka mipa ban reka kutchuk lian vak lo kha i hmu thei mai ang; khati kha ni mah se Ramnunthara chuan a taksaah chhinchhiahna a nei lo tih a pain a sawi ta tlat si a ni," tiin Muanawma chuan thlalak chu min han pe a.
Kei chuan thlalak chu ka han en a, Muanawma sawi ang ngeiin mipa banrekah chuan kutchuk lian vak lo hi a lo awm a, thlalak chu han en thuak chuan chu a kutchuk chu hmuh loh palh pawh awl tak tur a ni bawk. "Eng'e a awmzia?" ka han ti ta a.
"Ramnunthar ang tak, 'ang tak' pawh ni satliah lo, a hmel leh pianze anpui ang deuh chiah chiah midang an awm tihna a ni mai; mak tak a ni, heti ang hi mihringah hian a awm zen zen lo, phir an nih ngawt loh chuan! Chu pa Ramnunthara anpui chu chin hriat lohin a bo a, an hmu zo ta lo va; thih tawh tluk tihna a nih chu," Muanawma chuan a lo ti a. "Ruang kha hmu ta ila he thil hi kan tan a awlsam zawk ngei ang; mahse, Kimkimi avangin engkim kha a fel ta tho a ni," a han ti leh a.
"A nih leh, Duhawmi in-léng pa i tih chu i va chhui zui thei ta em?" Ka lo ti a.
"A hniak vei lam pawh ka va hmu lo!"
Muanawma min chhàn dan avang chuan ka nui kur kur a. Mahse Muanawma chu a nui lo va, inngaihtuah mùk hmel tak hian a en ngai chu a en reng a.
"Chhante, thil hriatthiam loh tak ka la nei a ni. Kimkimi'n a lehkhaah thil nihna rawn sawi kim viau mah se, a phèna THE JUDGE te nena an inlaichin dan tak hi ngaihruat dan pawh ka thiam mai rih lo. Ka ngaihtuahna tibuaitu chu Kimkimi'n Pu Rosiamngheta te ina a kalpui, Duhawmi in-leng ka tih pa kha a ni; pa namai a ni lo tawp ang," a han ti a.
"Kikimi'n lehkhaah khan eng'e a sawi min hrilh ve thei em? Ka hriat ve chi te a nih chuan..." tiin inthlahrung deuh tak hian ka han zawt a.
"Engkim kha ruahman lawk a ni, chu aia mak ka tih zawk chu a ruahmantu Kimkimi a nih thu hi...he thil ka buaipui theih nan thlalak ka kutah a rawn thleng phawt a; hei hi SI Zodinsanga ka zawt chiang tawh a, kha thlalak kha SI Remlalfaka hnenah Duhawmi'n a pe a ni awm e. SI Remlalfaka a nupui nen an inṭhen zawk laiin Duhawmi nen hian an lo inchukha ve tawh nghe nghe a, khatia SI Remlalfaka'n Ramnunthara thubuai a khawih tâkah khan khawi aṭanga a neih nge tih pawh hriat lohin Duhawmi chuan a pe ta mai ni àwm tak a ni. Tu pek tir mah a ni lo vang, amah ka hnaih theihna tura Kimkimi ruahhmanna a ni ngei tih pawh ka ring; SI Zodinsanga leh SI Remlalfaka inlaichin dan, Kei leh SI Zodinsanga kan inzawm dan hrechiang taktu thil ruahman a ni.
"Lehkhaah khan a sawi chiang vek lo na a, kha thlalak hmanga hnu ka chhui dik zel kha a lawm hle a ni tih Kimkimi'n a rawn sawi tlat a; chuta mak ka la tih leh fo chu, kha pain Kimkimi thiltih leh ruahmanna a thlawp zel anga lang ta kha a ni; hepa hi tunge a nih ka hre duh?" Muanawma chuan a han ti nghat a.
"A nih leh, Ramnunthara kha a la dam si a, Pu Rosiamngheta ten an fapa emaw an tiha an phum tak ruang kha tu ruang nge? engtin nge a nih theih?" ka lo ti ve leh a.
"Kha thil a thlen zan khan Kimkimi'n thingpuiah muthilhna hlo a phul vek a ni. Tichuan, mitthi sa ruang kha an dah ta a, Ramnunthara leh Kimkimi chu an kalbo ta a ni. Kha ruang kha tu ruang nge tih chu ka thusawi hmasak lam kha han ngaihtuah let la, i hrethiam maiin ka ring," tiin Muanawma chuan min chhang a.
"Thil awmzia dik tak hi Pu Rosiamngheta te i hrilh dawn em?" ka han ti leh a.
"Ka hrilh tawh. Engmah sawi zui lovin Vaṭhuampuia pem an tum thu an sawi kha; FIR pawh an hnuk kir tawh a ni."
Kan han ngawi dun ta vang vang a. Muanawma'n a farnu a hmu ve ta lo chu ka khawngaih hle a, chu thil chu ka ngaihtuahnaah a rawn lut veng veng a.
"Ka hmu alawm," Muanawma chuan a rawn ti thut a.
"Tu maw i hmuh?" Ka lo ti hû a.
"Kimkimi kha mawle. Khami nî khan i la muthilh lai, zingkar Ni chhuah hmain ka chhuak ta daih a, Bipajjanaka awmna hmun ka zawng a ni. Chutia ka vah velna lamah chaun luiruam pakhat ka pawh a, chumi hmuna ṭawng ṭhawm lo chhuak ka hriatna lam chu ka pan a, anmahni ka hmuh theih hnu chuan luiruam aṭanga mi pathum kal liam chiah hi ka hmu hman a, anni baka chu luiruama la awm nula pakhat leh mipa pakhat ka hmuh chuan min ṭhawng ve khawp a sin; mahse va pawh mai lovin mi pathum te kha ka zui ta zawk a ni. Achhan pawh, Bipajjanaka hmun min hrilh theih ka beisei vang a ni. Anmahni ka zuina lamah ka fimkhur tawk loh avangin hrui ka pal a, ka tlu thawmah kan innangching ta a nih kha," Muanawma chuan a han ti a.
Muanawma'n a sawi lai mek thil thlen dan chu ka la hrechiang hle a, ka la mitthla thei vek nghe nghe. "A nih leh, Duhawmi khan Bangladesh-ah eng'e a rawn tih ve ang le?" Ka lo ti leh a.
"Ka hre bik lo, a sumdawng a ni thei a, thil dang deuh a ti pawh a ni mahna; khatia kan han inhmu thut kha chu ka beisei loh lam thil a ni..." Muanawma chuan a ti a. "Chuan, i mumang min hrilh tâk chungchang kha ka ngai thutak ve deuh a, ka fimkhur phah ta reng a ni. Hotel-ah khan ka chungah thil ṭha lo a thlen loh phah a ni ber mai," tiin a nui sak a.
Kei chuan, "Mahse, Bangladesh lam lamah i thih ṭép tho kha!" Ka lo ti ve hmak a.
Muanawma chuan, "Ni e...hei hi ka han dah ṭha lawk ang'e?" tih paha lehkhathawn lek zeuh pahin a pindan lamah a chho ta a. Dawhkana a Phone dah chu a kalsan a.
Kei chu Ṭhuthlengah muthilh tumin ka han maimi'chhing a; mahse thil thleng te khan ka ngaihtuahna a luah hneh em avangin ka muhil thei lo. Chutih lai chuan Phone a rawn ri a, ka ṭhu chhuak thuai a, dawhkana Muanawma Phone ri chu a lo ni a. Amah chu ka han au a, min chhàn mai si loh avangin Phone chu ka han la ta a. Duhawmi a lo ni.
"Hello...?"
"Muanawm...?"
"A awm lo va..."
"Chhante khaw'nge a awm?"
"A pindanah thil a khawih lawk a niang..."
"A nih chu, nakinah ka rawn call leh mai ang...e chuan, ka ngai lutuk tih lo hrilh rawh aw..."
A TAWP TA.
Comments