R E B E C C A
©Chhantea Pautu
Bung 4 Na
Thliahhnu Thinlung
Kawlkila Nî a liam ruala lungngaihna leh ipikna te, manganna lo thleng leh thinlung natna zual ṭhin hi ka nunah a mikhual lo khawp mai.
Kum 2018, Khuangchawi thla chawhnu lam a ni a. Kum kalta kumhnih chhunga ka nuna ka thil tawnte ngaihtuahin keimah chauh hian ka ṭhu ngawi reng a, "Hmangaihna..." tia phun sap pahin beidawng tak hian ka ṭhen sak a.
Ka tan hi chuan tih deuh rap rap te, khawi maw lai ram ril leh hmun fianriala inhliam deuh rap rap te, thil harsa leh khirhkhán hmachhawna mî hniak zuia chhui te hi hmangaihna buaipui leh ṭhin ai chuan ka tih chi a ni fo; mahse, ka thinlung hi hmeichhe mawina leh an zûn hian a kal kân thei bik lo va, ka hmang hmeichhiain min hnawl hnu-ah hmeichhia bawk hian ka lung an ti nâin ka nun an ti nguai ta ziah mai.
Bathlara ka ṭhutna lam pan chuan hmeichhe lian vak lo, hmaifang fel zet, ngo lutuk lo, hang pawh ni chuang si lo hi a rawn chhuak ve a, "Chhante, ti nge hetah i awm reng a? Ngawi rengin i chhuak daih a, thinrimna i nei ami?" a han ti sep a.
Kei chu ka ngawi reng a, ka nui lo va, thinur hmel pawh ka pu chuang lo. Ruah a sur cherh cherh a, khua chu a vawt viau mai bawk; hmeichhe lo chhuak chu a kawr lum chuan a intuam ṭha set set a. Ka bula ṭhutna awlah chuan ṭhuin, ka dar veilamah a lu nghatin ngainatawm deuh hian ka lamah chuan a rawn thle phei deuh a.
Kan pahnih inkar chu hetih lai dinhmunah chuan hriat thiam a har deuh a ni. Min ngainat hmel zeta min ngheng chil chial te, ka taksa khana a mu zawi hniang ṭhin te, min melh leh ralh ralh ṭhin te chu duhawm ka ti thei hle a.
"Maw, Chhante, i thinrim ami?"
Kei chu ka la ngawi reng a, a nuih erawh ka nui sak a. Ka chhan loh avang chuan a thinin a tuar ta lo a ni ang, "Lalchhanhim, min chhang rawh, i awm dan hi ka ngaih dan a ni miah lo a nia aw," a han ti ta ṭhat a. A awm dan thlâkin min han thlék hé hâw a.
Kei chu ka nui leh sak duh chauh a. K ngawih leh tlat hnu-ah, "I chunga a rilru put dan ang chiah hi kei pawhin i chungah ka put ve dan a ni; mahse, ani aiin ka inthup thei a ni mai," ka ti ve ta a.
Min chhang lawk lo. Ka malchunga ka kut chu a dah sawn a, chutah chuan a lu chu nghatin a mu zawi nen nen a, a mitah tak enin ka khabe hmul chu a khal nep nep a. "I hmanhmawh a nih kha. Hmanhmawh lo vang aw, tun dinhmunah chuan ka peih rih lo a ni, insiamrem ka ngai alawm," a ti a.
"Hlauhthawn ka la nei a ni..."
"Eng nge?"
"I chunga ka rilru put dan chu theihnghilh rawh...a hnenah i kir leh duh ang em?"
"I mawl ami? A hun an inneih hun a thlen ṭep tawh hi..."
"Ṭhulh ta se..."
"A ṭhulh ngam awm lo e mai a..."
Ruah sur cherh cherh bak chu thawm dang a awm lo va, kan chuan ruahsur chu kan thlir dun a, ngawi renga kut invuanin khaw vawh avangin kan inkhawr ṭha ṭat ṭat a, inchhunga luh erawh kan tum mai lo. Ka ngaihtuahna chu a kal thui hle a, a hun chu a thleng ṭep tawh tak tak a, chumi hunah chuan ka chan atan eng nge dah a nih leh ang ka hre lawk bawk si lo. Ka hmeichhe duh apiang hi ka chân deuh ziah mai.
Ka malchung khama mu hmeichhia chu ka han en a, ani chu a lo maimi'chhing siai tawh a. He nu hi ka duh a ni. Ka hmuh loh chhungin a lo la danglam tam lo hle a, ka tan chuan ngainatawm, duhawm leh lawmawm tak hmeichhia kha a la ni reng a, a duhawmna leh ngainatawmna hian a hmel ṭhatna a hliah zawk ni hial hian ka hre ṭhin; mahse, a hmel ṭha lo chu a ni der si lo. Ka ngaihtuahna avang chuan ka nui sak a, ka kun hniam a, a hmuiah dimte hian ka zuk fawp a.
Ani chu a rawn meng a, mi rawn ner khum nâng nâng a, "Ngawt a che aw..." a rawn ti hâ a.
Ka lo nui mai a, a mitah tak hian ka en reng a, "Nun hi a awlsam ngai lo, thil nihphung a ni tlat lo; hlim la, hlim fo ang che aw."
Ani chu a meng hnuai deuh raih hian a lang a. "Ka hlim alawm. Chhante, lut tawh ila."
"A vawt i ti deuh elo?"
"Imm..."
"Mu lo khan lo ṭhu teh..."
A tho a, keimah si chèt hian a han ṭhu a. Kei chu ka inher rem hret a, a bianga ka kut pahniha dawmin a mitah awmze nei zet hian ka han melh a, a mitmeng aṭanga a remti tih ka hriat hnu chuan muangchang hian khaw vawh avanga a hmui duk lek lek lum hiam mai si chu ka fawp leh ta a. Ani pawh chuan min lo chhang let mial mial a; kan rilru an lantir a ni.
"A tawk e," tih sap pahin ka hawi sawn a, "Tikhan a lum deuh tawh em?" ka ti a, ka nui zui sak a.
Lai deuh tak hian a nui seih a, ka âwmah na lo tè hian a han chum taih a.
Kei bawk chuan, "Mi thiamte chuan infawh hian kan taksa mamawh hormones a chhuak hnem a, a hrisel an tia sin; min ti hlim a, nun nguai a ti reh thei an tia lawm, khaw vawt pawh," ka han ti leh a.
A la nui san san reng a. "Ka awih kher lo ve a..."
"A nia lawm, dawt ka sawi miah lo; chuvangin ti ṭha leh ila..."
"I thaw ve nih chu..."
Ani chu a nui chen chen a, min pawm hle hle a. Ruah sur pawh a hàn ta; ka ngaihtuahna erawh a chawl thei lo, ka chân leh mai ang em tih ngawt chu ka ngaihtuah a, thil lo thleng mai tur chuan ka rilru a kap tlat a, engmah hi a la chiang thei tak tak lo niin ka hria. Hlim se, lawm se, nui se la, a hmangaih ber nei se ka duh a; mahse, chu chu ka duh thlan tur ni lovin, ka thinlunga cheng reng, ka hmangaih hmeichhe duh thlan tur a ni si.
"Lut tawh ila...kei pawh naktukah ka haw ang."
"Ngati maw?" a lo ti deuh há a.
"Tih tur ka nei alawm; bakah, a chang chuan i bula awm hi kan inthlahrung ṭhin."
"Engvang ngawtin maw?"
"Ka hre lo; ka tel lo pawh hian i hlim thei tih ka hria asin," ka aw chu a pangchang ve lek lek a.
"I tel lo chuan a kim lo, a nuam chuang lo; chuvangin..." a ngawi leh daih a.
"Sawi zawm rawh."
"Ka duh lo."
"Tunah sawi zawm vat teh." Ka dawh thei lo ṭhin hle a.
"Ka duh lo," tih pahin a nui har har a, inchhungah kan inum lut a.
Khua chu a vawt a, a hnim reih a, chhum a zing chiai chiai a. Hun hian ka hmangaihna thawnthu kal dan tur chu a hril dawn a ni; ka hawi let a, Bathlar ṭhuthlenga Phone chu la hmu a, ka let leh a, ka va la a, ka han bih a; chutah, ka tih lan ngai mang loh thîkna chu a rawn chhuak leh ta, thinrim hmel erawh ka pu lo. A luhna inchhung lam chu hawiin ka ding vang vang a.
Hei hi a ni, ka hun kal ta kha; Rebecca-i nena kan inngaihzawn hma lawka ka thinlung ti natu kha. A hmangaih ṭhentu hmeichhe rilru na chu ka thinlungah ka lo la lut a, ka thinlung a chang miah lo tih hre chungin khawngaihna leh lainatna rilru nen a tan ka ding tlat ṭhin a nih kha; mahse, a khawhar hnemah, a rilru nâ hnemtu-ah chiah ka ṭang a, ka fawh tura a hmui dawhtu leh ka kuah tura a taksa nghengtu chuan ka beisei, hmangaihnain a beisei thil chu min pe let ve thei lo.
Rindingi khan a ṭhen tak mipain nupui a neih san tur kha a tuar hle a, a tana ṭha tur ka hrilh chungin a nunphung a pangngai thei lo. A tawpah chuan ka dawh theihnain a tlin ta bik lo va, kiang zawk ila awmzia a awm zawk ringin khaw dang ka hawi san ve ta a; ka hném a, a tan ka awm a, kka veng a, a kiangah ka ding a, chin tawk awm lovin a tan ka inpe zo a. Khang ka hun leh ka tha sen zawng zawng kha rulh let a ni lo; pasal nei mai tur a bialpa hlui nen khan an inbe reng tho si kha min ti natu a ni a.
Rindingi'n, "Nang hlat che hi ka tan a ṭha zawk a ni," a tih ṭum kha ka hre reng a. "Chuti na na chu...tumah ka rawn be pawp tawh lo vang che u," tiin ka chhang ta a nih kha. Ka be pawp tawh lo.
Mi dangin an thliah hnu thinlung, awmze nei lo va sala inti tâng lui tlat, nun hluiin a phuar beh, hnung lam thlah thei lova hawi let fo, hma lam pan tum si lo. Mahnia natna insiam chawp reng mai hmeichhe hmangaihna beisei hahdam loh zia hi ka hre chiang khawp mai. Ka thinlung chu, nun thawnthu ka ziahpui theih loh, ka sawm ka sawm a, keima'n ka hnaih pawha kal hla zel mai, induhna nena khawhar hnemtu atan ngawta min hmangtu zui reng ai chuan, nun thawnthu ka ziahpui theih nena bul ṭan hi ka duh zawk a ni.
Ka hun kal ta chu a liam tawh a, Rebecca-i hian hlimna min pe a, amah avang hian ka dam a ni. Rebecca-i nen kan inbiak tlem chang chuan ka khua a har ru thei hle a; mahse, ka inthup fo. Ka hun kal ta ka ngaihtuahna chuan ka hmabakah chona tam tak min pe a. Mi thliah hnu pangpar ni lo khâwi tur chu an vang viau mai thei; mahse, hmana khâwi ngam ka tum hmeichhia kha chuan a nun hlui kha a dah bo phal tlat lo va, khawi ngam theih a ni lo. Rindingi kha dem erawh ka dem lo.
Rebecca-i chu ka han ngaihtuah a; a dik taka sawi chuan kan inbiak hnu rei lotea hlimna min pek ang zat hi tu hmeichhia mah khan min la pe bik lo. A danglam a, ka hlauhthawn laiin ka lakah a induh ngai lo va, hei hi ka duh zualna a ni fo a. A tana eng tiklai pawhin ka inhawng ṭhin. Nakinah chuan nupui neiin chhungkua ka din ve a la ngai dawn tih hriain ka rilru-ah chutiang hun atan chuan ruahmanna pawh ka nei ve a ni; hma hun atana ruahmanna neih hi a pawimawh tih ka hre si a. Mak tak maiin ka ruahmannaah chuan Rebecca-i hi ka hriat loh karin la lo telh leh reng mai ṭhin.
Comments