SANGU LUI RUAMAH
(Detective Story)
©hhantea Pautu
Bung 5 Na
"Kan In lamah rawn kal la, rei deuh hlek thang tura i zin theih i inring em?" Muanawma chuan min rawn ti a.
Lunglei aṭanga kan haw hnu karkhat a ralah zin turin min rawn sawm leh chiah a ni. Khatia hmanhmawh deuh taka kan haw khan an khaw lama kal lovin Aizawlah kan tlang a, a tukah SI Zodinsanga kan hmu nghal a, chumi zawhah kei chu kan In thleng min thlah a, ani chu a haw leh ta a ni. Chumi karkhat chhung chuan amahin Vaṭhuampui lamah a lo va kal tih pawh min hrilh a, tun ṭumah erawh Bangladesh kal a sawi ri vuai a, min rawn fiam pah nghe nghe bawk.
"Chhante, Bangladesh hmun ṭhenkhatah chuan nuthlawi man a hautak vak lo an ti a nia," a han ti ṭan phawt a. Phone chuan rei iak kan inbia a, thil min sawipui dan leh tih phur dan a thiam thei hle bawk.
Muanawma chuan, "Hnahthial hi engtiang chiahin nge a hlut tih leh, chawfun nana hman a nawm zia i hriat loh chuan ka thil sawi tur hi, 'A va tlâwm em,' i lo ti hmanhmawh ang chu, ngawt a. Mahse a tlawm lo. Bangladesh(foreign ngat), tun hmaa 'East Pakistan' an tih ṭhin, Mizoram zalenna tura kan 'Hnam Sipaite' an chêttlat tawh ṭhinna lama 'Nuthlawi' man khu i lo hre ve tawh em!?" a han ti a.
"Hre lo," ka lo ti nghut a.
"Nuthlawi hlutna hmu pha khawpa mitmeng chin tân chuan ngaihven a va ṭha ve," Muanawma chuan a han ti phawt a, "Hman deuh, Aizawla ka Labour ve ṭhin lai khan, mipakhatin a sawi a- Mahmuam leh a chhehvelah khuan Nuthlawi man chu Hnahthial tel 1 leh cheng 25 a ni; Hnahthial tel 1 hian hnah 50 zel a keng tur a ni bawk. Hei hi a tlâwm i ti mai thei; nuthlawi hlutna a ti nêp pawh i ti mai thei bawk. Mahse Hnahthial tel 1 leh cheng 25 lek anga lang hi Nuthlawi hlut zia puangtu a ni daih zawk a nia aw. Hnahthial hi a vâng a, a ro khawr tawm vek tawh pawh an chiah huh mar leh thlap zel. Chuti khawpa an tâna thil hlu leh ṭangkaiin a lei phâk thil chu an tân thil hlu lo leh hmuhsitawm a ni thei thlâwt lo. Chhante, Mahmuam leh a chhehvela chengte khuan Nuthlawi hlutna an lo hmu fiah ber a nih hmel tlat," a han ti a.
Kei chu a rukin ka lo nui pùt pùt tawh a.
Muanawma bawk chuan, "I peih bawk a, Fb lamah, 'Remchâng hmasa berah Hnahthial tel eng emaw zat(a tlem berah Pick-up trip 1 tal) kenga Bangladesh kal tum a ni a; Nuthlawi hlutna varpawh khawpa thinlung tih varsaka awm tawhte in awm chuan rawn in-report teh u. A in-report hmasa apiang duhsak an ni ang. Cheng 25 erawh mahni intum tur a ni,' tiin status update la a ṭha ang ang," a han ti vei luam a.
Kei chu ka nui ri ta kur kur a. Mahse, "Engtik nge kan kal ang?" Tiin ka han zawt daih a.
"I hman dawn chuan naktukah kan In lamah rawn kal nghal mai rawh, thil hi ka rin aia thuk a nih duh hmel," Muanawma chuan a ti ta a.
He pain ti tura min ngen anga ka ti nghal mai zel leh awm tura min ngen anga ka awm nghal mai zelna chhan hi ka hre thiam bik lo. Hemi ṭum pawh hian a tukah chuan ka kal nghal ruak ruak a, ka thlen a, ka han insil fai hnu chuan kan ti ti ta a.
"Nuthlawi lam sawi chuan i rawn dawk chhuak rang hle mai," Muanawma chuan a han ti nghal ngawt a. Eng vang teh lek emaw ni, mi fiam phet chu a tum chu ni?
Kei chu ka lo nui ṭha duh lo der ta tlat a, "Eng nge kan kalna chhan tur ber hi?" tiin ka han zawt daih a.
Muanawma chuan, "Sawi vak pawh a la hun lo. Bangladesh hmun ṭhenkhata an khawsak dan te pawh hre ve la a ṭha ang," a lo ti mai a.
"Min han hrilh la," ka han ti hmuk a.
"Bangladesh, Mahmuam leh Thangnang khuaah te leh hmun ṭhenkhatah khuan Pâng Hnam an tam khawp mai, Chakma leh Tuikuk pawh tam tak an ni. Mizorama V.C., 'Khawtlâng Hruaitu' tia kan sawi ṭhin hi khu lamah chuan 'Hadman' an ti a. Dangpuithu, Kaikuang, Anṭam, Chengkawl te hi an nitin chawhmeh a ni ṭhin," Muanawma chuan a han ti leh a.
Kei chuan, "A nawm phian dawn chu le," ka lo ti ve mai a.
Muanawma chuan, "Hnahthial tel 2 tal chu kan keng dawn lo'm ni?" a han ti leh hram a, a nui kak kak a, "Nuthlawi zûna i uai nat zia kha ka la hria asin," a han ti zui a.
Nia hmanah chuan Muanawma sawi ang hian ka awm tawh, ka la na hle bawk; chutia ka inngaihtuah zui lai chu mi han en vang vang a, "Nang chauh i ni lo a nia, nuthlawi zûn chungchang hi kei pawhin sawi tur ka nei ve tho alawm," tih pahin a han nui sak a.
Kei chu ka phur ta khawp mai a, "Han sawi teh; i sawi loh chuan ka kal ve lo vang," ka han ti nghal sek sek a.
Muanawma chu a nui var var a, ṭhuthlengah chuan a han ṭhu rem a, kei lah chuan ka nghakhlel nasa mai si a, amah chu ka en kar mai a, Lunglei thil thleng chanchin vel min hrilh tawh dawn ni-ah ka ngai a.
"Anmahni rawn uai lêt lem lo mah se, nuthlawi zûna uai hi a awl a ni ang ; tuna ka sawi tur hi a tu ber nge tih ka thup a ngai dawn tlat hi a va ṭha em," Muanawma chuan a han ti te te a.
A han sawi zawm leh a, "Ka hmel ka han en a, a hmel te vir ver chu ka phu lo ka ti takzet a. Keia kara chawmpang kar aṭanga pawh chhuah hlim ang maia hmel pawr chip chep, lu kir chhap mai min ngaina ve hle tih ka han hre phei kha chu, ka lawm lutuk hi mi dang hriat loh hian ka khek vei ṭhut ṭhut ṭhin a, ka Hâ chu a lang reng mai bawk.
"Tawn tirh lamah chuan Phone kan han bih dun a, ka Phone bih lai min rawn bih pui pahin ka lamah a rawn âwn phei a, mi rawn nêk tàlh tàlh a. Chu thil thleng chuan ka ngaihtuahna chu a ti pûk nghal ruih mai a. Ka han melh rulh a, ka meng mi tak rûn a, a chêtzia chuan min duh ve a ni tih a ti lang chiang mai. Insum hle lo ila chuan lawm avangin ka khek chhuak leh ṭhut pek ang chu.
"Ka hmel en ang hi ka ni lo va; keimah leh keimah hi zei hi ka inti ru em em zel ve ringawt a, ka zeizia erawh tu hmeichhia tak tak mahin an la sawi ngai lo. Tichuan, kan han inbia a, kan inbia kan inbia a, kan inbe ta em em mai. Kei chuan fing takin ṭawngkam chhawrthlapui ka hmang duh ngai miah lo va, kan inhaw lo ve ve nia a lan hnu pawh chuan bem duh lovin in-bem hmasaktir chu ka project lianpui a ni nghal. Mi ka bem dawn hian ka hlau pawh ni chiah si loh hian ka tiril a khùr ru tlat zel; mahse, min bem duh tâk miau loh avangin ka hlawhchham ta phawt mai.
"A tâwpah chuan fiamthu nena ṭan la chhoin chatuan thunung thû-ah thu chu kan han thlung ve ta poh a; ka thu ziak lam hawi kî ka thlâk nghal bawk. Pathian thu ziaka status update ṭhin khan nuthlawi thlavang hauhna thu ka'n ziak chho nghal pang a. Nula pangngaite aia nuthlawi chhai a fair zawk zia chu rilru-ah a ṭhang lian chho ta thur thur mai. Virgin thu hlaah pawh, a langa nula pangngai si virgin lo an tam tho si zia chu titi lamah ka'n han vawrh chho ṭan a. Naupang ka'n ngainat belh sauh a; an lawm zawng leh ei duhzawng ka'n hre thei chho ṭan ta em em khawp a; engtin nge khati tak mai a ka inpêk thûk theih tiin ka inzâwt ṭhin? A chhan chu keimah bawk hian ka hria; nuthlawi zûnah ka uai a lo ni.
"A nu ka rim rualin a fa rim tel a ngai a. A nu ti tau ka thlem rualin a fanu chocolate pêk zeuh a ngai a. A fanu chocolate pêk rualin a nu tih lungawi nan pêk ve a ngai a. Nula pangngai kan rimin kan rimate tân chocolate kan ken ṭhin kha; nuthlawi zûna han uai ngat chuan naupang pêk tura ken a ngai tlat.
"An fate an lo fel chuan min 'pa' deuhthaw nghal a, "Âpa Chhante..." awh..."Âpa Muanmawm, min mutpui rawh," an tih palh tâk hlauhin an In panna kawngah thawnthu hrilh tur ngaihtuah chawp a ngai a. Ka hriat chian vak tawh loh, 'MAURUANGI' thawnthu leh 'RUNGI NU' leh 'THIALTEA' thawnthu ka sawi pawlh tak nual ṭum pawh a awmin ka hria. A châng leh Bingtaii kha Mauruangi dinhmunah ka dintir a. A chang leh Rungi nu kha ka'n ti Bingtaii chho nawk nawk bawk ṭhin. Tichuan, Mizo thawnthu dik takin a fate lam kan han awi mu te te a; a nu lam ka belh bulh hman meuh chuan zan a lo rei tawh a, haw a lo hun leh chawpchilh tawh mai bawk si. Ka rima ber kha ka rim hman lo va, ka bialnu rim tura ka kal kha nau awmin ka hun ka hmang a, thawnthu ka hrilh a, ka chawi mu a, zun huh ka thlâk lo chauh chu a ni e. Tlangval, kum 30 pawh ka tlin hma hian fate home work ka tihpui dawn a ni tih hi ka pa takngial pawhin a hre lawk lo tawp ang.
"Nu leh pa bula fing takin ṭawngkam ka rawlh ṭan a. Nu leh pa tlawn pahin, "Ka pa, ka nu, Mo atan nuthlawi a pawi ang em?" kan han ti nui heuh heuh a. Kan fiamthuah ngaiin, "Pawi lah lo ve," an lo ti a. "Fa chhawm ngai pawh a pawi lo tiraw?" tiin kan han nuih tlawn ngial a. A ṭhuma ruh ngai zûna uai chu tih namai a lo ni lo; thluak hman hi a ngai em em a, hisáp kitáp nei sang tak tân lo chuan tih rual a ni lo. A nu ka han tih lungawi loh ṭumte hian, a fanu chu ka ngai ta em em mai ṭhin a. A lungawi loh avanga min be ṭha duh lo kha ka han call ngei a, "Matei kha ka ngai, ka be châk tlat, min lo biaktir teh," ka han ti zaih mai a; a dik tak chuan a nu 'Hello' ṭawngkam khat lek pawh kha a thlakhlelhawm riau a ni. Nupa an inṭhena an lunglêng khawharin an fate an chhuanlam ang chauh hi a ni. Nuthlawi zûna han uai zet chu nupa nun zirlai hi kan zir a ni ringawt.
"An zûna uai chu a lo na tak tak a ni ang; khawilo kal hlek dawn apianga lirtheia chuan thlahlel em em zel kha, a nu rim turin, a fanu ngaih chhuanlam siin ke ngatin kan han paidal tlauh tlauh mai a nia. An In panna, an In thlen hma theihna short-cut te hi ka hre chhuak zung zung a. Thil ṭul danga hah hma em em khan, zantin kal chungin hah ka hre ngai miah lo nia. An In chu panhnah cheh leh roll training nana duh thu samte pawh a lo ni lehzel a; nuthlawi zûn nei chin ngat hi chuan panhnah cheh leh roll lah hi an chîng duh riau lehnghal a. Nuthlawi pathum chin zûna uai tawh ngat chuan rang tak hian panhnah kan roll zet zet thei tawh mai ṭhin," a han ti a.
Kei chu ka nui ṭha duh miah lo, "I chanchin i sawi dawn emaw ka ti a...Duhawmi nena in chanchin kha..." ka han ti a.
Nui sak pahin, "Kha ka sawi alawm," a lo ti mai a.
"A ni lo, ka chanchin a nih kha i sawi. Engtin nge Zorini nena kan chanchin i hriat a?" tiin ka han zawt a.
Muanawma chu a nui var var a, "Ka tan hriat chian che hi a ṭha alawm," a han ti zet a, "Tak takin, a tam zawk hi duh reng vang leh awm herh vanga thlawi ta an ni kher lo vang; chuvangin, chhaih a, dem a, fiam nawmnah a, zahmawh ṭawngkama sài ngawt hi kan tih tur niin a lang lo. A thlawiate lam pawh hian zahawm taka nun tum ve bawk se la," thu tak deuh zawkin a han ti leh a.
Kei chuan, "A ni khawp mai, nuthlawi zûna uai chu, intih thiam loh avanga inṭhen hnu pawhin an fate zûnah kan lo uai tel hman a, naupang hi kan ngai vung vung mai nia," nui vur vur pahin ka han ti ve a.
Muanawm chuan, "Chhante, rawn kal ve la ka duh rualin dinhmun hlauhawmah ka dah che ka hlau ngawt mai, Kimkimi hi ka hmuh leh mai rih pawh ka ring ta lo. THE JUDGES ho kuta a awm tak tak a nih chuan thil khirh tak ka su ngei dawn niin ka hria," lungngai àwm deuh hian a han ti a.
Muanawma hi mipa chhel tak a ni, a lungngai hmel chu ka hmu tawh; lungngai deuha a thil sawi lai erawh ka la hmu miah lo. "A ho lutuk...thil a kal tluang viau maithei a nia," ka han ti ve ngawt a.
Muanawma chuan, "Naktuk kan chhuah dawn chuan mu hma deuh ila a ṭha ang," a han ti a, a pindan lam panin a chho nghal daih a.
Kan sawi lan tawh Bangladesh rama Sangu lui hnaih tak pakhatah khuan luite reuhtein a pal tlang ruam rai biru tak pakhat a awm a, chu lui ruam chanchin tlem chu kan sawi dawn a ni.
He ruam hi Bipajjanaka awmna lai nen pawh a inhlat lo hle bawk. Helaiah hian thawkkhat lai khan mi tute emaw an rawn khawsa ṭan a, a chhehvela mite tan erawh buaina an thlen lem lo; mahse Bipajjanaka chu vil takte hian an vil tlat a, eng emaw nghah nei niawm tak hian an khawsa a, chulai hmun chu an thlahthlam lo reng reng a ni.
Ṭumkhat chu lui ruama chengte zinga ṭhenkhat chuan Bipajjanaka chu an luh chilh a, buaina nasa tak an tawh phah nghe nghe a, chumi vang erawh chuan chu hmun chu an ṭinsan phah chuang hauh lo. Mahse chu thil a thlen hnu chuan ruama awmte chu mi tharin an rawn thlak ta a, mi thar rawn thlaktute chu panga an ni a, hmeichhe pakhat leh pa upa lam tawh pakhat bakah tlangval sual hmel tak pahnih leh zakdawh tiang hawlh lauh lauh ṭhin pakhat a awm bawk. Engtik lai pawhin Bipajjanaka awmna vel chu an enthla emaw tih mai tur hi a ni a, an zinga tel ve tlangval pahnihte chuan an nin thu an sawi an sawi nghe nghe a.
"Eng vanga helai hi chen chilh tlat nge kan nih?" Pakhat zawk chuan a han ti a.
An zinga phanchang ber, pa upa lam tawh chuan, "kan Hotuten kan hriat tur china an ngaih bak lo hriat ve tum hi a him lo a nia," a lo ti nghut a.
Tlangval pahnihte chu an ngawi ta reng a.
Nula chu a ngawi reng a, zakdawh tiang hawl lauh lauh nen chuan hnaih te hian an inṭhut chilh a, mi dang thu sawi chu ngaihsak àwm pawhin an awm lo. Mi pathum te chu ring vak lo hian an titi zui ta zel a. An zinga upat hmel ber bawk chu a lo ṭawng leh a, "Khapa kha dah ṭhat vat a ṭhat thu hi ka sawi fo ṭhin. Kan thil tih tum apiangah min hmakhalh hman ziah a, chuti ni lo se helaia kan awm hi a ṭul hauh lo tur," a han ti leh bul bul a.
A thu sawi chu nula chuan a lo hre pha a, a hmel awm dan chu a inthlak nghal vek a, a thinrim zia pawh hai rual a ni lo. A ding phat a, chupa chu a en ang renrawn a, chang fak hian, "Pu Rualsang, ani kha i thah ni a thlen hun hunah i tawp ve nghal ang, a chungchang kha khati zawng khan sawi tawh lo turin ka hrilh tawh che," a han ti hmak a.
Chupa chu verther zet hian a nui a, nula chu rawn melhin, ngeiawm zet hian a nui vur vur a. Mi dang pahnihte pawh chu an lo nui ṭhaw bawk a.
"I hmel chu a ngeiawm hle mai, hetah hian Pu Hrangliana thu-a zui che u ka ni a, kan tih tur kan zawh hunah i ṭawngkam chungchang hi kan la sawi leh ang. Ka tih tur ka tih chhung chu i mi sawi mek kha a him ang tih min tiam a ni," nula bawk chuan a han ti leh a.
Chupa chuan ngeiawm taka nula melh leh nuih el chu a la chhunzawm reng a. "Hmeichhe ṭawngah chuan a lian mah mah deuh lo maw?" nui sun sun chungin a han ti ve a.
Nula chuan, "Tunah kan fîah mai dawn em ni?" a lo ti leh nghat a.
Chutia nulain a han tih chuan chupa chu a thinrim ta em em mai a, a han tho kang uaih a; mahse chutih lai chuan, zakdawh tiang hawla bai lauh lauh ṭhin ber chu a rawn inrawlh ta vat a, nula chu a kai ṭhu a, hahdam turin a han ti zauh a, a kal hranpui ta daih a. An kal hran hnu chuan nula thinrim lutuk chu a ṭap lo chauh a ni ber e.
Mipa chuan, "I nghah a ngai tih chu i hriat ve tho kha, insum ve ṭhin ta che," nula hnenah chuan a han ti a.
"Amah avang khan ka chhungkua ka chân tih ka hre chhuak tawh a, ka û pawh umzui a la duh ta zel a, ka en mai mai thei tawh lo a ni," nula chuan a lo ti a.
Mipa zawk chu a ngawi ta reng a; mahse duat deuh mai hian nula chu a kuah ta thung a.
A tuk chawhnu lam chuan an zinga pakhat chu hmanhmawh deuh hian a rawn kir a, Nula nena inchhang lawk deuh, Rualsanga hnenah khan, "Hetah a rawn kal, hetah a awm ve tawh tlat mai," a rawn ti a.
Chupa chuan, "Tu chu maw? A hming han sawi ta che," a lo ti nghut a.
"Muanawma..."
Rualsanga chu a rum nghut a, engmah sawi lo hian a ṭhu mi tak run a, a hnu deuhah, "Engtin nge helai rawn pan nachang pawh a hriat chu le, eng nge tih a rawn tum leh pek ni?" Zawh bik pawh nei chuang lo hian a han ti a.
Nula chuan Rualsanga hmel chu chîk zet hian a lo en reng a, engmah phei chu a sawi lo; mahse, a en dan chu hmusit hmel leh ngainatawm loh zet mai hi a ni thung.
"Heta awm hian ṭangkaina a nei tawh lo vang, kan dawithiamho pawh chu Muanawma a rawn lan chuan hetah an rawn kal ka ring miah lo. Mira-i ber a hmuh theih dawn loh chuan hepa hian ṭangkaina a nei lo; chuvangin..." tiin mipa, zakdawh tiang hawl lauh lauh ṭhin chu rum zet hian a han melh a.
Nula chu a rawn ding chhuak ve nghal vat a, "Tuna i rilru put mek kha tih hlawhtlin han tum chhin ta che," tiin mipa hliah chiah chuan a rawn ding ve nghal a.
Nula leh Rualsanga chu rei ngial an han inmelh a. Chutah, Rualsanga chuan, "Naktukah helai hi kan chhuahsan ang," a ti ta hmuk a.
"Nangni chu in duh leh in chhuak ang a, kei chu hetah ka la awm dawn, Pu Hrangliana min hrilh anga ka tih tur ka zawh hma chu ka chhuak ve dawn lo," nula chuan a lo ti ta tlat a.
Chupa chuan nelawm loh zetin nula chu a han en a, chutah a rum nghut a, mi dang pahnihte lam a hawi a, "Naktukah Chittagong kan pan dawn nia," a ti a, hmun dangah a kal ta nul nul a.
A tukah chuan mi pathumte chuan ruam chu an chhuahsan ta a, nula leh mipa ke bai chauh chu an awm ta a ni. Mahse nula chuan chhuak tate pathum chu a ring ngang lo va, zui ruk a tum ta a, mipa ke bai chuan a rem ti lo hle a, a dan theih miau loh avangin nula chu a kal ta nge nge a.
Mipathum te chu Bipajjanaka lam pan zelin an kal a, an hmel aṭang ringawt pawhin thil ṭha lam an ngaihtuah lo vang tih a hriat theih a. An zinga upa ber Rualsanga chuan, "Khawiah nge i hmuh?" Tiin Muanawma rawn thlen thu rawn sawitu ber chu a han zawt nghut a.
"Pûk awmna bul hnai maiah; amah chauh a ni lo a, ṭhian pakhat a nei a ni," tiin chupa chuan a lo chhang a.
A zawttu pa chuan, "A pawi loh chu, an pahnih chuan kan dah ṭha dawn tihna a ni mai," a lo ti leh nghut a.
* * * * * * *
"U Chhante, a muhil rei hle mai," Tete-i chuan a han ti a.
Buaina tel lo hian engmah hi a tih theih tak tak loh a nih hi. Muanawma chu ka han en a, ka lung hi a awi lo em em a. A malpui an tuam bar mai te, a lu pilh nian nuan leh a ban che ṭha thei lo va zawi hnak mai te chuan ka thin a tirim a ni; chu achhapah, a hmuh chak em em kimkimi a hmu thei ta lo chu pawi ka tihpui em em bawk.
Damdawi Inah chuan karkhat zet ka awmpui ve ta a. Thil dangah ka rilru ka dah thei lo va, Muanawma chu ka vil chawt a, ICU lama dah ngai em chuan a khawsa tawh lo. He mihring, luhlul lutuk leh, a tih tawh lam ti tlut mai ṭhin hi engmah hian a tum a thlaktir thei ngai dawn lo niin ka hria.
Bangladesh kan kal aṭangin karhnih chuang zet chu a lo liam leh reng tawh a, Muanawma chuan a tih tur a ti a, a hriat duh pawh a hria a, chu thil avang chuan umzui a hlawh a, beih a tawk a, a chet theih loh phah ta reng bawk a nih hi. Lunglei Police SI Remlalfaka chiang zeta a hnek lai kha ka han mitthla a, Muanawma'n a ṭul huna hmeichhe thlavang a hauh nat zia ka hmuh chuan a mak ka ti zawk hle nghe nghe a ni. Hmeichhe khirhzia, hmangaihna leh inngaihsakna lama mahni hma an sialzia hi min hrilh ve kauh kauh ṭhin a, an duhawmna leh hlutna pawh a sawi hmaih ngai chuang lo bawk. Hmeichhe zia leh cheng a man em em a; mahse ngaihzawng hi a nei ngai vak lo nge ni, kei hi chuan ka hriatpui lo khawp mai. Heng thil thleng thlenga ka sawina chhan chu, hmeichhe zahawmna hum sak a, a thlavang hauha Sawrkar Uisathiam a han hnek hmiah mai kha mak ka tih deuh vang a ni pakhat.
Tete-i nena kan titi malh malh lai chuan a rawn rum ṭiah ṭiah a, fiah deuh hian a rawn meng a, min rawn en tawn ve ve hnu-ah a han nui sak a, "Min han ṭhuttir dawn em ni?" a han ti sap a. "Keimah pawhin ka ti thei tawh tho ang a; mahse, in pahnihin in awm bawk a, ka pangchang ve tlat teh ang," a han ti leh a.
Tete-i nen chuan kan han ṭhuttir a, a malpui chu a la dam chian loh avangin han tih chet deuh chuan hrehawm a ti deuh niin a lang, khum lu ngheng hian a maimi'chhing vang vang a. A rawn men hnu-ah, "Tete, karhnih zet awm dun hnu-ah chuan mipa leh hmeichhia hi inngainat a awl khawp mai," a han ti ngawt a.
Muanawma thu sawi awmze nei lutuk chu ka hai hauh lo, ka lo nui ringawt a. Tetei zak chu a sen ṭan ṭan a.
Muanawma chuan, "Kei lah ka muhil deuh reng mai bawk si," a la ti ta fo a.
* * * * * * *
Comments