KA PAIN KA CHUNGA A THIL TIH KHA.
© Chhantea Pautu.
Ka Pain nupui nei tura min tur dan kha a mak thei ngawt mai, tun thleng hian ka la nei ta lem chuang lo.
Kan khaw pa pakhatin a fapa tlangval 'senior' tawh takte, nupui nei tura a nawrna, "Ka chi te hi in ti mang ang ka ti," a tih ang em chuan ti ve lo mah se, ka Pain nupui nei tura min nawrna kha a 'khawlo' thei mai mai ngawt a ni; ka Pa kha chu a ho mai mai ngawt mai.
Ka Pa kha a thâibàwih lo khawp mai a. A 'man' ṭek ṭek lutuk. "Hualtu khuaah Pu Dova leh Liandawla an vin ber a, an nupui fanau te'n an ngai ber," an ti ṭhin. Ka Pa kha, hmeichhe thunun theih mipa an tih ang chi hi a ni lo; mahse a ṭul chuan ka Nu thu mai ni lo, a fate thu thleng khan hna relbawl leh chhungkaw inrelbawlna kawngah a zawm ṭhin. A fing a, a remhria a, rorel pawh a thiam khawp mai, "Ka thu chu ka thu a ni mai," ti hmiah ṭhin khawpa pa luhlul kha a ni ṭhin thung; chuvangin ka nupui lo la ni tur hmeichhia hian a thâwk a phita min thunun a tum a nih vaih chuan a hlawhchham chîang ngawt ang; kei chu, ka Pa fapa ka ni tlat. A ṭul a nih chuan ka nupui fanaute thu erawh ka la zawm ve ang, ka Pa fapa ka ni tlat a.
A fiamthu thawh dan chu ka sawi kher lo vang; mahse a nupui fanaute min tih hlim nana ka Pain chaw ei laia a fiamthu thawh ṭhin ṭhenkhat kha chu a ho thei mai mai ngawt mai, kan nui dar dar zel si. Kohhran Upa a ni a, midang, Kohhran Upa, intifekfawn satliah ang erawh a ni ve lo; ka Pa kha chu a nui maimi'chhîng sâng zel. Kei pawh hi ka nui maimi'chhîng sâng ṭhin; ka Pa fapa ka ni tlat a.
Ka Pa khan buh ṭhàp leh thlei a thiam hle a, ka naupan lai aṭanga ka puitlin hnu thlengin nâu paw chunga chhuat a nàwt kha vawi tam ka hmu a, ka Nu thawmhnaw, fenhnuai leh kawrhnuai thlenga a su lai pawh ka hmu fo. A hmun phiat te kha ka Nu hmun phiat ai mahin a zei zâwk mah a, a fai zâwk fo bawk; ka Nu hi nu taima, tih tur hre em em a ni a, a buai ṭhin lùatah hna a uluk hman ngai lo bawk atin ni. Ka Pa chêt dan leh khawsak phung ka hmuh fo chu ka ṭhan hnan a, tun thleng hian inchhûng chêt kawnga Mizo mipa ten hmeichhe tih tur chauha kan dah ang tih kawngah harsatna ka nei ve lo; ka Pa fapa ka ni tlat a.
Ka Pa khan min vaw nasa ṭhin khawp mai; naupang huaibak leh suakbak, luhlul leh nuara chhuata ṭhu chunga ke leng bat bat ṭhin kha ka ni miau a. Ka puitlin hnu thlengin min hau na ṭhin khawp mai, rilru na takin min siam fo va, ṭah zawih zawihna tur khawpa min hauh châng pawh a awm. Ṭawngkam vin lam, rilru chhe miah si lo a nih avangin ka rilru a ti na em em ṭhin; mahse a hnu lawkah a fate kha ṭhian kawmin min kawm leh bawrh bawrh ṭhin a, min hau kha min huat vang a ni lo tih a awm danah a hriat ṭhin avangin ka thinrim rei theih miah lo. Hei pawh hi ka ṭhan hnan châwk ang a, ka fate chu ṭhian kawmin ka la kawm hlim ve ngei ang; ka Pa fapa ka ni tlat a. A vin lutuk ṭhin erawh ka chhawm lutuk lovin ka inhria, chhawm ka duh lo bawk.
Pa taima a ni. Hna min thawhpui a, kan chawlhin min tur sek ngai lo, min phût hmêl pawhin a awm ngai lo. Amah zâwk khan a thawk reng mai zel si a, mahni Pa ten an thawh laia han chawlh reng bik kha chu a nuam miah lo va, kan thawk ve leh mai zel a ni.
Sakhuana lamah pawh min thunun hneh khawp mai. "Kan inkhawm peih lo a nih chuan a len pawh kan lêng tur a ni lo," tih kha ka Pa thuvawn a ni a, chu chu kan chhungkaw ziak loh dan a ni ṭhin; chuvangin zanah ka inkhawm peih lo a nih chuan len pawh ka leng ngai lo. Aizawl ka chhuk hnu hian ka inthlah dul ta deuh mai pawh a ni; ka Pa Sorry!
Ka pa chuan nuthlawi ka ngaihzawn lai pawhin min hau miah lo; nuthlawi fate ta tur Sairawkherh ka siam pawh a phal thlap!
Ka ngaihtuah ṭhin a, ka Pain ka chunga a thil tih zîngah khan, eng thil khan nge a ṭha lamah awmzia nei ta ber tih hi ka inzawt a; ka hria, ka hre chiang khawp mai, ka Pa chuan HMA A HRUAI ṬHIN A NI.
Comments