DIKTAWN

DIKTAWN

Pjs

"Mamte, hei hi i hmu em? Diktawn a nih hi. A hnah rawng tê hi a nalh tiraw? Kan naupan lai chuan a hnah hi kan thliaka, kan hawna, zanah kan lukham hnuaiah kan dah a, kan mumangah kan duh deuhte kan lo hmu a, an ni nen chuan inngaizawngin kan lo inhmangaih ém êm ṭhin a, chu kan mumang chu a tak takah an lo chang ṭhin. I pa nena kan in ngaihzawn lai hian vawikhat chu ka lukham hnuaiah ka daha, mahse ka mumanga ka hmuh chu ramhuai lianpui mai hian min lo umchiam a, ka lo tlan chak thei bawk si lova, ka han enchianga i pa lek hi a lo ni a, a takah a thleng ang tih ka hlau teh asin.."

Kei ka nu leh ka ú nen chuan thing kan phur a, ka nu'n diktawn chungchang min hrilh chuan kan rilru a luah reng a, tun thleng pawh hian ka la hre reng.

Chumi ni kan thingphurh haw lamah chuan diktawn chu ka ú nen chuan ka thliak haw a, zana kan lukham hnuaia dah kan duh avangin, ka ú chuan a la duham ngei maia, a zankhatnaa a duh tak a hmuh loh palh takin, zan nga vel lai daih chu a hawn ta a..

Chumi zan chuan ka nu'n "In hmuh duh tak tak chuan thu tlemte chham tur a awm a, lo ngaithla chiang ang che'u ka chham anga, ka chham ang chiah chiah hian in lo chham dawn nia,"

"Diktawn ka tawn, ka chhun mu lo, ka zan mu, ka duh ber ka mumangah min tawn tir ang che" tiin

Chumi zan chuan kan lukham hnuaiah kan dah ve ve a, mahse kan mumangah engmah kan hmu lo, ka nu chuan "Zan khatna chauh a la ni a, in hmuh a la rem lo a niang, chuan diktawn hnah kha tlemin in lulam hnaihah in dah dawn nia" a ti leh a..

A zan hnihna ah chuan kan han ti leh a,
Ka ú chuan a diktawn hnah pakhat chu a rawn la chhuaka, lastic-rubber hian a lu-ah chuan a phuar bet a, a mut dawn chuan a lù chu a dawm vang vanga, ka nu chham ang chiah khan chhamsual hlau tak mai hian a chham leh a, a mu ta a..

Kei pawh chuan ka diktawn hnah hawn chu ka hum a, thu chham tur ka cham zawh chuan ka lukham hnuaiah a hma aia hnaizawkin ka dah ve leh ta a..

Zan laiah chuan diktawn awmlohna lamah ka thlesawn palh ang tih ka hlau hle mai a, mut pawh ka mu nghet thei lo a ni ber mai. Ka ú pawh chu a tal a tal a, a muhil thei bik lo nge a mumangah a duh tak a lo hmu tawh zawk ni ang le, ka ti neuh neuh a, mahse a hmel chu ka han enchianga, a sen vek a, a hmai leh chal velah te chuan thisenzam hi a rawn lang ṭuak ṭuak a, ka ngaih ṭha lo chuan ka nu chu ka va kaiharha, a rawn thawh chuan, ka u chu a rawn kaiharha, a lu a diktawn hnah a ṭawnbeh vang khan alo sen vek hi alo ni a, a ṭawn behna rubber kan phelh sak hnu chuan rubber thla te chu a lang kulh mai bawk si, a vual tettut mai a, kan han kaihharh chuan a meng sen ruma, a mittui a tla fuap fuap mai a, a mumangah eng nge a hmuh ang aw..

Ka ngaihtuah hian ka ú leh kei khan kan mumang thlengdik ngei ngei tur kha hmuh kan chak hle a, kan duhthusam nula hmelṭha tak chu tunge ni ang tih chauh kha kan rilruah a awm a ni ngei ang..ka nuih a za..

A tuk zingah chuan ka nu chuan keini unau chu min han en ṭhin, a nui leh kur kur zel a, ka pa nena an titi kalhmangah chuan keini unuau chu bumin kan awm a ni tih kan hrethiam ta a..

Ka û nen chuan kan diktawn hnah hawnte chu kan paihfai ta vek mai a ni.

Zan khat chu ka mumangah hian nula duhawm zet mai hi ka lo hmu a, tunge a nih ka hre lova , khawi hmuna awm nge tih pawh chu chhuichhuak dawn ila, a harsa ngawtin ka ring. A hming ka lo zawt lo kha ka inchhir leh hnuhnawh hle mai a, zingkarah chuan chunu zûn chuan min phuar a, ka melh ngai ka melh tlawk tlawka, hmuh leh theih ka chak ngei mai. Ka hmu leh a nih ngat chuan a hming leh a awmna veng leh khua chu ka zawt tawh ngei ngei ang tiin ka insehruh ve em em mai a ni.

Ka hmuh hmasak ber zan chuan, khawi hmunah emaw hian ka lo zin a, ka zinna khua a; ka tlenina nula chu a duhawmin a hmelṭha êm em a, ka kum rualpui vel a ni tih ka hre thei mai a, a felin mi a ngaihven êm em mai bawk, a nu leh a pate ai mahin min ngaihsak, a chawhmeh siamte chu a tui em em mai a, an fanu neihchhun a nih avangin an duat hle bawk, an inah chuan a nu leh pa te nen chauh chuan an cheng a, chuta an mikual va nih chu a nuamin a zalen em em mai bawk a ni.

Kha ka va mikualna khua kha khawi khua tak ni ang maw?? A awm tak tak a nih chuan zawn chhuah ka va han chak em..

Ani hming chu sawi loh a nu leh pa hming takngial pawh chu ka zawt ta si lo kha a nia, khatia an ina ka va luh chiah khan an mikhual ka ni tih leh eng emawni tak ti tura kal ka ni tih chu ka hre nghal mai a, an ni pawhin an milkhual ka ni tih kha an chetzia aṭangin an lo tilang nghal tawp mai bawk a ni.

Nia mumang a nia..

Zan inzawng zatin kha nu kha ka hmu a, a zan hnihna ah chuan, an khuaah bawk khan ka va kalnawn leh a. A pa hian eng titura kal nge ka nih min zawta, chhan ka han tuma, ka kalchhan ber lah chu ka hre si lo, ka rilru ah chuan "Ranngo zawng turin ka kal a ni" tih ang zawng hian a rawn lang ta daih mai a..

Chuan kha nula duhawm deuh khan, "Nupui tur i zawng a ni lo maw le..?" A rawn tive lehhlawl mai a. Min nuih sen sen a..
Chutah kei chuan.
"A ni deuh ber ang chu..nia..a niang.." tih pahin a pa lam chu ka va hawia..
"Ka pu, nupui tur ka rawn zawnga, i fanu hi ka duh a ni.." ka ti ta ringawt a..

Ani chuan "Ekhai..amah khan a duh ve che em ni..? A duh ve che chuan i duh leh i nei dawn a nia.." a lo tive mai bawk a..
Chutah, nula lamah khan ka hawia, a hmelah chuan a duh tih ka hre thei a, a hlim hmel em em mai lehnghal.

Chumi zan ka mumangah chuan, ani chu ka ngaihzawng a ni a..ka nupui hual a nichhunzawm nghal ta mai a..Naupang te mah ni ila, khang hunlai a ka rilru put hmang kha a lo va han patling tawh ren rawn em.

Zan dangah ka hmuh leh loh ka hlau em em a, ka mumang inzawm dan vel ka nu ka han hrilh chuan mak a tiin ka ti hrilhhai ngei mai..

Ani chuan
"Mumang inzawm zut kan neih hian kan thih a hnai ṭhin," a han timai chuh ngaih a ṭha duh lo leh zual.

Mahse zan dangah pawh chuan ka hmuh chhunzawm leh ta tho a..

Ka hmuh tawp ber zan chuan, khawiah emaw hian kan lo leng dun a, a chhungte kan tlawhkual nita in ka hria, kan inneih dawn; kan khuaa ka hruai haw tawh dawn vang a lo ni a..Chumi tlai chuan an khaw rama hmun nuam tak pakhatah hian kan kala, phul hmun nitain ka hria. Chutah chuan ka hmaah a kal a, eng eng emaw hi a sawi nep nep a, hriatchhian tuma ka va pan hnaih chuan
"Fanu ka duh a nia, kan fa hmasa berah.." a rawn tihlawl mai,
"Hmeichhia chu eirawng bawlah kan chhawr thei hmaa ang a, chuan in nghak atan pawh mipa aichuan an ṭangkai zawk ang", a han tileh a..

Kei chuan "Naa..fapa neih hmasak ka duh zawk a sin..hmeichhe tih angte chu zir tir ila, a thiam ve thei thoin ka ring a ni.." ka han ti ve leh a..
Ani chuan "A.....!hmeichhia ka duh tho tho.." tipah chuan a lungawi lo hmel der vel a, khatih laia a hmel kha han hmu ve ula chuan aw..a zúnah in uai lo bikin ka ring lo..mahse hmu leh suh u..ka phal leh lo..

Kei chuan "Awle..i duh ang chuan Fanu kan nei hmasa ber dawn nia.." tih pah chuan ka han nui rih a.
Ani chu lawm hmel tak mai hian enghla emaw ni hi a sa a..a zai ret ret a, a aw tⅇ chu a nalh em em mai lehnghal.

Mi han en ṭhin; lungchim tak mai hian min melh a, a han nuih leh ṭhin, a vahan duhawm chungchuan em..

Kha a hmel kha tun thleng hian ka la theihnghilh thei lo..Nilengin ani chu ka vei a, ka vei ngawih ngawih, ka chaw ei a titui lova, hmuh leh thuai ka chak em avangin muthilh reng mai kha ka duh hle a ni..
Mahse chumi ni ber kher chuan ka nu'n kan khum a sing sa a, mutbû a haih na lamah, ka lukham hnuaia hman ni a, diktawn hnah ka dah kha ka lo la la chhuak lo chu ni in..a lo vuai zo vek ṭep tawh lehnghal..

Ka han ngaihtuah chiang a, kha diktawn tê kha a thawk tak tak emawni dawn le?..ka mumang inzawm pet pet dan kha, diktawn hnathawh hi a lo nih dawn hi ka ti ta ringawt a..

Ui hle mah ila, kha ka mumang ngaihawm kha ka thlahliam a ngai ta si a ni. Chutia diktawn vuai tawhlam ka lukkham hnuaia a awm tak lohah chuan kha mumang kha tunthlengin ka mang chhunzawm leh ta lova, kha nula ka nupui nimai turi hmel lah kha ka hrechiang tawh hek lo..
Hmu leh dawn ngat ila chuan muthilh hlen pawh ka thlan ngei ka ring.

Lo nui suh aw..ka chan hi hrethiam la chuan khati'ang mumang te kha chu i ngai ve thoin ka ring tlat..

Hun a kal zela, tlangval nupui neih hun kan lo ni ve ta der mai. Chungkaw chawmnan eizawnna ka dap theih ang ang ka dapa, tluan chuan nupui neih pawh ka inhuam tawh hle a ni.

Ka ṭhian pakhat Saia tiha ka koh mai nen hian hna kan thawk duh ṭhina, ani nen chuan ṭhian inkawm ngaih tak kan ni..Nupui kan la nei lo ve ve a,
Hrai chawilova, val hlen kan hlauh thu chu kan titi tam ber a ni.

Ani chu mifel tak a ni a. Kohhran lamah pawh a inhmang taima in, a nihna chelh pawh a sang hle a ni.
Vawikhat chu a inkhawmpui kal a rawn haw ni hian a ngaihzawng a neih thu a rawn hawn tel a nih chu. Anva khawmpuina khua-ah chuan nupui a neih mai theih tur mifel tak a ti mai a..ka va hmuhpui ve lem lova, a fel turah ka ngai hmiah.. chunu chu neih ngei a duh a, a awmna khua hla hle mah se, nupui nei lova, tlangval awmreng aichuan a ti a ni..

Tlaikhat chu kan inah a rawn leng a.
Ani chuan palaia kalpui turin min rawn sawm ta hlawl mai a nih chu. A phur em em mai lehnghal, chutia ka ṭhian kawm ṭhin ber maiin nupui min han neihsan tur erawh chu ka thikru fu mai. Tichuan a tuka a bialnute khawlama kal tur chhuan kan inbuatsaih ta a.

A nupui turte khua chu a a han sawi chuan a hming pawh a lar hran lo khawp mai, mizo ramah chuti'ang khua a awm tih pawh ka lo hre ve hauh lo lehnghal.

A tukah chuan palai anga ṭang tur leh a nupui tur hmuhpui ve nihpahfawmin ka kalpui ve ta ringawt mai a, a hla fu mai lehnghal, tlai lamah chuan ka thleng ve thei ta hrama. A bialnute in kan thlenchiah chuan an khua a la thingtlang angreng bawka, an in chu a lian tehfalua lo, a bialnu phur tak maia ka han hmuhpui chuan ka lung a awizan lo, a hmel a ṭha lutuk lova, duhawm rukna riau erawh a nei a ni phawt ang chu..nge a nupui neih chak lutuk tawhin a thlang ve hmiah zawk ni ang. Mahse a fel ang ka ring..

Zan lamah chuan a bialnute inah chuan kan tawt hle a, inthlahrung tak chungin ka riahchhuah mai a lo ngai ta a..A bialnu nû chuan a unaute inah min hruai ta ringawt a.

Chumi zan berkher chuan an khuaah hian current an nei lova, ka ṭhianpa bialnu nu'n a uanaute in min hruainaah chuan inthlahrung zet mai hian ka riah a lo ngai ta bawk nen, ka lo kal kher kher chu ka inchhir em em mai a ni.

Mahse an fel em em a, an bengvar in mi an ngaihtuah em em mai bawk, ka inthlahrun an hlauh em em na chuan mi a tihlim zawk zamah. Chu mi hruaina inah chuan nupa tuakkhat leh an fanu nula chauh chu an chenga, bati hnuaiah chuan an hmel pawh ka hmuchiang hleithei lova, anni pawh chuan an mikhual chu min hmuchiang bik kherin ka ring lo.

Chumi zan chuan ka inthlarung leh hrehawm tilutuk chuan ka muhil thei ta reng reng lo mai a.. min mawlhtu eng emaw ni tak hi a awm leh nghal. Ka hriat chhian hauh loh, vawikhatmah ka la hmuh ngailoh mite inah ka riak ta chu. Muhil ila, ka muthilh lai hian engtin nge min tih ang tihringawt te chu ka rilru ah a awm reng mai a ni.
Ṭhianpa Saia ka lo zui kher kher kha aw..!!!

Zing lam thleng chuan ka muhil ta reng reng lo mai a..An chokâ chu a ri rak rak renga, an fanu nula tleirawlte kha a nih ka ringa, a zai ret reta , a aw te chu ka hriathnu a ang em em mai leh nghal, a aw ngaihno bei zia chu!! Ka ngaithla reng a, zanlama ka muthilh loh avangin ka mut a tichhuak a ni. Mahse ka muhil a nih chuan mikhual ṭawmkai lo tak ka ni ngei ang..

Ka zunchhuak lutuk chu ka va thova, an tuideh bulah chuan an fanu nula chu a lo dinga, min lo hmuhchiah chuan, min rawn melh a,
Ka hmuh tawh hnu a ang ngei mai, a hmel lah chu a ṭha em em mai lenghal..
Ani chuan "I muttui maw..?? Chaw ei ve nghal mai rawh aw..hei ka chhum kep che a nia," a lo tinghal vata, lehlam a hawi leh ta daih a..

Zunram ka thiar zawh chuan an ṭhutthlenga ṭhu chungin ani lak ata chu ka mit ka lasawn thei ta reng reng lo mai a, heti'ang khuaah nula chhe lo lutuk mai lehnghal, engtin nge a ni theih.. ka ti rilru ta neuh neuhva, ka thlenin chu a fuh loh hran loh hi kan tileh hnuhhnawh a, Saia chu ka zui fuh hle mai..

Chuti khawpa nula duhawm awmna in-ah chuan engvangin nge maw tukṭhuan chu ka han eiloh tehlul ang ni..?

Tukṭhuan kan ei lai leh kan inkawmho lai te chuan an fanu chu ka hmuhnu a an em vang leh a hmelṭhat em avang chuan ka lo melh leh veng veng zela, inthlahrung tak chung siin, ka melh lo thei lo a ni.

Chumi ni chuan lo lama feh turin an chhuak vek a, kei chu Saia nupui turte inlamah chuan ka awm ve ta rih a..

Man leh mual chungchang leh a huntur te relin ni kan hmangliam a, chhun lamah chuan ka mumang lama ka nula hmuh ṭhin hmana mi kha ni ngeiin ka hria, hmuh leh vat vat ka chak hle a ni. Ka hmu leh a nih chuan mawl tak leh holam takin ka thlahliam phal hauh lovang..

Zan lamah Saia bialnu te inlamah chuan kan ṭhukhawm a, chu mi zan chuan ka thlenin nula tê kha a rawn lang ve hlawl mai..

Current a awm tawh bawk nen, a hmelchu chiang takin a lang a, hmanna ka diktawn mumanga nula kha a ni tih chiang takin ka hrechhuak ta a..
Mak tak a ni..a tak tak tur alo ni mial lo maw..?

Kan inkawm hova, innel takin kan duh duh kan sawi a, ka ngaina nghal a, ani pawh chuan zep ruallohin min ngaina tih ka hre thei a ni...

Zan a rei deuh hnu chuan ka bulah rawn ṭhu hnaiin,

"Haw tawh ang hmiang" tih te mai hi, nui seih chung hian a rawn sawi ta a..

A hnu leh zel chu sawi tawh lo mai ang..ka diktawn mumang kha a tak a ni tih chu i hriat mai ka ring..
Chuan ka nupui hmelṭha leh duhawm em em mai i hmuh ve duh chuan kan khuaah ka bulah a awma, kan fanu duhawm em em mai nen lehnghal..duh leh i lo kal ve mai dawn nia.

Ka diktawn mumang leh tak tak chu ka hril zo ta che..

THE END