KAWHTEBÂWKA SIHHUAI LALPAIN A HMUSIT
Ziaktu: ©Chhantea Pautu
Model: Amah Kawhtebâwka(Hriata Tea)
Kawhtebâwka chuan leng hawn ar khuan rualin phelh phungin Mualvùm a lut a. Khawchhung chu a lo reh duk a, a boruak hmuh theih si lova fawn vel chuan a mi ṭham a ti na hle mai a. A rilru te te chuan thil dik lo a thleng ngei a ni ang tih a ring tlat a. An inah a lut a, tumah an lo awm loh avangin a iptepui var leh a silai a dah lawk a, zawlbuk lam a pan nghal a. Zawlbuk a va thlen chuan tumah an lo awm leh pek lo; chutianga thei reh taka a reh mai chu mak hi a ti khawp mai a, inngaihtuahin rei lo deuh chu a han ding a, lal in panin a kal leh ta nghal a.
Lal in a va thlen chuan kawt zawlah mipui an lo ṭhu tlim hmur mai a, pasalṭhate chu ralthuam famkim inbelin an lo ding ther fer fur a, an hmai chu thinrim avangin a sen ṭul hlawm a, an meng no lo nasa mai. An lalpa Lianluaia chu leikapuiah a lo fu to vung mai a, a bulah a upate chu an lo ding ṭhap a, mipui hnenah chuan thu a lo sawi dup dup a.
"Khai le, kan hmelmate chuan kan bu zawlah min rawn luh chilhin, nunau nunna leh hmeichhe nunna lâk pawh pawisa zo lovin ka khawper Pangdèp an rawn run ral a, kan thin chu fei lu-a vih ang maiin an ti na a ni. Ka upate finna, ka pasalṭhate leh ka mi huaisente thinlung chu ka hmu a, nangni zarah phuba leh saihlum a nget lo vang," a han ti a.
Lal Lianluaia hi pa lianpui mai, sar vuah mai, lal ṭhuthleng a luah hma pawha pasalṭhatna kawnga khuala thang, hming lang hat tham kha a ni a, a fing a, thlahtute aṭanga huaisenna, a thisena zâm tel tlat vawng nungtu a ni a. Fapa, kum 12 vel a nei tawh a, hemi zan pawh hian a pa bulah chuan a ding ve ran nghe nghe.
Lalin thu a sawi lai chuan hnunglam aṭangin, "Kan pasalṭha Kawhtebâwka pawh an lo thleng e," mipakhat hian a rawn ti lang lang a.
Kawhtebâwka lo kal chu an lo en ṭhup a, a chungah lal leh a upate, mipui leh pasalṭhate mit chu a fu ṭhup mai. A lo phei zel a, lal leh upate hnaih deuha a ṭhianpa Ṭhohliana lo thu kawh luah mai chu a han hmu a, a boruakin zir lo teh mah se, ring vak lo hian a han nui phuh ṭhut pek a. Ṭhohliana hmui chu a vung kawh luah mai lah tak a, a nihna tur bak hian a lian lung mai bawk si a, fawh chakawm loh ve tak a ni ang. Chhun lama tlang nuam a perkaipui Kawhtebêli pawh khan zawlpuan a phahpui duh tawh rih kherin a rinawm loh. A meng duk chur mai a, a sam chu a phelh phung mai bawk a, a hmaite chu a khem neng nung a, a hahmai pakhat a bal avang chuan a hmui vung kawh luah karah a lang awng hiau mai a. Suktepa tawlh thlu kha a nuihzat vei nen.
Kawhtebâwka chuan nuih la insum tak chung hian, "Lalpa, eng thil nge ni ta, kan awm dan chuan ral rim a nam ka ti," a han ti a.
Lalpa chuan thil awmzia chu a han hrilh a. Pangdêp beih a nih dan chu hmui vung kawh luah chungin Ṭhohliana pawh chuan a han sawi ve a, Kawhtebâwka fapa pawh Suktehoin an man thu chu a sawi bawk.
A fapa an man a, an kal bopui tih a han hriat chuan Kawhtebâwka thinrim chu a beng a ling vut mai a, khawih leh hnaih ngam pawh a ni lo. A ngawi ngul a, thla êng hnuaiah a meng thim pûk ruih a, a ṭhianpa hmui vung kawh luah mai pawh chu nuihzatah a kal tawh lo. "Lalpa, kan hmelmate chimih turin ka inpeih e," a han ti chhum hmuk a.
Lalpa chu a lo ṭawng chhuak a, "A ṭha e, kan hmelmate chu pasalṭha thlan bik sawmngain in um ang. Kan hmelma lam hi eng zat nge an nih kan hre lo va, pakhat erawh Ṭhohliana'n a lo thal thei a ni. Ka pasalṭhate chu Liana pavin han ho rawh se," a han ti a.
An lalpain Liana pa a tih hi, pasalṭha khual kai, val upa Mengrima(Ar El Khawlhring) a ni a. A fing a, a huaisen a, râl rama rawlrâla chetna hmuna hruaitu atana a ṭhat em emna chu, a muhil ve mang ngai lo hi a ni. Khawvar dawn hnaih, mi mut tui laite hian a la che sauh sauh ṭhin. Amah hi han en mai chuan dam dap, zawi ve hmel deuh, chawrche lek lek, ṭawng zawi raih mai, phungthlu deuh mai leh val upa nih tling tak a ni. A hmel en aiin zuam sual a awl fo va, a 'luck' viau a; mahse, a hriam a lek nazen lem lo.
A zan a zanin hmelma chu an um ta nghal a. Pawl hnihah inṭhenin, hmelmate tlanna lam ni-a an sawi chu Val upa Mengrima'n a ho a, an zingah chuan Kawhtebâwka pawh a tel a. Pawl dang chu val upa Thianglova'n hoin, anni hi Sukte ho lehkhalh tumin hmanhmawh takin an kal ang a, pumpelh kawng zawhin tlan khalh an tum dawn ani.
Kawhtebâwkate kalna lamah chuan ngaw chhah ṭha zet mai, Sihhuai lalpa awmna, 'Tlinghlum ngaw' an tih chu a awm a, mak tak maiin tlinghlum ngaw lam pan zel chuan hmelmate chuan hnu an hnutchhiah tlat mai a. He tlinghlum ngaw hi la dai dar loh ram pilril, ngaw chhah ṭha zet, thing pawh Chhura rual mai pawh ni lo, Chhura aia upa pa awmna a ni a. Kawhtebâwka tak pawh hian a la dai dar hneh lem lo hle a.
Zankhuain an kal a, Sukteho chu an um pha mai lo; mahse, kawrte hmun rem lo zetah hian an mi um mek zinga mi ni ngei tur Sukte ruang pakhat hi an hmu a; chulai hmun chu tlinghlum ngaw tawntirh a ni tawh nghe nghe a. Chupa chuan hliam leh dik lohna a nei lo va, a hmel chu hlau thlabar hmel hian a khat thung a, a lo thi meng kur mai a, a mit meng reng reng chu- a thih dawnin thil rapthlak tak a hmu a ni ang tih hriat takin hlauhna hi a hmuh theih a, a thi kawm ngul a, a kut chu a phar kâk hûang mai bawk a.
Val upa Mengrima chuan an mi umte sulhnu chu a han en vang vang a, "Khai aw, naute u, kan mi umte hian tlinghlum ngaw ril lam an pan zel mai; hlauhawm tawng turin inpeih rawh u. Kan hmelmate leh kan mi leh sa an mante hi huaiin a hruai kawi pawh a ni maithei, thil awm dan hi a dik zat lo tlat mai," a han ti a.
Chawl muang lovin an um ta zel a. Khua a var a, tukṭhuan atan an chawfun bawk chu a chanve vel an ei ṭheuh a, eng chen nge an thang dawn a hriat loh avangin a chanve dang chu an bawk ṭha leh ṭheuh a. A ṭhen chuan riah chaw fai an mamawh ringin an lo pai tel bawk. Nilengin an um leh a; mahse an um phak thei reng reng lo mai. Khua pawh a lo tlai ta hial a, unau hmel hai a ni chho mai dawn si a, val upa Mengrima chuan riahbûk sual a rawt ta a.
"Riahbûk kan sual mai a ṭhain ka hria. Kan hmelmate um nan kan tha leh tui kan hmang nasa a, kan um phak hunah che tur kan awm lo palh hlauh ang e," tiin Mengrima chuan an tih tur a han hrilh zung zung a.
Riahbûk sual han tih lemah, hmanhmawh taka hmelma um an nih avangin bûk an sa tak tak lem lo va, hmun rem deuh lai chu hai fai deuh nial nualin mut hmun an rem a, meipui chheh ngam a nih loh avangin hmun biru lai, lung pûk zau vak lo phenah mei an chhem a, an sarep pai hem lumin an chaw bâwk ei bang ṭheuh khan an bar leh hawng hawng hlawm a, chumi zawhah mutmu an tuah ta hlawm a.
Val upa Mengrima'n kal zel ti lova riahbûk sual a rawt chhan hi eng dang a ni lo, an kalna hmabak, an riahna aṭanga lo fing hnih velah chuan sihhuai lalpa chenna nia an sawi a awm vang zawk a ni. Zan thilah thil ṭha lovin a tlakbuak hlauhthawn thil avanga kal zel ti lova chawlh rawt a ni a.
Mi dang chu an mu reh ṭhiap tawh a. Kawhtebâwka chu an mei chhemna bulah a ṭhu mi tak run a. A fapa chu a ngaihtuah em em mai a. Zanlai vel a ni tawh awm e- a hah rimtawng chu a lo mu thlu a, eng thil emaw ni, ri deuh huau hian a ti harh a. A harh hlawl chuan a bul lawka pa lianpui hmul dur mai lo ṭhu chu a han hmu nghal a, ani, pasalṭha thinphut zawk nei lo tak pawh a phu ve dawrh mai, a fapa ngaihtuah hle lo se chu hmun dangah a awm(in-teleport) daih ang tih a rinawm.
Mit khap kar lekah chu pa lianpui chu a lo bo leh ta daih a. Kawhtebâwka chu hmuh leh mai tumin a han hawi kual a; mahse a hmu si lo. Chutah, a fapa aw ngei mai hian, "Âpa min chhan rawh, âpa min chhan rawh..." a rawn ti ta mai. Chu aw chu Kawhtebâwka hawi lohna lam zelah a ri mai si a, a lo chhuahna lam hriat tumin a han hawi kual vak vak a, a hnug lam leh hma lamah te, sir lamah te a ri kual chhen mai bawk si. A hawi kual vir nasa lutuk chu a lu a hai a ni ang, kan pasalṭha chu a ke a phet palh a, a tlu pai ta chawn chawn mai a, a puan ven chu perhtein a lo bât a, mei êngah chuan a saruak ta kung mai a!
Chutia a tluk veleh, mei bulah chuan pa lian hmul dur mai kha a rawn ṭhu leh ta hlun mai a. Kawhtebâwka tlu, a puan ven tla bawk si leh a kawhte lang bawk nalh mai chu hmuhsit hmel deuh hian a han nuih vur vur mai a, a rawn chhiatkhum vel a, "I va chhe nawi nawi e awww..." a la ti zui dût dût a, hmusit tih hriat zet hian a nuih zui huah huah bawk a...
A tawp leh ta...😁
Comments