Kha Hmeichhia Kha.
©Chhantea Pautu
Nikum, 2018 kum tir lam kha a ni.
Ṭhian pakhat nen in aṭangin thil ṭul eng emawah kan chhuak vak a. Kan Mizo Novelist zînga ka ngaih san Pu C Lalnunchanga Novel ziah, 'KA MI HUAISEN LEH KA PASALṬHA' tih chu a bu ka la neih loh avangin lehkhabu zawrhna dawr hrang hrang leh Synod Book Room hrang hrangah kan zawng chiam bawk a, neih ngei kha ka duh si a, a vang tawh nasa mai si. Ṭhian pakhatin, CVL BASS lamah an neih a rin thu min hrilh chu bawh zuiin, chu lam chu kan pan ta nghal a.
'VANAPA HALL' hnuaiah lut thlain, Zodin Bus Stand aṭanga Bus chang turin kan chho leh a. Bus Stand kan han thleng chu, hmeichhia, tleirawl a ni mah zawk ang, la naupan hmel tak, nu lian lo, ngo paw vang mai, lukhum hmathlawk khum, zahzum hmel zeta a thil khai, rih ve hmel tak nena Bus lo chang hi ka va hmu ta a.
Ka han en chîang a, ka en chîang ngun telh telh a, ka en chîang ka en chîang ta mai a. Ka mit chu ka la sawn hleithei tawh tlat lo; ka lerh loh tehlul nen, khami ṭuma khatianga ka awm kha mak pawh ka inti ve deuh hle. Amah chu cher lam lek lek, cher chhia ni si lo hi a ni. A lukhum khum lai chu a inhmeh takzet a, amaha ngo fai veng a, min hiptu tak pakhat chu, zahzum hmel tak leh ngawichawi tak, nu zêm mai a nihna kha a ni; ka sawi thiam danin, ka duh zawng tak ang chi, hmel ṭha tia han sawi hluai tur aia a duhawmna zawk khan min hîp ni berin ka hria.
Bus chang chu an ṭhahnem hle a, mi karah a ding ve a, a thil khai pakhat leh leia a dah, a thil khai tur tho niawm tak chu a rih hmel hle a. Bus a lo thleng a, mite chuan luh hmasak loh hlauin Bus kawngka lam an pan a, an innek buai lek lek a. Bus-a lawn ve tur tho kan ni na a, hmeichhia chu ka mitmei ru reng a, chuhhelh taka Bus-a luh tumte chuan ani luh tum ve bawk, thil rit khâi bawk si chu an nek buai deuh a ni tih ka va hmu a, a tân Bus-a luh a harsat phah a ni. Chutah, hmanhmawh takin Bus hma lam kawngkhara luh tum tawh khan, a hnung lam kawngkhar chu ka va pan ta a, a thil khai chu ngawi rengin ka laksak a, amah nektu mi dangte chu ka han nêk lui ve nghal ngat a, Bus kawngka awl zawk lai chuan, "Lut rawh," ka han ti sap a.
Ani chuan mak tih hmel deuh tak hian min han en zawk a, ngawi rengin a lut ve ta mai bawk a. Bus-ah chuan ka lut hmasa a, Bus laihawl vela ṭhutna awl la awm chu ka va hmu vat a, chu ṭhutna awl hauh tur chuan ka pan hnai vat a, mi dang tana ṭhut mai a rem loh nan ka taksa pawh ka her rem nghal a. Hmeichhia kha ka han mitmei a, "Tah hian ṭhu rawh," ka han ti leh sap a. Ani chu a la ṭawng lo. Ngawi rengin a ṭhu ve mai a, mi a rawn melh leh zawk a, a nui lo va, a tûm chuang lo bawk. Kei chu a ṭhutna bulah chuan ka ding ve nghal a, a thil ka khaisak chu a ṭhutna bula nghatin ka vensak zui nghal bawk.
Ka be zui vak bik lem lo va, khawia kal tur nge a nih tih chiah ka zawt a. Amah chu hmuhnawm ka tih em avangin ka en leh zauh ṭhin a, a awm dan chuan hmeichhe lepchiah leh lerh a ni lo tih a lantir a. Zahzum hmel deuh hian ṭha takin a ṭhu mai a, lawm thu mi han hrilh emaw pawh a tum chuang lem lo. Ka en leh ṭhin tih a hre ve reng a, a zak tih kei pawhin ka hre ve reng bawk; mahse ka en lo thei lo.
A zak chuan a hmaa ṭhutna tuamna puan chu a pawt a pawt a, ka nuih a za deuh a, "Pawt pawt suh, i pawt thler ang e," tiin ka han fiam a. Ani chuan zah hmel zet hian a kut a la lêt rang hle a, a kut la let rang lutuk leh a zak hmel ka hmuh chuan ka nui ringawt a; mahse, ngam loh pakhat ka nei ve ta, a Phone No. ka dil ngam miah lo. Khatianga huangtau khan hmeichhia hi ka la hnaih ngai tlat lo va, a Phone No. han dil em kha chu ka ngam tlat lo a ni.
Zarkawt Bus Stand kan thleng a, keini ṭhian dun chu kan chhuk ta. Kan chhuk dawn chuan, "A nih aw," ka han ti hram a. Ani chuan min chhang lo, mak tih hmel tak leh pawi sawi lo hmel lutuk chung hian min en hâ ringawt a. Kan chhuk hnu chuan kawng hnuai pawh thlakna step-ah kan kal thla ta a. Chumi step sir maia CVL BASS la awm lai, tuna an awmnaa an insawn hma kha a ni a.
CVL BASS dawr chhungah chuan kan han lut a, Pu Taitea lehkhabu 'KA MI HUAISEN LEH KA PASALṬHA' tih chu an neih leh neih loh kan han zawt a, an lo nei ta ngei a. Lehkhabu kan lei zawh chuan a Phone No. ka dil lo chu pawi ka ti thar ta thut a, kawng hnuai aṭanga tlanin a chuanna Bus te kha Chanmari kawna tlan khalh hman ka inbeisei deuh thut thut a, thui vak lo chu ka tlan hman nghe nghe a ni.
Mahse, ka ṭhianpa, thil dang tih tur la nei, hmanhmawh bawk si chuan, "A ho eee mai, i tlan khalh hman tawh chuang lo vang," a lo ti a. Bus-a kan chuan laia a Phone No. ka dil ngam lo chu nep hi min han ti khawp mai a. A dik taka sawi chuan Pu Taitea lehkhabu kha lei loh ka hlau em em a, kha khan ka rilru a pawt pêng ve deuh bawk a ni.
Kha hmeichhia kha ka hmu leh tawh reng reng lo va, ka zawh chhuah chhun chu Zemabawka kal tur a nih thu chiah kha a ni. Hmeichhe thau tak leh hnute lian ngawt hian ka mit hi an la ve ngai vak lo va, an nu tè a nih pawhin, pian fel fai tak, nu te pian thiam an tih ang chi hian ka mit an la ṭhin. Ani tè pawh kha chutiang chu a ni a, a ngo paw vang a, a mitmeng leh hmelah khan pawi sawi lo hmel tak leh thianghlimna a lang thei a ni. A ngawi chawi a, a zakzum a, a lerh lo tih kha a lang thei bawk.
Kan Bus chuan chhûng khan lehkhabu leh ani khan ka rilru an inluah ṭawm a, lehkhabu lei loh hlau tak chungin ka thinlung mit latu hmeichhia ka hmu a ni ber awm e. Hre chiang lovin ka kalsan a, ka damchhung hian ka hmu leh tawh kher lo vang.
Adios Seniorita!
My am da Chhantea Pautu a.k.a Lone Wolf
Comments