SANGU LUI RUAMAH
Muanawma: The Lone Investigator
(Detective Story)
©hhantea Pautu
Bung 2 Na
Muanawma'n a chhui ruk, 'THE JUDGES' intite, pawi khawihnaa an inrawlh dan hi mi tlemte chauhin an hria a,
Sawrkar lam Police pathum vel leh Muanawma an ni deuh mai a, an chet dan chhuidawn thei phei chu Muanawma chiah hi a ni. Kum 2016 December thla khan Aizawl veng pakhata hmun chengker takah hmeichhia, la naupang tak pakhat ruang chhar a ni a, he ruang hi mitthi dahna hmunah Muanawma'n SI Zodinsanga'n a rawn sawm avangin a en ve nghe nghe a; mahse, a chhui zui thu eng mah Muanawma hian a sawi lo.
SI Zodinsanga hian Muanawma thil tawn kha a hre chiang ve hle a, a farnute pahnih pawh a hmu ve fo a. Kimkimi phei kha chu tleirawl fel tak leh ṭawng duh, lawmawm zet mai a nih avangin tu pawh khan an ngaina a, chu hmeichhe ruang an chhar pawh chu SI Zodinsanga'n Kimkimi a ang ema a hriat avangin, a nih leh nih loh finfiah turin Muanawma hi a sâwm a ni. Kimkimi ruang chu a lo ni lo a ni ang, Muanawma hian ruang a en zawhah a farnu a nih loh thu ṭawngkam tam lo taka sawiin mitthi dahna hmun aṭangin a chhuak nghal daih a ni awm e; a hnu-ah pawh thil dang reng reng a sawi zui leh tawh chuang lo.
Vawikhat chu SI Zodinsanga hian chumi ṭuma Muanawma khawsa zia mak sak zet chu min hrilh a. He ka ṭhianpa hi a hriat thiam vak loh châng a awm thu a sawi nghe nghe; chumi ṭuma hmeichhe ruang an en fiah chuan, Muanawma chuan a farnu Kimkimi chu ang a ti ve hle a ni awm e. SI Zodinsanga'n, "A hmel danglam nghal vek mai chu ka lo hmu a," tiin min hrilh a ni.
Muanawma chu hmeichhe ruang en chuan che lék lo hian a ding reng mai a; chutianga minute 10 vel lai a awm hnu-ah, rang deuh vut hian a Jacket a phelh sawk sawk a, SI Zodinsanga chu kentirin hmeichhe ruang chu a pan a. Doctor ten ruang an en dik vek tawh hnu, a ruang pawh thawmhnaw an haktira an khuh ṭhat leh thlap tawh hnu-a en ve leh hnuhnawh a ni a; mahse, Muanawma chuan a khuhna puan leh thawmhnaw chu a kéu ṭhet sawk sawk a, chu hmeichhia, nunna pawh nei tawh lo âwm bawr chu zau hek hawk hian a keu lang ta mai a ni awm e. Chutah, hmeichhe ruang hnute chu hnai zetah a han bih a, a khawih ta mai a! A duh tawka a en zawhah SI Zodinsanga hnenah chuan, "Kimkimi a ni miah lo," tih chauh sawiin a Jacket chu a la a, ngawi rengin a chhuak zui nghal mai a ni awm e.
Ka inbual pah chuan chu'ng vel chu ka ngaihtuah let a, tunah hian eng thil emaw hriat a nei a nih ka ring; a chhan chu, hmanni khan an khuaa zin turin min rawn sawm ringawt a, Dintei ka sùn avanga ka nun nguai leh bet lutuk chu zin khawthawn ka mamawh a rin thu a rawn sawi pah a, kei lahin chu chu mamawh hle a ka inhriat bawk avangin ìhè lovin a sawmna chu aw ka pawh a, lirthei chuan huphurh hle mah ila, a rang lamin ka zin ta a nih hi.
Mak ka tih em em chu, Muanawma'n min rawn biaka an khuaa zin tura min sawm leh, amah kaihhnawih thil mumanga ka man nawn fo lai a innang tlat mai chu a ni. Ka mumang chu in hriat tawh kha, bung hmasa lama kan sawi tawh, thil thleng kha a ni e.
Ka inbual zo chu ṭhut khawmna pindanah ka lut phei a, Muanawma a pindan aṭanga a chhuk thla chu ṭhut khawmna pindanah a lo ṭhu ve tawh bawk a. Ṭhut khawmna pindan ka va luh chuan Dawnkan phénah thil eng emaw hi ngunthluk zetin a lo bih vung vung mai a. Min han hmuh chuan min lo nuih deuh suk a, chutah ka thawmhnaw leh Bag vel a han hmuh chuan, "E hee, hei chu kan la dah fel lo a nih hi. Lo ṭhu rawh, thingpui lum pahin i Bag vel hi i pindanah ka'n dah nghal ang e. Tete-i lah i inbual hlan khan a lo haw tawh si a," a ti zung zung a, a tho ta nghal a.
Muanawma che vel chu mak ti deuh mai hian ka en zui hé háw a, ama chezia leh khawsak phung hrim hrim mak ka ti tihna lam pawh a ni lo, helai ka thlen hma leh thlen hnu-a ka mumang neih teh fo avang zawk khan mak ka ti a ni.
Ṭhut khawmna pindana a rawn luh leh chuan thingpui no hnih hi a rawn chaâwi lut a, mak tiin ka lo la ngawi vung vung a. Kan ṭhut fela thingpui no kan han dawm dun hnu chuan thlalak pakhat hi a rawn lek chhuak va va a, "He thlalak hi SI Zodinsanga min rawn thawn a ni, kha, mipa pakhat pawh a lan tel nghe nghe kha. Chuan, hei hi Kimkimi thlalak hnuhnung lam, an chet sual hmaa ka neih thar ber a nih kha, han en tawn ve chhin teh," a han ti a.
Chutianga a han ṭawng phei chu, mak hi ka ti tulh tulh a, ṭawng nachang pawh ka hre lo! Chuti chung chuan thlalak pahnih chu ka han en tawn vel a, thlalak pahniha hmeichhiate chu an inang hle mai, mi thuhmun an ni ngei ang tih rin a harsa hauh lo va. Thlalak pakhata lang ve mipa chu nawr lirh theih ṭhuthlengah hian a ṭhu a, a hmeichhia zawk chu Muanawma nau Kimkimi ai chuan a lang upa deuh zawk tih chauh lo chu mi thuhmun an nih loh han rin ngaihna vak a awm miah lo.
Ka la ngawi reng a. Ka mak tihna reh lo chuan min la thunun hle mai. Thlalak chu dawhkanah ka dah thla a, Muaanawma lam chu ka han hawi a; ani chuan ngun deuh mai hian min lo en reng chu niin, "I hmel leh awm dan a va danglam ve, eng thil mak nge thleng?" mi lo ti ta chat a.
Ka awm dan a rawn man ta chat mai chuan min han ti hamhaih hle phawt a, chutah, ngaihtuah chiang mang lo hian, "Hei hi a thleng tawh," ka han ti ngawt a.
Muanawma chu a ngawi vang vang phawt a, "Eng maw thleng tawh chu?" a han ti a, a nui deuh niin ka hre hial a.
Kei chuan, sawi chhuah ka duh loh ka sawi chhuak ṭan der a nih tih ka inman vat a, bah deuh niaih hian, "Eng lo...eng...eng vak mah...hei hi i nau ni theiin i hre deuh em ni?" ka han ti ta ngawt a.
Muanawma chu a nui var var phawt a, "Min hrilh hun chu i la nei khawp ang mawle," a han ti te te a. "Tak takin, kha thlalak kha SI Zodinsanga'n Lunglei lama a ṭhianpa hnen aṭanga a neih a ni awm e, Kimkimi a an em avangin min rawn hriattir ta vat a. A àwm lo lem lo, Pu Dinsanga hian Kimkimi a la dam ka rin thu hi a hre ve tlat a ni," a han ti a.
Kei chuan, "Kimkimi a nih i ring ve tihna a ni em?" ka lo ti a.
"Ka hre lo. An inang mah mah chu a nia lawm; mahse, hmel inang palh hi chu an awm ve tho bawk a. Kimkimi a ni nge ni lo tih hre tur chuan fianrialah, khum awmnaah ka phelh ruah a ngai ang," Muanawma chuan a han ti leh a.
Keia mak tihna pawh chu a pung tulh tulh; ka mak ti hmel hmuh hmaih hlek lotu Muanawma chu a nui suk a, "Mak i lo ti deuh a ni maw? Kimkimi khan a hnute vei lam hnuai lamah khuavang a nei alawm, chu chu amah a nih leh nih loh ka fiah theihna tur ber a ni," a lo ti ta vat a.
A farnu phelh-ruah a ngaih tur thu a sawi avanga mak ti ka ni lo tih lah chu a hre chai si lo; mak ka tih zawk chu, tuna thil thlen dan leh kan inkawm dan hi ka mumang ang deuh chiah a nih vang zawk a ni. Ka ngaihtuahna chu a kal thui vawng vawng hle mai a, ka mumang, Lunglei khawpuia Hotel pakhata thil thlengte lam lam kha ka ngaihtuah kâi nghal a. Chutia ka inngaihtuah buai vung vung lai chuan Muanawma chuan mi rawn be leh ta a.
"Chhante, ka sawi chu i hria em?" tiin mi rawn khawih zeuh a.
Kei chuan, "Eng maw?" ka lo ti hû a.
Thu tak hmêl deuh pu chung hian min han en vang vang a, "Thlalaka mipa kha lirtheia a chet sualna lamah khati khan a awm ta a nih kha. Tichuan, a boral a, a thih danah a chhungte ngaih a ṭhat loh avangin FIR an theh lut a, chu thu buai chu Pu Dinsanga ṭhianpain a khawih dawn a ni. Tichuan, Pu Dinsanga hmalakna azarah keini hi kan va inrawlh ve deuh dawn a ang. Thûk taka inrawlh erawh ka tum lo va, he hmeichhia hi tu nge a nih tih ka hre duh chauh zawk a ni," tiin Dawhkana thlalak chu a han en nawn lehnghal a.
Kei chu ka ngawi reng a, chutah thil hriat chhuah thut ka nei ta a, "Kan zin dawn em ni?" ka han ti hnuhnawh leh hlut a.
"Aw zin dawn," Muanawma chuan a lo ti mai a.
"Khawiah nge?" tiin ka han zawt leh a.
"Lunglei District lamah; mahse kan kalna tur tak khua chu sawi chhuah loh a ṭha ang, nang pawhin thup ang che," Muanawma chuan a lo ti leh mai a.
Kei chu ka ngawi leh ta vung vung a. 'Lunglei District...' ka rilruin ka ti a, hei pawh hi a thleng tawh chiang a ni! Chutah, "Eng tikah nge kan chhuah dawn?" ka han ti leh hlut a.
Muanawma chuan, "Vawiin hi Thawhṭan a ni a, ka ruahman dan chuan naktuk Thawhleh nî hian chhuak zui nghal mai ila ṭha ka ti a; mahse kha, i awm dan kha, ka duh hran lo, i chau deuh a nih ka ring," tiin a han ngawi deuh vang vang a, "Ninganî zîngkarah chhuah kan tum dawn nia," a ti ta a.
Ningani zîngkarah maw? A va mak lehzel em!
Chaw kan ei lai te chuan ka ngawi run run a, Muanawma chuan min be buai duh lem lo a ni ang, ka biak loh chuan a ngawi ve reng mai a, ka lakah a ngai te tein a la dawh thei zui zel a. Zanah chuan kan mu hma hle a, kei phei chu ka muhil thuai nghe nghe a. Ka muthilh apiangin ka mumang ngai bawk kha ka nei leh ṭhin a; mahse hemi zan hi chuan tlemin a dang deuh thung. A danglamna chu ka mumang ngai mang tho mah ila, a hma maia a taka thleng tawh chin hnulam zel aṭang khan ka hmu tawh thung; a awmzia chu ka mumanga ka lo hmuh tawh, a taka thleng zui chin zel kha chu ka mumangah pawh ka hmu ta lo tihna a ni. A taka a thlen tawh vang te pawh a ni maithei.
Ka muthilha mumang ka neih avanga ka han harh hmasak ber chuan ka khum bulah Muanawma chu a lo ding reng a, khum mawng lama bang ngheng chuan a ding a, a kut kuangkuahin ngun zet hian min lo en reng a. Ka han harh a, ka ṭhu chhuak chu tui mi lo pe vat a, kei chuan ka in ta khawlh khawlh a. Ka ngawi reng a, ka awm chu a nuam chiah lo hle mai lehnghal.
Muanawma chuan dam dap hian, "Ka hming hi i lam fo mai a, min ko vak vak a, i mumangah eng nge i hmuh min han hrilh teh," a ti ta chiah a.
Ka sawi duh lo a ni. A dik tak chuan sawi ka duh lo a ni ber.
Muanawma bulah chuan, "Ka ṭha nia, mumang ka neih àwm pawh ka hre lo, i hming ka lo lam a nih chuan ka ṭawngvai satliah a nih dawn chu, tunlai chu ka ngai deuh che a ni ang," tiin ka han nui lui ngial a, ka nuih erawh a za lo kher asin.
Muanawma chuan, "I chau viau a nih dawn kha," a ti ṭha ve ta mai a, ka pindan chu a chhuahsan zui ta a ni.
Chumi zan chuan tlem te te tam deuh ka muhil a, khua a var meuh chuan ka mut kham lo mitmeng chu Chawke Ni rui an sawi ang mai hian a sen rûm a. Ka sam chu a kir lo; mahse a kawi. A kawi a kawi chuan a pheng chuap mai a, keimah hrim hrim chu ka hlui chul rup a ni ber e.
Second a liam a, minute a kal a, darkar a liam bek bek a, Ningani zingkar hma takah Muanawma chuan min rawn kai tho a, zin tur chuan kan inbuatsaih ta nghal a ni. A hma zanin Muanawma chuan min ngaihtuah avangin, "Kan kal rih lo mai dawn em ni?" a ti a; mahse keiin ṭhulh ka duh tlat loh avangin zanah chuan kan zin thawmhnaw tur kan siam lawk nghal vek tawh nghe nghe.
Zingkar boruak chu a thîang vawr vawr hle mai. Mak takin chhum erawh a zîng chuai a. Muanawma nen chuan kan inbe tlem hle a. Nî a rawn chhuah hnu-ah erawh chhum zin avanga khaw awm dan ti deuh churh chu veng hawk hian ka hria a. Hmuifang tlang kan thlen chuan chawlh ka rawt a, kan han chawl chu a nuam hle mai, Ni chhuakin a chhun raih avangin Hmuifang tlang chu a mawi zual hle a, Muanawma pawhin nuam a ti ve hle tih ka hre thei. Hmuifang tlang leh Pu Thanhawla hming lama thil a sawi lai chuan kha ka mumang bawk kha ka mithlaah a rawn lang ve nghal a. Darkar chanve vel kan chawlh hnu-ah kan inkhalh chhuak leh ta a. Hmuifang tlang kan pelh hnu chuan kan titi pawh a kal ve ta deuh hlek a.
Lunglei kan thlen chuan a la tlai chhe hran lo khawp a, Muanawma chuan Hotel lam pan mai ṭha a tih avangin, a hriat sa Hotel chu min panpui nghal a. Kan innghahna tur Hotel kan han thlen a, chu Hotel ka han hmuh chuan ka mumang bawk kha rilru-ah a lo lang ve leh nghal vat a, "A thleng dik dawn a ni ang," ka han ti sap a. Hetih lai hian Muanawma chuan Hotel Recieptionist bulah kan pindan luah tur vel a tih fel avangin ka phun ri chu a hre lo va. Kan pindan luah tur kan han luh chuan ka mumang chu ka han mithla leh a, ka awm a nuam thei ta reng reng lo.
Kan indah fel a, Muanawma chu ngawi rengin a va inbual nghal sur sur a, a inbual zawh chuan thawmhnaw a ha nghal sawk sawk a, chhuah tumin pindan kawngka lam chu a pan zui nghal a. Chutih lai chuan ka mumang khan min chiah hneh em avangin Muanawma chezia chu ka lo thlir ru reng a, chhuah tuma kawngkhar a han hawng tur chu, "Chhuak suh," ka han ti ta ṭhat a.
Muanawma chu a rawn hawi let a, "Ngati maw, Chhante? Thil tih tur ka nei alawm," a han ti a, mak a tih ve hmel hle.
Kei chuan chhàn mai dan tur ka hre leh chai chuang si lo, ka mumang kha ka hrilh chuan, a ho a tih ka hlau bawk si. Tih ngaihna hre lovin ka inngaihtuah buai a, kal chhuak lo se ka duh bawk si, ka mumang ka hrilh duh bawk si lo, a thleng dik ang tih ka hlau bawk si. Ka tihngaihna hre lo chuan, "Ka ngaih a ṭha thei tlat lo, vawiin leh zanin chu pindanah hian tawm ve rih phawt ang," ka ti ta ngawt a.
Muanawma chuan min en vang vang ringawt a. A lan dan chuan, ka ngaihtuahna zawng zawng hriat vek tuma min zir hi a ang ber mai. Kan thlen tlai chuan a chhuak ta lo.
Zan a lo ni a, Muanawma chu hma takah a mu a, a muhil thuai nghe nghe. Kei erawh ka harh chiang tawlh tawlh a, ka ngaihtuahnaah chuan ka mumang ringawt mai chu a awm a, a thleng dik tak tak dawn ni hian ka hre tlat mai a. Ka chau ve hle na a, Zawlnei Daniela'n, "Ka taksa chhûngah hian ka rilru a lungngai a, ka lu-a inlârnate chuan mi ti buai a ni." a tih ang maiin, ka mumang chuan min ti buai a ni ber e. A tâwpah chuan ka chau thlu ngang a ni ang, ka lo muhil ve ta nge nge a. Ka han harh meuh chuan khua a lo var iarh tawh a. Muanawma mutna lam chu ka han en a, a lo awm tawh hlek lo mai. Ka mumang avang bawk chuan ka han inngaihtuah phili dawn viau hman a; mahse chutih lai chuan Muanawma chu a rawn lut ta hlauh a.
"Chhante, kan Lalpa Isua Krista hun lai ni lo, tunlai khawvelah hian mitthi tho leh an sawi ṭhin hi i ring lo tiraw kha?" min han ti ngawt a.
"Ka hre nang," ka lo ti ringawt a. "Chutiang an awm i tihna em ni?" ka ti hû a.
"Ramnunthara kha rawn tho leh ta se mak i ti viau ang em?" tiin min han zawt leh a.
Ka inngaihtuah vung vung a, a tir chuan a sawi awmzia ka man mai lo va, ka inngaihtuah harh hnu-ah pawh eng nge sawi a tum chu ka la hre chuang miah lo. Mahse, "Nizan i chhuak elo, eng nge hriat i neih a?" ka han ti thla ta ngawt a.
Muanawma chu pindan aṭangin a lo chhuak leh daih tawh a. Peih lo zetin ka tho ṭuah ṭuah a, ka hmai ka phih laiin a rawn lut leh a. Nizan khan 2:00am vel thleng ka meng a, a hnu-ah ka lo muhil ve ta a ni ang. Ka muthilh hma kha chuan Muanawma chu tui taka muhil ni mai hian a lang a, ka ngaih ṭhat lohna avanga a chhuah tum a ṭhulh ringawt pawh chu ka lawm tawk a tling a, ka mumang duhawm lo zet kha a chunga a thlen dik mai ka hlauhna chuan min uai rit em em reng a, thleng dik turin ka duh miah lo a ni.
Muanawma rawn lut chuan, "Chaw ka lam tawh a, ei fel vat ila, darkua a ri ṭep tawh a nih hi," a rawn ti a.
"Thawh hlima chaw ei chu a va peihawm loh ve," ka lo ti bal bal a.
"I men chen tho ka meng a; ka men chen pawh i meng ve der bawk si lo. Inphih fai mai mai teh," a ti a, a ni chu chhawng hnuai lamah a kal thla ta nghal a.
Kei chu ka la muangchang hle, ka taksa te chu a sil ṭhum a, ka pang a kham ngawih ngawih a, muhil hlek ila mumangin min ti buai reng mai bawk si. Zawi zetin ka chhuk thla ve ta a, chaw ei dawhkan ka zuk kil ve meuh chuan chaw a lo bar mawlh mawlh tawh a.
"Pu Dinsanga nen kan inbe zo deuh chauh a, vawiin chu SI patuai, Pu Remlalfaka kan va hmu dawn a nih chu," Muanawma chuan a lo ti a.
"Police Station-ah maw?" ka han ti leh hê hâw a.
"Ni lo, anmahni Inah, vawiin hi a duty dawn lo a ni; a nihna takah chuan Ramnunthara Case vang hian Station lamah a tam vak loin an sawi. Police dul kiar tak, mi sual umtu atana îtawm loh tak a nih ve loh ring phawt ang," Muanawma chuan a han ti duah a.
A thu sawi chu ka ngaihtuah chhunzawm a, Mizoram Police-te fitness âwm ang tur ka han ngaihruat a, mi sual um ngai awm ta se, kan Police tam tak hi chu an tlan thei lo ve ngawt chuan ka ring. Mahse tunah chuan ṭhalai lamin fitness an ngai pawimawh tawh a, Aizawl City Police-te pawh an zahpuiawm tawh lo.
Ka ngawih vung vung lai chuan, "I rilru-a Police dul kiar i mitthla theih nana sawi pawh ka ni chuang lo a nia," Muanawma chuan a rawn ti khauh a.
Kei chu ka lo nui ringawt a. Hepa hian mi rilru chhiar a, mi ngaihtuahna chhuidawn dik hi a harsat vak lo.
"Nakkinah chuan ṭhalai fit tak takin, heng kan Police mawng rit tak tak, a ṭhen phei chu tlin leh tlâk vang pawh ni lo, Political fitness vang liau liaua tlingte hi an la rawn thlak vek mai ang. Dingdihlipin san zawng tehna an pal tlang a ni ber e," a han ti leh duah a.
"Nang pawh i san vak tehchiam loh hi mawle," ka lo ti a, ka nui vei sun sun a.
"Fiamthu te chu i thawh ve deuh a ni maw? Thinlung hi a pawimawh a nia," a lo ti fuk a. A hnu deuhah, nui var var pahin, "Kan dingdihlip ar ar ang a, Minister lehkha kan neih theih chuan Written test pal tlang lo pawhin kan tling ve thei mai ang," a han ti leh a.
Muanawma hian kan Ram leh Hnam hi a vei a, a thu sawi dikzia hi tuna a chhiar mektu pawh hian i haiin ka ring lo. A Mizona hi a humhalh hle bawk.
"Vawiin chu keimahin ka va kal mai ang chu, Hotelah hian inkhungin lo mu hahdam zawk ta che," tiin, ka ngaih dan ngaichang chungin min han en a.
"Aih. Ka kal ve dawn," ka lo ti kawh ṭun a. "Eng tik nge Lunglei hi kan chhuahsan ang," ka tih zawm a.
"A hunah kan la sawi dawn nia," tih pahin a tho a, inchung lama kan pindanah min chhohsan nghal daih a.
* * * * * * *
Ka rin aiin Lunglei chu a nuam. Kan mi hmuh tumte In chu Hotel aṭangin a lo hla fé mai, a awmna a lo thlaler hle mai bawk. Kan han lut a, Hmeichhe pakhat, hmel ṭha fé mai hian kawngkhar min lo hawn a, Muanawma'n tawi fel taka kan kal chhan a sawi hnu-ah ṭhutna min kawh hmuhah chuan kan han ṭhu a, hmeichhia chu inchung lamah a chho ta nghal a.
Minute sawm vel kan nghah hnu-ah inchung lam aṭang chuan pa pakhat, kum 36 mi awm vel hi a lo chhuk a, pa thau lam deuh a ni na a, a dul chu a kiar lo ve teh mial a. Muanawma hnena Pu Dinsanga'n a sawi dan chuan Pu Remlalfaka hi a SI na a la rei lo a ni awm e. Tuna Ramnunthara Case pawh hi amaha Case a lak vawithumna chauh a nih hmel nghe nghe a.
Eng nge kan duh tih leh eng vanga rawn lêng nge kan nih chu min han zawt thum chhuk a. Ka rin aiin a aw a lian daih mai. Muanawma chuan kan kal chhan chu tawitea sawiin a han inhmel hriattir a,
Chu Police SI chu a bu deuh nghut a, "Tikhan min lo nghak lawk teh u, ka han inphih fai lawk ang e, nizan ka meng rim deuh a, ka tho lawk peih ta lo a ni," tih pahin tui dehna lam chu a pan nghal a.
"Eng angin nge i hmuh?" tiin Muanawma chuan min han zawt sap a.
Muanawma thil min zawh chu ka beisei loh lam daih a ni. "Ka hre lo, a dul chu a kiar ve lo a nih kha," ka lo ti ringawt a.
"Lo chîk ve phawt mai la," a han ti leh sap a.
SI Remlalfaka chu a rawn phei leh a, kan hma ṭhuthlenga ṭhuin Muanawma chu a han en bik a, "In rawn kalchhan lam kan sawi nghal mai dawn em ni?" a han ti a.
Muanawma chuan zahder tak hian, "Pu Fak, he thlalâk hi Pu Dinsanga'n i hnen aṭanga a lak niin a sawi a, he thlalâka hmeichhia hi a chanchin dang i hriat leh hriat loh min hrilh thei la ka lawm ngawt ang," a han ti a, a thlalâk phawrh chu a pe nghal a.
Chupa chuan thlalâk chu a thlék vung vung a, "Chu chu i tan eng nge a pawimawhna min hrilh thei em?" a han ti hmuk a.
Muanawma chu a ṭawng lawk lo va.
SI pa bawk chuan, "SI Dinsanga khan he thlalâk hi min dil a, min dil chhan lam pawh ka lo ngaihtuah lo, thawhpuite an nih avangin ka pe mai a ni. Tunah i kutah a lo awm leh daih mai bawk si a," a han ti leh a. Lawm lo hmel te chu a pu ta lek lek zawk a.
Muanawma chuan, "Kha hmeichhia kha ka farnu bo ta a ni maithei a, a ni lo maithei bawk," a han ti nghat a. A ngawih deuh hnu-ah, "A awmna chin leh thangna chin ka hre duh mai a ni," a tih zawm a.
"Chu, he hmeichhia buaipui tur ngawt hian em ni in lo kal?" SI chuan a ti leh nghut a.
Muanawma chuan, "Aw ni e," a lo ti ve leh mai a.
"Ehh! SI Dinsanga sawi dan nen a va inpersan ta ve!" SI chuan a lo ti leh nghut a.
Muanawma chu a ngawi ta vang vang a, a hnu deuhah chuan, "Pu Fak, Pu Dinsanga chuan eng ang pawhin lo sawi ni se la, Lungleiah hian ka farnu, hman kuma bo ta chanchin ngaihven tura lo kal ka ni," a ti ta a.
SI chuan, "Pu Dinsanga chuan Private Detective niin a sawi che a, ka Case khawih laiah min puih theih a beisei thu a sawi asin," a han ti a. A hnu-ah, "Puih ka ngaihna em em phei chu ka hre rih hran lo," a han ti leh kher a.
A ṭawng dan teh kher chu ka lo run hle a.
Muanawma chuan, "Pu Fak, he hmeichhe chanchin min hrilh tur i hriat si loh chuan kan kal ang e. Private Detective ka ni lo va, i Case-ah pawh puih i ngaih lem loh phei chuan kan puih ngawtna tur chhan che a awm lem hleinem," a ti ve hmak a, a ṭhu chu a ding chhuak phat a, kawngkhar lam chu a pan ta nghal a, keiin ngawi rengin ka zui ve nghal bawk. Muanawma chét dan leh awm dan chu ṭha hi ka lo ti khawp mai a.
An In kan chhuahsan hnu, kan inkhalh thui deuh hnu chuan Muanawma chu a nui ta hawk hawk a. A nuih chhan ka han zawh chuan- duan sa emaw, zawm tur awm sa(protocol) emaw awm thlip thlep hnuaia hnathawh a peih ve loh thu-in min chhang ringawt a. Kimkimi chanchin ngaihven tur chauha kal kan nih leh nih loh ka han zawt leh a, a ngawi ta reng a.
A hnu fêah, "Dawt ka sawi a nih kha," a han ti a.
Min chhang har ka ti hle. "Chu, Ramnunthara chungchang chu i chhui dawn em ni?" tiin ka han zawt a.
"Aw. Kha SI pa ai khan kan chhui chhuak hmasa bawk ang," a han ti nghat a. A hmel chu a tak ngal mai a.
"THE JUDGES an inrawlh i ring em?" ka han ti vei nulh a.
"Thlalâka hmeichhia kha Kimkimi a nih chuan...aw, an inrawlh ngei ang," a lo ti mai a. "Nangin, Private Detective angin min ngai em?" tiin min han zawt thut a.
Ka chhan dan turah ka han inngaihtuah buai deuh a, a hnu-ah, "I ni chu a ni ber alawm," ka ti ta a.
Muanawma chuan, "Ka ni lo. Nih pawh ka duh lo, anni ho nen chuan kan danglam daih. He thil hi ei zawn nana hman tum ka ni lo, anni ho chuan sum pe tam theitu apiang an pan loh leh, a pantute hnena sum bithliaha indawrna kalpui ṭhin an ni, ka dem hran lo; mahse, chutiang turin he hna hi ka thawk ve dawn lo. Ka nunna hi suma dahkham turin ka huangtau hran lo ve," a tih hnu chuan a ngawi ta vang vang a.
Nilengin khawi khawiah emaw kan pingpei kual a, tlai thimhlimah kan thlenna Hotel chu kan pan ta chauh a, chaw kan lam a, kan ei khamah pindanah kan inkhung a, Muanawma chuan ngawi rengin eng lehkhabu emaw ni hi a bih ngur ngur a, a Note-book-ah chuan eng thil emaw ni hi a chhinchhiah zauh zauh bawk.
Dar kua vel bawr a ni a. Muanawma chu lehkhabu bihin a la ngawi char char a. Kei chu tukverhah dakin pâwn lam chu ka thlir voh voh a. Dintei avanga ka khawhar hi a reh mawh ang reng khawp mai. Ka hawi kual ka hawi kual a, ka ngaihtuah let a...thingzar, hnam hrui leh Dinte-i pa hmanhmawh taka a lo tlan lai te. Ka inngaihtuah ding lai tak chuan, Hotel kawt zawl chhak deuh kawngpui sira Bolero rawn ding chu ka han hmu a, a chhung aṭang chuan mi pathum hi an rawn chhuak nghal a, pakhat chu Hotel Recieptionist awmna lam panin a kal nghal a, kan pindan hnuai zawnah chuan a lang thei lo zui daih a. Chumi ka han hmuh chuan Muanawma lam ka va hawi phei a, ani chu a lo awm tawh hlek lo.
Ka rilru chuan ka mumang bawk kha ka ngaihtuah kai nghal thuai a, Muanawma chu auin pindan chu ka han fang kual dawn a; fan kual tham phei chu a ni tak tak lo. Chutia ka auh vak vak tâkah chuan Bualpindan aṭangin Muanawma chu lu huh hluamin a rawn dâk a, "Eng nge ni a?" a rawn ti a.
Chutia pindanah a awm tih ka hriat chuan ka thawveng sawt a, amah ka auh chhan chhuanlam siam mai tur ka hriat loh avangin, "Inbual mai mai rawh," ka lo ti ta ngawt a. Ani chu a tlum lut lehnghal a. Kawngkhar lam ka pan vat a, ka kalh ta daih a.
Comments