SANGU LUI RUAMAH
Muanawma: The Lone Investigator
(Detective Story)
Bung 3-Na
Nihnih hnu-ah Lunglei chhuahsanin kan kal tumna khua kan pan a, a khaw hming chu Muanawma'n sawi lan a rem tih loh avangin kan sawi dawn lo a ni. Kan thlen rualin Ramnunthara te In kan pan nghal a, a nu leh pa chuan Muanawma hmel an hmuh chuan, hmuh theihin an hmel a danglam nghal a. Zanah Ramnunthara pindan ṭhinah kan pahnihin kan mu a, Muanawma chuan a farnu leh Ramnunthara inlaichin dan min hrilh ta a ni. Chumi hnu-ah Ramnunthara'n a chanchin a ziahna, hmuh theih awm chhun chu min chhiartir ve a. In chhiar turin ka han chhawp chhuak ve ang e.
* * * * * * *
Hei hi Ramnunthara'n a chanchin a ziah chu a ni.
108 Days With Dove- Part Four
Kha zan thim lunglenthlak taka khatiang thil a thlen tak hnu khan kan inkawp chho ta viau a, kan inkawp dan velah khan thil awm ang lo lutuk leh nuihzatthlak tak tak sawi tur pawh a awm nawk reng a.
Ani han zei reuh zia kha awww...kawp kha a nuam reuh lutuk asin! A chang phei chuan ka kawp pha lo lek lek ni te hian ka hre ṭhin a. Siamtu hian min duhsak bik ni hial te khan ka'n hre thut thut a. Ani kha ka tawng lo vang tih ka hlau, ka tan chuan hringnun zirtirtu ṭha tak a ni.
Khatih hun lai khan Love Letter ziah kha ka'n thiam khawp a! Lungrun em emin ka ziak thiam a, a nuih ver verna turin ka ziak thiam a; tin, a ṭul chuan khawngaihthlak thei ang berin ka insawi thiam bawk. Helai te hi hmeichhe chak lohna lai, mipa tana kar fung ṭha tak a lo ni bawk a. Ka ziak thiam a ni tawp mai a ni...ti ta ngawt i la, ka inngaih dan a ni zawk mah awm e; mahse, a dawngtu tan a dawn a nuamin, a chhiar a nuam tih ka chiang a ni. A chhan chu, Ani khan ama hriat leh chhiar mai duh tawk lo khan a lo tlangzarh ta ṭhin a, amah chauha hriat atan chuan a ui a ni mahna. Insawi theihna pawh ni lovin, eng vangin nge Love Letter ziah kha thiam viaua ka lan le te ka ti mai mai ṭhin a. Ka irawm chhuak pawh ni miah lo, lehkhabu ṭhenkhat aṭanga ka hriat te kha, in ti zei fahrana ka zeh tel ṭhin vang te pawh a ni mai thei. A eng a pawh chu lo ni ta se, Love Letter ziah hi chu thiam emaw thiam lo emaw, huphurh loh a ṭha, tun hnu-a phone a lo chhuah tak atangin Love Letter ziak lo hian sms hmangin kan intext kan intext a, hengte hi ka hua, kan che ṭha ve thei ta reng reng lo mai, thil ṭha lo tak a ni!
Tichuan, ka Love Letter te khan a zir viauin, ka awm dante pawh khan a zir viau a ni ang, ani khan mi dang tute emaw bulah khan, "Min hmangaih lutuk," tiin a lo sawi ṭhin a. A sawinate khan tlawmah khan min lakpui lehling a, "I va'n hmangaih awm em em," te kha an han ti a, kei chu ka lo nui mai a, ka hmangaih ni maw ka ti mai.
Vawikhat chu ani khan, "Ka mumangah ka haw lutuk che," a'n ti ngawt a, a mumangah chuan hmeichhe dang ka lo kawpsan niawm tak a ni. Kha hmeichhia a sawi kha, chhe lo zet mai, amah nena kan inkawp hmaa ka lo 'ARSI' ruk em em ṭhin kha a lo ni a. Amaherawh chu hmeichhe dang han kawp kual vel turin ka 'khaw êng chhaih' a dik zan loh zia te hi chu hria ni se la chuan a khati lo tur, mite angin chhass play ka zei teh chiam lo ka tihna a nia! Chu chu ani pawh kha hre chiang ngat se, a mumangah pawh khan huat enah a en lo tawp ang. A hre lo mai mai a ni.
Thla Thum Leh Ni Sawmpasarih Chiah
Thla 3 leh ni 17. Chu chu ni 108 chiah tihna a ni.
Buaina em em nei lo chuan, "Ka hmangaih che," tih thu chuan min phuar ve mai a; thîkthu tih mai loh chu buaina em em kan nei ngai lo; mahse, eng a ti ta nge maw ni, ani kha ka lak aṭangin a hla ta tial tial mai a. A chhan ka zawng a, ka hre mai si lo. A hma te kha chuan School kal kawngah te, kan haw lam te khan ka banah a rawn vuan a, kan kaldun rel rel a, khua a lum loh chuan a sam ngil zet mai kha a thlah hniang a, khatih lai kha chuan, ṭhiante khan, 'inhmeh' tih thumal hi an sawi zing viau ṭhin.
Ṭumkhat chu Lalṭhiana (A hming tak a ni lo va, hetih hunlaia thian tak takte kan inkohna bik a nia) pui rohin thinrim lo thei lovin min siam a...eng e mmaw min han hrilh mai chu(h)...ka thin hi a rim chiang a sin aw! A va han rim tak em ve leee!!
16, July 2009 kha a ni. Sunday chhuna kan In aṭanga ka chhuak chiah chu, Ani nen chuan kan intawk ta siah mai. Ka thinrim ka insum hram hram a, thin, a chhiata chhe zo vek tan phei chuan insum a har tawp. Kawtah rei tawk kan indin chilh hnu chuan, huana lenpuiah ka sawm a, a duh lo phawt. Leikapuia awmpuiah ka sawm leh a, chu zawng a duh ta hram e.
Kan han ngawidun ta vang vang a, a ṭawng duh hlek lo mai, engmah pawh min zawt duh lo; mahse pawi lo, keimah ka ṭawng dawn alawm!!
"Naktukah i nu leh pate an riak ang em?" ka han ti mawl tawp a
"Ka hre lo," tih chauh hian min chhâng a. A ṭawng bung hi ka ti lutuka ka lungawi lo nasa.
"Naktuk zanah ka rawn kal dawn," ka ti leh tawl a, "Sawi duh ka nei," ka ti mawl leh tawp a.
"Kal lo vang." Chu bak zu ṭawng duh tlat lova mawle!
Kei chuan ka run ngang mai a. Lenpuiah ka sâwm leh a, a duh bawk si lo. A ngawi reng a, lehlam a hawi tlat bawk si. Thinrim hleihtheih pawh a ni lo zawk; mahse ka thinrim lui ve tlat tho bawk. Tichuan, ka thu tiam ka zah em avanga, ka ṭhen hmasak loh tur thu ka'n sawi a. He thu ka sawi lai hi chuan kei ngei pawh inbum ka tum a ni tih, ka hre ve reng. Ani pawh khan ka ṭhen ngam loh avanga chu thu chu sawi ka ni tih a hre chiang dawn lutuk tlat. Kan thil tih duh, kan tih tak tak ngam si loh, ti ngam anga lan ve duh si chuan khatia han intlawhkhalh hmasak kha a ngai tlat alawm.
Chutiang thil a thlen hnu chuan, vawikhat pawh thil a thleng leh a; tichuan, ani kha inhmuhpui atan ka bum chhuak ta alawm. Ka bum chhuah mai loh chuan rawn kal duh dawn hek lo. Luhlul ve tlat. A barakhaih thei ang bera ṭhen tumin ka bum chhuak a ni.
25, July 2009 kha a ni a. Inṭhenna thu sawi tumin kan inhmuhna hmun turah chuan kan kal a; mahse, kan inṭhen lo chiang a sin awww. Kan hun hman dan erawh a hlimawm viau mai si.
Kan inkawp chhung kha a rei lo hle a; mahse khatih chhung lek pawh khan thil engkim a thleng a ni ber mai. Kan pahnih khan chhungte thlim leh pehhel dan kan thiam em em a. Ani khan a chhungte a thlim a, keiin ka chhungte ka thlim bawk a; tichuan, chhungte ve ve thlimin zan rei tawkah khan kan inhmu ṭhin. Chhungte kan bum hnem dun ngawt mai. A hun lai chuan a nuam a ni.
Mahse Mangṭha!
Mite pawh hian hmangaih hmasa ber an nei ṭhin, "Hmangaih hmasa ber chu an theihnghilh theih loh," te hi an ti fo bawk. Kei chuan ka chiang chiah lo.
Ka theihngilh theih loh avanga heng thilte pawh hi ziak ka ni mai thei bawk. A ṭhente chuan hmangaih hmasa ber pasarihna velte an lo nei tawh a, chuti a nih chuan theihnghilh loh tur hi an va han ngah dawn em, te ka ti deuh mai mai ṭhin. Hei, kei pawh hian ka la theihnghilh lo chu a nih hi. Ni e, thil tam tak kha ka la hria a ni.
Ka ngaihzawn ruk em em tawh hnu, a hnena ka la hrilh hma si; min haw lo a ni tih hriat theih tura a mitmeng mawi taka min rawn melh changa ka nun nawm ṭhin zia te kha. Ka duhthu, a hnena ka sawi hnu-a min duh ve thu a sawi te phei kha chuan, khawvel hi a thar ta ser khan ka hria a, kei aia hlim hi an awm bik hian ka ring ngai lo. Thil engkim hi a thar ni vek hian ka hria a; khatih lai kha chuan, thil siamte kha an mawi zual ta ser ṭhin. Chu chu a ni, hmangaihna ṭo ṭantirin mihring nuna nghawng a neih dan chu, a lo rei ta deuh a, ngaiah kan innei ta ṭhin mai pawh a...nupa te pawh hi.
Tichuan, thinlung chuan inhnaih duh mah se la, a rem tawh loh hun a lo thleng ta a, eng emaw dai dangtu bang, kan karah khan a awm ta tlat a.
"Dove, ka hmangaih che tih i hria, kei paw'n min hmangaih tih ka hria asin; mahse, kan awmdun thei tawh si lova tiraw!? Hmana kan awm dan te khan min ti lungleng fo va, ka bula i nuih sen sen lai te, nui rah rah chunga i mitmeng mâwi taka min melh leh ralh ṭhin te, ka âwma i bei hnap hnap ṭhin te kha, ka mitthlain ka hmu ṭhin asin. Ka ngâi ṭhin ngawt mai; mahse...mang,ha...Dove, mangṭha le...!!"
* * * * * * *
Kha kha mak taka thi ta Ramnunthara thil ziah chu a ni. Ka han chhiar zawh chuan Muanawma hnenah, "A thu a va chhum bung ve," ka han ti nghal a.
Ani chuan, "Chhum bung khawp mai, kha 'ani' tia a sawi leh 'Dove' tia a sawi kha Kimkimi nena an inhriat hmaa Ramnunthara bialnu a ni a, hmeichhe hmel ṭha tak a ni. He thilah hian inrawlhna a neih ka ring deuh tlat bawk. Lo chhinchhiah ang che, a hming chu Lalduhawmi a ni," a han ti a.
"Khaw'nge a thu ziak hi a dang a awm le? Hei chu Part four chauh a nih hi, 1 aṭanga 3 emaw, 4 hnulam emaw hi chhiar ka va châk reuh ve," tiin ka han zawt a.
"Ka hre bik lo tawp," tiin Muanawma chuan min lo chhang a.
Ka mumang te, thil dang reng reng pawh dah ṭhain Muanawma'n Ramnunthara chungchang a bawhzui dan hi kan sawi chho zel tawh dawn a ni.
Ramnunthara Pa Pu Rosiamngheta chu Mizo paah chuan pa vantlang tak, kum 50 bawr vela lang hi a ni a; mahse Zokhuaah kuthnathawka awm an nih avangin a kum zat dik tak aiin a lang upa zawk ang tih hai rual a ni lo. Muanawma nena an inkawm lai ka lo ngaihthlak aṭang chuan a fapa boral ta chu a tuar hle niin ka lo hria a, Muanawma chuan thil a zawt chipchiar vak lo va, a hmel chu ka lo khawngaih ang reng hle.
"Pa Ro, nizanah Rama pindan awm dan hi ka en chik viau a; mahse awlsam taka han luh ruk theihna tur awm ang ka hmu miah lo va, in rinhlelh angin mi kut tuar lo ni ta se, chhung lam aṭanga kawngkhar hawn sak a nih hnuah pawikhawihtu chu a rawn lût chauh a ni thei mai lo maw?" Muanawma chuan a han ti phawt a.
Pu Rosiamngheta chu a han ngawi deuh vang vang phawt a, chutah a rawn hawi chhuak a, "Muana, ka sawi chak vak lo nang a, Mama boral zan khan Kimi pawh kan Inah a riak ve asin; mahse zinga Mama ruang kan han hmuh khan ani chu a lo bo ta daih mai a, thil awm dan hi kan hre thiam lo takzet a ni," a han ti a.
Pu Roa thusawi a vang chuan mak ka lo ti hle a, Muanawma hmel chu ka han en a; mahse, ani chu chhete mahin a danglam ve lo. Zawi sap hian, "Pa Ro, thil awmzia leh thil awm dan nia i hriat chu a bul aṭangin kim deuhin min han hrilh teh, puih theihna che ka neih ka ring tlat a ni," a lo ti a.
Pu Rosiamngheta chuan muangchang hian a han sawi zawm leh ta charh charh a. "A bialnu, Duhawmi nena an inṭhen avang khan Mama nunphung kha a danglam nasa hle a, ṭumkhat phei chu Vaṭhuampui lamah a thangbo vang vang phah nghe nghe a ni. A rawn haw leh pawh chuan a nunphung ṭhin kha a la nei let tak tak thei lo va; mahse, Kimi kha kan khuaah a rawn awm ve ta a, ani khan a ngaizawng ve pawhin ka hre lo, Mama erawh kha chuan a ngaina em em a, a khawhar kha Kimi khan a hnem ber ṭhin a ni.
"Khatia Mama leh Kimi an inkawmngeih ta em em mai a hmuh khan Duhawmi kha a lo pawng thar leh ta a, Mama lahin a lo hmangaih viau a ni ang, a rilru kha a ném leh zo a, Duhawmi khan Kimi kha a hal ta riau mai bawk si a, hrehawm ti takin i nau kha a awm ṭhin. Tichuan, Aizawl lamah a rawn let a, Kimi awm loh hnuah lah Duhawmi chuan Mama chu a ngaihsak lo zui leh ta daih bawk si kha, zu in a ching chho a, a nun chu a hniam leh ta em em mai a, kei leh a nu hian tihngaihna kan hre lo. Kan en tawp mai a ni.
"Chutia Mama a han khawsa chu a Putea chuan a duh lo em em mai a, han tih vak ngaihna a hre si lo va, a zilhin a fuih a, a chang leh a han hau viau ṭhin tak na a, a sawt mawh khawp mai. A tawpah chuan a Putea chuan Motor-a a thil phurh ṭhinnaah a hruai ve ta a; chutia hna a han thawh ve takah chuan Mama nunphung pawh a pangngai leh ṭan a, a Putea bulah a awm tam vang te pawh a ni ang, zu chu a thlah hret hret a, pangngai takin a nung chho ve thei ta ni. A putea hi Pathian ṭih leh mi nunnem, zaidam tak a ni a, Mama pawh hian a zah hle nghe nghe.
"Mahse, thil a kal tluang dawn chauh emaw tih laiin vanduaina a lo thleng leh ta a. Mama leh a Putea, Bungraw thiara zan rei tawha an rawn haw chu a Putea Motor khalh chu a muthlu ta hlauh mai a, chesualin kawngthlangah an tlan liam ta a, a Putea chu a hmunah boral nghalin, Mama erawh chu ramtuileiloin a awm phah ta a ni.
"Chumi hnu chuan vawi khat chu Kimi kha a rawn lang hlawl mai a, a hmel chu a la upat belh miah lo na a, a zia erawh chuan a naupangchhiatna kha a kalsan ve tawh tih a lang thei a. Mi pakhat, upat hmel deuh tawh lam nen hian an rawn kal a, Mama'n a lo hmuh chuan hmuh theih khawpin a hmel a danglam a, chumi chhung erawh a rei lem lo. Mak erawh ka ti rilru hle a ni. Mama hmel awmzia khan min ti ngaihṭha lo hman a; amaherawh chu, a reh leh mai avangin ka ngaihtuah zui chiam duh ta lo. A tir chuan, Kimi a hmuh avanga hmel danglam nge a nih, Kimi rawn kalpui pa avanga hmel danglam tih ka ngaihtuah hman a ni.
"Kimi chu in chhungkaw chanchin ka ha zawt sateh ṭhin na a, a ngawichawiin thil sawi a harsat tlat mai a, heta lehkha a zirlaia a zia ang kha a pu tawh lo niin ka hre hial a ni. A rawn kalpui chuan Hmingthanga niin a insawi a, 'Kimi Pate ka ni e,' a ti a ni. Mahse, Kimi leh chupa chu an innel dan a pawnlang tlat hian ka hria a, Kimi hmelah lah lungngaih rukna riau hi hmu tlatin ka inhria a, ka ngaihbel thil deuh mai mai phei chu a ni ang.
"Mama, Kimi leh Hmingthanga chu kan mut tawh hnu hian zan rei tak tak thlengin an titi fo a, an inkawmngeih hle ni maiah ka ngaih avangin eng'e an sawi phei chu ka ngaihven hran lo. Ni thum an cham hnuah kan khua hi an chhuahsan a, chumi hnu chuan Kimi chu a reh vang vang a, Mama nen chuan an inbe zui chuang lo bawk. Mahse, Kimi ten kan khua an chhuahsan hnu chuan Mama nunphung chu a danglam leh hle tawh a, a ṭawngtlem a, chaw a ei tlem a, khawhar âwm em em hian a ṭhutna nawrhlirh theih ṭhuthlengah chuan nilengin a ṭhu ngawi reng ṭhin. Mak tak maiin a ṭawngṭai nasa ta em em thung a, a ṭawngṭai thu hian ka thinlung a chhun na fo mai. A ṭawngṭaia a chham tam ber chu Pathian hnena ngaihdam dilna a ni a, chu chu nitina a tih dan a ni chho ta a ni.
"Ni khat chu ka titi pui ta a. Engvanga Pathian hnena ngaihdam dil reng mai nge a nih ka han zawt a, ani chuan eng dang tehchiamin min chhang lo, a hun kal taa a awm dan avanaga a inchhir thu min hril ngawt mai ṭhin a ni. Chuti anga hun a hman chhoh lai chuan Amah chauhin Kimi kha a rawn lang leh ta hlawl mai a, Mama'n a han hmuh chuan hmuh theihin a hmel a hlim a, a khawhar a ziaawm tih hriat deuh mai hian chaw te pawh a ei tui chho leh ṭan a, Kimi karkhat zet a awm hnu phei chuan a hmel pawh a mawi ve leh hle tawh a ni. Mahse, zan khat chu khati khan thil a rawn thleng leh ta thut mai si a.
"Tukkhat zing kan han thawh chuan Mama chu a pindanah..." Pu Rosiamngheta chu a han ngawi deuh vang vang a. "...a pindan chhuatah a lo tlu reng a, kan han khawih chet chuan a pang a lo dai diak tawh a, a lo thi hman reng tawh a ni. Kimi mutna lam ka pan vat a; mahse, ani pawh kan hmu ta lo a ni. Kan hrilh a hai em em a, zanah khan kan mutui viau a ni ang, thawm hria tumah reng kan awm lo va, thil thleng chuan zingah min ṭhawng thut vek mai a ni."
Pu Rosiamngheta chu hnukulh ṭeuh hian a han ngawi leh vang vang a. Muanawma pawh chuan engmah a sawi lo reng reng, hmel tak ngal mai hian Pu Rosiamngheta thusawi chu a ngaithla a, a hmelah chuan eng'e a ngaihtuah ka chhiar thiam miah lo.
Nakkinah chuan Pu Rosiamngheta chu a rawn ṭawng leh a. "Mama thih dan chuan kan ngaih a tihṭhat theih ngang loh avnagin FIR kan thehlut ta tawp a. Kan khua mite hi chuan, Kimi kha an rinhlelh thu an sawi sep sep hlawm vek tih erawh kan hria; mahse Muana, ka hriatthiam bak thil a awm nia hriatna ka nei tlat a ni." tiin a thusawi chu a tlip ta a.
A sawi zawh chuan kei chu ka lo thaw ve huai ringawt a. Muanawma chu a ṭhu kun chal a, rei fé chhung chu tumah kan ṭawng lo reng reng. Boruak chu a tak deuh ngul mai hian ka hria; kan ngawih rei tak hle hnu chuan, "Duhawmi i tih kha, Rama thih hmain in Inah a rawn leng ngai em?" tiin Muanawma chuan Pu Rosiamngheta chu a han zawt a.
"Ngai lo...ti i la, Kimi awm chhung khan vawi hnih chu a rawn chuangkai tak; chuti anga a rawn len ṭum hnih chuan, khati khawpa Kimi haw si khan a be ṭha thei hle a, nél hle âwm zet hian Kimi bulah a tawlh hrut hrut ṭhin; mahse Kimi khan a lo ngaina vak tehchiam lo va. Chuan, Mama thih thu-a kan khua mite hnena Kimi a rinhlelhawm thu sawi ṭantu pawh Duhawmi a nih thu kan chhungte zinga pakhatin min hrilh a ni," Pu Rosiamngheta chuan a lo ti a.
"Lo kal chu Kimi a ni tih i chiang chiah em?"
Pu Rosiamngheta chuan Muanawma zawhna chu mak a ti deuh tih a hriat a; mahse, "Ka hai hauhin ka ring lo" tiin a chhang ta tho a.
"A nih tak chu."
"Muana, engvanga khatia min zawt kher nge i nih. Mama boral hlim khan Kimi chanchin ngaihven turin nangmahni rawn biak pawh nagihna kan hre lo va, Kimi chanchin zel hi hriat kan duh ve ngawt a sin," Pu Rosiamngheta chuan a han ti leh a.
Muanawma chuan tawi fel zet hian an chhungkaw chunga thil thlen dan leh Kimi bo tak daih dan chu a han hrilh a. Chutah, ṭawng leh tawh hauh lovin a tho a, pawnah a chhuak ta daih a.
Muanawma chhuak ta chu mak tih hmel deuh hian Pu Rosiamngheta chuan a en zui vung vung a. A tawpah chuan ka lam a rawn hawi a, Muanawm chungchang chu min zawt ta chawt mai a. Kei chuan sawi duh loh chin nei tak chung si hian Muanawma thil tawn leh a chunga thil thleng te chu ka hrilh a. Ka sawi zawh chuan Pu Rosiamngheta chu a thaw huai a, "A nih tak chu, harsatnain a chenchilh ve hle mai," a han ti sup a.
Darkar khat hnuah Muanawma chu a rawn lut a, Pu Rosiamngheta lam en pahin, "Pa Ro, zanin chu hetah kan riak leh phawt ang a, naktuk lamah in khua hi chhuahsan kan ngai nghal dawn a ni," a han ti a.
"Kimi chu i zawng dawn em?"
"A la dam a nih phawt chuan ka hmu leh ang."
Muanawma chuan a ze ngai a chhuah leh a ni. A ṭawng bung mah mah hian ka lo hria a, ka lo îp deuh hlek nghe nghe a ni.
"Pa Ro, Duhawmi hi khawiah nge a awm min hrilh thei em?" Muanawma chuan Pu Rosiamngheta mit taka en reng chung chuan a han zawt a.
"Thei e, Pasal a nei tawh a, Lungleiah mi Hotel a enkawl sak a ni. Lo chhinchhiah la, a Address chu ka lo sawi ang'e," Pu Rosiamngheta chuan a han ti a.
Pu Rosiamngheta'n Duhawmi khawsakna hmun a han sawi lai chuan, Lungleia kan innghahna Hotel kha a ni tih ka hria a; he Hotel hming erawh hi chu fimkhur thuhlaah ka sawi lang lo mai ang'e.
Zan kan mut hmunah chuan Muanawma chu a ṭawng duh lo hle mai a, kei pawh chu ka ngawi ve reng ringawt mai a. Mahse, ka dawhtheihnain a tlin ta bik lo pek a, "Muana, naktuk chuan khawiah nge kan kal leh dawn?" tiin ka han zawt ta nge nge a.
"Duhawmi kan hmu dawn."
Min chhan dan chu a bung tawi ṭha tek tawk hle. Ka lam hawi lo zawngin a inlet thak a, che lo leh ngawi reng hian a awm zui ta a ni.
Zinga ka han harh chuan Muanawma chu a lo tho tawh a, kei pawh chu ka tho ṭiah ṭiah a, Pu Rosiamngheta nupui Pi Liannguri chuan, "I lo tho tawh maw? I mutui em? Muana a la muhil em ni?" a lo ti zunh zung a.
Kei chuan, "A tho daih tawh a ni ang chu ka ti, a awm miah hleinem," ka han ti a.
Pi Liannguri chuan, "Khawiah emaw a kal a ni ang. I ṭhianpa hi chu mi mak danglam deuh tur niin ka hria," a han ti te te a, "Kâwl en hmain ka tho a, i ṭhianpa rawn thawh lai emaw, a thawm emaw pawh ka la hre lo reng reng," a han ti leh a.
Chutia Pi Liannguri'n a sawi zawh chiah chuan phang zet hian Muanawma chu a rawn lut ve ta chiah a.
Comments