PASALṬHA KAWHTEBÂWKA
BUNG KHATNA.
©Chhantea Pautu
Thlanvawng Kungah.
Ziak ṭan deuh tawp mai ang aw.
Ruahphingphisiau a sûr seng seng a, thing no leh thing chang hmun inpawlh, thelh deuh, mûal pèr ṭha ang reng tak leh lung lian pui pui inhun khupna kawr kam, arthladawn awmna hmunah chuan hmel hrâm pui pui, pawr fep fuap silai keng eng emaw zat hi zuanbak dài tawn ang mai hian an lo lang ṭuam ṭuam a. An lan dan ngawt aṭang chuan ṭamchhawl thei mai hmel hi an pu lo hle hlawm a; mahse, an zînga pakhat, kum lama la nau tak chu a ṭamchhawl ṭan mêk a ni.
Heng mite hi khawchhak ral, sukteho an ni a, lusei khua rawn rawk a, a ruk a rala rawn chet tum, rawlrala rawn tek chhuak, ralhrat leh nunchhe tak tak, nunrawnna leh an mihringpuite zahna bosal tak takte an ni a, an vaiin sawm panga an ni a. Tun ṭumah hian Sailo lal Lianluaia Mualvùm khawper, Pangdêp rum ṭhaih a, an inring lo lai ṭhawn thut tum leh, lusei mite lu lâk ngei tuma lo thawk chhuak an ni.
Sukteho chuan kawr an kân a, an chet danah chuan an hmanhmawh ru hle ni hian a hriat a. Fimkhur takin an che sawn a, a kam leh lam mûalah chuan per kaiin an hotupa ni awm tak chuan zaizirin a han ti ding hlawm a. Rei lote an din hnu-ah an hotupa chuan mûal lu lam a hawi vung vung a, a kal ta vut a. A hote chuan ngawi rengin an zui ve vat a.
Hetih lai hian Kawhtebâwka chuan Sazuk ki bung hnu a chhui mek a; chu Sazuk ki bung hnu a hmuh chuan a phur takzet mai. Ruahin lei a nan hnip bawk a, a hnu chu a chiang kelh kawlh hle a, a rilru te te chuan amah tak pawh a hnai hle tawhin a ring a ni.
A Sazuk ki bung hnu chhuina mûal pangper, awihtlàn zâl deuh mah zawkah chuan a mual tan zawngin a kun phei kat kat a. A bul velah chuan tlip pathum vel hi an rawn vir vat vat a, Kawhtebâwka chu a nui suk a, a sa chhui chu a hnai tawh a nih a ring a. A han hawi chhuak a, ngunthluk zet hian a beng chu a han chhi 'êng vat vat' a. A mak khawp mai, hetia a beng a chhi êng thei hi Mualvùm khua, in zanga nufa zeta pasalṭha thei tak tak za chuang zet zingah ani lo hi chu an awm ṭhak lo, ṭhak ṭhak mai a.
Ngun zetin thawm a han ngaithla a; chutah, sain thingṭang a rah tliah rik rap hi a han hre ta a. A phur khawp mai aw. Mak deuh hian a rilruin, "I hi le! Ka kâp ngei dawn e," a han ti ri deuh sup a. Hetia a kâ leh hmui phun tel lova a rilru ringawta a phun ri sup thei pawh hi pasalṭha za rual zet zînga a ber a nihna pakhat mai chauh a ni bawk.
Thawm awmna lam chu a han pan a; chutah, ani leh ni lo angin a ke chheh a sual palh a, ruahphingphisiau sûr kâra lei tak nêm ṭha tak chunga a kephah inphah thlup mai chu a leu zek a, lei nêma hmai phum thlawrh khawpin a han tlu bawkkhup mai teh reng a. Chutia a tluk rik thlawrh rual chuan, a piah lawka Sazuk ki bung chu a lim sawn ve nghal zawk a, hmuh zui theih lohin a bo ta hmiah mai. A 'in-teleport' pawh a ni mai thei.
Kawhtebâwka chu a rawn tho ṭual ṭual a, "Pasalṭha reng reng chu an che phut phut tur a ni lo," tih hi a thuvawn a nih avangin, a tlu pawh chu muangchang hian a tho lui deuh ngat a. A ner nûng a, a hmai chu chirhin a berh rang nuau a, a hmel lan dan chuan, American special force chhuanvawr Seal Team 6 comando, rawlrala che te pawh a ang lek lek thei.
Sazuk ki bung per bo daihna lam chu a thlir vung vung a. Kah lova mûal a liam ta chu a ui thlu ngang a ni ang, a ṭah te lam lam a chhuak lek lek a. Sazuk ki bung liamna lam nia a hriat chu a la hawi zui ta vung vung a. Chu mai chu duh tawk lovin a chhak lawka thlanvawng kung lian tak lam chu a pan a; chu thlanvawng kungah chuan lâwnin a kakpui rem zetah chuan vakul ang vang hian a han fu to ta vang a.
Kan pasalṭha chuan pawndum a veng a, iptepui var a ak a, a silai sei ruang mai, keini ang dung chen zeta sei chu a kut ding lam hian a keng hnalh bawk a, Sazuk ki bung kal liamna ni ngeia a rin chu a la thlir zui ta zel a.
Chutah, Sakzuk ki bung ringawt ngaihtuah chu awmzia a awm lo tih a hre chhuak a, a dinna thlanvawng kung zawk chu a 'hisap' ta zawk a. A rilru te te chuan, chu thlanvawng kung chu kih a duh hle a, furniture atan a ṭhat dan tur te, khum siam nan leh Drawer siam nan te, Wardrobe siam nan a ṭhat dan tur te a ngaihtuah chho a, a nui suk a, "Ka hlawhchham let tawp lo ve," tiin thlanvawng kakpui aṭang chuan inthazo zet hian an inbin thla a! A chemtum a phawrh a, thlanvawng kung lianpui mai chu kih tumin a sat ting ta taih taih a; chutianga thingkung lian leh chemtum chu a in-bit lo taih taih hle a ni.
Mak deuh mai chu, thing kunga a lâwn reng reng hian, a sâng lutuk a nih loh chuan a inbin thla ziah ṭhin a ni. Mi dang chu ni se an han invawrh vir vel emaw te a ni ang a; mahse, ani chu a ni lo...Kawhtebâwka chu a inbin tlat zel.
Pasalṭha Kapbâwra fa hming koh, a lai ah hming atâna 'Kawhtebâwka' tia a Pi, Suleikhupi sak hi, a hming awmzia leh a put chhan hriat kawngah chuan lo hmanhmawh lo hrâm teh u aw. Kan la sawi em em ang.
Duh tawk rih ila. In duh a, in chhiar peih a nih phawt chuan coment lamah te lo sawi ve reng reng ula, hmanhmawh hauh lovin kan Kawhtebâwka chanchin hi kan ziah chhunzawm zel dawn nia; duh lo mah ula ka insum thei lo maithei, ka ziah tho ka ring deuh tlat.
Comments