KA LA THEIHNGHILH LO

KA LA THEIHNGHILH LO

Pjs

Túemaw ka mutna khum bula rawn lang sek ṭhin chuan ka kête hrúin a sil a, ka awmna hmun chu khawilai nge a nih ka hre lo, hun rei tâk mu tawh ang mai ka ni a, ka mutbû te chu chu nula chuan a sú ṭhin a, ka ekte thianin ka zun nan bur min dawh sak ṭhin bawk.

Chu nula chuan túemaw ni tâk min hriatchhuahtir ṭhin a, mahse tunge a nih chiah ka hre lo, a hmel chu a ṭha hlê a, tleirawl duhawm tâk a ni a, ani chu min enkawltute zingah pawh ka mutna room rawn lut hnem ber a ni a, lainat tâk leh mi khawngaih hmel táka min enchangte hian eng nge a chhan ka hre lova, a tán tuemawni tâk ka nih ngei ka ring a, mahse tùemaw ni tâk ka nih chuan min hrilh tawh ngeiin ka ring bawk si. Zanlaia ka ṭhangharh changte hian ka bulah awmin mî a lo ngaihven vat ṭhin.

Ani chauh chuan min tihlima, midang tú tùte emaw rawn lang ve fo ṭhin chu ka ning ṭhin a, an rawn lanzin deuh chang phei chuan melh pawh ka melh peih ngai meuh lo a ni.

Patar tawh tâk mahni a zun leh ek thiar thei lovin ka mutna khum pawh chu ka kalsan thei lova, ka kê pahnih chu an che thei lova, tu ṭawng mah hre thei lovin ka beng chu a chhet a, ka mithmuh erawh chu a la fiah kur lawi si. Ka tunhma nun chhuikir tumin zanah ka ngaihtuahna seng ve ṭhin mah ila eng nge ka lo tawna, eng thil nge ka tih ṭhin tih chu ka ngaihtuah thleng pha ngai lo a ni. Ka hriatzawng chu nula tleirawl duhawm tâk tuemaw ân deuh nei chauh kha a ni.

Tlaikhat chu doctor ni awm tâk hi room-ah chu tleirawltê chuan a rawn luhpui a, box pakhatah hian eng eng emaw a rawn phawrhchhuak a, ka beng khawih nawk nawk pah chuan eng emawni tak hi a rawn vuah a, a han vuah zawh veleh chuan ka bengin thawm a hrethei ta a, "Ka ṭawng i hre thei em?" Tih niawm tâk hian chupa chuan ka beng bulah a rawn sawi a, kei chuan ka hriat thúin ka lo chhang a, ani chu a nuisuk a, "Ava lawmawm êm!" Tih thu chu a han sawi leh a, chutih lai chuan tleirawltê khan hlimhmel tâk mai hian mi a rawn panhnaia, ka bulah chuan rawn ṭhu in "Ka pa, ka van lawm êm em" tih thu chu a rawn sawi a, ka awmah chuan min kuaha a ṭap ta hawm hawm maia.

Eng nge a ṭah chhan tih leh eng vanga ka pa tih a min koh ringawt na chhan chu ka hrethiam lova, fanu ka la nei lova, fa chu sawi loh nupui ka la nei lo hrim hrim tih chauh chu ka rilrú a awm a ni.
Tihian ani chu ka chhang a, "Nula, nupui ka nei lova, fa pawh ka nei lo asin..i pa ka nih ka ring lo." Tiin. Ani chuan ka banah vuanin mi a han melha, "Ka hria lawm..mahse ka pa ini asin..i fannu ka nih hi.." a han tileh a, kei chuan awiha awihloh tur nge pawh ka hre lo. Engmah ka hre lova, engvanga ka pa tia min koh mai nge chu ka hre lo takzet a ni.

Chuti'a ṭawng ka hriat theih tâk chinah chuan ninawm khawpin ka mutna room-ah chuan ka hmelhriatloh hlir chu an rawn lang ṭana, a ṭhenin unaupa min ti a, a ṭhenin ka ú, ka patê min titawklah bo lo. Ṭap chungin ka hun kal tawh an sawi a, ka rilru tibuaitu mai an ni si. Kum engzata tam nge ka nunhlui chu ka  mutbó san ang le? Tunge maw ka nih chiah le?

An rilru tihahtu leh timangangtu mai ka nih ka ringhlel lova, engvanga beidawn hmel taka a tute pawh mai hian min melh ka hrethiam lo a ni..

Zankhat chu tleirawltê kha a rawn lut a, lehkhabu pakhat hi a rawn keng lut a, a rawn luh veleh chuan tukverh a hawnga, thla êng chu a nalh êm em a, ársi tlem an lang bawk, a boruak a daiin a nuam ngei mai.

Ani chuan lehkhabu chu khum bula dawhkanah chuan a han pharha, thawnthu pakhat a ziaktu Pjs tih hi a lo ni a, a han keu chuan min chhiarsaktur thu chu a sawi a, thawnthu berkher, eng atân nge maw ka han tih ang le..? Min awihmutnan a ti a ni ngei ang, ka lo tirilru neuh neuhva.

Ani chuan "Ka pa, ka chhiar anga, min lo ngaihthlak sak dawn a nia, a ziaktu hi Pjs a nia, a diary-bu a ni deuhber a school kal lai leh college a kal laia a ziahte an ni. A ngaihnawm lutuka, i hriat ve atân ka awt lutuka, mahse a bu hi a chhah ṭha hle a, kan chhiar zo har viau maithei a ni. Zantin phek thum tal chhiar zawh kan tum dawn nia aw.." a han ti a, kei chuan ka rem tihzia lantir nan, ka lu chu ka han bu ve mai a.

A  chhiar ta a.

A phek hmasa berah chuan Pjs chu highschool a kal laia a ṭhiante leh an zirtirtute chungchang a ziaka, a úanau te leh a nu leh pa te chungchang a ziak a, a chhungkua leh a a ṭhiante nena an chanchin a tam ber, tuemaw star ruk deuh a neihte chu a lang hnem ber pawl a ni bawk.

A phekkhatna a zawh chuan ho ka tihrùk deuh hlek avangin chak deuhhleka chhiar turin ka han ti a, ani chuan phur hmel tak hian mi a han melha, a hmel ka han en chuan kei paw'n a phur ang tâka lo ngaihthlak sak ve mai chu ka duh ta ber a, ning chung chunga ngaihthlak sak a ngai dawn a ni.

A phek thumna chu a han chhunzawm leh a.

"Vawiin chu Higher Secondary ka ni hmasa ber a ni a, hmelhriatloh hlir an ni nen a hrehawm khawp mai, ka ṭhian pakhat Sangtea nen chauh kan awmdun a, a fel khawp mai, ka mîze mil tâk a ni nen, ani lo chu ṭhiandang siam leh pawh ka tum tawh lo. Taka, kan class-ah chhelo deuh a awma, naktuk chu roll-call laiin a hming ka lo chhinchhiah tawh ngei ngei ang. A hmel a ṭha êmai. Kinah ka la bê ngei ngei ang..a phone Number pawh ka la dil dawn chiang."

A nihnihna-ah "Vawiin chu roll-call laiin ka hmelṭha tihdeuh kha a hming ka hre tawh a, kan zirtirtu pa'n a hming a rawn lam veleh khan a hming chu lehkha-ah ka lo ziak nghala, a hming chu Tracy Ramthanpuii a nia, a hmel a ṭhat angin a hming pawh a nalh khawp mai..kinah ka la be dawn..mahse ka be ngam ang em aw...?"

Chutia a chhiar lai chuan a han chawl zauhva, "Pjs a bialnu tur a nih hi, lo chhinchhiah rawh aw. Tracy Ramthanpuii tih hi" a han ti a, kei chuan "awle" tiin ka lo chhanga, lehlam a hawi a, a mittui niawm tâk hi a han hrú mawlh mawlh a, a rawn hawi leh chuan lehkhabu lam chu a bih a, a chhiar zawm leh ta a.

"Vawiin chu Tracy bulah inline laiin ka dinga, min melh zeuh zeuhin ka hria, a hmel ṭhatzia kha ka la theihnghilh thei lo. Ka lo melh leh reng ṭhin a, a chang chuan min duh ve in ka hria, min duh ve chiang, a bula ka awm changte hian min lo melh ve reng ṭhin a, a Number ka dil ṭep tawh. Mahse kan CR Roliana'n a lo star ve a, ka bem vat loh chuan ka chang lo ang tih ka hlau lutuka, naktukah Tracy chu a No ka dil tawp dawn..."

Chuti'a a chhiar lai chuan ka han nuisuka, min rawn melh chuan mak tihhmel tak mai hian zawhna hlir a khat a mit meng chuan min han melh leh rih a. Eng nge ka nuih a, engvanga nui nge ka nih min han zawh chuan pjs-a chu dawih ka tih thuin ka lo chhang mai a, beidawn hmel tak hian min han melh leh a, nimah sela lehkhabu lam chu a hawi thuaia, a chhiar zawm leh a.

"Vawiin chu class zawh veleh a ka ṭhianpa Sanga nen Tracy-ite hnungah kan kala, a vawikhatnan ka be ve a , mahse ka ṭawng a hre lo a niang, min chhang lova, ka lam pawh a rawn hawi miah lo. Chuan kan hnungah kan CR Rova a rawn kal ve a, Tracy hnunga kan kal avang chuan, min melh rum nasa a, a chhan pawh ka hre lo. Min thik deuh der a nih ka ring tlat. A nuam lo ang reng khawp mai.."

"Aaahh..vawiin chu nilai ni a ni a, class XI ho kan work a, ka hmelma pa Rova'n chhan awm loin min hnial hrepa, ka thin a rim khawp mai. Thikna chhan tur ka awm lo a, Tracy chu vawikhat bak ka la be lova, ka biak ve chhunah lah, ka ṭawng a la hre lo zui a, Tracy vang ni se, chhan engmah a la awm si lova, ka ngei tâk tak a ni.."

"Vawiin chu a nuam khawp mai..ka hriatreng theih nan a ni ka han tarlang a nge, vawiin hi ni 7/july /2016 a ni a, ka sawi duh a ngem aw..sawi loh phal chi a ni lo. Nithum chhung kan work hnu-ah, a tawp nan vawiin chu ka rin loh lutukin thil ṭha deuh a thlenga, mahse ka rawl lutuk, aaa kan sawi tawh a nge. Haw kawngah Tracy'in min lo bia a, mahse min lo biak zawh hnu lawk khan Sanga nena kan kal dun laiin, kan CR Rova'n min rawn hnaih a, an ṭhianhovin hnekah min vau a, mahse min vau lai chuan Tracy leh a ṭhiante pahnih chuan min lo hmu a, Rova'n Tracy lo star ve tawh lo tura min tihlai vel chu. An rawn let leh a, Tracy chuan min kai hranga, "min lo star amaw" tih a min zawh chuan "ka hre lo" tihin ka lo chhanga, mahse a awih loh thu a sawi chuan kan han nui a, ka mitmeng a en chuan dawt ka sawi tih a hrethei ngei ang. Chutia buaina a reh hnu chuan kan haw hova, a nuam asin aw..mahse "aw" tih khan ka lo chhang lo a ni. Mahse min duh ve leh veloh ka hre si lova..a pawi lo a ṭha vek mai.."

Tui tâka a chhiar lai chuan ka mut a tihchhuah thu ka sawi a, tichuan a thilchhiar chu a daha, tui taka mutura duhsakna min hlan hnu chuan min chhuahsan  leh rih a.

Zing khua a lo var chuan room kawngkhar chu tuemaw tar ve tawh tak hian a rawn hawng hlawl mai a, mak tihhmel taka ka lo melh chuan a nui suka, ṭawng ka hriat theih tawh thu a lo hriat avang chuan a lawm hle a, ka û a nih thu leh eng eng emaw a sawi zawh chuan a fate chu a ko lut a, ka bulah chuan an rawn chiar ta nuaih nuaih mai a, an thawm bengchheng leh ka ú intipa thil min zawh leh min sawipuite chuan min timang ang takzet a, ka benga thawm ka hriat theihnana thil vuah chu ka pawt thla a, ka puan sinlai chuan ka inkhuhsan ta daih a, chutia ka inkhuhsan hnu chuan an chhuak ta nge chhuak ta lo pawh ka hre lo. Ka mutthilh san ta daih a ni.

Kha putar rawn kal khan a hming min hrilh a, ka û a nih thu a sawi bawk a, mahse ka vawikhat hmuhna a ni a, a thilsawi leh kan pahnih inkar aṭanga kan chhungkaw chugchang a sawi kha engmah hriat ka nei lo a ni. Ka tan awmzia a awm lo, min tibuai mai mai a ni.

Tlailamah chuan ka eitur kengin nulatê kha a rawn langa, ka ei zawh chuan thawnthu kha min chhiar sak turin ka han ngena, ka lam hawi chuan phur hmel tak hian, "Awle, i chaw eina thlengte hi ka va seng fel anga, ka rawn lut leh vat dawn nia, chuan kan chhiar leh dawn nia aw.." a han tih chuan ka thil eina te chu a seng fel chhunzawm nghal mai a.

A chhuah hnu lawk chuan lehkhabu leh thlalak bawm(album) niawm tak keng chuan a rawn lut leh a, ka bulah chuan a rawn ṭhu a, vawiin tlaia putar rawn lut kha a hming min han zawt a, ka lo hre tawh reng reng lo mai a, ani chuan Pjs-a thawnthua a bialnu kha min han zawt leh a, mahse kha berkher kha chu ka lo la theihnghilh lo thung. Chutia dik taka ka lo chhan chuan phur hmel takin a lehkhabu ken chu a han keu a, a chhiar leh ta a.

"Tracy vangin ka insual.. Class XII kan luhni chuan, Kan CR Rova khan CR nih leh duh hle mah se, student dangte'n kei min thlang ta si a, ka tan pawh Tracy chhaithluk nan kawng a inhawng ve ta, a No ka dil anga, min chhan hma chu ka bem char char dawn a ni. Min duh ve ngei ngei ang. Class banah chuan kawngah Rova chuan Tracy chu a lo bia a, ani chuan CR a nih tawh loh avanga be ṭha duh lo vah a lo ngai a, a vin hrep hrep ringawt mai a, ka zuk kal hnaia, Rova hmaah chuan ka dinga, Tracy thlavang hauhin ka chhan ve e ka tia, Rova'n min han hmuh chhiah chuan ka nâkah min nghawk ta sawk mai a, nâ tak a ni. Mahse ka hlau bik lo, a bawpah chuan ka theihtawpin ka pet let ve nghal mai a, Zopa insual in kan in man bet a, inkherhtluk tumin kan han inbakaih ta chawt chawt mai a, a bawpa ka petna avang chuan a ṭang rei thei ta lova, ka keuhthlu ta tawp maia, chutih lai chuan midang kan bula lo awm ve te chuan min rawn man bet a, min ṭhelh ta a. Min rawn ṭhelh khanglang lo sela chuan ka hnek hrep tur hi a nia, mahse lawm rukna riau ka nei a, Tracy chuan min buaipui thuaia, ka nâkte chu a han dawm a, min han chul sak vel bawk a, nâ ka tih leh tih loh te chu min han zawt a, nâ hle mah se zep a ngai tlat thung.

Zanlamah chuan Rova min hnekna ka nâk chu ka han dapa, ka han khawihfuh chiah chuan a na zawk mai a, kawisawi taka han inherkual vel ka tum pawh chuan a kam ta at mai, mahse nuam ve deuh chu maw..Tracy khan engtin nge min rawn call theih tih hi a ni. Sanga'n ka No a lo pe chu niin, a nuam ve khawp a sin, Rova nena kan insualna a ka nak nâ te chu ka zia tawh leh tawh loh min zawt a, min rawn biak chiah chuan ka dam sawng sawng a ni ber mai. A nuam a ni."

Chutia a chhiar lai chuan thil eng emaw hi ka hrechhuak zawk a, "Sanga; Pjs ṭhianpa kha khawiah nge a awm tak ang le?" Tihin ka han sawichhuak hlawl mai a, engvanga chu thu chu sawichhuak nge ka nih ka hre miah lo. Ani chuan mak tihhmel tak mai hian min han melh kawk a, eng emaw ni tak hriatchhuah ka neih chuan a tihlim ru fú mai bawk. Nunhlui eng emaw ka lo theihnghilh  vang vang tawh chu ka hrechhuak thei dawn ṭan niin ka hre ta a. Hmanhmawh takin a rawn ken luh album chu a rawn la chhuak a, Sanga thlalak hi a rawn la chhuak a, ka han en chuan tuemawni ka hriat reng ṭhin hmel nen chuan ka han tehkhin vela, mahse thlalak ami leh ka mitthlâa rawn lang chu an dang daih lawi bawk si.

Mî a han melh leh renrawn a, mahse beisei bó hmel hlir ka mita a hmuh avang chuan lehkhabu chu a han keu leh a, a chhiar zawm leh ta zawk a.

"Vawiin ni 8 a ni a, ka ziahzawm lohna a rei ta hle mai. Tracy chu ka bialnu a ni tawh asin. Kan inngaihzawn dan tak ka sawi thiam lo, a lo thleng ve tawp mai a ni. Hmeichhe dang ka biak a phal loh khan min duh ve tih ka hre thei a, kei pawn mipa dang a biak ve ka phal lo a, inngaizawng chu kan lo ni reng tawh mai a ni. A nuam lutuka  diary ziah nachang pawh ka lo hre lo a lawm mawle. A nuam a ni.. mahse ka la fawp ngam lova, châk hle mahila, a la rem lo a ni ber. Kan awmfal ve chang pawh hian ka khur a, fawh chu sawi loh ka titipui ngam ṭawk a ni.
Zaninah pawh hei kan inbe renga, lehkha zir zawh hnuah chuan kan inbe reng zel, school-ah kan inhmu reng thei tho bawk sia, a nuam teh mai a nia aw. Chuan a hming taka koh a duh lova, Duatpui tih in min ko rawh a ti tlat a, Duatpui tih hlirin ka koh ta a ni, a hlim chhan a ho thei asin aw."

Chutia a chhiar lai chuan ka han pawtchata, thil eng emaw ka hriatchhuah avangin.  Duatpui tiha koh ṭhin ka nei a, chu nu chu nula hmelṭha tak a ni a, ka bula Pjs thawnthu chhiar mektu nen chuan an in ang êm em mai lehnghal.

Kan han ngawi vang vanga,
Duatpuii tiha a koh chu a hmel ka hmuh duh thu ka sawi a, ani chuan phur hmel tak hian a rawn la chhuak a, ka han en chuan tuemaw ka mumanga hmelṭha deuh ka bialnu lo ni tawh chu ka hrechhuak nghal a, a mah chu ka hmangaih a, ka duh êm em a, nupuia neih ka duh hial a ni. Mahse engvanga chutih ang hrechhuak thei nge ka nih ka hre lo va, Tracy tih hming chu ka vawikhat hriatna ani bawk si. Tunge Tracy chu ni ta ang le??

Ani chuan min han melha, a mitah chuan mittui a rawn luang chhuak a, "Ka pa Tracy chu ka nu a ni asin. I bialnu a nia, duatpui tihin i ko ṭhin alawm." A rawn tichhuak hlawl mai a, chu thu ka hriat chuan ka rilru a tibuai a, engah mah chuan ka insawrbing thei ta reng reng lo. "Tunge Pjs inti chu, eng nge ka hming ni a, Pjs chu  tu nge..?"

Khumah chuan ka tal vak vaka, ka bawk khupa, eng eng emaw chu ka sawi nuah nuah a, a chang leh ka au vak vaka, ani chuan mangan hmel tak hian  "Ka pa, pjs chu nang hi i ni a lawm, he lehkhabu hi i diary a nih hi. Nangma thawnthu a lawm ka chhiar sak che.." a han tih chuan ka rilru a tibuai lehzual a ni.

Ka tal vak hnu chuan ka zawi ta der mai a, ka han hawikual ruaia, ka mitah chuan mittui a rawn luang nghal zung zunga, ka taksa khawi lai amah chu ka chet thei ta lo.

Ka û in motor khalh min zirtira, a chhan pawh Tracy ka rukbo theih nan, chutia ka tih loh chuan a chhungte'n kan inneih an la phal lova. Nia, ka dinhmun ka enin nupui neithei ka la ni miau lova, mahse ka rúka, ka nupuia ka siam vat loh chuan midangin min neihkhalh ka hlau bawk si a, a hmel a ṭha a, duhtu pawh tam tak an awm tih ka hriat avangin ka mangang a ni.

BA kal chhunzawm ka tum laiin ani chuan a chhungte tuipui zawng leh ṭha tihzawng chu tihluihna avanga zawm a ni tih ka hriatpui a, duhlo hle mah se a duhluih a ngaia, a tumâ a tumluih a ngai bawk a ni. BA ka kal chhungzawng chuan ani chuan hmun dangah min awmsan a, biak pawh kan inbe khat hle, kumtawp leh kumlaihawla a rawn haw chang chauh chuan kan inhmu ve thei a ni. In ngai hle mah ila, kan duhloh dana kan awm a ngai ta a ni.

Motor ka khalh thiam ve takah chuan a awmna aṭanga hruai haw chu ka thil tum hmasa ber a ni, ruam hmanna tam tak siamin ka hlawhtling thei ta a.  Ka hruai haw zan chuan hotel pakhatah kan riak dun a, zan thum lai kan riak a, khum khatah mu in ani chuan nau a lo pai ta a ni. Kha thil ka ti kha ka inchhir lova, damchhunga ka tâ nitura ka siam ve theihna kawng awmchhuna ka ngaih avangin ka tih ngei a ngai a ni. Fâ a pai hnu chuan a chhungte'n an rawn hruaia, ka neih an phal mai ka rin avangin palai kan tir chhunzawm nghal a, nimahsela a hma ang thoin kan innneih chu an la phal ta lova, ka fa a pai khan kan inneih ve theih mai ka lo ring a, mahse kei min huatna tizualtu a  lo ni zawk si.

Bul ka ṭan tawha, a tawp thlen ngei pawh ka tuma, a vawihnih nán Tracy chu ka ruk chhuah leh a ngai dawn ta a ni.

Kum khat lai kan inhmuh loh hnu chuan fanu kan neih thu chu min hrilh a, mahse kan inneih chu phal a la ni ta chuang lo cheu. Eng nge ka tihsual a, eng vanga kei chu makpa atâna min duh tlat lo nge ka hre lo a ni.

Chuti'ang khawpa keini inkar kawng chhuk chho tak mai chu a chang chuan harsa tak a ni. Hmahun kha kan thlir thui êm ema, nupa kan nih ve huna kan awmdan turte chu zantin kan sawi dun ṭhin. Mahse nupa ah lo insiam thei teh reng pawh ni ila, a chhungte'n makpa atân min duh miau si  lo a, nuam taka inkhawp tur chuan kan bulṭan danin a zir lo laklawh tawh si a ni.

Motor-a inkhalhin Tracy leh ka fanu awmna lam chu ka pan leh a, hun remchang chuha hruaihaw daih chu ka thiltum ber a ni. Tichuan nupa niin inkhatah kan cheng dun anga, khum khatah kan mudun tawh bawk anga, kan fanu chu kan enkawl dun bawk dawn a ni.

Vanneih thlak takin kan ruahmanna a kaltluanga, Tracy leh ka fanu chu ka ruchhuak thei ta a.

Mahse khawnge an ni chu tunah an awm? Kei putar tawh tak hian chu ka nunhlui chu tunah ka hrechhuak leh a, mahse khawnge ka nupui leh ka fanu kha? Ka bula awm ve tur hi an ni lovem ni? Mal takin min hnutchhiah ringawt em mawni le..? Nge thildang vangin min kalbo san zawk?

Nilo, Tracy chu a awm ve tawh lo. Accident kan tawk a ni tih ka hriat khan, ka fanu ṭap thawm chu ka hria a, Motor chhung aṭanga ka va en chuan a bulah a nu ruang chu a lo let reng a, va panhnaih tuma ka han vah chhuah lai chuan ka lu aṭangin thisen a rawn baw puat puata, thâ reng nei loin chechang tur ka awm ta lo a ni. A thim mupa, ka han men leh chuan ka bula awmte chu ka hmel hriat loh hlir an lo ni ta.

Ka fanu kha tuin nge lo enkawl a, tuin nge ka hmangaih Tracy ruang chu lo hlawm ta ka hre lo, khawiah tak zalh ang maw..?

Vanduaina zawng zawng tawk tur leh hrehawm tinreng tuar tura piang ka ni em ni? Nunrawnna khawvelah hian lo piang ve lo law law ila ka tân a ṭha zawk tur. Ka hmangaih Tracy nun chu keimah avang tawp a lo ni reng si. Ṭah hi bang thei teh reng ila, ka natna te pawhin zialam an pan ve thei tur lah ni. Ka tân he lei hi nunrawnna khawvel a ni a, damchhan tur dang reng ka nei lo, engamah kha lo hrechhuak lo law law ila ṭha zawk tur. Nât nawn leh ka duh lova, ka hmangaih ka chân tak pawh kha hriatchhuah leh ka duh tawh lo a sin. Mahse hun chuan min herchhuahpui leh ta tho a nih hi.

Chawngzawngte chu an hram chhiah chiah a, vanlaizawlah chuan vamurte chu an inchhaihkual vel bawka, ka mutna room tukverh aṭang chuan thlifim chu a rawn thaw lut heuh heuh bawk, ka suangtuahna rei tak ata ka lo upbeh tawh chuan ka nunhlui liam tawhte chu a chhui kir zung zunga, ka khum mawng lam chu ka han ena, ka fanu chu khum bul maia dawhkanah chuan bawk chungin a lo muhil a, thei leh thei lovin ka tawlh thla a, a lu chu ka han khawiha, ka fanu duh tak ka fanu a nih thu ka hriat hmaa ka hmuh hnuhnun ber kha chuan nausen mai a la ni a, a hming takngial pawh ka la hre si lo.

A lu chu ka chul a, a rawn harh chiah chuan, a thophang hmel chu ka lo en ngawih ngawiha, a nu hmel a an em avangin Tracy kha ka hmu leh ta niberin ka inhria a, a chalah khuavang chhinchhiah a nei ve lo tih chauh lo chu.