GYPSY
CHAPTER--13
By:- Rs Thangluah✍🏼
Zing dar 6:45am velah Sharma chu a chenna In aṭang a chhuak ta a. Keini erawh a In lian tak chhungah chuan kal hnan kan la ni zui bawk si. Mahriati chuan,"He zawng chhepa hian eng thil nge tih a tum zel le? A dawr bula mizo pa dawr nei ve pawh kha ka mi rin loh zawng tak a ni,"a rawn ti bawrh bawrh a.
"Eng pawh nise, min thlah thlam ngai lo tu Pathian hi âu leh phawt mai ang aw. Ani chuan in kan âu thawm chu min ngaihthlak sak ngeiin ka ring a ni."
"Kei zawng, Pathian awm pawh hi ka ring tak tak thei tawh lo. Khati khawp khan Pathian kan âu nasa a; mahse, chhanna lawmawm engmah kan hmuh ngai loh hi,"Mahriati chuan a rawn ti hlawk hlawk a.
"Ni love, Pathian chu a awm ngei a lawm. Khawi hmunah pawh a awm ṭhin."
"Nihchuan, engvanginnge heng harsatna te hi kan chungah a thlen tir bik?"
"Kan tawrh zawh loh tur khawpa harsa chu Pathian hian kan ko ah a tlak tir ka ring lo."
"Kei zawng ṭawngṭai reng pawh hi ka peih zozai tawh lo. I duh leh ṭawngṭai rawh,"Mahriati rilru tur chu kawng tam takin ka hriatthiam pui a ni. Khum sir kil lamah chuan ka phei a, ka ṭhingṭhi a, Pathian hnenah ka ṭawngṭai ta a,"Aw Lalpa, kan Pathian duhtak min hmangaih tu. Tun thlenga dam leh hrisel taka min la awm tir avangin i hnenah lawmthu kan rawn sawi nawn leh e. Engkim kan tawh te hi kan tan a ṭha vek tura i ruat a ni tih kan hriatthiam theih nan min pui la. Heng harsatna tam tak kan tawh te hi nangmah kan hnaih zel theih na tur che hmanrua lo ni se, kan chunga thil ṭha lo ti tu te pawh hi ṭhatnaa kan hneh zel theih nan min pui la. Nangmah an lo hmuhfiah theih nan che an tan ka rawn dil sak bawk a ni. Tin, Amuana pawh a tan ka rawn dil sak bawk a, ani pawh nangin i awmpui ang tih kan ring a. Nangma lam a hawi theih nan ka rawn dil bawk a ni.
Tin, keini ṭhian dun pawh hi nangin min awmpui tih kan hria a, kan lawm e. Engkim kan tih leh kan sawi te i ropui nan ni se, kan tih sual awm te min ngaidam la. Heng hi i fapa Isua Krista hmingin kan rawn dil e, Amen,"ka ṭawngṭai zo ka meng chu ka rin loh deuhin Mahriati chu ka bulah a lo ṭhingṭhi ve reng chu niin. Mittui parawl ṭeuh chungin min rawn kuah a,"Te, ka lawm lutuk aw. Nangmah anga Pathian thuawih hi nih ve ka duh a ni,"ṭah âw ṭuau chuan a rawn ti a. Ka van lawm tehreng êm! Mahriati chu ka kuah a,"Pathian thuawih tak mi chu i ni thei reng a lawm. I nunah eng harsatna pawh tawk la, Pathian chu ring la vuan tlat zel ang che,"ka ti a, ka thiam ang tawkin ka fuih mawlh mawlh a.
Kidnap kan ni tih pawh kan theihnghilh hial a, Sharma khan chhun dar 11:30am velah a rawn let leh tur thu a sawi a. Chumi hma chuan Sharma In chu chhuahsan dan kan ngaihtuah nasa khawp mai. Mahse, chhuahna tur kawng engmah kan hmu lo, chulai hmunah chuan Sharma rawn let leh hun tur nghakin kan tawm reng ringawt mai a ni.
Chawhma dar 11:30am velah chuan Sharma chu midang tu emaw nen an rawn let ta ngei a. A rawn hruai pa lah chuan min en chîk em em mai bawk si, he Sharma hian a ṭhian dang tu emaw hnenah min hralh ngei dawn a nih hi tih chu ka ngaihtuahnaa rawn lut hmasa ber a ni. Mahriati nen chuan kan hlauthawng takzet tawh a ni.
Sharma chuan sitting room ṭhutthleng seiah chuan ṭhu turin min ti a. Mahriati nen chuan ngawi rengin kan ṭhu a, a ṭhianpa erawh min hmachhawn zawngin a ṭhu thung a. Sharma chuan,"Nangmahni video chu hmu duh tawh chuan hei aw,"tiin kan hmaa dawhkanah chuan Laptop hi a rawn hung a, zan hmasa lama kan awmdan hmuh nuam lo zet chu min hmuh tir ta a.
Sharma ṭhianpa chuan,"Mr. Sharma, anni 2 hi ka duh e. Pawisa chu i Account-ah ka rawn thun mai ang aw,"tih pah chuan a nui hawk hawk a. Sharma ṭhianpa chu hnam dang a ni hauh lo, mizo mipa ngei a ni si. Sharma chuan nui sawng chungin,"Awle, anmahni chu hmel pawh sa lutuk maw le,"a ti zuah zuah a.
Mizo pa leh Sharma chuan zu an in tluk tluk a. Rei vak lo hnuah chuan Sharma chu a chatthla a ni ngei ang, a muhil bawrh bawrh mai a. Mizo pa zawk erawh chu a la harhfim ṭha kher mai, kan lam hawiin a rawn nui var var a,"Nula te u, duhthlan tur 2 in nei. Pakhatna chu helai hmun aṭang hian ka hruai chhuak che u ang a, he vaipa sum hi kan nei vek ang. Pahnihna chu min zui lo a nihchuan he video hmuhnawm zet hi mizo mipui te hmuh atan ka tlangzarh nghal ang,"tih pah chuan a nui huk huk a. Mahriati chuan,"Nang hian min puih i tum nge? Min hralh i tum zawk?,"a ti mauh mai a. Chupa chuan nui huk huk chungin,"Chutiang thleng thleng in hriat kher a ṭul lo e. Hming chhiat in duh loh chuan sum leh pai leh chenna tur chu a buaithlak loh ang,"a ti leh a. Rilru a buai kher mai, hming chhiatna thup bo nana sum lak chu duh viau mah ila, kan thawh chhuah sum a ni si lo.
"Ṭhianpa, i duh duh chu ti rawh. Keini chuan kan zui lo ang che,"ka ti ram hmak mai a. Chupa chuan mak ti takin min en ho ringawt mai a,"Eng eng, engtin maw? Ka duh duh chu ka ti ang maw? A ṭha e, he vaipa hausak na hi in hre ve lo a nih dawn hi,"a ti a, zu no dawm chung chuan a nui huah huah a.
"Heng sum leh pai te hi kan awt reng reng hleinem. I duh chuan nei vek rawh,"ka ti ta zek a.
"A ṭha a lawm,"tih pahin Sharma Laptop chu a en a. A phun bul bul a, thinrim hmel zet hian a rawn tho a. Sharma awmna lam chu a pan a,"Zawngchhepa, tho teh. Khawnge video te kha,"tih leh Sharma phih thawh chu a rual nghal a.
Sharma chu rui tih hriat tak hian a rawn ding chhuak a, a meng sen râm mai a,"Eng nge buaina?,"a rawn ti ve vat a. Mizo pa chuan Sharma chu a hnek let tawp mai a, keini lah chu hlauh vangin kan khur dar dar a.
Sharma leh mizo pa chu an inhnial buai nasa kher mai. Mizo pa chuan,"Khawnge video chu?,"vin zeta tih pah chuan Sharma chu a ṭham nawk nawk a. Sharma chuan,"Video chu keiman delete vek tawh lawm. Nangman hmu tawh tho nihkha,"a ruih êm vang chuan din pawh a ding ṭha thei lova.
"A ṭha e, i sum hmuh tur ho chu i hmu hauh lo ang le,"tih pahin Sharma chu chhuatah chuan a namthlu a, a chhir zui leh bawk a. Sharma hnar leh kâ aṭang chuan thisen a rawn chhuak ngiai ngiai bawk a.
"Vaichhepa, i thi dawn khawp mai. Nangni 2 pawh kha in thi ang,"tih pahin a file rawn ken kar aṭang chuan Pistol hi a rawn phawrh a, Sharma hliam tuar chhuata let reng chu dimna nei lek lovin a kap ta ṭhuai mai a. Keini 2 chu kan ṭe nghal ṭhawt a, Mahriati kutah chuan ka kai a,"I rilru in ṭawngṭai ve mawlh mawlh rawh aw,"ka ti a, kei pawh ka rilru in ka ṭawngṭai ve mawlh mawlh bawk a,"Aw Lalpa, khawngaihin min pui hram teh. Sharma nunna hlu tak hi khawngaihin zuah sak hram ang che aw,"engvanga min kidnap tu ngei Sharma nunna chu zuah sak tura ngen nge ka nih pawh ka hre lo. Mahse, mak tak maiin Sharma chu ka lainat tlat thung si a ni.
Mahriati nen chuan a Pistol chuan min tin reng a,"Duhthlan tur ka pe leh ang che u. Tunah hian min zui chhuak dawn nge helai hmunah hian in nunna hi ka la ve dawn zawk? In nunna hi ka kuta awm a ni tih hi hria ang che u,"a mit meng sen râm chuan min melh rum ngei mai.
"Keini chuan kan zui lo ang che. I duh chu ti la, keini pawn kan duh kan ti ang. Tin, kan nunna hi i kutah ni lovin Pathian kuta awm a ni,"Mahriati chuan ka kutah min rawn kai a. Chung lamah ban kan phar a, kan mit kan chhing a Lalpa'n ṭawngṭai dan min zirtir angin kan ṭawngṭai ta a.
Kan ṭawngṭai zo chiah tih chuan Silai puak ri kan hre ta; mahse, chu Silai chu min vau bettu pa kut aṭanga puak a ni hauh lo mai. Min vau bettu pa chu kan hmaah chuan a let tual mai a, chumi hnu rei vak lovah chuan Police ṭhahnem tak an rawn lut ṭuk ṭuk a. Sharma hliam tuar chu an rawn buaipui nghal mawlh mawlh bawk a, keini pawh chu hmun him lamah min hruai ta nghal a.
Police ho chuan min lo hre fur hlawm a. A chhan pawh, a hmaa min man tawh vang kha a ni. A hmaa min dawptu bawk khan min kawm leh a,"Kan enthla reng che u kan tih kha in la hria em?,"a ti a, kan hmel chu uluk takin min en a.
"Aw hria e,"tiin ka lo chhang ve vat a.
"Sharma kha kan hnuaia thawk a ni a. Tin, tuna kan man tak saw, hmeichhe rukbo chungchanga kan chhui mek a ni bawk a. Nangni hi awm lo u la, ani saw kan man thei kher lo maithei. Eng pawh nise, in 2 chanchin hi thui tak chu kan chhui ve tawh a. Misual in ni lo tih pawh kan hre chiang tawh a. Mahse, kha in ṭhianpa Zomuanpuia erawh kha chu a hmaa a thil tihsual tam tak vangin case a nei nual a. Tukin zing lamah khan Central Jail lamah kan thawn thla ta a nihkha,"a ti a. A thusawi chuan min ṭhawng hle mai,"Amuana chu Central Jail-ah a awm maw?,"ka ti nghal vat a.
"Aw awm e, kar leh ah khian Court-ah a in lan ang,"a ti leh a.
"Kan hmuh ve a rem ang em?"
"Rem teh reng e, in kan hunah chuan in hmu ve thei reng e. E chuan, thil pakhat....,"a ngawi det a, a dawhkan pawhdawh aṭang chuan Envelope hi a rawn la chhuak a,"Min puihna avangin in chunga lawmthu sawi nan hei hi min pawm sak ve ang che u aw,"a ti a, Envelope chu kan hmaah chuan a rawn nawr phei a. Mahse, chu pawisa chu lak ka duh lo a ni,"Ni love, in hnuaia hnathawk pawh kan ni lova. Kan thawh rah lo chu kan la lo ang e, ṭanpui ngai te ṭanpuina atan in lo hmang zawk dawn nia,"tiin ka lo hnial ta zawk a. Police pa chuan nui var var chungin min en a,"Amuana sawi kha a lo dik chiah a nih hi. Nang hi mi thianghlim chu i nih hi, tikhan lo ṭhu u la tu emaw in a hmu duh che u a nia,"tiin a ṭhutna aṭang chuan a tho a, min kalsan ta daih a.
Rei vak lo hnuah Police pa leh pa pakhat hi an rawn in zui phei leh a. Chupa chu khawiah emaw hmuh tawhna nei tlatin ka in hria a. Ani lah chuan min lo hre em em mai bawk si,"Nula, min la hria em? Ka hmuh tirh phat aṭang che khan misual i nih hi ring lo reng a ni,"a lo ti nghal bawrh bawrh a. Ka ngaihtuah let a, chupa chu ka hre chhuak thei ta hram a. Amuana nen kan in hriat tirh a thlanmuala min man tu te zinga mi kha a ni tih ka hre chhuak ta. Ani hian a number te pawh min pek nghe nghe kha maw le, engtinnge maw ka lo mangnghilh theih le,"Aaaa aw hria e, hria e engtinnge min lo la hriat zawk a?,"ka ti ve nghal vat a.
Nêlawm zetin a nui sun sun a,"Khami zan aṭang khan rilru nuamin ka awm ngai lo a sin. I hmelah khan dikna ka hmu tlat si a, khatianga in chunga thil kan tih vang khan nasa takin hrehawm ka ti a. In tan zan tin ka ṭawngṭai ṭhin bakah, khawiah emaw ka hmuh leh che u beiseiin ka zawng ṭhin che u a sin. Tichuan, a tawp a tawpah News lamah in hmel ka hmu ta ngei a. A rang lamin Police Station-ah ka tlan nghal a, anni chuan enthlak mek in nih thu te min lo hrilh bawk a. Tin, ani hi ka unaupa a lo ni kher bawk nen, tun ṭum chu ka lawm kher mai,"a thusawi chu a chawl a. Sawi khalh hlau ni awm takin a rawn sawi zawm leh nghal a,"Tun aṭang chuan Thlanmualah in riah a ngai tawh lo ang a. Hlauthawng reng reng a hringnun in hman a ngai tawh lo ang, tun aṭang chuan ka fanu te in ni tawh ang,"a ti a, hlim hmel pu sâng chung chuan min rawn en a.
Keini ai mahin a hlim zawkin ka hria,"Ka van lawm tak êm! Kan ṭawngṭaina chu chhan in a awm ta a nih hi, Lalpa chu fakin awm rawh se,"ka ti chhuak hlawl mai a. Mahriati pawh chu a hlim kher mai, engtiklai pawha kan bianga lungngaihna mittui luang ṭhin kha tunah chuan hlimna mittuiin a rawn thlak ve dawn ta.
Pu Chhuantea(Min rawn zawng chhuaktu pa) te chhungkaw zingah chuan kan awm ve ta a. Anni chhungkua hi miṭha tak chhungkua an ni a, an ṭhenawm khawveng te pawn an entawn chhungkua an ni ṭhin. Anni chhungkua hi Pathian in kan tan Vantirhkoh a ruat chu an ni ngei ang. Tin, a hnenah bang lova kan ṭawngṭaina rah pawh a niin ka hria.
Khang hun hrehawm tak tak kan paltlang takah te khan Pathian hnaih ngai lo ila, sual kawng zawh ta ni ila, tun hi kan thleng hauh lo ang. Tun dinhmun kan thlen theih nachhan chu, kawng harsa ber kan zawh lai pawha amah kan hriat reng na leh ṭawngṭai kan thlah ngai loh vang kha a ni. Pathian zarah Mahriati pawn a damdawi tih te a sim a, nunthar in a nung chho ve ṭan a. Amuana erawh rilru ti hah tur tawk chiahin a nun ngaiin a la nung reng a, a rilrua Pathian awm rin lohna chuan a kiansan thei si lo. Mahse, Amuan tana ka ṭawngṭaina chu ka bansan ngai chuang lo. Nitin, zan tin Amuana chuan nunthar a neih ve theih nan Pathian hnenah dilin ka ṭawngṭai reng ṭhin.
GYPSY
CHAPTER--14
By:- Rs Thangluah✍🏼
(IN RUKBO NA PHÊNAH ENG NGE AWM?)
"Sir, Sharma kha in hnuaia thawk a nih si chuan, video te kha eng nge a awmzia?,"tiin ka bula Police Officer chu ka zawt a. Ani chuan min lo nuih sun sun a,"Ni e, a tirah khan engmah in hrilhfiahna hun a lo awm si lova. Thil awmzia chu ka han hrilhfiah ang che u aw,"a ti a, a ṭhut hmun a remṭha a. A sawi zawm leh a,"Mr. Sharma kha kan hnuai thawk a ni a. Khami ni khan kan nau te 2 in an umzui reng che u a. Chutih rual chuan, khapa kan man tak kha kan chhui zui ve mek bawk a. Khami ni khan Sharma khan khapa kha dawr chhungah khan a hmu a.
Sharma chuan khapa kha hmeichhe 2 a neih theih tur thu a hrilh a. Sharma chu khapa khan Police a ni tih erawh a hre lo; tichuan, nangni 2 kha kan chhui zui lai mek in nih tho vangin Sharma khan hman ṭangkai theih dan tur che u a zawng a. A duh ang ngeiin hman ṭangkai turin in lo awm reng ta bawk a. Tichuan, video kha chu, kan nau 1 in a edit a nihkha. Kha video ah khan nangmahni hmel kha hman a ni a; mahse, a tak erawh nangmahni in ni lo. Chuan, kan ruahmanna hi nangni hnenah khan engmah kan hriattir loh che u avang khan pawi kan ti khawp mai. Zingkara thuamhnaw inbel lova in awm pawh kha pawi kan ti takzet; mahse, in 2 khan engtinmah khawih in ni lova. Hrai ruih erawh in ni tho, a chhan chu, kha misualpa kha man kan duh miau si a. Chumi avang chuan nangni 2 hi tawktarh ah kan hmang che u a ni.
Tin, kha thil thleng kha ruahman loh angin a thleng ta si a. Mr. Sharma pawh kan rin loh deuhin kah hliam a ni a, nangmahni pahnih pawh dinhmun hlauhthawn awmah in awm phah a, pawi kan ti khawp mai,"tiin an thil ruahman dan te chu min hrilh a. Mahse, min hrai rui erawh lung a awi lo khawp mai,"Mahse, engvanginnge hrai ruih kan nih kher?,"ka ti leh kher a.
"Ni e, kha thil kha tih kan tum hauh lo. Kan tum dan chuan Sharma khan Inah a hruai hnuah che u, kan ruahmanna engkim a hrilh vek ang che u tiin ruahmanna kan siam a. Mahse, kha uichopa kha a lo mawl bik hauh lo mai a. Sharma motor-a in chuan hma khan, ani chu Sharma chenna In-ah a lo va kal daih tawh a. Sitting room-ah khan Spy Cam a lo vuah fel vek tawh a. Chu chu Sharma khan In a luh hnu khan a hre zui nghal si.
A rang lamin min rawn hrilh nghal a, ruahmanna engmah awm lovin a che ta ringawt a nihkha. A pawi kan ti khawp mai; mahse, khawih chhiat in ni lo tih erawh ka sawi duh a ni. Chutiang a nih avang chuan fimkhur taka chet kan lak loh chuan in 3 khan nunna chân thei vek in ni si a. Khapa khan ṭhuih hruai tam tak a nei ve a, anni chuan Sharma In kha an hual vek a. Keinin kan hual bawk a; mahse, duh angin chet a lak theih si loh. Khang thil thleng zawng zawng kha a tak ang thei ber tura tih a ni a, kha video pawh kha kha uichopa khan en uluk deuh se la chuan room leh khum te kha hmun dang daih a ni tih a hre ngei ang. Mahse, ani kha chuan hmeichhia chiah a ngaihtuah tlat a. Uluk taka en nachang a lo hre lo a nihkha, chu chu kan tan chuan a lawmawm lutuk tlat.
Sharma khan zanah in mutthilh laiin in thla a la, chu chu keini hnenah a rawn thawn a. Video dangah in hmel kha kan lo hmehbel ta a nihkha, khami zan khan Sharma chenna In kha. Kha misualpa ṭhuih hruai te khan ralthuam nen an vil reng a. Keinin kan vil reng bawk a, engmah erawh kan ti thei si lo. In nunna erawh dinhmun derthawngah a awm mek tih kan hai hek lo. Tichuan, zingah Sharma khan khapa kha a be ta a. A tak ang thei ber turin lem a chang a, nangni 2 chu rawn hruai vat tur che u in a ti bawk a. A chhan chu, Police in a chenna In an hre tawh a. A chenna In an rawn pan mek tih te'n dawt a hrilh bakah, a naute ho chu bibo turin a hrilh bawk a. Chutia a tih loh chuan keini kan che thei dawn si lova. Tichuan, Sharma chenna In veng rengtu te an bo diak lai chuan keini kan rawn che ta a nihkha,"tiin min hrilhfiah leh a.
"Nihchuan, engvanginnge Sharma kha a ruih ve kher a?,"ka ti leh a. Police Officer chuan dil chhut min tih hmel tak hian min melh a, a nui suk a,"Ani hi chu a dose hi a hre lo ṭhin a. A ruih hma a, video a lo delete hman kha a vanneih thlak khawp mai,"a ti leh a.
"Video kha engtinnge a lem a ni tih kan rin theih ang?,"ka ti leh ngat a.
A nui leh huk huk a,"Hei en u la, hei hi original chu a nia. Tin, khami zana thil thleng kha in hriat duh chuan, CCTV record pawh in en let thei ang,"tiin video original chu min en tir a. Hrilhfiah chhunzawm ngai lovin engkim chu kan hrethiam ve ta a.
Mahse, kan thuamhnaw phelhsak kan ni erawh kan lungawi lo dun kher mai. Tih vak ngaihna a awm tawh si lo,"Kan thuamhnaw min phelhsak erawh kha chu, kan lungawi vak bik lo a sin,"Mahriati chuan a rawn ti ve khauh mai a.
"Ni e, kha thil thleng kha pawi kan ti khawp mai. Sharma leh Police Department aiawhin ngaihdam ka dil mawlh mawlh che u a ni,"in thiam loh hmel zet chuan a rawn ti leh a.
"Khapa kha engtinnge a awm zui zel dawn?,"Police Officer chuan zawhna ngah min ti viau in ka ring a ni.
"Dân in a chungah ro a rel ang a. A phû tawk hremna chu a hmuh ngei ka beisei,"tiin nui suk chungin min chhang a.
"Sharma kha eng nge a chanchin?,"ka ti leh a. Za vak lovin a nui leh suk a,"A ṭha ve zel e, kar leh lamah chuan ani pawn Damdawiin a chhuahsan ve thei tawh ang,"a ti a. A dawhkan hnuaia pawhdawh aṭang chuan Envelope hi a rawn phawrh leh a. A kawmah chuan, Miss Lalramnunthari & Miss Vanlalhriati tih a in ziak kalh a.
"Hei in lehkha tur aw, Police Department ho chuan in chunga thil thleng te kha pawi kan ti tak zet zet a ni,"a ti a, Envelope chu min pe a.
"Kan duh dan ang thlap thlapin engmah kan thlen tir thei si lova. Eng pawh nise, ngaihdam kan dilna che u kha min pawm sak chuan kan lawm ngawt ang,"a ti leh a. A hmelah chuan in thiam lohna leh in thlahrunna tam tak a rawn lang chhuak nghal bawk a.
"Ni e, i sawidik chiah a lawm. Keini pawn kan ngaidam mawlh mawlh che u nia. Nangni awm lo u la, Pu Chhuantea te chhungkua nen pawh kan in tawng kherin ka ring bik lo. Engkim hi Pathianin kan ṭhatna tura a lo ruat vek a nih zawk hi,"ka ti ta zawk a. Ni e, a thleng tur ang ang chu a thleng vek tawh a. Khawih chhiat kan ni lo tih pawh kan hre tawh a, chhungkaw ṭha leh fel tak kan tawn phah zawk a, kan tan chuan chu tluka hlu chu a awm bik chuang hleinem.
_____________________
Pu Chhuantea te chhungkua chu kan chungah an ṭha in an fel em em a. An kiangah chuan kar 1 zen zawn chu kan awm ve ta. Pu Chhuantea chuan Mahriati hnenah chuan,"Mahriat, i chhungte hi zawn chhuah i duh em? I duh chuan engtik hunah pawh ka inpeih reng a nia,"tiin 5Mahriati chhungte zawn chhuah a inhuam thu chu a sawi ve mawlh mawlh a.
"Chhungte an la dam si chuan, an zinga chen tluk a awm chuang hleinem. Mahse, tunah chuan an awmna chin pawh hriat a ni tawh si lova,"a ti chuai raih mai a. Pu Chhuantea Ina kan awm hnu hian, a hmasa berah Mahriati chhungte chu biak kan tum nghal a. Mahse, tumah biak pawh theih kan neih tak loh avangin keimahni ngei an Inah chuan kan va kal ta kha a ni a.
Mahse, kan rin loh leh beisei loh deuhin an In ropui leh lian tak mai chu, chhungkaw dang hnenah an lo hralh tawh a lo ni a. An In leitu te lah chuan an chin chang engmah hriat an nei zui bik si lo, hrilhhai takin kan let leh ta ringawt a nihkha.
Pathianni zing a ni a, Pu Chhuantea chuan chhung inkhawmnaah hun a chang a. Bible chang a chhiar zawh hnuah, tihian a sawi a,"Matei leh Mahriati te khan 'Pu' ti a min ko tawh lovin, 'Ka pa' tiin min ko tawh turin ka duh che u a ni. Ka tan chuan ka fanu te in ni a, fate chuan a pa chu 'Ka pa' tiin an ko ṭhin. Chuvangin, vawiin aṭang chuan 'Pu' ti a min koh hi ka pawm thei tawh lo ang. Tin, ka nupui pawh hi 'Ka pi' ti tawh lovin, 'Ka nu' in ti tawh ang. Anni hi in laizawn te an ni tawh ang a, hrehawm taka hun in hman kan phal tawh dawn lo a nia aw,"a ti a, a thusawi vang chuan ka lawmin ka hlim kher mai.
Ka in rin hman hma hauhin ka biangah mittui a rawn luang a. Mahse, lungngaihna mittui ni lovin, hlimna mittui a ni.
Chaw eikhamah chuan inkhawm turin kan in siam malh malh a,"Ka naupan lai aṭang khan hetiang chhungkuaa awm hi ka chak ve ṭhin lutuk a. Tunah hian chu ka thil chak em em chu ka tem chho ṭan mek niin ka hria,"a rawn ti ve siam siam a.
Kei hi ka vanduai viau emaw ka lo in ti ṭhin a. Mahse, Mahriati nun ka en hian kei chu vannei tak ka la niin ka hria. Nu leh pa kar aṭanga seilian ni lo mah ila, ka nu khan min hmangaih em em a. Ka tan a ṭawngṭai reng ṭhin.
Mahse, Mahriati erawh hi chu nu leh pa kara seilian ni mah se, a nun chu nuam takin a hmang ngai lova. Nu leh pa hmangaihna a dawng ngai hek lo, an In chhung chu a ning em em ṭhin a. An In chhung lum aiin tual laia tal vel chu nuam a ti zawk ṭhin. Kei erawh chu ka nu in min boral san hnuah pawh ka putea te bulah thlamuang takin ka la awm thei a, ani ai hi chuan ka la vannei zawkin ka hria.
Inkhawm kal tur chuan kan in zui chhuak diah diah hlawm a. Thui pawh kan kal hma in, Amuana chu kan lam panin chak deuh hian a rawn tlan a. A hnungah Police motor in a rawm um nghal bawk a. Thui lo te min tlan pelh hnu chuan Silai a puak ta, Amuana chu lei charah chuan a let nghal tawp a.
Engmah dang ka ngaihtuah hman tawh lo,"Amuan,"tiin ka âu vak a, lei chara let reng Amuana awmna lam pan chuan ka tlan phei nghal hlawk hlawk a. Midang ho chuan min lo um nghal bawk a, Police lam pawn,"Tumah rawn hnai suh u,"an tih tuarh tuarh pawh ka hre thei. Mahse, chung thu te chuan min dang zo lo. Amuana hliam tuara a let reng chu ka pan hnai a, a ngal rekah an kap niin ka hria. A ngal rek vel aṭang chuan thisen thar lam hi a rawn chhuak ngiai ngiai a. Amuana lu chu ka dawm a, ka mal chungah ka muttir a,"Amuan, i bulah ka awm reng a nia aw. I ṭha leh vat mai ang, engmah hlauh thawn tur a awm lo a nia,"ka ti mawlh mawlh a.
"Nula, lo kiang rawh le. Ani kha Jail tang tlan chhuak a nih kha,"tih pahin Police 1 chuan a Silai chuan Amuana chu a rawn tin a. Rei lo te hnuah Mahriati leh midang ho pawh chu an rawn thleng phei deuh nghal mai a.
"Ka pu, khawngaihin ani hi tina lo hram ang che u aw. Ka ngen tak meuh meuh che u a ni,"tiin Police ho chu ngen tak te in ka ngen lawm lawm a. Police chuan,"Kan tina dawn hleinem, tun ṭum pawh hi a din duh loh vang chauha kap kan nihkha. Motor-ah hian kan phur ang a, Damdawiin lamah kan kal pui ang,"a ti a, Amuana chu Police dang 2 te chuan an rawn kai tho a. Motor lamah chuan an in kuah phei a, ka zui phei zel a. Midang pawh chuan min rawn zui ve zel bawk a,"Amuan, engmah hlauh thawn tur a awm lo a nia aw. I tan ka ṭawngṭai reng ṭhin a nia, i ṭha leh vat mai ang,"ka ti zui mawlh mawlh a. Amuana chuan engmah a sawi lova, mit meng dul raih hian min rawn melh a. Nui lui tih hriat tak hian min rawn nuih a, Police motor-ah chuan an kuah lut a. An tlan ta nghal a, ka hawi let leh chiah chu ka hnungah chuan an lo ding ṭhap hlawm a.
Ka pa(Ka pa tiin ka sawi tawh dawn a, in lo hrethiam tawh mai ang chu maw) chuan,"Mate, engmah lungngaihna tur a awm lo a nia. Pathianin a veng ang a, a damṭha leh vat mai ang. Hei, inkhawm ṭan a hun ṭep a nia, i kal teh ang u,"tiin min rawn hnem a, Biak In lam pan chuan kan in zui chho ta hlawm a.
Amuana chu ka ngaihtuah takzet a ni. Engtinnge Jail aṭang chuan a rawn tlanchhuah theih reng reng le? A hliam kha a na viau ang em le? Ka ngaihtuah ang hian min ngaihtuah ve ang em le? Heiham zawhna hlir mai a ni. Ka pa chuan ka rilru hria ni awm tak hian,"Mate, Amuana chu engtinmah a awm dawn hleinem. A dam leh vat mai ang, a ngal rekah khan an kap hliam a. A dang chu a ṭha vek a nia, tunkar Zirtawp ni khian Court-ah a in lan dawn a. Chutah chuan Mahriati nen in pahnihin in lan ve a ngai dawn a nia,"a rawn ti a.
Ka bulah chuan a rawn ding a, chhan mai ngaihna pawh ka hre lo. Ka ngawi reng a, amah bawk chu a rawn ṭawng leh a,"Pathian hnenah engkim thlen ila. Ani chuan ṭha a tih angin ro a rawn rel mai ang, lungngai reng reng suh aw. Engkim a ṭha leh vek mai ang,"a rawn ti dam thluam mai a.
"Ni e, kan rin Pathian a awm a lawm. Ani chuan ṭha a tih angin ro a rawn rel ngei ngei ang,"ka ti ve a.
Amuana chuan Pathian hmel a lo hmuh ve theih nan, kan ṭawngṭai sak ve reng ṭhin a. Ka pa unaupa hnen aṭangin a chanchin pawh kan hre ve zel a, Pathian zarah ani pawh a damṭha chho ve zel a.
Court-a a in lan hunah chuan a chungah engtinnge ro an rel sak ang? tih ngawt chu ka rilrua zawhna awm a ni. Kan hriat loh lai khan eng thil nge a lo tih ṭhin le? Eng tiang taka thukin nge khang misual ho nen khan an lo in zawm le? Zawhna chhanna awm lo chu ka in zawt ka in zawt ṭhin a.
Amuana hi chu misual hlawm tawp chu a ni lo. Ka chungah pawh a ṭha em em reng a, mi lainatna leh khawngaihna a ngah a. Engkimah khan min ngaihsak em em reng ṭhin, a tawrh ai te hi tuar thei ni ila tawrh pawh ka inhuam a sin. Mahse, chu erawh amah Amuana hian min phalsak dawn hauh si lova.
GYPSY
CHAPTER--15(LAST CHAPTER)
By:- Rs Thangluah✍🏼
Amuan Court-a a inlan ni tur chu rokhawlhna eng emaw avangin ni 3 in an sawn hla a. Chumi hma chuan Amuana chu kan hmuh theih tur thu erawh hrilh hriat kan ni a, Amuana pawh chu hmuh ve ngei tumin kan inbuatsaih ve ta a.
Ninga ni a ni a, hemi ni hian Amuana kan turin Central Jail lamah kan kal dawn a ni. Ka nu leh pa te leh, Mahriati leh kei chu kan kal dawn a ni.
Ka pa(Pu Chhuantea te chhung) chhung hi kan chunga an ṭhatna hi rul dawn ni ila, kan dam chhung pawn kan rul zo seng lo ang. Keini ṭhian dun mai ni lo, Amuana chungah pawh an ṭha em em a. Engkimah puih an in huam bawk a, kan tan chuan anni tluka min hmangaih tu hi an awm in ka ring lo.
Central Jail chu kan thleng thla ta ngei a. A boruak chu a lo dang zar mai a, eng emaw ti takin chulai hmuna tang ho te chu ka lainat em em bawk a. Misual tak tak khung khawmna hmun ni mah se, an kiangah chuan Pathian a awm ve reng si a. Anni hi mihring ngaih ah chuan misual ber ber te leh mi tam tak endawng ni mah se, Pathian chuan hmangaih tawp lovin a hmangaih si a.
Rei vak lo kan ṭhut hnuah chuan Amuana chu vengtu pakhat nen hian an rawn kal a. Kan bula ṭhutna awlah chuan inthlahrun hmel tak hian a rawn ṭhu a. A hmuh ngai loh a hmuh vang a ni ngei ang, a hawi chhuak vak ngam lova. "Amuan, anni hi ka nu leh pa te an nih hi. Anmahni vang hian nun nuam kan hmang ve ṭan mek a nih hi,"tiin ka nu leh pa chu ka hmelhriat tir a.
Hun kan ngah loh vangin sawi tur tam tak ka neih pawh ka sawi vek a rem lova. Mahse, hei erawh sawi ngei ka duh a ni,"Amuan, kar leh lamah chuan Court-ah i inlan a ngai dawn a. Chutah chuan keini pawh kan rawn tel ve ang; mahse, engmah sawi lova ngawi renga i awm reng chuan i tan a hahthlak dawn a nia. Engvanga khang ho kha hum tlat nge i nih le? Ngatinge engmah i sawi duh loh?,"ka ti mawlh mawlh mai a.
Ngawi rengin ka hmel chu min en a, a mit mengah chuan hlauhna ka hmu tlat a ni. Ka kutah min rawn vuan a,"Te, chân che ka duh lo a ni,"a ti sawi sap a.
"Amuan, i ngawih reng khan i tihsual ni miah lovah pawh i tuar thei a sin,"ka ti leh a. Mahse, engmah a sawi tawh lo, ngatinge a mit menga hlauhna awm chu a reh theihna miah loh le? Khang misual ho khan Amuana hi engmah sawi lo turin an vau bet em ni le?
"5minutes a la awm e,"tiin duty pa chuan min rawn en a. Thu tam sawina hun a ni tawh lo tih ka hria, Amuana kutah chuan ka vuan a,"Ka ṭawngṭai ang che aw, i duh em?,"ka ti ta a.
Diktak chuan Amuana tan hian ka ṭawngṭai nasa ṭhin; mahse, a lu chunga kut nghata ṭawngṭai erawh harsa ka la ti ve tho mai. Tun ṭum erawh hi chu, a lu chunga kut nghata ṭawngṭai nghei ka duh a ni. Amuana chuan rei ang reng a ngawih hnuah,"Aw duh e,"a rawn ti hul hak a. Duty pa hnenah chuan ṭawngṭai min phalsak turin ka dil a, ani pawh chuan min lo phalsak ve mai a. Ka lawm kher mai, tichuan, zam tak chungin Amuana lu chunga kut nghat chuan ka ṭawngṭai ta a. Ka ṭawngṭai zawh chuan haw turin kan chhuak ta nghal a.
Pathianni zing a ni a, inkhawm turin kan insiam malh malh a. Mahriati chuan,"Te, nimin ka bazar khan ka pa ka hmu a,"a rawn tih chuan ka lo hlim ve kher mai,"Tak tak maw? An awmna i zawt em?,"ka lo ti nghal chûk a.
Mahse, Mahriati hmel chu a hlim hmel hauh lo mai,"Rangvamual lamah an awm a ni awm e. Ka nuṭa te erawh khawiahnge an aw a hre bik lo. Ka nu nen Rangvamual lamah mi huan enkawlin an riak ṭhin a, an hunawlah zu an thlawr ṭhin thu te min hrilh a. Ka rilru a na lutuk, ka awm loh chhung khan an lo darh vek a ni ngei ang,"a ti a, ka khawngaih ngei mai. Ka kuah a,"Lungngai reng reng suh, mihring siamṭhat nan khawdur a ngai an tih ṭhin kha. I chhungte nen chuan hlim takin in la awm ho leh ngei ngei ang tih hi ka beisei tlat a sin,"ka ti a.
"Ni e, chu chu ka duh dan pawh a ni. Nitin ka ṭawngṭainaah pawh ka dil hmaih ngai lo, nang pawn min lo ṭawngṭaipui ang che aw"a lo ti ve bawk a.
"Tehreng mai, Pathian chuan kan ṭawngṭaina hi a ngaithla em em ang,"ka lo ti ve vat a.
Chawhma inkhawm ban chuan KṬP Leader chuan an Ina leng lut turin min sawm a, Mahriati nen chuan inthlahrung takin kan tei lut ve ta a. Kan KṬP Leader chu Muanpuia a ni a, keini aiin upa mah se, û tia koh chu a duh miah lova. Tlangval fel tak a nih bakah tlangval tlawmngai tak a ni tel bawk a, kohhran leh khawtlangah nise a kul a taiin a in hmang em em bawk a. Nu leh pa tam tak chuan makpa atan an awt ru ve viau ṭhin in ka ring a ni.
Muanpuia te In kan lut chu ka rin loh leh beisei loh deuhin U Hriatpuia ka hmu tlat mai. Chhuah leh dawn in a tih chi si loh, a van hrehawm tak êm! Muanpuia chuan,"E kha, min thlen khalh a ni maw? I che rang hle mai,"tiin U Hriatpuia chu a fiam nghal zat a. In ngam taka an infiam danah an innêl thawkhat viau ang tih chu ka ringhlel lo mai ni lovin, ka hrethiam nghal a.
"Nula hmelṭha leh fel, inleng i nei dawn tih min hrilh khan phû namen lovin ka phûr tawh a lawm,"tih pah chuan nui hawk hawk chungin U Hriatpuia chuan min rawn melh a. Muanpuia chuan,"Ka ring reng a ni,"tih pahin a nui hawk hawk a, ṭhu turin min ti a rilru nghet lo takin ka ṭhu ve ta a.
Muanpuia chuan,"In in hre tawh tho a, inhmelhriat tir pawh a ṭul in ka hre lo,"tih pahin min rawn en a. Ngawi rengin ka lo nui mai a, Mahriati pawh chu za vak lo hian a lo nui suk a. Muanpuia vek chuan,"Kar leh Zirtawpni hian Central Jail lamah rawngbawlna an nei dawn a. Chumi hunah chuan zaia rawng bawl turin a duh che a,"a ti a.
"Tumaw?,"ka lo ti vat a.
U Hriatpuia zawk chu a nui hak hak a,"Nangmah maw le, Nula Lalramnunthari kha. I tello chuan engmah kan ti thei lo a nih hi,"a ti a, min rawn en a. Hriat loh karin ani hi Pathian thuhrilin a lo vak chhuak ṭhin tihna em ni le?
"Hmm awihawm kher loh,"ka lo ti bul hmuk a.
"Tak takin, nakinah i nu leh pa te pawh ka rawn hmu dawn a. Chumi hma chuan hmuh hmasak che ka duh a, hetah hian ka lo ti khawtlai che a nih hi."
"Ka zai ngai tawh hleinem. Bakah keini ang zai te chu tuman an ngaithla peih lo ang,"ka lo ti liam ve mai a. Ka thusawi erawh a ngai pawimawh lem lo, Mahriati lah chu U Hriatpuia ai aiin a lo phûr emaw tih turin a awm a,"Nia, zai lamah hi chuan nang tluk tur hi ka la hmu lo. Music tel miah lova, i zai te kha a nalh theih zia kha,"a lo ti ve bawrh bawrh bawk a.
U Hriatpuia chuan,"I zai ngaithla chak reng reng a ni vuiliam hi kan tam a sin. Chuan, in zin kawnga in thil tawn te pawh in sawi ve dawn lo'm ni?,"a rawn ti ve leh a.
"Ni e, khang hun harsa tak tak in tawn tak aṭang khan Testimony ropui tak in sawi ve ang chu,"Muanpuia chuan a rawn ti ve bawk a. U Hriatpuia sawmna chu eng ang pawn hnar tum mah ila, awmzia a awm dawn chuang lo tih chu a hre chiang tu te zingah hian ka tel ve a ni. Chawhnu inkhawm ṭan leh hma in U Hriatpuia te 2 chuan kan In lam panin kan inzui haw ta a.
U Hriatpuia chuan engtinnge ka awmna a hriat theih le? Ani hian min lo umzui reng tak tak em ni le?
Âaa eng pawh chu nise, Central Jail lama rawngbawlna chu puih ka hreh hauh lo. Amuana Court hun hma ni chiah a ni bawk a, pawi ka ti em em hran lo. Mahse, ka chhungte hian min phalsak ang em?
"Pa Chhuante, nangni in lo ni hlauh chu a vanneih thlak kher mai. Central Jail lama kan rawngbawlna chu min ṭawiawm ve thei ang em?,"tiin ka pa chu a han dil a. Ka pa chuan nui sâng chung hian,"E khai! Kei chuan ka phal vek a, a zai lai te pawh ngaihthlak a chakawm ka ti a. I nî kha dil chhin la, i nî thu thu a ni mai,"a tih chuan mak ka ti kher mai. Ka nu chu U Hriatpuia nî a lo ni reng a, anni hi chhungkhat hnai an lo ni reng a nih hi. Ka nu chuan,"Kei pawn Matei zai te chu ka ngaithla ve chak a lawm. A zai ṭhin tih pawh kan lo hre lova, aman a duh phawt te chuan kan hnial reng reng lo a nia,"a lo ti ve bawk a, ka lawm kher mai.
"Phal lo mah u la, hruai luih ka tum dawn tho tho a,"U Hriatpuia chuan nui hak hak chung chuan a ti leh hram a. Amah vek chuan,"E i ṭhianpa kha tunah hian Central Jail-ah a awm ve mek tiraw?,"a ti leh a.
"Aaa aw awm e,"ka lo ti zawi sap a.
"Ani kha ka hmuh dan chuan misual tak a niin ka hre lo. Venhim che a tum em mai,"tih pahin U Hriatpuia chuan min rawn nuih suk a. Engtinmah ka chhang lo,"Ni e, Amuana kha chu misual a ni lo a sin. Engkimah khan min ngaihtuah em em reng a, a bikin Matei ngat phei hi chu Vantirhkoh ang hialin a ngai ṭhin. Ka bulah te khan a sawi ve ṭhin,'Ani anga miṭha hi ka la hmu lo,'a ti ṭhin,"Mahriati chuan a lo ti ve luam bawk a.
Zirtawpni chu kan chuang kai ta, Central Jail lama kal tur chuan kan inbuatsaih malh malh hlawm a. U Hriatpuia te chuan kei leh Mahriati chu an motor ah min phur a. Ka pa te erawh kan motor in an rawn kal ve thung a.
Chawhma dar 9:30am velah Central Jail chu kan thleng thla ta a. Hotu lam te'n min lo buaipui nghal zung zung bawk a, keini lam kan in peih hnu chuan hotu lam te chuan tang ho chu an ko khawm ta a. Mi chi hrang hrang, in ang lo tak tak an rawn kal khawm a. Amuan hmel hmuh tumin ka lo hawi vel ruai a; mahse, ka hmu miah lo mai. Ngatinge le? Ka bula ṭhu Mahriati chu ka kheuh a,"Amuana i hmu em?,"tiin ka zawt ta nge nge a. Mahriati pawh chuan,"Aih hmu bik miah lo, ka lo zawng ru ve reng a,"tiin a lu a lo thing a.
Inkhawm ṭan a ni dawn a, ṭantu a rawn ding chhuak ta. Ṭantu in Bible chang a chhiar mek lai chuan, Amuana ngei mai chu ke baih suih suih chungin a rawn lut ve ta a. Mahriati nen chuan kan in melh a, kan ngaih a ṭha dun viau in ka hria. Ṭantu in hun a hman zawh chuan zai turin min ko chhuak ta a, zep lo chuan ka zam ve kher mai. Ka hmaah mi ṭhahnem tak an ṭhu a, min thlir ve ṭhap hlawm si a. Chumai a ni lo, Amuana pawh a awm a ni, rilru ṭawngṭaina nei zui mawlh mawlh chung stage-ah chuan ka ding a. Zai tur chuan ka inbuatsaih a, 'Ngawlvei te inhlanna' tih hla chu ka sa ta a.
"Keini zawng hrem zia rêng kan ni,
Kan thil tih man choh hmu kan ni;
Aw Isu, Davida fapa min khawngaih rawh
Min kal pel lul suh."
Tih lai chang ka sak lai chuan, tlar hnung lam aṭang chuan mipa 1 hi a rawn ding a. Chung lamah ban pharin a ṭap zawih zawih mai a, rilru a khawihin hnuk a ti ulh kher mai.
Hla chu ka sa zo ta, kal mai tum a ka inher lai chuan. Tlar hnung lam aṭang chuan ka âw hriat ṭhan em em hian,"Khawngaihin 1minute lawk,"tih pahin a rawn ding a. Ani chu tudang ni lovin, Amuana a ni, ka ding nghal chawt a. Eng nge sawi a tum tih chu kan ngaichang ṭhap hlawm a, a âw a thian khak khak a,"Khawngaihin hla 1 min sak sak leh thei ang em?,"a rawn ti tawl mai a. U Hriatpuia chu a rawn ding chhuak a,"Ṭhianpa, eng hla nge i duh ang?,"tih pah chuan ka bulah a rawn ding a.
Amuana chuan,"Lungngaihni leh lawm lai ni hian....tih hla kha,"tih hla kha tiin in thlahrun hmel zet hian a rawn ti leh a. U Hriatpuia chuan min rawn melh a,"I zai leh thei ang tiraw?,"a rawn ti a. Ka lu ka lo bu nghut a, U Hriatpuia vek chuan,"Awle i hla request chu ani hian a rawn sa leh dawn e,"a ti a, Jail tang ho chuan lawm tih hriat takin kut an beng dar dar hlawm a.
Amuana hla request hi track kan siam hman loh vangin sak pawh ka lo tum lova. Mahse, Amuana'n a rawn request takah chuan Acoustic Guiter nen ka sak mai a ngai dawn a ni. Guiter chu keimah ngeiin ka perh a, Amuana hla request chu ka sa ta a;
Ka sak chhung zawng chuan Amuana chu a ding tluan parh a, chung lamah ban pharin a mit a chhing a, ka hla sak chu min lo zawm ve reng tih ka hmuh chuan ka hlim tehreng êm! Hun rei tak ata ka ṭawngṭaina kha chhan in a awm ta niin ka hria. Ka zai zawh chuan U Hriatpuia chu Pathian thuchah sawi turin a rawn in puahchah ve ta a.
"Awle, a hmasa in in zavaiin chibai vek u le. Bible chang pawh tawi te chhiar ka duh a,
2 Samuela 22 : 7
Ka manganin LALPA chu ka ko țhin a, A ni, ka Pathian chu ka au țhin:
Tin, ani chuan a biak in ațang chuan ka aw a hria a, Tin, ka au thâwm chu a bengah a lût ta a.
Helai hmunah hian ṭum hnih kan rawn kalna a ni tawh a, ṭhenkhat chuan min hre nual tawh ang ka ring. Keini Team ho hian theih tawpin in tan kan dil ve ṭhin a, engtikniah emaw chuan kan dilna chu chhanin a la awm ve ngei ang tih ka ring a ni. Mihring ngaiah chuan misual ber ni mah u la, Pathian mit hmuhah chuan in ang khat vek kan ni si a. Kan Bible chang chhiara kan hmuh ang khan, harsatna kan tawh a, kan mangan tawpah chuan Pathian bak hi auh tur kan lo nei lo a ni. Khawvel thilah te kan tlan lawp lawp ṭhin a, kan vanglai kan chen a, kan hlim a ni.
Amah erawh chu Lalpa hre lova, vanglai chen erawh a pawi zia kan hre ṭheuh ngei ang. Kei ngei pawh hi tun hma chuan Kohhrana in hmang em em chung si hian, eng emaw tih khawm nikhuaah zu han lem ve zauh te pawh ka hrat ve ṭhin. Chuti chung chuan zu ngawl vei te leh damdawi ngawl vei te chu ka hmusit ṭhin. Mahse, Kohhran huang chhungah erawh miṭha ber angin ka awm ṭhin. Hun a lo her liam zel a, ka thil tih chuan min vaw let a, midang hriat si lohvin hrehawm ka ti a. Ka nun chu hahthlak tih chang lah ka ngah; mahse, tumah ka hrilh ngam si lo. A tawpah chuan Pathian bawk ka pan leh nge nge a, chuta ka thil hriat chhuah chu. Kohhran kha kawrah hmangin rawng ka lo bawl a, ka nunah hmuh tur a awm si lo tih hi a ni. Mahse, engkim chunga rorel tu chuan ka sualna te min ngaidamin a rawngbawl turin kei hi min ko ta si a.
Helai hmunah hian khawvelin thiam loh a chantir vang che u in khung khawm in ni a. Mahse, Pathian chuan a hmangaih takzet che u a ni. Pathian mit hmuh ah thilsual tam tak lo ti ṭhin tawh mah u la, ani chuan a hnena in kir hun tur a nghak reng a. In tan a ban a phar reng a sin, 'Keichu ka sual em mai, Pathian pawn min ngaidam duh tawh lovang,'tiin i inkiltawih a ni maithei. Mahse, inchhir a a hnen i pan a, i in lam let phawt chuan, Pathian chuan a ngaidam ang che. Ani chu hmangaih Pathian a ni si a, i thlarau kha a boral a phal lo a sin. Tunah hian a hnen i pan hun a nghak reng a sin, i thinlunga a sual hnathawh châkna te kha Pathian nen in hneh thei a sin. Pathian hnenah a puihna dil rawh le, tunah khan. I au thawm chu Lalpan a lo ngaithla ang a, a pui ang che.
I awmna hmun aṭang khan Pathian chu au rawh le, ani chuan ṭawngṭaina chu a ngaithla ang a. A chhang ngei ang, dil la, nghak ang che. Ani chu tlai ngai lo Pathian a ni si a, i awmdan tur zawng zawng kha Pathian hnenah nghat la. Amah chauh chu ring la, a pui ang che. Kan thusawi te Lapan kan za tan mal sawm rawh se, Amen,"Music a rawn ri riai riai a, U Hriatpuia chu a zai ta a. A zai lai chuan tang ho zing aṭang chuan mi 5 vel hi an lo ding chhuak a. Chung zingah chuan Amuana pawh a tel ve tih ka hre nghal a, ka van hlim tak êm!
U Hriatpuia chuan,"Testimony sawi duh tan, tunah hian hun kan hawng dawn a. A duh apiang tan sawi theih a ni ang,"tiin a duh duh tan Testimony sawi hun chu a hawng ta a.
Tumah an rawn ding chhuak tawh dawn lo emaw tih hnuah, rin loh leh beisei loh deuhin tlar hnung lam aṭang chuan Amuana chu a rawn ding chhuak ta a. Testimony sawi turin dawhsan lam chu a rawn pan chhat chhat a. Zam hmel tak hian min rawn en a, a nui suk a. Microphone awmna lam chu a pan phei ta a, a âw a han thian khak khak a. A Testimony chu heti hian a rawn sawi ṭan ta a,"Kei hi Zomuanpuia ka ni a, helai hmunah hian Damdawi tawlh leh rukruk thubuai vanga tang ka ni. Drug addict ka ni a, Pathian awm hi ka ring ngai lo bawk. Ka hriat theih chinah hlim taka nun ka hman hi ka la hre lo a ni. Ka hlimna ber ni a, ka hriat chu ruihhlo hi a ni a. Ka ruih loh a, harhfîm taka ka awm hian hrehawm ka ti ṭhin.
Chutiang reng renga nun hmang chho chu ka ni a, ka nu leh pa te chuan thuṭha tin reng min hrilh ve bawk ṭhin mah se, ka zawm ngai lo. Zawm chu sawi loh ngaihthlak pawh ka ngaithla peih ngai lo a ni. Chhungte thu awih duh lo, ruih tur hlir ngaihtuaha khawsa ta chu, chhungte tan hnawksak kan ni a. In aṭanga pet chhuah ka ni ta rêng bawk a, In aṭanga ka chhuah hnuah chuan ani nen hian kan in tawng hlawl mai a,"ka lam hawiin min rawn nuih a, a sawi zawm leh a,"Ka Testimony ka sawi dawn chuan, ani hi ka sawi lan ngei ngei a ni. A tirah chuan ani hi hmeichhe nikhua lo leh ruihhlo ngâi tho ni turah ka ngai a. Mahse, ka rin ang chu a lo ni hauh lo mai. Khawvel hmeichhiaah hian ani aia fel leh ṭha hi an awmin ka ring lo hial zawk. Ani hi awm lo ni se, helai hmunah hian thusawi turin ka ding kher tawh lo maithei a ni."
A chawl det a, tuisik chu a lem ri khalh a"Ani nen hi chuan lei leh van ang kan ni. Ani hi chu sawiselna tur ka hre lo, engtiklai pawn Pathian a âu reng ṭhin. Kei erawh Pathian awm ring miah lo tu ka ni; tichuan, Pathian awm ring lo tu leh Pathiana rinna nghat tlat mi chu harsatna in min tlakbuak avangin loh theih lohna in kan awmdun a ngai ta a. Ani chanchin erawh hi chu, ka sawi thui tam lo mai ang a. Mahse, ani min ṭawngṭai sak zara hetia awm thei hi ka ni tih erawh ka sawi lang lo thei lo a ni. Harsatna tam takin min tlakbuak a, riahna tur nei lovin hun rei tak kan vak vai a. Pawisa leh ei tur kan nei hek lo, kei lah ka ruih tur damdawi ka neih reng a ngai bawk a. Chutih hunah chuan pawisa ka hmuh theihna tur a nihchuan engpawh tih ka in huam ṭhin. Pawisa ka hmuh theih na tur chuan, thilsual tam tak ka tih phah rêng bawk a. Chu erawh in thiam lohna ka nei ve ṭhin, a chang chuan ka nunna te hi lak mai duh chang te ka nei ve ṭhin. Mahse, chu erawh ka ngam ṭhin si lo."
Rei lo te a ngawi a, a sawi zawm leh a,"Kei hian Pathian hi a awm ka ring ngai lova. Mahse, he nula thianghlim erawh hi chuan Pathian a awm thu chiah min hrilh thung ṭhin. Riahna tur kan neih loh chang te hian thlanmualah te kan riak mai ṭhin a. Chutiang hmunah pawh chuan ani hian ṭawngṭai a ṭhulh ngai chuang lo a ni. Kei lah Pathian awm ring lo na na na chuan'Hetiang khawpa hun harsa kan tawk chung pawh hian, Pathian awm chu i la ring a maw?' tiin ka zawt hial ṭhin. Mahse, ani chuan'Pathian chu khawi hmunah pawh a awm'tiin min chhang mai ṭhin. A ṭawngṭai dawn apiangin tel ve turin min ti ṭhin a; mahse, ka tel ve ngai lo. Ṭawngkam na tak taka ka ṭawngkhum ṭhin lai pawn, ani chuan engtinmah min ti let ngai lo. Pathian awm ring lo mah ila, ani chuan Pathian awm a ring mai ni lovin. Amah Pathian chu a ring a, a vuan tlat ṭhin."
"Ani nen hian hun rei tak kan vak vai a, chutih chhung chuan a rin Pathian chu a phatsan ngai lo. Chumai a ni lo, ka tan a ṭawngṭai bang ngai lo bawk. Mahse, ka tan a ṭawngṭai reng chung pawn kei chuan'Ṭawngṭai ṭawngṭai sak ka ngai lo'tiin ka ṭawngkhum fo ṭhin. Mahse, ani chuan ka thusawi te chu a ngaithla duh ngai lova, Pathian ka hnaih theih nan min dil sak zawk ṭhin."
"A sei lutuk loh nan kai tawi ta mai ila. Khatia Police in min man tak hnu khan, kan awm hran a ṭul ta a. Ani ka kianga a awm loh meuh chuan mipa meuh pawh hrehawm ti taka mittui tlak chang ka nei ta fo mai a. Mahse, ani kha khawiah pawh awm se, ka tan a ṭawngṭai reng ṭhin ang tih hi ka ring ve ringawt mai a ni.
Tichuan, Central Jail a ka luh tirh khan, khawsikin min tlakbuak ta char char a. Chaw ka ei thei lova, zanah ka muhil thei hek lo. Zan 5 lai mai chutiang chuan ka awm a, zan 5 na turah chuan ka rilruah ṭawngṭai a rawn lang ve ta tlat a. Mahse, ka luhlul chhuahin ka ṭawngṭai ta chuang lova. A tuk khua a rawn var a, ka khawsik pawn ziaawm lam a pan ṭan ta a. Ka chaw ei te pawh a rawn tui chho ṭan a, ni 8 na velah chuan ka damṭha a ni deuh tawh mai. Ṭawngṭai lam pawh rilruah a lang leh ta lo, rilrua lian ber chu engtinnge ka ruih tur damdawi ka hmuh theih ang tih a ni ṭhin. Tichuan, hun a liam ve zel a, nizan hmasa ṭang khan ka ke veilam ruh hi a chhan hriat miah lovin a rawn na ta vak vak mai a. Nachhawkna pawn min chhawk zo lova, nizan hmasa leh nimin nileng chu na tuarin ka mu a ni.
Damdawiin lama min kalpui an tum lahin keiin ka duh lo ve tlat bawk si a, ka nâ chu a dam leh mai ka ring a ni. Tichuan, nizanah khan dar 8:00pm vel aṭangin a hma aia let in a rawn na leh ta a. Awm ngaihna pawh ka hre lo, na ka ti lutuk chu ka khur ngat ngat a ni ber mai. Mahse, ka natna tawrh chu tumah ka hrilh duh lova, keimahin ka tuar ngat ngat a. Zan dar 11:00pm ah pawh a na chuan ziaawm lam a pan thei si lo, ka mangang chuan âwka chhuah meuhin,"Lalpa, min pui mawlh teh,"tiin Pathian awm ring ngai lo tu khan Pathian ka âu ve ta. Mahse, chawp leh chilhin ka na chu a dam nghal mai lo. Zing lam dar 1:30am ah chuan a zia tawh khawp mai, a awih awm loh hial zawk a ni. Zing khawvar hnu phei chuan ka la kal ṭha thei lo tih mai loh chu, na reng reng a awm tawh lo. Helai hmunah nangni in rawn kal dawn tih ka hriat phei kha chuan ka hlim takzet a ni.
Tukin zinga ka rawn luh khan beisei loh deuhin Matei leh Mahriati te ka rawn hmu bawk a, khatih laia ka hlimna kha teh theih nise, khawvela tehna ṭha ber pawh hian a teh chhuak zovin ka ring lo a ni."
"A tawp berah chuan, bang lova min ṭawngṭai sak ṭhin tu Matei bulah hian ka lawm tak zet zet a ni. Ani hi awm lo se, tunah pawh Pathian hi a awm ka la ring lo ang. Mahse, tunah chuan ani min ṭawngṭai sak zarah Pathian hmel chu ka lo hmufiah ve ta a ni. Lalpa chu fakin awm rawh se, Halleluiah,"tiin a âu ṭhawt ṭhawt a, ka van lawm tehreng êm! Ka biangah chuan lawm vangin mittui a rawn luang zung zung a, ka ding a,"Lalpa ropui ber rawh se,"tiin ka theih tawpa ringin ka âu ve ta a.
Bang lova Pathian hnena ka ṭawngṭaina rah chu chhanin a awm ta a. Amuana leh Mahriati te pahnih chuan nunthar an lo nei ve ta. An zingah khan cheng lo ila, anni kha hmangaih lo ni ila, tun hun hi kan thleng dawn si lova. Pathian hian heng riangvai fate leh ruihhlo ngâi te tan hian hna ropui tak min lo pe a lo ni reng si a. Tun aṭang chuan heng ho tan hian Pathian hnenah ka dil dawn a ni. Pathian hmel an hmuh a, nunthar an neih theih nan theih tawp chhuahin an tan ka bei zel ang.
----A TAWP TA----
Comments