GYPSY
CHAPTER--11
By:- Rs Thangluah✍🏼
Police in kan awmna an rawn luh chhuah hma ngei a kan chhuah a ngai si. Amuana pawh a beidawng ve takzet tih ka hria,"Helai hmun lo hi chu in hum himna hmun ka hre lo a sin maw le,"a ti ve nang nang a.
"Amuan, keini chuan engkim chunga ro rel tu Pathian kan neih kha. Eng pawh nise, a hnenah engkim thlenin ka ṭawngṭai dawn a. Khawngaihin i mit lo chhing ve ang che aw,"ka tih chuan a ngawi reng a, min hnial lem lo. Mahse, ṭawngṭai ka rawt chu ṭul a ti vak lo tih a hmelah chuan a lang reng mai.
"Aw Lalpa, engkim chunga ro rel tu i ni a. Tunah hian keini hian kan mamawh takzet che a ni, khawngaihin min pui hram teh. Khawngaihin, i âng chhungah min hum hram ang che aw,"tiin ka dil mawlh mawlh ringawt a.
Kan chungah chuan eng pawh thleng dawn se, Pathian kutah ka in nghat tawp a. Ani'n ṭha a tih angin kan chungah ro a rel ngei ang, zan dar 7:00pm rik hma in chu lai hmun chu kan chhuahsan ve ta. Mahse, thui pawh kan kal hma in Police Motor pakhat hi kan lam panin a rawn tlan ta vûk vûk mai a. Amuana chuan,"Tlan ang,"tih leh min kaih chu a rual nghal a. A rem lai laiah chuan kan tlan chhe nghal dawr dawr a. Mahse, thui kan tlan hman lo chiang kher mai, Police ho chuan min hual bet vek tawh a ni. Min man a, min hnungkhir vek a, hand cuff min bun tir nghal vek a.
Police Motor-ah chuan min nam lut nghal rawk rawk a, sawi tur a vang duh ngei mai. Aizawl P/S lam panin min tlan pui nghal vûk vûk a, a van beidawn thlak ngai ve le! Min veng tu Police 1 chuan Walkie-Talkie hmangin tu emaw a bia a,"Sir, mi 3 chu kan rawn phur phei mek e. Mipa 1 leh hmeichhia 2 an ni a, an tawm buk erawh luh chhuah turin ka nau te mi 30 ka tir phei leh mek e,"a ti mawlh mawlh a. Police ho hian min man chhan tak pawh ka la hre lo, Mahriati pawh chuan a lo la hre bik lo a ni ngei ang,"Pu te u, engvanga min man ngawt nge in nih le? Tin, ka ṭhiannu phei hi chu mi thianghlim a ni a, hetianga in ti hi in la chhir ngei ang,"a ti leh a. Mahse, kut zai zir in Mahriati chu insum rih turin ka khap nghal vat a, engmah a sawi zawm ta lem lo.
Police pakhat chuan,"Hmeichhe awmṭha duh lo ho kha in ni maw? A hma khan 3 in i si a, khawnge 1 hi?,"a nui huah huah a. Keini ṭhian erawh tumah kan nui lo, kan ṭawng lova ṭawng kan tûm hek lo. Hnuai lam kan bih ngar hlawm a, Police pa thusawi chu kan ngaithla liam vel mai mai niin ka hria.
P/S kan thleng phei ta, Lock up-a min khung hma chuan thu min zawh fiah tur an neih vangin chair hran ṭheuh ah min ṭhut tir vek a. An pu ber chuan min en chîk kher mai, a ṭhutna aṭang chuan a rawn ding chhuak a,"Nangni hi ka tan chuan mithar in ni lem love. Eng pawh nise, zawhna ka zawt dawn che u a. Hawihhawm taka min chhan ngei ka beisei dawn a nia,"a ti a, a kekawr ipte a zen a, ngil takin a ding auh mai a.
Amuana chu a pan hmasa ber a, a hmaah a ding a,"No.4 kha tu hnenah nge i hlan chhawn ṭhin?,"chhei raw, Amuana thil tih ṭhin chu man chhuah a ni ta. Kan hma bak chu a ko hle mai, Amuana chuan engtinmah a chhang lo. Police pa chu a thaw deuh hak a,"Luhlul chhuah i tum chuan a tih dan dan ka thiam ve tho a nia aw,"a ti leh a. Amuana chuan engtinmah a la chhang chuang lo, hepa luhlul zia hi chu aw. Police pa chuan Amuana khabeah chuan a dawm a, hnaiah a melh a,"Tlangval, engmah i sawi dawn lo maw? A ṭha e,"tih pahin Amuana bekah chuan a hnek ri chawk mai a. Amuana chu a ṭhutna aṭang chuan a hlawm thla tawl mai a, Mahriati nen chuan ka lo ṭe ṭhawt nghe nghe a. Amuana chu rum pawh a rum chhin eih lo, hetiang em em mihring luhlul hi ka vawikhat hriatna a ni.
Police pa pawh chuan ngawi rengin a melh tlawk tlawk a,"Constable, Lock up-ah khan lo va dah la. Anni 2 hi ka lo be leh ang e, ani kha chu nakinah ka be leh mai ang,"a ti a, ka rin aiin a insum thei zek mai.
"Nangni hi chuan eng emaw min hrilh ka beisei tlat a nia,"tiin ka hmaah chuan a rawn ding a. Amuana a hnek vanga ka hlauhthawnna kha a la reh fel lo bawk a, ka tirilah ka la khur thei nia. Mahse, he Police Officer hian keini hmeichhia te hi chu kut min thlak duhin ka ring lo a ni,"In ṭhiana hian tu hnenah nge damdawi hi a hlan chhawn ṭhin?,"tiin chang fak hian min zawt a. Engmah kan hriatpui si lo, a van hrehawm tak êm!,"Ka pu, engmah kan hriatpui lo. A thil tih chu kan hria; mahse, tu te nge a hlan chhawn ṭhin tih hi kan hriatpui lo a ni,"tiin ka chhang ve mai a.
Police Officer chu a ngawi reng a, Mahriati awmna lamah chuan a phei leh a,"In ṭhiana hian tu hnenah nge Damdawi hi a hlan chhawn ṭhin?,"tiin a zawt leh a. Mahriati pawh chuan ka chhan dan ang tho chuan a lo chhang ve leh mai a. Police Officer chuan min en vang vang a,"Immm dawt in sawi lo ang tih ka ring e. Mahse, hei vang hian in him tihna a la ni lo a nia,"tiin kan kut a hand cuff min bun tir chu a phelh a. Amah ngeiin Lock up lamah min hruai phei ta a.
"Amuana hian ngatinge engmah a sawi duh loh le?,"Mahriati chuan a rawn ti a. Ni e, kei pawn Amuana ngawih reng chhan hi ka hre hauh lo mai, chhan eng emaw tak chu a awm a ni ngei ang.
"Ka hrethiam bik lo, midang nen kan hriat lohvin inzawmna an ei emaw ni dawn le?,"ka lo ti ve bawk a. Lock up chu a nuam lo kher mai, ka pian a hnu lamah Lock up ka vawikhat luhna a ni a. Tuman min hmu in min rawn hre kher lo mah se, ka zak a ni. Mahriati pawh chuti ve tho chu a lo ni a,"Suah sual rawng bawl in, tal hiar ve viau ṭhin mah ila. Lock up hi chu ka lut ngai lo a sin le, tun ṭum zet chu a nuam lo khawp mai,"a lo ti ve nang nang a.
Rei ngial Lock up-a kan awm hnu chuan min hruai lut tu Police pa bawk kha a lo kal leh a,"Rawn chhuak ru le,"tih pahin a rawn hawng a. Mahriati nen chuan kan chhuak rang kher mai, a dawhkan lamah min hruai phei a,"Zawhna ka zawt leh dawn che u a. Ṭha taka min chhan ka beisei a nia,"a ti leh a.
"Engmah in hre lo tak tak maw?,"fiah fel fai tak hian a ti leh a.
"Aih, Sir, engmah kan hre lo takzet. Zanah chuan a chhuak ṭhin tih chu kan hria; mahse, tu te nge a hlan chhawn ṭhin tih hi engmah kan hriatpui ngai lo,"tiin ka chhang leh a. Mahriati pawh chuan,"Ni e, Sir, engmah kan hriatpui lo a ni. Zanah hian a chhuak ṭhin a, a chhuahna erawh min hrilh ngai lo. A thil tih erawh kan hria a, keini pawn tawp turin kan ti ṭhin. Mahse, hna thawh tur kan zawn lahin thawh tur kan hmu zo si lova. Pawisa kan mamawh ve bawk nen, kan awmdan hrehawm tur zia chu min hriatthiampui pha lo zawk ang,"a lo ti ve bawk a.
Police Officer chuan ngun zet hian min en a,"Umm a ṭha e, eng pawh nise Lock up-ah chuan kan dah tawh rih lo ang che u. Mahse, chhui zui reng in ni dawn tih erawh chu hre reng ang che u,"a ti a, Station aṭang chuan min sezawl chhuah ta ringawt a.
Mahriati nen chuan kalna tur pawh kan hre lo. Station aṭang chuan kan inzui chhuak hnak hnak a, Amuana erawh engtinnge a awm tih kan hre zui ta lo. Police pa lah khan a chanchin engmah min hrilh si lova, keini lah in lo zawh nachang kan hre bawk lo nen, a buaithlak ngei mai.
Kan hun tawn chu a khirh takzet a ni. Pathian hnenah ka rilru in ka ṭawngṭai mawlh mawlh a,"Aw Lalpa, khawngaihin min pui mawlh teh,"tiin ka dil mawlh mawlh a. Mahriati chuan,"Te, Amuana kha engtinnge an tih ang le?,"a rawn ti a. Chhan dan tur ka hre lo kher mai, min rawn kal pel tu te lah chuan min en hrek hrek hlawm bawk nen, a nuam lo duh kher mai.
GYPSY
CHAPTER--12
By:- Rs Thangluah✍🏼
Mahriati nen chuan pan lam tur pawh hre lo chuan kan tei kan tei a. A tawp a tawpah chuan Zodin Over bridge-ah bawk chuan kan chuang kai leh a. Chulai hmuna awm chu a nuam lo duh kher mai, nuam lo tih tawh sa nak alaiin kan lam pana U Hriatpuia rawn kal chu hmuh hmaih theih a ni si lo. Bih ruk tum sateh mah ila, bihrukna hmun tur a awm tawh lo. U Hriatpuia chu ka bulah a rawn ding chat a,"Thil thlen dan hi a mak kher mai. Hmeichhe ṭha tak i ni ṭhin emaw ka tia, i lo mak hle mai,"a rawn ti ta bawrh bawrh mai a.
Chutia min ânkhum bawrh bawrh chu Mahriati chu a lo palzam thei hauh lo mai,"Ṭhiana, engvanga khatianga rawn ânkhum ringawt kha nge i nih a? Eng ang harsatna nge kan tawh a? Eng dinhmunah nge kan din tih pawh i hria em ni?,"a rawn ti zek mai a. U Hriatpuia chuan,"Khawngaihin kan inkarah hian rawn inrawlh lo hram ang che,"a ti chang fak a, Mahriati chu rum fê hian a melh khui khui a. Chutiang taka U Hriatpuia'n Mahriati a ti chu ka lungawi vak bik lova,"U Hriatpui, khawngaihin min ngaihven tawh lo turin ka ngen a che. Ka nun aṭang hian kalbo rawh,"ka lo ti ve hmak mai a. U Hriatpuia chu a nui suk a,"Huh i duh duha thu i pek theih ka ni lo,"a ti duh chauh mai si. Hetia kan inhnial reng chuan kan mualpho leh zual dawnin ka hria a, Mahriati chu a rang lamin ka kalpui nghal dawr dawr a.
Tlai dar 5:00pm vel a ni tawh a, Durtlang lam aṭang chuan dum chhah zet hi a rawn let tup tup a. Ruah pawh fang lian tak takin a rawn tla deuh nghal phuar phuar bawk a, tawm hulna tur zawn a ngai ta. Mahriati chu ka kai a, kan hmaa dawr lian ve tak veranda-ah chuan ka tlan chhoh pui nghal vat a. Ruah chuan min lo nan huh ve nual hman tawh a, kan kawr te chu a huh phuar mai a. Ruah lah chu in thlahrunna nei lek lovin a sur buan buan mai bawk si. Chu dawr lian tak veranda-ah chuan rei ngial kan din hnu chuan, Dawr chhung aṭang chuan vai pa lian tak mai 1 hi a rawn tei chhuak a,"Mami, nangmahni hetah lo lut rawh se. Ruah sur nasa lutuk lawm, nangmahni huh jawr bek mai ang,"tiin an dawr chhunga lut tur chuan min rawn sawm a.
Mahriati chuan,"A ngai love, kan lawm e,"tiin a lo chhang vat a. Chu vaipa chuan nui sâng hian,"Ruah chu sur tam lutuk lawm, nangmahni kha dam lo mai dawn sin,"a rawn ti leh a. Chutah Mahriati chuan,"Kan duh lo kan tih mawlh mawlh chu maw le aw,"tiin vin deuh hian a chhang a. Chutah zet chuan chu vaipa pawh chuan engmah a sawi zawm ngam tawh lo, ngawi rengin dawr chhungah a lut ve leh mai bawk a. Mahriati chu ka en a, vawt a tih vang in a hmui a lo duk vek tawh chu niin,"Mahriat, i awmdan hi a dik miah lo a nia aw. I khua a sik a nih hi,"a chal chu ka han dek a, a lo sa vur mai a. Mahriati chuan nui chungin,"Engmah ni lo, ka ṭha ve leh mai ang,"tiin min chhang mah se, a ṭhat loh zia hre chiangtu ber ka ni si.
Mahriati hmui chu a khur a che dat dat a,"Ka ṭha lawm,"a rawn ti leh a; mahse, a ṭha hauh si lo. Ka mangang chuan dawr chhunga vaipa chu ka han ko ta nge nge a. Vaipa pawh chu min pui tur chuan a rawn kal ve mai a, Mahriati chu a tlun ti tih ta mai si. Ka hlauthawng takzet a ni, ka rilru in ka ṭawngṭai mawlh mawlh a,"Aw Lalpa, khawngaihin min ṭanpui mawlh teh. Aw Lalpa, engkim ti thei i nih zia kha rawn lan tir ang che aw,"tiin Pathian hnenah ka dil mawlh mawlh a. Mahriati khawsik chu a sang kher mai, vaipa chuan,"Amah hi khuasik nasa lutuk lawm. Amah chu Hospital-ah kal pui mai ang,"a ti a, a mangang ve kher mai. Mahriati chu Damdawi In lamah kan tlan phei pui nghal a.
Damdawiin kan thlen chuan Doctor leh Nurse ho chuan an lo buaipui nghal zung zung a, nurse 1 chuan Damdawi lehkha hi min rawn pe a,"Kha heng ho hi i lo zu lei dawn nia aw. A khawsik hi a sang ang reng a, a bak chu a ṭha e,"a rawn ti a. Lehkha chu ka la a; mahse, pawisa dere pawh ka nei si lo. Khawiahnge a pil bo tak pawh ka hre lo, damdawi chu engtinnge ka lei tak ang? Rilru a van buai tak êm! Vaipa lah chu kei ai aiin a mangang emaw tih mai tur hi a ni a. Min rawn pan a,"Nangmah damdawi lei dawn chuan, keimah pawisa nei lawm. Hei keimah pawisa hi hmang thei ang,"tiin ₹500 note 2 hi min rawn pe a. Lak loh duh sateh mah ila, lak loh theih a ni si lo. Mahse, vaipa pawisa ka hman chu engtinnge ka rulh leh ang? Eng pawh nise, ka ṭhiannu nunna chu a pawimawh ber si a. Hmanhmawh takin Damdawiin Canteen lamah chuan ka chhukthla hlawk hlawk a. Damdawi lei tur an ziah ho chu ka lei a, a vaiin ₹650 man a ni a, ka rin aiin a tlawm hlawm a.
Hmanhmawh zetin Casualty lamah chuan ka chho leh a. Vaipa chuan Mahriati chu a lo ṭhut chilh ve ran bawk a, ka Damdawi lei chu Doctor hnenah ka pe a. Doctor chuan Damdawi lehkhaah eng eng emaw hi a ziak malh malh a,"A khawsik hi a la reh hlei thei lova. Nachhawkna kan pe tawh a, ngaihṭhat lohna tur engmah a awm lo a nia aw,"tiin lehkha chu min pe a,"Ei dan tur chu hetah hian ka ziak vek aw,"a ti a, Damdawi ka lei ho leh damdawi lehkha chu min pe let leh a.
Casualty-ah chuan rei tawk fang kan awm hnuah, min chhuah tir ta a. Casualty aṭanga kan chhuah chuan zan dar 7:00pm a ri der tawh a, ruah chu sur tawh lo mah se, boruak erawh a vawt vur mai. Vaipa chuan,"Nangmahni khawnge awm sawi la, keiman thlah ang che,"tiin a motor awmna lamah chuan kan inzui thla hnak hnak a.
"Aaah iih eng lo,"ka ngawi leh rih a. Motor chhungah chuan kan in in zui lut leh a. Mahriati chuan chau tih hriat takin min rawn en a,"Ka lawm lutuk aw,"a ti a, a rawn nui suk a. Engtinmah ka chhang lo, a kutah ka vuan a ka kuah hle hle a.
Nichina ka damdawi leina bang kha vaipa hi ka pe miah lo tih ka hre chhuak chiah. A van zia lo ṭhin tak,"Bhaia, nichina keimah damdawi leina bang kha hei aw,"tiin pek ka tum a. Mahse, chu vaipa chuan a lo la duh hauh lova,"Nangmah ta vek tur nihkha, pawisa chu keimah dang nei lawm,"a lo ti mai a. Mahse, in pek tawp chu ṭha ka ti lo mai ni lovin, ka duh lo a ni,"Ni love, nangman nei tur lawm,"tiin pek let tum sateh mah ila, a la duh tlat si lova.
Tih ngaihna dang awm hek lo le, pawisa chu ka kekawr ipteah ka ak ve ta ringawt a,"Bhaia, keimahni kha lawm lutuk aw. Nangmah khan keimahni kha nasa takin pui lawm, keimahni chu lawm lutuk aw,"tiin lawmthu ka sawi ve mawlh mawlh a. Vaipa chuan,"Nangmahni chu khawi vengah nge awm sawi la, keimah chuan thlah mai ang,"a ti leh a. Chhan dan tur a vang hle mai,"Keimahni chu Khatla-ah awm a, Khatla kawnah drop mai dawn nia,"tiin dawt ka sawi tawp mai a. Vaipa chu a ngawi vang vang a,"Keimah nangmahni kha hria lawm. Keimah khan whatsapp-ah hmu lawm, nangmahni Police in man a. Mahse, chhuah leh mek tih pawh sawi bawk lawm,"a ti ta mai. Mak ka ti kher mai, chhan ngaihna pawh ka hre lo, ka ngawi ta reng a. Amah bawk chuan,"Nangmahni khan awmna neih loh chuan ka Inah awm thei ang. Keimah hming chu Sharma a ni a, keimah In chu Jarkawt ah awm a,"a ti suam suam a.
Chu vaipa hnenah chuan kal mai tur nge? Engtia awm tur nge pawh ka hre lo. Mahriati chuan ka beng bulah chuan,"Ani hi pan tawp ila, a bak chu a tla chawpin khawsa naw naw mai ang. Tun dinhmunah chuan awmna tur hmun kan mamawh a ni,"tiin zawi te hian a rawn ti a. Chutianga Mahriati berin a tih takah chuan ka lo hnial duh bik lova,"Awle, Bhaia nangmah Inah chuan keimahni awm ang aw,"tiin ka lo chhang nghal vat a. Sharma(Sharma tiin ka sawi tawh mai ang) chuan a lu buk nghut nghut pahin,"Awle, keimahni Dawrah kal leh phawt ang a. Nangmahni pawh thuamhnaw te thar ha ang a, chumi jawhah keimahni in phei dawn nia,"a ti a, kan ti ti phei mawlh mawlh lai chuan Sharma te dawr chu kan thleng phei ta a.
Sharma te dawr hi Hard Ware lam pang a ni a, an dawr piah deuh lawkah hian thuamhnaw dawr lian ve ang reng deuh a awm bawk a. Chu chu Sharma ṭhianpa dawr a ni, chu dawr neitu erawh chu Mizo tlangval a ni thung a. An dawr kan thlen chuan Sharma chuan ṭhu turin min hrilh a, ṭhutna lo awm ah chuan kan ṭhu nghal a.
Sharma ṭhianpa dawrah chuan min phei pui a, kan thuamhnaw huh hnuang chu kan inthlak ta a. Sharma ṭhianpa chuan min en chîk viau mai a,"Mr. Sharma, zanin chu i buai dawn hle mai a,"tih pahin a nui suk a. A mit meng hur hmel zet chu ka haw hle mai, Mr. Sharma chuan,"Keimah chu buai lutuk lovang. Keimah khan ṭhian thar nei a, kan Inah rei lo te chhung awm ang,"a lo ti ve mai a.
Kan inthlak fel hnu chuan Sharma chuan min chhuahpui a, a dawr a khar a, a hnathawk ho hnenah chuan zing dar 7:00am velah dawrah a kal tur thu a hrilh a. Chumi hnu chuan a chenna In lam panin kan in phur phei leh ta a.
Sharma In chu a zau nuam kher mai, amah chauha cheng a ni tih hriat takin a In chhung chu a reh hle mai. Mipa mahni chauha chenna e ti lo chuan, a In chhung leh a chhe vel chu a fai in a thianghlim kher mai. Sharma chuan,"Hetah hian keimah chiah cheng a, keimah nu leh pa chu Silchar-ah awm a. Keimah chuan unau nei lova, hetah in duh chen chen awm thei ang,"tiin kan room tur te chu min kawh hmuh nghal zung zung a. Chaw kan la ei loh vangin amah Sharma chuan ei rawng a bawl nghal mawlh mawlh a, tih pui ve kan tum pawn a duh hauh lo mai.
Sitting room-ah chuan Mahriati nen kan ṭhu dun a,"Te, hetiang em em a kan chunga a ngilnei hi mak i ti em? Hnam dang leh nghal,"a rawn ti zawi sap a.
"Nia, mak ve tak chu a ni,"ka lo ti ve bawk a.
"I rin zawng a ni em?,"Mahriati chuan a rawn ti hlawl mai a.
"Ka hre lo le? Ngatinge?,"ka lo ti ve vat a.
"Hetiang em em kan chunga a ṭhat chhan hi eng emaw chhan ṭha tak vang a nih ka ring. Naktuk lamah he lai hmun hi chhuahsan dan ngaihtuah ila a ṭhat ka ring,"a ti ta mai a, a hmelah chuan ngaihṭhat lohna a rawn lang nghal a.
"Ni e, hriatthiam a har khawp mai. Mahse, zanin na na na chu nangma hahdam nan hrim hrim pawh awm ve phawt ila, a pawi dawn em ni le?,"ka tih chuan Mahriati pawh chuan min hnial bik lova.
Zan dar 8:00pm velah zan riah kan kil ho ta a. Sharma ei siam chu a tui dangdai kher mai, dar 9:00pm velah chuan mut chhuakin min rawn zem ṭan ta. Ka chauh vang a nih ka ring deuh a, ṭhutthleng ah chuan ka muthlu ta nge nge a. Ka bula ṭhu Mahriati pawh chu mut chhuak lutukin a lo muthlu ve ngawih ngawih bawk a, rei lo te hnuah ka khaw hmuh a fiah lo ṭan a. Engkim mai chu ka hmu phê ruai mai a,"Ka pi, nangmah muhil tawh ni maw?,"ti a Sharma min rawn biakna chu ka hre vuai vuai a, a bak ka hre chhunzawm thei ta lo.
Ka harh leh chuan Mahriati chu ka bulah ruak vekin a lo mu a. A la muhil tui kher mai, phawk fê hian Mahriati chu ka en a. Kei pawh ka bang bik lo, ka taksaah chuan eng thuamhnaw mah ka inbel reng reng lo. Eng nge kan chunga thleng ta hi? Khawnge Sharma kha? Ka hawi vel ruai a, midang tumah ka hmu lo. Mahriati chu ka sawi nawk nawk a,"Mahriat, harh teh thil thlen dan hi a dik lo tawp mai,"ka ti a, hlauhthawnna chuan min rawn man nghal a. Ka khur chhia chu a ni deuh mai, Mahriati pawh chu a rawn harh ve ta. Kan awmdan a rawn hmuh chuan a mangang ve kher mai,"Te, eng thil nge thleng hi?,"a ti chûl mai a. Ka kuah a,"Engmah ka hrethiam bik lo. Mahse, kan zahawmna tih chhiatsak kan ni tih erawh chiang takin ka hria,"ka rilru chu a na kher mai. Ka biangah chuan mittui a luang ngiai ngiai a, Mahriati pawh lungchhe takin a in hnit ve faih faih bawk a. Tumah in hnem thei bik kan awm lo, kan inkuah a lungchhe takin kan ṭap dun vawng vawng mai a.
Chu pindan reh ruih chhungah chuan Mahriati nen chuan puanvar pan tak sin chungin Khumah kan ṭhu ngawi reng a. Kan chunga thil thleng chu hriatthiam harsa kan tiin nâ kan ti hle mai; mahse, thlak danglam theih a ni tawh si lo. He hun rapthlak tak rawn thleng tur hi hre lawk ni ila, kha vaipa kha kan zui hauh lo tur a nia. Mahse, mihringte hian kan hma hun kan hre si lo.
Zing dar 6:30am velah chuan Sharma chu room-ah chuan a rawn lut a. Mahriati chuan Sharma rawn lut chu a bula lukham chuan a lo vawm nghal pawp mai a,"Zawng chhepa, nang hian min lo bum reng a maw? I châk lo khawp ang,"tih pahin Khum aṭang chuan a zuang tho a. Sharma chu a bawhthlu nghal ṭhuai a, chutah kei chuan ka pui ve nghal vat a.
Sharma chu rei lo te ah kan tukzal thei ta, a kut chu kan hnung khirh a. Khum bula Chair-ah chuan kan ṭhut tir a,"Zawnga, heng hi engvanga ti nge i nih a? Police man tir i duh em?,"tiin Mahriati chuan a ânkhum nghal phiar phiar bakah a hmaiah a beng bawk a. Sharma chuan,"Police chu keimah hlau lo, nangmah Police hnenah kal chuan nangmahni sex video kha thehdarh mai ang,"nui sûng chuan a la rawn ti ham ham zui a.
"Zawnga, eng sex video nge i sawi chu?,"Mahriati chu a thinrim kher mai. Sharma chuan nui sûng chungin,"Nakinah nangmah ngeiin en dawn nia. Nangmahni ka thu awih loh chuan Joram pumin nangmahni sex video kha hmu ang,"a ti zuah zuah a. A thinrim thlak duh kher mai,"Eng thil nge i tih chiah hi sawi teh,"Mahriati chuan a ti leh a.
Comments